ប្រទេសចិន៖ ប្រទេសចិន បច្ចុប្បន្នបានប្រើប្រាស់ AI ដើម្បីគ្រប់គ្រងប្រព័ន្ធរថភ្លើងល្បឿនលឿនដ៏ធំបំផុតរបស់ពិភពលោក ដោយសារតែវាមានសមត្ថភាពអាចទស្សន៍ទាយកំហុសបានយ៉ាងត្រឹមត្រូវ ដោយផ្តល់ការប្រកាសមុនពេលមានបញ្ហាកើតឡើងនៅលើផ្លូវរថភ្លើងល្បឿនលឿនដ៏ធំបំផុតនេះ។

បើយោងតាមសារព័ត៌មានបរទេស ដែលបានចុះផ្សាយកាលពីពេលថ្មីៗនេះថា មុនពេលចិនចាប់ផ្តើមសាងសង់ផ្លូវរថភ្លើងល្បឿនលឿនដំបូងគេរបស់ពិភពលោកកាលពី ១៥ ឆ្នាំមុន បញ្ហាប្រឈមចម្បងដែលអ្នករិះគន់បានព្យាករណ៍នោះគឺការថែទាំ។ ក្រុមអ្នករិះគន់និយាយថា ការថែទាំនឹងក្លាយជាបន្ទុកមួយ ដោយសារប្រព័ន្ធផ្លូវដែកនៅទីបំផុតនឹងចាស់ទៅតាមពេលវេលា ហើយវានឹងបង្កើតបញ្ហាដែលត្រូវដោះស្រាយ។

ទោះជាយ៉ាងណាក៏ដោយ ឥឡូវនេះប្រទេសចិនកំពុងប្រើប្រាស់ AI (Artificial Intelligence) ដើម្បីគ្រប់គ្រងប្រព័ន្ធផ្លូវរថភ្លើងល្បឿនលឿនធំបំផុតរបស់ពិភពលោក ក្នុងប្រតិបត្តិការ និងថែទាំបណ្តាញផ្លូវដែករបស់ខ្លួន។ ប្រព័ន្ធ AI ពិសេសនេះមានសមត្ថភាពទស្សន៍ទាយកំហុសបានត្រឹមត្រូវ និងចេញការព្រមានមុនពេលមានបញ្ហា ហើយវាដើរតួនាទីយ៉ាងសំខាន់ក្នុងការថែរក្សាទាន់ពេលវេលានៃខ្សែរថភ្លើងល្បឿនលឿន។
បណ្តាញផ្លូវដែកល្បឿនលឿន ៤៥,០០០ គីឡូម៉ែត្រនេះគឺជាបណ្តាញផ្លូវដែកល្បឿនលឿនដ៏ធំបំផុតនៅលើផែនដី ហើយត្រូវបានគ្រប់គ្រងដោយប្រព័ន្ធ AI នៅក្នុងទីក្រុងប៉េកាំង។ យោងតាមវិស្វករដែលចូលរួមក្នុងគម្រោងនេះ ប្រព័ន្ធ AI នេះមានភាពត្រឹមត្រូវខ្ពស់ប្រហែល ៨៩% ហើយសម្រេចបាននូវចំណុចសំខាន់ៗមួយចំនួនក្នុងអំឡុងពេលប្រតិបត្តិការរបស់វា។

នៅក្នុងការអនុវត្តជាក់ស្តែង ប្រព័ន្ធ AI នេះដំណើរការទិន្នន័យយ៉ាងច្រើនក្នុងពេលវេលាជាក់ស្តែងទូទាំងប្រទេស។ វាក៏មានសមត្ថភាពក្នុងការជូនដំណឹងដល់ក្រុមថែទាំអំពីស្ថានភាពមិនធម្មតាក្នុងរយៈពេល ៤០ នាទីផងដែរ។ ជាមួយនឹង AI ចំនួននៃបញ្ហាផ្លូវតូចដែលលេចឡើងនៅក្នុងផ្លូវរថភ្លើងល្បឿនលឿនដែលកំពុងដំណើរការរបស់ប្រទេសចិនបានថយចុះ ៨០% ក្នុងរយៈពេលមួយឆ្នាំកន្លងមក។
លោក Liu Daoan ដែលជាវិស្វករជាន់ខ្ពស់នៅមជ្ឈមណ្ឌលត្រួតពិនិត្យហេដ្ឋារចនាសម្ព័ន្ធនៃសាជីវកម្មផ្លូវដែករដ្ឋចិនបានកត់សម្គាល់ថាប្រព័ន្ធ AI នេះពិតជាដំណើរការបានយ៉ាងល្អ។ លោកបានបន្តទៀតថា « ប្រព័ន្ធ AI នេះនឹងជួយក្រុមក្នុងកាត្រួតពិនិត្យ ក៏ដូចជាជួសជុលឡើងវិញបានលឿនតាមដែលអាចធ្វើទៅបាន »។

គួរបញ្ជាក់ដែរថា ផ្លូវរថភ្លើងល្បឿនលឿនរបស់ប្រទេសចិនគឺជាខ្សែបណ្តាញដែលដំណើរការលឿនបំផុតនៅក្នុងពិភពលោក។ ដោយបច្ចុប្បន្ននេះ វាបម្រើដល់រថភ្លើងដែលដំណើរការក្នុងល្បឿន ៣៥០ គីឡូម៉ែត្រក្នុងមួយម៉ោង ហើយគ្រោងនឹងបង្កើនវាដល់ល្បឿន ៤០០ គីឡូម៉ែត្រក្នុងមួយម៉ោងនៅឆ្នាំក្រោយ។ រដ្ឋាភិបាលក្រុងប៉េកាំងក៏មានគម្រោងបន្តពង្រីកផ្លូវនេះរហូតដល់វាតភ្ជាប់ទីក្រុងទាំងអស់ដែលមានប្រជាជនជាង ៥០ ម៉ឺននាក់ផងដែរ៕

កាលពីពេលថ្មីៗនេះ ក្រុមហ៊ុនយន្តអវកាស SpaceX របស់លោក Elon Musk បានចេញសេចក្តីប្រកាសតាមរយៈបណ្តាញសង្គម X ថា យន្តអវកាស Starship របស់ខ្លួន ដែលជារ៉ុក្កែតដ៏ធំសម្បើមនិងមានឥទ្ធិពលបំផុតមិនធ្លាប់មាន គ្រោងនឹងបាញ់បង្ហោះម្តងទៀត នៅថ្ងៃទី១៤ ខែមីនា ឆ្នាំ២០២៤នេះហើយ។

ក្តីស្រម៉ៃរបស់លោក Elon Musk គឺចង់រុករកឋានព្រះច័ន្ទនិងភពព្រះអង្គារ ដែលនឹងជួយជម្លៀសមនុស្សទៅរស់នៅទីនោះប្រកបដោយភាពជោគជ័យ ដោយបច្ចុប្បន្ន ក្រុមហ៊ុន SpaceX របស់លោកបាននឹងកំពុងព្យាយាមយ៉ាងពេញទំហឹងក្នុងការអភិវឌ្ឍយាន្តអវកាស Starship ខ្លួនឲ្យមានឥទ្ធិពលបំផុត។ ទោះជាយ៉ាងណា នេះគឺជាការបាញ់បង្ហោះគ្រាប់រ៉ុកែត Starship ជាលើកទី៣ហើយដែលគ្រោងធ្វើឡើងនៅថ្ងៃទី១៤ ខែមីនានេះ ខណៈដែលការបង្ហោះ២ដងលើកមុនគឺកាលពីខែមេសា និងវិច្ឆិកា ឆ្នាំ២០២៣ ហើយក៏ទទួលបាននូវការបរាជ័យទាំង២លើក។

ក្រុមហ៊ុន SpaceX បញ្ជាក់ថាការបាញ់បង្ហោះយាន្តអវកាសខ្លួនលើកនេះ នឹងធ្វើឡើងពី Starbase ក្នុងទីក្រុង Boca Chica រដ្ឋតិចសាស់ សហរដ្ឋអាមេរិក ដែលនឹងមានការបន្តផ្សាយផ្ទាល់នៅលើគេហទំព័រក្រុមហ៊ុន SpaceX លើបណ្តាញសង្គម X។ ប៉ុន្តែទោះជាយ៉ាងណា ទាំងនេះគ្រាន់តែជាផែនការ អាចនឹងមានការផ្លាស់ប្តូរតាមសា្ថនភាពជាក់ស្តែង៕

ជប៉ុន៖ នៅថ្ងៃទី១៣ ខែមីនា ឆ្នាំ២០២៤ នេះទីភ្នាក់ងារសារព័ត៌មាន BBC បានរាយការណ៍ថា អាជ្ញាធរនៅទីក្រុង Fukuyama ខេត្តហ៊ីរ៉ូស៊ីម៉ា ប្រទេសជប៉ុនបានចេញសេចក្តីប្រកាសដល់ពលរដ្ឋកុំឱ្យចូលទៅជិត ឬប៉ះពាល់ឆ្មាដែលវង្វេងតាមផ្លូវ ព្រោះមានឆ្មាមួយក្បាលបានធ្លាក់ចូលទៅក្នុងធុងគីមី នៅខាងក្នុងរោងចក្រ Nomura ដែលជាសារធាតុគីមីពុលគ្រោះថ្នាក់ខ្លាំងដល់ជីវិតមនុស្ស។

ការប្រកាសនេះធ្វើឡើងបន្ទាប់ពីកម្មកររោងចក្រមួយបានរកឃើញក្រដាសពណ៌លឿងចេញពីកុងតឺន័រ។ បន្ទាប់មកពួកគេក៏បានពិនិត្យមើលកាមេរ៉ាសុវត្ថិភាព ហើយឃើញថាឆ្មាកំពុងព្យាយាមរត់ចេញពីធុងគីមី ដោយបន្សល់ទុកនូវស្នាមក្រយ៉ៅដៃ។ ភ្លាមនោះមន្ត្រីនៅក្នុងទីក្រុង Fukuyama ក៏បានស្នើឱ្យសាធារណជននៅឱ្យឆ្ងាយពីសត្វនេះ ដើម្បីជៀសវាងគ្រោះថ្នាក់ដល់មនុស្ស។

បើយោងតាមគេហទំព័រព័ត៌មាន Asahi ក៏បានឱ្យដឹងទៀតថា ធុងគីមីដែលឆ្មាបានប៉ះពាល់នោះ គឺមានសារធាតុក្រូមីញ៉ូម hexavalent ដែលជាសារធាតុគីមីពុលខ្លាំងនិងមានអាស៊ីតខ្ពស់ ដែលអាចបង្កជាជំងឺមហារីកយ៉ាងឆាប់រហ័ស ក៏ដូចជាបណ្តាលឱ្យរលាកស្បែក ពិការភ្នែក និងបញ្ហាផ្លូវដង្ហើមផងដែរ។ ហេតុនេះហើយ ក្រុមបរិស្ថាននៃទីក្រុង Fukuyama ក៏បានព្រមានសាធារណជនកុំឱ្យប៉ះឆ្មាវង្វេងតាមផ្លូវ ឬកុំប៉ះឆ្មាណាដែលមានរូបរាងមិនធម្មតាឡើយ។

ទោះជាយ៉ាងណា ក្រុមអ្នកជំនាញបាននិយាយថា សត្វនេះទំនងអាចនឹងបាត់បង់ជីវិត ដោយសារឧបទ្ទវហេតុគ្រោះថ្នាក់នេះ។ ក្រុមហ៊ុនដែលជាម្ចាស់រោងចក្របាននិយាយថា ធុងនេះត្រូវបានគ្របជិតជាធម្មតា ប៉ុន្តែនៅថ្ងៃកើតហេតុ ផ្នែកនោះក៏ត្រូវបានគេរាយការណ៍ថាបានក្រឡាប់។ អ្នកនាំពាក្យក្រុមហ៊ុនបានបញ្ជាក់ដូច្នេះថា “ឧបទ្ទវហេតុនេះបានដាស់តឿនយើងឱ្យមានវិធានការណ៍ដើម្បីការពារសត្វតូចៗដូចជាឆ្មាពីការលួចចូល ដែលជាអ្វីដែលយើងមិនធ្លាប់គិតពីមុនមក”។ បច្ចុប្បន្នមន្ត្រីបាននិយាយថា រហូតមកដល់ថ្ងៃពុធនេះមិនទាន់មានរបាយការណ៍ឃើញឆ្មាមួយក្បាលនេះទេ៕

ប្រទេសហ្វីលីពីន ៖ កាលពីថ្ងៃទី១២ ខែមីនា ឆ្នាំ២០២៤ សារព័ត៌មានបរទេសរាយការណ៍ថា សហរដ្ឋអាមេរិកប្រកាសថា ត្រៀមវិនិយោគនៅប្រទេសហ្វីលីពីន ស្មើទឹកប្រាក់ជាង១ពាន់លានដុល្លារអាមេរិក ក្នុងវិស័យសំខាន់ៗ ដូចជា ៖ ថាមពលពន្លឺព្រះអាទិត្យ, រថយន្តអគ្គិសនី និងការផ្លាស់ប្តូរឈានទៅរកឌីជីថល ។

សារព័ត៌មានរ៉យទ័ររាយការណ៍ថា មន្ត្រីក្រសួងពាណិជ្ជកម្មអាមេរិកបានលើកឡើងក្នុងអំឡុងពេលធ្វើដំណើរមកកាន់ទីក្រុងម៉ានីល ប្រទេសហ្វីលីពីន ជាផ្លូវការថា ក្រុមហ៊ុនរបស់អាមេរិកត្រៀមវិនិយោគនៅហ្វីលីពីន ស្មើទឹកប្រាក់ជាង១ពាន់លានដុល្លារអាមេរិក ។ ក្រុមហ៊ុនអាមេរិកចាប់អារម្មណ៍វិនិយោគលើផ្នែកថាមពលពន្លឺព្រះអាទិត្យ, រថយន្តអគ្គិសនី និងការផ្លាស់ប្តូរឈានទៅរកឌីជីថល ។

អ្នកនាង Remondo ជាមន្ត្រីតំណាងលោកប្រធានាធិបតីអាមេរិក ចូ បៃឌិន បានធ្វើដំណើរមកកាន់ទីក្រុងម៉ានីល និងអនុវត្តបេសកកម្មវិនិយោគរយៈពេល២ថ្ងៃ ព្រមជាមួយគណៈប្រតិភូសុទ្ធតែជាមន្ត្រីជាន់ខ្ពស់មកពីក្រុមហ៊ុននានា ដូចជា ៖ ក្រុមហ៊ុន GreenFire Energy, Google Asia Pacific, Visa, United Airlines និង KKR ។ ក្រុមហ៊ុនអាមេរិកទាំងនេះនឹងចូលរួមចំណែកយ៉ាងសំខាន់ក្នុងការអភិវឌ្ឍវិស័យផ្សេងៗនៅប្រទេសហ្វីលីពីន រួមទាំងហេដ្ឋារចនាសម្ព័ន្ធ, ថាមពលស្អាត, រ៉ែ, កសិកម្ម និងការច្នៃប្រឌិត ។

អ្នកនាង Remondo បាននិយាយទៅកាន់មន្ត្រីហ្វីលីពីនថា ៖ «សម្ព័ន្ធមិត្តរវាងប្រទេសហ្វីលីពីនជាមួយអាមេរិក គឺមានភាពរឹងមាំអស់រយៈពេល៧២ឆ្នាំហើយ ។ ប្រទេសយើងទាំងពីរនៅតែជាមិត្តល្អនឹងគ្នាយ៉ាងរឹងមាំ និងជាដៃគូក្នុងភាពចម្រុងចម្រើនផងដែរ» ។

គួរបញ្ជាក់ថា ប្រទេសហ្វីលីពីន និងអាមេរិក គឺជាសម្ព័ន្ធមិត្តនឹងគ្នានៅក្រោមសន្ធិសញ្ញាការពារជាតិ ដែលមានរយៈពេលរហូតដល់៧៣ឆ្នាំ ។ បច្ចុប្បន្ន ប្រធានាធិបតីហ្វីលីពីន លោក Ferdinand Marcos Jr. បានព្យាយាមពង្រឹងទំនាក់ទំនងជាមួយអាមេរិកឱ្យកាន់តែស៊ីជម្រៅថែមទៀត ក្នុងកិច្ចសហប្រតិបត្តិការផ្នែកសេដ្ឋកិច្ច បន្ថែមពីលើកិច្ចសហប្រតិបត្តិការផ្នែកការពារជាតិ ៕

ជប៉ុន៖ កាលពីពេលថ្មីៗនេះ យោងតាមក្រុមហ៊ុនផលិតរថយន្តក្នុងស្រុក Toyota/Lexus បានឱ្យដឹងថា បច្ចុប្បន្នម៉ូដែល Land Cruiser មានចំនួន ៩/១០ នៃរថយន្តដែលត្រូវបានគេលួ.ចច្រើនបំផុតក្នុងឆ្នាំ ២០២៣ ដោយរថយន្តនេះនាំមុខគេ ៣ ឆ្នាំជាប់ៗគ្នា។ ខណៈនៅសហរដ្ឋអាមេរិក ចោ.រមានគោលដៅទៅលើរថយន្តភីកអាប់ធំៗដូចជារថយន្តកូរ៉េ ( Hyundai , និង Kia ) ចំណែកនៅចក្រភពអង់គ្លេសវិញ ពួកគេឈ្លក់វង្វេងនឹងរថយន្ត Range Rover ដូច្នេះស្ថានភាពនៃការលួ.ចតាមបណ្តាប្រទេសនីមួយៗគឺខុសគ្នា។

ទោះជាយ៉ាងណា នៅក្នុងទឹកដីនៃព្រះអាទិត្យរះ Toyota និង Lexus គឺជាឈ្មោះដែលចោ.រចាប់អារម្មណ៍ជាងគេបំផុត។ ក្រុមហ៊ុននេះកាន់កាប់ ៩ ក្នុងចំណោម ១០ មុខតំណែងក្នុងបញ្ជីរថយន្តទាំង ១០ ដែលត្រូវបានគេលួ.ចច្រើនបំផុតនៅក្នុងប្រទេសជប៉ុនឆ្នាំ ២០២៣ នេះបើយោងតាម Response ដែលជាគេហទំព័រព័ត៌មានរបស់ប្រទេសនេះ។ ដូច្នេះរថយន្តទាំង ១០ នោះរួមមាន៖

១. Toyota Land Cruiser មានចំនួនករណីលួ.ចប្រមាណ ៣៨៣ គ្រឿង
២. Toyota Alphard មានចំនួនករណីលួ.ចប្រមាណ ៣៦៤ គ្រឿង
៣. Toyota Prius មានចំនួនករណីលួ.ចប្រមាណ ៣០៧ គ្រឿង
៤. Lexus LX មានចំនួនករណីលួ.ចប្រមាណ ១២០ គ្រឿង
៥. Toyota Hiace មានចំនួនករណីលួ.ចប្រមាណ ៦០ គ្រឿង
៦. Toyota Crown មានចំនួនករណីលួ.ចប្រមាណ ៥៣ គ្រឿង
៧. Toyota Vellfire មានចំនួនករណីលួ.ចប្រមាណ ៤៣ គ្រឿង
៨. Lexus RX មានចំនួនករណីលួ.ចប្រមាណ ៤២ គ្រឿង
៩. Toyota Harrier មានចំនួនករណីលួ.ចប្រមាណ ៣៧ គ្រឿង
១០. Mercedes មានចំនួនករណីលួ.ចប្រមាណ ៣៧ គ្រឿង។

គួរបញ្ជាក់ដែរថា នៅក្នុងបញ្ជីនៃរថយន្តចំនួន ១០ ដែលត្រូវបានគេលួ.ចច្រើនបំផុតត្រូវបានចងក្រងដោយសមាគមធានារ៉ាប់រងទូទៅរបស់ប្រទេសជប៉ុន ដែលជាផ្នែកមួយនៃការស្ទង់មតិស្តីពីការលួ.ចរថយន្តនៅក្នុងទឹកដីនៃព្រះអាទិត្យរះនេះ។ ដូច្នេះម៉ូដែលរថយន្តកំពូលទាំង ១០ មានចំនួន ៥៥.៧% នៃការលួចសរុប។ ហើយពេលវេលានៃឧប្បត្តិហេតុដែលបានកើតឡើងញឹកញាប់បំផុតនោះ គឺពីយប់ដល់ព្រឹក (ប្រហែលម៉ោង ១០ យប់ដល់ម៉ោង ៩ ព្រឹក) ដែលមាន ៥៨.៤% ដោយអត្រាក្នុងអំឡុងពេលនេះបានកើនឡើង ១.៣% បើប្រៀបធៀបទៅនឹងឆ្នាំមុន៕

ប្រទេសវៀតណាម ៖ បើតាមរបាយការណ៍របស់ HSBC Vietnam បញ្ជាក់ថា មានកត្តាជាច្រើនដែលធ្វើឱ្យវិនិយោគិនបរទេសស្ទាក់ស្ទើរក្នុងការសម្រេចចិត្តមកវិនិយោគនៅប្រទេសវៀតណាម ដូចជា ៖ ផលិតភាពការងារទាប, ប្រសិទ្ធភាពនៃការដឹកជញ្ជូនមិនល្អ និងគោលនយោបាយមិនប្រាកដប្រជា ។ ហេតុនេះ ធ្វើឱ្យវៀតណាមដើរតាមក្រោយប្រទេសផ្សេងៗនៅតំបន់អាស៊ីអាគ្នេយ៍ ផ្នែកផលិតភាពការងារ ។

លោក Tim Evans នាយកប្រតិបត្តិរបស់ HSBC Vietnam លើកឡើងថា ប្រទេសវៀតណាមបានដើរតាមក្រោយប្រទេសផ្សេងៗនៅតំបន់អាស៊ីអាគ្នេយ៍ ផ្នែកផលិតភាពការងារ ។ ជាក់ស្តែង លទ្ធផលផលិតក្នុង១ម៉ោងធ្វើការ គឺទាបជាង៩ឯកតា បើធៀបនឹង១០ឯកតា ទៅ២៦ឯកតា របស់ប្រទេសផ្សេងៗក្នុងតំបន់ ។ ហេតុនេះ វាជាកត្តាមួយក្នុងចំណោមកត្តាសំខាន់ៗដែលវិនិយោគិនបរទេសមើលឃើញថា ការទទួលបានកម្លាំងពលកម្មមានគុណភាពខ្ពស់នៅវៀតណាមជារឿងពិបាក ។

កត្តាមួយទៀត គឺប្រសិទ្ធភាពនៃការដឹកជញ្ជូនរបស់វៀតណាមដើរតាមពីក្រោយប្រទេសចិន, ម៉ាឡេស៊ី និងថៃ ដោយសារវៀតណាមមានបញ្ហាទាក់ទងនឹងសមត្ថភាពដឹកជញ្ជូន, ពេលវេលាដឹកជញ្ជូន និងការត្រួតពិនិត្យការងារដឹកជញ្ជូន ។ បច្ចុប្បន្ន ហេដ្ឋារចនាសម្ព័ន្ធដឹកជញ្ជូនរបស់វៀតណាមពុំទាន់ស្របតាមស្តង់ដារសកលទេ ដោយការដឹកជញ្ជូននៅតាមផ្លូវមានសមាមាត្រស្មើត្រឹមតែ៣ភាគ៤ នៃការដឹកជញ្ជូនសរុប បើទោះជាមានតម្រូវការដឹកជញ្ជូនតាមសមុទ្រ និងកំពង់ផែកម្រិតខ្ពស់ក្តី ។

ក្រៅពីនេះ ការអនុវត្តតាមច្បាប់ និងគោលនយោបាយផ្សេងៗរបស់វៀតណាមនៅតែជាបញ្ហាប្រឈម ។ បើតាមការស្ទង់មតិចុងក្រោយរបស់ HSBC Global Connections បង្ហាញថា ការអភិវឌ្ឍបទប្បញ្ញត្តិជាឧបសគ្គ១ ក្នុងចំណោមឧបសគ្គចំនួន២ ដំបូងគេសម្រាប់ក្រុមហ៊ុនបរទេសដែលចូលមកប្រកបអាជីវកម្មនៅវៀតណាម ។ ការស្ទង់មតិបង្ហាញថា ក្រុមហ៊ុនបរទេស៣០% បានលើកឡើងពីឧបសគ្គក្នុងការសម្របខ្លួនឱ្យស្របតាមបទប្បញ្ញតិ្ត និងគោលនយោបាយផ្សេងៗដែលផ្លាស់ប្តូរយ៉ាងឆាប់រហ័ស ។

លោក Tim Evans នាយកប្រតិបត្តិរបស់ HSBC Vietnam បន្តថា ក្របខ័ណ្ឌបទប្បញ្ញត្តិមានស្ថិរភាព និងងាយស្រួលយល់ នឹងក្លាយជាជំហានវិជ្ជមានដើម្បីទាក់ទាញវិនិយោគិនថ្មីៗឱ្យចូលមកវិនិយោគនៅវៀតណាម ខណៈខ្សែសង្វាក់ផ្គត់ផ្គង់បង្ហាញយ៉ាងច្បាស់ថា កំពុងផ្លាស់ប្តូរពីចិនទៅកាន់ប្រទេសផ្សេងៗនៅតំបន់អាស៊ី ។ ហេតុនេះ វៀតណាម និងឥណ្ឌា គឺជាប្រទេសគោលដៅដែលគួរឱ្យចាប់អារម្មណ៍សម្រាប់វិនិយោគិន ។

ក្រៅពីនេះ ការស្ទង់មតិរបស់ EuroCham ក៏បានបញ្ជាក់ដែរថា បណ្តាក្រុមហ៊ុនអឺរ៉ុបដែលប្រកបអាជីវកម្មនៅប្រទេសចិន នៅតែបន្តពិនិត្យឡើងវិញនូវយុទ្ធសាស្ត្រខ្សែសង្វាក់ផ្គត់ផ្គង់ជាបន្តបន្ទាប់ ។ រីឯនៅតំបន់អាស៊ាន ត្រូវបានគេជ្រើសរើសឱ្យក្លាយជាតំបន់គោលដៅដំបូងគេសម្រាប់ការផ្លាស់ប្តូរទីតាំងវិនិយោគទាំងនេះ ហើយវៀតណាម គឺជាគោលដៅវិនិយោគចម្បងក្នុងតំបន់ ៕

ក្នុងព្រឹត្តិការណ៍ដែលប្រព្រឹត្តទៅនាព្រឹកថ្ងៃទី១១ ខែមីនា ម៉ោងនៅកម្ពុជា សត្វឆ្កែឈ្មោះ Messi បានទាក់ទាញការចាប់អារម្មណ៍យ៉ាងខ្លាំងនៅលើបណ្តាញអ៊ីនធឺណិតនៅពេលបង្ហាញខ្លួនជាមួយក្រុមការងារភាពយន្តរឿង Anatomy of a Fall។ ទោះបីជា Messi ជាសត្វចិញ្ចឹមក្តីប៉ុន្តែជាសត្វទទួលបានកិត្តិយសមិនចាញ់មនុស្សឡើយដោយមានកៅអីអង្គុយដូចជាតារាសម្តែងឯងទៀត។

ពិធីករ Jimmy បានណែនាំ Messi ក្នុងកម្មវិធីបើកឆាក ហើយនិយាយបែបកំប្លែងថា «ទោះបីជាវាជាឆ្កែក៏ដោយ Messi បានទទួលរង្វាន់ជាតួឯកប្រចាំឆ្នាំក្នុងរឿង Anatomy of a Fall » ។ មុនពេលបង្ហាញខ្លួនគេហទំព័រ Vanity Fair បានឱ្យដឹងថា Messi ទំនងជាមិនបង្ហាញខ្លួនទេ។ ទោះយ៉ាងណាកម្មវិធីមកដល់សត្វឆ្កែនេះក៏បានមកចូលរួមផងដែរ។

ក្នុងព្រឹត្តិការណ៍រយៈពេលបួនម៉ោង Messi អង្គុយត្រង់ មិនព្រឺសម្បុរ ឬបង្កបញ្ហានោះទេ។ អ្នកយកព័ត៌មានក៏ថតបានពេលដែលឆ្កែមើលមកត្រង់កាមេរ៉ាផងដែរ ជាហេតុធ្វើឱ្យអ្នកប្រើប្រាស់បណ្តាញសង្គមជាច្រើនចាប់អារម្មណ៍ទៅលើសត្វចិញ្ចឹមមួយនេះ។

កាលពីមុន Messi បានចូលរួមពិធីទទួលជ័យលាភីសម្រាប់បេក្ខភាព Oscar កាលពីខែកុម្ភៈ។ Laura Martin ដែលជាម្ចាស់ និងជាគ្រូបង្វឹករបស់ Messi បានប្រាប់ Hollywood Reporter ថាឆ្កែបានប្រលែងលេងជាមួយ Billie Eilish ប្រហែល ១០ នាទី។ ពេលចេញទៅក្រៅតាមផ្លូវ Messi បានដើរទៅរកតារាសម្តែង Bradley Cooper ទៀតផង។

គួរបញ្ជាក់ថា Messi មានអាយុ៧ឆ្នាំបានបង្ហាញខ្លួននៅក្នុងភាពយន្ត «Anatomy of a Fall» ដែលជារឿងនិយាយអំពីស្ត្រីម្នាក់ដែលត្រូវបានចោទប្រកាន់ពីបទសម្លាប់ប្តីរបស់នាង ហើយមានសាក្សីតែម្នាក់គត់គឺកូនប្រុសពិការភ្នែករបស់នាង និងឆ្កែរបស់ពួកគេ។ ភាពយន្តនេះត្រូវបានតែងតាំងសម្រាប់ពានរង្វាន់អូស្ការចំនួន ៥ ដោយឈ្នះពានរង្វាន់ភាពយន្តដើមល្អបំផុត(Best Original Screenplay)។ អ្នកដឹកនាំរឿងបាននិយាយថា Messi គឺជាផ្នែកមួយដែលមិនអាចខ្វះបាននៃខ្សែភាពយន្តនេះ។ ក្នុងឈុតខ្លះឆ្កែគឺជាតួអង្គដូចអ្នកដទៃទៀត ហើយវាពិតជាសំខាន់ណាស់សម្រាប់ភាពយន្តនេះ៕