ប្រទេសថៃ ៖ នៅដើមឆ្នាំ២០២៤នេះ មានមតិខ្លះលើកឡើងថា តែរបស់ថៃបានផ្សំនូវសារធាតុម្យ៉ាងឈ្មោះ «Sunset Yellow FCF» ខណៈតែថៃ គឺជាភេសជ្ជៈចាប់ផ្តើមពេញនិយមនៅទូទាំងពិភពលោក ប៉ុន្តែបែរជាប្រទេសមួយចំនួនហាមនាំចូលតែថៃ ដោយសារបារម្ភអំពីការផ្សំនូវសារធាតុពណ៌លឿង ។

តែថៃ គឺជាភេសជ្ជៈដ៏ពេញនិយមដែលគេចូលចិត្តផឹកពេលអាកាសធាតុក្តៅនៅប្រទេសថៃ ។ តើដឹងឬទេថា ការពិត តែថៃ គ្មានពណ៌ទឹកក្រូចតាមធម្មជាតិទេ ហើយពណ៌ទឹកក្រូចរបស់តែថៃ កើតចេញពីសារធាតុផ្សំអាហារហៅថា «Sunset Yellow FCF» ដែលមានពណ៌លឿងលាយទឹកក្រូច ។ សារធាតុផ្សំអាហារប្រភេទនេះ ត្រូវបានគេយកមកផ្សំក្នុងអាហារឱ្យមានពណ៌ឆើតស្រស់ និងគួរឱ្យចង់ទទួលទាន ។

បើទោះជាសារធាតុផ្សំអាហារ Sunset Yellow FCF ទទួលបានការអនុញ្ញាតឱ្យប្រើប្រាស់ដាក់ក្នុងម្ហូបអាហារ ឬភេសជ្ជៈនៅប្រទេសថៃក្តី ប៉ុន្តែប្រទេសមួយចំនួនបានហាមនាំចូលសារធាតុប្រភេទនេះ ដូចជា ៖ បណ្តាប្រទេសអឺរ៉ុប និងអង់គ្លេស ។ ប្រទេសទាំងនេះបានចេញច្បាប់ហាមនាំចូលសារធាតុផ្សំអាហារ Sunset Yellow FCF និងសារធាតុផ្សំអាហារ៥ប្រភេទទៀត រួមមាន ៖ Tartrazine, Quinoline Yellow, Carmoisine, Ponceau 4R និង Allura Red ។

ចំណែកមូលហេតុធ្វើឱ្យបណ្តាប្រទេសអឺរ៉ុប និងអង់គ្លេសហាមនាំចូលសារធាតុផ្សំអាហារ Sunset Yellow FCF ដោយសារលទ្ធផលការស្រាវជ្រាវផ្នែកពេទ្យនៅតំបន់អឺរ៉ុបបង្ហាញថា សារធាតុផ្សំអាហារនេះបណ្តាលឱ្យកុមារខ្វះការតាំងស្មារតី ។ ក្រៅពីនេះ ការស្រាវជ្រាវបានណែនាំថា បើគ្មានការប្រើប្រាស់សារធាតុផ្សំអាហារនេះ នឹងអាចកាត់បន្ថយបញ្ហាខ្វះការតាំងស្មារតីរបស់កុមារបាន ។

ទោះយ៉ាងណា លទ្ធផលការស្រាវជ្រាវនេះមិនបានបញ្ជាក់ថា សារធាតុផ្សំអាហារ Sunset Yellow FCF គឺជាមូលហេតុចម្បងដែលធ្វើឱ្យកុមារខ្វះការតាំងស្មារតីនោះទេ ។ ប្រសិនបើតែថៃ ដាក់សារធាតុផ្សំអាហារ Sunset Yellow FCF នឹងធ្វើឱ្យតែថៃ មានពណ៌ទឹកក្រូចគួរឱ្យចង់ផឹក ។ តើពណ៌ពិតប្រាកដរបស់តែថៃ គឺពណ៌អ្វី?

សំណួរនេះ ត្រូវក្រឡេកទៅមើលប្រភពរបស់តែថៃ ដែលគេគិតថា តែថៃមានប្រភពពីតែស៊ីឡន ដាំដុះនៅប្រទេសស្រីលង្កា ដែលមានពណ៌ត្នោតលាយក្រហម ។ បើគេផ្សំជាមួយទឹកដោះគោក្នុងតែស៊ីឡន វានឹងប្រែទៅជាពណ៌ត្នោតខ្ចី ។ រីឯការផ្សំនូវសារធាតុអាហារក្នុងតែថៃ គឺអាចផ្សំក្នុងតែថៃមួយចំនួនប៉ុណ្ណោះ ឬអាចនិយាយថា តែថៃមានប្រភេទដាក់សារធាតុផ្សំអាហារ និងតែថៃមិនដាក់សារធាតុផ្សំអាហារ ។

ក្រៅពីនេះ សារធាតុផ្សំអាហារ Sunset Yellow FCF បានទទួលការអនុញ្ញាតនៅប្រទេសថៃ រួមទាំងនៅសហរដ្ឋអាមេរិកផងដែរ ដែលមិនបានហាមឃាត់ការប្រើប្រាស់សារធាតុផ្សំអាហារប្រភេទនេះ ។ គេចាប់ផ្តើមឃើញថា នៅសហរដ្ឋអាមេរិកមានហាងលក់តែថៃ កើនឡើងយ៉ាងឆាប់រហ័ស និងកំពុងក្លាយជាភេសជ្ជៈកាន់តែពេញនិយមសម្រាប់ផឹកពេលអាកាសធាតុក្តៅ ៕  

បរទេស៖ ថ្មីៗនេះក្រុមអ្នកវិទ្យាសាស្ត្រអ៊ីស្រាអែលមកពីវិទ្យាស្ថានបច្ចេកវិទ្យា Technion-Israel បានស្នើគំនិតដ៏មានសក្តានុពលមួយ ដោយប្រើប្រាស់ឆ័ត្រយក្សបង្ហោះលើទីអវកាស ក្នុងគោលបំណងរារាំងកាំរស្មីព្រះអាទិត្យ ដើម្បីកាត់បន្ថយកម្តៅផែនដី។

កាលពីដើមខែកុម្ភៈ ឆ្នាំ២០២៤ យោងតាមសារព័ត៌មានអន្តរជាតិមួយ បានឱ្យដឹងថា បច្ចុប្បន្នអ្នកវិទ្យាសាស្ត្រអាកាសធាតុកំពុងបង្កើតឆ័ត្រយក្សមួយដែលមានទំហំប្រមាណ ២.៦ លានគីឡូម៉ែត្រការ៉េ ស្មើនឹងទំហំនៃប្រទេសអាហ្សង់ទីន ដែលវានឹងជួយបាំងពន្លឺព្រះអាទិត្យ ដើម្បីកាត់បន្ថយឥទ្ធិពលនៃការឡើងកំដៅផែនដី។

គំនិតដ៏អស្ចារ្យនេះ បានមកពីក្រុមអ្នកស្រាវជ្រាវអ៊ីស្រាអែលដែលជឿគេថា ការបង្កើតឆ័ត្រយក្សទៅបង្ហោះលើអាកាសអាចកាត់បន្ថយសីតុណ្ហភាពរបស់ផែនដីបាន ២.៧ អង្សាក្នុងរយៈពេលពីរឆ្នាំ។ ដូច្នេះអ្នកវិទ្យាសាស្ត្របានត្រៀមខ្លួនរួចរាល់សម្រាប់ការសាងសង់របាំងយក្សដំបូងបង្អស់របស់ខ្លួនដែលមានទំហំធំជាង ៩,៣ លានម៉ែត្រការ៉េក្នុងតម្លៃប្រមាណ ២០ លានដុល្លារអាមេរិក ដោយពួកគេបាននិយាយថាគម្រោងនេះនឹងអាចសម្រេចបាននៅឆ្នាំ ២០២៧។

ទោះជាយ៉ាងណាក៏ដោយ លោក Avi Loeb រូបវិទូនៅសាកលវិទ្យាល័យ Harvard បានអត្ថាធិប្បាយលើគម្រោងនេះថា “ការដំឡើងរបាំងការពារព្រះអាទិត្យនៅលើលំហអាកាស” នឹងមានតម្លៃថ្លៃណាស់ ហើយទាមទារឱ្យមានកិច្ចសហការជាអន្តរជាតិដ៏ធំមួយ តាមរយៈការបែងចែកមូលនិធិពីថវិកាយោធា ទៅជាគោលបំណងសន្តិភាព។
គួរបញ្ជាក់ដែរថា ការកាត់បន្ថយពន្លឺ ឬរារាំងព្រះអាទិត្យដើម្បីធ្វើឱ្យផែនដីត្រជាក់ គឺជាផែនការមួយក្នុងចំណោមអ្នកវិទ្យាសាស្ត្រជាច្រើន។ នៅឆ្នាំ២០២១ គំនិតផ្តួចផ្តើមចំនួន ៣ លានដុល្លាររៀបចំដោយ Bill Gates បានបង្ហាញថាការស្រាវជ្រាវនេះមិនទទួលលទ្ធផលជោគជ័យទេ។

ហើយកាលពីឆ្នាំមុន សេតវិមានក៏បានប្រកាសដែរថា ខ្លួននឹងបើកចំហចំពោះផែនការទប់ស្កាត់ពន្លឺព្រះអាទិត្យមិនឱ្យមកលើផ្ទៃផែនដី ក្នុងគោលបំណងបញ្ឈប់ការឡើងកំដៅផែនដី ប៉ុន្តែផែនការទាំងអស់នេះគ្មានភាពពេញលេញនោះទេ។ ទោះជាយ៉ាងណា ក្រុមអ្នកវិទ្យាសាស្ត្រក្នុងប្រទេសអ៊ីស្រាអែលរំពឹងថានឹងមានគំរូពេញលេញក្នុងរយៈពេលបីឆ្នាំខាងមុខ ហើយគម្រោងរបស់ក្រុមនេះនឹងទទួលបានលទ្ធផលជោគជ័យនាពេលអនាគត៕

ប្រទេសថៃ ៖ កាលពីថ្ងៃទី៧ ខែកុម្ភៈ ឆ្នាំ២០២៤ សារព័ត៌មានថៃបានពីចុះផ្សាយពីកសិករម្នាក់ជាអតីតមេភូមិ រស់នៅភូមិម៉ាក្លឿ ឃុំម៉ាខា ស្រុកណូនថៃ ខេត្តនគររាជសីម៉ា បានដាំឪឡឹករាងបេះដូង និងពុំប្រើប្រាស់ជីគីមី ដើម្បីបង្កើនប្រាក់ចំណូលនៅថ្ងៃក្តីស្រឡាញ់ ។ កសិកររូបនេះនិយាយថា បើទោះជាឪឡឹករាងបេះដូងមានតម្លៃថ្លៃបន្តិចមែន ប៉ុន្តែមានអតិថិជនកក់អស់ពីចម្ការ ដោយសារជិតដល់ថ្ងៃបុណ្យក្តីស្រឡាញ់ ។

កសិកររូបនេះឈ្មោះ នីផុន ប្លៀនក្លាង អាយុ៦៥ឆ្នាំ ជាអតីតមេភូមិ និងជាប្រធានមជ្ឈមណ្ឌលបង្កើនប្រសិទ្ធភាពផលិតផលកសិកម្ម នៅឃុំណូនថៃ ខេត្តនគររាជសីម៉ា និយាយថា លោកចាប់អារម្មណ៍លើកសិកម្មសរីរាង្គ (ឬការដាំដុះដំណាំមិនប្រើប្រាស់សារធាតុគីមី) ហើយលោកក៏បានសិក្សាពីវិធីដាំដុះដំណាំ ។ លោកបានសម្រេចចិត្តដាំឪឡឹក ហើយធ្វើរោងដាំឪឡឹក ដែលមានទទឹង៦ម៉ែត្រ និងបណ្តោយ១២ម៉ែត្រ ។

លោកបានចាប់ផ្តើមដាំឪឡឹកដោយពុំប្រើប្រាស់ជីគីមី១០០% និងប្រើប្រាស់តែជីលាមកសត្វប៉ុណ្ណោះសម្រាប់ដាក់ដំណាំ ។ លោកបានដាំឪឡឹកចំនួន១០០ដើម ដោយលោកបានសាកល្បងដាំអស់រយៈពេលជាង១ឆ្នាំ ទើបទទួលបានទិន្នផលគួរឱ្យពេញចិត្តបែបនេះ ។ ឪឡឹកដុះដាំតាមធម្មជាតិរបស់លោក មានរសជាតិផ្អែម និងស្រួយឆ្ងាញ់ ហើយលោកអាចប្រមូលផលលក់បានរយៈពេលយូរទៀតផង ។

លោកនិយាយថា លោកបានយកពុម្ពផ្លាស្ទិកមកស្រោបពីលើផ្លែឪឡឹកដើម្បីឱ្យវាមានរាងបេះដូង សម្រាប់ទុកលក់នៅថ្ងៃ១៤ កុម្ភៈ ។ លោកបានប្រើប្រាស់ពុម្ពផ្លាស្ទិកស្រោបក្តិបឪឡឹក ពេលវាមានទម្ងន់ប្រមាណ១គីឡូក្រាម ឃើញថា វាស្រស់ស្អាត និងប្លែកភ្នែកយ៉ាងខ្លាំងសម្រាប់អ្នកបានឃើញផ្លែឪឡឹកទាំងនេះ ។ បច្ចុប្បន្ន ផ្លែឪឡឹកទាំងនេះមានអតិថិជនកក់អស់គ្មានសល់ ។

ចំណែកផ្លែឪឡឹកធម្មតាវិញ លោកលក់ក្នុងតម្លៃ៦៥បាតក្នុង១គីឡូក្រាម រីឯឪឡឹករាងបេះដូង លោកលក់ក្នុងតម្លៃពិសេស គឺតម្លៃ១០០បាតក្នុង១គីឡូក្រាម ។ ជាទូទៅ ឪឡឹក១ផ្លែ មានទម្ងន់រហូតដល់៥គីឡូក្រាមឯណោះ ហើយលោកអាចលក់ក្នុងតម្លៃរហូតដល់៣២៥បាត ។

ហេតុនេះ ការលក់ឪឡឹកដាំដុះពុំប្រើប្រាស់ជីគីមី បានធ្វើឱ្យកសិករអាចប្រមូលប្រាក់បានច្រើនជាងមុនរហូតដល់៤ដង ។ នេះចាត់ទុកថា គឺជាការបន្ថែមតម្លៃដល់ទិន្នផលកសិកម្មបានមួយកម្រិតទៀត ៕

ប្រទេសប៊ុលហ្គារី ៖ នៅថ្ងៃទី៨ ខែកុម្ភៈ ឆ្នាំ២០២៤ សារព័ត៌មានបរទេសបានរាយការណ៍ពីរឿងគួរឱ្យភ្ញាក់ផ្អើលមួយថា នារីមានបបូរមាត់ធំបំផុតនៅលើពិភពលោក មានគម្រោងពង្រីកទំហំបបូរមាត់ និងថ្ពាល់របស់នាងឱ្យកាន់តែធំថែមទៀត ។ ប៉ុន្តែវាបានធ្វើឱ្យក្រុមគ្រួសារ និងមិត្តភក្តិរបស់នាងបារម្ភពីសុខភាពនាងយ៉ាងខ្លាំង ។

នារីមានបបូរមាត់ធំនេះឈ្មោះ Andrea Ivanova អាយុ២៦ឆ្នាំ រស់នៅប្រទេសប៊ុលហ្គារី ដែលស្ថិតនៅតំបន់អឺរ៉ុបប៉ែកអាគ្នេយ៍ និយាយថា នាងនឹងពង្រីកទំហំបបូរមាត់ និងថ្ពាល់នាពេលឆាប់ៗនេះ ។ នាងបានកំណត់គោលដៅថា នាងនឹងក្លាយជានារីមានថ្ពាល់ធំជាងគេនៅលើពិភពលោក ។

នាងបាននិយាយនាពេលកន្លងមកថា នាងចង់មានរូបសម្បត្តិដ៏ស្រស់ស្អាតក្នុងឆ្នាំថ្មី ឆ្នាំ២០២៤ នេះ ។ ប៉ុន្តែនាងចាំមិនបានថា នាងបានចំណាយប្រាក់អស់ប៉ុន្មានទេក្នុងការធ្វើមុខមាត់ ហើយនាងបានរស់នៅជាមួយមុខមាត់បែបនេះអស់រយៈពេលជាច្រើនឆ្នាំ ។

នាងបន្តថា ក្រុមគ្រួសារ និងមិត្តភក្តិរបស់នាងព្រួយបារម្ភពីសុខភាពរបស់នាងយ៉ាងខ្លាំង ព្រោះពួកគេគិតថា អាចធ្វើឱ្យនាងប្រឈមនឹងបញ្ហាសុខភាព ហើយការកែសម្ឆស្សទាំងឡាយនឹងបណ្តាលឱ្យមានគ្រោះថ្នាក់ដល់ជីវិត ។ នាងដឹងថា គ្រួសារ និងមិត្តភក្តិរបស់នាង មិនចូលចិត្តមុខមាត់ផ្លាស់ប្តូនេះទេ ប៉ុន្តែនាងបែរជាចូលចិត្តមុខមាត់បែបនេះ ។

កាលពីអំឡុងពេលចូលឆ្នាំសកល នាងបានត្រៀមផ្តល់រង្វាន់ឱ្យខ្លួនឯង ដោយការចាក់សារធាតុអាស៊ីតអ៊ីយ៉ាលូរូនីច និងហ្វីល័រ ដោយសារនាងចូលចិត្តកែសម្ឆស្សមុខមាត់ ។ វាជាចំណង់ចំណូលចិត្តមួយ ហើយនាងរំភើបខ្លាំងណាស់នៅពេលបានកែទម្រង់មុខបន្ថែមទៀត និងចង់ឃើញមុខមាត់ថ្មីឆាប់ៗ ។

អ្នកនាង Andrea Ivanova បានចាប់ផ្តើមកែមុខមាត់របស់ខ្លួននៅឆ្នាំ២០១៨ ហើយចាប់ពីពេលនោះមក នាងក៏ចាប់ផ្តើមជក់ចិត្តនឹងការផ្លាស់ប្តូរមុខមាត់បែបនេះ ។ នាងទទួលស្គាល់ថា មានមនុស្សមួយចំនួនតូចប៉ុណ្ណោះដែលព្រមទទួលស្គាល់នាង ហើយនាងគ្មានអារម្មណ៍ខ្មាស់អៀនជាមួយរូបសម្បត្តិនេះ ព្រោះគិតថា វាសាកសមជាមួយនាង ។

ចំណែកអ្នកស្រឡាញ់ភាពស្រស់ស្អាតនិយាយថា បើនារីមាត់ធំសេពគប់បុរសណាម្នាក់ ហើយបុរសនោះនិយាយថា គាត់មិនសប្បាយចិត្តនៅពេលដើរទៅណាមកណាជាមួយនាងនៅតាមផ្លូវ ឬទៅកន្លែងផ្សេងៗ នៅទីបំផុត បុរសនោះនឹងសុំបញ្ចប់ទំនាក់ទំនងជាមួយនាងមិនខាន ។

ប៉ុន្តែអ្នកនាង Andrea Ivanova និយាយថា នាងនឹងអាក់អន់ចិត្តនៅពេលសង្សារសុំចែកផ្លូវ ប៉ុន្តែនាងនឹងស្វែងរកសង្សារថ្មីទៀត ដែលមិនប្រកាន់នឹងមុខមាត់បែបនេះ ។ នាងនឹងស្រឡាញ់បុរសនោះឱ្យអស់ពីចិត្ត និងស្រឡាញ់យ៉ាងពិតប្រាកដ ពីព្រោះសេចក្តីស្រឡាញ់មានភាពស្រស់ស្អាតបំផុតនៅលើពិភពលោក ៕