សហរដ្ឋអាមេរិក ៖ នេះជាតាក់ស៊ីអាកាសដើរដោយថាមពលអគ្គិសនី ដែលផលិតឡើងដោយក្រុមហ៊ុនមួយរបស់សហរដ្ឋអាមេរិក ។ វាជាលើកដំបូងហើយដែលតាក់ស៊ីអាកាស «Joby» បានហោះហើរនៅក្នុងទីក្រុងញូវយ៉ក សហរដ្ឋអាមេរិក ។ ជាទូទៅ រថយន្តតាក់ស៊ីមានតួនាទីដឹកអ្នកដំណើរទៅកាន់ទីកន្លែងនានា ប៉ុន្តែសម្រាប់តាក់ស៊ីអាកាសនេះ នឹងត្រៀមដឹកអ្នកដំណើរពីតំបន់ម៉ែនហាតតាន់ ទៅកាន់អាកាសយានដ្ឋាន ដនអេស ខេនណាឌី ។

ក្រុមហ៊ុនឱ្យដឹងថា តាក់ស៊ីអាកាសបានហោះហើរក្នុងល្បឿន៨៩គីឡូម៉ែត្រក្នុង១ម៉ោង គឺវានឹងជួយកាត់បន្ថយពេលវេលាក្នុងការធ្វើដំណើរ ។ បើអ្នកដំណើរជិះរថយន្តតាក់ស៊ីធម្មតាទៅកាន់អាកាសយានដ្ឋាន ដនអេស ខេនណាឌី ពួកគេនឹងត្រូវចំណាយពេលវេលាអស់ជាច្រើនម៉ោង ប៉ុន្តែបើពួកគេជិះតាក់ស៊ីអាកាសវិញ នឹងចំណាយពេលត្រឹមតែ៧នាទីប៉ុណ្ណោះ ។

ក្រៅពីវាមានល្បឿនលឿន និងចំណេញពេលវេលាហើយ តាក់ស៊ីអាកាសមិនបញ្ចេញជាតិពុលដល់បរិយាកាសទេ ពីព្រោះវាដើរដោយថាមពលអគ្គិសនី ។ លើសពីនេះ វាមិនបង្កសំឡេងរំខានទេ ពីព្រោះការប្រើប្រាស់ថាមពលអគ្គិសនីនឹងមានសំឡេងស្ងាត់ជាងការប្រើប្រាស់ម៉ាស៊ីនទូទៅ និងកាត់បន្ថយការបំពុលបរិយាកាសផងដែរ ។

តើតាក់ស៊ីអាកាសអាចដឹកអ្នកដំណើរបានចំនួនប៉ុន្មាននាក់? តាក់ស៊ីនេះអាចទទួលអ្នកជិះចំនួន៥នាក់ ក្នុងនោះមានអ្នកបើកបរម្នាក់ និងអ្នកដំណើរ៤នាក់ទៀត ។ ក្រុមហ៊ុនសង្ឃឹមថា តាក់ស៊ីអាកាសនឹងអាចផ្តល់សេវាកម្មដឹកអ្នកដំណើរនៅឆ្នាំ២០២៥ ។ បច្ចុប្បន្ន ក្រុមហ៊ុនទទួលបានការទទួលស្គាល់ពីស្ថាប័នគ្រប់គ្រងអាកាសចរណ៍ជាតិ និងបានត្រួតពិនិត្យដំណើរការហោះហើររួចរាល់ហើយ ។ ដូច្នេះ មិនយូរទៀតទេ អ្នកដំណើរនឹងអាចជិះតាក់ស៊ីអាកាសដ៏ទំនើបនេះ ៕ ប្រភព ៖ Thai PBS

ហ្វីលីពីន៖ គ្រោះរញ្ជួយដីកម្រិត ៦.៧ រ៉ិចទ័រ បានអង្រួនប្រទេសហ្វីលីពីន បង្កឱ្យមានការខូចខាតយ៉ាងធ្ងន់ធ្ងរដល់ផ្ទះសម្បែង និងផ្សារទំនើបជាច្រើន។

យោងតាមគេហទំព័រ ABC News ដែលបានចុះផ្សាយកាលពីថ្ងៃទី ១៧ ខែវិច្ឆិកាថា ហេតុការណ៍នៃគ្រោះរញ្ជួយដីនេះបានកើតឡើងនៅម៉ោង ៤:១៤ រសៀល ដែលមានកម្រិត ៦.៧ រ៉ិចទ័រ ស្ថិតនៅចម្ងាយ ២៦ គីឡូម៉ែត្រពីទីក្រុង Burias នៅចុងភាគខាងត្បូងនៃប្រទេសហ្វីលីពីន។

លោក Angel Dukaduka មន្ត្រីឆ្លើយតបគ្រោះមហន្តរាយ បានឱ្យដឹងថា នៅជិតចំណុចកណ្តាលនៃការរញ្ជួយដីនេះ មានមនុស្សយ៉ាងហោចណាស់ម្នាក់ត្រូវបានគេនិយាយថាស្លាប់ និង ១៨ នាក់ផ្សេងទៀតបានរងរបួស។ លោក Dukaduka បានបន្តទៀតថា អគារការិយាល័យក្រុង ក៏ដូចជាផ្ទះសម្បែង កន្លែងហាត់ប្រាណ និងផ្សារទំនើបជាច្រើនក៏ត្រូវបានរងការខូចខាតក្នុងការរញ្ជួយដីនេះផងដែរ រួមទាំងដាច់ចរន្តអគ្គិសនីដោយសារតែការរំញ័រខ្លាំងពេក។ ទោះជាយ៉ាងណាក៏ដោយ មេប៉ូលីសនៃទីក្រុង Koronadal បាននិយាយថា មិនមានរបាយការណ៍ណាច្បាស់លាស់អំពីការស្លាប់នោះទេ។

បច្ចុប្បន្ន ប្រធានាធិបតី Ferdinand Marcos Jr បានធ្វើការណែនាំភ្នាក់ងាររដ្ឋាភិបាលឱ្យធានាសុវត្ថិភាព និងសុខុមាលភាពរបស់មនុស្សគ្រប់គ្នាដែលរងផលប៉ះពាល់ដោយការរញ្ជួយដី។
គួរបញ្ជាក់ដែរថា ប្រទេសហ្វីលីពីនបានជួបប្រទះការរញ្ជួយដីជាញឹកញាប់ និងការផ្ទុះភ្នំភ្លើង ដោយសារតែទីតាំងរបស់វានៅលើមហាសមុទ្រប៉ាស៊ីហ្វិក “Ring of Fire” ដែលជាធ្នូនៃរលករញ្ជួយជុំវិញមហាសមុទ្រ៕

ប្រទេសកូរ៉េខាងត្បូង ៖ វាជាដំណឹងដ៏រីករាយសម្រាប់អ្នកស្រឡាញ់សត្វនៅប្រទេសកូរ៉េខាងត្បូង ខណៈនៅឆ្នាំ២០២៣ រដ្ឋាភិបាលបានរៀបចំសេចក្តីព្រាងច្បាប់ហាមពលរដ្ឋបរិភោគសាច់ពិសេស ឬសាច់ឆ្កែ ក្រោយពីទទួលការរិះគន់យ៉ាងខ្លាំងអស់រយៈពេលជាច្រើនឆ្នាំ ។ រដ្ឋាភិបាលបញ្ជាក់ថា នឹងផ្តល់ប្រាក់សំណងដល់អ្នកប្រកបអាជីវកម្មនេះដែលត្រូវផ្លាស់ប្តូរមុខរបរ ។ រីឯកសិករចិញ្ចឹមឆ្កែលក់សាច់បានតវ៉ាប្រឆាំងនឹងសេចក្តីព្រាងច្បាប់ ដោយពួកគេនិយាយថា វាជាការរំលោភសិទ្ធិរស់នៅ ។

កាលពីថ្ងៃទី១៧ ខែវិច្ឆិកា ឆ្នាំ២០២៣ រដ្ឋាភិបាលបានរៀបចំសេចក្តីព្រាងច្បាប់ហាមពលរដ្ឋនៅទូទាំងប្រទេសកូរ៉េខាងត្បូងបរិភោគសាច់ឆ្កែ ក្នុងគោលបំណងបញ្ឈប់មតិរិះគន់ និងការប្រឆាំងនឹងការបរិភោគសាច់ឆ្កែនៅកូរ៉េខាងត្បូង និងនៅក្រៅប្រទេស ។

លោក You Uidong ប្រធានគណបក្ស People Power Party ជាគណបក្សរបស់រដ្ឋាភិបាលកូរ៉េខាងត្បូង បានថ្លែងក្នុងកិច្ចប្រជុំជាមួយមន្ត្រីរដ្ឋាភិបាល និងសកម្មជនសិទ្ធិសត្វថា វាដល់ពេលហើយ ដែលកូរ៉េខាងត្បូងត្រូវបញ្ឈប់បញ្ហាទំនាស់ក្នុងសង្គម និងភាពចម្រូងចម្រាស់អំពីការបរិភោគសាច់ឆ្កែ ។ ហេតុនេះ កូរ៉េខាងត្បូងត្រូវចេញច្បាប់ពិសេសមួយដើម្បីបញ្ឈប់ការបរិភោគសាច់ឆ្កែ ។

លោក You Uidong លើកឡើងថា ៖ «រដ្ឋាភិបាល និងគណបក្សរបស់រដ្ឋាភិបាលនឹងស្នើសេចក្តីព្រាងច្បាប់ ដើម្បីដាក់ឱ្យអនុវត្តបម្រាមបរិភោគសាច់ឆ្កែនៅឆ្នាំ២០២៣ ព្រមទាំងអំពាវនាវឱ្យមានការគាំទ្រពីគណបក្សប្រឆាំង ហើយរដ្ឋសភាអាចអនុម័តច្បាប់នេះបានជោគជ័យ» ។

ការបរិភោគសាច់ឆ្កែ គឺជាផ្នែកមួយនៃវប្បធម៌បរិភោគអាហារនៅឧបទ្វីបកូរ៉េជាយូរមកហើយ ។ ពលរដ្ឋកូរ៉េខាងត្បូងយល់ឃើញថា ការបរិភោគសាច់ឆ្កែអាចជួយកាត់បន្ថយកំដៅក្នុងខ្លួននៅរដូវក្តៅ ប៉ុន្តែការវិវឌ្ឍរបស់ពិភពលោក និងការយល់ដឹងអំពីសិទ្ធិសត្វ បានធ្វើឱ្យវប្បធម៌ការបរិភោគសាច់ឆ្កែទទួលការរិះគន់យ៉ាងខ្លាំងទាំងនៅកូរ៉េខាងត្បូង និងក្រៅប្រទេស ។

មុននេះ កូរ៉េខាងត្បូងបានព្យាយាមធ្វើសេចក្តីព្រៀងច្បាប់ហាមបរិភោគសាច់ឆ្កែជាច្រើនលើក ប៉ុន្តែទទួលបរាជ័យ ដោយសារមានមតិប្រឆាំងពីអ្នកពាក់ព័ន្ធក្នុងឧស្សាហកម្មលក់ដូរសាច់ឆ្កែ ។ ទន្ទឹមនឹងនេះ គេបារម្ភថា ការហាមឃាត់បរិភោគសាច់ឆ្កែនឹងប៉ះពាល់ដល់មុខរបររបស់កសិករនៅជនបទ ។

សេចក្តីរាយការណ៍បញ្ជាក់ថា សេចក្តីព្រាងច្បាប់ហាមបរិភោគសាច់ឆ្កែនឹងរួមបញ្ចូលរយៈពេលអនុគ្រោះចំនួន៣ឆ្នាំ ហើយរដ្ឋាភិបាលនឹងផ្តល់ប្រាក់សំណងដល់អ្នកប្រកបមុខរបរលក់សាច់ឆ្កែ ដើម្បីឱ្យពួកគេយកប្រាក់នេះទៅប្រកបមុខរបរផ្សេងទៀត ។

តាមទិន្នន័យរបស់រដ្ឋាភិបាលបង្ហាញថា ប្រទេសកូរ៉េខាងត្បូងមានកសិដ្ឋានចិញ្ចឹមឆ្កែប្រមាណ១.១៥០កន្លែង, ទីស.ត្តឃា.តចំនួន៣៤កន្លែង និងភោជនីយដ្ឋានលក់ម្ហូបអាហារពីសាច់ឆ្កែ ចំនួន១.៦០០កន្លែង ៕ ប្រភព ៖ 3Plus News

កាលពីពាក់កណ្តាលខែវិច្ឆិកា ឆ្នាំ២០២៣ សារព័ត៌មានបរទេសចុះផ្សាយថា ក្រុមហ៊ុនដ៏ល្បីល្បាញលំដាប់ពិភពលោក Amazon បានប្រកាសសហការជាមួយក្រុមហ៊ុនផលិតរថយន្ត Hyundai ដើម្បីត្រៀមលក់រថយន្តតាមអនឡាញនៅសហរដ្ឋអាមេរិក ។ គម្រោងនេះគ្រោងដំណើរការនៅឆ្នាំ២០២៤ ហើយនេះជាលើកដំបូងហើយ ដែលក្រុមហ៊ុន Amazon ងាកមកជួញដូរទំនិញធំៗ ដូចជា រថយន្ត ។

ការទិញរថយន្តតាមអនឡាញ គឺអតិថិជនអាចជ្រើសរើសប្រភេទរថយន្ត, ពណ៌ និងលក្ខណៈពិសេសផ្សេងទៀតតាមតម្រូវការ តាមរយៈគេហទំព័រ Amazon ។ លើសពីនេះ អតិថិជនអាចជ្រើសរើសវិធីទូទាត់ប្រាក់តាមតម្រូវការទៀតផង បើទោះជាពួកគេចង់បង់រំលោះ ឬចង់ទិញជាសាច់ប្រាក់ គឺពួកគេអាចធ្វើបានតាមរយៈគេហទំព័ររបស់ក្រុមហ៊ុនទាំងអស់ ។ អតិថិជនថែមទាំងអាចកំណត់រយៈពេលការប្រគល់រថយន្ត តាមរយៈតំណាងចែកចាយក្រុមហ៊ុន Hyundai ក្នុងតំបន់ ឬអតិថិជនអាចមកទទួលយករថយន្តនៅហាងដោយខ្លួនឯងផ្ទាល់ ។

កិច្ចព្រមព្រៀងនេះ គឺជាការពង្រីកកិច្ចព្រមព្រៀងដែលធ្លាប់បានប្រកាសកាលពី២ឆ្នាំមុន ដើម្បីពង្រីកកន្លែងលក់រថយន្តឌីជីថលរបស់ក្រុមហ៊ុន Hyundai នៅលើគេហទំព័រ Amazon.com ។ វានឹងជួយឱ្យអតិថិជនអាចកំណត់ថ្លៃបង់រំលោះរថយន្ត, គណនាតម្លៃ និងងាយស្រួលស្វែងរកតំណាងចែកចាយលើសពីមួយ ។

Jay Chang គឺជា CEO របស់ Hyundai Motor លើកឡើងថា ៖ «ការធ្វើជាដៃគូជាមួយក្រុមហ៊ុនមួយដែលមានអតិថិជនច្រើនបំផុតនៅលើពិភពលោក វានឹងជួយផ្តល់ឱកាសឱ្យក្រុមហ៊ុន Hyundai ខណៈយើងខ្លួនឯងក៏កំពុងព្យាយាមពង្រីកទីផ្សារ និងបណ្តាញលក់ផងដែរ ។ នេះជាការផ្លាស់ប្តូរមួយឈានទៅរកការប្រើប្រាស់ថាមពលអគ្គិសនី និងគិតពីអនាគតនៃការធ្វើដំណើរដ៏ឆ្លាតវៃ» ។

ក្រុមហ៊ុនដ៏ល្បីល្បាញ Amazon បានងាកមកចាប់យកទីផ្សាររថយន្តបែបនេះ គឺជាការផ្លាស់ប្តូរដ៏ធំមួយដែលមនុស្សជាច្រើនចាប់អារម្មណ៍លើការធ្វើពាណិជ្ជកម្មអេឡិចត្រូនិក ៕ ប្រភព ៖ beartai BRIEF

មន្ត្រីជាន់ខ្ពស់នៃប្រទេសឡាវ និងសមាជិកនៃអង្គការផលិតភាពអាស៊ី (APO) បានជួបពិភាក្សាគ្នាដើម្បីចែករំលែកគំនិតនិងបទពិសោធន៍ នៅក្នុងសិក្ខាសាលាស្តីពីសហគ្រិនភាពសង្គមសម្រាប់ជនពិការ ដើម្បីលើកទឹកចិត្តដល់ជនពិការក្នុងការចែករំលែកពីការអភិវឌ្ឍន៍អាជីវកម្មរបស់ពួកគេ។

ថ្លែងក្នុងសិក្ខាសាលាមួយនាទីក្រុងវៀងចន្ទនទប្រទេសឡាវ លោក Bounpheng Sibounheung នាយកដ្ឋានផ្សព្វផ្សាយសហគ្រាសធុនតូច និងមធ្យម នៃក្រសួងឧស្សាហកម្មនិងពាណិជ្ជកម្មឡាវ មានប្រសាសន៍ថា សិក្ខាសាលានេះមានគោលបំណងលើកកម្ពស់សហគ្រិនភាពក្នុងសង្គមជនពិការ ដែលជាជំហានសំខាន់មួយដើម្បីឆ្ពោះទៅរកការបង្កើតសង្គមមួយ មានភាពសម្បូរបែបក្នុងចំណោមជនពិការទាំងអស់។

ការបង្កើតឲ្យមានសហគ្រិនភាពសង្គមនេះ អាចជួយឱ្យជនពិការមានភាពជីវភាពរស់នៅល្អពេញបរិបូរណ៍ និងរួមចំណែកដល់ការលើកកម្ពស់សហគមន៍របស់ពួកគេ។ សិក្ខាសាលានេះផ្តោតលើការពង្រឹងជំនាញទន់របស់សហគ្រិនក្នុងការជំរុញការអភិវឌ្ឍន៍ផលិតផលរបស់ពួកគេ និងដើម្បីឱ្យពួកគេមានលទ្ធភាពនៅក្នុងការប្រកួតប្រជែងនៅក្នុងទីផ្សារក្នុងស្រុក និងក្នុងតំបន់។

ជាមួយគ្នានេះ អ្នកចូលរួមទាំងអស់ក៏បានពិភាក្សាអំពីបញ្ហាប្រឈម និងឱកាសសម្រាប់ជនពិការនៅក្នុងវិស័យផ្សេងៗ ជាពិសេសគឺវិស័យសេដ្ឋកិច្ច ហើយពួកគេក៏បានស្វែងយល់ពីតួនាទីរបស់សហគ្រាសសង្គមក្នុងការពង្រឹងសិទ្ធិជនពិការ និងការបង្កើតគោលនយោបាយ រួមទាំងយុទ្ធសាស្ត្រក្នុងការផ្តល់ឱកាសក្នុងសង្គមសេដ្ឋកិច្ចរបស់ជនពិការផងដែរ៕

ប្រទេសថៃ ៖ កាលពីថ្ងៃទី១៦ ខែវិច្ឆិកា ឆ្នាំ២០២៣ នៅសាលប្រជុំ Mosconi Center ក្នុងទីក្រុងសាន់ហ្វ្រែនស៊ីស្កូ រដ្ឋកាលីហ្វ័រញ៉ា សហរដ្ឋអាមេរិក លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ បានពិភាក្សាទ្វេភាគីជាមួយលោក Justin Trudeau នាយករដ្ឋមន្ត្រីកាណាដា ក្នុងអំឡុងពេលកិច្ចប្រជុំមេដឹកនាំសេដ្ឋកិច្ច APEC លើកទី៣០ ។

ចំណុចសំខាន់របស់ការជួបពិភាក្សាគ្នានេះ មេដឹកនាំប្រទេសទាំងពីរសង្ឃឹមថា នឹងពង្រឹងកិច្ចសហការទ្វេភាគីឱ្យកាន់តែទូលំទូលាយ ប៉ុន្តែមានក្តីបារម្ភចំពោះស្ថានការណ៍នៅលើពិភពលោកផងដែរ ។ មេដឹកនាំទាំង២រូបជឿថា កិច្ចសហការផ្នែកសេដ្ឋកិច្ចនៅតំបន់អាស៊ីប៉ាស៊ីហ្វិក គឺជាកិច្ចសហការដ៏សំខាន់ដែលនឹងបង្កើតឱកាសជាច្រើន ។

លោក សេដ្ឋា ថាវីស៊ីន នាយករដ្ឋមន្ត្រីថៃថ្លែងថា ការចូលរួមកិច្ចប្រជុំលើកនេះដើម្បីប្រកាសឱ្យគេជ្រាបថា ថៃបានបើកប្រទេសហើយ និងទទួលយកការវិនិយោគ ។ ហេតុការណ៍នៅលើពិភពលោក បានធ្វើឱ្យមានការផ្លាស់ប្តូរទីតាំងផលិតមកតំបន់អាស៊ីកាន់តែច្រើន ដូចជា ប្រទេសថៃ និងវៀតណាម ក្នុងនោះមានក្រុមហ៊ុនឯកជនបរទេសនាំមុខគេ បានចូលមកផលិតរថយន្តអគ្គិសនីនៅថៃ ។

លើកនេះ លោកនាយករដ្ឋមន្ត្រីថៃមានឱកាសពិភាក្សាជាមួយក្រុមហ៊ុនឯកជននាំមុខជាច្រើន ដែលកំពុងពិចារណាយកប្រទេសថៃធ្វើជាទីតាំងផលិត ដោយសារថៃបានផ្តល់សិទ្ធ ផលប្រយោជន៍ និងវិធានការជំរុញការវិនិយោគសម្រាប់បណ្តាក្រុមហ៊ុនឯកជន ហើយវាស្របនឹងតម្រូវការរបស់ក្រុមហ៊ុនទាំងនេះ ។

ចំណែកលោក Justin Trudeau នាយករដ្ឋមន្ត្រីកាណាដាថ្លែងថា ប្រទេសកាណាដានឹងសហការការងារជាមួយរដ្ឋាភិបាលថៃទាំងទ្វេភាគី និងតំបន់ ដើម្បីបន្តទំនាក់ទំនង និងសហការលើផ្នែកនានា ។ កាណាដាមានយុទ្ធសាស្ត្រឥណ្ឌូ-ប៉ាស៊ីហ្វិក ដែលសង្ឃឹមថា នឹងអាចសហការជាមួយថៃ ប៉ុន្តែដោយសារស្ថានការណ៍ពិភពលោក បានធ្វើឱ្យផ្នែកឯកជនត្រូវបង្កើនសក្តានុពលផលិតកម្ម ក៏ដូចជាពង្រឹងកិច្ចសហការអន្តរជាតិឱ្យកាន់តែស៊ីជម្រៅ ព្រោះថៃជាប្រទេសដៃគូពាណិជ្ជកម្មដ៏សំខាន់របស់កាណាដា ។

ទោះយ៉ាងណា ប្រទេសថៃ និងកាណាដា មិនទាន់មានតំបន់ពាណិជ្ជកម្មសេរី (FTA) នៅឡើយទេ ហើយភាគីទាំងពីរមើលឃើញដូចគ្នាថា បើអាចដំណើរការបាន វានឹងផ្តល់ប្រយោជន៍ដល់ថៃ និងកាណាដាយ៉ាងខ្លាំង ។ ភាគីទាំងពីរយល់ឃើញថា កិច្ចព្រមព្រៀង FTA រវាងអាស៊ាន និងកាណាដា ដែលកំពុងចរចាគ្នានេះនឹងក្លាយជាឱកាសល្អ ដែលភាគីទាំងពីរនឹងទទួលបានផលប្រយោជន៍ ៕ ប្រភព ៖ khaosod