ប្រទេសវៀតណាម ៖ ការិយាល័យពាណិជ្ជកម្មបរទេសរបស់វៀតណាមបង្ហាញថា ការវិនិយោគផ្ទាល់ពីបរទេស (Foreign Direct Investment: FDI) មកកាន់ប្រទេសវៀតណាម បានកើនឡើងចាប់ពីខែមករា ដល់ខែកុម្ភៈ ឆ្នាំ២០២៤ ស្មើទឹកប្រាក់ជាង៤.២៩០លានដុល្លារអាមេរិក ។ នេះចាត់ទុកថា វាមានកំណើនយ៉ាងខ្លាំង ស្មើនឹង៣៨,៦% បើធៀបនឹងឆ្នាំ២០២៣ ។
ការិយាល័យពាណិជ្ជកម្មបរទេសបញ្ជាក់ថា ចាប់ពីខែមករា ដល់ខែកុម្ភៈ ឆ្នាំ២០២៤ ប្រទេសវៀតណាមបានផ្តល់អាជ្ញាប័ណ្ណវិនិយោគថ្មីប្រមាណ៤០៥គម្រោង ដែលមានទឹកប្រាក់វិនិយោគចុះបញ្ជីរួចហើយ ចំនួន៣.៦០០លានដុល្លារអាមេរិក ។ វាបានកើនឡើង៥៥,៥% ផ្នែកបរិមាណ និងទឹកប្រាក់វិនិយោគកើនឡើងទ្វេដង បើធៀបនឹងរយៈពេលដូចគ្នានៅឆ្នាំ២០២៣ ។
ខេត្ត-ក្រុង ដែលទាក់ទាញការវិនិយោគផ្ទាល់ពីបរទេសច្រើនបំផុតនៅវៀតណាម រួមមាន ៖ ហាណូយ, ក្វាងនិញ, ថាង៉េង្វៀន, បាសៀ វុងតាវ, ប៊ិកនីន, ដុងណាយ, ប៊ុកសាង, ហូជីមិញ, ហៃផុង និងហឿងអៀន ។ ការវិនិយោគនៅខេត្ត-ក្រុងទាំងនេះ ស្មើនឹង៨១,៧% នៃការវិនិយោគផ្ទាល់ពីបរទេសសរុប ចាប់ពីខែមករា ដល់ខែកុម្ភៈ ឆ្នាំ២០២៤ ក្នុងនោះទីក្រុងហាណូយទទួលបានការវិនិយោគផ្ទាល់ពីបរទេស ជិតស្មើ៩១៤លាន៤សែនដុល្លារអាមេរិក កើនឡើង២៤,៤ដង បើធៀបនឹងរយៈពេលដូចគ្នាកាលពីឆ្នាំ២០២៣ ។
ក្រៅពីនេះ ក្នុងរយៈពេល២ខែដំបូងនៃឆ្នាំ២០២៤ ប្រទេសដែលបានវិនិយោគនៅវៀតណាមច្រើនជាងគេ រួមមាន ៖ សិង្ហបុរី, ហុងកុង, ជប៉ុន និងចិន ក្នុងចំណោម៤៨ប្រទេស និងតំបន់សេដ្ឋកិច្ចផ្សេងៗដែលបានមកវិនិយោគនៅវៀតណាម ។ រីឯឆ្នាំ២០២៣ ប្រទេសចូលមកវិនិយោគនៅវៀតណាមច្រើនជាងគេ រួមមាន ៖ សិង្ហបុរី, ជប៉ុន, ហុងកុង, ចិន និងកូរ៉េខាងត្បូង ។
នៅឆ្នាំ២០២៤ វិនិយោគិនបរទេសបានវិនិយោគក្នុងផ្នែកឧស្សាហកម្មជាច្រើននៅវៀតណាម ដូចជា ៖ ឧស្សាហកម្មកែច្នៃ និងផលិត ។ វាជាទិន្នន័យដូចគ្នានឹងទិន្នន័យនៅឆ្នាំ២០២៣ ដែលបញ្ជាក់ថា ឧស្សាហកម្មកែច្នៃ និងផលិត គឺជាឧស្សាហកម្មនាំមុខសម្រាប់ការវិនិយោគ ដែលមានទឹកប្រាក់វិនិយោគស្មើជាង២៣.៥០០លានដុល្លារអាមេរិក ស្មើនឹង៦៤,២% នៃការវិនិយោគសរុប និងកើនឡើង៣៩,៩% បើធៀបនឹងឆ្នាំ២០២២ ។
ចំណែកឧស្សាហកម្មផ្សេងទៀតដែលវិនិយោគិនបរទេសបានវិនិយោគនៅវៀតណាម រួមមាន ៖ ឧស្សាហកម្មបច្ចេកវិទ្យា ដែលទទួលបានការច្នៃប្រឌិតថ្មីៗ និងការប្រើប្រាស់បច្ចេកវិទ្យាដើម្បីផ្លាស់ប្តូរវិធីធ្វើការ ឬអាជីវកម្ម ។ រីឯឧស្សាហកម្មថាមពលកកើតឡើងវិញ ក៏ទទួលបានការចាប់អារម្មណ៍ផងដែរ ជាពិសេស ថាមពលស្អាត ដូចជា ៖ ថាមពលពន្លឺព្រះអាទិត្យ និងថាមពលខ្យល់ ដែលជំរុញធនធានថាមពលវៀតណាមប្រកបដោយនិរន្តរភាព ៕