បរទេស៖ ក្រុមហ៊ុន Toyota បានវិនិយោគប្រាក់ចំនួន ១.៣ ពាន់លានដុល្លារទៅលើរោងចក្រ Kentucky ដើម្បីផលិតរថយន្ត SUV បីជួរថ្មីសម្រាប់ទីផ្សារសហរដ្ឋអាមេរិក នេះបើយោងតាម CNBC ដែលបានចុះផ្សាយកាលពីថ្ងៃទី៨ ខែកុម្ភៈ ឆ្នាំ២០២៤។ក្រុមហ៊ុន Toyota បាននិយាយថា ប្រាក់នេះនឹងគាំទ្រដល់ការផលិតរថយន្តអគ្គិសនីនាពេលអនាគត រួមទាំងខ្សែសង្វាក់ដំឡើងថ្មសម្រាប់ម៉ូដែលរថយន្តអគ្គិសនីផ្សេងទៀត ដោយរថយន្តនេះត្រូវបានគេរំពឹងថានឹងចាប់ផ្តើមផលិតនៅចន្លោះចុងឆ្នាំ ២០២៥ ដល់ដើមឆ្នាំ ២០២៦។

ការប្រកាសនេះបានធ្វើឡើងនៅពេលដែលការបញ្ជាទិញរបស់អ្នកប្រើប្រាស់សម្រាប់រថយន្ត EVs មានភាពលឿនរហ័សជាងការរំពឹងទុក ដែលបណ្តាលឱ្យក្រុមហ៊ុនរថយន្តមួយផលិតមិនទាន់ពេល ហើយក៏បានកាត់រៀបចំផែនការវិនិយោគសម្រាប់រថយន្តអគ្គិសនីទាំងអស់។ ដូច្នេះហើយ ការវិនិយោគនេះគឺជាផ្នែកមួយនៃផែនការដែលបានប្រកាសពីមុនដោយក្រុមហ៊ុនផលិតរថយន្តជប៉ុនក៏មានការវិនិយោគបន្ថែមចំនួន ៣៥ ពាន់លានដុល្លារទៅក្នុងរថយន្តថាមពលថ្ម ឬ BEVs រហូតដល់ឆ្នាំ ២០៣០។

ទោះជាយ៉ាងណា បច្ចុប្បន្នក្រុមហ៊ុនមិនបានផ្តល់ព័ត៌មានលម្អិតអំពីរថយន្ត SUV អគ្គិសនីថ្មីនាពេលខាងមុខនោះទេ រួមទាំងតម្លៃ និងពេលវេលាលក់ផងដែរ។ គួររំលឹកដែរថា កាលពីខែតុលា ឆ្នាំ២០២៣ ក្រុមហ៊ុនបានលើកឡើងពីលទ្ធភាពនៃការវិនិយោគបន្ថែមចំនួន ៨ ពាន់លានដុល្លារនៅក្នុងរោងចក្រអាគុយសម្រាប់រថយន្តអគ្គិសនី និងរថយន្តកូនកាត់នៅរដ្ឋ North Carolina ដែលច្រើនជាងការបណ្តាក់ទុនដំបូងទ្វេដង និងការបង្កើតការងារថ្មី។

ក្រុមហ៊ុន Toyota រំពឹងថារោងចក្រនឹងផ្តល់ការងារដល់កម្មករជាង ៥,០០០ នាក់ នៅពេលវាចាប់ផ្តើមប្រតិបត្តិការក្នុងឆ្នាំ ២០២៥។ Toyota គឺជាក្រុមហ៊ុនផលិតរថយន្តធំជាងគេលើពិភពលោក ស្ថិតក្នុងចំណោមក្រុមហ៊ុនផលិតរថយន្តលេចធ្លោបំផុតដែលក្រុមហ៊ុនតែងតែបន្តវិនិយោគលើរថយន្ត hybrid រថយន្តកូនកាត់ plug-in hybrid និងបច្ចេកវិទ្យាផ្សេងទៀត ដូចជាកោសិកាឥន្ធនៈអ៊ីដ្រូសែនជាដើម៕

បរទេស៖ កាលពីថ្ងៃទី៨ ខែកុម្ភៈ ឆ្នាំ២០២៤ យោងតាមរបាយការណ៍ថ្មីមួយ បានឱ្យដឹងថា Apple បានកំពុងអភិវឌ្ឍ iPhone ដែលអាចបត់បានយ៉ាងស្ងាត់ស្ងៀមចាប់តាំងពីឆ្នាំ ២០១៨ មកម្លេះ ហើយបានផលិតគំរូយ៉ាងហោចណាស់ពីរដងរួចទៅហើយ។

នេះបើយោងតាមប្រភពខ្លះបានឱ្យដឹងទៀតថា Apple បានជ្រើសរើសបង្កើត iPad ដែលអាចបត់បានមុន ដើម្បីវាស់ស្ទង់ប្រតិកម្មទីផ្សារ។ ទោះជាយ៉ាងណាក៏ដោយ The Information បាននិយាយថា Apple ក៏បានបង្កើតគំរូ iPhone ពីរដែលអាចបត់ផ្តេកស្រដៀងទៅនឹង Galaxy Z Flip របស់ Samsung ដែរ។

ប្រសិនបើជាការពិត ដំណឹងនេះនឹងបង្ហាញពីការផ្លាស់ប្តូរការរចនាដ៏ធំសម្រាប់ក្រុមហ៊ុន Apple ដែលជាក្រុមហ៊ុនទើបតែទទួលយកគម្រោងទូរស័ព្ទដែលមានរាងកោង។ កាលពីឆ្នាំ ២០១៩ ក្រុមហ៊ុន Samsung បានចាប់ផ្តើមនិន្នាការជាមួយនឹងជួរ Fold របស់ខ្លួនក្នុងការចាប់ផ្តើមផលិតទូរស័ព្ទដែលអាចបត់បាន បន្ទាប់មកគឺ Motorola, Oppo និង Google។ ទោះជាយ៉ាងណា ទូរស័ព្ទដែលអាចបត់បានមិនមែនជាផ្នែកនៃផែនការផលិតរបស់ក្រុមហ៊ុនសម្រាប់ឆ្នាំ ២០២៤ និង ២០២៥ ទេ។ មូលហេតុគឺក្រុមហ៊ុន មិនអាចបញ្ចេញផលិតផលបានទាន់ពេល ដោយសារតែវិស្វករកំពុងជួបការលំបាកក្នុងការកែសម្រួលការរចនា ប្រសិនបើផលិតផលមិនបំពេញតាមស្តង់ដាររបស់វា។

លើសពីនេះ Apple ក៏ត្រូវបានគេរាយការណ៍ថាកំពុងព្យាយាមផលិតទូរស័ព្ទដែលមានកម្រាស់ស្តើងជាង iPhone ស៊េរីបច្ចុប្បន្ន ពាក់កណ្តាល ដើម្បីកុំឱ្យវាក្រាស់ពេកនៅពេលបត់។ ជាងនេះទៅទៀត Apple ក៏កំពុងធ្វើការលើវិធីកាត់បន្ថយស្នាមប្រេះជាអចិន្ត្រៃយ៍នៅកណ្តាលអេក្រង់ដែលអាចលេចឡើងបន្ទាប់ពីបត់ច្រើនដងពេក។

ទន្ទឹមនឹងនេះ Apple ក៏នឹងត្រូវបង្កើនប្រសិទ្ធភាពប្រព័ន្ធប្រតិបត្តិការ iOS ឱ្យសមនឹងឧបករណ៍ដែលអាចបត់បាន។ អ្នកជំនាញបានព្យាករណ៍ថា iPhone ដែលអាចបត់បាននឹងមានច្រក MagSafe នៅជាប់នឹងការបញ្ចូលថ្ម USB-C ដែលឧបករណ៍នេះអាចប្រើ FaceID ឬ TouchID ។ នេះបើតាមគេហទំព័រ The Elec បានឱ្យដឹងទៀតថា ថេប្លេត iPad ដែលមានអេក្រង់អាចបត់បានអាចនឹងចេញលឿនជាង iPhone នៅឆ្នាំ ២០២៦ ដោយផលិតផលនេះត្រូវបានគេរំពឹងថានឹងមានទំហំដូចគ្នាទៅនឹង iPad Mini ដែលមានអេក្រង់ទំហំ ៨ អ៊ីញ៕

ប្រទេសកូរ៉េខាងត្បូង ៖ នៅថ្ងៃអនាគត រថយន្តទាំងឡាយដែលយើងបានឃើញបើកបរនៅតាមដងផ្លូវ អាចមិនបានបើកបរដោយប្រើប្រាស់កង់រថយន្តធម្មតាៗបន្តទៀតទេ ពីព្រោះនៅថ្ងៃអនាគត រថយន្តទាំងនេះនឹងមានជើងយន្តបំពាក់នូវបច្ចេកវិទ្យាខ្ពស់ ។ ការបំពាក់នូវជើងយន្តនេះ គឺសម្រាប់ឱ្យរថយន្តអាចលើកខ្លួនវាឡើងទៅលើ និងឈានដើរឆ្លងកាត់ឧបសគ្គនានា ។

ការបង្កើតរថយន្តអាចដើរបានដូចមនុស្ស គឺជាគម្រោងរបស់ក្រុមហ៊ុនយានយន្ត និងបច្ចេកវិទ្យានៅប្រទេសកូរ៉េខាងត្បូង ឈ្មោះ Hyundai ។ ក្រុមហ៊ុននេះបានបង្ហាញនូវគំនិតការផលិតរថយន្តអាចដើរបានតាំងពីឆ្នាំ២០១៩ មកម៉្លេះ ក្នុងកម្មវិធីពិព័រណ៍បច្ចេកវិទ្យាលំដាប់ពិភពលោក (Consumer Electronics Show) ឈ្មោះគម្រោង Elevate មានន័យថា ការបង្កើនកម្រិតស្របនឹងលក្ខណៈរបស់រថយន្ត ។

គម្រោងបង្កើតរថយន្តមានជើងយន្ត វាអាចជួយលើករថយន្តឱ្យឡើងខ្ពស់បាន ដើម្បីឱ្យសមនឹងគំនិតរថយន្តប្រភេទ Ultimate Mobility Vehicles (UMVs) ដែលចំណុចខ្លាំងរបស់វា គឺអាចផ្លាស់ទីនៅគ្រប់ស្ថានភាពដីយ៉ាងស្ទាត់ជំនាញ ។ បច្ចុប្បន្ន គំនិតនេះនៅតែទទួលបានការអភិវឌ្ឍជាបន្តបន្ទាប់នៅក្រោមផ្នែក New Horizons Studio ។ ផ្នែកនេះបានបង្កើតឡើងដោយក្រុមហ៊ុន Hyundai សម្រាប់ការស្រាវជ្រាវ និងអភិវឌ្ឍន៍រថយន្តប្រភេទនេះដើម្បីឈានទៅប្រើប្រាស់បានពិតប្រាកដ ។

ផ្នែកសំខាន់របស់រថយន្តអាចដើរបាន គឺការអភិវឌ្ឍនៅបរិវេណជើងយន្តនៅលើកង់រថយន្ត ។ ការផលិតជើងយន្តសម្រាប់កង់រថយន្ត នឹងផលិតឡើងតាមជើងសត្វកណ្តូប ។ ជំហានដំបូង ជើងយន្តនេះនឹងមានប្រព័ន្ធម៉ូទ័រ និងកម្លាំងបង្វិលខ្ពស់ ហើយវាមិនត្រឹមតែប្រើសម្រាប់ផ្លាស់ទីកង់ប៉ុណ្ណោះទេ ប៉ុន្តែវានឹងរួមបញ្ចូលទាំងការផ្លាស់ទីនៅបរិវេណដូចត្រគាក និងក្បាលជង្គង់របស់រថយន្តផងដែរ ។

ក្រៅពីការអភិវឌ្ឍរថយន្តដើរបានសម្រាប់ដឹកអ្នកដំណើរហើយ បច្ចេកវិទ្យាស្រដៀងគ្នានេះ ក៏បានអភិវឌ្ឍន៍ជារថយន្តបើកបរដោយស្វ័យប្រវត្តិ (Hyundai Tiger X-1) ផងដែរ ដែលមានទំហំតូចជាង សម្រាប់ដឹកជញ្ជូនសម្ភារៈផ្សេងៗបន្ថែមទៀត ។ ហេតុនេះ ការប្រើប្រាស់ជាក់ស្តែង យើងនឹងឃើញរថយន្តអាចដើរបានពីគម្រោងនេះ មកបំពេញតួនាទីជារថយន្តតាក់ស៊ីដឹកភ្ញៀវដល់មុខផ្ទះ, ប្រើសម្រាប់ការងារសង្គ្រោះបន្ទាន់, ប្រើជារថយន្តដឹកជញ្ជូនសម្ភារៈកងទ័ព ឬអាចបញ្ជូនទៅរុករកនៅភពព្រះអង្គារនៅថ្ងៃអនាគត ។

គួរបញ្ជាក់ថា ក្រុមហ៊ុន Hyundai បានដាក់ពាក្យសុំផ្សេងៗសម្រាប់បច្ចេកវិទ្យារថយន្តដើរបានរួចរាល់ហើយកាលពីឆ្នាំ២០២៣ ហើយបច្ចុប្បន្ន ក្រុមហ៊ុននេះបានព្យាយាមអភិវឌ្ឍន៍ម៉ូឌែលដើម្បីសាកល្បងប្រើប្រាស់ក្នុងស្ថានភាពផ្សេងៗ មុននឹងឈានទៅផលិតរថយន្តដើរបានយ៉ាងពេញលេញ ៕

ប្រទេសតួកគី ៖ ខ្យាដំរី គឺជាសត្វមានពិសដែលមនុស្សភាគច្រើនខ្លាចរអារ ប៉ុន្តែនៅប្រទេសតួកគីវិញបានធ្វើកសិដ្ឋានបង្កាត់ពូជខ្យាដំរី ដើម្បីច្របាច់យកពិសលក់នៅតំបន់អឺរ៉ុប ។ ចំណែកពិសខ្យាដំរីមានតម្លៃខ្ពស់ខ្លាំងណាស់ គឺស្មើរហូតដល់១០លានដុល្លារអាមេរិកក្នុង១លីត្រ ។

លោក Metin Orenler គឺជាម្ចាស់កសិដ្ឋានចិញ្ចឹមខ្យាដំរីនៅទីក្រុង Sanliurfa ស្ថិតនៅភាគអាគ្នេយ៍ប្រទេសតួកគី និយាយថា កសិដ្ឋានរបស់លោកមានខ្យាដំរីជាង២ម៉ឺនក្បាល ។ ជារៀងរាល់ថ្ងៃ កសិដ្ឋាននេះអាចច្របាច់យកពិសខ្យាដំរី បានប្រមាណ២ក្រាមប៉ុណ្ណោះ ។

ចំណែកពិសខ្យាដំរី ដែលកសិដ្ឋានទទួលបាន ត្រូវយកវាទៅក្លាស្សេជាមុនសិន ។ បន្ទាប់មក ត្រូវយកពិសនេះទៅកែច្នៃធ្វើជាម្សៅ រួចហើយបញ្ជូនទៅលក់នៅបណ្តាប្រទេសតំបន់អឺរ៉ុប ដើម្បីប្រើប្រាស់ធ្វើជាសារុធាតុផ្សំក្នុងការផលិតថ្នាំអង់ទីប៊ីយោទិច, គ្រឿងសម្អាង និងថ្នាំបំបាត់ការឈឺចុកចាប់ ។

ខ្យាដំរី គឺជាប្រភេទសត្វគ្មានឆ្អឹងខ្នង ហើយវាចូលចិត្តរស់នៅតាមកន្លែងងងឹត និងមានសំណើម ។ ពួកវាមានទម្លាប់ស្រឡាញ់ការស្ងប់ស្ងាត់ និងមិនធ្វើបាបគេមុនទេ ប៉ុន្តែបើមានមនុស្ស ឬសត្វផ្សេងរំខានវា វានឹងលើកកន្ទុយឡើងលើដើម្បីគំរាមសត្រូវ បន្ទាប់មក វានឹងខាំដើម្បីការពារខ្លួន ។

នៅពេលខ្យាដំរីខាំអ្នកណាម្នាក់ វានឹងបញ្ចេញពិសចេញមកក្រៅ ហើយពិសរបស់វានឹងធ្វើឱ្យឈឺចុកចាប់ខ្លាំង ឬរលាកនៅត្រង់បរិវេណដែលវាខាំ ។ ពិសរបស់ខ្យាដំរីភាគច្រើនគ្មានគ្រោះថ្នាក់ដល់ជីវិតទេ ហើយមានខ្យាដំរីមួយចំនួនប៉ុណ្ណោះ ដែលពិសរបស់វាមានគ្រោះថ្នាក់ខ្លាំង ។ កាលពីមុន មនុស្សយើងបានបរិភោគខ្យាដំរី ដោយសារជឿថា វាជាឱសថដ៏ល្អ ។

បើតាមការស្រាវជ្រាវអំពីសមាសធាតុ និងផ្នែកជីវសាស្ត្រទៅលើពិសខ្យាដំរី របស់ក្រុមអ្នកវិទ្យាសាស្ត្រមកពីសាកលវិទ្យាល័យខនគែន ប្រទេសថៃ និងបានចុះផ្សាយក្នុងទស្សនាវដ្តីឈ្មោះ «Thai Journal of Toxicology» បង្ហាញថា សារធាតុបិបថៃ នៅក្នុងពិសខ្យាដំរី គឺមានឥទ្ធិពលផ្នែកជីវសាស្ត្រដែលមានប្រយោជន៍ច្រើន ។

លើសពីនេះ វាសាកសមសម្រាប់ប្រើប្រាស់ជាគំរូការអភិវឌ្ឍឱសថនាពេលអនាគត ដូចជា ៖ ប្រឆាំងបាក់តេរី, ប្រឆាំងផ្សិត, ប្រឆាំងមេរោគ, ប្រឆាំងប៉ារ៉ាស៊ីត, ប្រឆាំងមហារីក, ប្រឆាំងការរលាក និងមានឥទ្ធិពលកែប្រែប្រព័ន្ធភាពស៊ាំ ៕

បរទេស៖ ខ្សែប្រយុទ្ធ Cristiano Ronaldo របស់ Al Nassr រកចំណូលបាន ២៧៥ លានដុល្លារអាមេរិកក្នុងឆ្នាំ ២០២៣ ច្រើនជាង Lionel Messi រហូតទៅដល់ពីរដងឯណោះ។
ro
យោងតាមសារព័ត៌មាន Sportico ដែលបានរាយការណ៍កាលពីថ្ងៃទី៨ ខែកុម្ភៈ ឆ្នាំ២០២៤ ថា ខ្សែប្រយុទ្ធព័រទុយហ្គាល់ទទួលបាន ២៧៥ លានដុល្លារអាមេរិកក្នុងឆ្នាំ ២០២៣។ ក្រៅពីប្រាក់ខែរបស់គាត់នៅ Al Nassr Ronaldo ក៏រកចំណូលបាន ៦០ លានដុល្លារពីកិច្ចសន្យាផ្សាយពាណិជ្ជកម្មជាមួយម៉ាកដូចជា Nike, Herbalife, Armani, Tag Heuer, DAZN ឬ PokerStars ផងដែរ។ លើសពីនេះគាត់ក៏ទទួលបានជោគជ័យជាមួយនឹងម៉ាកផ្ទាល់ខ្លួនរបស់គាត់ CR7 ទៀតផង។

ទោះជាយ៉ាងណាក៏ដោយ សម្រាប់ចំណាត់ថ្នាក់ទី ២ បានទៅលើកីឡាករវាយកូនហ្គោលជនជាតិអេស្ប៉ាញ Jon Rahm ជាមួយនឹងប្រាក់ចំណូល ១៨១ លានដុល្លារអាមេរិក។ ចំណែកឯខ្សែប្រយុទ្ធអាហ្សង់ទីន Lionel Messi វិញជាប់ចំណាត់ថ្នាក់ទី ៣ លើពិភពលោកជាមួយនឹងប្រាក់ចំណូលប្រមាណ ១៣០ លានដុល្លារអាមេរិក រួមទាំង ៦៥ លានដុល្លារជាប្រាក់បៀវត្សរ៍ពីការលេង និងប្រាក់ចំណូលដែលនៅសល់គឺបានមកពីកិច្ចសន្យាផ្សាយពាណិជ្ជកម្ម។

ក្រៅពី Ronaldo និង Messi មានកីឡាករបាល់ទាត់ពីរនាក់ក្នុងចំណោមអត្តពលិកដែលរកចំណូលបានច្រើនជាងគេបំផុតទាំង ១០ ក្នុងឆ្នាំ ២០២៣។ ក្នុងចំណោមនោះ Kylian Mbappe ជាប់ចំណាត់ថ្នាក់ទី ៥ ជាមួយនឹង ១២៥ លានដុល្លារ និង Neymar ជាប់ចំណាត់ថ្នាក់ទី ៦ ជាមួយនឹង ១២២ លានដុល្លារអាមេរិក។ ស្ថិតនៅពីលើអ្នកទាំងពីរនេះក្នុងចំណាត់ថ្នាក់ទី ៤ គឺតារាបាល់បោះ LeBron James នៃក្រុម Los Angeles Lakers ដែលមានទឹកប្រាក់ចំនួន ១២៦ លានដុល្លារ។

ចំពោះតំណែងទាំងបួនដែលនៅសល់ក្នុង Top 10 គឺជារបស់តារាបាល់បោះបីនាក់គឺ Stephen Curry (៩៩ លានដុល្លារ), Giannis Antetokounmpo (៨៨ លានដុល្លារ), Kevin Durant (៨៧ លានដុល្លារ) និងតារាបាល់ទាត់ Patrick Mahomes ដែលមានទឹកប្រាក់ ៨៤ លានដុល្លារអាមេរិក។

គួរបញ្ជាក់ដែរថា Ronaldo បានប្រជែងយកតំណែងកំពូលជាមួយ Messi ស្ទើរតែគ្រប់អាជីពរបស់គាត់តែម្តង។ ទោះបីជាការឈ្នះពាន Golden Ball តិចជាង Messi ក៏ដោយ ក៏ Ronaldo នៅតែរកចំណូលបានច្រើនជាងគេបំផុតលើពិភពលោកសម្រាប់ឆ្នាំ ២០២៣៕