ប្រទេសឥណ្ឌា៖ អាគារ Surat Diamond Bourse មានតម្លៃ ២៨៨ លានដុល្លារ ជាមួយនឹងផ្ទៃដី ៦៦០,០០០ ម៉ែត្រការ៉េ ដែលវ៉ាដាច់មន្ទីរបញ្ចកោណរបស់សហរដ្ឋអាមេរិក ដើម្បីបង្កើតកំណត់ត្រាថ្មីសម្រាប់អគារការិយាល័យដ៏ធំជាងគេបំផុតនៅលើពិភពលោក។

យោងតាមប្រភពព័ត៌មាន CNN ដែលបានរាយការណ៍កាលពី ថ្ងៃទី ១៨ ខែកក្កដា ថា អាគារ Surat Diamond Bourse ស្ថិតនៅទីក្រុង Surat ក្នុងរដ្ឋ Gujarat ចម្ងាយ ២៤០ គីឡូម៉ែត្រ ភាគខាងជើងនៃទីក្រុង Mumbai ប្រទេសឥណ្ឌា។ អាគារនេះដែរ មាន ១៥ ជាន់ នឹងបានសាងសង់នៅលើផ្ទៃដីជាង ១៤ ហិកតា។ នៅក្នុងអាគារ Surat Diamond Bourse មានកំរាលឥដ្ឋថ្មម៉ាប និង atrium ពោរពេញដោយពន្លឺ ដែលភ្ជាប់ការិយាល័យជាង ៤,៧០០ នឹងអាចដំណើរការជាសិក្ខាសាលាខ្នាតតូចសម្រាប់ការកាត់ និងប៉ូលាពេជ្រ។ អគារតម្លៃ ៣៨៨ លានដុល្លារនេះក៏មានជណ្តើរយន្តចំនួន ១៣១ រួមជាមួយបន្ទប់ទទួលទានអាហារ ហាងលក់រាយ កន្លែងហាត់ប្រាណ និងបន្ទប់សន្និសីទសម្រាប់បុគ្គលិកផងដែរ។ Surat Diamond Bourse គឺជាអាគារសម្រាប់លក់ពេជ្រ ដែលរចនាឡើងដោយក្រុមហ៊ុនស្ថាបត្យកម្មឥណ្ឌា Morphogenesis បន្ទាប់ពីការប្រកួតប្រជែងអន្តរជាតិ។

គោលបំណងនៃការសាងសង់អាគារដ៏ធំនេះ គឺដើម្បីជួយមនុស្សរាប់ពាន់នាក់សន្សំពេលវេលាធ្វើដំណើរទៅកាន់ទីក្រុងបុមបៃដោយរថភ្លើង និងអភិវឌ្ឍន៍ទីក្រុងនាពេលអនាគតប្រកបដោយនិរន្តរភាព។ យោងតាមលោក Mahesh Gadhavi នាយកប្រតិបត្តិគម្រោង Surat Diamond Bourse បាននិយាយថា គម្រោងនេះនឹងស្វាគមន៍អ្នកស្រុកដំបូងនៅក្នុងខែវិច្ឆិកា បន្ទាប់ពីការសាងសង់អស់រយៈពេល ៤ ឆ្នាំ និងសម្ពោធជាផ្លូវការនៅចុងឆ្នាំ៕

ប្រទេសថៃ ៖ គេសង្កេតឃើញថា មានសមាជិកសភាជាច្រើនរូបមកពីគណបក្សកាវក្លៃបានស្រក់ទឹកភ្នែក និងសោកសៅ កាលពីវេលាម៉ោង១រសៀលថ្ងៃទី១៩ ខែកក្កដា នៅសាលប្រជុំរដ្ឋសភាតាមបណ្តោយផ្លូវសាមសេន តំបន់ឌុសិត ទីក្រុងបាងកក ក្រោយពីតុលាការធម្មនុញ្ញបានចេញសេចក្តីសម្រេចមួយក្នុងសំឡេងគាំទ្រ៧ទល់នឹង២ ឱ្យលោក Pita Limjaroenrat មានបញ្ជីឈ្មោះក្នុងសមាជិកសភា និងជាមេដឹកនាំគណបក្សកាវក្លៃ បញ្ចប់តួនាទីជាសមាជិកសភាតំណាងរាស្ត្រ ។

នៅក្នុងកិច្ចប្រជុំរដ្ឋសភា លោក Nattawut Buaprathum សមាជិកសភាមកពីគណបក្សកាវក្លៃបានស្រក់ទឹកភ្នែក ក្រោយទទួលដំណឹងពីការដកនាទីលោក Pita Limjaroenrat ចេញពីសមាជិកសភាតំណាងរាស្ត្រ ។ ពេលនោះ លោក Pita Limjaroenrat និងសមាជិកសភាផ្សេងទៀតរបស់គណបក្សកាវក្លៃ ក៏បាននាំគ្នាមកផ្តល់កម្លាំងចិត្តដល់លោក Nattawut Buaprathum ។

លើសពីនេះ លោក Chutipong Phiphoppinyo សមាជិកសភាតំណាងរាស្ត្ររបស់គណបក្សកាវក្លៃ ប្រចាំខេត្តរ៉ាក់យ៉ង ក៏បានស្រក់ទឹកភ្នែកផងដែរ និងដើរមកឱបលោក Pita Limjaroenrat ។ ដូចគ្នានេះ អ្នកនាង Thisana Choonhawan សមាជិកសភាតំណាងរាស្ត្ររបស់គណបក្សកាវក្លៃ ប្រចាំក្រុងបាងកក ក៏បានស្រក់ទឹកភ្នែកតាមដែរ ។

លោក Patiphat Santipada អនុប្រធានសភាទី១ ក៏បានដើរមកជជែក និងផ្តល់កម្លាំងចិត្តដល់លោក Pita Limjaroenrat មេដឹកនាំគណបក្សកាវក្លៃ ។ ទោះយ៉ាងណា លោក Pita Limjaroenrat នៅតែមានទឹកមុខញញឹមជានិច្ច និងបានផ្តល់កម្លាំងចិត្តទៅកាន់សមាជិកសភាតំណាងរាស្ត្ររបស់គណបក្សកាវក្លៃ ។

នៅថ្ងៃដដែលនេះ ក្រុមអ្នកគាំទ្រគណបក្សកាវក្លៃដែលបានមករង់ចាំផ្តល់កម្លាំងចិត្តដល់លោក Pita Limjaroenrat ក្នុងថ្ងៃបោះឆ្នោតជ្រើសរើសនាយករដ្ឋមន្ត្រីលើកទី២ បានសម្តែងការមិនពេញចិត្តជាខ្លាំង ក្រោយពីតុលាការធម្មនុញ្ញសម្រេចដកលោក Pita Limjaroenrat ចេញពីតួនាទីជាបណ្តោះអាសន្ន រហូតដល់មានការសម្រេចជាថ្មី ។

ក្រុមអ្នកគាំទ្រគណបក្សកាវក្លៃបានដង្ហែរក្បួនទៅកាន់មាត់ទ្វាររបស់អគាររដ្ឋសភា ដើម្បីតវ៉ានឹងការសម្រេចរបស់តុលាការធម្មនុញ្ញ ដែលបានបំផ្លាញក្តីសង្ឃឹមរបស់ពលរដ្ឋ ។ ក្រោយមក ប៉ូលិសក៏បានទាញទ្វារបិទ និងប្រកាសឱ្យក្រុមអ្នកគាំទ្រទាំងនេះទៅតវ៉ានៅបរិវេណមជ្ឈមណ្ឌលរាជការក្រុងបាងកក ៕ ប្រភព ៖ Mono News

រដ្ឋធានីប៉េកាំង៖ ក្រោយអវត្ដមានរបស់ប្រមុខការទូតរបស់ចិន អស់រយៈពេល ប្រហែល៣សប្ដាហ៍កន្លងមកនេះ កំពុងតែបង្កើតជាពាក្យចចាមអារ៉ាមយ៉ាងច្រើន ហើយត្រូវបានបណ្ដាញផ្សព្វផ្សាយល្បីៗរបស់ពិភពលោក រួមមាន Reuters, BBC, Nikkei Asia, The Guardian…លើកយកមកចុះផ្សាយព្រោងព្រាត ដោយផ្ដោតលើការសង័្សយផ្សេងៗគ្នា។

សារព័ត៌មានរបស់សិង្ហបុរី Channel News Asia បានចេញចេញផ្សាយ កាលពីព្រឹក ថ្ងៃពុធ ទី១៩ ខែកក្កដា ថា លោក គិន គាង (Qin Gang) រដ្ឋមន្រ្ដី ក្រសួងការបរទេសចិន មិនបានបង្ហាញខ្លួន ជាសាធារណៈ អស់រយៈពេលប្រហែល៣សប្តាហ៍កន្លងមកហើយ។ អវត្ដមានរបស់ប្រមុខការទូតមហាយក្សអាស៊ីមួយនេះ កំពុងតែបង្កឲ្យមានពាក្យចចាមអារ៉ាម ជុំវិញទំនាក់ទំនងស្នេហានៅក្រៅប្រព័ន្ធ។

ប្រមុខការទូតរបស់ប្រទេសមហាយក្សចិន វ័យ៥៧ឆ្នាំ មិនបានមកចូលរួម នៅក្នុងកិច្ចប្រជុំកំពូលរបស់អាស៊ាន ស្ថិតក្នុងរដ្ឋធានីហ្សាការតា កាលពីសប្តាហ៍មុន។ ប៉ុន្ដែអ្នកនាំពាក្យ ក្រសួងការបរទេសចិន បានអះអាង កាលពីថ្ងៃទី១១ ខែកក្កដា ថា លោករដ្ឋមន្រ្ដី មានបញ្ហាសុខភាព ទើបមិនបានមកចូលរួម នៅក្នុងកិច្ចប្រជុំកំពូលរបស់ប្លុកមួយនេះ។

លោករដ្ឋមន្រ្ដីក្រសួងការបរទេសចិន មិនបានបង្ហាញខ្លួនជាសាធារណៈ អស់រយៈពេល២៣ថ្ងៃកន្លងមកហើយ ខណៈការចូលរួមរបស់គាត់ជាលើកចុងក្រោយ នៅថ្ងៃទី២៥ ខែមិថុនា។ លោក គិន គាង ត្រូវបានតែងតាំង ជារដ្ឋមន្រ្ដីក្រសួងការបរទេសចិន នៅខែធ្នូ ឆ្នាំ២០២២ ហើយគាត់ត្រូវបានគេមើលឃើញ ថា ជាមនុស្សដ៏គួរឲ្យទុកចិត្តបំផុតរបស់ប្រធានាធិបតីចិន លោក ស៊ី ជិនពីង (Xi Jinping)។

នៅក្នុងឋានៈជាអ្នកមុខមាត់ដ៏ល្បីល្បាញមួយរូបរបស់រដ្ឋាភិបាលចិន នោះ អវត្តមានដ៏យូររបស់លោក គិន គាង មិនត្រឹមតែ ធ្វើឲ្យក្រុមអ្នកការទូត និង អ្នកឃ្លាំមើលប្រទេសចិន តាមដានប៉ុណ្ណោះទេ សូម្បីតែប្រជាជនចិនធម្មតា ក៏ផ្ដោតការចាប់អារម្មណ៍ លើបញ្ហានេះផងដែរ។

ក្រោយពេលមានសំណួរសាកសួរ កាលពីថ្ងៃចន្ទ ថា តើលោករដ្ឋមន្រ្ដី គិន គាង ទៅទីណា? ជាការឆ្លើយតបវិញនោះ លោកស្រី ម៉ៅ នីង (Mao Ning) អ្នកនាំពាក្យ ក្រសួងការបរទេសចិន បានអះអាង ថា លោកស្រី មិនមានព័ត៌មានផ្តល់ជូននោះឡើយ។

ក្រោមប្រព័ន្ធគ្រប់គ្រងដ៏តឹងរឹងរបស់ប្រទេសចិន ការអវត្ដមានរបស់មន្ត្រីជាន់ខ្ពស់ណាម្នាក់ មានរយៈពេលយូរ អាចនឹងក្លាយជាសញ្ញាមួយ សម្រាប់បញ្ហា។ ប៉ុន្ដែការឆ្លើយតបទទេៗរបស់អ្នកស្រី អ្នកនាំពាក្យ រូបនេះ បាននាំឱ្យផ្ទុះឡើងជាថ្មី អំពីការរំពឹងទុក ចំពោះការអវត្តមានរបស់លោករដ្ឋមន្រ្ដី ក្រសួងការបរទេសចិន ហើយកំពុងតែបង្កើននូវការសង្ស័យ កាន់តែខ្លាំងឡើងបន្ថែមទៀត។

លោកស្រី ម៉ៅ នីង (Mao Ning) អ្នកនាំពាក្យ ក្រសួងការបរទេសចិន បានឆ្លើយតប នៅតាមបណ្ដាញសង្គម Weibo របស់ចិន ថា «គាត់មិនបានដឹង ថា នឹងត្រូវឆ្លើយយ៉ាងម៉េចទេ?»។

ដោយឡែក មតិមួយទៀត បានលើកឡើង ថា ការឆ្លើយតបបែបនេះ ពិតជាគួរឲ្យបារម្ភ។ ករណីនេះ មិនមែនជារឿងចម្លែកនោះទេ ខណៈឥស្សជនជាន់ខ្ពស់ នៅក្នុងប្រទេសចិន បានបាត់ខ្លួន អស់រយៈពេលយូរ ដោយគ្មានការពន្យល់ តាំងពីដំបូងមក ហើយករណីនេះមានតែបង្ហាញ អំពីការសង័្សយជាច្រើន។

ការចរចា រវាងលោករដ្ឋមន្ត្រីការបរទេសចិន និង ប្រធានគោលនយោបាយការបរទេសរបស់សហភាពអឺរ៉ុប លោក ចូសេប ប័ររ៉ែល (Josep Borrell) គ្រោងនឹងធ្វើឡើង នៅក្នុងរដ្ឋធានីប៉េកាំង ប៉ុន្ដែគម្រោងនោះ ត្រូវបានប្រកាសផ្អាកទៅវិញ កាលពី២សប្តាហ៍មុន។ ស្របគ្នានេះ រដ្ឋាភិបាលក្រុងប៉េកាំង បានជូនដំណឹង ទៅដល់សហភាពអឺរ៉ុប ថា កាលបរិច្ឆេទមិនមានពេលកំណត់ ប៉ុន្តែមិនបានពន្យល់ អំពីមូលហេតុនេះដែរ។

ប្រភពព័ត៌មានមួយផ្សេងទៀត បានប្រាប់ទីភ្នាក់ងារសារព័ត៌មាន Reuters ថា សហភាពអឺរ៉ុប បានទទួលនូវការជូនដំណឹង សុំពន្យារពេលនេះ ត្រឹមតែ២ថ្ងៃ នៅមុនពេលការមកដល់របស់ប្រមុខការទូតរបស់សហភាពអឺរ៉ុប លោក ប័ររ៉ែល ទៅកាន់ទីក្រុងប៉េកាំង។

លោករដ្ឋមន្រ្ដីការបរទេសចិន កាលពីថ្ងៃចន្ទ មិនបានបង្ហាញខ្លួន នៅក្នុងជំនួប រវាងលោកប្រធានាធិបតី ស៊ី ជិនពីង និង អតីតប្រធានាធិបតីហ្វីលីពីន រ៉ូឌ្រីហ្គោ ឌូទើតេ (Rodrigo Duterte)។ ឃ្លីបវីដេអូរបស់ប្រព័ន្ធផ្សព្វផ្សាយរដ្ឋចិន បានបង្ហាញតែអំពីវត្ដមានរបស់លោក វ៉ាង យី (Wang Yi) និង មន្ត្រីជាន់ខ្ពស់មួយចំនួនទៀតរបស់ក្រសួងការបរទេស។

លោក Wu Qiang ជាអ្នកអត្ថាធិប្បាយនយោបាយចិន មានមូលដ្ឋាន នៅទីក្រុងប៉េកាំង បានអះអាង ថា «ប្រជាជនកំពុងតែចាប់អារម្មណ៍នឹងរឿងរ៉ាវនេះ ដោយសារតែពួកគេចង់ដឹង ចង់ឃើញ អំពីអាថ៌កំបាំងណាមួយ នៅក្នុងប្រអប់ខ្មៅនេះ។ ការបាត់ខ្លួនរបស់គាត់ បានបង្ហាញ អំពីភាពផុយស្រួយ សម្រាប់ប្រព័ន្ធការទូតរបស់ប្រទេសចិន និង ប្រព័ន្ធសម្រេចចិត្តកម្រិតខ្ពស់របស់ចិន»។

បើទោះជាយ៉ាងណា ការពិត នៃពាក្យចចាមអារ៉ាម អំពីមន្ត្រីជាន់ខ្ពស់បែបនេះ កំពុងតែត្រូវបានពិភាក្សា នៅលើបណ្ដាញអ៊ិនធើណេតរបស់ចិន។ អវត្តមានរបស់លោករដ្ឋមន្រ្ដី បានធ្វើឱ្យមនុស្សជាច្រើន កើតការងឿងឆ្ងល់ ថាតើវាជាការពិតទេ ចំពោះពាក្យចចាមអារ៉ាម អំពីការតស៊ូអំណាច អំពើពុករលួយ ការរំលោភបំពានអំណាច មុខតំណែង និង ទំនាក់ទំនងស្នេហា?

ប្រទេសថៃ ៖ នៅថ្ងៃទី១៩ ខែកក្កដា តុលាការធម្មនុញ្ញបានបើកកិច្ចប្រជុំពិភាក្សាមួយ គឺករណីគណៈកម្មការរៀបចំការបោះឆ្នោតសូមឱ្យតុលាការធម្មនុញ្ញធ្វើការសម្រេចតាមមាត្រា៨២ នៃរដ្ឋធម្មនុញ្ញថា សមាជិកភាពនៃសមាជិកសភាតំណាងរាស្ត្ររបស់លោក Pita Limjaroenrat មេដឹកនាំគណបក្សកាវក្លៃ និងជាបេក្ខជននាយករដ្ឋមន្ត្រី នឹងបញ្ចប់តួនាទី តាមរដ្ឋធម្មនុញ្ញមាត្រា១០១ (៦) ស្របតាមមាត្រា៩៨ (៣) ដែរឬទេ ។ ចុងក្រោយ តុលាការនេះក៏បានសម្រេចចិត្តដកតួនាទីលោក Pita Limjaroenrat ចេញពីសមាជិកសភា នៅថ្ងៃដដែលនេះ ។

គណៈកម្មការរៀបចំការបោះឆ្នោត និងអ្នកដាក់ញត្តិបានដាក់សំណើស្នើឱ្យតុលាការនេះពិចារណាករណីលោក Pita Limjaroenrat សមាជិកសភាតំណាងរាស្ត្រ ដែលបានកាន់កាប់ភាគហ៊ុនក្នុងក្រុមហ៊ុន ITV ដំណើរការអាជីវកម្មកាសែត ឬប្រព័ន្ធផ្សព្វផ្សាយនានា ។ នេះជាមូលហេតុធ្វើឱ្យសមាជិកភាពនៃសមាជិកសភាតំណាងរាស្ត្ររបស់លោក Pita Limjaroenrat បានបញ្ចប់តាមរដ្ឋធម្មនុញ្ញមាត្រា១០១ (៦) ស្របតាមមាត្រា៩៨ (៣) ។ តុលាការធម្មនុញ្ញបានសម្រេចឱ្យលោក Pita Limjaroenrat ចាកចេញពីតួនាទីនេះ រហូតដល់តុលាការធម្មនុញ្ញសម្រេចតាមមាត្រា៨២ ហើយតំណែងជាសមាជិកសភាតំណាងរាស្ត្ររបស់លោក Pita ត្រូវបានបញ្ចប់ គិតចាប់ពីតុលាការធម្មនុញ្ញចេញសេចក្តីសម្រេចនេះ ។

តុលាការធម្មនុញ្ញបានឱ្យអ្នករងការចោទប្រកាន់ (គឺលោក Pita Limjaroenrat) ដាក់លិខិតស្រាយបំភ្លឺចំពោះការចោទប្រកាន់នេះមកកាន់តុលាការធម្មនុញ្ញ ត្រឹមរយៈពេល១៥ថ្ងៃ ។ តុលាការធម្មនុញ្ញបញ្ជាក់ថា ការបំពេញតួនាទីរបស់អ្នករងការចោទប្រកាន់ គឺអាចធ្វើឱ្យកើតបញ្ហាផ្នែកច្បាប់ និងការប្រឆាំងជំទាស់ដល់ការបំពេញការងារសំខាន់ក្នុងកិច្ចប្រជុំរដ្ឋសភា និងកិច្ចប្រជុំសភាតំណាងរាស្ត្របាន ។ ហេតុនេះ លោក Pita Limjaroenrat នឹងគ្មានតួនាទីជាសមាជិកសភាតំណាងរាស្ត្រ ចាប់ពីថ្ងៃទី១៩ ខែកក្កដា ឆ្នាំ២០២៣ តទៅ រហូតដល់តុលាការធម្មនុញ្ញធ្វើសេចក្តីសម្រេច ។

នៅថ្ងៃទី១៩ ខែកក្កដា នេះដែរ គេសង្កេតឃើញលោក Pita Limjaroenrat មេដឹកនាំគណបក្សកាវក្លៃ និងជាបេក្ខជននាយករដ្ឋមន្ត្រី បានដើរចេញពីសាលប្រជុំសភា
ភ្លាមៗផងដែរ ក្រោយពីតុលាការធម្មនុញ្ញដកតួនាទីលោកពីសមាជិកសភាតំណាងរាស្ត្រ ៕ ប្រភព ៖ Bangkok biznews

លោកយាយ Elsie Allcock ជាស្រ្តីជនជាតិអង់គ្លេសដែលត្រូវប្រព័ន្ធផ្សព្វផ្សាយចាប់អារម្មណ៍ជាខ្លាំងព្រោះលោកយាយបានកើតនិងរស់នៅផ្ទះដដែល មិនប្តូរលំនៅដ្ឋានទៅណានោះទេអស់ពេល១០៥ឆ្នាំមកនេះហើយលោកយាយក៏គ្មានគម្រោងចាកចេញដូចគ្នា។

ជីដូនចំណាស់ខាងលើនេះ កើតនៅខែមិថុនា ឆ្នាំ១៩១៨ លោកយាយជាកូនស្រីពៅក្នុងចំណោមបង ប្អូន៥នាក់ ដែលមានផ្ទះស្ថិតនៅផ្លូវ Barker Street ក្រុង Huthwaite តំបន់ Nottinghamshire ប្រទេសអង់គ្លេស។ ដំបូងឡើយ ឪពុករបស់លោកយាយ Elsie ដែលជាអ្នកជីករ៉ែធ្យូងថ្មបានជួលផ្ទះនេះកាលពីឆ្នាំ១៩០២ក្នុងតម្លៃប្រហែល៣០ផោន។ ក្រោយពីម្តាយលោកយាយចែកឋានក្នុងឆ្នាំ១៩៣១ ហើយខ្លួនលោកយាយជាកូនពៅក្នុងគ្រួសារ លោកយាយត្រូវរស់នៅមើលថែឪពុក និងបានសម្រេចចិត្តរៀបការជាមួយលោក Bill នៅឆ្នាំ១៩៤១ រស់នៅផ្ទះជួលនោះជាមួយគ្នាតែម្តង។

នៅឆ្នាំ១៩៤៩ ឪពុកលោកយាយបានចែកឋាន ហើយលោកយាយសម្រេចចិត្តទិញផ្ទះដែលធ្លាប់តែជួលនោះក្នុងឆ្នាំ១៩៦០ក្នុងតម្លៃ២៥០ផោន ដោយមានការកម្ចីប្រាក់ផងដែរ។លោកយាយមានកូនប្រុស២នាក់ហើយស្វាមីលោកយាយបានចែកឋាននៅឆ្នាំ១៩៩៦ ដែលបច្ចុប្បន្ននេះលោកយាយ Elsie រស់នៅជាមួយកូនប្រុស Raymond អាយុ៧៦ឆ្នាំ។

ក្នុងការរស់នៅផ្ទះដដែល១០៥ឆ្នាំរបស់លោកយាយ គឺបានឆ្លងកាត់សង្រ្គាមលោកទាំង២លើកប្រមុខរដ្ឋ៥នាក់និងនាយករដ្ឋមន្ត្រីអង់គ្លេស ២២ នាក់៕