ប្រទេសកាណាដា ៖ ភ្លើងឆេះព្រៃនៅប្រទេសកាណាដាបានរាលដាលរហូតដល់១.១០០កន្លែងហើយនៅឆ្នាំ២០២៣ នេះ ។ ភ្លើងនៅតែបន្តឆេះព្រៃចំនួនជាង៨៨០កន្លែង ក្នុងនោះ១១០កន្លែង គេមិនអាចគ្រប់គ្រងបានទេ ចំណែកផ្ទៃដីចំនួន២៥លានរ៉ៃត្រូវបានភ្លើងឆេះម៉ត់ ។ វាជាគ្រោះមហន្តរាយធ្ងន់ធ្ងរបំផុតក្នុងរយៈពេល៤០ឆ្នាំ ខណៈកាណាដាមានអាកាសធាតុក្តៅ និងគ្រោះរាំងស្ងួត ហើយកាណាដាបានអំពាវនាវឱ្យប្រទេសនានាបញ្ជូនមន្ត្រីពន្លត់ភ្លើងមកកាណាដាបន្ថែមទៀត ។

ការិយាល័យគ្រប់គ្រងភ្លើងឆេះព្រៃនៅរដ្ឋ British Columbia របស់កាណាដា បានរាយការណ៍ថា ភ្លើងឆេះព្រៃសរុបមានចំនួន១.១០០កន្លែងនៅឆ្នាំ២០២៣ ក្នុងរដ្ឋ British Columbia ហើយវាខ្ពស់ជាងចំនួនភ្លើងឆេះព្រៃរយៈពេល១០ឆ្នាំ ដែលបានកើតឡើងចំនួន៦២០កន្លែង ។

នៅពាក់កណ្តាលខែកក្កដា ឆ្នាំ២០២៣ មានភ្លើងឆេះព្រៃថ្មីៗចំនួន២៣៩កន្លែងនៅរដ្ឋ British Columbia ហើយធ្វើឱ្យភ្លើងឆេះព្រៃក្នុងរដ្ឋនេះកើនឡើងសរុប៣៧៣កន្លែង ក្នុងនោះ១១០កន្លែងមិនអាចគ្រប់គ្រងបានទេ ។ ចំណែក២៣កន្លែងទៀត គេបានប្រុងប្រយ័ត្នជាពិសេស ព្រោះវាបង្កផលប៉ះពាល់ដល់សុវត្ថិភាពសាធារណៈ គំរាមកំហែងទីប្រជុំជន ពលរដ្ឋ និងហេដ្ឋារចនាសម្ព័ន្ធសំខាន់ៗ ។

មជ្ឈមណ្ឌលកិច្ចការភ្លើងឆេះព្រៃប្រទេសកាណាដាបញ្ជាក់ថា ពេលនេះ នៅទូទាំងប្រទេសកាណាដាមានភ្លើងឆេះព្រៃសរុប៨៨១កន្លែង ហើយហេតុការណ៍នេះធ្ងន់ធ្ងរបំផុត គិតចាប់ពីឆ្នាំ១៩៨២ មក ។ ស្ថានការណ៍ធ្ងន់ធ្ងរបំផុត គឺនៅរដ្ឋ British Columbia និងរដ្ឋ Quebec ហើយរដ្ឋ Northwest Territories ក៏មានភ្លើងឆេះព្រៃដែរ ។ ចំណែកស្ថានការណ៍ភ្លើងឆេះព្រៃនៅរដ្ឋ Alberta គេអាចគ្រប់គ្រងបានហើយ ។

មន្ត្រីអន្តរាគមន៍ភ្លើងឆេះព្រៃប្រចាំរដ្ឋ British Columbia ដាស់តឿនថា វាចាប់ផ្តើមមានអាកាសធាតុក្តៅ និងគ្រោះរាំងស្ងួត ទើបបណ្តាលឱ្យភ្លើងឆេះព្រៃកាន់តែរាលដាលខ្លាំងឡើង ។ គេរំពឹងថា ភ្លើងឆេះព្រៃនឹងកាន់តែខ្លាំងក្លានៅខែកក្កដា រហូតដល់ខែសីហា ឆ្នាំ២០២៣ ។ ប៉ុន្តែពេលនេះ គ្មានអ្នកណាដឹងថា ភ្លើងឆេះព្រៃនឹងបញ្ចប់នៅពេលណាទេ ។

អាជ្ញាធរប្រចាំរដ្ឋ British Columbia បានស្នើសុំការជួយសង្គ្រោះពីប្រទេសនានា ដោយសុំឱ្យបញ្ជូនមន្ត្រីពន្លត់ភ្លើងចំនួន១.០០០នាក់បន្ថែមទៀតមកកាន់ទីនេះ ព្រោះបច្ចុប្បន្ន មានមន្ត្រីពន្លត់ភ្លើងនៅកាណាដាចំនួន១៨០នាក់មកពីអាមេរិក ម៉ិកស៊ិក និងអូស្ត្រាលី ។ អាជ្ញាធរប្រចាំរដ្ឋនេះ ក៏បានសុំការជួយសង្គ្រោះពីរដ្ឋាភិបាលកណ្តាលផងដែរ ដើម្បីបញ្ជូនកងទ័ពកាណាដាមកជួយពន្លត់ភ្លើង ៕ ប្រភព ៖ TNN World

គ្រោះមហន្តរាយធម្មជាតិជំនន់ទឹកភ្លៀងនិងការបាក់ដីនៅប្រទេសកូរ៉េខាងត្បូងបានបង្កឱ្យខូចខាតទ្រព្យសម្បត្តិទាំងសាធារណៈនិងឯកជន មិនត្រឹមតែប៉ុណ្ណោះគ្រោះធម្មជាតិនេះក៏បានផ្តាច់ជីវិតមនុស្សជាច្រើននាក់ផងដែរ។ ទន្ទឹមនឹងប្រទេសជាតិជួបវិបត្តិ តារាចម្រៀង និងសម្តែងដ៏មានប្រជាប្រិយភាព Suzy មិនបង្អង់ពេលយូរចូលរួមបរិច្ចាគថវិកាផ្ទាល់ខ្លួនទៅដល់ជនរងគ្រោះផងដែរ។

តាមការចុះផ្សាយរបស់គេហទំព័រ allkpop នៅថ្ងៃទី១៩ ខែកក្កដា Suzy បានបរិច្ចាគថវិកាចំនួន ១០០ លានវ៉ុន (ជិត៨ម៉ឺនដុល្លារ) ដល់សមាគមសង្គ្រោះគ្រោះមហន្តរាយជាតិនៃស្ពានសង្ឃឹម ក្នុងគោលបំណងជួយដល់ជនរងគ្រោះដែលរងផលប៉ះពាល់ដោយទឹកជំនន់នាពេលថ្មីៗនេះ។

គួរបញ្ជាក់ផងដែរថា ជាញឹកញាប់នៅពេលប្រជាជនកូរ៉េជួបបញ្ហានានា Suzy ជាតារាស្រីម្នាក់ដែលមានចិត្តសប្បុរសធម៌តែងតែចូលរួមបរិច្ចាគ។ ក្នុងឆ្នាំ ២០១៩ នាងបានផ្តួចផ្តើមការបរិច្ចាគដើម្បីជួយដល់អ្នកដែលរងផលប៉ះពាល់ដោយភ្លើងឆេះព្រៃនៅ Gangwon ហើយក៏ធ្លាប់បរិច្ចាគ ជួយជនរងគ្រោះដោយទឹកជំនន់នាពេលកន្លងមកជាញឹកញាប់ផងដែរនៅពេលមានគ្រោះមហន្តរាយនានា៕

បរទេស៖ យោងតាមប្រភព Insider កាលពីថ្ងៃទី១៧ ខែកក្កដា បានឱ្យដឹងថា សេដ្ឋកិច្ចរុស្ស៊ីបច្ចុប្បន្នមានការធ្លាក់ចុះយ៉ាងខ្លាំង បន្ទាប់ពីមានការវាយប្រហារកាលពីឆ្នាំមុន លើអ៊ុយក្រែន និងត្រូវបានដាក់ទណ្ឌកម្មសេដ្ឋកិច្ចដោយសហរដ្ឋអាមេរិក និងបណ្តាប្រទេសលោកខាងលិច។
លោក Volodymyr Lugovskyy សាស្ត្រាចារ្យផ្នែកសេដ្ឋកិច្ចនៅសាកលវិទ្យាល័យ Indiana បាននិយាយថា “ប្រទេសរុស្ស៊ីអាចនឹងធ្លាក់ចូលទៅក្នុងបំណែកដូចជាសហភាពសូវៀត ហើយនោះប្រហែលជារឿងអាក្រក់មួយសម្រាប់ពិភពលោក” ។ ដូចនេះសេដ្ឋកិច្ចរុស្ស៊ីកាន់តែអាក្រក់ទៅៗ ដោយផ្អែកលើស្ថិតិទាំងប្រាំដូចខាងក្រោម៖

១.រូបិយប័ណ្ណរុស្សីខ្សោយ៖ កាលពីខែមិថុនាកន្លងទៅ តម្លៃនៃប្រាក់រូប្លិតរបស់រុស្សីបានធ្លាក់ចុះជាង ៦.៨% ហើយមកដល់ពេលបច្ចុប្បន្ននេះវាបានធ្លាក់ចុះជាង ៣៥% ដោយសារអស្ថិរភាពភូមិសាស្ត្រនយោបាយនៅក្នុងប្រទេស នឹងធ្វើឱ្យវាមានភាពប្រែប្រួលច្រើន។

២.សមតុល្យគណនីចរន្តធ្លាក់ចុះ ៩៣%៖ យោងតាមទិន្នន័យពីអង្គការសហប្រជាជាតិរបស់ធនាគារកណ្តាលនៃប្រទេសរុស្ស៊ី បានឱ្យដឹងថា នៅក្នុងត្រីមាសខែមេសាដល់ខែមិថុនា ប្រទេសរុស្ស៊ីមានអតិរេកគណនីចរន្តចំនួន ៥.៤ ពាន់លានដុល្លារ បានធ្លាក់ចុះ ៩៣ ភាគរយពីកំណត់ត្រាចាស់បើប្រៀបធៀបរយៈពេលដូចគ្នាកាលពីឆ្នាំមុនគឺ ៧៦.៧ ពាន់លានដុល្លារ។

៣.ការធ្លាក់ចុះនៃការលក់ថាមពល៖ យោងតាមក្រសួងហិរញ្ញវត្ថុរុស្ស៊ីបាននិយាយកាលពីខែមិថុនា ថា ប្រាក់ចំណូលពីពន្ធប្រេង និងឧស្ម័នបានធ្លាក់ចុះ ៣៦% ធៀបនឹងឆ្នាំមុន ខណៈដែលប្រាក់ចំណេញពីប្រេងឆៅ និងផលិតផលប្រេងបានធ្លាក់ចុះ ៣១% ។

៤.ការលក់រថយន្តរុស្ស៊ីបានធ្លាក់ចុះ៖ មុនពេលមានការវាយប្រហារជាមួយអ៊ុយក្រែន រថយន្តប្រហែល ១០០,០០០ គ្រឿងត្រូវបានលក់ជារៀងរាល់ខែនៅទូទាំងប្រទេសរុស្ស៊ី នេះបើយោងតាមទិន្នន័យស្រាវជ្រាវរបស់ Yale ដែលបានចែករំលែកជាមួយ Insider ។ ប៉ុន្តែបច្ចុប្បន្ននេះ ការលក់ទាំងនោះបានធ្លាក់ចុះមកត្រឹមប្រហែលមួយភាគបួន ដោយសារតម្លៃឡើងថ្លៃ បូករួមនឹងកង្វះការផ្គត់ផ្គង់ផងដែរ។

៥.ការចំណាកស្រុក៖ យោងតាមទិន្នន័យ Yale បានឱ្យដឹងថា ជនជាតិរុស្ស៊ីរាប់លាននាក់បានធ្វើចំណាកស្រុកចាប់តាំងពីការចាប់ផ្តើមនៃសង្រ្គាមក្នុងប្រទេសអ៊ុយក្រែន ដែលប្រជាជនជាង ៤០ ម៉ឺននាក់បានចាកចេញទៅនៅ ប្រទេសដូចជា អាមេនី ហ្សកហ្ស៊ី និងកៀហ្ស៊ីស៊ីស្ថាន៕ ប្រភព៖cafef.com

ប្រទេសថៃ ៖ គណបក្សភូមិចៃថៃបានលើកឡើងថា មិនឯកភាពក្នុងការបង្កើតរដ្ឋាភិបាលដែលទទួលបានសំឡេងឆ្នោតតិច ហើយគណបក្សនេះនឹងគោរពតាមសំឡេងឆ្នោតរបស់ពលរដ្ឋ ។ គណបក្សនេះលើកឡើងទៀតថា នឹងត្រៀមប្រជែងយកអាសនៈនាយករដ្ឋមន្ត្រីប្រទេសថៃ ប្រសិនបើគណបក្សលំដាប់ទី១ និងលំដាប់ទី២ បង្កើតរដ្ឋាភិបាលមិនបានសម្រេច ។

កាលពីថ្ងៃទី១៨ ខែកក្កដា កន្លងមក លោក Chada Thaised សមាជិកសភាប្រចាំខេត្តឧទ័យថានី និងជាអនុប្រធានគណបក្សភូមិចៃថៃ បានលើកឡើងថា ការបោះឆ្នោតជ្រើសរើសបុគ្គលសាកសមសម្រាប់កាន់តំណែងជានាយករដ្ឋមន្ត្រីប្រទេសថៃ គឺត្រូវឱ្យគណបក្សកាវក្លៃ ដែលទទួលបានសំឡេងឆ្នោតច្រើនលំដាប់ទី១ បង្កើតរដ្ឋាភិបាលសិន ហើយបើបង្កើតរដ្ឋាភិបាលមិនបានទេ ត្រូវទុកឱកាសឱ្យគណបក្សលំដាប់ទី២ គឺគណបក្សភឿថៃ ។ ប៉ុន្តែបើគណបក្សភឿថៃមិនអាចបង្កើតរដ្ឋាភិបាលបាន វាជាឱកាសរបស់គណបក្សផ្សេងទៀត ។ គណបក្សភូមិចៃថៃ បានត្រៀមខ្លួនរួចជាស្រេចក្នុងការបង្កើតរដ្ឋាភិបាល បើគណបក្សទាំងពីរនេះធ្វើមិនបានសម្រេច ។

លោក Chada Thaised អនុប្រធានគណបក្សភូមិចៃថៃ លើកឡើងថា ៖ «ពិន្ទុដែលគណបក្សកាវក្លៃទទួលបាននេះ មិនមែនជាពិន្ទុឈ្នះដាច់ទេ និងគ្មានសិទ្ធិផ្តាច់មុខធ្វើជានាយករដ្ឋមន្ត្រីតែឯងទេ ប៉ុន្តែវាជាគោលការណ៍របស់អ្នកនយោបាយដែលទុកឱកាសឱ្យគណបក្សលំដាប់ទី១ សិន ។ បើតាមច្បាប់មិនបានកំណត់ថា គណបក្សលំដាប់ទី១ ត្រូវតែធ្វើជានាយករដ្ឋមន្ត្រី ហើយគណបក្សផ្សេងៗមិនអាចធ្វើនាយករដ្ឋមន្ត្រីនោះទេ» ។

ទោះយ៉ាងណា លោក Chada Thaised បានបដិសេធមិនបញ្ចេញយោបល់ ប្រសិនគេដាក់ឈ្មោះលោក Pita Limjaroenrat មេដឹកនាំគណបក្សកាវក្លៃ ធ្វើជាបេក្ខជននាយករដ្ឋមន្ត្រីម្តងទៀត ព្រោះលោកមិនមែនជាអ្នកច្បាប់ ប៉ុន្តែគ្រប់គ្នាក៏មានគោលជំហរក្នុងចិត្តរួចហើយ តើអាចដាក់ឈ្មោះលោក Pita ដូចមុនឬក៏អត់ គឺត្រូវស្តាប់សេចក្តីសម្រេចរបស់គណបក្សជាមុន ។

ប៉ុន្តែសម្រាប់លោកមើលឃើញថា ច្បាស់ហើយដែលត្រូវដាក់ឈ្មោះលោក Pita ជាបេក្ខជនក្នុងការបោះឆ្នោតជ្រើសរើសនាយករដ្ឋមន្ត្រី នៅថ្ងៃទី១៩ ខែកក្កដា និងគ្មានអ្វីផ្លាស់ប្តូរទេ ។ បច្ចុប្បន្ននេះ មិនទាន់មានមន្ត្រីតំណាងមកពី៨គណបក្សរួមគ្នាបង្កើតរដ្ឋាភិបាលមកសុំសំឡេងគាំទ្រពីលោកទេ ហើយលោកមិនប្រាកដទេថា ពួកគេបានទំនាក់ទំនងជាមួយថ្នាក់ដឹកនាំក្នុងគណបក្សដែរឬអត់ ។

លោកបន្តថា ៖ «យើងបានបោះឆ្នោតគាំទ្រគាត់ហើយកាលពីថ្ងៃទី១៣ ខែកក្កដា ប៉ុន្តែគាត់មិនទទួល ហើយយើងក៏មិនដឹងថាយ៉ាងម៉េចដែរ ។ យើងគាំទ្រគណបក្សកាវក្លៃ ក្នុងលក្ខខណ្ឌមិនពាក់ព័ន្ធនឹងមាត្រា១១២ គឺគណបក្សភូមិចៃថៃនឹងបោះឆ្នោតគាំទ្រ និងមិនចូលរួមជាមួយរដ្ឋាភិបាល ។ រឿងនេះបានបញ្ចប់តាំងពីថ្ងៃនោះមកម៉្លេះ សំណើរបស់យើងចប់ហើយ ប៉ុន្តែគាត់មិនទទួល» ៕ ប្រភព ៖ chiangmai news

បរទេស៖ យោងតាមប្រភពព័ត៌មាន Live Science ដែលបានរាយការណ៍កាលពីថ្ងៃទី ១៦ ខែកក្កដាថា រន្ទះបានជ្រាបចូលទៅក្នុងខ្លួនមនុស្សរយៈពេលមួយវិនាទី ហើយប្រហែល ៩០% នៃមនុស្សត្រូវបានបាត់បង់ជីវិត។

មនុស្សភាគច្រើនដែលស្លាប់ដោយសាររន្ទះបាញ់គឺជាការស្លាប់ភ្លាមៗដោយការគាំងបេះដូង ពីព្រោះវ៉ុលខ្លាំងរបស់រន្ទះធ្វើឱ្យរំខានដល់ចង្វាក់បេះដូងធម្មជាតិ។ ផ្លេកបន្ទោរក៏អាចបណ្ដាលឱ្យជនរងគ្រោះខ្ទេចត្រចៀក ដោយសាររលកសម្ពាធ ធ្វើឱ្យប្រព័ន្ធផ្លូវដង្ហើម ខ្វិន ឬបណ្តាលឱ្យរលាកបន្ទាប់បន្សំទៅនឹងសក់ឆេះ ឬសម្លៀកបំពាក់ខូចខាតជាដើម។

ទោះជាយ៉ាងណាក៏ដោយ មានមនុស្សភាគតិចណាស់ដែលបានរស់រានមានជីវិតដោយសាររន្ទះបាញ់ ប៉ុន្តែអ្នកនៅរស់រានមានជីវិតទាំងនោះអាចជួបប្រទះបញ្ហាជាច្រើនដូចជា ការខូចខាតសរសៃប្រសាទ ជំងឺស្ត្រេសក្រោយការប៉ះទង្គិចផ្លូវចិត្ត រលាកស្បែក និងមានរូបរាងនៃផ្កាផ្លេកបន្ទោរនៅលើស្បែកជាដើម។

លោក Mary Ann Cooper អ្នកជំនាញសុវត្ថិភាពរន្ទះនៅ National និងជាសាស្ត្រាចារ្យផ្នែកវេជ្ជសាស្ត្រសង្គ្រោះបន្ទាន់នៅសាកលវិទ្យាល័យ Illinois បាននិយាយថា យើងមិនច្បាស់ទេថាតើរោគសញ្ញាទាំងនេះ កើតឡើងដោយរបៀបណានោះទេ ដោយសារតែចំនួនតិចតួចនៃរន្ទះបាញ់ និងការខ្វះខាតថវិកាសម្រាប់ស្រាវជ្រាវ។ ទោះជាយ៉ាងណាក៏ដោយ អ្នកជំនាញជឿថា មូលហេតុនៃរោគសញ្ញាទាំងនេះ គឺអាចមកពីការរំខានដល់ជាលិកាដែលបណ្តាលមកពីរន្ទះ រួមផ្សំជាមួយនឹងរបួសត្រង់ៗ នឹងបណ្តាលមកពីការផ្លាស់ប្តូរសម្ពាធបរិយាកាសភ្លាមៗផងដែរ។ ដូចនេះ មនុស្សដែលធ្លាប់បានរន្ទះបាញ់ អាចមកពីចរន្តដីនៅក្បែរនោះ ឬកំពុងឈរក្បែរវត្ថុមួយដែលត្រូវបានរន្ទះបាញ់ជាដើម៕ ប្រភព៖vnespress

ប្រទេសថៃ ៖ អ្នកនាំពាក្យក្រសួងការបរទេសអាមេរិកបានលើកឡើងថា អាមេរិកបារម្ភអំពីការវិវឌ្ឍក្នុងប្រព័ន្ធច្បាប់ប្រទេសថៃ ក្រោយពីមេដឹកនាំគណបក្សនយោបាយដែលទទួលជោគជ័យក្នុងការបោះឆ្នោត និងទទួលបានសំឡេងឆ្នោតលំដាប់ទី១ ប៉ុន្តែពាក់ព័ន្ធនឹងពាក្យបណ្តឹងចំនួន២ករណីខុសៗគ្នា ។

កាលពីថ្ងៃទី១៧ ខែកក្កដា កន្លងមក សារព័ត៌មានរ៉យទ័របានរាយការណ៍ថា លោក Matthew Miller អ្នកនាំពាក្យក្រសួងការបរទេសអាមេរិកបានឆ្លើយតបនឹងសំណួររបស់អ្នកសារព័ត៌មាន ពាក់ព័ន្ធនឹងស្ថានការណ៍នយោបាយប្រទេសថៃក្រោយការបោះឆ្នោតថា រដ្ឋាភិបាលក្រុងវ៉ាស៊ីនតោនគ្មានទំនុកចិត្តសម្រាប់ការបោះឆ្នោតរបស់ប្រទេសថៃលើកនេះទេ ប៉ុន្តែអាមេរិកគាំទ្ររាល់ដំណើរការការងារដែលឆ្លុះបញ្ចាំងពីឆន្ទៈរបស់ពលរដ្ឋ ។

លោក Matthew Miller អ្នកនាំពាក្យក្រសួងការបរទេសអាមេរិកលើកឡើងថា ៖ «យើងកំពុងសង្កេតមើលស្ថានការណ៍យ៉ាងដិតដល់ក្រោយការបោះឆ្នោតនៅប្រទេសថៃ រួមទាំងអ្វីដែលបានកើតឡើងក្នុងដំណើរការផ្លូវច្បាប់កាលពីពេលថ្មីៗនេះផងដែរ ហើយពួកយើងមានការបារម្ភ» ។

សារព័ត៌មានរ៉យទ័របានរាយការណ៍ទៀតថា តុលាការធម្មនុញ្ញបានទទួលយកញត្តិរបស់លោក Pita Limjaroenrat និងគណបក្សកាវក្លៃដែលបានស្នើធ្វើវិសោធនកម្មច្បាប់ព្រហ្មទណ្ឌ មាត្រា១១២ ។ ចំណែកគណៈកម្មការរៀបចំការបោះឆ្នោតបានបញ្ជូនសំណុំរឿងទៅតុលាការធម្មនុញ្ញ ដើម្បីពិចារណាលើលោក Pita Limjaroenrat មេដឹកនាំគណបក្សកាវក្លៃ បានកាន់កាប់ភាគហ៊ុនប្រព័ន្ធផ្សព្វផ្សាយបំពាននឹងច្បាប់បោះឆ្នោត ។ ករណីទាំងពីរនេះធ្វើឱ្យគេបារម្ភថា លោក Pita Limjaroenrat អាចខ្វះខាតគុណសម្បត្តិធ្វើជាសមាជិកសភាតំណាងរាស្ត្រ ឬគណបក្សកាវក្លៃអាចត្រូវគេរំលាយ ដូចគ្នានឹងគណបក្សអនាគតថ្មី ធ្លាប់ត្រូវបានគេរំលាយកាលពីឆ្នាំ២០២០ ។

នៅពេលអ្នកសារព័ត៌មានសួរបន្ថែមពាក់ព័ន្ធនឹងករណីទាំងពីរនេះ លោក Matthew Miller អ្នកនាំពាក្យក្រសួងការបរទេសអាមេរិកបញ្ជាក់ថា ៖ «ខ្ញុំមិនចង់ទាយនោះទេ ហើយយើងត្រូវធ្វើដូចម្តេចជាមួយរឿងមិនទាន់កើតឡើង ។ ប៉ុន្តែស្ថានការណ៍នយោបាយដែលបានកើតឡើងនៅប្រទេសថៃនាពេលថ្មីៗនេះ គួរឱ្យបារម្ភ» ៕ ប្រភព ៖ Bangkok biznews

រដ្ឋធានីសេអ៊ូល៖ ស្របពេលប្រទេសកូរ៉េខាងត្បូង កំពុងតែរងគ្រោះ ដោយសារទឹកជំនន់ដ៏ធ្ងន់ធ្ងរ ដែលបានសម្លាប់មនុស្សជាង៤០នាក់ និង បង្កនូវការខូចខាតដល់ហេដ្ឋារចនាសម្ព័ន្ធមួយចំនួននោះ បែរជារលកកម្ដៅ វាយប្រហារ ទៅលើប្រទេសចិន តំបន់អឺរ៉ុប តំបន់សមុទ្រមេឌីទែររ៉ាណេ និង ផ្នែកជាច្រើនផ្សេងទៀត នៅលើពិភពលោក។

សារព័ត៌មានរបស់ចក្រភពអង់គ្លេស BBC បានចេញផ្សាយ នៅថ្ងៃអង្គារ ទី១៨ ខែកក្កដា ថា រលកកម្ដៅ កំពុងតែបន្តរាលដាលពាសពេញ នៅតំបន់ភាគខាងត្បូងទ្វីបអឺរ៉ុប ជាមួយនឹងសីតុណ្ហភាព នៅកណ្តាលមេឌីទែរ៉ាណេ ហើយគេរំពឹង ថា អាកាសធាតុក្ដី នឹងឡើងដល់កំពូល នៅថ្ងៃនេះ។ រីឯកោះ Sardinia របស់អ៊ីតាលី ត្រូវបានគេរំពឹងថា នឹងឡើងកម្ដៅ រហូតដល់កម្រិតខ្ពស់ ជាមួយនឹងសីតុណ្ហភាព ៤៦អង្សាសេ នៅរសៀល ថ្ងៃអង្គារ។ ទន្ទឹមគ្នានេះ អាជ្ញាធរ ក៏បានព្រមាន ថា កម្ដៅឡើងខ្លាំង អាចនឹងបន្តអូសបន្លាយ រយៈពេល១០ថ្ងៃទៀត នៅតាមតំបន់មួយចំនួនរបស់ប្រទេសអ៊ីតាលីប្រទេសអេស្បាញ បានប្រឈមមុខនឹងរលកកម្ដៅកើនឡើងជាប់ៗគ្នា ខណៈសីតុណ្ហភាព កាលពីម្សិលមិញ បានឡើង រហូតដល់៤៤អង្សាសេ នៅភាគខាងត្បូងរបស់ប្រទេសអឺរ៉ុបមួយនេះ។ រីឯសហរដ្ឋអាមេរិក នៅពាក់កណ្តាលអធ្រាត្រយប់ ថ្ងៃចន្ទ គឺសីតុណ្ហភាព នៅតាមស្ថានីយអាកាសធាតុ ស្ថិតនៅ Death Valley រដ្ឋកាលីហ្វ័រញ៉ា បានឡើង រហូតដល់៤៩អង្សាសេ។

បើទោះជាភ្លៀងបានធ្លាក់មកយ៉ាងខ្លាំង នាំមកជាមួយនឹងព្យុះទីហ្វុង Talim វាយលុកទៅលើឆ្នេរសមុទ្រ នាភាគខាងត្បូងរបស់ប្រទេសចិន យ៉ាងណាក្ដី ប៉ុន្ដែរលកកម្ដៅក៏កំពុងតែគ្របដណ្តប់ ទៅលើតំបន់មួយចំនួន នាភាគខាងជើងរបស់ប្រទេសមហាយក្សអាស៊ីមួយនេះ។

បើតាមការិយាល័យឧតុនិយមរបស់ចក្រភពអង់គ្លេស បានឱ្យដឹងថា កាលពីចុងសប្តាហ៍កន្លងទៅ ប្រទេសចិន បានកត់ត្រា អំពីសីតុណ្ហភាពឡើងខ្ពស់បំផុត មិនធ្លាប់មានពីមុនមក ដោយឡើងកម្ដៅ រហូតដល់ជាង៥២អង្សាសេ នៅក្នុងខេត្តស៊ីនជាង (Xinjiang)។ ជាមួយគ្នានេះ ក្រុងប៉េកាំង ក៏បានកត់ត្រាថ្ងៃដ៏ក្តៅបំផុត នៅក្នុងខែមិថុនា នៅក្នុងរយៈពេលជាង៦០ឆ្នាំ ដោយបារតឡើងដល់ ៤១,១អង្សាសេ។

ស្របគ្នានេះដែរ ប្រទេសជប៉ុន កាលពីថ្ងៃចន្ទ បានផ្អាកជាបណ្ដោះអាសន្ននូវព្រឹត្ដិការណ៍ក្រៅផ្ទះ ហើយសកម្មភាពមួយចំនួន បានបង្ហាញ ពាក់ព័ន្ធនឹងអាកាសធាតុក្តៅខ្លាំង។

ក្រសួងមហាផ្ទៃកូរ៉េខាងត្បូង បានបញ្ជាក់ ថា គ្រោះទឹកជំនន់ នៅក្នុងប្រទេសអាស៊ីបូព៌ាមួយនេះ បានសម្លាប់មនុស្ស ចំនួន៤១នាក់ និង ៩នាក់ផ្សេងទៀតកំពុងតែបាត់ខ្លួន។ ចំណែកប្រតិបត្ដិការសង្គ្រោះ និង រុករកមនុស្ស នៅក្នុងផ្លូវរូងក្រោមដី ប្រវែង៤៣០ម៉ែត្រ ស្ថិតក្នុងCheongju, ខេត្ត North Chungcheong បានបិទបញ្ចប់ កាលពីល្ងាចថ្ងៃចន្ទ ដោយបានរកឃើញសាកសពរបស់មនុស្ស ចំនួន១៤នាក់៕