វីដេអូចែកចាយពីបណ្តាញសង្គម បានបង្ហាញឲ្យឃើញអំពីរបៀបការលេងល្បែងមួយប្រភេទរបស់អ្នកស្រុកបាកាន ខេត្តពោធិ៍សាត់ ក្នុងឱកាសបុណ្យសង្ក្រាន្តថ្មីៗនេះ ជាការសបញ្ជាក់អំពីសាមគ្គីភាពខ្មែរ ដែលក្មេងៗជំនាន់ក្រោយកម្របានឃើញណាស់។
បុណ្យចូលឆ្នាំប្រពៃណីជាតិខ្មែរបានប្រព្រឹត្តិទៅយ៉ាងរលូនរយៈពេល៤ថ្ងៃ ដែលទើបតែបានកន្លងផុតទៅកាលពីប៉ុន្មានថ្ងៃមុននេះ។ ជាមួយគ្នានេះ ក៏បានបន្សល់ទុកនូវអនុស្សាវរីយនិងការចងចាំល្អៗជាច្រើនក្នុងចំណោមទាំងបងប្អូនប្រជាពលរដ្ឋខ្មែរនិងភ្ញៀវបរទេស តាមរយៈការប្រារព្ធពិធីបុណ្យសង្ក្រាន្តនៅតាមទីតាំងនីមួយៗប្រកបដោយភាពសប្បាយរីករាយទូទាំងប្រទេសកម្ពុជា។
យោងតាមការដាក់បង្ហោះដោយគណនីមួយដែលមានឈ្មោះថា Sata Morat គឺបានចែករំលែកវីដេអូនៅលើបណ្តាញសង្គមហ្វេសបុក បង្ហាញឲ្យឃើញពីទិដ្ឋភាពរបស់បងប្អូនប្រជាពលរដ្ឋខ្មែរមួយក្រុម បានលើកយកល្បែងដ៏កម្រមួយប្រភេទមកលេងក្នុងឱកាសបុណ្យសង្ក្រាន្ត ដែលមានទីតាំងស្ថិតនៅវត្តបាកាន ស្រុកបាកាន ខេត្តពោធិ៍សាត់។
ល្បែងនេះទៀតសោត គឺគេលេងដោយត្រូវធ្វើការដាំឈើខ្ពស់វែងនិងមានសភាពមាំទាំមួយដើមនៅទីតាំងណាមួយ និងត្រូវជ្រើសរើសបុរសមួយក្រុមមានគ្នាប្រមាណពី៥ ឬ៦ នាក់។ ចំពោះរបៀបនៃការលេង គឺគេឲ្យបុរសដែលមានមាឌធំរឹងមាំម្នាក់ ទៅឈរអោបឈើមួយដើមនោះ បន្ទាប់មកបុរសម្នាក់ទៀតក៏ធ្វើការឡើងទៅឈរពីលើបុរសទីមួយនោះ ហើយក៏នាំគ្នាឡើងទៅឈរពីលើគ្នាជាបន្តបន្ទាប់រហូតដល់អស់គ្នា។ 
តាមរយៈការលេងល្បែងនេះផងដែរ ក្រៅតែពីជាការលេងកម្សាន្ត វាពិតជាមានអត្ថន័យបង្កប់ដែលបង្ហាញអំពីស្មារតីផ្តោតខ្ពស់ ការប្រឹងប្រែងរួមកម្លាំង និងការសាមគ្គីគ្នាជាធ្លុងមួយ ដើម្បីសម្រេចបាននូវការងាររួមណាមួយផងដែរ៕
