ប្រទេសជប៉ុន ៖ ទារ.ក នៅប្រទេសជប៉ុនជាង១០០នាក់ ត្រូវបានឪពុក-ម្តាយនាំមកចូលរួមការប្រកួតកីឡាស៊ូម៉ូស្រែកយំឮខ្លាំងបំផុត ដែលជប៉ុនបានរៀបចំឡើងនៅតាមវត្តនានាទូទាំងប្រទេសជារៀងរាល់ឆ្នាំ ។ ជនជាតិជប៉ុនជឿថា ការនាំទារកមកចូលរួមប្រកួតកីឡានេះ នឹងធ្វើឱ្យពួកគេមានសុខភាពល្អ ។

នៅលើសង្វៀនប្រកួតកីឡាស៊ូម៉ូ ដែលរៀបចំឡើងនៅវត្ត Sensoji ស្ថិតក្នុងទីក្រុងតូក្យូ កីឡាករស៊ូម៉ូមាឌធំៗចំនួន២នាក់ មកពីក្លិបចំបាប់សាកលវិទ្យាល័យ Nihon បានលើកទារក២នាក់ ដែលពាក់ខ្សែក្រវ៉ាត់ស៊ូម៉ូទំហំតូចមកដាក់ទល់មុខគ្នា ។ បន្ទាប់មក កីឡាករស៊ូម៉ូមាឌធំៗព្យាយាមធ្វើឱ្យទារកស្រែកយំឮខ្លាំងៗដើម្បីទទួលជ័យជម្នះក្នុងការប្រកួត ។

ចំណែកលក្ខខណ្ឌការប្រកួត បើទារកណាស្រែកយំមុនគេ នឹងទទួលបានជ័យជម្នះក្នុងការប្រកួតនេះ ។ រីឯអ្នករៀបចំកម្មវិធី និងអ្នកចូលរួមទស្សនាការប្រកួតទាំងអស់នាំគ្នាពាក់ម៉ាស់រូបបីសាច និងឆ្កែចចកដែលមានពណ៌ខុសៗគ្នា ដើម្បីឱ្យទារកឃើញមុខរបស់ពួកគេហើយស្រែកយំកាន់តែខ្លាំង ។

ប្រពៃណីការប្រកួតកីឡាស៊ូម៉ូទារកស្រែកយំឮខ្លាំងរបស់ជនជាតិជប៉ុន តែងតែរៀបចំឡើងនៅកន្លែងសក្ការៈបូជា និងតាមវត្តនានាទូទាំងប្រទេស ។ ជារៀងរាល់ឆ្នាំ ឪពុក-ម្តាយជាច្រើននាក់បាននាំកូនតូចរបស់ពួកគេមកចូលរួមការប្រកួតកីឡា ដើម្បីបន្តប្រពៃណីដ៏យូរអង្វែងអស់រយៈពេលជាង៤០០ឆ្នាំ ។

ចំណែកវត្ត Sensoji បានចាប់ផ្តើមរៀបចំការប្រកួតកីឡាប្រភេទនេះ តាំងពីឆ្នាំ១៩៩១ មកម៉្លេះ ។ មុនពេលចាប់ផ្តើមប្រកួត គេនឹងនាំទារកទៅកាន់មុខកន្លែងសក្ការៈបូជាស័ក្តិសិទ្ធិរបស់សាសនាឈីនតូក្នុងព្រះវិហារ ដើម្បីព្រះសង្ឃរៀបចំពិធីឱ្យទារកទទួលភាពបរិសុទ្ធ មុននាំទារកទៅកាន់សង្វៀនប្រកួតកីឡាស៊ូម៉ូនៅក្រៅព្រះវិហារ ។ ព្រះសង្ឃនៅវត្ត Sensoji ឱ្យដឹងថា ជនជាតិជប៉ុនជឿថា សំឡេងយំរបស់ទារកនឹងអាចបណ្តេញខ្មោចព្រាយបីសាច និងជួយការពារទារកពីហេតុការណ៍អាក្រក់ផ្សេងៗ ។

ទោះយ៉ាងណា លក្ខខណ្ឌការប្រកួត គឺខុសៗគ្នាទៅតាមតំបន់នីមួយៗនៅប្រទេសជប៉ុន ក្នុងនោះលក្ខខណ្ឌការប្រកួតក្នុងតំបន់ខ្លះកំណត់ថា បើទារកណាស្រែកយំឮខ្លាំងមុនគេ នឹងឈ្នះការប្រកួត ។ ប៉ុន្តែលក្ខខណ្ឌការប្រកួតក្នុងតំបន់ខ្លះទៀតកំណត់ថា ទារកណាដែលស្រែកយំឮខ្លាំងមុនគេ នឹងចាញ់ការប្រកួត ៕

កម្ពុជាបានចូលជាសមាជិកអាស៊ាននៅថ្ងៃទី ៣០ ខែមេសា ឆ្នាំ ១៩៩៩ និងបានក្លាយជាសមាជិកទី ១០ នៃសមាគមនេះ។

សមាគមប្រជាជាតិអាស៊ីអាគ្នេយ៍ ដែលហៅកាត់ថា អាស៊ាន ត្រូវបានបង្កើតឡើងនៅថ្ងៃទី៨ ខែសីហា ឆ្នាំ១៩៦៧ ក្នុងទីក្រុងបាងកក ប្រទេសថៃ ដោយមានការចុះហត្ថលេខាលើសេចក្តីប្រកាសទីក្រុងបាងកកដោយបិតាស្ថាបនិករបស់អាស៊ាន ដែលមានប្រទេសឥណ្ឌូនេស៊ី ម៉ាឡេស៊ី ហ្វីលីពីន សឹង្ហបុរី និងថៃ។ សមាជិកបន្ទាប់គឺមានប្រុយណេ វៀតណាម ឡាវ ភូមា កម្ពុជា។

អាស៊ានត្រូវបានកសាងឡើងដោយឈរលើសរសរស្តម្ភទាំងបីគឺ៖ សហគមន៍សន្តិសុខនយោបាយអាស៊ាន (APSC) សហគមន៍សេដ្ឋកិច្ចអាស៊ាន (AEC) និងសហគមន៍សង្គមវប្បធ៌មអាស៊ាន (ASCC)។

សមាគមអាស៊ាន គឺបង្កើតឡើងដើម្បីអំពាវនាវឲ្យប្រទេសដែលជាសមាជិករបស់ខ្លួនទាំងអស់មានការប្តេជ្ញាចិត្តនិងទំនួលខុសត្រូវរួមគ្នាក្នុងការស្វែងរកសន្តិភាព ស្ថិរភាព និងវិបុលភាព ដោយផ្អែកលើគោលការណ៍ឯករាជ្យ អធិបតេយ្យភាព ការមិនជ្រៀតជ្រែកកិច្ចការផ្ទៃក្នុង និងការអនុវត្តប្រកបដោយសមធម៌ដោយគ្មានការដាក់ទណ្ឌកម្ម។

គោលបំណងនៃការចូលជាសមាជិកអាស៊ានរបស់កម្ពុជា៖
១ ពង្រីកឱកាសជាអតិបរមាក្នុងការកសាងទំនាក់ទំនងមិត្តភាព និងកិច្ចសហប្រតិបត្តិការក្នុងតំបន់ និងលើសពីឆ្ពោះទៅរកសន្តិភាព ស្ថិរភាព សន្តិសុខ និងការអភិវឌ្ឍន៍សេដ្ឋកិច្ចសង្គមរបស់កម្ពុជា។

២ ពង្រឹងសមាហរណកម្មក្នុងតំបន់ និងអន្តរជាតិរបស់កម្ពុជា និងឈរឈ្មោះជាសមាជិកប្រកបដោយការទទួលខុសត្រូវនៃសហគមន៍អន្តរជាតិ។

៣ លើកកម្ពស់ និងពង្រីកការរួមចំណែករបស់កម្ពុជាក្នុងការដោះស្រាយបញ្ហាប្រឈមក្នុងតំបន់ និងពិភពលោក និងក្នុងការកសាងពិភពលោកប្រកបដោយសុខដុមរមនា សន្តិភាព និងវិបុលភាពសម្រាប់ទាំងអស់គ្នា។

៤ លើកតម្កើងតម្លៃសន្តិភាពក្នុងតំបន់អាស៊ីអាគ្នេយ៍ តាមរយៈការអនុវត្តប្រកបដោយជោគជ័យរបស់កម្ពុជាលើគោលនយោបាយឈ្នះ ឈ្នះ និងការចូលរួមយ៉ាងសកម្មក្នុងការរក្សាសន្តិភាពរបស់អង្គការសហប្រជាជាតិ។

៥ អានុភាពលើវឌ្ឍនភាពនៃការអភិវឌ្ឍន៍សេដ្ឋកិច្ចសង្គមដ៏រឹងមាំរបស់កម្ពុជា និងកំណើនសេដ្ឋកិច្ចខ្ពស់ប្រកបដោយនិរន្តរភាព ដើម្បីពន្លឿនសមាហរណកម្មក្នុងតំបន់ និងកិច្ចខិតខំប្រឹងប្រែងសហគមន៍អាស៊ាន៕

ប្រទេសចិន៖ ឆ្មាមួយក្បាលនៅក្នុងប្រទេសចិន បានធ្វើឱ្យមានការចាប់អារម្មណ៍យ៉ាងខ្លាំង នៅពេលដែលវាបានបង្កើតគ្រោះថ្នាក់ដោយអចេតនា ដែលបណ្តាលឱ្យឆាបឆេះផ្ទះរបស់ម្ចាស់វា និងធ្វើឱ្យខូចខាតទ្រពសម្បត្តិអស់ជាង ១៣.០០០ ដុល្លារអាមេរិក បន្ទាប់ពីម្ចាស់វាបានចេញទៅក្រៅ នេះបើយោងតាម South China Morning Post ដែលបានចុះផ្សាយកាលពីថ្ងៃទី២៩ ខែមេសា ឆ្នាំ២០២៤។

ហេតុការណ៍នេះបានកើតឡើងនៅក្នុងខេត្ត Sichuan ប្រទេសចិន នៅពេលដែលម្ចាស់ផ្ទះបានចេញទៅក្រៅដើរលេង ហើយទុកឆ្មាចោលនៅក្នុងផ្ទះម្នាក់ឯង ខណៈវាកំពុងរត់លេងក្នុងផ្ទះបាយ ហើយចៃដន្យវាក៏រត់ប៉ះចង្រ្កានអាំងភ្លើងអគ្គិសនី បន្ទាប់មកវាក៏បានជាន់លើបន្ទះដំណើរការរបស់ឧបករណ៍ ហើយក៏បណ្តាលឱ្យផ្ទះរបស់ម្ចាស់វាឆាបឆេះ និងបណ្តាលឱ្យខូចខាតអស់ ១.៣ ម៉ឺនដុល្លារអាមេរិក។

ស្ត្រីម្នាក់ឈ្មោះ Dandan ដែលជាម្ចាស់ផ្ទះនិងជាម្ចាស់ឆ្មាបានទទួលទូរស័ព្ទពីបុគ្គលិកគ្រប់គ្រងអចលនទ្រព្យដោយប្រាប់នាងថា ផ្ទះរបស់នាងត្រូវភ្លើងឆេះ។ ភ្លាមនោះនាងក៏បានប្រញាប់ប្រញាល់ទៅផ្ទះល្វែងរបស់នាង ហើយក៏បានរកឃើញថាឆ្មាចិញ្ចឹមរបស់នាងគឺជាមូលហេតុនៃអគ្គីភ័យ ដោយបានឆាបឆេះជាន់ទីមួយទាំងមូលនៃផ្ទះល្វែងតូចមួយរបស់នាង។ ក្រុមសង្គ្រោះបាននិយាយថា ឆ្មាហាក់ដូចជាបានទៅលេងនៅក្នុងផ្ទះបាយ ហើយចៃដន្យបានជាន់លើបន្ទះអាំងឌុចទ័រនៃចង្ក្រានអគ្គិសនី បណ្តាលឱ្យចង្ក្រានបើកហើយក៏បានឆាបឆេះផ្ទះនេះតែម្តង។ ទោះជាយ៉ាងណាឆ្មាមួយក្បាលនេះមិនមានគ្រោះថ្នាក់នោះទេ ដោយសារវាបានលាក់ខ្លួននៅក្នុងទូខោអាវជាន់ខាងលើដោយមិនមានរបួសអ្វីសោះ។

ទោះបីជាឆ្មាមិនមានបញ្ហាពិតមែន ប៉ុន្តែការធ្វេសប្រហែសរបស់ឆ្មាបានបណ្តាលឱ្យខូចខាតទ្រពសម្បត្តិរបស់ម្ចាស់វាអស់ ១០០,០០០ យ័ន (ប្រមាណ ១៣,៨០៧ ដុល្លារអាមេរិក )។ ប្រឈមមុខនឹងស្ថានភាពដ៏គួរឱ្យហួសចិត្តនេះ Dandan ដែលជាម្ចាស់ឆ្មាបានប្តូរឈ្មោះគណនីបណ្តាញសង្គមរបស់នាងទៅជា “ឆ្មាឈាមត្រជាក់” នៅក្នុង Douyin ដែលជា TikTok របស់ចិន។ ហើយក្នុងពេលនោះនាងបាននិយាយថា “ជូនចំពោះអ្នកដែលស្រឡាញ់សត្វទាំងអស់គួរតែប្រុងប្រយ័ត្នឱ្យបានខ្ពស់ ហើយកុំបណ្តោយឱ្យសត្វចិញ្ចឹមរបស់អ្នកនៅម្នាក់ឯងព្រោះអាចកើតមានឧប្បត្តិហេតុដែលមិនអាចនឹកស្មានដល់”៕

ប្រទេសឡាវ ៖ កាលពីថ្ងៃទី២៥ ខែមេសា ឆ្នាំ២០២៤ មន្ទីរវប្បធម៌ និងទេសចរណ៍ប្រចាំទីក្រុងហ្លួងព្រះបាង ប្រទេសឡាវឱ្យដឹងថា ទីក្រុងហ្លួងព្រះបាង បានទទួលភ្ញៀវទេសចរសរុបចំនួន១១០.៣០២នាក់ ក្នុងអំឡុងពេលបុណ្យចូលឆ្នាំថ្មីឡាវ ឆ្នាំ២០២៤ កើនឡើង៣៦៤,៤៤% បើធៀបនឹងអំឡុងពេលដូចគ្នានៅឆ្នាំ២០២៣ ។

តួលេខនេះ មានភ្ញៀវទេសចរបរទេសស្មើជាង៤១.៤០០នាក់ ក្នុងនោះមានភ្ញៀវទេសចរចិនមកកម្សាន្តច្រើនជាងគេ គឺស្មើ១០.៤៩៧នាក់, កូរ៉េខាងត្បូង ស្មើ៥.៥៤១នាក់, ថៃ ស្មើ៤.២៨៤នាក់, វៀតណាម ស្មើ២.៨៤៣នាក់ និងភ្ញៀវទេសចរមកពីប្រទេសផ្សេងទៀត ។ រីឯអំឡុងពេលចូលឆ្នាំថ្មី ឆ្នាំ២០២៣ ទីក្រុងហ្លួងព្រះបាង បានទទួលភ្ញៀវទេសចរជាតិ និងបរទេស ស្មើនឹង២៣.៧៤៩នាក់ ។

នៅឆ្នាំ២០២៤នេះ ទីក្រុងហ្លួងព្រះបាង ដែលស្ថិតនៅឆ្ងាយពីទីក្រុងវៀងចន្ទន៍ ទៅទិសខាងជើងប្រមាណ២២០គីឡូម៉ែត្រ បានរៀបចំពិធីបុណ្យចូលឆ្នាំថ្មីយ៉ាងអធិកអធមជាងឆ្នាំមុនៗ គឺចាប់ពីថ្ងៃទី១០ ដល់ថ្ងៃទី២០ ខែមេសា ។ វាក៏ជាពិធីសំខាន់សម្រាប់គម្រោងទេសចរណ៍ឡាវ (Visit Laos Year) នៅទីក្រុងហ្លួងព្រះបាងផងដែរ ។

ហ្លួងព្រះបាង ជាទីក្រុងមានឈ្មោះល្បីល្បាញបំផុតរបស់ឡាវ និងជាកន្លែងទាក់ទាញភ្ញៀវទេសចរជាច្រើននាក់ ដោយសារមានវត្តបុរាណ និងតំបន់ទេសចរណ៍ដ៏ស្រស់ស្អាតជាច្រើនកន្លែង ។ ទីក្រុងនេះត្រូវបានចុះបញ្ជីជាសម្បត្តិមរតកពិភពលោកដោយអង្គការយូណេស្កូ (UNESCO) កាលពីឆ្នាំ១៩៩៥ ដែលមានតំបន់ទេសចរណ៍កំណត់ជាផ្លូវការ ចំនួន២២៨កន្លែង ក្នុងនោះមានតំបន់ទេសចរណ៍ធម្មជាតិ ១១១កន្លែង, តំបន់ទេសចរណ៍មរតកវប្បធម៌ ៧៨កន្លែង និងតំបន់ទេសចរណ៍ប្រវត្តិសាស្ត្រ ៣៩កន្លែង ។

ប្រទេសឡាវបានរៀបចំក្បួនដង្ហែរទេវតាឆ្នាំថ្មីនៅទីក្រុងហ្លួងព្រះបាង ដើម្បីប្រារព្ធពិធីបុណ្យសង្ក្រាន្ត ឬពិធីបុណ្យចូលឆ្នាំថ្មីតាមប្រពៃណីឡាវ ដោយមានការចូលរួមពីពលរដ្ឋឡាវស្លៀកពាក់សម្លៀកបំពាក់ប្រពៃណីយ៉ាងស្រស់ស្អាត ។ ក្នុងថ្ងៃដង្ហែរទេវតាឆ្នាំថ្មីនេះ មានពលរដ្ឋឡាវ និងភ្ញៀវទេសចរបរទេសយ៉ាងច្រើនកុះករបានមកចូលរួមលេងជះទឹកដាក់អ្នកដំណើរតាមផ្លូវយ៉ាងសប្បាយរីករាយ ៕

បរទេស៖ កាលពីពេលថ្មីៗនេះប្រទេសអង់គ្លេសបានចេញច្បាប់ថ្មីមួយដោយហាមឃាត់ពលរដ្ឋកុំឱ្យប្រើពាក្យសម្ងាត់ ‘Admin’ និង ‘12345’ ដែលជាផ្នែកមួយនៃច្បាប់ពិភពលោកដំបូងគេដើម្បីការពារប្រឆាំងនឹងការវាយប្រហារតាមអ៊ីនធឺណិត។
បើយោងតាម Yahoo New ច្បាប់ថ្មីនេះនឹងចូលជាធរមានចាប់ពីថ្ងៃទី ២៩ ខែមេសា ឆ្នាំ២០២៤ នេះតទៅដែលជាផ្នែកមួយនៃរបបសន្តិសុខផលិតផល និងហេដ្ឋារចនាសម្ព័ន្ធរបស់ចក្រភពអង់គ្លេស។ ដូច្នេះអ្នកប្រើប្រាស់ដែលបានកំណត់ពាក្យសម្ងាត់ងាយស្រួលបែបនេះនឹងត្រូវបានស្នើសុំឱ្យផ្លាស់ប្តូរពាក្យសម្ងាត់ថ្មីជាបន្ទាន់។

លើសពីនេះ ក្រុមហ៊ុនផលិតឧបករណ៍ដែលភ្ជាប់អ៊ីនធឺណិតទាំងអស់ ចាប់ពីទូរស័ព្ទដៃ ទូរទស្សន៍ ទូទឹកកកឆ្លាតវៃ រហូតដល់កណ្ដឹងទ្វារ នឹងត្រូវធ្វើបច្ចុប្បន្នភាពស្តង់ដារសុវត្ថិភាពអប្បបរមា ការពារអ្នកប្រើប្រាស់មិនឱ្យប្រើពាក្យសំងាត់ខ្សោយ ដែលអាចព្យាករណ៍បាន។ ពួកគេក៏ត្រូវតែបង្ហាញដល់អ្នកប្រើប្រាស់នូវព័ត៌មានលម្អិតអំពីរបៀបធ្វើវា កំហុសដែលអាចកើតមាន ក៏ដូចជារយៈពេលអប្បបរមាសម្រាប់ការអាប់ដេតនេះ។ យោងតាម Sky News ការផ្លាស់ប្តូរនេះនឹងធ្វើឱ្យចក្រភពអង់គ្លេសក្លាយជាប្រទេសដំបូងគេនៅលើពិភពលោកដែលមានច្បាប់ស្តីពីពាក្យសម្ងាត់។

មូលហេតុដែលប្រទេសអង់គ្លេសចេញច្បាប់ថ្មីគឺដោយសារផ្ទះនីមួយនៅក្នុងប្រទេសនេះគឺពោរពេញទៅដោយឧបករណ៍ឆ្លាតវៃដែលអាចប្រឈមនឹងការវាយប្រហាររហូតដល់ ១២,០០០ ដងក្នុងមួយសប្តាហ៍ ជាមួយនឹង ២,៦៨៤ នៃការប៉ុនប៉ងទាយពាក្យសម្ងាត់ខ្សោយនៅលើឧបករណ៍ចំនួន ៥។ ទន្ទឹមនឹងនេះ ស្ថិតិពីគេហទំព័រគ្រប់គ្រងពាក្យសម្ងាត់ NordPass បង្ហាញថាលេខ “123456” គឺជាពាក្យសម្ងាត់ពេញនិយមបំផុតរបស់មនុស្សនៅក្នុងប្រទេសនេះកាលពីឆ្នាំមុន បន្ទាប់មកគឺ “ពាក្យសម្ងាត់”, “qwerty”, “Liverpool” និង ‘Admin’ ។

អ្នកតំណាងក្រសួងវិទ្យាសាស្ត្រ និងបច្ចេកវិទ្យារបស់អង់គ្លេសក៏បានវាយតម្លៃថា ដោយសារជីវិតប្រចាំថ្ងៃកាន់តែពឹងផ្អែកលើឧបករណ៍ទំនើបដែលបានភ្ជាប់ ដូច្នេះការគំរាមកំហែងពីអ៊ីនធឺណិតនឹងកាន់តែកើនឡើង។ ហេតុនេះហើយ ច្បាប់ថ្មីនេះនឹងជួយអ្នកប្រើប្រាស់មានអារម្មណ៍ថាមានសុវត្ថិភាពជាងមុន ដែលឧបករណ៍ឆ្លាតវៃរបស់ពួកគេត្រូវបានការពារពីឧក្រិដ្ឋជនតាមអ៊ីនធឺណិត។ តំណាងក្រសួងបាននិយាយថា “បទប្បញ្ញត្តិថ្មីទាំងនេះបង្ហាញពីការលោតផ្លោះដ៏សំខាន់មួយឆ្ពោះទៅរកបរិយាកាសឌីជីថលដែលមានសុវត្ថិភាពជាងមុន” ដោយបានសន្យាថានឹងធ្វើឱ្យចក្រភពអង់គ្លេសក្លាយជា “កន្លែងសុវត្ថិភាពបំផុតនៅក្នុងពិភពលោកសម្រាប់សុវត្ថិភាពនៃប្រព័ន្ធបច្ចេកវិទ្យា”៕

ប្រទេសកូរ៉េខាងត្បូង ៖ មនុស្ស និងភាពឯកោ ស្ទើរតែមិនអាចបំបែកចេញពីគ្នាបានទេ ខណៈមនុស្សម្នាក់ៗសុទ្ធតែធ្លាប់មានអារម្មណ៍ឯកោ ហើយក្នុងវ័យនីមួយៗបានជួបភាពឯកោខុសៗគ្នា ។ កាលពីឆ្នាំ២០២៣ អង្គការសុខភាពពិភពលោក (WHO) ប្រកាសថា ភាពឯកោបានគំរាមកំហែងយ៉ាងខ្លាំងដល់មនុស្ស ។

ការស្រាវជ្រាវបញ្ជាក់ថា មនុស្សដែលផ្តាច់ខ្លួនពីសង្គមស្មើប្រមាណ៣២% នឹងស្លាប់មុនអាយុ ដែលផ្ទុយគ្នានឹងមនុស្សដែលបានចូលរួមក្នុងសង្គម និងសន្ទនាជាប្រចាំ ។ មនុស្សចាស់ ជាក្រុមមានហានិភ័យខ្ពស់បំផុតដែលងាយប្រឈមនឹងភាពឯកោ ពីព្រោះពេលអាយុកាន់តែច្រើនធ្វើឱ្យពួកគាត់ឈឺជាញឹកញាប់ ហើយសមាជិកគ្រួសារពុំយកចិត្តទុកដាក់ ។ ហេតុនេះ មនុស្សចាស់ត្រូវនៅក្នុងផ្ទះ ហើយពុំសូវបានជជែកជាមួយមនុស្សក្នុងសង្គមប៉ុន្មានទេ ។

ប៉ុន្តែមនុស្សចាស់នឹងអាចយកឈ្នះភាពឯកោបាន បើមានអ្នកណាម្នាក់នៅក្បែរ ។ នៅឆ្នាំ២០២៤ ក្រុមហ៊ុនកូរ៉េខាងត្បូងបានផលិតមនុស្សយន្តឆ្លាតវៃ ដែលអាចឆ្លើយតបសំណួរមនុស្សចាស់បាន ឈ្មោះថា «មនុស្សយន្ត Hyodol» ។ វាមានសមត្ថភាពជាច្រើនផ្នែក ដូចជា ៖ កត់ត្រាការចងចាំ, បង្ហាញអារម្មណ៍, ឆ្លើយតបសំណួរ, លេងភ្លេង និងធ្វើឱ្យមនុស្សចាស់មានអារម្មណ៍ថា មិនឯកោ ។

ក្រុមហ៊ុននេះបានប្រើប្រាស់ប្រព័ន្ធ Emotional AI សម្រាប់កត់ត្រាទិន្នន័យ និងអារម្មណ៍មនុស្សចាស់ ខណៈក្រុមហ៊ុនអាចត្រួតពិនិត្យមនុស្សយន្តឆ្លាតវៃពីចម្ងាយ ។ ក្រៅពីនេះ មនុស្សយន្ត Hyodol មានប្រយោជន៍ផ្នែកសុវត្ថិភាពផងដែរ ដូចជា ៖ ពេលមនុស្សយន្តពុំអាចត្រួតពិនិត្យការបម្លាស់ទី មានន័យថា មានគ្រោះថ្នាក់កើតឡើងចំពោះមនុស្សចាស់ ហើយវានឹងបន្លឺសំឡេងរោទិ៍ពីវិធានការសុវត្ថិភាព ។

លើសពីនេះ មនុស្សយន្ត Hyodol អាចណែនាំអំពីសុខភាពចំនួន២លើកក្នុង១ថ្ងៃ, អាចលេងភ្លេង, មានកម្រងសំណួរឱ្យធ្វើ និងណែនាំមនុស្សចាស់ពីកម្មវិធីហាត់ប្រាណផងដែរ ។ បើទោះជាមនុស្សយន្តនេះមានតម្លៃថ្លៃរហូតដល់១.៨០០ដុល្លារអាមេរិក ប៉ុន្តែរដ្ឋាភិបាលកូរ៉េខាងត្បូងលើកឡើងថា វាមានប្រយោជន៍សម្រាប់មនុស្សចាស់ហើយរដ្ឋាភិបាលកូរ៉េខាងត្បូងបានផ្តល់មនុស្សយន្តជាង៧.០០០គ្រឿង ទៅឱ្យមនុស្សចាស់រស់នៅទីក្រុងសេអ៊ូល ។

គេរាយការណ៍ថា មនុស្សចាស់ភាគច្រើនដែលបានប្រើប្រាស់មនុស្សយន្ត Hyodol គឺមានអាយុជាមធ្យម ស្មើ៨២ឆ្នាំ ។ បើតាមការស្រាវជ្រាវរបស់មន្ទីរពេទ្យសាកលវិទ្យាល័យជាតិកាំវ៉ុន អំពីមនុស្សយន្ត និងផលប៉ះពាល់លើអ្នកជំងឺបង្ហាញថា មនុស្សយន្ត AI មួយនេះ អាចជួយកាត់បន្ថយជំងឺធ្លាក់ទឹកចិត្តបានល្អ ពីព្រោះវាអាចបង្កើតភាពស្និទ្ធស្នាលផ្លូវចិត្តជាមួយអ្នកជំងឺ ព្រមទាំងផ្តល់ប្រយោជន៍ផ្នែកសុខភាព និងសុវត្ថិភាព ៕

កាលពីយប់ថ្ងៃទី២៩ ខែមេសា ឆ្នាំ២០២៤ ព្រះចៅស៊ុលតង់ ហាជី ហាសិនណល់ ប៊ូលហ្កះ ព្រះមហាក្សត្រ នៃប្រទេសប្រ៊ុយណេ ដារូសាឡឹម បានយាងមកដល់កម្ពុជា ដើម្បីសោយព្រះក្រយានាព្រឹកថ្ងៃទី៣០ ខែមេសានេះ ជាមួយសម្តេចតេជោ ហ៊ុន សែន។

ព្រះរាជដំណើររបស់ព្រះមហាក្សត្រប្រុយណេមកម្ពុជាពេលនេះ ពុំមានជំនួបផ្លូវការណាមួយនោះទេ គ្រាន់តែជាការសោយក្រយាពេលព្រឹកនៅថ្ងៃទី៣០ ខែមេសា ជាមួយសម្តេច ដែលព្រះអង្គរាប់អានដូចប្អូនពៅតែប៉ុណ្ណោះ។

នៅក្នុងជំនួប ដើម្បីសោយក្រយាពេលព្រឹកនេះ ខាងព្រះអង្គមានព្រះអង្គម្ចាស់ម៉ាទីនដែលជាព្រះរាជ្យបុត្រ។ ឯសម្តេចតេជោមានមានកូនប្រុសទាំងបីគឺសម្តេចធិបតីហ៊ុន ម៉ាណែត ឯកឧត្តមហ៊ុន ម៉ានិត និងឯកឧត្តមហ៊ុន ម៉ានី ដោយក្រោយការស្រស់ស្រូបរួច ព្រះអង្គនឹងព្រះយាងនិវត្តន៍ទៅកាន់ប្រទេសវិញ។

គួរបញ្ជាក់ថា ព្រះចៅស៊ុលតង់ ហាជី ហាសិនណល់ ប៊ូលហ្កះ គឺជាស្តេចមានទ្រព្យសម្បត្តិច្រើនជាងគេបំផុតនៅលើលោក ខណៈបច្ចុប្បន្នព្រះអង្គត្រូវបានគេប៉ាន់ប្រមាណថាមានទ្រព្យដល់ទៅ ២៨ពាន់លានដុល្លារ៕

ប្រទេសមីយ៉ាន់ម៉ា ៖ មន្ត្រីការិយាល័យឧតុនិយមមីយ៉ាន់ម៉ាលើកឡើងថា កាលពីថ្ងៃទី២៨ ខែមេសា ឆ្នាំ២០២៤ អាកាសធាតុនៅទីក្រុងស្ថិតនៅតំបន់កណ្តាលរបស់មីយ៉ាន់ម៉ាបានកើនឡើងខ្ពស់បំផុតពុំធ្លាប់មាន គឺស្មើរហូតដល់៤៨,២អង្សារសេ បើគិតចាប់ពីមីយ៉ាន់ម៉ាបានកត់ត្រាទិន្នន័យកាលពី៥៦ឆ្នាំមុន ខណៈប្រទេសផ្សេងៗនៅតំបន់អាស៊ីអាគ្នេយ៍ ក៏ប្រឈមនឹងអាកាសធាតុក្តៅផងដែរ ។

ទីក្រុងយ៉ាំងហ្គោន ដែលជាទីក្រុងធំបំផុតរបស់មីយ៉ាន់ម៉ា សីតុណ្ហភាពនៅថ្ងៃដដែល (គឺថ្ងៃទី២៨ ខែមេសា ឆ្នាំ២០២៤) បានកើនឡើងរហូតដល់៤០អង្សារសេ និង៤៤អង្សារសេនៅទីក្រុង Mandalay ជាទីក្រុងធំទី២ ។ រីឯពលរដ្ឋរស់នៅទីក្រុង Kyaukphyu បាននិយាយមកកាន់សារព័ត៌មាន AFP ថា អាកាសធាតុក្តៅខ្លាំងពេកធ្វើឱ្យគ្រប់គ្នាសម្ងំនៅតែក្នុងផ្ទះ ហើយពួកគេមិនអាចធ្វើអ្វីបានទេ ។

កាលពីឆ្នាំ២០២៣ សីតុណ្ហភាពលើពិភពលោកបានកើនឡើងខ្ពស់បំផុតក្នុងប្រវត្តិសាស្ត្រ ហើយអង្គការឧតុនិយមពិភពលោករបស់អង្គការសហប្រជាជាតិបញ្ជាក់ថា តំបន់អាស៊ីកំពុងកើនកំដៅយ៉ាងឆាប់រហ័ស ហើយផលប៉ះពាល់ដោយសាររលកកំដៅក្នុងតំបន់នេះនឹងកាន់តែខ្លាំងក្លា ។ រីឯការស្រាវជ្រាវផ្នែកវិទ្យាសាស្ត្របង្ហាញថា ការផ្លាស់ប្តូរអាកាសធាតុបានធ្វើឱ្យរលកកំដៅគ្របដណ្តប់តំបន់នេះកាន់តែយូរ, ញឹកញាប់ និងមានកម្រិតខ្លាំង ។

ចំណែកបង់ក្លាដែស ជាប្រទេសមានព្រំដែនជាប់មីយ៉ាន់ម៉ា បានទទួលរងនូវអាកាសធាតុក្តៅខ្លាំងជាប់ៗគ្នាចំនួន២៧ថ្ងៃ គិតរហូតមកដល់ថ្ងៃទី២៧ ខែមេសា ឆ្នាំ២០២៤ ។ វាជាអាកាសធាតុក្តៅបំផុតក្នុងប្រវត្តិសាស្ត្រ ចាប់តាំងពីបង់ក្លាដែសបានកត់ត្រាទិន្នន័យកាលពីឆ្នាំ១៩៤៨ ។ ជាមួយគ្នានេះ នៅឆ្នាំ២០២៤ គឺជាឆ្នាំដំបូង ដែលតំបន់ស្មើប្រមាណ៧៥% របស់បង់ក្លាដែស ទទួលរងរលកកំដៅជាបន្តបន្ទាប់ ៕