សហរដ្ឋអាមេរិក ៖ អ្នកនាង Jennifer Granholm រដ្ឋមន្ត្រីក្រសួងថាមពលអាមេរិកបានថ្លែង កាលពីថ្ងៃទី៦ ខែមីនា ឆ្នាំ២០២៤ ថា ប្រទេសចិនអាចធ្វើឱ្យទីផ្សាររថយន្តអាមេរិកសម្បូរដោយរថយន្តអគ្គិសនីតម្លៃថោកៗ ។ រដ្ឋមន្ត្រីក្រសួងថាមពលបានលើកឡើងបែបនេះ ក្រោយពីលោកប្រធានាធិបតីអាមេរិក ចូ បៃដិន បានបង្ហាញការបារម្ភពីរថយន្តអគ្គិសនីចិន ប្រមាណ១សប្តាហ៍មុននេះ ។

អ្នកនាង Jennifer Granholm រដ្ឋមន្ត្រីក្រសួងថាមពលអាមេរិក បានថ្លែងក្នុងអំឡុងពេលពិភាក្សាអំពីគេហទំព័រព័ត៌មានមួយឈ្មោះ Axios ថា ៖ «យើងបារម្ភយ៉ាងខ្លាំងថា ចិននឹងមានឥទ្ធិពលខ្លាំងលើឧស្សាហកម្មយានយន្តរបស់អាមេរិក បើទោះជាបច្ចុប្បន្ននេះ យើងនឹងបង្កើតហេដ្ឋារចនាសម័្ធន្ធសំខាន់សម្រាប់ផលិតកម្មរថយន្តក្តី» ។

អ្នកនាង Jennifer Granholm បន្តថា ៖ «យើងបានឃើញស្ថានការណ៍ស្រដៀងគ្នានេះ កើតឡើងក្នុងផ្នែកឧស្សាហកម្មថាមពលពន្លឺព្រះអាទិត្យផងដែរ ដែលមានផលិតផលហូរចូលមកទីផ្សារពេញទាំងអស់» ។

ចំណែកសារព័ត៌មាន CNBC រាយការណ៍ថា គេមើលឃើញថា ប្រទេសចិនបានគំរាមកំហែងដល់ឧស្សាហកម្មយានយន្តរបស់អាមេរិក ដោយសារចំនួនការនាំចេញរថយន្តរបស់អាមេរិកបានធ្លាក់ចុះជាបន្តបន្ទាប់ ។ រីឯក្រុមហ៊ុនផលិតរថយន្តផ្សេងៗ ដូចជា ៖ General Motors ក៏បានកាត់បន្ថយទំហំប្រតិបត្តិការនៅក្រៅប្រទេសផងដែរ ។

បើតាមទិន្នន័យរបស់សមាគមផលិតរថយន្តចិនបញ្ជាក់ថា ចិនបាននាំចេញរថយន្តជិតស្មើ៥លានគ្រឿងនៅឆ្នាំ២០២៣ ហើយចិនបានវ៉ាដាច់ជប៉ុន ។ ហេតុនេះ ចិនបានក្លាយជាប្រទេសនាំចេញរថយន្តដ៏ច្រើនបំផុតនៅលើពិភពលោក កាលពីឆ្នាំ២០២៣ ។ Fitch Ratings បានរាយការណ៍កាលពីខែធ្នូ ឆ្នាំ២០២៣ ថា បណ្តាក្រុមហ៊ុនផលិតរថយន្តអគ្គិសនីចិនបានបង្ហាញរថយន្តថ្មីៗ ហើយទស្សនវិស័យរបស់ក្រុមហ៊ុនទាំងនេះនៅតែមានស្ថិរភាព បើទោះជាមានកំណើនការប្រកួតប្រជែងក្តី ។

អ្នកនាង Jennifer Granholm បន្ថែមថា ៖ «ចិនកំពុងបណ្តាក់ទុនស្មើទឹកប្រាក់ដ៏ច្រើនមហាសាល ក្នុងគោលបំណងពង្រីកអាជីវកម្មដើម្បីគ្រប់គ្រងទីផ្សារពិភពលោក ។ហេតុនេះ យើងត្រូវយល់ថា វាជាចំណុចសំខាន់គួរឱ្យពិចារណាសម្រាប់អតិថិជនចង់ទិញរថយន្តមានតម្លៃថោក ។ ប៉ុន្តែយើងអាចធ្វើបាន ហើយអាចរក្សាស្ថិរភាពទីផ្សារអាមេរិកបាន» ។

កាលពីខែកុម្ភៈ ឆ្នាំ២០២៤ សេតវិមានអាមេរិកប្រកាសថា អាមេរិកនឹងស៊ើបអង្កេតថា តើការនាំចូលរថយន្តចិននឹងគំរាមកំហែងដល់សន្តិសុខអាមេរិកដែរឬទេ? ដោយសារអាមេរិកបារម្ភថា យានជំនិះទាំងនេះអាចប្រមូលទិន្នន័យលម្អិតពាក់ព័ន្ធនឹងពលរដ្ឋអាមេរិក និងហេដ្ឋារចនាសម្ព័ន្ធ ហើយបញ្ជូនទិន្នន័យទៅឱ្យប្រទេសចិន ៕

បរទេស៖ កាលពីពេលថ្មីៗនេះ ទីភ្នាក់ងារសុវត្ថិភាពចំណីអាហារកូរ៉េបានបញ្ឈប់ការនាំចូលសំណាកស្ករគ្រាប់ពីប្រទេសជប៉ុនបន្ទាប់ពីរកឃើញបរិមាណសារធាតុ Cesium ដែលជាប្រភេទសារធាតុវិទ្យុសកម្ម នៅក្នុងផលិតផលស្ករគ្រាប់របស់ប្រទេសជប៉ុន ដែលគ្រោងនឹងនាំចូលទៅប្រទេសកូរ៉េ ប៉ុន្តែត្រូវបានមន្ត្រីកូរ៉េរកឃើញ និងលុបចោលផែនការនាំចូលស្ករគ្រាប់គ្រប់ប្រភេទពីប្រទេសជប៉ុន។

នេះបើយោងតាម Korea Joongang Daily ដែលបានរាយការណ៍នៅថ្ងៃទី១០ ខែមីនា ឆ្នាំ២០២៤ ថាក្នុងអំឡុងពេលត្រួតពិនិត្យផលិតផលនាំចូលពីប្រទេសជប៉ុន ស្រាប់តែមន្ត្រីកូរ៉េបានរកឃើញសារធាតុ Cesium នៅក្នុងគំរូស្ករគ្រាប់ដែលផលិតនៅក្នុងខេត្ត Shizuoka ប្រទេសជប៉ុនចំនួនក្នុងមួយគីឡូក្រាម។ ភ្លាមនោះក្រុមហ៊ុនដែលមានបំណងនាំចូលស្កគ្រាប់ ១២២ គីឡូក្រាមនៃផលិតផលដែលរងផលប៉ះពាល់បានលុបចោលផែនការនាំចូលរបស់ខ្លួនជាការឆ្លើយតបទៅនឹងការរកឃើញនេះ។

ទោះបីជាកម្រិតវិទ្យុសកម្មដែលបានរកឃើញធ្លាក់ក្រោមកម្រិតសុវត្ថិភាពនៃ 100 bequerel ក្នុងមួយគីឡូក្រាមក៏ដោយ ក៏ក្រសួងចំណីអាហារតម្រូវឱ្យអ្នកនាំចូលធ្វើការសាកល្បងបន្ថែមទៀតសម្រាប់នុយក្លេអ៊ែរវិទ្យុសកម្មផ្សេងទៀត។ យោងតាមក្រសួងបានឱ្យដឹងទៀតថា កាលពីឆ្នាំមុន ដាននៃសារធាតុ Cesium ត្រូវបានរកឃើញនៅក្នុងផលិតផលជប៉ុនចំនួន ៤ ដង ដែលជំរុញឱ្យក្រុមហ៊ុនទាំងអស់បង្ខំលុបចោលកិច្ចសន្យានាំចូលសម្រាប់ការត្រួតពិនិត្យ។

គួរបញ្ជាក់ដែថា កាលពីខែមីនា ឆ្នាំ២០១១ ប្រទេសជប៉ុនបានទទួលរងនូវគ្រោះមហន្តរាយពីរដងនៃការរញ្ជួយដី និងរលកយក្សស៊ូណាមិ ដែលប៉ះពាល់ដល់រោងចក្រថាមពលនុយក្លេអ៊ែរ Fukushima ធ្វើឱ្យស្នូលរ៉េអាក់ទ័របីបានរលាយ បញ្ចេញវិទ្យុសកម្មយ៉ាងច្រើនទៅក្នុងបរិយាកាសជុំវិញ។ បន្ទាប់មករដ្ឋាភិបាលក៏បានសម្រេចបញ្ចេញទឹកសំណល់ដែលបានព្យាបាលរួចពីរោងចក្រនុយក្លេអ៊ែរ Fukushima ចូលទៅក្នុងសមុទ្រ ចាប់ពីឆ្នាំ ២០២១ ដែលបណ្តាលឱ្យសារធាតុទាំងនេះបានរលាយចូលទៅក្នុងផលិតផលផ្សេងៗនៅក្នុងប្រទេសជប៉ុន។

ហេតុនេះបច្ចុប្បន្ន កូរ៉េខាងត្បូងនៅតែដាក់បម្រាមលើការនាំចូលអាហាររបស់ជប៉ុនពីតំបន់ជុំវិញរោងចក្រនុយក្លេអ៊ែរហ្វូគូស៊ីម៉ា។ ក្នុងឆ្នាំ ២០១១ បន្ទាប់ពីគ្រោះមហន្តរាយនៅ Fukushima ក្រុមហ៊ុនផលិតទឹកដោះគោក្នុងប្រទេសជប៉ុនត្រូវប្រមូលផលិតផលចំនួន ៤០០,០០០ មកវិញ ដោយសារដាននៃសារធាតុ Cesium ត្រូវបានរកឃើញ៕

ប្រទេសឥណ្ឌូណេស៊ី ៖ កាលពីថ្ងៃទី៩ ខែមីនា ឆ្នាំ២០២៤ សារព័ត៌មាន AFP រាយការណ៍ថា ក្រសួងគមនាគមន៍ឥណ្ឌូណេស៊ីជូនដំណឹងថា នឹងស៊ើបអង្កេតបន្ថែមទៀតករណីអាកាសយានិក២រូប របស់ក្រុមហ៊ុនអាកាសចរណ៍ Batik Air ស្ថិតក្រោមការគ្រប់គ្រងរបស់ក្រុមហ៊ុន Lion Air Group នៅប្រទេសឥណ្ឌូណេស៊ី បានដេកលក់ក្នុងអំឡុងពេលពួកគេកំពុងបើកយន្តហោះចេញពីខេត្ត Sulawesi នៅភាគអាគ្នេយ៍ ទៅកាន់ទីក្រុងហ្សាកាតា កាលពីថ្ងៃទី២៥ ខែមករា ឆ្នាំ២០២៤ ។

តាមការស៊ើបអង្កេតជំហានដំបូងរបស់គណៈកម្មការសុវត្ថិភាពដឹកជញ្ជូនជាតិបង្ហាញថា អាកាសយានិក និងជំនួយការអាកាសយានិកបានដេកលក់ដំណាលគ្នាប្រមាណ២៨នាទី ក្នុងអំឡុងពេលពួកគេបើកយន្តហោះនៅលើអាកាស ។ ហេតុនេះ វាបានធ្វើឱ្យយន្តហោះធ្វើដំណើរខុសគោលដៅ រហូតដល់ពួកគេភ្ញាក់ដឹងខ្លួន និងបញ្ជាឱ្យយន្តហោះធ្វើដំណើរទៅកាន់គោលដៅឡើងវិញ ។

ទោះយ៉ាងណា អ្នកដំណើរនៅយន្តហោះចំនួន១៥៣នាក់ រួមទាំងបុគ្គលិកបម្រើការលើយន្តហោះ៤នាក់ទៀតគ្មានគ្រោះថ្នាក់ទេ សម្រាប់ការធ្វើដំណើរតាមយន្តហោះនេះ ដែលមានរយៈពេល២ម៉ោងនិង៣៥នាទី ។

បើតាមរបាយការណ៍ដំបូងរបស់គណៈកម្មការសុវត្ថិភាពដឹកជញ្ជូនជាតិបញ្ជាក់ថា ជំនួយការអាកាសយានិកពុំបានសម្រាកគ្រប់គ្រាន់ទេ នៅយប់មុនពេលបើកយន្តហោះ ដោយសារជំនួយការអាកាសយានិករូបនេះមានកូនភ្លោះអាយុ១ខែ ហើយរូបគេបានជួយមើលកូនជាមួយភរិយានៅផ្ទះ ។

បន្ទាប់ពីយន្តហោះធ្វើដំណើរបានប្រមាណកន្លះម៉ោង អាកាសយានិកក៏បានប្រាប់ទៅជំនួយការថា សុំសម្រាកបន្តិច ហើយជំនួយការអាកាសយានិកក៏យល់ព្រមជួយបើកយន្តហោះបន្ត ។ ចំណែកភ្នាក់ងារគ្រប់គ្រងតំបន់ប្រចាំទីក្រុងហ្សាកាតា បានព្យាយាមទាក់ទងទៅកាន់អាកាសយានិកទាំង២រូប ប៉ុន្តែពុំទទួលបានការឆ្លើយតបទេ ។

ពេលវេលាបានកន្លងផុតទៅ២៨នាទី អាកាសយានិកក៏បានភ្ញាក់ដឹងខ្លួនឡើងវិញ និងដឹងថា ជំនួយការអាកាសយានិកដេកលក់ដែរ ហើយធ្វើឱ្យយន្តហោះធ្វើដំណើរខុសគោលដៅ ។ ហេតុនេះ អាកាសយានិកក៏បានដាស់មិត្តរួមការងារឱ្យភ្ញាក់ និងឆ្លើយតបទូរស័ព្ទពីទីក្រុងហ្សាកាតា ដែលបានព្យាយាមទំនាក់ទំនងមកពួកគេជាច្រើនលើក ។ ភ្លាមនោះ ពួកគេក៏បានជួយដោះស្រាយឱ្យយន្តហោះធ្វើដំណើរត្រឹមត្រូវតាមគោលដៅវិញ នៅទីបំផុត យន្តហោះនេះក៏បានចុះចតដោយសុវត្ថិភាព ។

ភ្នាក់ងារស៊ើបអង្កេតពុំបានបង្ហាញពីអត្តសញ្ញាណអាកាសយានិកទេ គ្រាន់តែបញ្ជាក់ថា អាកាសយានិកទាំង២រូប គឺជាជនជាតិឥណ្ឌូណេស៊ី ក្នុងនោះម្នាក់អាយុ៣២ឆ្នាំ និងម្នាក់ទៀតអាយុ២៨ឆ្នាំ ។ បច្ចុប្បន្ន អាកាសយានិកទាំង២រូប ត្រូវបានគេបញ្ជាឱ្យសម្រាកពីការងារជាបណ្តោះអាសន្ន ។

លោក Kritsati Endah Murni មន្ត្រីនាយកដ្ឋានដឹកជញ្ជូនផ្លូវអាកាសឥណ្ឌូណេស៊ីលើកឡើងថា ក្រសួងគមនាគមន៍បានថ្កោលទោសក្រុមហ៊ុនអាកាសចរណ៍ Batik Air យ៉ាងខ្លាំងចំពោះហេតុការណ៍នេះ និងអំពាវនាវឱ្យក្រុមហ៊ុនអាកាសចរណ៍ផ្សេងទៀតយកចិត្តទុកដាក់លើពេលសម្រាករបស់បុគ្គលិកហោះហើរឱ្យបានច្រើន ។

មន្ត្រីក្រសួងគមនាគមន៍លើកឡើងថា ពួកគេនឹងបន្តការស៊ើបអង្កេត និងពិនិត្យឡើងវិញសម្រាប់ជើងហោះហើរពេលយប់របស់ក្រុមហ៊ុន Batik Air រួមទាំងក្រុមហ៊ុនអាកាសចរណ៍ទាំងអស់នៅប្រទេសឥណ្ឌូណេស៊ី ៕

ប្រទេសម៉ាឡេស៊ី ៖ កាលពីឆ្នាំ២០២៣ មានភ្ញៀវទេសចរបរទេសបានធ្វើដំណើរមកប្រទេសម៉ាឡេស៊ី ជិតស្មើ២៩លាននាក់ ហើយធ្វើឱ្យម៉ាឡេស៊ីក្លាយជាប្រទេសគោលដៅទេសចរណ៍ដ៏ពេញនិយម ស្ថិតក្នុងលំដាប់ទី១ នៅតំបន់អាស៊ីអាគ្នេយ៍ និងវ៉ាដាច់ប្រទេសថៃផងដែរ ។ នេះបើតាមការចុះផ្សាយរបស់សារព័ត៌មានថៃ ឈ្មោះ AEC Connect កាលពីថ្ងៃទី២ ខែមីនា ឆ្នាំ២០២៤ ។

យោងតាមគេហទំព័រឈ្មោះ Focus Malaysia បញ្ជាក់ថា ពលរដ្ឋសិង្ហបុរីបានធ្វើដំណើរមកកាន់ប្រទេសម៉ាឡេស៊ីច្រើនបំផុត គឺស្មើនឹង៨លាន៣សែននាក់ បន្ទាប់មក គឺពលរដ្ឋឥណ្ឌូណេស៊ី, ថៃ, ចិន និងព្រុយណេ ។

ចំណែកប្រទេសថៃ គឺជាគោលដៅទេសចរណ៍ពេញនិយម ស្ថិតក្នុងលំដាប់ទី២ និងទទួលបានភ្ញៀវទេសចរសរុបចំនួន២៨លាននាក់ ។ ចំណែកប្រទេសសិង្ហបុរី ជាប់លំដាប់ទី៣ ដែលទទួលបានភ្ញៀវទេសចរសរុបចំនួន១៣លាន៦សែននាក់ ។

ប្រទេសនានានៅតំបន់អាស៊ីអាគ្នេយ៍បានប្រឹងប្រែងទាក់ទាញភ្ញៀវទេសចរបរទេស ដោយបានកំណត់វិធានការផ្សេងៗតាំងពីចុងឆ្នាំ២០២៣ ដូចជា ៖ កាលពីថ្ងៃទី១ ខែធ្នូ ឆ្នាំ២០២៣ ប្រទេសម៉ាឡេស៊ីបានអនុញ្ញាតឱ្យភ្ញៀវទេសចរចិន និងឥណ្ឌា អាចចូលមកម៉ាឡេស៊ី និងស្នាក់នៅរយៈពេល៣០ថ្ងៃ ដោយពុំចាំបាច់ស្នើសុំទិដ្ឋាការ ។ វាជាវិធានការស្រដៀងគ្នាជាមួយប្រទេសថៃដែរ ។

ចំណែកប្រទេសវៀតណាម គិតចាប់ពីពាក់កណ្តាលខែសីហា ឆ្នាំ២០២៣ បានអនុម័តទិដ្ឋាការទេសចរណ៍រយៈពេល៣ខែ សម្រាប់ភ្ញៀវទេសចរគ្រប់ប្រទេស ។ វៀតណាមបានបង្កើនរយៈពេលស្នាក់នៅក្នុងប្រទេសរយៈពេល៤៥ថ្ងៃ សម្រាប់ភ្ញៀវទេសចរមកពី១៣ប្រទេស ដែលទទួលបានការលើកលែងទិដ្ឋាការពីវៀតណាមតែម្ខាង ។

នៅពេលប្រទេសនីមួយៗប្រកួតប្រជែងគ្នាទាក់ទាញភ្ញៀវទេសចរបរទេសមកកម្សាន្តក្នុងប្រទេសរបស់ខ្លួន បានធ្វើឱ្យលោក Pham Minh Chinh នាយករដ្ឋមន្ត្រីវៀតណាម បញ្ជាទៅក្រសួងនានាឱ្យពិចារណាលើវិធានការលើកលែងទិដ្ឋាការសម្រាប់ភ្ញៀវទេសចរមកពីប្រទេសមួយចំនួន ដើម្បីឱ្យសមស្របនឹងកិច្ចសហការទ្វេភាគី ។

ខាងក្រោមនេះ គឺជាចំណាត់ថ្នាក់ចំនួនភ្ញៀវទេសចរធ្វើដំណើរមកកាន់ប្រទេសមួយចំនួនក្នុងតំបន់អាស៊ាន រួមមាន ៖
១-ម៉ាឡេស៊ី ទទួលបានភ្ញៀវទេសចរ ២៩លាននាក់
២-ថៃ ទទួលបានភ្ញៀវទេសចរ ២៨លាននាក់
៣-សិង្ហបុរី ទទួលបានភ្ញៀវទេសចរ ១៣លាន៦សែននាក់
៤-វៀតណាម ទទួលបានភ្ញៀវទេសចរ ១២លាន៦សែននាក់ និង
៥-ឥណ្ឌូណេស៊ី ទទួលបានភ្ញៀវទេសចរ ១១លាន៧សែននាក់ ៕

Heat stroke គឺជាជំងឺដែលទាក់ទងនឹងកម្រិតកម្តៅឡើងខ្ពស់ខ្លាំងបំផុត។ វាកើតឡើងនៅពេលដែលរាងកាយរបស់យើងមិនអាចសម្របខ្លួនទៅនឹងសីតុណ្ហភាពបរិយាកាសបាន ដែលនឹងធ្វើឲ្យសីតុណ្ហភាពរាងកាយកើនឡើងយ៉ាងឆាប់រហ័ស និងឲ្យបណ្តាលបែកញើសខ្លាំង រលាកស្បែក ក្រៅក្រហល់ក្រហាយ ដែលអាចបណ្តាលឲ្យសន្លប់បាត់បង់ស្មារតីឬស្លាប់ភ្លាមៗប្រសិនបើមិនទទួលបានការសង្គ្រោះបន្ទាន់។ នៅពេលដែលជំងឺ Heat stroke កើតឡើង សីតុណ្ហភាពរាងកាយអ្នកអាចឡើងដល់ 106°F ឬខ្ពស់ជាងនេះក្នុងរយៈពេល ១០ ទៅ ១៥ នាទី។

រោគសញ្ញាផ្សេងៗនៃ Heat stroke រួមមាន៖ ភាពច្របូកច្របល់ផ្លូវចិត្ត, ជីបចរដើរលឿន ,ចំពោះស្បែកវិញឡើងក្តៅ ស្ងួត ឬបែកញើសខ្លាំង, ខ្សោះជាតិទឹក, ឈឺក្បាល វិលមុខ ដួលសន្លប់ ប្រកាច់ភ្លាមៗ, សីតុណ្ហភាពរាងកាយឡើងខ្ពស់ខ្លាំងជាដើម។

ដើម្បីការពារនិងជៀសផុតពី Heat stroke មានដូចជា ៖
-ហាមបរិភោគភេសជ្ជៈមានជាតិអាល់កុល
-ផឹកទឹកឲ្យបានច្រើន
-មិនចាំបាច់កុំចេញក្រៅ ឬចេញក្រៅត្រូវពាក់សម្លៀកបំពាក់ជិតៗ ឬលាបលេការពារកម្តៅថ្ងៃជាដើម
-ប្រសិនបើប្រទះឃើញនរណាម្នាក់ជួបប្រទះជាមួយនឹងបញ្ហាដែលបានរៀបរាប់ខាងលើនេះគឺគួរតែមានការសង្គ្រោះបឋមផ្សេងៗឬបញ្ជូនទៅកាន់មន្ទីរពេទ្យជាបន្ទាន់ផងដែរ៕

សហរដ្ឋអាមេរិក ៖ ក្រុមហ៊ុនអាមេរិកឈ្មោះ Alef Aeronautics ដែលផលិតរថយន្តអាចហោះបាន និងមានការគាំទ្រពីក្រុមហ៊ុន SpaceX លើកឡើងថា បច្ចុប្បន្ន ក្រុមហ៊ុនបានទទួលការកុម្ម៉ង់ទិញពីអតិថិជនសម្រាប់រថយន្តគ្មានមនុស្សបើកបរ ដែលវាអាចហោះឡើងលើ និងចុះចតដោយខ្លួនឯង ។ ការកុម្ម៉ង់ទិញមានចំនួនខ្ពស់បំផុត គឺស្មើនឹង២.៨៥០គ្រឿង ខណៈពេលមុននេះ ក្រុមហ៊ុនរាយការណ៍ថា ចំនួនការកុម្ម៉ងទិញរថយន្ត Alef Model A ដែលមានកៅអី២ ស្មើនឹង២.៥០០គ្រឿង ។

សារព័ត៌មាន CNBC រាយការណ៍ថា អតិថិជនអាចកុម្ម៉ង់ទិញរថយន្តហោះ Model A តាមរយៈអនឡាញ ហើយអតិថិជនត្រូវតែកក់ប្រាក់ជាមុន ប៉ុន្តែពួកគេអាចសុំប្រាក់កក់នេះទៅវិញបានគ្រប់ពេលវេលា បើត្រូវការ ។ ក្រុមហ៊ុនមានគម្រោងកំណត់តម្លៃលក់រថយន្តហោះ Model A ស្មើនឹង៣សែនដុល្លារអាមេរិក ហើយក្រុមហ៊ុនសង្ឃឹមថា នៅពេលរថយន្តនេះដាក់លក់នៅលើទីផ្សារ ការកុម្ម៉ង់ទិញរថយន្តចំនួន២.៨៥០គ្រឿង នឹងបង្កើតប្រាក់ចំណូលរហូតដល់៨៥០លានដុល្លារអាមេរិក ។

លោក Jim Dukhovny ជាស្ថាបនិកក្រុមហ៊ុន Alef Aeronautics បានផ្តល់បទសម្ភាសន៍ទៅកាន់សារព័ត៌មាន CNBC ថា ៖ «រហូតមកដល់បច្ចុប្បន្ននេះ យើងទទួលបានការកក់រថយន្តជាមុន ស្មើជាង២.៨៥០គ្រឿង ហើយធ្វើឱ្យវាក្លាយជារថយន្តហោះលក់ដាច់បំផុតក្នុងប្រវត្តិសាស្ត្រ ។ ចំនួនការលក់រថយន្តហោះនេះ បានវ៉ាដាច់ Boeing / Airbus / Jobi Aviation និងរថយន្តប្រភេទ eVTOL ផងដែរ» ។

រថយន្តហោះមានតម្លៃ៣សែនដុល្លារអាមេរិកនេះ គឺក្រុមហ៊ុនផ្តោតគោលដៅទៅលើអតិថិជនមានទ្រព្យសម្បត្តិច្រើន ។ លោក Jim Duchovny បញ្ជាក់ថា ក្រុមហ៊ុនចាំបាច់លក់រថយន្តក្នុងតម្លៃខ្ពស់ ដោយសារ Alef Aeronautics គឺជាក្រុមហ៊ុនទើបតែចាប់ផ្តើមអាជីវកម្មរថយន្តហោះ ហើយក្រុមហ៊ុនមិនអាចប្រមូលប្រាក់ចំណូលបានស្ថិតស្ថេរ ។

គួរបញ្ជាក់ថា ក្រុមហ៊ុន Alef Aeronautics បានបង្កើតឡើងនៅថ្ងៃទី៦ ខែមេសា ឆ្នាំ២០១៥ និងមានស្នាក់ការនៅទីក្រុង San Mateo រដ្ឋកាលីហ្វ័រញ៉ា សហរដ្ឋអាមេរិក ។ ក្រុមហ៊ុននេះបានផ្តោតលើការអភិវឌ្ឍ និងផ្សព្វផ្សាយពីរថយន្តហោះ ហើយមានស្ថាបនិកជាច្រើននាក់បានរួមគ្នាបង្កើតក្រុមហ៊ុននេះ រួមមាន ៖ លោក Jim Dukhovny, Constantine Kisly, Pavel Markin និង Oleg Petrov ៕

អំបិលឫស្សីដែលមានដើមកំណើតនៅក្នុងប្រទេសកូរ៉េមានតម្លៃរហូតដល់ ១០០ ដុល្លារអាមេរិកសម្រាប់ ២៤០ ក្រាមនីមួយៗ ដោយសារគុណភាពខ្ពស់ខុសពីអំបិលសមុទ្រផ្សេងទៀត ធ្វើឱ្យវាក្លាយជាអំបិលថ្លៃបំផុតនៅលើពិភពលោក។ អំបិលនេះត្រូវបានជនជាតិកូរ៉េប្រើប្រាស់សម្រាប់ធ្វើម្ហូប និងជាទម្រង់ឱសថបុរាណ វាត្រូវបានបង្កើតឡើងដោយដាក់អំបិលសមុទ្រនៅខាងក្នុងឬស្សី ហើយអាំងនៅសីតុណ្ហភាពខ្ពស់ គោលបំណងគឺដើម្បីទាញយកសារធាតុរ៉ែពីដើមឬស្សី។

ដូច្នេះអំបិលឫស្សីមានតម្លៃថ្លៃរហូតដល់ទៅ ១០ ដងនៃតម្លៃអំបិលហិមាល័យពណ៌ផ្កាឈូកទៅទៀត។ តម្លៃនេះគឺថ្លៃព្រោះការចំណាយភាគច្រើនបានមកពីការប្រើប្រាស់កម្លាំងពលកម្មច្រើន។ ដំណើរការដំបូងគឺចាប់ផ្តើមដោយការកាត់ដើមឬស្សីដែលមានអាយុបីឆ្នាំទៅជាដើមឯកសណ្ឋាន ហើយអំបិលសមុទ្រពីឆ្នេរសមុទ្រភាគខាងលិចនៃប្រទេសកូរ៉េត្រូវបានបញ្ចូលទៅក្នុងឫស្សី បន្ទាប់មកគេដាក់ក្នុងឡដុតដោយប្រើតែគល់ស្រល់។ ដំណើរការនេះត្រូវចំណាយពេលប្រហែល ១២ ទៅ ១៤ ម៉ោង នៅសីតុណ្ហភាពលើសពី ៨០០ អង្សារសេ។

នៅពេលដែលឬស្សីឡើងកំដៅ ប្រេងហូរចេញពីឈើ ហើយត្រូវបានស្រូបចូលទៅក្នុងអំបិល ដែលត្រូវបានគេនិយាយថាផ្តល់ឱ្យវានូវក្លិនដ៏ឈ្ងុយឈ្ងប់ ក៏ដូចជាលក្ខណៈសម្បត្តិពិសេសរបស់វាជួយពង្រឹងសុខភាព។ បន្ទាប់មក សសរឬស្សីក៏ប្រែក្លាយទៅជាផេះ បន្សល់ទុកតែដុំអំបិលដែលកិនរួចយកទៅដាក់ក្នុងសសរឬស្សីម្តងទៀត ជាសរុបដំណើរការនេះត្រូវបានធ្វើម្តងទៀតចំនួនប្រាំបីដង។ រីឯដំណើរការទីប្រាំបួនគឺខុសគ្នាបន្តិចព្រោះអំបិលត្រូវបានកម្ដៅប្រហែល ១០០០ អង្សាសេ ធ្វើឱ្យអំបិលនិងឫស្សីរលាយទាំងស្រុង។ ល្បាយនេះត្រូវបានចាក់ចូលទៅក្នុងដបតូចៗហើយទុកឱ្យរឹងអស់រយៈពេលជាច្រើនថ្ងៃ បន្ទាប់មកអំបិលនឹងរឹងដូចថ្មត្រូវបានបំបែកដោយដៃខ្ចប់និងលក់។

នេះបើយោងតាមការស្រាវជ្រាវបានបង្ហាញថា អំបិលឬស្សីមានផ្ទុកជាតិដែក ប៉ូតាស្យូម និងកាល់ស្យូមខ្ពស់ជាងអំបិលសមុទ្រធម្មតា ហើយវាអាចធ្វើឱ្យប្រព័ន្ធភាពស៊ាំរបស់មនុស្សប្រសើរឡើង ក៏ដូចជាជួយដល់ការរំលាយអាហារ សុខភាពមាត់ធ្មេញ និងការរលាក ហើយថែមទាំងមានឥទ្ធិពលប្រឆាំងនឹងមហារីកទៀតផង។ ទោះជាយ៉ាងណាក៏ដោយ វានៅតែមិនមានភស្តុតាងគ្រប់គ្រាន់ដើម្បីបញ្ជាក់ថាអំបិលឬស្សីពិតជាល្អជាងអំបិលធម្មតាឬយ៉ាងណានោះទេ៕