ប្រទេសចិន ៖ ពិធីបុណ្យប្រណាំងទូកនាគអន្តរជាតិប្រចាំឆ្នាំរបស់ទីក្រុងហុងកុង បានរៀបចំឡើងកាលពីថ្ងៃទី១០ ខែមិថុនា ឆ្នាំ២០២៤ ។ គេចាត់ទុកថា ពិធីបុណ្យប្រណាំងទូកនាគឆ្នាំនេះរៀបចំអធិកអធមជាងបណ្តាឆ្នាំមុនៗ ដោយសារមានតំបន់ចំនួន២៩ របស់ហុងកុងរៀបចំពិធីនេះ ហើយខេត្តហ៊ូណាន ក៏បានប្រណាំងទូកនាគដូចគ្នាដែរ ។

ការប្រណាំងទូកនាគអន្តរជាតិដែលគ្រប់គ្នាឃើញនេះ បានរៀបចំឡើងនៅតំបន់អាប័រឌីនស្ថិតនៅភាគខាងត្បូងហុងកុង ដែលជាតំបន់មានទំហំធំជាងគេរបស់អ្នកនេសាទ ។ គេឃើញកីឡាករ-កីឡាការិនីរាប់រយនាក់បានចូលរួមប្រណាំងទូកនាគ នៅក្រោមសំឡេងគាំទ្ររបស់អ្នកទស្សនាយ៉ាងសប្បាយរីករាយ ។ អ្នកទស្សនាពិធីប្រណាំងទូកនាគ និយាយថា ពួកគេបានមកលេងពិធីបុណ្យនេះជារៀងរាល់ឆ្នាំ និងមានអារម្មណ៍រីករាយខ្លាំងណាស់ ។

ដោយឡែក ខេត្តហ៊ូណាន ក៏បានរៀបចំពិធីបុណ្យប្រណាំងទូកនាគអន្តរជាតិដូចគ្នាដែរ កាលពីសប្តាហ៍ទី១ ខែមិថុនា ឆ្នាំ២០២៤ ។ កីឡាករ-កីឡាការិនី ដែលមកចូលរួមប្រកួតនៅខេត្តហ៊ូណាន គឺមានអាយុលើសពី៤០ឆ្នាំ និងមានជំនាញអុំទូក ។ ហេតុនេះ កីឡាករមកចូលរួមប្រកួតមានទាំងអ្នកចូលនិវត្តន៍ពីការងារ, ពលករបរទេស និងស្ត្រីមេផ្ទះ ខណៈកីឡាករអាយុច្រើនបំផុត គឺមានអាយុ៥៧ឆ្នាំ និងអាយុតិចបំផុត៤៤ឆ្នាំ ។

ក្រៅពីនេះ តំបន់ជាច្រើនទៀតរបស់ប្រទេសចិន ក៏បានរៀបចំពិធីបុណ្យប្រណាំងទូកនាគអន្តរជាតិដូចគ្នាដែរ ។ ចិនបានប្រារព្ធពិធីប្រណាំងទូកនាគអន្តរជាតិអស់រយៈពេលជាង២.០០០ឆ្នាំហើយ ប៉ុន្តែកាលពី៤០ឆ្នាំមុន ហុងកុងបានរៀបចំការប្រណាំងទូកនាគបែបថ្មីឱ្យស្របនឹងស្ថានភាពបច្ចុប្បន្ន ។

ពិធីបុណ្យប្រណាំងទូកនាគ គឺស្រដៀងគ្នានឹងពិធីផ្សេងៗរបស់ចិនដែរ ប៉ុន្តែខុសប្លែកនៅត្រង់ការប្រណាំងទូកនាគ គេនិយមបរិភោគនំប៉ាក់ចាង និងផឹកស្រា ។ នំនេះធ្វើពីអង្ករដំណើបខ្ចប់ស្លឹកឫស្សី និងមានស្នូលខុសៗគ្នា ដូចជា ៖ សណ្តែកក្រហម, ពុទ្រា, សាច់ជ្រូក, ពងទាប្រៃ,ផ្សិត និងសាច់ក្រក បន្ទាប់មក គេយកវាទៅចំហុយ ឬស្ងោរ ។ ក្រៅពីនេះ ពលរដ្ឋចិនភាគច្រើននាំគ្នាទៅមាត់ទន្លេ ឬមាត់បឹង ដើម្បីចូលរួមអបអរ និងទស្សនាការប្រណាំងទូកនាគបុរាណ ។

ការប្រណាំងទូកនាគបានក្លាយជាពិធីល្បីល្បាញមួយនៅចិន គឺដើម្បីរំលឹកពីការធ្វើអត្តឃាតរបស់ Qu Yuan ពីព្រោះការប្រណាំងទូកមានលក្ខណៈស្រដៀងគ្នានឹងអ្នកស្រុកព្យាយាមតាមរកសពរបស់ Qu Yuan ក្នុងទឹកទន្លេ ។ មតិខ្លះទៀតថា ការធ្វើអត្តឃាតរបស់ Qu Yuan គ្រាន់តែជារឿងតំណាលប៉ុណ្ណោះ ពីព្រោះការប្រណាំងទូកនាគមានប្រវត្តិយូរយារហូតដល់២.០០០ឆ្នាំ ។

ចំណែកអ្នកជំនាញជឿថា ពិធីប្រណាំងទូកនាគមានដើមកំណើតពីការថ្វាយបង្គំសត្វនាគ ហើយខេត្តក្វាងទុង ស្ថិតនៅភាគខាងត្បូងប្រទេសចិន បានរៀបចំពិធីនេះមុនគេ ៕

ប្រទេសបេលីស ៖ The Great Blue Hole គឺជារណ្តៅយក្សពណ៌ខៀវក្នុងមហាសមុទ្រ ដែលមានទីតាំងនៅក្រៅឆ្នេរសមុទ្រប្រទេសបេលីស (Belize ជាប្រទេសស្ថិតនៅអាមេរិកកណ្តាល) និងនៅក្បែរចំណុចកណ្តាលកោះផ្កាថ្មឈ្មោះ Lighthouse Reef ។ មាត់រណ្តៅយក្សនេះមានរាងជារង្វង់មូល និងមានជម្រៅចុះទៅក្រោមស្មើនឹង១២៤ម៉ែត្រ (គឺមានកម្ពស់ស្មើអគារ៣៥ជាន់) ។

កន្លងមក ក្រុមអ្នកស្រាវជ្រាវបានយកថ្មពីបាតរណ្តៅទៅវិភាគឃើញថា រណ្តៅដ៏ធំក្នុងសមុទ្រនេះបានកើតឡើងរាប់ពាន់ឆ្នាំមកហើយ គឺមុនពេលវាក្លាយជារណ្តៅយ៉ាងជ្រៅបែបនេះ គឺវាធ្លាប់ជាល្អាងថ្មស្ថិតនៅលើកោះផ្កាថ្មពីមុន ។ ប៉ុន្តែពេលកម្រិតទឹកសមុទ្រកើនឡើងកាន់តែខ្លាំង ល្អាងថ្មនៅលើកោះក៏ត្រូវបានទឹកសមុទ្រជន់លិចទាំងស្រុង និងធ្វើឱ្យវាក្លាយជារណ្តៅមានជម្រៅយ៉ាងជ្រៅក្នុងទឹកសមុទ្រនាពេលបច្ចុប្បន្ន ។

រណ្តៅយក្ស The Great Blue Hole គឺជាផ្នែកមួយស្ថិតក្នុងការអភិរក្សផ្កាថ្មប្រភេទ Belize Barrier Reef Reserve System ដែលមានទំហំធំ និងត្រូវបានអង្គការយូណេស្កូចុះបញ្ជីជាសម្បត្តិបេតិកភណ្ឌពិភពលោក ។ រណ្តៅយក្សនេះ គឺជាតំបន់ទេសចរណ៍ដ៏ពេញនិយមសម្រាប់ភ្ញៀវទេសចរជ្រមុជទឹករាក់ និងទឹកជ្រៅ ខណៈបាតរណ្តៅជាជម្រករស់នៅរបស់សត្វសមុទ្រជាច្រើនប្រភេទ រួមទាំងត្រីឆ្លាមផងដែរ ។

សម្រាប់អ្នកជ្រមុជទឹកវិញចាត់ទុកថា រណ្តៅយក្សជាកន្លែងស្រាវជ្រាវនៅក្រោមទឹកយ៉ាងពិសេសមួយ ។ បើពួកគេចុះទៅក្នុងរណ្តៅកាន់តែជ្រៅ ពួកគេនឹងបានឃើញថ្មបុរាណជាច្រើនប្រភេទ ដែលថ្មទាំងនេះបានកើតឡើងតាំងពីសម័យរណ្តៅនៅជាល្អាងថ្មលើកោះមកម៉្លេះ ។ លើសពីនេះ ទឹកសមុទ្រក្នុងបរិវេណនេះមានសភាពថ្លាខ្លាំង ទើបធ្វើឱ្យអ្នកជ្រមុជទឹកអាចមើលឃើញសត្វសមុទ្រជាច្រើន ព្រមទាំងផ្កាថ្មមានសភាពរស់រវើក ។

ការចុះទៅក្នុងបាតរណ្តៅយក្ស គឺជាដំណើរផ្សងព្រេងមួយដែលធ្វើឱ្យគេភ្ញាក់ផ្អើលនឹងសម្រស់ដ៏ស្រស់ស្អាតរបស់ធម្មជាតិ និងភាពស្មុគស្មាញនៅបាតរណ្តៅ ។ ជារៀងរាល់ឆ្នាំ ភ្ញៀវទេសចរនិយមមកកម្សាន្តនៅទីនេះភាគច្រើន គឺចាប់ពីខែមេសា ដល់ខែមិថុនា ។

ភ្ញៀវទេសចរដែលចង់មកជ្រមុជទឹកក្នុងរណ្តៅនេះ ពួកគេត្រូវតែមានវិញ្ញាបនបត្របញ្ជាក់ថា ធ្លាប់ឆ្លងកាត់វគ្គបណ្តុះបណ្តាលជ្រមុជទឹក និងមានបទពិសោធន៍ ពីព្រោះមានតែអ្នកមានជំនាញខ្ពស់ប៉ុណ្ណោះ ទើបអាចជ្រមុជទឹកក្នុងរណ្តៅបាន ។ ក្រៅពីនេះ មុនពេលជ្រមុជទឹក ពួកគេក៏ត្រូវសង្កេតមើលអាកាសធាតុ និងជ្រើសរើសពេលវេលាល្អបំផុត ។

បើអ្នកជ្រមុជទឹកពុំចង់ពិបាកច្រើន គឺពួកគេអាចទំនាក់ទំនងក្រុមហ៊ុនទេសចរណ៍ជាច្រើនដែលផ្តល់សេវាកម្មផ្នែកនេះ ឬទំនាក់ទំនងជាមួយមគ្គុទ្ទេសក៍ទេសចរមានបទពិសោធន៍ ៕

តារាចម្រៀង K-pop ដ៏ល្បីល្បាញមួយរូបគឺ Karina មេក្រុម Aespa បានបង្ហើបគន្លឹះថែរក្សាស្បែកឱ្យសភ្លឺថ្លាល្អឥតខ្ចោះ ដោយប្រើរូបមន្តសាមញ្ញទាំងនេះ។ នាងបាននិយាយថា ទោះបីជានាងមានការងារមមាញឹកក៏ដោយ ក៏នាងនៅតែឆ្លៀតពេលដើម្បីថែរក្សាស្បែករបស់នាងជាប្រចាំផងដែរ។ តារាវ័យ ២៤ ឆ្នាំរូបនេះតែងតែបញ្ចេញមុខធម្មជាតិជានិច្ច ធ្វើឱ្យមនុស្សគ្រប់គ្នាលង់ស្នេហ៍នឹងស្បែកមុខសភ្លឺថ្លារបស់នាង។ អាថ៌កំបាំងនៃការថែរក្សាស្បែកមុខរបស់ Karina គឺសាមញ្ញណាស់ ពោលគឺត្រូវបិទម៉ាសមុខជាប្រចាំ។ ដូច្នេះតើម៉ាសមុខណាដែលតារាស្រីរូបនេះតែងតែយកទៅប្រើប្រាស់?

ជាការពិតណាស់ Karina Aespa តែងតែប្រើប្រាស់ Lotion Mask មកបិទមុខជាប្រចាំ។ Lotion មានវាយនភាពរាវ ស្រាលជាងក្រែម និងមានជាតិទឹកខ្ពស់ ដូច្នេះវាមានសមត្ថភាពល្អបំផុតក្នុងការផ្តល់សំណើម ដោយសារវាឆាប់ជ្រាបចូលទៅក្នុងស្បែក ផ្តល់សំណើមដល់ស្បែកបានយ៉ាងមានប្រសិទ្ធភាព។ ម៉ាស់ប្រភេទនេះមិនបណ្តាលឱ្យមានជាតិខ្លាញ់ ឬស្អិតនោះទេ។ Lotion Mask អាចស្តារស្បែកស្ងួត ស្បែកគ្រើម កាត់បន្ថយរាល់បញ្ហាដែលកើតឡើងដោយសារស្បែកស្ងួតពេក ឬខ្លាញ់ពេក។ ជាពិសេសវាក៏មានផ្ទុកសារធាតុចិញ្ចឹមផ្សេងទៀត ដែលជួយបង្រួមរន្ធញើសទៀតផង។

របៀបប្រើម៉ាសមុខ ជាធម្មតា Karina ចំណាយពេល ១០-១៥ នាទីរាល់ពេលបិទ ហើយត្រូវអនុវត្តបែបនេះ ២-៣ ដងក្នុងមួយសប្តាហ៍។ គ្រាន់តែលាងសម្អាតមុខ រួចយកម៉ាសបិទនៅលើកន្លែងដូចជា ថ្ងាស ច្រមុះ ថ្ពាល់ និងចង្កា បន្ទាប់មកទុករយៈពេល ១០-១៥ នាទី រួចយកចេញហើយជូតលើមុខរបស់អ្នកជាជំហានទី ១។

ជំហានទី២ បន្ទាប់ពីផ្ទៃមុខរបស់អ្នកស្អាតហើយ សូមលាងមុខជាមួយទឹកស្អាតម្តងទៀត ហើយសូមលាបក្រែមផ្តល់សំណើមស្រាលៗ បន្ទាប់មកអ្នកត្រូវម៉ាស្សាដើម្បីបង្កើនការស្រូបយកសារធាតុចិញ្ចឹម។ ជំហានទី៣ ត្រូវគឺបាញ់ទឹកដើម្បីបន្ថែមសំណើមលើម៉ាសក្រដាស រួចលាបលើមុខរបស់អ្នក ហើយទុកចោលប្រហែល ១០ នាទីរហូតដល់របាំងស្ងួត រួចលាងមុខរបស់អ្នកដោយទឹកស្អាតជាការស្រច។

ទោះជាយ៉ាងណាចំពោះអ្នកដែលមានស្បែកខ្លាញ់ ល្បាយនេះគួរប្រើដោយប្រុងប្រយ័ត្ន។ វិធីសាស្រ្តនេះត្រូវបានណែនាំអោយប្រើពីរដងក្នុងមួយសប្តាហ៍ប៉ុណ្ណោះ និងមិនគួរប្រើជារៀងរាល់ថ្ងៃនោះទេ។ នេះជាវិធីសាស្ត្រដ៏សាមញ្ញមួយដែលតម្រូវឱ្យប្រើតែសំឡីជូតសម្អាតគ្រឿងសម្អាង និងឡេដើម្បីងាយស្រួលធ្វើ។ ផលិតផលនេះជួយឱ្យស្បែកមានសំណើមយ៉ាងម៉ត់ចត់ បន្ថែមពីលើការធ្វើឱ្យស្បែកស និងភ្លឺថ្លា វាក៏ធ្វើឱ្យមានពណ៌ស្មើគ្នាតាមពេលវេលាផងដែរ៕

ប្រទេសថៃ៖ ថ្មីៗនេះនៅព្រឹកថ្ងៃទី១១ ខែមិថុនា ឆ្នាំ២០២៤ គឺមានអគ្គីភ័យមួយបានឆាបឆេះផ្សារចិញ្ចឹមសត្វដ៏ធំបំផុតរបស់ប្រទេសថៃ បណ្តាលឱ្យសត្វចំនួន ១,០០០ ក្បាល រួមទាំងពូជកម្រជាច្រើនទៀតបាត់បង់ជីវិត។
យោងតាមសារព័ត៌មានបរទេស បានឱ្យដឹងថា អគ្គីភ័យនេះបានឆាបឆេះផ្សារចិញ្ចឹមសត្វមួយកន្លែងក្នុងសង្កាត់ Chatuchak នៃទីក្រុងបាងកក ប្រទេសថៃ នៅព្រឹកថ្ងៃទី១១ ខែមិថុនា ដោយបានសម្លាប់សត្វចិញ្ចឹមរាប់ពាន់ក្បាល រួមទាំងពូជកម្រនិងអសកម្មថ្លៃៗជាច្រើនទៀតផងដែរ។

ការិយាល័យស្រុក Chatuchak បាននិយាយថា អគ្គីភ័យបានចាប់ផ្តើមនៅម៉ោងប្រហែល ៤ និង ១០ នាទីព្រឹកនៅផ្សារសត្វចិញ្ចឹម Sri Somrat ដែលជាផ្សារមានហាងលក់សត្វចិញ្ចឹមចំនួន ១១៨ កន្លែងលើផ្ទៃដី ១,៤០០ ម៉ែត្រការ៉េ។ នៅពេលនោះរថយន្តពន្លត់អគ្គីភ័យបានទៅដល់កន្លែងកើតហេតុភ្លាមៗ ប៉ុន្តែត្រូវចំណាយពេលកន្លះម៉ោង ទើបភ្លើងរលត់ទាំងស្រុង។ អ្នកលក់ជាច្រើននៅទីនេះបាននិយាយថា ពួកគេបានបាត់បង់សត្វចិញ្ចឹមមួយចំនួនធំដោយសារតែភ្លើងឆេះ ដូចជាត្រីលម្អ ឆ្មា ឆ្កែ ស្វាជាដើម ហើយថែមទាំងមានពូជកម្រនិងអសកម្មដែលមានតម្លៃផ្សេងទៀតផងដែរ។

Meecha អាយុ ៣៦ ឆ្នាំជាបុគ្គលិកនៃហាងលក់សត្វចិញ្ចឹមនៅទីនេះ បាននិយាយថា នាងមានការតក់ស្លុតយ៉ាងខ្លាំងនៅពេលដែលនាងរត់គេចពីភ្លើង ខណៈពេលដែលនាងកំពុងដេកក្នុងហាង។ ជាសំណាងល្អ នាងក៏បានឡើងតាមបង្អួច ហើយរត់ទៅរកកន្លែងមានសុវត្ថិភាព។ ទោះជាយ៉ាងណាហាងរបស់ Meecha គឺមានលក់សត្វស្លាបដ៏កម្រជាច្រើនដែលពួកវាសុទ្ធតែមានតម្លៃថ្លៃ ប៉ុន្តែត្រូវបានងាប់អស់គ្មានសល់។

ម្ចាស់ហាងម្នាក់ទៀតក្នុងផ្សារ ក៏បាននិយាយដែរថា ហាងរបស់លោកនៅត្រើយម្ខាងនៃផ្លូវ ដូច្នេះមិនមានផលប៉ះពាល់អ្វីឡើយចំពោះសត្វចិញ្ចឹមរបស់លោក។ លោកបានបន្តទៀតថា ហាងរបស់លោកគឺមានសត្វកម្រជាច្រើនប្រភេទ ដែលសត្វនីមួយៗមានតម្លៃដល់ទៅ ១០ ម៉ឺនបាតឯណោះ (ប្រហែល ២,៧០០ ដុល្លារអាមេរិក)។ គួរបញ្ជាក់ដែរថា សម្រាប់មូលហេតុនៃឧបទ្ទវហេតុនេះបច្ចុប្បន្នគឺកំពុងត្រូវបានស៊ើបអង្កេត។ ទោះជាយ៉ាងនេះក្តី ប្រជាពលរដ្ឋជាច្រើននាក់ដែលនៅក្បែរនោះបាននិយាយថា មូលហេតុនៃអគ្គិភ័យនេះ អាចមកពីផ្ទុះស្សេចរន្តអគ្គិសនីចេញពីហាងលក់កូនឆ្កែ ខណៈម្ចាស់បានបើកភ្លើងពេញមួយយប់ ដើម្បីជួយឱ្យសត្វឆ្កែមានបរិយាកាសកាន់តែមានផាសុកភាព៕

ប្រទេសថៃ ៖ កាលពីមុន អ្នកនាង អ៊ីវ សាវ៉ាឡាក់ គឺជាតារាចម្រៀងល្បីឈ្មោះម្នាក់នៅប្រទេសថៃ ហើយនាងមានផ្ទះ២ខ្នង និងមានប្រាក់រហូតដល់ជាង១០លានបាត ។ ការងារប្រចាំថ្ងៃរបស់នាង គឺដើរច្រៀងនៅតាមទូរទស្សន៍ទូទាំងប្រទេសថៃ ប៉ុន្តែជីវិតរបស់នាងបានផ្លាស់ប្តូរទាំងស្រុង ហើយបច្ចុប្បន្ននេះ នាងធ្លាក់ខ្លួនក្រីក្រ និងក្លាយជាមនុស្សអនាថា គ្មានផ្ទះសម្បែង ។

អ្នកប្រើប្រាស់ TikTok ម្នាក់ឈ្មោះ «pramotpanket» បានបង្ហោះវីដេអូស្ត្រីអនាថាម្នាក់ ដែលច្រៀងពិរោះមានទឹកដមដូចតារាចម្រៀងអាជីព ហើយធ្វើឱ្យអ្នកទស្សនាវីដេអូចាប់អារម្មណ៍ និងភ្ញាក់ផ្អើលយ៉ាងខ្លាំងពីសំឡេងរបស់ស្រ្តីអនាថា ។ ក្រោយមក អ្នកលេងបណ្តាញសង្គមព្យាយាមស្វែងរកព័ត៌មានបន្ថែមរហូតដឹងថា ស្ត្រីអនាថានេះឈ្មោះ អ៊ីវ សាវ៉ាឡាក់ ជាអតីតតារាចម្រៀងដ៏ល្បីមួយរូប ។

ក្នុងការងារតន្ត្រី នាង អ៊ីវ សាវ៉ាឡាក់ មានឈ្មោះមួយទៀតថា អេ សាក់ឡេតេ ហើយនាងធ្លាប់ច្រៀងនៅតាមភោជនីយដ្ឋាន និងកម្មវិធីផ្សេងៗនៅស្រុកស៊ីឃីវ ខេត្តនគរាជសីម៉ា ។ ក្រៅពីនេះ នាងធ្លាប់ចូលរួមប្រកួតច្រៀងក្នុងកម្មវិធីទូរទស្សន៍ល្បីៗផងដែរ ។ ប៉ុន្តែដោយសារនាងមានអាយុកាន់តែច្រើន និងសេដ្ឋកិច្ចគ្រួសារមិនល្អ ទើបធ្វើឱ្យនាងលាឈប់ពីការងារតន្ត្រី និងបាត់មុខពីផ្នែកតន្ត្រីអស់រយៈពេលជាច្រើនឆ្នាំ រហូតក្លាយជាស្រីអនាថានាពេលបច្ចុប្បន្ន ដែលគេបានឃើញក្នុងវីដេអូ TikTok ។

បច្ចុប្បន្ន (ឆ្នាំ២០២៤) អតីតតារាចម្រៀងរូបនេះបានស្នាក់នៅជាមួយអ្នកជិតខាង គឺអ្នកស្រី សេណក់ ឆបសុក អាយុ៤៦ឆ្នាំ ហើយនាង អ៊ីវ ប្រាប់ថា មានអារម្មណ៍រំភើបណាស់ជាមួយការផ្សព្វផ្សាយពីជីវិតរបស់នាងក្នុងបណ្តាញសង្គមពេលនេះ ។

អ្នកស្រី សេណក់ រៀបរាប់ថា បានស្គាល់នាង អ៊ីវ យូរហើយ តាំងពីនាងកំពុងល្បីល្បាញមកម៉្លេះ ក្រោយមក នាងក៏បាត់មុខពីសង្គម ។ អ្នកស្រីបានជួបនាងម្តងទៀតកាលពី៣ឆ្នាំមុន ពេលនោះ នាងគ្មានទីពឹងទេ ហើយនាងដេកមុខបន្ទប់ទឹកផ្សារនៅស្រុកស៊ីឃីវ ។ អ្នកស្រីចាំមុខបាន ក៏បបួលនាងមករស់នៅផ្ទះជាមួយគ្នា ព្រោះអាណិត ដោយសារនាងធ្លាប់មានជីវិតស្រស់បំព្រង បែរជាធ្លាក់ខ្លួនបែបនេះ ។

ចំណែកលោក ថេវ៉ាន់ ឆៃចាន់ធឹក អាយុ៣៧ឆ្នាំ ជាក្មួយប្រុសរបស់នាង អ៊ីវ និយាយថា កាលពីមុន លោកធ្លាប់នៅក្រុមតន្ត្រីជាមួយនាង និងដើរច្រៀងពាសពេញប្រទេស ប៉ុន្តែក្រោយមក ថៅកែក៏បបួលនាង អ៊ីវ ទៅថតចម្រៀងដាក់អាល់ប៊ុមនៅទីក្រុងបាងកក ។ ពេលនោះ នាងបានជួបតារាចម្រៀងល្បីៗជាច្រើននាក់ ហើយលោក ថេវ៉ាន់ ក៏ត្រេកអរផងដែរ ប៉ុន្តែបន្ទាប់ពីនោះ លោកពុំបានជួបនាងទៀតទេ ។ លោកបានជួបនាងលើកចុងក្រោយ គឺពេលនាងញៀនថ្នាំ និងបាត់បង់ស្មារតីជាមនុស្ស ។

បច្ចុប្បន្ន នាង អ៊ីវ សាវ៉ាឡាក់ អាយុ៤៦ឆ្នាំ បានរៀបរាប់ពីខ្សែជីវិតរបស់ខ្លួនប្រាប់អ្នកសារព័ត៌មានថា នាងចូលចិត្តច្រៀងតាំងពីក្មេងមកម៉្លេះ ។ ពេលនាងអាយុ១៥ឆ្នាំ រៀនថ្នាក់មធ្យមសិក្សា នាងចូលចិត្តដើរមើលការប្រគំន្ត្រីក្នុងវត្តអារ៉ាមនៅខេត្តនគរាជសីម៉ា ។ ដូច្នេះ ធ្វើឱ្យនាងចាប់អារម្មណ៍ការច្រៀង និងស្ម័គ្រចិត្តធ្វើជាអ្នករាំតាំងពីពេលនោះមក ។ ពេលធ្វើជាអ្នករាំ នាងក៏ហាត់ច្រៀងផងដែរ រហូតក្លាយជាតារាចម្រៀងតាមក្តីប្រាថ្នា និងដើរច្រៀងនៅទូទាំងប្រទេសអស់រយៈពេល៧ឆ្នាំ ។

ក្រោយមក ម្ចាស់ហាងបានបបួលនាងទៅច្រៀងដាក់អាល់ប៊ុមនៅទីក្រុងបាងកក ដោយនាងដាក់ឈ្មោះខ្លួនឯងថា អេ សាក់ឡេតេ ។ រីឯអាល់ប៊ុមចម្រៀងដំបូងរបស់នាង មានចម្រៀង១១បទ ហើយចម្រៀងដែលធ្វើឱ្យនាងល្បីល្បាញ គឺបទ «ស្ទះចរាចរណ៍» ។ ពេលនោះ នាងបានច្រៀងនៅតាមកន្លែងប្រគំតន្រ្តីផ្សេងៗទូទាំងប្រទេស និងបង្ហាញមុខក្នុងកញ្ចក់ទូរទស្សន៍ជាច្រើន ។

ក្រៅពីនេះ នាងមានជំនួយការផ្ទាល់ខ្លួនផងដែរសម្រាប់ចាត់ចែងការងារ ហើយនាងទទួលបានប្រាក់ចំណូលច្រើនពីការងារសិល្បៈ រហូតដល់មានប្រាក់រាប់លានបាត ។ នាងបានទិញផ្ទះធំចំនួន២ខ្នងនៅស្រុកសូងណឺន ខេត្តនគរាជសីម៉ា ប៉ុន្តែកេរ្តិ៍ឈ្មោះនាងក៏ចាប់ផ្តើមធ្លាក់ចុះបន្តិចម្តងៗ ។ ដូច្នេះ នាងបានដើរលេងយប់រហូតដល់ញៀនស្រា និងប្រើប្រាស់ថ្នាំញៀន ។

ចុងក្រោយ សុខភាពរបស់នាងចាប់ផ្តើមចុះខ្សោយ ហើយការងារច្រៀងក៏បាត់បង់ ទើបម្ចាស់ហាងពុំបន្តកិច្ចសន្យា ហើយនាងក៏ដើរស៊ីឈ្នួលច្រៀង ។ រីឯប្រាក់រាប់លានបាតនោះបានបាត់បង់ដោយសារការដើរលេង, ផឹកស្រា និងប្រើថ្នាំញៀន ។ ចុងក្រោយ នាងក៏សម្រេចចិត្តលក់ផ្ទះទាំង២ខ្នង គឺផ្ទះ១ខ្នងលក់តម្លៃត្រឹមតែ២សែនបាតប៉ុណ្ណោះ ។ ពេលលក់ផ្ទះរួច នាងក៏យកប្រាក់ដែលបានពីលក់ផ្ទះមកដើរលេង និងចាយវាយបន្តរហូតដល់អស់ពីខ្លួន ត្រឹមតែរយៈពេល៤ឆ្នាំប៉ុណ្ណោះ ។

កាលពី៥ឆ្នាំមុន សាច់ញាតិបាននាំនាងទៅព្យាបាលជំងឺផ្លូវចិត្តនៅមន្ទីរពេទ្យ ។ ពេលចេញពីមន្ទីរពេទ្យវិញ នាងក៏ក្លាយជាមនុស្សអនាថារស់នៅតាមផ្សារ រហូតមានអ្នកឃើញនាងដេកមុខបន្ទប់ទឹកផ្សារ និងនាំនាងមករស់នៅជាមួយ ។ នាងក្លាយជាមនុស្សអនាថាបែបនេះ ដោយសារនាងចូលចិត្តរស់នៅមានសេរីភាព ចង់ទៅដើរលេងកន្លែងណាស្រេចតែចិត្ត ហើយនាងគ្មានគោលដៅជីវិតច្បាស់លាស់ទេ ។

ប៉ុន្តែដោយសារនាងចូលចិត្តច្រៀង ទើបពេលមានកម្មវិធីនៅកន្លែងណាមួយ នាងតែងតែទៅរាំច្រៀងលើឆាកជានិច្ច ។ មនុស្សខ្លះនៅចាំមុខនាងថា ជាអតីតតារាចម្រៀង ពួកគេក៏ឱ្យលុយធីប ហើយនាងក៏លុយធីបនេះទៅទិញបាយហូប ។ ចុងក្រោយ នាងប្រាប់ថា នាងក៏នឹកឃើញពីជីវិតជាតារាចម្រៀងផងដែរ ហើយបើមានឱកាស នាងចង់ត្រឡប់ទៅច្រៀងនៅលើឆាកតន្ត្រីម្តងទៀត ៕