ដូចប្រិយមិត្តមួយចំនួនធំជ្រាបមកហើយថាអ្នកបង្កើតមាតិកាល្បីឈ្មោះ Rick Kh បានសម្រេចចិត្តឃ្លាតពីស្រុកខ្មែរវិលត្រលប់ទៅរស់នៅអាម៉េរិកវិញ ខណៈពេលនេះលោកបានទៅដល់ទឹកដីមហាអំណាចនេះហើយ។ អ្វីដែលធ្វើឱ្យអ្នកគាំទ្រស្រុកខ្មែររំភើបចិត្តនោះគឺគ្រាន់តែទៅដាក់ភ្លាមលោកបាន Surprise ក្រុមគ្រួសារតែម្តងដោយមិនឱ្យដំណឹងជាមុនជិះតាក់ស៊ីទៅជួបគ្រួសារនៅវត្តឥណ្ឌាតែម្តង ខណៈគ្រួសារ Rick Kh បានឱបថើបបង្ហាញការនឹករលឹកលោកយ៉ាងខ្លាំង។

ព្រឹកថ្ងៃទី១៣ ខែមីនា Rick Kh គោប្រាក់បានបង្ហោះជាង១២នាទី ដោយដាក់ចំណងជើងថា «មកស៊ុបប្រាយនៅផ្ទះ Fail មកស៊ុបប្រាយនៅវត្តវិញ Welcome back California Cambo Fam»។ ក្នុងវីដេអូនោះ Rick Kh បានបង្ហាញទីតាំងស្អាតៗជូនអ្នកគាំទ្រ និងតំបន់ណាដែលមានប្រជាពលរដ្ឋខ្មែររស់នៅច្រើន និងអាចសម្គាល់បានថាផ្ទះមួយណាមានប្រជាពលរដ្ឋខ្មែររស់នៅគឺមានការដាំស្លឹកគ្រៃ ដាំដើមចេកជាដើម។

Rick Kh ក៏បានជិះតាក់ស៊ីដោយចំណាយជាង៦០ដុល្លារដើម្បីទៅ Surprise គ្រួសារដែលកំពុងតែទៅធ្វើបុណ្យនៅវត្ត ដោយបានជួបជីដូនមុនគេ ខណៈលោកយាយ Rick Kh បានបង្ហាញការនឹករលឹកចៅយ៉ាងខ្លាំងដោយបានឱបថើប។ ជាបន្តទៀត Rick Kh ក៏បានទៅ Surprise ម្តាយលោកនិងសាច់ញាតិលោកផ្សេងទៀតផងដែរធ្វើឱ្យមានការភ្ញាក់ផ្អើលយ៉ាងខ្លាំងព្រោះគ្រួសារលោកមិនដឹងថាលោកបានទៅដល់នោះទេ។ បន្ទាប់មកលោក និងគ្រួសារ បានជិះឡានវិលត្រលប់មកផ្ទះវិញដើម្បីអបអរ Rick kh វិលត្រលប់មកផ្ទះវិញផងដែរ។

ការបង្ហាញសកម្មភាពនេះដែរធ្វើឱ្យអ្នកគាំទ្ររបស់ Rick Kh បង្ហាញអារម្មណ៍រំភើបចិត្តយ៉ាងខ្លាំងចំពោះភាពកក់ក្តៅ ផ្អែមល្អែមរបស់ក្រុមគ្រួសាររបស់អ្នកបង្កើតមាតិការូបនេះ។

គួរបញ្ជាក់ថា Rick Kh វិលត្រលប់ទៅរស់នៅអាម៉េរិកវិញក្នុងគោលបំណងដើម្បីធ្វើការនៅស្រុកគេសន្សំលុយយកមកផ្គត់ផ្គង់សហគមន៍របស់លោកដែលជួយទៅដល់និស្សិតជាង២០នាក់។ លោកត្រូវការចំណាយក្នុង១ខែជាង៣ពាន់ដុល្លារដោយជួយចេញថ្លៃផ្ទះ ទឹក ភ្លើង អង្ករ រួមទាំងការបង់សាលាជាដើម៕

ក្រុមហ៊ុនអាកាសចរណ៍របស់ប្រទេសថៃ បានរៀបចំផែនការកាត់បន្ថយតម្លៃសំបុត្រយន្តហោះក្នុងស្រុកនិងបង្កើនចំនួនជើងហោះហើរបន្ថែមទៀត ដើម្បីជួយសម្រួលដល់ភ្ញៀវទេសចរនៅក្នុងឱកាសបុណ្យចូលឆ្នាំប្រពៃណីថៃ(សង្ក្រាន្គ)ក្នុងខែមេសានេះ។

យោងតាមអនុប្រធានការិយាល័យអាកាសចរណ៍ស៊ីវិលនៃប្រទេសថៃ (CAAT) លោក សារុន បេនចានីរ៉ាត់ បានលើកឡើងថា ប្រទេសថៃបានត្រៀមជើងហោះហើរចំនួន ១០៤ ជើងបន្ថែមទៀត សម្រាប់ជើងហោះហើរក្នុងស្រុក ដោយបន្ថែមកៅអីចំនួន ១៧,៨៧៤ ដើម្បីបង្ករនូវភាពងាយស្រួល និងកាត់បន្ថយការកកស្ទះក្នុងការដឹកជញ្ជូនអ្នកដំណើរក្នុងពិធីបុណ្យប្រពៃណីជាតិថៃដ៏សំខាន់ខាងមុខ។

ការបន្ថែមជើងហោះហើរក្នុងស្រុកនេះ គ្រោងនឹងដំណើរការនៅតាមបណ្តាអាកាសយានដ្ឋានសំខាន់ៗនៅទូទាំងប្រទេសថៃ រួមមានខេត្តភូកេត ឈៀងម៉ៃ សាមុយ អ៊ូប៊ុន រ៉ាត់ឆាថានី អ៊ូដនថានី និងខនខេន។ ការបញ្ចុះតម្លៃ ២០% សម្រាប់ជើងហោះហើរក្នុងស្រុកនេះ នឹងធ្វើឡើងនៅពេលព្រឹកព្រលឹមនិងពាក់កណ្តាលអាធ្រាតថ្ងៃទី ១១-១២ ខែមេសា និងថ្ងៃទី ១៥-១៦ ខែមេសាប៉ុណ្ណោះ។ ជាមួយគ្នានេះ គណៈរដ្ឋមន្ត្រីថៃក៏បានប្រកាសសម្រេច ពន្យារថ្ងៃឈប់សម្រាកទូទាំងប្រទេសក្នុងឱកាសចូលឆ្នាំប្រពៃណីថៃរហូតដល់ ៥ ថ្ងៃចាប់ពីថ្ងៃទី ១២ ដល់ថ្ងៃ ១៦ ខែមេសា។

គួរបញ្ជាក់ថា ប្រទេសថៃនាពេលកន្លងមកនេះ ដើម្បីជំរុញវិស័យទេសចរនៅក្នុងប្រទេសខ្លួនបានដាក់ចេញនូវគោលនយោបាយមួយចំនួនដូចជាផ្តល់នូវទិដ្ឋការ (Visa) សេរីជាមួយនឹងប្រទេសចិនរយៈពេលវែង, ការរៀបចំពិធីបុណ្យសង្ក្រាន្តរយៈពេលជាច្រើនថ្ងៃ ព្រមជាមួយនឹងការបញ្ចុះតម្លៃនិងកម្មវិធីជាច្រើនទៀត។ យ៉ាងណាមិញសម្រាប់សង្រ្កាន្តឆ្នាំ២០២៤នេះ ប្រទេសថៃបានជឿជាក់យ៉ាងមុតមាំថានឹងស្វាគមន៍ភ្ញៀវទេសចរអន្តរជាតិបានច្រើនបំផុត ព្រោះថាប្រទេសថៃទើបតែបានដាក់បុណ្យ«សង្រ្កាន្ត»ចូលជាសម្បត្តិបេតិកភណ្ឌពិភពលោកដោយអង្គការយូណេស្កូដោយជោគជ័យ កាលពីចុងឆ្នាំ២០២៣ផងដែរ៕

កាលពីពេលថ្មីៗនេះ ក្រសួងវប្បធម៌ និងវិចិត្រសិល្បៈ បានរៀបចំសិក្ខាសាលាមួយស្តីពី “អាពាហ៍ពិពាហ៍ក្នុងសង្គមខ្មែរ” ដើម្បីប្រមូលឯកសារសំខាន់ៗ នៅក្នុងការស្នើសុំចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ។រដ្ឋមន្ត្រីក្រសួងវប្បធម៌ លោកស្រី ភឿង សកុណា បានលើកឡើងថាសិក្ខាសិលានេះធ្វើឡើងក្នុងគោលបំណង សំខាន់ៗចំនួន៤គឺ៖

១. រួមគ្នាសិក្សាស្វែងយល់ចែករំលែកបទពិសោធន៍ អំពី “អាពាហ៍ពិពាហ៍ក្នុងសង្គមខ្មែរ” ដ្បិតកិច្ចពិធីមានច្រើនបែបច្រើនយ៉ាងប្លែកៗគ្នា ពីតំបន់មួយទៅតំបន់មួយ។

២.ប្រមូលធាតុចូលដើម្បីជាប្រយោជន៍ក្នុងការរៀបចំឯកសារអំពីអាពាហ៍ពិពាហ៍ខ្មែរ ដើម្បីស្នើសុំចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ។

៣.រួមគ្នាគិតអំពីយន្តការអភិរក្សមរតកវប្បធម៌ ពោលគឺ “អាពាហ៍ពិពាហ៍ក្នុងសង្គមខ្មែរ” ឱ្យបានគង់វង្សទៅអនាគត។ រួមគ្នាគិតនោះ គឺមិនសំដៅតែម្ចាស់មរតក ឬអ្នកប្រតិបត្តិដូចជាលោកតាអាចារ្យ អ្នកភ្លេង អ្នកផ្នួងនោះទេ គឺត្រូវមានការចូលរួមពីគ្រប់ភាគីទាំងអស់។

៤. ផ្សព្វផ្សាយទូទៅអំពីមរតកវប្បធម៌អរូបីនៅកម្ពុជា និងអំពីអនុសញ្ញា២០០៣ នៃអង្គការយូណេស្កូ ស្តីអំពី “កិច្ចការពារបេតិកភណ្ឌវប្បធម៌អរូបី” ដែលកម្ពុជាបានចូលជារដ្ឋភាគីតាំងពីឆ្នាំ២០០៦៕

ឆ្នាំ២០២៤នេះគឺជាឆ្នាំទី២របស់លោកស្រី អ៊ឹម សុគន្ធា ក្នុងការរៀបចំកម្មវិធីប្រកួត Miss Grand Cambodia ដែលត្រៀមនឹងចាប់ផ្តើមប្រកួតនាខែមិថុនា ខាងមុខ។ ទន្ទឹមនឹងកម្មវិធីរៀបចំកាន់តែធំជាងឆ្នាំមុនអ្នកគ្រប់គ្រងរូបនេះបានទម្លាយថាតម្លៃមកុដឆ្នាំនេះតួលេខដល់ខ្ទង់លានដុល្លារអាម៉េរិក។ នេះមានន័យថាម្ចាស់មកុដឆ្នាំនេះពិតជាសំណាងខ្លាំងដែលអាចនឹងគ្រងមកុដថ្លៃជាងមកុដឆ្នាំមុនរបស់ ភឹម ស្រីនោ ដាច់។

លោកស្រី អ៊ឹម សុគន្ធា បានសរសេរនៅលើបណ្តាញសង្គមនាយប់ថ្ងៃទី១២ ខែមីនា ថា «មកុដ Miss Grand Cambodia 2024 មិនសូវថ្លៃប៉ុន្មានទេត្រឹមតែ 1M$ »។ ដំណឹងដែលមកុដឆ្នាំថ្មីនេះមានតម្លៃរហូតដល់១លានដុល្លារនេះដែរបានធ្វើឱ្យអ្នកគាំទ្រវិស័យបវរកញ្ញាបង្ហាញការភ្ញាក់ផ្អើលយ៉ាងខ្លាំងការរៀបចំរបស់អ្នកគ្រប់គ្រងរូបនេះកាន់តែធំពីមួយឆ្នាំទៅមួយឆ្នាំ។

បើតាមការបញ្ជាក់របស់ លោកស្រី អ៊ឹម សុគន្ធា នាពេលកន្លងមកក៏បានឱ្យដឹងដែរថា ឆ្នាំនេះមានមកុដរហូតទៅដល់១០ឯណោះសម្រាប់អ្នកដែលជាប់លំដាប់រង។ លើសពីនេះ ND Miss Grand Cambodia រូបនេះបានអួតពេញៗមាត់ថា អ្នកជាប់៥នាក់កាលពីឆ្នាំមុនមានដូចជា ភឹម ស្រីនោ កុយ អេនណា អ៊ិន លក្ខិណា ស៊ូ ស្រីនីត និង ណង នីត សុទ្ធតែមានប្រជាប្រិយភាពមានអ្នកស្គាល់ច្រើនទាំង៥នាក់។ អ្វីដែលកាន់តែគួរឱ្យចាប់អារម្មណ៍មិនត្រឹមតែជ័យលាភីឯកប៉ុណ្ណោះទេដែលមានសិទ្ធិចេញទៅប្រកួតនៅលើឆាកអន្តរជាតិឆ្នាំនេះសម្រាប់អ្នកជាប់លំដាប់រងក៏មានសិទ្ធិចេញទៅប្រកួតនៅលើឆាកអន្តរជាតិដូចគ្នាក្នុងការប្រកួតបវរកញ្ញាផ្សេង ខណៈបច្ចុប្បន្នលោកស្រី អ៊ឹម សុគន្ធា ទទួលបានសិទ្ធិរៀបចំកម្មវិធីបវរកញ្ញាមួយទៀតនោះគឺ Miss Cosmo Cambodia 2024។

គួរបញ្ជាក់ថា តម្លៃមកុដឆ្នាំចាស់២០២៣ គឺមានតួលេខ២៧ម៉ឺនដុល្លារ ខណៈឆ្នាំនេះច្រើនជាងឆ្នាំចាស់ដល់ទៅ ៧៣០ ០០០ដុល្លារ។ បេក្ខភាពឆ្នាំនេះដែលលេចធ្លោមុនការប្រកួតថ្នាក់ជាតិនាពេលនេះមានដូចជា ម៉ាច ដាវី តំណាងខេត្តរតនៈគីរី, ប៊ី សុធារី តំណាងខេត្តកំពង់ឆ្នាំង, ឌី បញ្ញាវិមាលា តំណាងខេត្តសៀមរាប , លឹម ចាន់សេរីរ័ត្ន តំណាងភ្នំពេញ
និង ផន ស្រីពី តំណាងខេត្តកំពង់ចាម៕