Zhao Lusi បង្ហើបថាការប្រគំតន្រ្តីលើកដំបូងរបស់នាងខាតលុយយ៉ាងច្រើន

ការប្រគំតន្រ្តីលើកដំបូងរបស់ Zhao Lusi នៅឯក្រៅប្រទេសត្រូវបានតារាសម្តែងរូបនេះបង្ហើបដោយផ្ទាល់ថាបានរងការខាតបង់យ៉ាងច្រើន។ កន្លងមកនេះតម្លៃសំបុត្រត្រូវបានអ្នកលេងអ៊ីនធឺណិតរិះគន់ថាមានតម្លៃថ្លៃស្មើនឹងតារាចម្រៀងអាជីព ប៉ុន្តែយ៉ាងណាចំណូលមិនស្មើនឹងចំណាយដែលធ្វើឱ្យនាងខាតបង់។

តារាសម្តែងចិន Zhao Lusi ថ្មីៗនេះបានបើកចំហអំពីភាពចម្រូងចម្រាសជាច្រើនជុំវិញអាជីពរបស់នាងក្នុងអំឡុងពេលផ្សាយផ្ទាល់ជាមួយអ្នកគាំទ្រ។ Zhao Lusi បានចែករំលែករឿងរ៉ាវរបស់មិត្តភក្តិជិតស្និទ្ធម្នាក់ដែលធ្វើការលើយុទ្ធនាការផ្សព្វផ្សាយពាណិជ្ជកម្មសម្រាប់ម៉ាកយីហោមួយដែលនាងបានគាំទ្រហើយបានបង្ហាញថានាងផ្ទាល់ធ្លាប់ត្រូវបានដាក់ក្នុងបញ្ជីខ្មៅក្រៅផ្លូវការពីឧស្សាហកម្មនេះ។

Zhao Lusi បាននិយាយថា «នាងបាននៅក្បែរខ្ញុំក្នុងអំឡុងពេលដ៏លំបាកបំផុតរបស់ខ្ញុំ។ ដោយសារតែខ្ញុំ នាងក៏ត្រូវបានមើលរំលង ត្រូវបានបោះបង់ចោលដោយឧស្សាហកម្ម និងមិនអាចធ្វើការបានមួយរយៈ។ យ៉ាងណាក៏ដោយ នាងនៅតែឈរក្បែរខ្ញុំ»។ តួឯកស្រីរូបនេះក៏បានរម្លឹកអំពីការប្រគំតន្ត្រី Stay Romantic របស់នាងនៅប្រទេសសៀមដែលក្លាយជាប្រធានបទចម្រូងចម្រាសយ៉ាងខ្លាំងបន្ទាប់ពីបញ្ចប់ការសម្តែង។

Zhao Lusi បាននិយាយថាទោះបីជាការលក់សំបុត្រដ៏ច្រើននៃការប្រគំតន្ត្រីក៏ដោយ ព្រឹត្តិការណ៍នេះមិនបាននាំមកនូវប្រាក់ចំណេញផ្នែកហិរញ្ញវត្ថុដូចដែលមនុស្សជាច្រើនបានសន្មត់នោះទេ។ នាងពន្យល់ថា «និយាយឱ្យត្រង់ទៅ ការប្រគំតន្ត្រីបានខាតបង់ប្រាក់យ៉ាងច្រើន។ ប៉ុន្តែរឿងសំខាន់បំផុតមិនមែនជាប្រាក់ចំណេញទេ វាគឺជាឱកាសដើម្បីជួបមនុស្សគ្រប់គ្នា។ យើងបានបង្កើតឱកាសនេះដោយចេតនាសម្រាប់ពួកយើងដើម្បីភ្ជាប់ទំនាក់ទំនង។ ចាប់ពីការហាត់សម និងការសម្តែងរហូតដល់ពេលវេលាចុងក្រោយនៅលើឆាក ការរកលុយមិនដែលជាអាទិភាពរបស់យើងទ»។

នៅថ្ងៃទី៩ ខែឧសភា Zhao Lusi បានធ្វើការប្រគំតន្ត្រីនៅក្នុងប្រទេសសៀមដែលជាទីកន្លែងដែលអាចផ្ទុកអ្នកចូលរួមបានប្រហែល ១២,០០០នាក់ ហើយក៏ជាលើកដំបូងដែលនាងបានរៀបចំការប្រគំតន្ត្រីនៅក្រៅប្រទេសដែលលក់សំបុត្រជាមួយនឹងការសម្តែងរយៈពេលជិត៤ម៉ោង។

ទោះជាយ៉ាងណា ការប្រគំតន្រ្តីលើកដំបូងរបស់ Zhao Lusi នៅក្រៅប្រទេសបានប្រឈមនឹងការរិះគន់យ៉ាងច្រើន ដោយមានអ្នកចែករំលែកថាកម្មវិធីរបស់នាងមនុស្សចូលរួមមិនពេញ ការច្រៀងគ្រាន់តែធ្វើត្រាប់តាមបបូរមាត់ ខណៈការរាំរបស់នាងធ្វើឱ្យអ្នកគាំទ្រចិនរិះគន់ថាស៊ិចស៊ីមិនសមរម្យដូច Lisa រួមទាំងការរិះគន់ជាច្រើនទៀត។ អ្នកចូលរួមជាច្រើនបានសម្តែងការខកចិត្ត ជាពិសេសបន្ទាប់ពីបានចំណាយប្រាក់ទិញសំបុត្រចាប់ពី ៤៨៨ យ័ន ដល់ ១៩៤០ យ័ន។

ទោះបីជាការរៀបចំខាតលុយក៏ដោយ Zhao Lusi បានប្រកាសពីផែនការសម្រាប់ការប្រគំតន្ត្រីមួយផ្សេងទៀតនៅម៉ាកាវនៅថ្ងៃទី១១ ខែកក្កដា។ នៅពេលដែលអាជីពសម្តែងរបស់នាងមិនទាន់មានសន្ទុះឡើងវិញ តារាស្រីរូបនេះហាក់ដូចជាប្តេជ្ញាចិត្តពង្រីកសកម្មភាពរបស់នាងក្នុងវិស័យតន្ត្រី៕