សហរដ្ឋអាមេរិក ៖ នារីម្នាក់ឈ្មោះ លីសា រស់នៅរដ្ឋមីឈីហ្គេន សហរដ្ឋអាមេរិក បានផ្តល់បទសម្ភាសន៍មកកាន់សារព័ត៌មាន BBC ថា នាងពុំចង់បានកូនទេ ហើយនាងគិតបែបនេះតាំងពីរៀននៅវិទ្យាល័យមកម៉្លេះ ដោយសារមានអារម្មណ៍ថា ត្រូវលះបង់អ្វីគ្រប់យ៉ាងក្នុងជីវិតដើម្បីក្លាយជាម្តាយម្នាក់ ។ លើសពីនេះ ការមានកូនត្រូវចំណាយគ្រប់បែបយ៉ាង ដូចជា ៖ ពេលវេលា, ប្រាក់ និងលះបង់សកម្មភាពដែលខ្លួនចង់ធ្វើ ។

ចំណែកបុរសជាគូស្នេហ៍របស់នាង លីសា និយាយថា លោកតែងតែបារម្ភពីរឿងមានកូនជានិច្ច ហើយលោកចាប់ផ្តើមមានចំណែករួមផ្នែកនយោបាយកាន់តែច្រើន ។ ហេតុនេះ លោកបានរៀនសូត្រពីអ្វីគ្រប់យ៉ាងពាក់ព័ន្ធនឹងបញ្ហាបម្រែបម្រួលអាកាសធាតុ ទើបលោកគិតថា លោកមិនអាចទទួលខុសត្រូវលើជីវិតរបស់កូនបានទេ ។

លោកបន្តថា ស្របពេលស្ថានភាពសង្គមតានតឹងអាចធ្វើឱ្យលោក និងអ្នកដទៃស្វែងរកទំនាក់ទំនងល្អ ឬសេចក្តីស្រឡាញ់គ្មានលក្ខខណ្ឌ ប៉ុន្តែវាមិនមែនជាការរៀបការហើយមានកូននោះទេ ។ មនុស្សសម័យថ្មីជាច្រើននាក់សុខចិត្តចិញ្ចឹមឆ្កែ, ឆ្មា ឬសត្វផ្សេងៗ ជំនួសការមានកូន រហូតដល់មានឃ្លាមួយដែលពលរដ្ឋអាមេរិកតែងនិយាយលេងសើចថា ៖ «Pets are the new kids, Plants are the new pets» ។

ចំពោះមូលហេតុដែលមនុស្សសម័យថ្មីភាគច្រើនសម្រេចចិត្តគ្មានកូន ឬមានកូនបន្ថែមទៀត បើធៀបនឹងមនុស្សសម័យមុន គឺអាចបណ្តាលមកពីកត្តាជាច្រើន ដូចជា ៖ ការពន្យារកំណើតមានប្រសិទ្ធភាព ហើយស្ត្រីមានជម្រើសច្រើនជាងពេលមុន ។ ពួកនាងពុំបានកំណត់គោលដៅថា ចង់រៀបការហើយមានកូនដើម្បីបង្កើតស្ថិរភាពសម្រាប់ជីវិតទេ ខណៈស្ថានភាពសង្គមមិនអំណោយផល ។

លើសពីនេះ ពួកគេពុំចង់ទទួលបន្ទុកចិញ្ចឹមកូនតូចតាំងពីកើតជាទារករហូតដល់ធំពេញវ័យ ដែលត្រូវចំណាយប្រាក់ឱ្យកូនរៀនសូត្រ, ទិញសម្ភារៈប្រើប្រាស់ និងសម្លៀកបំពាក់យ៉ាងច្រើន ។ ការមានកូនបានធ្វើឱ្យពេលវេលារបស់ឪពុក-ម្តាយមានកំណត់ ពីព្រោះឪពុក-ម្តាយគិតថា តើពួកគេត្រូវទៅធ្វើការនៅខាងក្រៅផ្ទះបែបណា ដើម្បីមិនបណ្តោយឱ្យកូននៅផ្ទះតែម្នាក់ឯង ។ ម្យ៉ាងទៀត ពួកគេត្រូវមានពេលវេលាថែទាំកូន តាមដានអាកប្បកិរិយា និងការចម្រើនវ័យរបស់កូនទៀតផង ។

ប៉ុន្តែពួកគេអាចទុកឆ្មា និងឆ្កែឱ្យនៅផ្ទះបាន ហើយការចំណាយប្រាក់ជួលអ្នកថែទាំសត្វចិញ្ចឹម គឺចំណេញជាងការចំណាយប្រាក់ជួលអ្នកមកថែទាំកូន ។ ក្រៅពីនេះ ការចិញ្ចឹមសត្វពុំសូវមានភាពតានតឹងដូចចិញ្ចឹមក្មេងទេ ទើបធ្វើឱ្យអ្នកចិញ្ចឹមសត្វមានសុខភាពផ្លូវចិត្តល្អជាងមនុស្សទូទៅ ៕

បរទេស៖ កាលពីពេលថ្មីៗនេះ រដ្ឋាភិបាលអាមេរិកបានប្រកាសដាស់តឿនប្រជាពលរដ្ឋរបស់ខ្លួនកុំឱ្យបរិភោគអណ្តើកសមុទ្រ ដោយសារមនុស្សជាច្រើនបានបាត់.បង់.ជីវិត បន្ទាប់ពីបរិភោគសាច់អណ្តើកសមុទ្រ។

កាលពីថ្ងៃទី១០ ខែមីនា ឆ្នាំ២០២៤ យោងតាម The Guardian បានឱ្យដឹងថា មានមនុស្សប្រហែល ៩ នាក់បានបាត់.បង់.ជីវិត ដោយក្នុងនោះកុមារមានចំនួន ៨នាក់ និងមនុស្សពេញវ័យម្នាក់ត្រូវបានគេរកឃើញថាបានស្លា.ប់នៅក្នុងប្រជុំកោះ Zanzibar ខណៈដែលមនុស្ស ៧៨ នាក់ផ្សេងទៀតត្រូវបានបញ្ជូនទៅមន្ទីរពេទ្យសង្គ្រោះបន្ទាន់ភ្លាមៗ បន្ទាប់ពីពួកគេបានបរិភោគសាច់អណ្តើកសមុទ្រ។

សាច់អណ្តើកសមុទ្រត្រូវបានចាត់ទុកថាជាអាហារដ៏ឆ្ងាញ់មួយនៅក្នុងប្រជុំ Zanzibar ប៉ុន្តែការបរិភោគវាគឺពិតជាមានគ្រោះថ្នាក់ខ្លាំងណាស់ ដោយសារវាមានសារធាតុ chelonitoxism ដែលជាសារធាតុពុល និងមានឥទ្ធិពលខ្លាំងអាចបណ្តាលឱ្យមនុស្សស្លាប់ភ្លាមៗ នៅពេលដែលពួកគេបរិភោគវា។

មន្ត្រីពេទ្យស្រុក Mkoani លោកវេជ្ជបណ្ឌិត Haji Bakari បាននិយាយថា មនុស្សពេញវ័យដែលបានស្លាប់កាលពីប៉ុន្មានថ្ងៃមុននេះ គឺជាម្តាយរបស់កុមារម្នាក់ក្នុងចំណោមកុមារដែលបានស្លាប់នោះ។ លោកបានបន្តទៀតថា តាមការពិនិត្យនិងធ្វើតេស្តពីមន្ទីរពិសោធន៍ បានរកឃើញថា ជនរងគ្រោះទាំងអស់សុទ្ធតែបានបរិភោគសាច់អណ្តើកសមុទ្រ នេះមានន័យថា ពួកគេពិតជាបានពុលអាហារមកពីការបរិភោគអណ្តើកពិតមែន មិនមែនពួកគេរងគ្រោះដោយសារជំងឺ ឬពុលអាហារអ្វីផ្សេងនោះទេ។

ភ្លាមនោះអាជ្ញាធរនៅក្នុងតំបន់កោះ Zanzibar ដែលជាតំបន់ពាក់កណ្តាលស្វយ័តនៃប្រទេសអាហ្វ្រិកខាងកើតក្នុងប្រទេសតង់ហ្សានីបានបញ្ជូនក្រុមគ្រប់គ្រងគ្រោះមហន្តរាយ ដែលបានជំរុញនិងដាស់តឿនប្រជាពលរដ្ឋឱ្យជៀសវាងការបរិភោគអណ្តើកសមុទ្រ ឬយល់ល្អកុំបរិភោគសាច់អណ្តើកសមុទ្រក៏បានដែរ។

ទោះជាយ៉ាងណាក៏ដោយ នេះមិនមែនជាលើកទី ១ ទេដែលប្រជាពលរដ្ឋបរិភោគអណ្តើកសមុទ្រមានការពុល នៅក្នុងខែវិច្ឆិកា ឆ្នាំ២០២១ មនុស្ស ៧ នាក់ រួមទាំងក្មេងអាយុ ៣ ឆ្នាំម្នាក់ក៏បានបាត់បង់ជីវិតនៅលើកោះ Pemba ផងដែរ បន្ទាប់ពីពួកគេបានបរិភោគសាច់អណ្តើក ហើយបីនាក់ផ្សេងទៀតត្រូវបានបញ្ជូនទៅមន្ទីរពេទ្យ៕

ប្រទេសវៀតណាម ៖ កាលពីចុងឆ្នាំ២០២៣ នាយករដ្ឋមន្ត្រីវៀតណាម លោក Pham Minh Chin បានធ្វើដំណើរទៅកាន់តំបន់ Silicon Valley ស្ថិតនៅភាគខាងជើងរដ្ឋកាលីហ្វ័រញ៉ា សហរដ្ឋអាមេរិក ដើម្បីទំនាក់ទំនងជាមួយក្រុមហ៊ុន Semiconductor ដូចជា ៖ Synopsys និង Nvidia ។ បន្ទាប់ពីលោកនាយករដ្ឋមន្ត្រីវៀតណាមត្រឡប់មកប្រទេសវិញ លោកបានបញ្ជាទៅក្រសួងចំនួន៤ ឱ្យបង្កើនចំនួនវិស្វករវៀតណាមរាប់ម៉ឺននាក់ ដែលអាចធ្វើការផ្នែកផលិត Semiconductor ។

ហេតុនេះ ការព្យាយាមរបស់រដ្ឋាភិបាលវៀតណាមក្នុងការធ្វើឱ្យប្រទេសវៀតណាមក្លាយជាគោលដៅគួរឱ្យទាក់ទាញសម្រាប់វិនិយោគិនផ្នែកឧស្សាហកម្មបន្ទះឈីប បានដំណើរការជាបន្តបន្ទាប់ រហូតដល់ឆ្នាំ២០២៤ នេះ ។

លោក Huynh Thanh Da រដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យាថ្លែងថា រដ្ឋាភិបាលបានបង្កើនសិទ្ធិប្រយោជន៍ផ្នែកពន្ធសម្រាប់ផលិតផលមានតម្លៃបន្ថែមខ្ពស់ ដូចជា ៖ Semiconductor ហើយវៀតណាមរីករាយទទួលស្វាគមន៍ការវិនិយោគថ្មីៗពីបរទេសផងដែរ ។ រដ្ឋាភិបាលនឹងសហការជាមួយក្រសួង និងក្រុមហ៊ុនបច្ចេកវិទ្យាផ្សេងៗ ដើម្បីជំរុញការស្រាវជ្រាវ និងទាក់ទាញអ្នកមានជំនាញខ្ពស់មកវិនិយោគក្នុងឧស្សាហកម្ម Semiconductor កាន់តែច្រើន ។

ក្រៅពីនេះ វៀតណាមមានគោលបំណងក្លាយជាប្រទេសនាំមុខគេលើពិភពលោក ផ្នែកឧស្សាហកម្ម Semiconductor ដោយសារប្រទេសជាច្រើនចាំបាច់កាត់បន្ថយហានិភ័យពីប្រទេសចិន ស្របពេលស្ថានការណ៍នយោបាយមានភាពតានតឹងខ្លាំងឡើង ។ ហេតុនេះ វៀតណាមនឹងអាចប្រកួតប្រជែងជាមួយតៃវ៉ាន់ និងកូរ៉េខាងត្បូងបាន ។

ទោះយ៉ាងណា វៀតណាមនៅតែប្រឈមមុខជាមួយឧបសគ្គជាច្រើនទៀត ខណៈចំនួនកម្លាំងពលកម្មមានជំនាញរបស់វៀតណាមមានកំណត់ ក៏ដូចជាអសន្តិសុខថាមពលនៅមជ្ឈមណ្ឌលផលិតកម្មបច្ចេកវិទ្យានៅភាគខាងជើងវៀតណាមផងដែរ ។

បើតាមរបាយការណ៍របស់ក្រុមប្រឹក្សាធុរកិច្ចអាមេរិក-អាស៊ានបង្ហាញថា វៀតណាមមានវិស្វករទទួលបានការបណ្តុះបណ្តាលផ្នែក Semiconductor ប្រមាណ៥.០០០នាក់ ប៉ុន្តែវៀតណាមត្រូវតែមានវិស្វកររហូតដល់២ម៉ឺននាក់ ក្នុងរយៈពេល៥ឆ្នាំទៀត ។

លោក Nguyen Thanh Yen ជាវិស្វករមកពីក្រុមហ៊ុនរចនាបន្ទះឈីប CoAsia SEMI និយាយថា រដ្ឋាភិបាលវៀតណាមក៏បានជ្រាបពីការខ្វះខាតកម្លាំងពលកម្មផងដែរ ហើយរដ្ឋាភិបាលជំរុញឱ្យមានការបណ្តុះបណ្តាលវិស្វករបន្ថែមទៀត ។ លើសពីនេះ រដ្ឋាភិបាលបានបង្កើតគម្រោងជាក់លាក់ដើម្បីបង្កើនចំនួនវិស្វករផ្នែក Semiconductor ៕

នៅអាស៊ីគឺសម្បូរទៅដោយរមណីយដ្ឋានទេសចរល្បីៗជាច្រើន ក៏ដូចជាកន្លែងដែលមានទេសភាពស្រស់ស្អាត ធម្មជាតិស្រស់បំព្រង ប្លែក និងអស្ចារ្យក្នុងការរុករក មិនចាញ់ទ្វីបអឺរ៉ុបនោះទេ។ នេះបើយោងតាម Agoda.com ដែលជាភ្នាក់ងារទេសចរណ៍អនឡាញដ៏ធំមួយនៅក្នុងតំបន់អាស៊ីប៉ាស៊ីហ្វិក បានណែនាំគោលដៅធម្មជាតិកំពូលទាំង ៩ ដែលពេញនិយមបំផុតនៅអាស៊ី សម្រាប់អ្នកដំណើរក្នុងការភ្ជាប់ទំនាក់ទំនងជាមួយធម្មជាតិ តាមរយៈព្រៃឈើបុរាណ ជ្រលងជ្រៅ និងបឹងដ៏ស្ងប់ស្ងាត់។

១.ទីក្រុង Ooty ប្រទេសឥណ្ឌា៖ Ooty គឺជាគោលដៅដែលគេស្គាល់ថាជា “Queen of the Hills” គឺជាជម្រើសសម្រាប់អ្នកស្រលាញ់ធម្មជាតិនៅពេលមកប្រទេសឥណ្ឌា។ ទីក្រុងនេះស្ថិតនៅក្នុងចំណោមភ្នំខៀវស្រងាត់នៃជួរ Nilgiris ដែលនៅទីនេះភ្ញៀវទេសចរអាចចូលរួមជាមួយធម្មជាតិ តាមរយៈបទពិសោធន៍ជាច្រើន ដូចជាការអង្គុយលើទូកមើលបឹង Ooty ទស្សនាសួនរុក្ខសាស្ត្រ ឬទៅ “Dolphin Nose” ដើម្បីមើលទេសភាពទីក្រុងពីខាងលើ។ ប្រសិនបើអ្នកចូលចិត្តឡើងភ្នំ អ្នកគួរតែទៅ Tiger Hill នៅភាគខាងកើតដែលមានចម្ងាយ ៦ គីឡូម៉ែត្រពីកណ្តាលក្រុង។

២. កោះ Lombok ប្រទេសឥណ្ឌូនេស៊ី៖ Lombok គឺជាកោះមួយនៅភាគខាងលិច Nusa Tenggara ក្នុងប្រទេសឥណ្ឌូនេស៊ី។ កោះនេះមានភាពល្បីល្បាញសម្រាប់ការដើរកម្សាន្តបែបផ្សងព្រេងទៅកាន់កំពូលភ្នំភ្លើង និងវាលស្រែពណ៌បៃតងរាប់មិនអស់។ ជានេះទៅទៀត ភ្ញៀវទេសចរដែលមកលេងកោះនេះក៏អាចរីករាយនឹងសម្រស់ឆ្នេរខ្សាច់សផងដែរ។

៣.ទីក្រុង Miri ប្រទេសម៉ាឡេស៊ី៖ ទីក្រុង Miri គឺជាច្រកចូលទៅកាន់ឧទ្យានជាតិ Gunung Mulu ដែលជាតំបន់បេតិកភណ្ឌពិភពលោករបស់អង្គការយូណេស្កូ ដែលមានព្រៃឈើត្រូពិច សត្វព្រៃដ៏សម្បូរបែប និងល្អាងដ៏អស្ចារ្យជាច្រើន។ នៅទីនេះ ភ្ញៀវទេសចរអាចរុករកភ្នំថ្មកំបោរ និងយកឈ្នះលើភ្នំ Api ដើម្បីគយគន់ទេសភាពដ៏អស្ចារ្យពីខាងលើ។ លើសពីនេះ ល្អាង Deer Cave ក៏ជាទិសដៅដ៏គួរឱ្យចាប់អារម្មណ៍មួយដែលអ្នកទស្សនាអាចសង្កេតមើលការធ្វើចំណាកស្រុករបស់សត្វប្រចៀវ។

៤.កោះ Siquijor ប្រទេសហ្វីលីពីន៖ កោះ Siquijor ត្រូវបានគេស្គាល់ថាជា “កោះអាថ៌កំបាំងនៃ Central Visayas” ដែលទាក់ទាញអ្នកទេសចរជាមួយនឹងទេសភាពភ្នំដ៏អស្ចារ្យ និងទឹកជ្រោះដ៏ស្រស់ស្អាត។ មកទីនេះ ភ្ញៀវទេសចរអាចចំណាយពេលរុករក “ដំបូលកោះ” នៃភ្នំ Bandilaan ដែលមានរុក្ខជាតិដើមចម្រុះ និងមេអំបៅជាង ១០០ ប្រភេទ។

៥.តំបន់ Jeongseon ប្រទេសកូរ៉េខាងត្បូង៖ តំបន់ដ៏ល្បីល្បាញសម្រាប់ទេសភាពភ្នំដ៏ស្ងប់ស្ងាត់ Jeongseon ក្នុងខេត្ត Gangwon ប្រទេសកូរ៉េខាងត្បូង គឺជាគោលដៅដ៏ល្អមួយក្នុងការរួមផ្សំជាមួយធម្មជាតិ។ អ្នកទស្សនាអាចជួបប្រទះនូវសកម្មភាពក្រៅតាមរដូវជាច្រើន ដូចជាការឡើងភ្នំ Hambaeksan ក្នុងរដូវរងារ ឬរុករកទេសភាពដ៏អស្ចារ្យនៃភ្នំ Gariwangsan ក្នុងរដូវស្លឹកឈើជ្រុះ។ កន្លែងនេះក៏មានសកម្មភាពជាច្រើនសម្រាប់ភ្ញៀវដែលចូលចិត្តភាពរំភើបដូចជា ziplining, ជួបប្រទះស្ពានកញ្ចក់ដើម្បីមើលទន្លេ Donggang និងភ្នំរមៀល។

៦.តំបន់ Hualien ប្រទេសតៃវ៉ាន់៖ Hualien គឺមានភាពល្បីល្បាញដោយសារកំពូលភ្នំដ៏ខ្ពស់ មេឃពណ៌ខៀវស្រឡះ សមុទ្រដ៏ធំ និងជ្រលងភ្នំដ៏រ៉ូមែនទិក។ នេះជាកន្លែងទេសចរណ៍កំពូលមួយសម្រាប់ភ្ញៀវជាតិ និងអន្តរជាតិក្នុងប្រទេសតៃវ៉ាន់។ តាមរយៈការថែរក្សាយ៉ាងពេញលេញនូវភាពស្រស់ស្អាតធម្មជាតិរបស់វា Hualien មានទេសភាពជាច្រើនសម្រាប់ភ្ញៀវទេសចរក្នុងការរុករក។

៧.ឧទ្យានជាតិ Khao Yai ប្រទេសថៃ៖ Khao Yai គឺជាឧទ្យានជាតិដំបូងគេរបស់ប្រទេសថៃដែលត្រូវបានទទួលស្គាល់ដោយអង្គការយូណេស្កូ។ កន្លែងនេះលេចធ្លោដោយសារព្រៃឈើត្រូពិចដ៏ធំ និងទឹកធ្លាក់ល្បីៗដូចជា Haew Narok និង Haew Suwat។ ឧទ្យានជាតិនេះក៏ជាជម្រកនៃចំនួនសត្វព្រៃដ៏សម្បូរបែប រួមទាំងដំរីព្រៃ និងខ្លាឃ្មុំអាស៊ីផងដែរ។

៨.ទីក្រុង Hakone ប្រទេសជប៉ុន៖ Hakone ដែលជាទីក្រុងរមណីយដ្ឋានដ៏ល្បីល្បាញក្នុងប្រទេសជប៉ុន ក៏ស្ថិតក្នុងបញ្ជីគោលដៅទេសចរណ៍ដ៏ល្អបំផុតសម្រាប់អ្នកស្រឡាញ់ធម្មជាតិផងដែរ។ កន្លែងនេះមានរមណីយដ្ឋានទឹកក្ដៅចំនួនប្រាំពីរ សណ្ឋាគារ Fujiya និងទីតាំងដ៏ងាយស្រួលរបស់វាក្នុងការឡើងទៅដល់ភ្នំ Fuji រួមទាំងម្ហូបចម្រុះជាច្រើនប្រភេទទៀត។

៩.ទីក្រុង Da Lat ប្រទេសវៀតណាម៖ ដាឡាត គឺជាគោលដៅធម្មជាតិកំពូលដែលមានអាកាសធាតុត្រជាក់ពេញមួយឆ្នាំ ព្រៃស្រល់ពណ៌បៃតង និងទឹកជ្រោះដ៏អស្ចារ្យជាច្រើន។ កន្លែងនេះក៏ជាគោលដៅដ៏ល្អសម្រាប់សកម្មភាពឡើងភ្នំបែបផ្សងព្រេង ជិះក្បូនទឹកស ដើម្បីរីករាយនឹងសម្រស់នៃសួនផ្កាដ៏ត្រចះត្រចង់។ លើសពីនេះ ទីក្រុង Da Lat ក៏បានក្លាយជាកន្លែងវិស្សមកាលដែលមិនអាចបំភ្លេចបានសម្រាប់អ្នកស្រលាញ់ធម្មជាតិជុំវិញពិភពលោក៕