ភ្នំឧត្តុង្គ ឬក៏គេច្រើនហៅថា ភ្នំព្រះរាជទ្រព្យ, ភ្នំអដ្ឋរស្ស មានទីតាំងស្ថិតនៅ ឃុំផ្សារដែក និងឃុំភ្នំបាត ស្រុកពញាឮ ខេត្តកណ្តាល និងមានចម្ងាយប្រហែល ៥១គីឡូម៉ែត្រ ពីរង្វង់មូលតាខ្មៅ។
ភ្នំនេះជារមណីយដ្ឋានបែបប្រវត្តិសាស្ត្រមួយ ព្រោះទីនោះ ធ្លាប់ជារាជវាំងចាស់អំឡុងឆ្នាំ ១៦១៨ និង១៨៦៦ មុនត្រូវបានប្តូររាជធានីទៅកាន់រាជធានីភ្នំពេញដោយព្រះបាទនរោត្តម នៅឆ្នាំ ១៨៦៦។ ភ្នំនេះជាទីកន្លែងសម្រាប់បញ្ចុះសពនៃព្រះរាជវង្សានុវង្ស និងជាកន្លែងដែលព្រះរាជាទ្រង់ព្រះរាជានុញ្ញាតអោយសាងសង់វត្ត និងព្រះវិហារ។
នៅលើកំពូលភ្នំក៏មានសំណង់ ប្រវត្តិសាស្ត្រមួយចំនួន ហើយនៅលើព្រះវិហារនោះក៏មានពុទ្ធបដិមាករ ធំហំដល់ទៅ ១៨ ហត្ត។ បច្ចុប្បន្នព្រះវិហារនេះ នៅសល់តែសរសរធំៗ ចំនួន៨ រីឯដំបូលវិញ ត្រូវបានបំផ្លាញនៅក្នុងសម័យខ្មែរក្រហមក្នុងឆ្នាំ១៩៧៧។
ប៉ុន្តែបើទោះបីជាមានសង្គ្រាមបំផ្លិចបំផ្លាញយ៉ាងណាក៏ដោយ ភ្នំឧត្តុង្គនៅមានសម្រស់ធម្មជាតិ និងទេសភាពល្អត្រកាល ជំនោរខ្យល់ល្អបរិសុទ្ធ ដែលអាចទាក់ទាញភ្ញៀវទេសចរជាតិ និងអន្តរជាតិបានយ៉ាងច្រើនថែមទៀតផង៕
