ប្រទេសថៃ ៖ មន្ត្រីមកពីមន្ទីរការងារប្រចាំខេត្តប៉ាធុមថានី សហការជាមួយប៉ូលិសអន្តោប្រវេសន៍ បានចាប់ខ្លួនជនបរទេសចំនួន២០នាក់ ក្នុងនោះមានជនជាតិខ្មែរ និងមីយ៉ាន់ម៉ា ដោយសារបើកហាងលក់ទុរេននៅប្រទេសថៃខុសច្បាប់ ។ អាជ្ញាធរលើកឡើងថា ជនបរទេសទាំងនេះធ្វើការហួសពីសិទ្ធិរបស់ខ្លួន ហើយពួកគេបានឈរបក់ដៃហៅអតិថិជនមកទិញទុរេន និងលក់ទុរេនលើសពីតម្លៃជាក់ស្តែង ។

កាលពីថ្ងៃទី៤ ខែមេសា ឆ្នាំ២០២៤ លោកស្រី Kotchaphon Rangkuphan មន្ត្រីជំនាញផ្នែកស្វែងរកការងារប្រចាំខេត្តប៉ាធុមថានី បានសហការជាមួយប៉ូលិសអន្តោប្រវេសន៍ខេត្តប៉ាធុមថានី, មន្ត្រីនាយកដ្ឋានការងារ និងមន្ត្រីស៊ើបអង្កេតខេត្តប៉ាធុមថានី ដឹកនាំកម្លាំងអាជ្ញាធរចុះត្រួតពិនិត្យ និងចាប់ខ្លួនជនបរទេស ដែលជាម្ចាស់ហាងលក់ទុរេនក្នុងផ្សារលក់ផ្លែឈើ «អៃយ៉ារ៉ា» ស្ថិតនៅឃុំខ្លងសង ស្រុកខ្លងលួង ខេត្តប៉ាធុមថានី ។

អាជ្ញាធរថៃបានចាប់ខ្លួនជនបរទេសចំនួន២០នាក់ និងបញ្ជូនទៅការិយាល័យប៉ូលិសអន្តោប្រវេសន៍នៅខេត្តប៉ាធុមថានី ក្រោយពីទទួលបានពាក្យបណ្តឹងពីពលរដ្ឋ ដែលទៅទិញទុរេន និងផ្លែឈើយកទៅបរិភោគ ប៉ុន្តែត្រូវបានអ្នកលក់ដើរខ្សែលើ និងលក់ទុរេនក្នុងតម្លៃខ្ពស់ ។ អ្នកទិញទុរេនប្រាប់ថា ខ្លួនត្រូវគេតម្រូវឱ្យស្កេន QR Code ដើម្បីទូទាត់ថ្លៃផ្លែឈើទៅឱ្យម្ចាស់ហាងជាជនបរទេស ។

លោកស្រី Kotchaphon Rangkuphan មន្ត្រីជំនាញផ្នែកស្វែងរកការងារប្រចាំខេត្តប៉ាធុមថានី និយាយថា ភ្នាក់ងារបានជូនដំណឹងមកអ្នកស្រីថា នៅផ្សារលក់ផ្លែឈើ «អៃយ៉ារ៉ា» មានជនបរទេសមកបើកហាងលក់ទុរេនដោយខ្លួនឯង ដែលវាជាទង្វើខុសច្បាប់នៅប្រទេសថៃ ។ ដូច្នេះ លោកស្រីក៏បានសហការជាមួយមន្ត្រីពាក់ព័ន្ធចុះត្រួតពិនិត្យ និងចាប់ខ្លួនជនបរទេសទាំងនេះ ។ ក្នុងអំឡុងពេលចុះត្រួតពិនិត្យនោះ អាជ្ញាធរបានឃើញពួកគេកំពុងតែឈរហៅម៉ូយឱ្យទិញទុរេននៅមុខតូប ។

ហេតុនេះ អាជ្ញាធរបានសុំត្រួតពិនិត្យឯកសារផ្សេងៗ ដូចជា ៖ លិខិតឆ្លងដែន និងប័ណ្ណអនុញ្ញាតធ្វើការជនបរទេស ដែលអនុញ្ញាតដោយក្រសួងការងារថៃ ។ តាមរយៈការត្រួតពិនិត្យឃើញថា ពួកគេគ្មានលិខិតអនុញ្ញាតធ្វើការទេ រីឯអ្នកខ្លះទៀតមានថៅកែផ្សេង ប៉ុន្តែមកធ្វើការនៅខេត្តប៉ាធុមថានី ។ ដូច្នេះ ជនបរទេសទាំងនេះធ្វើការហួសពីសិទ្ធិរបស់ខ្លួន ។

ក្នុងអំឡុងពេលការចុះត្រួតពិនិត្យក្នុងផ្សារលក់ទុរេន អាជ្ញាធរបញ្ជាក់ថា មានជនជាតិខ្មែរ និងមីយ៉ាន់ម៉ា ឈរលក់ទុរេនស្ទើរគ្រប់កន្លែង ហើយអាជ្ញាធរបានចាប់ខ្លួនជនបរទេសសរុបជាង២០នាក់ ។ ជំហានដំបូង អាជ្ញាធរនឹងបញ្ជូនពួកគេទៅការិយាល័យប៉ូលិសអន្តោប្រវេសន៍នៅខេត្តប៉ាធុមថានី បន្ទាប់មក នឹងបញ្ជូនពួកគេទៅកាន់ស្ថានីយប៉ូលិសស្រុកខ្លងលួង ដើម្បីចាត់វិធានការតាមច្បាប់បន្តទៀត ៕

បរទេស៖ ក្នុងរយៈពេល ៣ ខែដំបូងនៃឆ្នាំ ២០២៤ ការងើបឡើងវិញនៃតម្លៃបន្ទះឈីបអង្គចងចាំ semiconductor បានជួយឱ្យក្រុមហ៊ុន Samsung Electronics ទទួលបានប្រាក់ចំណេញជិត ៤.៩ ពាន់លានដុល្លារអាមេរិក នេះបើយោងតាម Money Control ដែលបានចុះផ្សាយនៅថ្ងៃទី៥ ខែមេសា។
ក្រុមហ៊ុនអេឡិចត្រូនិកយក្សរបស់កូរ៉េ Samsung Electronics បានប្រកាសកាលពីពេលថ្មីៗនេះថា ប្រាក់ចំណេញនៅត្រីមាសទីមួយរបស់ខ្លួនបានឈានដល់ ៦,៦០០ លានវ៉ុន (ប្រមាណ ៤.៨៩ ពាន់លានដុល្លារអាមេរិក) ដែលចំនួននេះបានកើនឡើងច្រើនជាង ១០ ដងធៀបនឹង ៦៤០ ពាន់លានវ៉ុនក្នុងរយៈពេលដូចគ្នាកាលពីឆ្នាំមុន។ ហេតុផលគឺដោយសារតែការងើបឡើងវិញនៃតម្លៃបន្ទះឈីបដែលទាញប្រាក់ចំណេញរបស់ក្រុមហ៊ុនកើនឡើង។

កាលពីឆ្នាំមុន តម្រូវការបន្ទះឈីបបានធ្លាក់ចុះនៅទូទាំងពិភពលោក ដែលបណ្តាលឱ្យស្តុកកើនឡើង។ នៅក្នុងត្រីមាសទីមួយនៃឆ្នាំ ២០២៣ ផ្នែកបន្ទះឈីបអង្គចងចាំរបស់ក្រុមហ៊ុន Samsung Electronics បានបាត់បង់រហូតដល់ ៤,៥៨០ ពាន់លានវ៉ុន (ប្រហែល ៣.៤ ពាន់លានដុល្លារ) ដោយផ្នែកនេះត្រូវបានគេចាត់ទុកថាជា “ស៊ុតមាស” សម្រាប់ Samsung ។ នៅឆ្នាំ ២០២១ ពួកគេបានវ៉ាដាច់ Intel ដើម្បីក្លាយជាក្រុមហ៊ុនផលិតបន្ទះឈីប semiconductor ដែលមានប្រាក់ចំណូលខ្ពស់បំផុតនៅទូទាំងពិភពលោក។ ដូច្នេះបច្ចុប្បន្ន Samsung គឺជាក្រុមហ៊ុនផលិតបន្ទះឈីប និងទូរទស្សន៍ដ៏ធំបំផុតរបស់ពិភពលោក។

ទោះជាយ៉ាងណាតួលេខខាងលើនេះគ្រាន់តែជាការប៉ាន់ប្រមាណនោះទេ ដោយបច្ចុប្បន្នវិនិយោគិនកំពុងរង់ចាំរបាយការណ៍លទ្ធផលអាជីវកម្មផ្លូវការដែលនឹងប្រកាសក្នុងខែនេះ។ ពួកគេចង់មើលថាតើអាជីវកម្មបន្ទះឈីប semiconductor ត្រឡប់ទៅរកប្រាក់ចំណេញបានដែរឬទេ ខណៈដែលផ្នែកដំណោះស្រាយឧបករណ៍របស់ Samsung រួមទាំងបន្ទះឈីបអង្គចងចាំ បានបាត់បង់ប្រាក់ចំនួន ៤ ត្រីមាសជាប់ៗគ្នានៅចុងឆ្នាំ ២០២៣។

ទោះជាយ៉ាងណាក៏ដោយ ផ្នែកបន្ទះឈីបនេះកំពុងងើបឡើងវិញបន្តិចម្តងៗ ដោយក្រុមអ្នកវិភាគបាននិយាយថា Samsung Electronics នៅពីក្រោយគូប្រជែងដូចជា SK Hynis និង Micron Technology តែប៉ុណ្ណោះក្នុងការប្រណាំងសម្រាប់អង្គចងចាំកម្រិតបញ្ជូនខ្ពស់ (HBM) ដែលជាសមាសធាតុស្នូលនៅក្នុង AI chip fever ។ ដូច្នេះហើយ ប្រសិនបើក្រុមហ៊ុនធ្វើការផ្លាស់ប្តូរដើម្បីតាមទាន់ដៃគូប្រកួតប្រជែងនៅក្នុងផ្នែកនេះ វិនិយោគិននឹងយកចិត្តទុកដាក់បន្ថែមទៀតចំពោះពួកគេ ហើយបច្ចុប្បន្នភាគហ៊ុនរបស់ក្រុមហ៊ុន Samsung Electronics បានកើនឡើង ៥% នៅក្នុងត្រីមាសទីមួយនៃឆ្នាំនេះ៕

ប្រទេសចិន ៖ សារព័ត៌មានហុងកុងរាយការណ៍ថា អ្នកជំងឺប្រុសម្នាក់ អាយុ៣៧ឆ្នាំ មានស្ថានភាពធ្ងន់ធ្ងរ និងបានព្យាបាលនៅមន្ទីរពេទ្យ ក្រោយពីអ្នកជំងឺរូបនេះត្រូវបានស្វាខាំនៅសួនច្បារមួយកន្លែងក្នុងទីក្រុងហុងកុង ។ ក្រោយស្វាខាំរួចមក បុរសខាងលើបានឆ្លងជំងឺម្យ៉ាងឈ្មោះ B Virus (ឬ Monkey B) និងធ្វើឱ្យបុរសនេះក្លាយជាមនុស្សដំបូងគេនៅទីក្រុងហុងកុង ដែលបានឆ្លងជំងឺ B Virus ។

គេបានបញ្ជូនបុរសនេះទៅកាន់មន្ទីរពេទ្យមួយកន្លែង កាលពីថ្ងៃទី២១ ខែមីនា ឆ្នាំ២០២៤ ក្រោយពីមានរោគសញ្ញាក្តៅខ្លួន និងបាត់បង់ស្មារតី ។ រីឯក្រុមគ្រួសាររបស់អ្នកជំងឺ និយាយថា អ្នកជំងឺត្រូវបានស្វាខាំ កាលពីចុងខែកុម្ភៈ ឆ្នាំ២០២៤ ដោយសារអ្នកជំងឺបានឡើងលើភ្នំនៅបរិវេណ Kam Shan Country Park ដែលជាតំបន់សម្បូរស្វា ។

មុននេះ មានសេចក្តីរាយការណ៍ថា មានមនុស្សត្រូវស្វាខាំរហូតដល់ឆ្លងមេរោគនៅសហរដ្ឋអាមេរិក, កាណាដា, ជប៉ុន និងចិន ។ ប៉ុន្តែករណីរបស់បុរសហុងកុង ចាត់ទុកថា វាជាករណីដំបូងគេដែលកើតឡើងនៅហុងកុង ដែលមានអ្នកឆ្លងជំងឺចម្លែកបណ្តាលមកពីស្វាខាំ ។ ហេតុនេះ វានឹងធ្វើឱ្យប៉ះពាល់ដល់ខួរក្បាល និងអាចមានគ្រោះថ្នាក់រហូតដល់ស្លាប់ ។

ស្ថាប័នពាក់ព័ន្ធនៅទីក្រុងហុងកុង បានស៊ើបអង្កេតករណីដែលកើតឡើងនេះ ព្រមទាំងប្រកាសឱ្យសាធារណជនប្រុងប្រយ័ត្នចំពោះគ្រោះថ្នាក់ដោយសារសត្វស្វា ។ ពួកគេបានដាស់តឿនពលរដ្ឋហាមប៉ះពាល់ ឬផ្តល់ចំណីឱ្យស្វាព្រៃជាដាច់ខាត ពីព្រោះអាចបណ្តាលឱ្យឆ្លងមេរោគពីស្វា ។ បើអ្នកណាម្នាក់មានដំបៅដោយសារស្វាខាំ ឬត្រូវស្វាធ្វើបាប ត្រូវតែប្រញាប់ទៅព្យាបាលជាបន្ទាន់ ។

ជាទូទៅ គេបានរកឃើញមេរោគ B Virus នៅក្នុងទឹកមាត់, ទឹកនោម និងលាមករបស់ស្វាពូជ Macaque ដែលពូជស្វានេះបានរស់នៅច្រើននៅហុងកុង ។ រីឯអ្នកឆ្លងមេរោគ B Virus នឹងមានរោគសញ្ញាគ្រុនក្តៅ បន្ទាប់មក មេរោគនឹងឆ្លងទៅកាន់ផ្នែកផ្សេងៗនៃរាងកាយ ហើយវាយលុកប្រព័ន្ធប្រសាទផ្នែកកណ្តាល ដែលបំពេញតួនាទីគ្រប់គ្រងប្រព័ន្ធប្រសាទ ៕

ប្រទេសកាណាដា ៖ សារព័ត៌មានបរទេសរាយការណ៍ថា នៅដើមខែមេសា ឆ្នាំ២០២៤ ប្រទេសកាណាដាបានសាកល្បងគម្រោងថ្មីឈ្មោះ «Pedestrian Brick Crossing System» ដោយឱ្យអ្នកថ្មើជើងកាន់ដុំឥដ្ឋនៅពេលពួកគេដើរឆ្លងផ្លូវ និងលើកឥដ្ឋថ្នមៗឱ្យរថយន្តបន្ថយល្បឿន ។ ការធ្វើបែបនេះ គឺដើម្បីឱ្យអ្នកបើកបររថយន្តយល់ដឹងអំពីសុវត្ថិភាពរបស់អ្នកថ្មើជើង ។

នៅពេលអ្នកថ្មើជើងកាន់ដុំឥដ្ឋដើរឆ្លងផ្លូវឃើញថា រថយន្តទាំងឡាយបានឈប់ឱ្យពួកគេឆ្លងផ្លូវយ៉ាងស្រួល ពីព្រោះអ្នកបើកបររថយន្ត និងម៉ូតូនៅទីក្រុង Vancouver ចូលចិត្តបើកបរក្នុងល្បឿនលឿន ជាពិសេស នៅចំណុចគំនូសសញ្ញាកាត់ទទឹងផ្លូវ ហើយវាអាចបង្កគ្រោះថ្នាក់ដល់អ្នកថ្មើជើងផងដែរ ។

នៅថ្ងៃ April’s Fools Day (ឬទិវាកុហកពិភពលោក) ស្ថាប័នមិនស្វែងរកប្រាក់ចំណេញឈ្មោះ Vision Zero Vancouver មានទីតាំងនៅទីក្រុង Vancouver បានបង្ហាញពីដំណោះស្រាយគួរឱ្យអស់សំណើចមួយក្នុងបណ្តាញសង្គម X (ឬ Twitter) ដើម្បីដោះស្រាយបញ្ហាអ្នកបើកបររថយន្តនៅតាមផ្លូវពុំព្រមបន្ថយល្បឿនរថយន្តឱ្យអ្នកថ្មើជើងឆ្លងផ្លូវនៅលើគំនូសសញ្ញាកាត់ទទឹងផ្លូវ ។

នៅពេលឆ្លងផ្លូវ អ្នកថ្មើជើងត្រូវកាន់ឥដ្ឋស្នោ ដែលដូចគ្នានឹងឥដ្ឋពិតប្រាកដ ហើយក្រោយការសាកល្បងឃើញថា ពលរដ្ឋកាណាដាគាំទ្រគំនិតនេះ ។ អ្នកបើកបរយានជំនិះនឹងចាប់អារម្មណ៍អ្នកថ្មើជើង និងធានាថា ការឆ្លងផ្លូវដ៏ពិបាក នឹងងាយស្រួលជាងមុន ហើយគ្មានជម្លោះកើតឡើង ។

ចំពោះលក្ខខណ្ឌកាន់ដុំឥដ្ឋឆ្លងផ្លូវនេះ ត្រូវអនុវត្តតាម៤ចំណុច រួមមាន ៖
១-«ចាប់ដុំឥដ្ឋ» នៅពេលចង់ឆ្លងផ្លូវ ត្រូវចាប់ដុំឥដ្ឋ១ដុំ
២-«សម្លឹង» សម្លឹងឆ្វេង-ស្តាំ មុនពេលឆ្លងផ្លូវ
៣-«លើកដៃជាសញ្ញា» លើកដុំឥដ្ឋឡើងលើក្នុងអំឡុងពេលឆ្លងផ្លូវ និង
៤-«ឆ្លងផ្លូវ» ដើរឆ្លងផ្លូវ និងសម្លឹងទៅយានជំនិះដើម្បីផ្តោតលើអ្នកបើកបរ ហើយពេលឆ្លងផ្លូវរួច ត្រូវទុកឥដ្ឋនៅចំណុចផ្លូវម្ខាងទៀត

បើទោះជាដុំឥដ្ឋទាំងនេះជាឥដ្ឋស្នោក្តី ប៉ុន្តែលទ្ធផលដែលទទួលបាន គឺលើសពីការរំពឹងទុក ពីព្រោះការកាន់ឥដ្ឋបានធ្វើឱ្យយានជំនិះជាច្រើនព្រមបន្ថយល្បឿនឱ្យអ្នកថ្មើជើង ។ វាជាគម្រោងសម្រាប់បង្កើតបរិយាកាសរីករាយដល់អ្នកធ្វើដំណើរគ្រប់រូប និងមិនបង្កអំពើហិង្សា ព្រមទាំងចង់ឱ្យអ្នកបើកបរយានជំនិះទាំងអស់គិតពីសុវត្ថិភាពអ្នកថ្មើជើង ។

Vancouver គឺជាទីក្រុងធំលំដាប់ទី៣ របស់ប្រទេសកាណាដា ដែលអ្នកបើកបរយានជំនិះមិនសូវចាប់អារម្មណ៍នឹងអ្នកឆ្លងផ្លូវ ឬមិនបន្ថយល្បឿននៅចំណុចគំនូសសញ្ញាកាត់ទទឹងផ្លូវ ។ ពេលខ្លះ អ្នកបើកបរយានជំនិះទាំងនេះធ្វើពុតជាមើលមិនឃើញថា មានអ្នករង់ចាំឆ្លងផ្លូវ ។ បើទោះជាគម្រោងថ្មីនេះបានអនុវត្តនៅខែមេសា ក្នុងថ្ងៃ April’s Fools Day ប៉ុន្តែគេបានទទួលគំនិតថា គ្រប់គ្នាគួរតែដើរឆ្លងផ្លូវដោយសុវត្ថិភាព និងពុំចាំបាច់ប្រើប្រាស់វិធីកាន់ដុំឥដ្ឋ ៕

ជប៉ុន៖ បើយោងតាមការសិក្សាស្រាវជ្រាវថ្មីៗពីសាកលវិទ្យាល័យ Tokohu បានបង្ហាញថាប្រជាជនជប៉ុនអាចមាននាមត្រកូល Sato ដូចគ្នានៅឆ្នាំ ២៥៣១ ប្រសិនបើប្រទេសនេះមិនផ្លាស់ប្តូរច្បាប់ស្តីពីការផ្លាស់ប្តូរនាមត្រកូលនៅពេលរៀបការ។
នៅថ្ងៃទី៤ ខែមីនា យោងតាម BBC បានឱ្យដឹងថា ការស្រាវជ្រាវថ្មីនេះធ្វើឡើងដោយសាស្ត្រាចារ្យផ្នែកសេដ្ឋកិច្ច Hiroshi Yoshida នៃសាកលវិទ្យាល័យ Tokohu បានព្យាករណ៍ថា ប្រសិនបើប្រទេសជប៉ុននៅតែបន្តរក្សាលក្ខខណ្ឌដែលប្រពន្ធត្រូវប្តូរទៅជានាមត្រកូលរបស់ប្តីនៅពេលរៀបការនៅឆ្នាំ ២៥៣១ ប្រជាជនជប៉ុនទាំងអស់នឹងមានឈ្មោះដូចគ្នាគឺ សាតូ។

Sato គឺជានាមត្រកូលសាមញ្ញបំផុតនៅក្នុងប្រទេសជប៉ុនដែលមានមនុស្ស ១.៨៦ លាននាក់កាន់នាមត្រកូលនេះ (ស្មើនឹង ១.៥% នៃចំនួនប្រជាជន) ខណៈដែលនាមត្រកូល Suzuki ស្ថិតនៅលំដាប់ទីពីរដែលមានសមាជិក ១.៧៧ លាននាក់។ សាស្រ្តាចារ្យ Yoshida បានសារភាពថាការព្យាករណ៍នេះគឺផ្អែកលើការសន្មត់មួយចំនួន ប៉ុន្តែគាត់បាននិយាយថា លេខនេះត្រូវបានបោះពុម្ពដើម្បីឆ្លុះបញ្ចាំងពីផលប៉ះពាល់សក្តានុពលនៃបទប្បញ្ញត្តិការផ្លាស់ប្តូរនាមត្រកូលលើសង្គមជប៉ុន។ យោងតាមក្រមរដ្ឋប្បវេណីដែលបានបង្កើតឡើងនៅចុងទសវត្សរ៍ឆ្នាំ ១៨០០ គូស្នេហ៍ជនជាតិជប៉ុនទាំងអស់ត្រូវតែមាននាមត្រកូលដូចគ្នា ដោយបង្ខំឱ្យមនុស្សម្នាក់បោះបង់ចោលនាមត្រកូលចាស់របស់ខ្លួន។

លោកបានព្រមានថា ប្រសិនបើប្រជាជនជប៉ុនទាំងអស់មាននាមត្រកូល Sato មនុស្សនឹងត្រូវហៅគ្នាតាមលេខដូចជា “Sato 1”, “Sato 2” នៅពេលទំនាក់ទំនង។ យោងតាមការគណនារបស់គាត់សមាមាត្រនៃប្រជាជនជប៉ុនដែលមាននាមត្រកូល Sato នឹងកើនឡើង ១.០០៨៣ ដងក្នុងរយៈពេលមួយឆ្នាំគិតត្រឹមឆ្នាំ ២០២២-២០២៣។ ប្រសិនបើច្បាប់ស្តីពីនាមត្រកូលនៅតែមិនផ្លាស់ប្តូរទេនោះ ច្បាស់ណាស់នៅថ្ងៃខាងមុខប្រហែលពាក់កណ្តាលនៃប្រជាជនជប៉ុននឹងមាននាមត្រកូល Sato នៅឆ្នាំ ២៤៤៦ ហើយកើនឡើងដល់ ១០០% នៅឆ្នាំ ២៥៣១។

សាស្ត្រាចារ្យព្រមានថា “ប្រទេសជប៉ុននិងក្លាយជាប្រទេសសាតូដោយសារប្រជាជននាពេលអនាគតសុទ្ធតែមាននាមត្រកូលនេះដូចគ្នា” មិនត្រឹមតែមានភាពរអាក់រអួលប៉ុណ្ណោះទេ ថែមទាំងប៉ះពាល់ដល់អត្តសញ្ញាណផ្ទាល់ខ្លួនរបស់មនុស្សម្នាក់ៗ ក៏ដូចជាក្រុមគ្រួសារ និងបេតិកភណ្ឌក្នុងតំបន់ទៀតផង។ ប្រទេសជប៉ុន គឺជាប្រទេសតែមួយគត់ដែលមានច្បាប់តម្រូវឱ្យប្តីប្រពន្ធប្រើនាមត្រកូលដូចគ្នា។ ដូច្នេះ ៩៥% នៃស្ត្រីនៅក្នុងប្រទេសនេះត្រូវតែប្តូរនាមត្រកូលរបស់នាងឱ្យដូចនាមត្រកូលប្តីបន្ទាប់ពីរៀបការ។

ទោះជាយ៉ាងណា បច្ចុប្បន្នប្រជាជនជប៉ុនកាន់តែច្រើនឡើងកំពុងស្នើសុំឱ្យរដ្ឋាភិបាលផ្លាស់ប្តូរច្បាប់ដើម្បីអនុញ្ញាតឱ្យប្តីប្រពន្ធរក្សានាមត្រកូលរបស់ពួកគេរៀងៗខ្លួន។ រដ្ឋាភិបាលជប៉ុនបានអនុញ្ញាតឱ្យមនុស្សសរសេរនាមត្រកូលចាស់ និងថ្មីនៅលើលិខិតឆ្លងដែន ប័ណ្ណបើកបរ និងឯកសារស្នាក់នៅ ប៉ុន្តែសមាជិកអភិរក្សនិយមនៃគណបក្សប្រជាធិបតេយ្យសេរី (LDP) ដែលកំពុងកាន់អំណាចបាននិយាយថា ការផ្លាស់ប្តូរច្បាប់នឹងប៉ះពាល់ដល់តម្លៃប្រពៃណី ធ្វើឱ្យសាមគ្គីភាពក្នុងគ្រួសារចុះខ្សោយ និងធ្វើឱ្យកុមារយល់ច្រឡំ៕

ប្រទេសឥណ្ឌូណេស៊ី ៖ អាជ្ញាធរប្រចាំកោះ Batam របស់ប្រទេសឥណ្ឌូណេស៊ី បានចាប់ផ្តើមដំណើរការដឹកជញ្ជូនទំនិញចេញពីកំពង់ផែ Batam ទៅកាន់ទីក្រុង Guangzhou និងទីក្រុង Shenzhen របស់ចិនជាផ្លូវការ កាលពីថ្ងៃទី៣១ ខែមីនា ឆ្នាំ២០២៤ ។ វានឹងជួយជំរុញពាណិជ្ជកម្មរវាងប្រទេសឥណ្ឌូណេស៊ី និងចិន និងជាការដឹកទំនិញត្រង់ទៅប្រទេសចិន ដោយពុំចាំបាច់ឆ្លងកាត់ប្រទេសសិង្ហបុរី ។

ការផ្តល់សេវាកម្មដឹកជញ្ជូនទំនិញត្រង់ទៅប្រទេសចិននេះ គឺដំណើរការដោយក្រុមហ៊ុនឈ្មោះ Persero Batam និង The Batam Concession Agency សហការជាមួយក្រុមហ៊ុនដឹកជញ្ជូននៅទីក្រុងហុងកុង ឈ្មោះ SITC International Holdings ។

Arham S. Torik ជានាយកក្រុមហ៊ុន Persero Batam បានលើកឡើងថា ការផ្តល់សេវាកម្មដឹកជញ្ជូនទំនិញត្រង់ទៅប្រទេសចិន នឹងប្រើប្រាស់កប៉ាល់សម្រាប់ដឹកជញ្ជូន ហើយកប៉ាល់នឹងចេញដំណើរនៅរៀងរាល់ថ្ងៃអាទិត្យ គឺស្មើនឹង៤ជើងក្នុង១ខែ ។

បច្ចុប្បន្ននេះ មានក្រុមហ៊ុននាំចេញបានប្រើប្រាស់សេវាកម្មដឹកជញ្ជូនទំនិញត្រង់ ចំនួន៥ក្រុមហ៊ុន ។ រីឯមូលហេតុដែលក្រុមហ៊ុននាំចេញទំនិញទាំងនេះជ្រើសរើសសេវាកម្មដឹកជញ្ជូនត្រង់ ដោយសារពួកគេអាចកាត់បន្ថយការចំណាយដើមទុនក្នុងការដឹកជញ្ជូន រហូតដល់៦០០ដុល្លារអាមេរិក បើធៀបនឹងការដឹកជញ្ជូននាពេលកន្លងមក គឺពួកគេត្រូវផ្លាស់ប្តូរកប៉ាល់នៅប្រទេសសិង្ហបុរី ។

ចំណែក Muhammad Rudi ជាប្រធានគណៈកម្មការអភិវឌ្ឍន៍ប្រចាំកោះ Batam បាននិយាយថា នាថ្ងៃអនាគត កោះ Batam របស់ប្រទេសឥណ្ឌូណេស៊ី នឹងក្លាយជាកន្លែងដឹកជញ្ជូនទំនិញដ៏ល្អ ហើយក្រុមហ៊ុនទាំងអស់នៅកោះ Batam នឹងអាចប្រើប្រាស់ប្រយោជន៍ពីការដឹកជញ្ជូនទំនិញត្រង់ទៅប្រទេសចិន ៕