តារាចម្រៀង នេន ទុំ បានសហការជាមួយលោក ព្រហ្ម ម៉ាញ ម្តងទៀតមុនសិល្បករអាយ៉ៃជើងចាស់រូបនេះចូលនិវត្តន៍។ បទចម្រៀងថ្មីនេះបានយកសិល្បៈអាយ៉ៃ និង ភ្លេងសម័យ លាយបញ្ជូនគ្នាយ៉ាងល្អឯក រួមជាមួយ Melody ជួនគ្នាយ៉ាងគួរឱ្យសរសើរ។ ទស្សនិកជនក៏សម្លឹងមើលឃើញថាខ្សែកដែលលោកព្រហ្ម ម៉ាញ ពាក់ជារូបបណ្តោងផែនទីរបស់ប្រទេសកម្ពុជា។ ជាមួយការសរសើរយ៉ាងច្រើនលើសលប់អ្នកមួយចំនួនក៏បានបញ្ចេញមតិដែរថាប្រសិនជាយកពាក្យ «ឪពុក» ជំនួស ពាក្យ «ប៉ា» ទៀតកាន់តែប្រសើរ។
គេចាំបានថាលោក នេន ទុំ និងលោក ព្រហ្ម ម៉ាញ សិល្បករជើងចាស់ដ៏ល្បីល្បាញបានសហការចេញបទចម្រៀងលើទីផ្សាររួចមកហើយទៅលើបទចម្រៀងមានចំណងជើងថា «ពូក្មួយចង់បានប្រពន្ធ»ក្នុងឆ្នាំ២០២១ មានការចូលស្តាប់ជាង៦លានដងលើឆាណែលយូធូប Boty Pen និងបទ « តុងទីនវ័ណ្ឌក»ក្នុងឆ្នាំ២០២២ ជាចម្រៀងក្នុងរឿង «លោកគ្រូប្រពន្ធល្អ» ដែលមានលោកព្រហ្ម ម៉ាញ បានដើរជាតួឯក។ បទចម្រៀងទាំងពីរបទនេះរបស់លោក នេនទុំ សហការជាមួយសិល្បករជើងចាស់ លោក ព្រហ្ម ម៉ាញ សុទ្ធតែទទួលបានការគាំទ្រពីទស្សនិកជន។
ក្នុងឆ្នាំ២០២៤ នេះដែរពោលគឺថ្មីៗនេះតែម្តងលោក នេន ទុំ បានអន្រួនចិត្តលោក ព្រហ្ម ម៉ាញ ចេញបទចម្រៀងមួយបទទៀតមុនលោកចូលនិវត្តន៍។ បទថ្មីរបស់សិល្បករទាំងពីរមានចំណងជើងថា «នែ៎! កូន» និងបានទម្លាក់ជាផ្លូវការនៅលើឆាណែលរបស់ នេន ទុំ ផ្ទាល់នាថ្ងៃទី៣ ខែមេសា ឆ្នាំ២០២៤។ បទចម្រៀងថ្មីនេះបានយកសិល្បៈអាយ៉ៃ និង ភ្លេងសម័យ លាយបញ្ជូនគ្នាយ៉ាងល្អឯក រួមជាមួយ Melody ជួនគ្នាយ៉ាងគួរឱ្យសរសើរ។ ចំណែកឯលោកព្រហ្ម ម៉ាញ បានពាក់ខ្សែកបណ្តោងរូបផែនទីរបស់ប្រទេសកម្ពុជាផងដែរ។
មុននឹងទម្លាក់បទចម្រៀងផ្លូវការ ឃើញថាសន្ទុះនៃការគាំទ្រពីមហាជនទៅកាន់លោក ព្រហ្ម ម៉ាញ និង លោក នេន ទុំ មានការចូលរួមលើកទឹកចិត្តនូវស្នាដៃមួយនេះយ៉ាងខ្លាំងដែលមានការលាយបញ្ជូនសិល្បៈបុរាណ និងសិល្បៈសម័យ។
ជាមួយនឹងការគាំទ្រយ៉ាងច្រើនលើសលប់ ក៏មានមតិមួយចំនួនបានចូលទៅខម្មិនក្នុងន័យកែលម្អដែរថាប្រសិនជា បទ «នែ៎! កូន» ប្តូរពីពាក្យ «ប៉ា» ទៅ «ឪពុក» រិតតែប្រសើរព្រោះពាក្យនេះស្តាប់ទៅពីរោះជាងនិងសមសួនថែមទៀត៕
