PituRooms គឺជាសណ្ឋាគារស្ដើងបំផុតនៅលើពិភពលោក ដែលបានបើកដំណើរការដំបូងនៅខែធ្នូ ឆ្នាំ២០២២ នឹងមានទីតាំងនៅទីក្រុង Salgatiga កណ្តាលកោះជ្វានៃប្រទេសឥណ្ឌូនេស៊ី។ បច្ចុប្បន្នសណ្ឋាគារថ្មីមួយនេះ កំពុងព្យាយាមបង្កើតកំណត់ត្រាពិភពលោក ជាសណ្ឋាគារតូចនឹងស្ដើងជាងគេបំផុត ជាមួយទទឹង ២.៨ ម៉ែត្រ។
យោងតាមគេហទំព័រ CNN បានឱ្យដឹងដែរថា គម្រោងនេះមិនត្រឹមតែមានគោលបំណងបង្កើតកំណត់ត្រាពិភពលោកប៉ុណ្ណោះទេ ប៉ុន្តែថែមទាំងចង់ទាក់ទាញការចាប់អារម្មណ៍ពីភ្ញៀវទេសចរអន្តរជាតិមកកាន់ទីក្រុងតូចមួយនេះផងដែរ។

បច្ចុប្បន្ន សណ្ឋាគារ Pitu Rooms មានបន្ទប់ចំនួន ៧ និងកម្ពស់ ៥ ជាន់ ដែលបន្ទប់នីមួយៗមានទំហំធំល្មមសម្រាប់ដាក់គ្រែពីរ រួមទាំងមានបន្ទប់ទឹកតូចមួយដែលមានផ្កាឈូក និងបង្គន់ ហើយត្រូវបានតុបតែងខុសៗគ្នា។ ដូច្នេះ ភ្ញៀវនៅ PituRooms អាចមើលឃើញទេសភាពភ្នំដ៏អស្ចារ្យពីបន្ទប់សណ្ឋាគាររបស់ពួកគេ។ ចំណែកឯនៅលើដំបូលសណ្ឋាគារវិញមានភោជនីយដ្ឋានដែលមានឯកទេសខាងម្ហូបក្នុងស្រុក ដោយ Pitu Rooms ក៏មានគម្រោងរៀបចំព្រឹត្តិការណ៍ និងការតាំងពិពណ៌សិល្បៈផ្សេងៗផងដែរ។

ម្ចាស់សណ្ឋាគារបាននិយាយថា៖ គាត់ចង់ឱ្យភ្ញៀវទេសចរទាំងអស់ទទួលបានបទពិសោធន៍ដ៏រីករាយនិងអារម្មណ៍ប្លែកៗជាមួយនឹងទីក្រុង Salatiga ដែលមានទីតាំងនៅជើងភ្នំ Merbabu។

ទោះបីជាយ៉ាងណាក៏ដោយ សណ្ឋាគារនេះបានស្វាគមន៍ភ្ញៀវអន្តរជាតិត្រឹមតែ ៥% ប៉ុណ្ណោះ ដោយសារតែភ្ញៀវទេសចរអន្តរជាតិមិនសូវស្គាល់។ សម្រាប់ប្រជាជនឥណ្ឌូនេស៊ីវិញត្រូវបានគេស្គាល់ថា PituRooms គឺជាសណ្ឋាគារដែលមានអាហារល្អ ហេដ្ឋារចនាសម្ព័ន្ធ និងគុណភាពជីវិតល្អ។ មនុស្សភាគច្រើនបានវាយតម្លៃទីក្រុងនេះថាជា “កន្លែងដ៏ល្អសម្រាប់អ្នកចូលនិវត្តន៍”៕

ប្រទេសវៀតណាម ៖ Nguyen Cenh Cong ជាទីប្រឹក្សាពាណិជ្ជកម្មនៃស្ថានទូតវៀតណាមប្រចាំប្រទេសអង់គ្លេសលើកឡើងថា កិច្ចព្រមព្រៀងពាណិជ្ជកម្មសេរីរវាងអង់គ្លេស និងវៀតណាម (UK-V FTA) និងការមានចំណែករួមរបស់អង់គ្លេសក្នុងកិច្ចព្រមព្រៀងភាពជាដៃគូសេដ្ឋកិច្ចប៉ាស៊ីហ្វិក (CPTPP) បានជួយឱ្យកាហ្វេវៀតណាមមានប្រៀបក្នុងការប្រកួតប្រជែងលើទីផ្សារអង់គ្លេស ។

កាលពីខែឧសភា ឆ្នាំ២០២៣ ប្រទេសអង់គ្លេសបាននាំចូលកាហ្វេពីប្រទេសជាង៦០ ក្នុងនោះអង់គ្លេសបាននាំចូលកាហ្វេពីប្រទេសចម្បងៗចំនួន៥ ស្មើជាង១.០០០តោន ។ ហេតុនេះ ប្រទេសវៀតណាមស្ថិតក្នុងលំដាប់ទី១ បន្ទាប់មក គឺប្រទេសប្រេស៊ីល, ហូឡង់, ហុងឌូរ៉ាស និងអេស្ប៉ាញ ។

រយៈពេល៥ខែដំបូងនៃឆ្នាំ២០២៣ ប្រទេសអង់គ្លេសបាននាំចូលកាហ្វេស្មើជិត២ម៉ឺនតោនពីវៀតណាម ។ ចំណែកតម្លៃនាំចេញរបស់កាហ្វេវៀតណាមទៅកាន់អង់គ្លេស គឺខ្ពស់ជាងតម្លៃនាំចេញទូទៅក្នុងរយៈពេលដូចគ្នារហូតដល់១៣,៧% ។ នៅខែមិថុនា ឆ្នាំ២០២៣ តម្លៃនាំចេញរបស់កាហ្វេវៀតណាមទៅកាន់ទីផ្សារអង់គ្លេស ស្មើនឹង២.៨០២ដុល្លារអាមេរិកក្នុង១តោន កើនឡើង២១,២១% បើធៀបនឹងខែឧសភា ឆ្នាំ២០២៣ ព្រមទាំងកើនឡើង៣៥,២៤% បើធៀបនឹងខែមិថុនា ឆ្នាំ២០២២ ។

អ្នកជំនាញពាណិជ្ជកម្មបញ្ជាក់ថា ទីផ្សារអង់គ្លេសមានការប្រកួតប្រជែងខ្លាំង ដោយសារអង់គ្លេសបាននាំចូលកាហ្វេពីប្រទេសជាច្រើន ។ ដូច្នេះ ដើម្បីរក្សាស្ថិរភាពការនាំចេញកាហ្វេទៅកាន់ទីផ្សារនេះ ឧស្សាហកម្មកាហ្វេវៀតណាមចាំបាច់ត្រូវអនុវត្តតាមការកំណត់ផ្សេងៗឱ្យកាន់តែរឹងមាំ រួមទាំងឈ្វេងយល់ពីចំណង់ចំណូលចិត្តរបស់អតិថិជនអង់គ្លេស ។ លើសពីនេះ ក្រុមហ៊ុនកាហ្វេវៀតណាមគួរតែបង្ហាញផលិតផលដោយប្រើប្រាស់បច្ចេកវិទ្យាទំនើប ដើម្បីបង្កើនគុណភាពផលិតផលផងដែរ ។

ក្រៅពីនេះ ក្រុមហ៊ុនកាហ្វេនៅវៀតណាមគួរវិនិយោគផលិតកាហ្វេ Arabica មានគុណភាពខ្ពស់នៅតាមតំបន់ដាំដុះកាហ្វេតូចៗ ហើយក្រុមហ៊ុនផ្សេងៗគួរមានសមត្ថភាពត្រួតពិនិត្យ និងអភិវឌ្ឍន៍ប្រកបដោយនិរន្តរភាព ។ លើសពីនេះ ត្រូវវិនិយោគលើទីផ្សារផ្សេងៗដើម្បីឱ្យគេស្គាល់ និងងាយស្រួលចូលទីផ្សារអង់គ្លេស ។

ក្រសួងកសិកម្ម និងការអភិវឌ្ឍជនបទបញ្ជាក់ថា វៀតណាមបាននាំចេញកាហ្វេប្រមាណ១លាន២សែនតោនក្នុងរយៈពេល៨ខែឆ្នាំ២០២៣ ហើយទទួលបានប្រាក់ចំណូលជិត៣ពាន់លានដុល្លារអាមេរិក និងធ្លាក់ចុះ៥,៧% សម្រាប់បរិមាណ ។ ប៉ុន្តែតម្លៃបានកើនឡើង៣២,៣% ដោយសារតម្លៃលក់កើនឡើង ហើយទីផ្សារនាំចេញកាហ្វេដ៏ធំបំផុតរបស់វៀតណាម រួមមាន អាល្លឺម៉ង់, អ៊ីតាលី, អាមេរិក និងជប៉ុន ។

តម្លៃកាហ្វេកើនឡើងនេះ អ្នកជំនាញរំពឹងថា ប្រាក់ចំណូលពីការនាំចេញផលិតផលកាហ្វេអាចកើនឡើងលើសស្ថិតិនៅឆ្នាំ២០២២ ដែលកំណត់ថា នឹងស្មើចំនួន៤ពាន់លានដុល្លារអាមេរិក ៕ ប្រភព ៖ AEC connect

ប្រទេសថៃ ៖ សារព័ត៌មានថៃរាយការណ៍ថា ប៉ូលិសស៊ើបអង្កេតប្រចាំខេត្តរ៉ាក់យ៉ង ប្រទេសថៃ បានចាប់ខ្លួនបុរសម្នាក់ឈ្មោះ អៃ អាយុ៣៣ឆ្នាំ ដោយសារបុរសនេះបានយកប្រេងសាំងស្រោចលើរថយន្តអ្នកដទៃ និងដុតអស់ចំនួន២គ្រឿង ។ បុរសឈ្មោះ អៃ សារភាពថា ខ្លួនគ្មានទំនាស់អ្វីជាមួយម្ចាស់រថយន្តទេ ប៉ុន្តែខ្លួនតានតឹងផ្លូវចិត្តខ្លាំងពេកដោយសារចាញ់ល្បែង ទើបដុតរថយន្តលេង ។

ហេតុការណ៍ដុតរថយន្តនេះបានកើតឡើងតាំងពីថ្ងៃទី៦ ខែវិច្ឆិកា ឆ្នាំ២០២៣ មកម៉្លេះ នៅត្រង់បរិវេណមុខខុនដូមួយកន្លែងក្នុងឃុំប្លួកឌែង ស្រុកប្លួកឌែង ខេត្តរ៉ាក់យ៉ង ។ ក្រោយមក ម្ចាស់រថយន្តបានទៅដាក់ពាក្យបណ្តឹងនៅស្ថានីយប៉ូលិសស្រុកប្លួកឌែង ខេត្តរ៉ាក់យ៉ង ហើយលោកវរសេនីយ៍ទោ Chaiphong Saengphongchai នាយប៉ុស្តិ៍នគរបាលស្រុកប្លួកឌែង ក៏បានបញ្ជាឱ្យប៉ូលិសបង្កើនការស៊ើបអង្កេតករណីនេះ ។

ប៉ូលិសក៏បានចុះស៊ើបអង្កេតនៅទីកន្លែងកើតហេតុ និងរកឃើញភស្តុតាងសំខាន់ពីកាមេរ៉ាសុវត្ថិភាពចាប់រូបភាពជនបង្កហេតុឈ្មោះ អៃ ដែលបានជិះម៉ូតូនៅក្បែរនោះ បន្ទាប់មក ក៏យកប្រេងសាំងមកស្រោចលើរថយន្ត រួចដុតតែម្តង ។ ពេលធ្វើសកម្មភាពរួចហើយ បុរសរូបនេះក៏បានជិះម៉ូតូគេចខ្លួន ។

រហូតមកដល់ថ្ងៃទី១៥ ខែវិច្ឆិកា ឆ្នាំ២០២៣ ប៉ូលិសបានប្រមូលភស្តុតាង និងធ្វើការចាប់ខ្លួនបុរសឈ្មោះ អៃ នៅផ្ទះស្ថិតក្នុងស្រុកប្លួកឌែង ដើម្បីឱ្យបុរសឈ្មោះ អៃ បង្ហាញកន្លែងទិញប្រេងសាំង បន្ទាប់មក បង្ហាញកន្លែងដុតរថយន្ត ។ ប៉ូលិសឱ្យដឹងថា ជនបង្កហេតុធ្លាប់បានជាប់ពន្ធនាគារជាច្រើនលើក និងសេពគ្រឿងញៀនទៀតផង ។ ក្រោយមក ប៉ូលិសក៏បានឃុំខ្លួន និងបញ្ជូនជនល្មើសទៅភ្នាក់ងារស៊ើបអង្កេតដើម្បីចាត់វិធានការតាមផ្លូវច្បាប់ ។

វីដេអូក្នុងកាមេរ៉ាសុវត្ថិភាព គឺជាភស្តុតាងសំខាន់ដែលប៉ូលិសទទួលបាន ដោយវីដេអូទី១ បង្ហាញពីពេលមុនបង្កហេតុ បុរសឈ្មោះ អៃ បានជិះម៉ូតូទៅមកនៅក្បែរនោះ ។ បន្ទាប់មក រូបគេក៏បានជិះម៉ូតូទៅទិញប្រេងសាំងយកមកដុតរថយន្តអស់ចំនួន២គ្រឿង ហើយជិះម៉ូតូគេចខ្លួន ។ រីឯវីដេអូ១ទៀតបង្ហាញថា មានផ្សែងកំពុងហុយចេញពីកន្លែងដុតរថយន្ត ។ ប៉ូលិសប្រចាំស្រុកប្លួកឌែង បានចំណាយពេលស៊ើបអង្កេតអស់រយៈពេល៩ថ្ងៃ ទើបអាចចាប់ខ្លួនបុរសឈ្មោះ អៃ បាន ។

ហេតុការណ៍នេះចាត់ទុកថា ជាសំណាងអាក្រក់របស់ម្ចាស់រថយន្តដែលបានចតរថយន្តយ៉ាងល្អ ប៉ុន្តែត្រូវបានគេដុតចោល ដោយជនបង្កហេតុគ្រាន់តែអះអាងថា តានតឹងផ្លូវចិត្ត ។ ចំណែកពលរដ្ឋបានសរសើរពីការបំពេញការងាររបស់ប៉ូលិសប្រចាំស្រុកប្លួកឌែង ដែលអាចចាប់ខ្លួនជនល្មើសបាន ៕ ប្រភព ៖ 3Plus News

Vietiane ៖ កាលពីថ្ងៃពីថ្ងៃទី១៧ខែវិច្ឆិកានេះ យោងតាមរបាយការណ៍ចេញផ្សាយដោយសភាពាណិជ្ជកម្ម និងឧស្សាហកម្មជាតិឡាវបានឲ្យដឹងថា បច្ចុប្បន្ននេះ សេវាកម្មក៏ដូចជាការលក់ទំនិញតាមអនឡាញនៅប្រទេសឡាវកំពុងតែមានការកើនឡើងជាបន្តបន្ទាប់ ខណៈរដ្ឋាភិបាលឡាវក៏បានចេញនូវសេចក្តីប្រកាសពីការជំរុញពាណិជ្ជកម្មតាមប្រព័ន្ធអេឡិចត្រូនិក E-commerce) ដែលជាយុទ្ធសាស្ត្រមួយក្នុងគម្រោងអភិវឌ្ឍន៍របស់ខ្លួនសម្រាប់ឆ្នាំ ២០១៦-២០២៥។

លោក Latthana Douangboupha អគ្គនាយករងនៃនាយកដ្ឋានជំរុញសហគ្រាសធុនតូចនិងមធ្យម នៃក្រសួងឧស្សាហកម្ម និងពាណិជ្ជកម្មឡាវ បាននិយាយនៅក្នុងសិក្ខាសាលាមួយនៅរដ្ឋធានីវៀងចន្ទន៍នាឡាវថា រដ្ឋាភិបាលឡាវបានធ្វើការលើកកម្ពស់សហគ្រាសធុនតូច និងមធ្យម (Small and Medium Enterprises) ហើយកំណត់ជាគោលដៅអាទិភាពមួយរបស់ខ្លួន ដើម្បីជំរុញកំណើនសេដ្ឋកិច្ចជាតិ។

សិក្ខាសាលានេះបានផ្តោតសំខាន់ទៅលើការអភិវឌ្ឍន៍គោលនយោបាយពាណិជ្ជកម្មតាមប្រព័ន្ធអេឡិចត្រូនិក និងការអនុវត្តយុទ្ធសាស្រ្តសម្រាប់ការពង្រឹងសហគ្រាសធុនតូច និងមធ្យមនៅប្រទេសឡាវក្នុងយុគសម័យឌីជីថល។ ជាមួយគ្នានេះ តំណាងក្រុមហ៊ុនមួយចំនួននៅប្រទេសឡាវក៏បានចូលរួមក្នុងសិក្ខាសាលានេះដែរ ដើម្បីស្វែងយល់ និងចែករំលែកបទពិសោធន៍ក្នុងការលក់តាមអនឡាញ ក៏ដូចជាការធ្វើអាជីវកម្មឌីជីថលសម្រាប់ការអភិវឌ្ឍន៍សហគ្រាសរបស់ពួកគេ និងដើម្បីប្រកួតប្រជែងជាមួយអាជីវកម្មក្នុងតំបន់។

លោកក៏បានបន្តទៀតថា ទោះបីជាសហគ្រាសធុនតូច និងមធ្យមជាច្រើនកំពុងប្រើប្រាស់ប្រព័ន្ធ e-commerce សម្រាប់ការលក់ និងការគ្រប់គ្រងអាជីវកម្មក៏ដោយ ក៏នៅមានផែនការអភិវឌ្ឍន៍ និងកែលម្អសម្រាប់ប្រតិបត្តិការអាជីវកម្មឌីជីថលឲ្យបានជោគជ័យបន្ថែមទៀត ដែលគួរតែត្រូវបានលើកកម្ពស់ដោយរដ្ឋាភិបាលផងដែរ។

ម៉្យាងវិញទៀត ការចែករំលែកបទពិសោធន៍និងការរៀនសូត្រពីសិក្ខាសាលានេះ នឹងជួយអភិវឌ្ឍអាជីវកម្មរបស់សហគ្រាសធុនតូច និងមធ្យម ក៏ដូចជាពង្រឹងពួកគេឲ្យមានសមត្ថភាពដើម្បីប្រកួតប្រជែងជាមួយធុរកិច្ចនៅក្រៅប្រទេស។

ទោះជាយ៉ាងណាក៏ដោយ ពាណិជ្ជកម្មតាមប្រព័ន្ធអេឡិចត្រូនិកនេះកំពុងកើនឡើងនៅក្នុងប្រទេសឡាវ។ រដ្ឋាភិបាលឡាវយល់យ៉ាងច្បាស់ពីតម្រូវការរបស់អ្នកវិនិយោគ និងបានចេញបទបញ្ញាត្តិថ្មីមួយផងដែរដើម្បីគាំទ្រដល់ភាពប្រសើរឡើងនៃរបៀបធ្វើអាជីវកម្មថ្មីសម័យទំនើប។ បទបញ្ញាត្តិនេះក៏នាំឱ្យមានទំនុកចិត្តកាន់តែខ្លាំងក្នុងចំណោមពាណិជ្ជករ និងអ្នកប្រើប្រាស់ទាក់ទងនឹងប្រតិបត្តិការឌីជីថល។

យ៉ាងណាមិញ វានៅតែទាមទារឲ្យមានការអភិវឌ្ឍលើវិស័យផ្សេងៗដែលពាក់ព័ន្ធជាមួយនឹងការធ្វើពាណិជ្ជកម្មអេឡិចត្រូនិកនៅក្នុងប្រទេសឡាវផងដែរ និងដើម្បីបង្កើនសក្តានុពលនៃរបៀបធ្វើអាជីវកម្មថ្មីនេះ។

គួរបញ្ជាក់ផងដែរថា រដ្ឋាភិបាលឡាវបានអនុម័តច្បាប់ស្តីពីប្រតិបត្តិការអេឡិចត្រូនិកក្នុងឆ្នាំ ២០១២ និងចេញនូវក្រឹត្យស្តីពីពាណិជ្ជកម្មអេឡិចត្រូនិកក្នុងឆ្នាំ ២០២១។ វាបានផ្តោតសំខាន់ទៅលើមធ្យោបាយជំរុញកំណើនសេដ្ឋកិច្ច និងបង្កើនប្រាក់ចំណូលពីពាណិជ្ជកម្មតាមប្រព័ន្ធអនឡាញផងដែរ៕ Xinhua

ប្រទេសថៃ៖ គិតត្រឹមថ្ងៃទី ១២ ខែវិច្ឆិកា ប្រទេសថៃបានទទួលភ្ញៀវទេសចរណ៍អន្តរជាតិជាង ២៣.៤ លាននាក់ និងរកចំណូលបានជិត ២៨ ពាន់លានដុល្លារ។
យោងតាមរដ្ឋមន្ត្រីក្រសួងទេសចរណ៍ និងកីឡា Sudawan Wangsuphakijkosol បាននិយាយកាលពីថ្ងៃទី ១៤ ខែវិច្ឆិកាថា ប្រទេសថៃបានស្វាគមន៍ភ្ញៀវអន្តរជាតិជាង ២៣.៤ លាននាក់ ចាប់តាំងពីដើមឆ្នាំដល់ថ្ងៃទី ១២ ខែវិច្ឆិកា ដោយនាំមកនូវប្រាក់ចំណូលជិត ៩៨២ ពាន់លានបាត (ប្រមាណ ២៧.៧ ពាន់លានដុល្លារអាមេរិក)។ ក្នុងនោះទីផ្សារទេសចរណ៍អន្តរជាតិកំពូលទាំង ៥ ទៅកាន់ប្រទេសថៃនៅឆ្នាំនេះគឺម៉ាឡេស៊ី (ជាង ៣.៨ លាននាក់) ចិន (២.៩ លាននាក់) កូរ៉េ (ជិត ១.៤ លាននាក់) ឥណ្ឌា (១.៣៥ លាននាក់) និងរុស្ស៊ី (ជិត ១.២ លាននាក់) ។

រដ្ឋមន្ត្រី Sudawan រំពឹងថានឹងមានភ្ញៀវអន្តរជាតិជាច្រើនមកកាន់ប្រទេសថៃនាពេលខាងមុខ ដោយសារការកើនឡើងនៃជើងហោះហើរអន្តរជាតិ និងដើម្បីបញ្ចៀសរដូវរងា។ នៅដើមឆ្នាំនេះ ប្រទេសថៃបានកំណត់គោលដៅទទួលភ្ញៀវអន្តរជាតិពី ១៨-២០ លាននាក់ និងបានបង្កើនគោលដៅដល់ ២៥ លាននាក់ចាប់ពីដើមខែឧសភា ស្មើនឹង ៦៦% បើធៀបនឹងរយៈពេលដូចគ្នាក្នុងឆ្នាំ ២០១៩ ដែលប្រទេសនេះបានស្វាគមន៍ភ្ញៀវទេសចរចំនួន ៣៩,៨ លាននាក់។ ដូច្នេះ នៅឆ្នាំ ២០២៤ ប្រទេសថៃត្រូវបានគេរំពឹងថានឹងទទួលភ្ញៀវអន្តរជាតិចំនួន ៣៥ លាននាក់ និងឈានដល់ ៥៦ ពាន់លានដុល្លារនៅក្នុងចំណូលពីទេសចរណ៍។

គួរបញ្ជាក់ដែរថា បច្ចុប្បន្ន ថៃគឺជាប្រទេសដែលទទួលភ្ញៀវអន្តរជាតិច្រើនជាងគេនៅអាស៊ីអាគ្នេយ៍ ជាមួយនឹងចំនួនភ្ញៀវអន្តរជាតិលើសពី ២៣.៤ លាននាក់។ ក្នុងរយៈពេល ១០ ខែដើមឆ្នាំនេះ វៀតណាមទទួលភ្ញៀវអន្តរជាតិជិត ១០ លាននាក់ ដែលតួលេខគឺស្រដៀងគ្នាទៅនឹងសិង្ហបុរី។ រីឯប្រទេសឥណ្ឌូនេស៊ីបានស្វាគមន៍ភ្ញៀវអន្តរជាតិចំនួន ៨.៥ លាននាក់ ប្រទេសហ្វីលីពីនបានស្វាគមន៍ជិត ៣.៩ លាននាក់ ប្រទេសកម្ពុជាបានស្វាគមន៍ជាង ២.៥ លាននាក់ និងប្រទេសម៉ាឡេស៊ីបានស្វាគមន៍ភ្ញៀវទេសចរចំនួន ១៣ លាននាក់ ចំណែកឯប្រទេសខ្លះទៀតមិនទាន់មានស្ថិតិនៅឡើយទេ៕