ប្រទេសថៃ ៖ សារព័ត៌មានថៃរាយការណ៍ថា កាលពីព្រឹកថ្ងៃទី៤ ខែមេសា ឆ្នាំ២០២៤ មានហេតុការណ៍ដ៏ រន្ធ.ត់ មួយបានកើតឡើងនៅសមុទ្រក្បែរកោះតៅ ស្ថិតនៅឃុំកោះតៅ ស្រុកកោះផាក់ង៉ាន់ ខេត្តសុរ៉ាជថានី គឺភ្លើងបានឆាបឆេះនាវាទេសចរណ៍១គ្រឿង ដែលមានភ្ញៀវទេសចរជិះពេញនាវា ។ ហេតុការណ៍នេះបានបណ្តាលឱ្យភ្ញៀវទេសចរភ័.យ ស្លន់ស្លោ និងត្រៀមលោតចុះទឹកដើម្បីគេចពីសេចក្តី ស្លា.ប់ ។

បើតាមវីដេអូបង្ហាញថា មានផ្សែងខ្មៅយ៉ាងខ្លាំងចេញពីនាវាទេសចរណ៍ ហើយភ្ញៀវទេសចរទាំងអស់ដែលជិះនៅលើនាវា មានអារម្មណ៍ភ័យតក់ស្លុតយ៉ាងខ្លាំង ដោយពួកគេត្រៀមលោតចុះក្នុងទឹក ដើម្បីរត់គេចពីសេចក្តីស្លាប់ ។ នាវាទេសចរណ៍នេះមានអ្នកជិះសរុបចំនួន៩០នាក់ ហើយក្រៅពីដឹកភ្ញៀវទេសចរ នាវានេះក៏បានដឹករថយន្ត, ម៉ូតូ និងរថយន្តដឹកសម្ភារៈសំណង់ផងដែរ ។

ក្នុងអំឡុងពេលកើតហេតុ នាវាខាងលើបានសុំការជួយអន្តរាគមន៍ពីអាជ្ញាធរប្រចាំកោះតៅ និងអាជ្ញាធរប្រចាំកោះនៅក្បែរគ្នា ។ ក្រោយមក គេក៏បញ្ជូននាវាតូចៗជាច្រើនគ្រឿងដែលមានការសហការពីផ្នែកឯកជន បើកសំដៅទៅកាន់នាវាទេសចរណ៍ និងជួយជម្លៀសភ្ញៀវទេសចរ ព្រមទាំងបុគ្គលិកនាវាមកកាន់ច្រាំង ។

ក្រោយកើតហេតុប្រមាណ១ម៉ោង អាជ្ញាធរក៏អាចគ្រប់គ្រងស្ថានការណ៍បាន និងបញ្ជូនភ្ញៀវទេសចរដែលឈ្លក់ផ្សែងនៅលើនាវា ទៅកាន់មន្ទីរពេទ្យកោះតៅ ។ ហេតុការណ៍នេះ គ្មានអ្នកណាម្នាក់រងរបួស ឬស្លាប់ទេ ខណៈទ្រព្យសម្បត្តិផ្សេងៗនៅលើនាវាទេសចរណ៍ខូចខាតស្ទើរទាំងអស់ ពីព្រោះនាវាត្រូវបានភ្លើងឆេះទាំងស្រុង ។ ជំហានដំបូង អាជ្ញាធរសន្និដ្ឋានថា ភ្លើងឆេះនេះអាចបណ្តាលមកពីបន្ទប់តូចនៅបាតនាវា ហើយអាជ្ញាធរនឹងរង់ចាំការពិសោធន៍យ៉ាងលម្អិតម្តងទៀត ។

លោក ភីភិត ឆ័យឈួយ ជាប្រធានកំពង់ផែ បានបញ្ជាឱ្យបង្កើតគណៈកម្មការត្រួតពិនិត្យរកមូលហេតុច្បាស់លាស់ ដែលធ្វើឱ្យភ្លើងឆេះនៅបន្ទប់បាតនាវា ។ លោកបញ្ជាក់ថា តាំងពីពេលចូលឆ្នាំសកល រហូតមកដល់ខែមីនា ឆ្នាំ២០២៤ លោកបានឱ្យក្រុមការងាររឹតបន្តឹងលើសុវត្ថិភាពអ្នកដំណើរ ជាពិសេស ផ្តោតលើឧបករណ៍ជួយសង្គ្រោះជីវិត និងសភាពនាវា ។

លោក ភីភិត ឆ័យឈួយ បន្តថា ក្នុងអំឡុងពេលថ្ងៃចូលឆ្នាំថ្មីខាងមុខនេះ លោកក៏បានឱ្យក្រុមការងារធ្វើការត្រួតពិនិត្យនៅតាមកំពង់ផែផ្សេងៗ ដើម្បីការពារសុវត្ថិភាពភ្ញៀវទេសចរផងដែរ ៕

សូរ្យគ្រាសដ៏គួរឲ្យភ្ញាក់ផ្អើលមួយនឹងកើតឡើងនៅថ្ងៃទី ៨ ខែមេសា ឆ្នាំ ២០២៤នេះ ស្របពេលអ្នកវិទ្យាសាស្រ្តក៏បានព្រមានថា ភពផែនដីយើងនឹងអាចកើតមានបាតុភូតមួយទៀតគឺ ព្យុះព្រះអាទិត្យ ឬ solar flare បណ្តាលឲ្យដាច់ចរន្តអគ្គិសនីនិងអ៊ីនធើណែត បង្ករភាពចលាចលទូទាំងពិភពលោក។ ស្របពេលដែលសហរដ្ឋអាមេរិកបានចេញនូវសេចក្តីប្រកាសបិទសាលារៀនមួយចំនួនក្នុងអំឡុងពេលថ្ងៃសូរ្យគ្រាសផងដែរ។

ទាក់ទងនឹងបាតុភូត «ព្យុះព្រះអាទិត្យ ឬ solar flare» នេះដែរ លោកយាយ Baba Vanga កើតក្នុងឆ្នាំ ១៩១១ ដែលជាហោរាសាស្រ្តដ៏ល្បីល្បាញម្នាក់ អាចទស្សន៍ទាយដឹងអំពីព្រឹត្តិការណ៍អាចកើតមានឡើងនៅពេលអនាគតក៏បានលើកឡើងអំពីរឿងនេះដែរ។ នៅអាយុ១២ឆ្នាំ លោកយាយបានកើតឧបត្តវហេតុមួយដែលបណ្តាលភ្នែកទាំងសងខាងងងឹតឈឹងតែម្តង។ បន្ទាប់ពីនោះមក លោកយាយក៏បានក្លាយជាមនុស្សម្នាក់ដែលអាចទាយពីរឿងរ៉ាវនៅអនាគតកាល ហើយរឿងដែលលោកយាយបានទាយភាគច្រើនក៏បានក្លាយជាការពិតផងដែរ។ ជាមួយគ្នានេះ លោកយាយ ក៏ទាយអំពីព្យុះព្រះអាទិត្យ អាចនឹងកើតមានឡើងលើភពផែនដី ចន្លោះឆ្នាំ២០២៣និង២០២៤។ ព្យុះព្រះអាទិត្យគឺអណ្តាតភ្លើងរបស់ព្រះអាទិត្យ ដែលនឹងបញ្ជូនមកកាន់ភពផែនដី ក្នុងនោះគឺផ្ទុកនូវបន្ទុកអគ្គីសនី ដែនម៉ាញេទិច និងវិទ្យុសកម្មខ្លាំង បង្កនូវផលប៉ះពាល់យ៉ាងធ្ងន់ធ្ងរជាពិសេសគឺមនុស្សជាតិ។

ជាមួយគ្នានោះ តុក្កតា Simpson ជាគំនូរជីវចលបរទេសដែលផលិតឡើងតាំងពីឆ្នាំ ១៩៨៩មកម្លេះ មានជាច្រើនវគ្គ ដែលវគ្គនីមួយៗគឺសុទ្ធតែបានឆ្លុះបញ្ចាំងអំពីការទស្សន៍ទាយពីអនាគតកាល។ ខណៈសាច់រឿងនៃវគ្គមួយរបស់តុក្កតា Simpson នេះក៏បានលេងអំពីបាតុភូតសូរ្យគ្រាស ហើយបន្ទាប់មកក៏បានលេចនូវបាតុភូតមួយទៀតគឺ ព្យុះព្រះអាទិត្យ បណ្តាលឲ្យដាច់ចរន្តអគ្គីសនីនិងអ៊ីនធើណែត បង្ករភាពចលាចលពេញពិភពលោកតាមរយៈខ្សែភាពយន្ត ហើយដូចទៅនឹងអ្វីដែលអ្នកវិទ្យាសាស្រ្តបានព្រមានកាលពីថ្មីៗនេះ។ ទោះជាយ៉ាងណាទាំងនេះគ្រាន់តែជាសាច់រឿង ចំណែកការពិតជាក់ស្តែងយ៉ាងណានោះ គឺមានតែរងចាំមើលទាំងអស់គ្នា នៅថ្ងៃទី៨ ខែមេសានេះ។

គួរបញ្ជាក់ថា សូរ្យគ្រាស គឺជាការដែលព្រះច័ន្ទ ដើរឆ្លងកាត់រវាងព្រះអាទិត្យនិងផែនដី ហើយនៅក្នុងរយៈពេលខ្លី វានឹងបិទមុខព្រះអាទិត្យទាំងស្រុង។ ខណៈនៅពេលដែលព្រះអាទិត្យត្រូវបានគ្របដណ្ដប់ដោយព្រះច័ន្ទទាំងស្រុង ភ្លាមនោះពន្លឺថ្ងៃដ៏ក្តៅចែស នឹងប្រែទៅជាពន្លឺយប់ងងឹតដ៏គួរឱ្យភ័យខ្លាច ក្នុងរយៈពេលត្រឹមតែប៉ុន្មានវិនាទីប៉ុណ្ណោះ។ មនុស្សម្នានឹងអាចមើលឃើញសូរ្យគ្រាសឆ្នាំ២០២៤ នេះនៅក្នុងតែប្រទេសម៉ិកស៊ិក សហរដ្ឋអាមេរិកនិង ភាគខាងកើតនៃប្រទេសកាណាដាប៉ុណ្ណោះ បើយោងតាមការការចេញផ្សាយរបស់អង្គការ NASA។

យ៉ាងណាមិញ ការព្រួយបារម្ភមួយទៀតបានលេចឡើងថា ការដែលមើលសូរ្យគ្រាសនេះ ដោយភ្នែកទទេរ គ្មានឧបករណ៍បច្ចេកទេសគ្រប់គ្រាន់ គឺអាចនឹងបណ្តាលឲ្យងងឹតភ្នែកមួយជីវិតផងដែរ៕

ប្រទេសរុស្ស៊ី ៖ មន្ត្រីក្រសួងការពារជាតិរុស្ស៊ីឱ្យដឹងថា ពលរដ្ឋរុស្ស៊ីបានមកចុះឈ្មោះធ្វើយោធា រហូតដល់ជាង១សែននាក់ បើគិតចាប់ពីខែមករា រហូតដល់ខែមីនា ឆ្នាំ២០២៤ ។ រីឯរយៈពេល១០ថ្ងៃ ក្រោយកើតហេតុការណ៍ បា.ញ់ នៅកន្លែងប្រគំតន្ត្រីក្នុងទីក្រុងមូស្គូ មានពលរដ្ឋរុស្ស៊ីមកចុះឈ្មោះធ្វើយោធា ចំនួន១ម៉ឺន៦ពាន់នាក់ ។

មន្ត្រីក្រសួងការពារជាតិរុស្ស៊ីបានបញ្ជាក់ក្នុងសេចក្តីថ្លែងការណ៍ កាលពីថ្ងៃទី៣ ខែមេសា ឆ្នាំ២០២៤ ថា ៖ «ក្នុងអំឡុងពេលសម្ភាសន៍រយៈពេល១សប្តាហ៍ នៅតាមទីក្រុងផ្សេងៗនៅប្រទេសរុស្ស៊ី គឺអ្នកមកចុះឈ្មោះធ្វើយោធាភាគច្រើនប្រាប់ថា ពួកគេចង់សងសឹកឱ្យអ្នកស្លាប់នៅកន្លែងប្រគំតន្ត្រី កាលពីថ្ងៃទី២២ ខែមីនា ឆ្នាំ២០២៤» ។

ហេតុការណ៍បាញ់ប្រហារនៅកន្លែងប្រគំតន្ត្រី Crocus City Hall នាពេលកន្លងមក បានធ្វើឱ្យមនុស្សស្លាប់មិនក្រោម១៤៤នាក់ ។ វាជាទង្វើរបស់ក្រុមប្រដាប់អាវុធរដ្ឋអីស្លាម (IS) ហើយពួកគេក៏បានប្រកាសថា នឹងទទួលខុសត្រូវចំពោះទង្វើរបស់ខ្លួន ។

ទោះយ៉ាងណា ប្រទេសរុស្ស៊ីនៅតែជឿថា ក្រុមជនបង្កហេតុនេះ គឺជាប់ពាក់ព័ន្ធនឹងប្រទេសអ៊ុយក្រែន ។ ប៉ុន្តែទីក្រុងកៀវរបស់អ៊ុយក្រែន បានបដិសេធយ៉ាងខ្លាំងថា មិនពាក់ព័ន្ធនឹងការបាញ់ប្រហារនេះទេ ខណៈសហរដ្ឋអាមេរិកនិយាយថា វាជាគំនិតឥតប្រយោជន៍ ។

ហេតុនេះ ប្រទេសរុស្ស៊ីត្រូវតែជ្រើសរើសកម្លាំងយោធាថ្មីជាបន្តបន្ទាប់ ដើម្បីបន្តគោលដៅធ្វើសង្គ្រាមនៅអ៊ុយក្រែន ។ សង្គ្រាមនេះបានអូសបន្លាយពេលអស់ជាច្រើនឆ្នាំ តាំងពីរុស្ស៊ីបានបើកឆាកឈ្លានពានអ៊ុយក្រែន កាលពីខែកុម្ភៈ ឆ្នាំ២០២២ ។

កាលពីឆ្នាំ២០២២ ប្រធានាធិបតីរុស្ស៊ី លោក វ៉្លាឌីមៀ ពូទីន ធ្លាប់បានបញ្ជាឱ្យជ្រើសរើសបុរសរុស្ស៊ីចូលបម្រើយោធា ចំនួន៣សែននាក់ ។ ប៉ុន្តែលើកនេះ មេដឹកនាំរុស្ស៊ីនិយាយថា វាពុំចាំបាច់ទេ ដោយសារមានមនុស្សជាច្រើននាក់ស្ម័គ្រចិត្តចុះឈ្មោះធ្វើយោធា ។

ផ្ទាំងឃោសនាបានសរសើរយោធារុស្ស៊ី ដែលស្ម័គ្រចិត្តទៅប្រយុទ្ធនឹងអ៊ុយក្រែនថា «ជាអ្នកស្នេហាជាតិ» និង «ជាវីរបុរស» ត្រូវបានគេយកទៅបិទនៅតាមទីក្រុងផ្សេងៗទូទាំងប្រទេសរុស្ស៊ី ។ ក្រៅពីនេះ ប្រទេសរុស្ស៊ីបានលើកទឹកចិត្តដល់អ្នកមកចុះឈ្មោះធ្វើយោធា ដោយការផ្តល់ប្រាក់ខែឱ្យខ្ពស់ជាងប្រាក់ខែការងារធម្មតា ។

ចំណែកលោក Sergei Shoigu រដ្ឋមន្ត្រីក្រសួងការពារជាតិរុស្ស៊ី បានលើកឡើងកាលពីខែមីនា ឆ្នាំ២០២៤ ថា ទីក្រុងមូស្គូ នឹងពង្រឹងកងកម្លាំងយោធាឱ្យកាន់តែរឹងមាំ នៅចុងឆ្នាំ២០២៤ នេះ ៕

ជាធម្មតាបើនិយាយអំពីពេជ្រ គឺវាពិតជាល្បីខ្លាំងណាស់ក្នុងការប្រើប្រាស់ជាគ្រឿងអលង្ការមានតម្លៃដូចជា ចិញ្ចៀន ខ្សែក ខ្សែដៃជាដើម ប៉ុន្តែតាមពិតទៅ ៨០ ភាគរយនៃគ្រាប់ពេជ្រទាំងអស់ ដែលគេជីកយកពីរ៉ែនៅជុំវិញពិភពលោក គឺត្រូវបានប្រើប្រាស់សម្រាប់វិស័យសិក្សាស្រាវជ្រាវ និងឧស្សហកម្មទៅវិញទេ ដោយសារតែពួកវាជាវត្ថុរឹងជាងគេបំផុតលើផែនដី។ ពេជ្រត្រូវគេនិយមប្រើប្រាស់សម្រាប់ការកាត់ សំលៀង ឬខួងត្ថុធាតុរឹងៗដទៃទៀត នៅក្នុងការងារឧស្សាហកម្ម និងស្រាវជ្រាវ ក្រៅពីការយកទៅច្នៃជាគ្រឿងអលង្ការ។ ដូច្នេះហើយ តើអ្នកដឹងទេថា ប្រទេសណាខ្លះដែលសម្បូរពេជ្រច្រើនជាងគេបំផុតនៅលើពិភពលោក?

១.ប្រទេសរុស្ស៊ី៖ ប្រទេសដ៏ធំមួយនេះអាចនិយាយបានថាជាកន្លែងស្តុកធនធានពេជ្រធំជាងគេលើលោក។ រុស្ស៉ីមានទីតាំងអណ្តូងរ៉ែចំហធំៗច្រើនជាង ១០ កន្លែង ដោយប្រទេសនេះបានចាប់ផ្តើមការជីករករ៉ែពេជ្រនៅឆ្នាំ ១៩៤៧ ហើយឥលូវជាប្រទេសសម្បូរពេជ្រច្រើនបំផុត និងជាប្រទេសដែលនាំចេញពេជ្រមិនទាន់ច្នៃក្នុងបរិមាណច្រើនជាងគេបំផុតលើលោកផងដែរ ដូច្នេះប្រទេសរុស្ស៊ីមានពេជ្រសរុបទាំងអស់ ៤១ លានការ៉ាត់។

២.ប្រទេសបុតស្វាណា៖ ក្នុងនាមជាប្រទេសផលិតពេជ្រច្រើនគេនៅទ្វីបអាហ្រ្វិក បុតស្វាណាឈរនៅលេខរៀងទី ២ លើពិភពលោក។ ចាប់តាំងតែពីទសវត្សឆ្នាំ ១៨៧០ មកគ្រាប់ពេជ្រមានគុណភាព និងតម្លៃខ្ពស់ ដែលអាចយកទៅច្នៃជាគ្រឿងអលង្ការបាន ភាគច្រើនបានមកពីទ្វីបអាហ្រិ្វកនេះឯង រួមទាំងដុំពេជ្រធំជាងគេលើលោកឈ្មោះថា ឃូលីណាន់ (Cullinan) ផងដែរ។ ការរុករកពេជ្របានចាប់ផ្តើមដំបូងនៅក្នុងប្រទេសបុតស្វាណា កាលពីទសវត្សឆ្នាំ ១៩៥០ ហើយវាមានលក្ខណៈជាប្រតិបត្តិការផ្លូវការនៅឆ្នាំ១៩៧១ ដូច្នេះគិតមកដល់ឆ្នាំ ២០២៤ នេះប្រទេសដែលស្ថិតក្នុងទ្វីបអាហ្រ្វិកនេះមានពេជ្រសរុបទាំងអស់ ២៤ លានការ៉ាត់។

៣.ប្រទេសកាណាដា៖ ការរុករកពេជ្រនៅកាណាដាបានចាប់ផ្តើមដំបូងនៅឆ្នាំ ១៩៩៨ ហើយអណ្តូងរ៉ែឈ្មោះ អីកាទី (Ekati) ជាអណ្តូងរ៉ែពេជ្រដែលបានធ្វើប្រតិបត្តិការដំបូងបង្អស់នៅក្នុងប្រទេសកាណាដា។ វាបានជួយត្រួសត្រាយផ្លូវឱ្យមានការបង្កើតអណ្តូងរ៉ែពេជ្រជាបន្តបន្ទាប់ទៀត ដែលរុញច្រានឱ្យកាណាដាក្លាយជាប្រទេសផលិតពេជ្រលំដាប់លេខ ៣ នាពេលបច្ចុប្បន្ន។ ហេតុនេះហើយប្រទេសកាណាដា មានពេជ្រសរុបទាំងអស់ ១៦ លានការ៉ាត់។

៤.ប្រទេសកុងហ្គោ៖ សាធារណរដ្ឋប្រជាធិបតេយ្យកុងហ្គោ (DRC) ជាប់ចំណាត់ថ្នាក់លេខ ៤ នៃប្រទេសកំពូលៗខាងផលិតពេជ្រ។ ក្នុងប្រទេសអាហ្រ្វិកមួយនេះ មានក្រុមហ៊ុនរុករកពេជ្រផ្លូវការតែមួយប៉ុណ្ណោះ ដែលជាការសហការរវាងរដ្ឋាភិបាល និងក្រុមហ៊ុនមួយរបស់ប៊ែលហ្ស៉ិក។ កាលពីឆ្នាំ ២០១៨ ការផលិតពេជ្រនៅក្នុងប្រទេសកុងហ្គោមានចំនួនជិត ១៦.៤ លានការ៉ាត់ ដែលគិតជាតម្លៃស្មើនឹង ១៣៦.‌១ លានដុល្លារអាមេរិក។ ទោះជាយ៉ាងណា គិតមកដល់ឆ្នាំ ២០២៤ នេះបរិមាណពេជ្រនៅក្នុងប្រទេសនេះបានធ្លាក់ចុះសល់ត្រឹមតែ ៩ លានការ៉ាត់ប៉ុណ្ណោះ៕

សហរដ្ឋអាមេរិក៖ ក្រុមហ៊ុន Apple ត្រូវបានគេនិយាយថាកំពុងបង្កើតគំរូមនុស្សយន្ត AI ដើម្បីជួយកិច្ចការងារផ្ទះរបស់មនុស្ស បន្ទាប់ពីគម្រោងផលិតរថយន្តបើកបរដោយខ្លួនឯងរយៈ ១០ ឆ្នាំត្រូវបានបរាជ័យ។
យោងតាមទីភ្នាក់ងារព័ត៌មាន Bloomberg បានឱ្យដឹងថា បច្ចុប្បន្នក្រុមហ៊ុន Apple កំពុងស្ថិតក្នុងដំណាក់កាលដំបូងនៃការបង្កើតមនុស្សយន្តប្រភេទថ្មី ដើម្បីបម្រើគ្រួសារ ដែលត្រូវបានគេចាត់ទុកថាជាគម្រោងទី ៣ របស់ក្រុមហ៊ុន បន្ទាប់ពីផលិតផលដែលបានបង្កើតឡើងដូចជា iPhone និង iPad ។ មនុស្សយន្តនេះត្រូវបានបំពាក់ដោយអេក្រង់ និងកាមេរ៉ា ហើយអាចតាមដានអ្នកប្រើប្រាស់នៅក្នុង និងជុំវិញផ្ទះ។

ប្រភពដដែលបាននិយាយទៀតថា មនុស្សយន្តនេះនឹងទទួលខុសត្រូវក្នុងការត្រួតពិនិត្យ ផ្តល់ព័ត៌មាន ឬផ្តល់ការព្រមាន ប្រសិនបើរកឃើញថាសមាជិកគ្រួសារស្ថិតក្នុងគ្រោះថ្នាក់។ អេក្រង់នៅលើឧបករណ៍អាចជំនួស iPhone ឬ iPad ដើម្បីធ្វើការហៅតាម FaceTime ប៉ុន្តែនឹងមានមុខងារជាច្រើនទៀត ដូចជាការពង្រីកលើមនុស្សជាក់លាក់នៅក្នុងហ្វូងមនុស្សជាដើម។ ដូច្នេះការបង្កើតមនុស្សយន្តធ្វើឡើងនៅក្នុងវិស្វកម្មផ្នែករឹង និងក្រុម AI ដែលគ្រប់គ្រងដោយនាយក John Giannandrea។

ព័ត៌មានអំពីក្រុមហ៊ុន Apple បង្កើតមនុស្សយន្តលេចឡើងក្នុងបរិបទដែលក្រុមហ៊ុនកំពុងប្រឈមមុខនឹងការលំបាកជាច្រើនចាប់តាំងពីដើមឆ្នាំមក នៅពេលដែលការលក់ iPhone ធ្លាក់ចុះនៅក្នុងប្រទេសចិន ក៏ដូចជាត្រូវបង់ប្រាក់ពិន័យជិតពីរពាន់លានដុល្លារនៅអឺរ៉ុប និងបណ្តឹងប្រឆាំងការទុកចិត្តពីនាយកដ្ឋានសហរដ្ឋអាមេរិក។ កាលពីដើមឆ្នាំនេះ ក្រុមហ៊ុនក៏បានបោះបង់ចោលនូវមហិច្ឆតារថយន្តបើកបរដោយខ្លួនឯងរយៈពេល ១០ ឆ្នាំ ដើម្បីផ្លាស់ប្តូរការផ្តោតអារម្មណ៍របស់ខ្លួនទៅលើការកសាងផលិតផល AI វិញ។

យោងតាម Business Insider ការផលិតមនុស្សយន្តនៅផ្ទះត្រូវបានគេមើលឃើញថាជាកិច្ចខិតខំប្រឹងប្រែងសម្រាប់ Apple ក្នុងការបង្កើនផលប័ត្រផលិតផលរបស់ខ្លួន។ ប្រភពខ្លះនិយាយថាក្រុមហ៊ុនបានចាប់ផ្តើមស្រាវជ្រាវមនុស្សយន្ត AI នេះតាំងពីឆ្នាំ ២០១៩ មកម្លេះ។ ហើយក្រុមហ៊ុនក៏ត្រូវបានគេនិយាយថានឹងផ្តោតតែលើគំនិតមនុស្សយន្តមួយចំនួនដែលមានមុខងារកំណត់បន្ថែមទៀត ដូចជាការលាងចាន ឬការហៅជាវីដេអូជាដើម។

គួរបញ្ជាក់ដែរថា មនុស្សយន្តគ្រួសារមិនមែនជាផលិតផលថ្មីទេ ក្រុមហ៊ុនជាច្រើននៅជុំវិញពិភពលោកបាននិងកំពុងអភិវឌ្ឍវាជាយូរមកហើយ។ ក្នុងឆ្នាំ ២០២១ Amazon ធ្លាប់បានណែនាំមនុស្សយន្តដែលមានឈ្មោះថា Astro ក្នុងតម្លៃ ១,៦០០ ដុល្លារ ប៉ុន្តែដំណើរការផលិតកម្មមានកម្រិត ហើយវាមិនទាន់ចេញលក់នៅលើទីផ្សារនៅឡើយទេ។ មនុស្សយន្តដែលពេញនិយមបំផុតសម្រាប់គេហដ្ឋានគឺ Roomba ដែលបានបង្ហាញខ្លួនកាលពី ២ ទសវត្សរ៍មុន៕