សហរដ្ឋអាមេរិក ៖ កាលពីថ្ងៃទី១៧ ខែវិច្ឆិកា ឆ្នាំ២០២៣ សារព័ត៌មានបរទេសរាយការណ៍ថា ប្រធានាធិបតីចិន លោក ស៊ី ជិនពីង បានចាប់ដៃជាមួយនាយករដ្ឋមន្ត្រីជប៉ុន លោក Fumio Kishida នៅក្រៅកិច្ចប្រជុំ APEC ក្នុងទីក្រុងសាន់ហ្វ្រែនស៊ីស្កូ រដ្ឋកាលីហ្វ័រញ៉ា សហរដ្ឋអាមេរិក ។ ក្នុងអំឡុងពេលនោះ នាយករដ្ឋមន្ត្រីជប៉ុនបានអំពាវនាវឱ្យចិនលុបចោលវិធានការហាមឃាត់នាំចូលអាហារសមុទ្រពីជប៉ុន និងពិភាក្សាអំពីអ្នកប្រកបអាជីវកម្មជប៉ុនត្រូវបានចាប់ខ្លួននៅចិន ព្រមទាំងបញ្ហាជម្លោះនៅកោះសេនកាកុ ។

នាយករដ្ឋមន្ត្រីជប៉ុន លោក Fumio Kishida បានថ្លែងថា ៖ «ជុំវិញបញ្ហាការបង្ហូរទឹកចេញពីរោងចក្រថាមពលនុយក្លេអ៊ែរចូលក្នុងមហាសមុទ្រនោះ ខ្ញុំសង្ឃឹមថា ប្រទេសចិននឹងស្ងប់ស្ងាត់ ពេលចិនបានគិតដល់ភស្តុតាងផ្នែកវិទ្យាសាស្ត្រ ។ ជប៉ុនសូមអំពាវនាវឱ្យចិនលុបចោលវិធានការហាមនាំចូលអាហារសមុទ្រពីជប៉ុន ។ ចំពោះស្ថានការណ៍សមុទ្រចិនខាងកើត រួមទាំងកោះសេនកាកុ ខ្ញុំសូមបង្ហាញការបារម្ភម្តងទៀត ហើយជប៉ុនស្នើឱ្យចិនយកឧបករណ៍បណ្តែតទឹកចេញពីបរិវេណដែនទឹកតំបន់សេដ្ឋកិច្ចជប៉ុន (EEZ)» ។

ចំណែកប្រធានាធិបតីចិន លោក ស៊ី ជិនពីង បានថ្លែងទៅកាន់នាយករដ្ឋមន្ត្រីជប៉ុន លោក Fumio Kishida ថា ប្រទេសដែលមានទំហំសេដ្ឋកិច្ចធំបំផុតចំនួន២ របស់តំបន់អាស៊ី ត្រូវបង្កើនទំនាក់ទំនងផ្នែកយុទ្ធសាស្ត្រ និងទទួលយកនូវភាពខុសប្លែកគ្នា ។ លោក ស៊ី ជិនពីង ថ្លែងថា ៖ «ការរស់នៅរួមគ្នាដោយសន្តិវិធី, មិត្តភាពដ៏យូរអង្វែង, ផលប្រយោជន៍រួមគ្នាពីកិច្ចសហការ និងការអភិវឌ្ឍរួមគ្នា គឺជាវិធីដ៏ត្រឹមត្រូវដើម្បីឈានទៅរកផលប្រយោជន៍របស់ពលរដ្ឋចិន និងជប៉ុន» ។

មុននេះ ប្រទេសចិនបានចេញវិធានការហាមឃាត់ការនាំចូលអាហារសមុទ្រពីជប៉ុន ក្រោយពីជប៉ុនបង្ហូរទឹកលាយឡំសារធាតុគីមីចេញពីរោងចក្រថាមពលនុយក្លេអ៊ែរចូលក្នុងសមុទ្រប៉ាស៊ីហ្វិក ។ កាលពីឆ្នាំ២០០៨ ជប៉ុន និងចិនធ្លាប់បានចេញសេចក្តីថ្លែងការណ៍រួមគ្នា ដើម្បីឈានទៅរកសម្ព័ន្ធភាពដែលទទួលបានប្រយោជន៍រួមគ្នា និងការផ្លាស់ប្តូរក្នុងផ្នែកផ្សេងៗ ដូចជា សន្តិសុខ ។ ប៉ុន្តែកាលពីឆ្នាំ២០២២ សម្ព័ន្ធភាពរវាងជប៉ុន និងចិន ត្រូវប្រឈមនឹងឧបសគ្គដោយសារបញ្ហាជម្លោះទឹកដី, ភាពតានតឹងផ្នែកពាណិជ្ជកម្ម រួមទាំងបញ្ហាតៃវ៉ាន់ ៕ ប្រភព ៖ TNN World

សារព័ត៌មានថៃផ្សាយថា កាលពីព្រឹកថ្ងៃទី១៧ ខែវិច្ឆិកា ឆ្នាំ២០២៣ មានហេតុការណ៍គ្រោះរញ្ជួយដីកម្រិត៥.៧ នៅប្រទេសមីយ៉ាន់ម៉ា ។ ចំណុចកណ្តាលនៃគ្រោះរញ្ជួយដីនេះបានកើតឡើងនៅរដ្ឋឆាន ដែលស្ថិតនៅជិតបរិវេណព្រំដែនប្រទេសមីយ៉ាន់ម៉ាជាប់ជាមួយប្រទេសចិន, ឡាវ និងថៃ ហើយវាមានចម្ងាយពីទីក្រុងឈៀងទុង ប្រមាណ៧៦គីឡូម៉ែត្រ ។

គ្រោះរញ្ជួយដីលើកនេះបានបង្កើតកម្លាំងរំញ័រឆ្ងាយរហូតដល់ប្រទេសវៀតណាម និងតំបន់ភាគខាងជើងប្រទេសថៃ ជាពិសេស នៅខេត្តឈៀងម៉ៃ និងខេត្តឈៀងរ៉ាយ ។ គេបានឃើញអគារសិក្សាជាច្រើនរង្គឺ រហូតដល់កូនសិស្សត្រូវប្រញាប់រត់ចេញពីអគារ ឬលូនចូលក្រោមតុ ដោយសារពេលកើតហេតុ គឺជាពេលដែលកូនសិស្សកំពុងរៀនក្នុងថ្នាក់ ។

សារព័ត៌មានវៀតណាមរាយការណ៍ថា ពលរដ្ឋដែលរស់នៅជាន់លើរបស់អាផាតមិនខ្ពស់ៗជាច្រើនកន្លែងនៅទីក្រុងហាណូយប្រាប់ថា ពួកគេមានអារម្មណ៍វិលមុខ ហើយបានឃើញអំពូលភ្លើងនៅលើជញ្ជាំងមានបញ្ហា២នាទី ខណៈវត្ថុផ្សេងៗបានផ្លាស់ទី ។ រីឯស្ថាប័នធរណីវិទ្យារបស់វៀតណាមរាយការណ៍ថា ពួកគេនឹងបន្តតាមដានស្ថានការណ៍គ្រោះរញ្ជួយដីនៅប្រទេសមីយ៉ាន់ម៉ា ។

ហេតុការណ៍គ្រោះរញ្ជួយដីនេះ ជំហានដំបូង នៅមិនទាន់មានសេចក្តីរាយការណ៍លម្អិតអំពីការខូចខាត និងអ្នករ.ងរបួ.សទេ ។ ប៉ុន្តែគេរំពឹងថា គ្រោះរញ្ជួយដីកម្រិតមធ្យមនេះ នឹងមិនបង្កផលប៉ះពាល់ធ្ងន់ធ្ងរឡើយ ដោយវាគ្រាន់តែធ្វើឱ្យវត្ថុផ្សេងៗធ្លាក់ចុះមកក្រោម និងកញ្ចក់បង្អួចបែកប៉ុណ្ណោះ ។

គេចាត់ទុកថា មីយ៉ាន់ម៉ាជាប្រទេសមួយដែលបានកើតរញ្ជួយដីច្រើនបំផុតនៅលើពិភពលោក ហើយរដ្ឋឆាន គឺជាកន្លែងកើតរញ្ជួយដីញឹកញាប់ជាងគេ ។ កាលពីខែមិថុនា ឆ្នាំ២០២៣ ប្រទេសមីយ៉ាន់ម៉ាបានកើតគ្រោះរញ្ជួយដីខ្នាតតូចមួយនៅទីក្រុងឈៀងទុង ៕ ប្រភព ៖ TNN World

ការដាក់ពាក្យសម្ងាត់ (Password) សម្រាប់គណនីផ្ទាល់ខ្លួននៅក្នុងបណ្តាញសង្គមឱ្យងាយស្រួលចាំសម្រាប់មនុស្សគ្រប់គ្នា គឺជារឿងល្អ ព្រោះពួកគេនឹងអាចចងចាំវាបានច្បាស់ ។ ប៉ុន្តែវាក៏មានគុណវិបត្តិខ្លាំងផងដែរ បន្ទាប់ពីក្រុមហ៊ុន Nordpass ជាក្រុមហ៊ុនផ្តល់សេវាកម្មគាំទ្រអ្នកប្រើប្រាស់អនឡាញ ដើម្បីបង្កើតពាក្យសម្ងាត់ផ្ទាល់ខ្លួនឱ្យមានសុវត្ថិភាព បានបង្ហាញរបាយការណ៍មួយបញ្ជាក់អំពី «ការកំណត់ពាក្យសម្ងាត់» ។

របាយការណ៍នេះលើកឡើងថា ពាក្យសម្ងាត់ដ៏ពេញនិយម ដែលមនុស្សទូទៅបានប្រើប្រាស់ច្រើនបំផុតជារៀងរាល់ឆ្នាំ គឺពួកគេកំណត់ឡើងឱ្យងាយស្រួលចាំ ហើយពាក្យសម្ងាត់ទាំងនេះមិនបានឆ្លងកាត់ការគិតអ្វីច្រើនទេ ។ ហេតុនេះ ធ្វើឱ្យគណនីក្នុងបណ្តាញសង្គមភាគច្រើនប្រឈមនឹងគេលួចចូលយ៉ាងងាយស្រួល ។

ពាក្យសម្ងាត់ដែលមនុស្សទូទៅប្រើប្រាស់ច្រើនបំផុត គឺលេខ «123456» ហើយមានគណនីដែលប្រើប្រាស់ពាក្យសម្ងាត់ទាំងនេះ រហូតដល់៤លាន៥សែនគណនី ។ ក្រុមហ៊ុន Nordpass បញ្ជាក់ថា ពាក្យសម្ងាត់បែបនេះអាចធ្វើឱ្យអ្នកប្រើប្រាស់ងាយស្រួលចាំ និងមិនងាយភ្លេច ។ ប៉ុន្តែបើគណនីពួកគេស្ថិតក្នុងគោលដៅចារកម្មទិន្នន័យ គឺគណនីទាំងនេះនឹងត្រូវគេលួចចូលបានក្នុងរយៈពេលត្រឹមតែ១វិនាទីប៉ុណ្ណោះ ។

បន្ទាប់មក មនុស្សភាគច្រើនចូលចិត្តដាក់ពាក្យសម្ងាត់ថា «Admin» ដែលពាក្យសម្ងាត់នេះ មានអ្នកប្រើប្រាស់រហូតដល់ជាង៤លានគណនី ។ រីឯពាក្យសម្ងាត់ជាតួលេខ ក៏មានការពេញនិយមពីមនុស្សទូទៅដែរ ដូចជា ៖ «1234» ឬ «12345678» ឬ «123456789» ។ ដូច្នេះ ពាក្យសម្ងាត់ទាំងនេះ គេចំណាយពេលត្រឹមតែ១វិនាទីប៉ុណ្ណោះ គឺអាចចូលក្នុងគណនីរបស់អ្នកណាម្នាក់យ៉ាងងាយស្រួល ។

ក្រៅពីការដាក់ពាក្យសម្ងាត់ជាតួលេខ ពាក្យសម្ងាត់ជាពាក្យពេចន៍ផ្សេងៗ ដូចជា «password», «P@ssw0rd» និង «qwertyuiop» ក៏ត្រូវបានគេលួចចូលក្នុងរយៈពេលមិនដល់១វិនាទីដូចគ្នា ។ ចំណែកពាក្យសម្ងាត់ដែលគេចំណាយពេលវេលាចូលគណនីយូរបន្តិច គឺពាក្យសម្ងាត់ «UNKOWN» គឺគេបានចំណាយពេលរហូតដល់១៧វិនាទី ។

ក្រុមហ៊ុន Nordpass បញ្ជាក់ថា បើចង់ឱ្យគណនីផ្ទាល់ខ្លួនមានសុវត្ថិភាព និងពិបាកឱ្យគេលួចយកទិន្នន័យនោះ គួរតែជាពាក្យសម្ងាត់ដែលប្រើប្រាស់តួអក្សរ និងតួលេខ២០តួ ក្នុងនោះមានទាំងអក្សរតូច និងអក្សរធំលាយឡំគ្នា ។ ក្រុមហ៊ុនបញ្ជាក់ទៀតថា យើងពុំគួរប្រើប្រាស់ថ្ងៃខែឆ្នាំកំណើតរបស់យើងមកធ្វើជាពាក្យសម្ងាត់ទេ ៕ ប្រភព ៖ Mono News

កាលពីថ្ងៃពី១៧ខែវិច្ឆិកានេះ សហរដ្ឋអាមេរិកនិងហ្វីលីពីនបានចុះកិច្ចព្រមព្រៀងនុយក្លេអ៊ែរជាមួយគ្នា ដែលអនុញ្ញាតិឲ្យសហរដ្ឋអាមេរិកនាំចេញបច្ចេកវិទ្យានុយក្លេអ៊ែរនិងសម្ភារៈមួយចំនួនទៅកាន់ហ្វីលីពីន ដើម្បីប្រើប្រាស់ក្នុងការរុករក ការបំបែកកាបូន និងជំរុញឲ្យមានការកកើតឡើងនៃថាមពលថ្មីៗជំនួសថាមពលចាស់ៗដូចជាប្រេង និងអគ្គីសនី។

រដ្ឋមន្រ្តីការបរទេស លោកអាន់តូនី ប្លីងគេន បាននិយាយនៅក្នុងកិច្ចប្រជុំកំពូល APEC នាទីក្រុងសាន់ហ្រ្វាន់ស៊ីស្កូនៃសហរដ្ឋអាមេរិកថា អាមេរិកនឹងផ្តល់នូវគ្រឿងបរិក្ខារបច្ចេកវិទ្យាផ្សេងៗទៅកាន់ហ្វីលីពីន សម្រាប់ការអភិវឌ្ឍមួយចំនួន ដូចជាការសិក្សាពីប្រតិកម្មម៉ូលីគីល និងហេដ្ឋរចនាសម្ព័ន្ធថាមពលអ៊ុយក្លេអ៊ែរស៊ីវិល។

ប្រធានាធិតីហ្វីលីពីនលោក ហ្វឺឌីណាន់ ម៉ាកូស ជូនៀ ក៏បានថ្លែងនៅក្នុងសន្ទរកថាមួយថា «ហ្វីលីពីនកំពុងសំឡឹងឃើញពី ការរុករកថាមពលនុយក្លេអ៊ែរគឺជាផ្នែកមួយដ៏សំខាន់ក្នុងប្រទេសហ្វីលីពីននឹងអាចសម្រេចជោគជ័យនៅឆ្នាំ២០៣២ ហើយសហរដ្ឋអាមរិកគឺជាដៃគូរសហការដ៏ល្អនៃដំណើរការនេះ»។

ម៉្យាងវិញទៀត ហ្វីលីពីនមានបំណងចង់ទាញយកថាមពលនុយក្លេអ៊ែ ដែលជាប្រភពមួយជំនួសឲ្យថាមពលផ្សេងៗព្រោះ ជាក់ស្តែង ភូមិភាគអាស៊ីអាគ្នេយ៍យើងនេះ ងាយនឹងរងគ្រោះដោយសារតែបញ្ហាមួយចំនួន មានដូចជា ការប្រែប្រួលតម្លៃប្រេងពិភពលោក ការដាច់ចរន្តអគ្គិសនីតាមរដូវកាល និងអត្រាអគ្គិសនីខ្ពស់ជាដើម ដែលជាហេតុបណ្តាលឲ្យមានផលប៉ះពាល់យ៉ាងខ្លាំងដល់ប្រទេសនីមួយៗនៅអាស៊ី។

គួរបញ្ជាក់ផងដែរថា នៅចុងបញ្ចប់នៃឆ្នាំ 1984 មានកត្តាមួយចំនួនបានជំរុញឲ្យរោងចក្រថាមពលនុយក្លេអ៊ែរ Bataan របស់ហ្វីលីពីនត្រូវបានបំផ្លាញចោល រីឯគ្រោះមហន្តរាយនុយក្លេអ៊ែរ Chernobyl ក៏កើតមានយ៉ាងសាហាវ និងមានការចោទប្រកាន់អំពើពុករលួយផងដែរ។ ដូច្នេះ ការប៉ុនប៉ងពីមុនដើម្បីបន្តថាមពលនុយក្លេអ៊ែរនៅក្នុងប្រទេសហ្វីលីពីនត្រូវបានបញ្ឈប់ដោយសារតែមានការព្រួយបារម្ភអំពីសុខសន្តិភាពទាំងក្នុងនិងក្រៅប្រទេស។ ប៉ុន្តែថ្មីៗនេះ លោក Marcos បានពិភាក្សាឡើងវិញអំពីលទ្ធភាពក្នុងការស្តារនូវរោងចក្រថាមពលនុយក្លេអ៊ែរនេះ ដែលបំណងរបស់គាត់គឺនឹងផលិតថាមពលថ្មីឡើង ដើម្បីឆ្លើយតបទៅនឹងវិបត្តិថាមពលដែលក្នុងកើតមានក្នុងសតវត្សទី២១នេះ៕

បរទេស៖ ក្រសួងការបរទេសអាមេរិកបានយល់ព្រមក្នុងការលក់មីស៊ីល Tomahawk ពីរប្រភេទទៅឱ្យប្រទេសជប៉ុនជាមួយនឹងតម្លៃសរុបប្រហែល ២.៣៥ ពាន់លានដុល្លារ។

យោងតាមប្រភពព័ត៌មាន US News ដែលបានចុះផ្សាយកាលពីថ្ងៃទី១៧ ខែវិច្ឆិកាថា ប្រទេសជប៉ុនបានទិញមីស៊ីល Tomahawk ពីសហរដ្ឋអាមេរិក ក្នុងគោលបំណងបន្សាបការគំរាមកំហែងដែលកំពុងកើនឡើងនឹងធ្វើឱ្យប្រសើរឡើងនូវសមត្ថភាពរបស់ប្រទេសជប៉ុនក្នុងការទប់ទល់នឹងការគំរាមកំហែងនាពេលបច្ចុប្បន្ន និងអនាគត។

ក្រសួងការបរទេសអាមេរិកក៏សង្ឃឹមដែរថា ការលក់មីស៊ីលឆ្លងទ្វីប Tomahawk ចំនួន ៤០០ គ្រាប់ទៅឱ្យប្រទេសជប៉ុន ដែលមានតម្លៃ ២.៣៥ ពាន់លានដុល្លារនឹង “ធ្វើឱ្យប្រសើរឡើងនូវសន្តិសុខសម្រាប់សម្ព័ន្ធមិត្តដ៏សំខាន់ដែលដើរតួជាកម្លាំងសម្រាប់ស្ថិរភាពនយោបាយ និងការរីកចម្រើន” ។ យោងតាមមន្ទីរបញ្ចកោណ បានឱ្យដឹងដែរថា បន្ថែមពីលើប្រភេទមីស៊ីល Tomahawk ពីរប្រភេទ ការលក់ក៏រួមបញ្ចូលនូវប្រព័ន្ធគ្រប់គ្រងអាវុធយុទ្ធសាស្ត្រ Tomahawk ចំនួន ១៤ ប្រភេទ កម្មវិធី សម្ភារៈជំនួយ គ្រឿងបន្លាស់ និងសេវាកម្មជំនួយបច្ចេកទេសទៀតផង។

ទោះជាយ៉ាងណាក៏ដោយ បច្ចុប្បន្នប្រទេសជប៉ុនមិនទាន់មានកាំជ្រួចមីស៊ីលវាយប្រហាររយៈចម្ងាយឆ្ងាយនៅឡើយទេ ពីព្រោះរដ្ឋធម្មនុញ្ញរបស់ប្រទេសបានចែងថា ឧបករណ៍យោធាបម្រើតែគោលបំណងការពារជាតិប៉ុណ្ណោះ។ ប៉ុន្តែថ្មីៗនេះ ប្រទេសជប៉ុនបានបកស្រាយឡើងវិញនូវរដ្ឋធម្មនុញ្ញរបស់ខ្លួន ដោយអនុញ្ញាតឱ្យខ្លួនបើកការវាយប្រហារ ប្រសិនបើសន្តិសុខជាតិត្រូវបានគំរាមកំហែង។

មីស៊ីល Tomahawks ត្រូវបានគេដាក់រហ័សនាមថា “អ្នកនាំសារនៃសង្រ្គាម” ដោយសារតែពួកវាត្រូវបាននាំចេញដោយសហរដ្ឋអាមេរិកជាញឹកញាប់ដើម្បីវាយប្រហារសត្រូវជាមុននៅក្នុងសង្រ្គាមជាច្រើន។ កាំជ្រួចមីស៊ីលនេះមានតម្លៃ ១.៥ លានដុល្លារក្នុងមួយកាំជ្រួច បំពាក់ក្បាលគ្រាប់ទម្ងន់ ៤៥៤ គីឡូក្រាម មានចម្ងាយប្រហែល ១,៦០០ គីឡូម៉ែត្រ និងត្រូវបានដឹកនាំដោយប្រព័ន្ធកំណត់ទីតាំងសកល (GPS)។

គួរបញ្ជាក់ដែរថា ក្រៅពីអាមេរិក អង់គ្លេសក៏ជាប្រទេសតែមួយគត់ដែលមានស្តុកគ្រាប់មីស៊ីល Tomahawk ផងដែរ។ កាលពីខែសីហា សហរដ្ឋអាមេរិកបានចុះហត្ថលេខាលើកិច្ចព្រមព្រៀងមួយ ដើម្បីលក់មីស៊ីល Tomahwak ជាង ២០០ គ្រាប់ដែលមានតម្លៃសរុបប្រហែល ៨៣០ លានដុល្លារទៅឱ្យអូស្ត្រាលី ដោយរំពឹងថានឹងបំពាក់នូវនាវាពិឃាត Hobart-class របស់ប្រទេសនេះ៕

ឆ្លើយតបនឹង សារព័ត៌មាន VnExpress នៅល្ងាចថ្ងៃទី១៧ ខែវិច្ឆិកា អនុរដ្ឋលេខាធិការក្រសួងទេសចរណ៍កម្ពុជាមានប្រសាសន៍ថា សកម្មភាពរបស់អ្នកលេងបណ្តាញសង្គមទិកតុកជាជនជាតិវៀតណាមនៅប្រាសាទអង្គរវត្តកាលពីថ្ងៃទី២៣ ខែតុលា បានជះឥទ្ធិពលអវិជ្ជមានដល់មុខមាត់ទេសចរណ៍។ បច្ចុប្បន្ន ភាគីពាក់ព័ន្ធកំពុងពិចារណាដាក់ពិន័យលើបុគ្គលនេះ ដែលអាចហាមឃាត់ការចូលប្រទេសកម្ពុជារយៈពេល ៥-១០ ឆ្នាំ។ នេះបើយោងតាមការចុះផ្សាយរបស់សារព័ត៌មាន VnExpress ព្រឹកថ្ងៃទី១៨ វិច្ឆិកា។

អ្នកលេងបណ្តាញសង្គមទិកតុករូបនោះមានឈ្មោះថា Hua Quoc Anh រស់នៅក្នុងទីក្រុងហូជីមិញ បានទៅប្រាសាទអង្គរវត្ត ដើម្បីថតរឿង និងថតរូបកាលពីថ្ងៃទី២៣ ខែតុលា រួចបង្ហោះវីដេអូនៅលើ TikTok ជាមួយនឹងរូបភាពនារីម្នាក់ស្លៀកសម្លៀកបំពាក់ពណ៌ផ្កាឈូក កាន់ដំបងដើរជុំវិញប្រាសាទអង្គរវត្ត ហើយបញ្ចូលវា រូបភាពនៃទង់ជាតិថៃ និងព្រះមហាក្សត្រ អមដោយសំឡេង “Hello Thailand”។

ជាមួយគ្នានេះដែរអាជ្ញាធរជាតិអប្សរានៅថ្ងៃទី ១២ ខែវិច្ឆិកា បានវាយតម្លៃវីដេអូនេះថាបានប៉ះពាល់ដល់វប្បធម៌ និងបេតិកភណ្ឌរបស់កម្ពុជា ហើយបានស្នើឱ្យបណ្ដាញសង្គម TikTok ទប់ស្កាត់វីដេអូនេះ។ អាជ្ញាធរជាតិអប្សរាក៏បានសំណូមអរអ្នកប្រើប្រាស់បណ្តាញសង្គមកុំបន្តចែករំលែក ឬគាំទ្រសកម្មភាពអវិជ្ជមានខណៈវីដេអូនោះត្រូវបានលុបចេញពីបណ្តាញសង្គម TikTok ហើយ។

បើតាមសម្តីរបស់គណៈមេធាវីទីក្រុងហាណូយ ដោយផ្អែកលើព័ត៌មានខាងលើ សកម្មភាពរបស់បុគ្គលនេះធ្វើឡើងក្នុងទឹកដីកម្ពុជា ដូច្នេះការចាត់ការលើបុគ្គលនេះ គឺអាស្រ័យលើអាជ្ញាធរកម្ពុជា និងអនុវត្តទៅតាមច្បាប់របស់ប្រទេសនេះ។
បុគ្គល Hua Quoc Anh កាលពីដើមសប្តាហ៍នេះ បានបដិសេធមិនចែករំលែកអំពីហេតុផលនៃការថតវីដេអូនេះនៅក្នុងប្រទេសកម្ពុជា ប៉ុន្តែបានបញ្ចូលរូបភាព និងសំឡេងទាក់ទងនឹងប្រទេសថៃដោយបានទទួលស្គាល់កំហុសរបស់ខ្លួន ហើយ«សង្ឃឹមថានឹងត្រូវបានលើកលែងទោស»ពីប្រជាជនកម្ពុជា។

គួរបញ្ជាក់ថា ក្រោយពីបានឃើញវីដេអូនារីម្នាក់ជាជនជាតិវៀតណាម ដែលបានបង្ហោះក្នុងគណនីទិកតុកបុគ្គលខាងលើនេះធ្វើឱ្យអ្នកលេងបណ្តាញសង្គមកម្ពុជា រួមទាំងខ្មែរក្រោមផង មិនពេញនិងរិះគន់យ៉ាងខ្លាំងដែលនារីនោះបានស្លៀកសំលៀកបំពាក់ថៃ កាត់តមានរូបទង់ជាតិនិងស្តេចថៃបង្ហោះនៅបណ្តាញសង្គមទិកតុកដោយដាក់ភ្លេងថៃទៀត ប៉ុន្តែការថតនោះគឺនៅលើទឹកដីប្រាសាទអង្គរវត្ត៕

បរទេស៖ កងទ័ពអ៊ីស្រាអែលបានប្រកាសថា ខ្លួននឹងវាយប្រហារលើគោលដៅរបស់ក្រុមហាម៉ាសគ្រប់ទីកន្លែងដែលពួកគេរកឃើញ រួមទាំងនៅតំបន់ហ្គាហ្សាភាគខាងត្បូងផងដែរ។

យោងតាមឧត្តមនាវីទោ Daniel Hagari អ្នកនាំពាក្យកងកម្លាំងការពារអ៊ីស្រាអែល (IDF) បានប្រកាសកាលពីថ្ងៃទី ១៧ ខែវិច្ឆិកាថា “យើងនឹងប្តេជ្ញាបង្កើនយុទ្ធនាការរបស់យើងទៅគ្រប់ទីកន្លែងដែលក្រុមហាម៉ាសមាន ក៏ដូចជានៅទូទាំងតំបន់ហ្កាហ្សាផងដែរ” ។ លោក Hagari បានបន្តទៀតថា “ប្រតិបត្តិការនេះនឹងប្រព្រឹត្តទៅតាមពេលវេលា ទីកន្លែង និងក្រោមលក្ខខណ្ឌល្អបំផុតសម្រាប់កងទ័ពអ៊ីស្រាអែល”។

កន្លងមក កងទ័ពអាកាសអ៊ីស្រាអែលបានទម្លាក់ខិត្តប័ណ្ណនៅតំបន់ភាគខាងកើតនៃទីក្រុង Khan Younis និងភាគខាងត្បូងតំបន់ហ្គាហ្សា ដោយអំពាវនាវឱ្យមនុស្សគ្រប់គ្នាចូលជ្រកកោនកន្លែងផ្សេងៗដើម្បីធានាសុវត្ថិភាពរបស់ពួកគេ។

ទាក់ទងនឹងខិត្តប័ណ្ណដែលរាយប៉ាយនៅភាគខាងកើតនៃទីក្រុង Khan Younis លោក Mark Regev ជំនួយការនាយករដ្ឋមន្ត្រីអ៊ីស្រាអែល បាននិយាយថា កងកម្លាំងការពារអ៊ីស្រាអែល (IDF) នឹងត្រូវចូលទៅកាន់ទីក្រុងដើម្បី “បណ្តេញសមាជិកក្រុមហាម៉ាសចេញពីផ្លូវរូងក្រោមដី និងបន្ទាយក្រោមដី”។ យោងតាមលោក Regev ក៏បានបន្តទៀតថា បច្ចុប្បន្ន “យើងកំពុងស្នើសុំឱ្យមនុស្សគ្រប់គ្នាជម្លៀសចេញពីទីនេះដើម្បីធានាសុវត្ថិភាពរបស់ពួកគេ”។

អ្នកនាំពាក្យ IDF ក៏បាននិយាយផងដែរថា ថ្មីៗនេះទាហានអ៊ីស្រាអែលបានបន្តស្វែងរកតំបន់មន្ទីរពេទ្យ Al-Shifa នៅភាគខាងជើងនៃទីក្រុង Gaza ។ លោក Hagari បាននិយាយថា “យើងបានរកឃើញរចនាសម្ព័ន្ធក្រោមដីបន្ថែមទៀត ហើយកំពុងប្រមូលព័ត៌មានទាំងអស់អំពីចំណាប់ខ្មាំង”។ ដូច្នេះបច្ចុប្បន្ន “ទាហានអ៊ីស្រាអែលកំពុងស៊ើបអង្កេតផ្លូវរូងក្រោមដីដែលបានរកឃើញនៅលើមូលដ្ឋានមន្ទីរពេទ្យនៃតំបន់ហ្កាហ្សា”។

គួរបញ្ជាក់ដែរថា នៅចុងខែតុលា អ៊ីស្រាអែលបានបង្កើនយុទ្ធនាការប្រឆាំងនឹងតំបន់ Gaza ក្នុងការសងសឹកចំពោះការវាយប្រហារថ្ងៃទី៧ ខែតុលា ដោយក្រុមហាម៉ាស ។ រដ្ឋមន្ត្រីការពារជាតិ Yoav Gallant បានប្រកាសថា អ៊ីស្រាអែល “បានខិតជិតដល់គោលដៅរបស់ខ្លួនក្នុងការបំផ្លាញប្រព័ន្ធយោធារបស់ពួកហាម៉ាសនៅភាគខាងជើងហ្គាហ្សា ហើយនឹងបន្តតាមប្រមាញ់ ក៏ដូចជាចាប់សមាជិកក្រុមហាម៉ាសរហូតទាល់តែបាន”៕