បរទេស៖ ថ្មីៗនេះយោងតាម NDTV បានឱ្យដឹងថា មនុស្សយន្តបុរសដំបូងបង្អស់របស់ប្រទេសអារ៉ាប៊ីសាអូឌីតដែលមានឈ្មោះថា Mohammad បានបង្កឱ្យមានភាពចម្រូងចម្រាសពេញបណ្តាញសង្គម ខណៈដែលមនុស្សយន្តស្វ័យប្រវត្តិនេះបានយកដៃទៅប៉ះត្រគាករបស់ស្ត្រីម្នាក់ដែលជាអ្នកសារព័ត៌មាន ក្នុងអំឡុងពេលព្រឹត្តិការណ៍បច្ចេកវិទ្យាមួយដែលធ្វើឡើងនៅទីក្រុង Riyadh។

Mohammad គឺជាមនុស្សយន្តប្រុស AI ដំបូងបង្អស់របស់ប្រទេសអារ៉ាប៊ីសាអូឌីត ដែលបង្កើតដោយក្រុមហ៊ុនមនុស្សយន្ត និងបញ្ញាសិប្បនិមិត្ត QSS។ កាលពីថ្ងៃទី១០ ខែមីនា ឆ្នាំ២០២៤ វីដេអូមួយដែលបានបង្ហោះនៅលើបណ្តាញសង្គម X ត្រូវបានអ្នកនិយមលេងអ៊ីនធឺណិតជាច្រើនរិះគន់ និងជជែកវែកញែកអំពីភាពមិនសមស្របនៃអាកប្បកិរិយារបស់មនុស្សយន្តនេះ ខណៈដែល Mohammad បានយកដៃទៅប៉ះត្រគាគរបស់អ្នកយកព័ត៌មានម្នាក់។

ឧបទ្ទវហេតុនេះបានកើតឡើងនៅព្រឹត្តិការណ៍បច្ចេកវិទ្យាកម្រិតខ្ពស់ DeepFest ក្នុងទីក្រុង Riyadh ប្រទេសអារ៉ាប៊ីសាអូឌីត ដោយក្រុមហ៊ុន QSS បានបើកដំណើរការមនុស្សយន្ត Mohammad ជាលើកដំបូងរបស់ខ្លួន ជាមួយនឹងសម្លៀកបំពាក់ប្រពៃណី។ នាយកក្រុមហ៊ុនបាននិយាយថា Mohammad គឺជាមនុស្សយន្តដំបូងគេរបស់ប្រទេសអារ៉ាប៊ីសាអូឌីត ដែលមានរាងដូចមនុស្ស ហើយវាត្រូវបានផលិត និងបង្កើតជាគម្រោងជាតិ ដើម្បីបង្ហាញពីសមិទ្ធិផលក្នុងវិស័យបញ្ញាសិប្បនិមិត្ត។

ទោះជាយ៉ាងណាក៏ដោយ នៅក្នុងព្រឹត្តិការណ៍នេះ Mohammad បានបញ្ចេញអាកប្បកិរិយាមិនសមរម្យទៅលើស្រ្តី ធ្វើឱ្យទស្សនិកជនភ្ញាក់ផ្អើលខ្លាំង។ ឆ្លើយតបទៅនឹងឧបទ្ទវហេតុនេះ ក្រុមហ៊ុនផលិតបានបញ្ជាក់ថា Mohammad គឺ “ដើរស្វ័យប្រវត្តិ” ហើយថាវាដំណើរការដោយឯករាជ្យដោយគ្មានប្រតិបត្តិករបញ្ជាវានោះទេ។ ក្រុមហ៊ុនបានបន្តទៀតថា “យើងនឹងធ្វើការពិនិត្យយ៉ាងល្អិតល្អន់ឡើងវិញលើខ្សែវីដេអូ និងកាលៈទេសៈជុំវិញឧបទ្ទវហេតុនេះ ហើយយើងនឹងបន្ថែមវិធានការណ៍ដើម្បីការពារនរណាម្នាក់ពីការចូលទៅជិតមនុស្សយន្តនៅក្នុងជួរនៃចលនារបស់វា”។

គួរបញ្ជាក់ដែរថា Mohammad គឺជាកំណែវិវត្តរបស់ Sara ដែលជាមនុស្សយន្តដំបូងគេដែលត្រូវបានបង្កើតឡើងដោយអារ៉ាប៊ីសាអូឌីត។ មនុស្សយន្តរបស់ QSS អាចនិយាយបានច្រើនភាសា ទំនាក់ទំនង ទទួលពាក្យបញ្ជា និងឆ្លើយតបទៅនឹងសំណើ។ គំរូមនុស្សយន្តនេះក៏អាចធ្វើចលនាដៃ ក រាងកាយផ្នែកខាងលើ និងបង្ហាញពីអារម្មណ៍ និងទឹកមុខរបស់វាផងដែរ។ បញ្ញាសិប្បនិមិត្តត្រូវបានប្រើប្រាស់តាមរយៈកាមេរ៉ាដែលភ្ជាប់មកជាមួយ ដើម្បីកំណត់ពីពេលដែលមនុស្សម្នាក់នៅពីមុខមនុស្សយន្ត។

ការអភិវឌ្ឍន៍នៃបច្ចេកវិទ្យាមនុស្សយន្ត ជាពិសេសមនុស្សយន្តដែលមានរូបរាងជាមនុស្ស តែងតែបង្កឱ្យមានការភ័យខ្លាចថាប្រព័ន្ធនឹងដកហូតការងាររបស់មនុស្សនាពេលអនាគត។ ទោះជាយ៉ាងណាក៏ដោយ មានមនុស្សតិចណាស់ដែលគិតថាប្រព័ន្ធបែបនេះអាចយកតម្រាប់តាមអាកប្បកិរិយារបស់មនុស្សមួយចំនួនដែលមិនចង់បាន។ ដូច្នេះឧប្បត្តិហេតុរបស់មនុស្សយន្ត Mohammad បានបង្ហាញថា AI និងប្រព័ន្ធមនុស្សយន្តត្រូវការការបណ្តុះបណ្តាល និងអភិវឌ្ឍបន្ថែមទៀត មុនពេលប្រើប្រាស់យ៉ាងទូលំទូលាយនៅកន្លែងសាធារណៈ៕

ប្រទេសចិន ៖ សារព័ត៌មានបរទេសរាយការណ៍ថា កាលពីថ្ងៃទី៤ ខែមីនា ឆ្នាំ២០២៤ ប្រទេសចិនបានសិក្សាស្រាវជ្រាវឧស្ម័នធម្មជាតិនៅក្រោមដី ដោយការខួងអណ្តូងពិសេសមួយក្នុងជម្រៅរហូតដល់១ម៉ឺនម៉ែត្រ នៅបរិវេណស៊ីនជៀង អ៊ុយគូ ស្ថិតក្នុងតំបន់ពាយ័ព្យប្រទេសចិន ។ លើសពីនេះ ក្រុមការងារនៅតែបន្តខួងអណ្តូងឱ្យកាន់តែជ្រៅបន្ថែមទៀត ។

គេចាត់ទុកថា វាជាការបោះជំហានទៅមុខនៃភារកិច្ចស្រាវជ្រាវក្រោមដីរបស់ប្រទេសចិន ។ ផ្ទៃដីសម្រាប់ខួងអណ្តូងពិសេស ឬហៅថា «ឈៀនទីថាខឺ ១» ស្ថិតនៅឆ្ងាយពីសមុទ្រខ្សាច់ ហើយគេសង្ឃឹមថា វានឹងមានជម្រៅរហូតដល់១ម៉ឺន១ពាន់១រយម៉ែត្រ ។ វាជាអណ្តូងស្រាវជ្រាវផ្នែកវិទ្យាសាស្ត្រដំបូងគេរបស់ចិន ដែលបានខួងចូលក្នុងដីក្នុងជម្រៅលើស១ម៉ឺនម៉ែត្រ ។

ការខួងអណ្តូងនេះបានចាប់ផ្តើមដំណើរការ តាំងពីថ្ងៃទី៣០ ខែឧសភា ឆ្នាំ២០២៣ មកម៉្លេះ ។ ក្រុមការងារបានខួងដីដោយឆ្លងកាត់ថ្មរហូតដល់១៣ជាន់ ដោយបានប្រើប្រាស់បំពង់ខួងប្រមាណ១ម៉ឺនបំពង់ និងមានម៉ាស៊ីនខួងអណ្តូងចំនួន២០គ្រឿង ។

ហ្វាង ឈុនសឺង ជានាយកក្រុមជំនាញអណ្តូងប្រេង «Tarim» និយាយថា វាជាលើកដំបូងហើយដែលប្រទេសចិនបានខួងអណ្តូងក្នុងជម្រៅរហូតដល់១ម៉ឺនម៉ែត្រ ។ Tarim Basin ស្ថិតនៅចន្លោះភ្នំធៀនតាន និងភ្នំខុនឡុន ហើយវាជាផ្ទៃដីដ៏លំបាកបំផុតសម្រាប់ការស្រាវជ្រាវ ។

នាយកក្រុមជំនាញអណ្តូងប្រេង «Tarim» បន្តទៀតថា ការខួងអណ្តូងនេះប្រឈមនឹងឧបសគ្គយ៉ាងខ្លាំង ហើយវាកាន់តែលំបាកខ្លាំងឡើងនៅពេលខួងអណ្តូងកាន់តែជ្រៅ ។ បច្ចុប្បន្ន ការខួងអណ្តូងជ្រៅបំផុតនៅលើពិភពលោក គឺមានជម្រៅស្មើនឹង១ម៉ឺន២ពាន់២៦២ម៉ែត្រ ។

ចំណែកអ្នកជំនាញមកពីស្ថាប័នវិទ្យាសាស្ត្រចិនឈ្មោះ ជៀក ឈើងចៅ និយាយថា «ឈៀនទីថាខឺ ១» បានក្លាយជារណ្តៅមានជម្រៅជ្រៅលំដាប់ទី២ នៅលើពិភពលោក និងជ្រៅបំផុតនៅតំបន់អាស៊ី ។ វាជាគោលដៅសំខាន់យ៉ាងខ្លាំងក្នុងការស្រាវជ្រាវនៅក្រោមដីដែលមានជម្រៅយ៉ាងជ្រៅ រួមទាំងការស្រាវជ្រាវរកឧស្ម័នធម្មជាតិផងដែរ ៕

ការផ្ទេរប្រាក់ទៅគណនីខុសមិនមែនជារឿងចម្លែកទេ ប៉ុន្តែតើយើងត្រូវធ្វើដូចម្តេចដើម្បីទទួលបានប្រាក់ត្រឡប់មកវិញនៅពេលដែលផ្ទេរប្រាក់ទៅគណនីធនាគារខុស? ក្នុងករណីផ្ទេរប្រាក់ខុសទៅគណនីធនាគារដូចគ្នា អ្នកដែលផ្ទេរប្រាក់ខុសអាចទទួលបានប្រាក់វិញតាមវិធីដូចខាងក្រោម៖

ជំហានទី ១៖ ទៅកាន់ការិយាល័យប្រតិបត្តិការរបស់ធនាគារ ហើយសុំជំនួយពីបុគ្គលិក។
ជំហានទី ២៖ ផ្តល់ព័ត៌មានរួមទាំងអត្តសញ្ញាណប័ណ្ណ/CCCD វិក្កយបត្រដែលបញ្ជាក់ពីប្រតិបត្តិការផ្ទេរប្រាក់ខុស…។
ជំហានទី ៣៖ បុគ្គលិកធនាគារផ្ទៀងផ្ទាត់ព័ត៌មាន និងទាក់ទងម្ចាស់គណនីដើម្បីស្នើសុំការបង្វិលសង។ ប៉ុន្តែសម្រាប់ជំហានទី ៣ គឺមាន ២ ករណីទៀត ដោយករណីទី១ អ្នកទទួលខុសមិនបានវេរលុយទៅវិញ មានន័យថា ធនាគារនឹងបិទគណនីអ្នកទទួលខុស ហើយសងប្រាក់ដែលផ្ទេរខុសមកអ្នកវិញ។

ករណីទី២ អ្នកទទួលខុសបានប្រើប្រាស់លុយនេះ៖ ធនាគារនឹងធ្វើការស្នើសុំ និងកំណត់ពេលវេលាអតិបរមាសម្រាប់ការសងប្រាក់វិញ។ ប្រសិនបើពេលវេលាដែលបានបញ្ជាក់បានកន្លងផុតទៅហើយ ហើយអ្នកទទួលនៅតែមិនទាន់បានប្រគល់ប្រាក់វិញ ធនាគារនឹងជូនដំណឹងដល់អ្នកដើម្បីចាប់ផ្តើមការប្តឹងផ្តល់តាមច្បាប់។

ហេតុនេះហើយ ក្នុងករណីផ្ទេរប្រាក់ទៅគណនីធនាគារផ្សេងដោយច្រឡំ ដំណើរការទទួលប្រាក់វិញគឺស្រដៀងនឹងចំណុចខាងលើ។ អ្នកដែលធ្វើការផ្ទេរប្រាក់ខុសត្រូវទៅការិយាល័យប្រតិបត្តិការរបស់ធនាគារដែលជាកន្លែងដែលគណនីត្រូវបានបើក និងផ្តល់ឯកសារពាក់ព័ន្ធ។ បុគ្គលិកធនាគារនឹងទាក់ទងធនាគារអ្នកទទួលផល និងម្ចាស់គណនីដើម្បីជួយអ្នកក្នុងការទទួលបានប្រាក់របស់អ្នកមកវិញ។ ទោះជាយ៉ាងណាក៏ដោយ ពេលវេលាដំណើរការអាចនឹងយូរជាងក្នុងករណីផ្ទេរប្រាក់ទៅគណនីធនាគារខុស។ ដូច្នេះ តើយើងត្រូវចំណាយពេលប៉ុន្មានដើម្បីយកប្រាក់ឱ្យបានលឿន?

ពេលវេលាដែលត្រូវយកលុយមកវិញនៅពេលផ្ទេរទៅគណនីខុសគឺអាស្រ័យទៅលើកត្តាជាច្រើន ជាពិសេសដំណើរការប្តូរប្រាក់ជាមួយម្ចាស់គណនីដែលបានទទួលលុយខុស។ ប្រសិនបើម្ចាស់គណនីបានទទួលចំនួនខុសដោយស្មោះត្រង់ ពេលវេលាដើម្បីទទួលបានប្រាក់ត្រឡប់មកវិញនឹងខ្លីគឺប្រហែល ៣ ទៅ ៧ ថ្ងៃធ្វើការ។ ពេលវេលាកំណត់អតិបរមាដើម្បីទទួលបានប្រាក់របស់អ្នកមកវិញគឺ ១០ ទៅ ១៥ ថ្ងៃធ្វើការ។ ប្រសិនបើបន្ទាប់ពីពេលនេះ អ្នកមិនបានទទួលការបង្វិលសងវិញទេ អ្នកអាចដាក់ពាក្យបណ្តឹង ហើយវានឹងចំណាយពេលពីរបីសប្តាហ៍ទៅពីរបីខែដើម្បីទទួលបានប្រាក់របស់អ្នកមកវិញ៕

ប្រទេសថៃ ៖ នៅថ្ងៃទី៦ ខែមីនា ឆ្នាំ២០២៤ សារព័ត៌មានថៃរាយការណ៍ថា អាជ្ញាធរថៃបាន រឹ.បអូ.ស គ្រឿងទេស ក្លែ.ងក្លា.យ ម៉ាកល្បីជិត៧ម៉ឺនកញ្ចប់នៅតំបន់ផលិត និងចែកចាយធំៗក្នុងប្រទេសថៃ ដើម្បីទប់ស្កាត់កុំឱ្យពួកឈ្មួញលក់ផលិតផលនេះទៅកាន់ទីផ្សារ ។ ក្នុងរយៈពេល៤ខែកន្លងមក អាជ្ញាធរបានចុះបង្ក្រាបផលិតផលក្លែងក្លាយ ចំនួន១១០ករណី ។

លោក Wutthikrai Leeweeraphan មន្ត្រីនាយកដ្ឋានកម្មសិទ្ធិបញ្ញាប្រទេសថៃលើកឡើងថា លោកបានសហការជាមួយកម្លាំងសមត្ថកិច្ច, នាយកដ្ឋានប្រឆាំងបទល្មើសសេដ្ឋកិច្ច ព្រមទាំងអ្នកតំណាងម្ចាស់កម្មសិទ្ធិមកពីក្រុមហ៊ុននានា ចុះទៅបង្ក្រាបផលិតផលក្លែងក្លាយរំលោភកម្មសិទ្ធិបញ្ញានៅតំបន់ផលិត និងចែកចាយធំៗ ដើម្បីទប់ស្កាត់ការចែកចាយផលិតផលរំលោភកម្មសិទ្ធិបញ្ជា ទៅកាន់ទីផ្សារនានា ។

លោកបន្តថា លោកបានចុះទៅខេត្តមួយចំនួន ដូចជា ៖ ខេត្តឧត្តរថានី, នគររាជសីម៉ា, នគរស្រ៊ីថាម៉ារាជ, សុងក្លា, ក្រៈប៊ី, ភូកេត, ឈុនបុរី, ណាខនណាយក, ស្រះកែវ, ចាន់ថាក់បុរី, ត្រាច, រ៉ាក់យ៉ង, ឆាក់ឈើងសៅ, ឈៀងម៉ៃ, ឈៀងរ៉ាយ, ឡាំផូន, ផាក់យ៉ៅ, ព្រះនគរស្រ៊ីអាយុធ្យា, ប៉ាថុមថានី និងនុនថាក់បុរី ។ ក្រៅពីនេះ លោកក៏បានចុះទៅផ្សារទំនើប MBK Center, ផ្លូវខាវសាន, ប្រាទូណាម, ផ្សារទំនើបផ្លាទីនៀម និងតំបន់សាំផេង ផងដែរ ។

ការចុះទៅតាមបណ្តាខេត្តនានា និងតំបន់មួយចំនួនក្នុងទីក្រុងបាងកក លោក Wutthikrai បញ្ជាក់ថា គឺដើម្បីត្រួតពិនិត្យការលក់ផលិតផលខុសច្បាប់ ព្រមទាំងផ្សព្វផ្សាយដល់ពលរដ្ឋឱ្យយល់ដឹងអំពីផលប្រយោជន៍របស់កម្មសិទ្ធិបញ្ញាផងដែរ ។ ហេតុនេះ វាជាការជំរុញពាណិជ្ជកម្ម និងវិនិយោគក្នុងប្រទេស ព្រមទាំងការពារពលរដ្ឋកុំឱ្យមានគ្រោះថ្នាក់ដល់សុខភាព ដោយសារការបរិភោគផលិតផលក្លែងក្លាយគ្មានស្តង់ដារ ។

លោក Wutthikrai មន្ត្រីនាយកដ្ឋានកម្មសិទ្ធិបញ្ញាលើកឡើងថា ៖ «ក្នុងរយៈពេល៤ខែកន្លងមក (គឺចាប់ពីខែតុលា ឆ្នាំ២០២៣ ដល់ខែមករា ឆ្នាំ២០២៤) ក្រុមអាជ្ញាធរបានបង្ក្រាប និងចាត់ការតាមផ្លូវច្បាប់ចំពោះអ្នកលក់ ឬចែកចាយផលិតផលខុសច្បាប់ទាំងអស់ រួមទាំងផលិតផលលក់តាមអនឡាញផងដែរ សរុបទាំងអស់ស្មើនឹង១១០ករណី ។ រីឯផលិតផលខុសច្បាប់ស្មើនឹង៨៩.០៣១ដុំ ហើយក្នុងចំណោមផលិតផលខុសច្បាប់ទាំងនេះ គឺមានគ្រឿងទេសក្លែងក្លាយម៉ាកល្បី ចំនួន៦៩.៤០៤ដុំ ដែលមានគ្រោះថ្នាក់ដល់សុខភាពអ្នកបរិភោគ» ។

គួរបញ្ជាក់ថា អ្នកលក់ផលិតផលក្លែងក្លាយនឹងត្រូវជាប់ពន្ធនាគាររយៈពេល៤ឆ្នាំ និងត្រូវពិន័យជាប្រាក់ចំនួន៤សែនបាត ឬទាំងជាប់ពន្ធនាគារ និងពិន័យជាប្រាក់ ។ រីឯអ្នកលក់ផលិតផលរំលោភកម្មសិទ្ធិបញ្ញា នឹងជាប់ពន្ធនាគាររយៈពេល៤ឆ្នាំ និងត្រូវពិន័យជាប្រាក់ចំនួន៨សែនបាត ឬទាំងជាប់ពន្ធនាគារ និងពិន័យជាប្រាក់ ៕

បច្ចុប្បន្នរថយន្តប្រភេទ SUV គ្រប់គ្រងការលក់ជាបណ្តើរៗនៅក្នុងទីផ្សាររថយន្តពិភពលោក ដោយក្នុងក្រុមហ៊ុនផលិតរថយន្តទំនើប ជាច្រើនបានដាក់បង្ហាញនៅរថយន្ត SUV ដ៏ប្រណិតដែលមានតម្លៃថ្លៃបំផុតចាប់ពី ៣៥ ម៉ឺនដុល្លារឡើងទៅរហូតដល់ជិត ២ លានដុល្លារអាមេរិក។ ដូច្នេះខាងក្រោមនេះ គឺជាប្រភេទរថយន្ត SUV កំពូលទាំង ១០ ដែលមានតម្លៃខ្ពស់បំផុតនៅលើពិភពលោក៖

១. Karlmann King៖ រថយន្ត SUV Karlmann King មានតម្លៃ ១.៩ លានដុល្លារអាមេរិក គឺជារថយន្តដ៏ថ្លៃបំផុតនៅលើពិភពលោក ដែលក្នុងមួយឆ្នាំមានតែ ៩ គ្រឿងប៉ុណ្ណោះដែលត្រូវបានផលិត។ រថយន្តនេះបង្ហាញពីបន្ទាត់កាត់ និងរាងសាច់ដុំ ដែលបំពាក់ដោយម៉ាស៊ីន V10 ចំណុះ ៦,៨ លីត្ររបស់ Ford មានកម្លាំង ៤០០ សេះ និងមានល្បឿនអតិបរមាត្រឹមតែ ១៤០ គីឡូម៉ែត្រក្នុងមួយម៉ោងប៉ុណ្ណោះ រីឯផ្ទៃខាងក្នុងអាចត្រូវបានរៀបចំដោយ ៤, ៥, ៦ ឬ ៧ កៅអី។

២. Scarbo Vintage SV Rover៖ រថយន្ត SUV Scarbo Vintage SV Rover មានតម្លៃ ១.៥ លានដុល្លារអាមេរិក ជាប្រភេទរថយន្តកូនកាត់ រួមបញ្ចូលគ្នានូវរចនាប័ទ្មនៃ Ford Bronco, Land Rover Defender និង Hummer H1 ដែលមានរាងមូល រាងការ៉េ និងជិះខ្ពស់។ រថយន្តនេះបំពាក់ដោយម៉ាស៊ីន Supercharged V8 ដែលមានកម្លាំង ១,១០០ សេះ និងមានសូម្បីតែកំណែអគ្គិសនីដែលមានកម្លាំង ១,០០៦ សេះផងដែរ។

៣. Dartz Prombron៖ Dartz Prombon គឺជារថយន្ត SUV ដែលមានតម្លៃថ្លៃបំផុតពីប្រទេសឡាតវី។ ម៉ូដែលរថយន្តនេះមានទ្រនាប់ការពារគ្រាប់កាំភ្លើងមានតួសរសៃ Kevlar និងទីតានីញ៉ូម បច្ចេកវិទ្យាស្គេនភ្នែក ស្កេនក្រយៅដៃ កាមេរ៉ាស៊េរី ស្នែង និងដៃទ្វារឆក់។ Dartz Prombron ជាប្រភេទរថយន្ត Mercedes មានចំណុះ ៦ លីត្រ Twin-Turbo V12 មានកម្លាំង ១៥០០ សេះ និងមានតម្លៃ ១.២ លានដុល្លារអាមេរិក។

៤. Mercedes-Maybach G650 Landaulet៖ រថយន្តដ៏ប្រណិតនេះ ផលិតតែ ៩៩ គ្រឿងប៉ុណ្ណោះនៅលើពិភពលោក ដោយវាបំពាក់ជាមួយម៉ាស៊ីន V12 ចំណុះ ៤,០ លីត្រ Bi-turbo អាចផលិតកម្លាំងបាន ៦៣០ សេះ មានតម្លៃលក់ ៧៥៤ ២០០ ដុល្លារអាមេរិក។

៥. Mercedes G63 AMG 6×6៖ រថយន្ត Mercedes G63 AMG 6×6 ផ្អែកនៅលើរថយន្ត G63 ប្រភេទ SUV បំពាក់ជាមួយម៉ាស៊ីន V8 ចំណុះ ៥,៥ លីត្រ Bi-turbo អាចផលិតកម្លាំងបាន ៥៤៤ សេះ និងកម្លាំងរមួល ១០០០ ញ៉ូតុនម៉ែត្រ មានតម្លៃលក់ ៥៤៤ ៣៧៨ ដុល្លារអាមេរិក។

៦. Rolls-Royce Cullinan Black Badge៖ កំណែ Black Badge របស់ Cullinan ផ្តល់ឱ្យរថយន្ត SUV កាន់តែមានថាមពលខ្លាំង ធ្វើឱ្យប្រសើរឡើងនូវម៉ាស៊ីន V12 Twin-turbo អាចផលិតកម្លាំងបាន ៦០០ សេះ និងកម្លាំងរមួល ៩០០ ញ៉ូតុនម៉ែត្រ មានតម្លៃលក់ ៤៥៣ ២៥០ ដុល្លារអាមេរិក។

៧. Ferrari Purosangue៖ Ferrari Purosangue គឺជារថយន្តបំពាក់ជាមួយម៉ាស៊ីន V12 ចំណុះ ៦,៥ លីត្រ អាចផលិតកម្លាំងបាន ៧២៥ សេះ និងកម្លាំងរមួល ៧១៦ ញ៉ូតុនម៉ែត្រ ដែលវាមានតម្លៃលក់ ៤០២ ០៥០ ដុល្លារអាមេរិក ។

៨.Rolls-Royce Cullinan៖ Cullinan ជារថយន្តប្រភេទ SUV ដំបូងបង្អស់របស់ម៉ាកយីហោប្រណីតរបស់អង់គ្លេស។ រថយន្តនេះបំពាក់ជាមួយម៉ាស៊ីន V12 Twin-turbo អាចផលិតកម្លាំងបាន ៥៧១ សេះ និងកម្លាំងរមួល ៨៥០ ញ៉ូតុនម៉ែត្រ ក៏ដូចជាមានតម្លៃលក់ ៣៧៦ ៧៥០ ដុល្លារអាមេរិក។

៩.Mercedes-AMG G63 4×4²៖ G63 4×4² មានសមត្ថភាពអស្ចារ្យជាង G63 ដែលរថយន្តបំពាក់ជាមួយម៉ាស៊ីន V8 Bi-turbo អាចផលិតកម្លាំងបាន ៥៨៥ សេះ មានតម្លៃលក់ ៣៥០ ០៥០ ដុល្លារអាមេរិក។

១០.Bentley Bentayga EWB Mulliner៖ គឺជារថយន្តចុងក្រោយដែលមានតម្លៃថ្លៃបំផុតលើលោក ដោយម៉ូដែលរថយន្តនេះបំពាក់ជាមួយម៉ាស៊ីន V8 Bi-turbo អាចផលិតកម្លាំងបាន ៥៥០ សេះ និងកម្លាំងរមួល ៧៧០ ញ៉ូតុនម៉ែត្រ រួមទាំងមានតម្លៃលក់ ៣៣៩ ១៥០ ដុល្លារអាមេរិក៕

ប្រជាកសិករថៃកំពុងបង្ហាញការមិនសប្បាយចិត្ត ស្របពេលដែលស្វាយកែវមៀតខ្មែរកំពុងមានទីផ្សារក្នុងប្រទេសថៃ ដែលបណ្តាលឲ្យតម្លៃស្វាយស្រុកថៃមានការធ្លាក់ចុះជាគំហុក។

កាលពីពេលថ្មីៗនេះ យោងតាមការចុះផ្សាយរបស់សារព័ត៌មានថៃ Thai PBS បានរាយការណ៍ថា នារដូវក្តៅនេះជាពេលដែលផ្លែស្វាយថៃលេចចេញជាបណ្តើរៗនៅលើទីផ្សារ។ ទន្ទឹមនឹងនេះក៏មានស្វាយប្រទេសជិតខាងគឺកម្ពុជា ជាពិសេសស្វាយកែវរមៀត ចូលមកក្នុងទីផ្សារប្រទេសថៃផងដែរ ដែលជាហេតុបណ្តាលឲ្យតម្លៃផ្លែស្វាយស្រុកឮថៃធ្លាក់ចុះខ្លាំង។

ប្រភពដដែលបានបញ្ជាក់ទៀតថា តម្លៃផ្លែស្វាយរបស់ស្រុកថៃ ពូជខ្លះទទួលបាន មួយគីឡូក្រាមត្រឹមតែ ២-៣បាតប៉ុណ្ណោះ ខណៈផ្លែស្វាយខ្មែរនៅក្នុងប្រទេសថៃ ១គីឡូក្រាមលក់បានចន្លោះពី ១០ដល់១៥បាត ហើយក៏ជាការពេញនិយមក្នុងចំណោមប្រជាជនថៃចោមរោមទិញស្ទើរគ្រប់ៗគ្នា។ ដូច្នេះហើយទើបប្រជាកសិករថៃសំណូមពរដល់រដ្ឋាភិបាលនិងស្ថាប័ពាក់ព័ន្ធចូលខ្លួនមកដោះស្រាយនិងរកទីផ្សារតម្លៃឲ្យបានសមស្របវិញផងដែរ។

ក្រឡេកមើលផ្លែស្វាយកែវរមៀតខ្មែរវិញ ដូចដែលយើងគ្រប់គ្នាបានជ្រាបមកហើយថា ជាពូជស្វាយដែលមានរសជាតិផ្អែម ឆ្ងាញ់ពិសារ សម្បូរសាច់ហូប ហើយគ្រាន់តែឃើញសំបកក៏ស្រកទឹកមាត់ដែរ។ ម្យ៉ាងវិញទៀតទៀត ស្វាយខ្មែរមួយប្រភេទនេះក៏អាចយកទៅច្នៃធ្វើជាភេសជ្ជៈ បង្អែម ដំណាប់ជាដើម បានយ៉ាងមានឱជារសឈ្ងុយឆ្ងាញ់។

គួរបញ្ជាក់ថា កាលពីពេលថ្មីៗនេះ ការកែច្នៃផ្លែស្វាយយកមកធ្វើជាភេសជ្ជៈផ្សេងៗ ជាពិសេសស្វាយគ្រីម គឺកំពុងក្លាយជាទីពេញនិយមបំផុតក្នុងចំណោមទាំងយុវវ័យនិងប្រជាពលរដ្ឋខ្មែរ។ ជាមួយនឹងគំនិតច្នៃប្រឌិតនេះ គឺពិតជាបានលើកកម្ពស់ទីផ្សារផ្លែឈើក្នុងស្រុកមួយផ្នែក ក៏ដូចជាបានក្លាយជាប្រភពចំណូលដល់កាក់កបដល់ប្រជាកសិករខ្មែរ អ្នកលក់ទាំងក្នុងនិងក្រៅស្រុកផងដែរ៕

ទន្លេមេគង្គ គឺជាទន្លេវែងជាងគេលំដាប់លេខ ១២ នៅក្នុងពិភពលោក។ ទន្លេនេះមានប្រវែងប្រហែល ៤២០០ គីឡូម៉ែត្រ ឆ្លងកាត់ប្រទេសចំនួន ៦ គឺប្រទេសកម្ពុជា ចិន ភូមា ថៃ ឡាវ វៀតណាម និងហូរចាក់ចូលក្នុងសមុទ្រចិនខាងត្បូង។ ទន្លេមេគង្គគឺជាសរសៃឈាមរបស់ប្រទេសកម្ពុជា ដែលវាហូរកាត់ខេត្តដូចជា ស្ទឹងត្រែង ក្រចេះ កំពង់ចាម ព្រៃវែង និងរាជធានីភ្នំពេញ។ ទន្ទឹមនឹងនេះ វាក៏ជាជម្រកនៃប្រភេទត្រីចំនួន ១,១៤៨ ត្រូវបានទទួលស្គាល់ ក៏ដូចជាមានមនុស្សរាប់លាននាក់ពឹងផ្អែកលើទន្លេសម្រាប់ចិញ្ចឹមជីវិតរបស់ពួកគេផងដែរ។

ទោះបីជាយ៉ាងណាក៏ដោយ បើយោងតាមរបាយការណ៍ថ្មីពីសម្ព័ន្ធនៃក្រុមបរិស្ថានក្នុងតំបន់ និងអន្តរជាតិ បានឱ្យដឹងថា ២០% នៃប្រភេទត្រីនៅក្នុងទន្លេមេគង្គបច្ចុប្បន្នកំពុងប្រឈមមុខនឹងហានិភ័យនៃការផុតពូជ។ បើតាមសកម្មជនបរិស្ថាន ទន្លេមេគង្គត្រូវបានគំរាមកំហែងយ៉ាងធ្ងន់ធ្ងររាប់មិនអស់ រួមទាំងការសាងសង់ទំនប់ ការជីកយករ៉ែខ្សាច់ ការគ្រប់គ្រងធនធានជលផលមិនល្អ ការបាត់បង់ទីជម្រក និងការដាក់បញ្ចូលប្រភេទសត្វចម្លែក ដែលបណ្តាលឱ្យចំនួនត្រីក្នុងទន្លេមេគង្គថយចុះ នឹងប៉ះពាល់ដល់មនុស្សរាប់លាននាក់ដែលជីវភាពរស់នៅពឹងផ្អែកលើទន្លេ។

លោក Lan Mercado នាយកអង្គការ WWF ប្រចាំតំបន់អាស៊ីប៉ាស៊ីហ្វិក បានមានប្រសាសន៍ថា៖ «ការធ្លាក់ចុះគួរឱ្យព្រួយបារម្ភនៃចំនួនត្រីនៅក្នុងទន្លេមេគង្គគឺជាការដាស់តឿនមួយ ដើម្បីចាត់វិធានការជាបន្ទាន់។ យើងត្រូវតែធ្វើសកម្មភាពឥឡូវនេះ ដើម្បីផ្លាស់ប្តូរនិន្នាការមហន្តរាយនេះ ពីព្រោះសហគមន៍មេគង្គ និងប្រទេសនានា មិនអាចមានលទ្ធភាពក្នុងការបាត់បង់ពួកគេឡើយ»។ របាយការណ៍ពីក្រុមស្រាវជ្រាវក្នុងតំបន់ និងអន្តរជាតិចំនួន ២៥ បានពិនិត្យលើផលប៉ះពាល់លើផ្នែកផ្សេងៗនៃទន្លេប្រវែង ៤,៩០០ គីឡូម៉ែត្រដែលជាទន្លេវែងជាងគេនៅអាស៊ីអាគ្នេយ៍ រួមទាំងបឹងទន្លេសាបនៃប្រទេសកម្ពុជាផងដែរដែលពួកគេបាននិយាយថាចំនួនត្រីបានធ្លាក់ចុះ ៨៨% រវាងឆ្នាំ ២០១៩ ដល់ឆ្នាំ ២០២៣។

អ្នកនិពន្ធការសិក្សាបានបញ្ជាក់ថា ប្រភេទត្រីចំនួន ៧៤ ត្រូវបានវាយតម្លៃថា “ជិតផុតពូជ” នៅក្នុងបញ្ជីក្រហមរបស់សហភាពអន្តរជាតិសម្រាប់ការអភិរក្សធម្មជាតិនៃប្រភេទសត្វដែលរងការគំរាមកំហែង។ របាយការណ៍បាននិយាយជាផ្លូវការថា “នេះមានន័យថា ប្រហែល ២០% នៃប្រភេទត្រីដែលគេស្គាល់នៅក្នុងទន្លេមេគង្គត្រូវបានគំរាមកំហែង” ។ ការបាត់បង់ត្រីអាចធ្វើឱ្យការកាប់បំផ្លាញព្រៃឈើក្នុងតំបន់កាន់តែអាក្រក់ទៅៗ ខណៈដែលមនុស្សរាប់លាននាក់ដែលពីមុនពឹងផ្អែកលើទន្លេសម្រាប់ចិញ្ចឹមជីវិតរបស់ពួកគេត្រូវបានបង្ខំឱ្យធ្វើស្រែចម្ការវិញ។

លោក Herman Wanningen នាយកប្រតិបត្តិនៃអង្គការទេសន្តរប្រវេសន៍ត្រីពិភពលោកបាននិយាយថា “វាច្បាស់ណាស់ថាយើងកំពុងប្រថុយនឹងបង្កឱ្យមានវិបត្តិជីវចម្រុះថ្មីសម្រាប់អាងទន្លេមេគង្គ។ ប៉ុន្តែវាមិនយឺតពេលទេនៅក្នុងអនុសាសន៍របស់ខ្លួន របាយការណ៍នេះបានអំពាវនាវឱ្យប្រទេសមេគង្គប្តេជ្ញាអនុវត្តការប្រឈមមុខនឹងទឹកសាប ក៏ដូចជាការការពារ និងការស្តារប្រព័ន្ធអេកូឡូស៊ីទន្លេឡើងវិញ រួមទាំងការបង្កើនលំហូរធម្មជាតិរបស់ទន្លេ ការកែលម្អគុណភាពទឹក ការការពារទីជម្រក និងប្រភេទសត្វសំខាន់ៗ ក៏ដូចជាការលុបបំបាត់របាំងទន្លេហួសសម័យជាដើម ដែលនេះគឺជាសសរស្តម្ភទាំងប្រាំមួយដែលត្រូវបានណែនាំដើម្បីជួយស្ដារទន្លេមេគង្គ៕