ក្រោយពីរៀបការតាមប្រពៃណីទំនៀមទម្លាប់ខ្មែររួចអ្នកនាង រឹម លក្ស្មី ភរិយារបស់តារាចម្រៀង ជា សុជាតិ នៃក្រុមក្មេងខ្មែរបានអារម្មណ៍មិនសប្បាយចិត្តទាំងប៉ះពាល់កិត្តិយសនិងផ្លូវចិត្តបន្ទាប់ពីមានការលើកឡើងថានាងធ្លាប់រៀបការមានប្តីជាជនជាតិគេ និងមានការលើកឡើងថានាងដូចជាអ្នកបង្កើតមាតិកាម្នាក់។ រឿងនេះអ្នកនាងបានបញ្ជាក់យ៉ាងច្បាស់លាស់ថានាងពុំធ្លាប់រៀបការកាលពីមុននោះទេ ហើយក៏មិនមែនជាអ្នកបង្កើតមាតិកាវីដេអូដូចដែលគេបានបង្ហោះដែរ។

នៅល្ងាចថ្ងៃទី២៩ មេសា អ្នកនាង រឹម លក្ស្មី បានបង្ហោះសំណេរយ៉ាងដូច្នេះថា « ជម្រាបសួរពុកម៉ែបងប្អូនទាំងអស់គ្នា ដើម្បីកុំឱ្យមានការច្រលំនាងខ្ញុំ សុំបកស្រាយ នាងខ្ញុំ រឹម លក្ស្មី គឺជាអ្នកគ្រប់គ្រងរឺក៏ហៅថា Manager របស់ក្រុមក្មេងខ្មែរ ហើយក៏គឺជាភរិយារបស់បង ជា សុជាតិ ដូចគ្នា ។ នាងខ្ញុំ post នេះក្នុងគោលបំណងកុំឱ្យមានការចល្រំរូបនាងខ្ញុំទៅអ្នកផ្សេង រហូតដល់មានការ post និង comment ថារូបនាងខ្ញុំធ្លាប់មានប្តីរួចហើយ ធ្លាប់មានប្តីជនជាតិគេ ។ល។ ហើយវាពិតជាប៉ះពាល់ដល់កិត្តិយសនិង ផ្លូវចិត្តនាងខ្ញុំខ្លាំងមែនទែន»។

ភរិយា ជា សុជាតិ បានបញ្ជាក់ថា ទី១ នាងមានការងារជា Artist Manager ៥ឆ្នាំមកហើយ ហើយមិនមែនជាអ្នកបង្កើតមាតិកាវីដេអូដូចដែលគេបាន Post ទេ។ទី២
នាងមានឈ្មោះថា លក្ស្មី អាយុ២៨ឆ្នាំ នៅលីវ ពុំធ្លាប់រៀបការពីមុនមកទេ ហើយនាងនិង សុជាតិស្គាល់គ្នា៨ឆ្នាំហើយ ហើយពួកគេទាក់ទងគ្នា២ឆ្នាំហើយ។

គួរបញ្ជាក់ថា ជា សុជាតិ បានដឹកដៃអ្នកគ្រប់គ្រងរបស់ខ្លួនរៀបការកាលពីថ្ងៃទី២៥ ខែមេសា នេះបន្ទាប់ពីអ្នកទាំងពីរបានភ្ជាប់ពាក្យជាមួយគ្នាកាលពីថ្ងៃទី១៤ ខែមីនា ឆ្នាំ២០២៤៕

ស្រីស្អាត ឡូរីន ដែលជាសង្សារតារារ៉េបល្បីឈ្មោះ វណ្ណដា កាន់តែលេងខ្លួនស៊ិ.ចស៊ី បញ្ចេញដើមទ្រូងទ្រលុកទ្រលុន ដោយអ្នកខ្លះក៏សរសើរភាពស្រស់ស្អាតរបស់នាងចំណែកឯអ្នកខ្លះថានាងធ្វើខ្លួនខុសពីមុនប្រែប្រួលរឿងការស្លៀកពាក់។ ជុំវិញការលើកឡើងផ្សេងៗ ឡូរីន ថាកាលពីមុននាងនៅក្មេងហើយគ្រួសារមិនចូលចិត្តឱ្យនាងស្លៀកពាក់ស៊ិចស៊ីនោះទេ ប៉ុន្តែពេលនេះនាងអាយុ២១ឆ្នាំហើយ ណាមួយគ្រួសារនាងក៏បើកចិត្តរឿងការស្លៀកពាក់ អាយុក៏សមល្មមទើបនាងស្លៀកពាក់អីដែលនាងចង់ស្លៀក។

ជឿជាក់ថាអ្នកគាំទ្រមួយចំនួនធំស្គាល់មកហើយថាស្រីស្អាត ឡូរីន ជាសង្សាររបស់តារាល្បីឈ្មោះ វណ្ណដា ដែលមានទាំងភាពស្រស់ស្អាត ពូកែធ្វើម្ហូប និងតាមមើលថែគាំទ្រ វណ្ណដា ស្ទើរគ្រប់ពេលវេលា ខណៈក្នុងថ្ងៃខួបកំណើតឡូរីន អ្នកទាំងពីរបានចំណាយពេលវេលាយ៉ាងផ្អែមល្ហែនៅកន្លែងយ៉ាងប្រណីត។ សម្រាប់មួយរយៈចុងក្រាយនេះអ្នកគាំទ្រក៏សង្កេតឃើញថា ឡូរីន កាន់តែបង្អួតរាងស៊ិចស៊ីបញ្ចេញដើមទ្រូងយ៉ាងស្រស់ស្អាតបង្ហោះរូបភាពនៅលើបណ្តាញសង្គមផងដែរ។

កាលពីពេលថ្មីៗនេះទៀតសោត ឡូរីន បាន add Story បាននិយាយពីការស្លៀកពាក់របស់នាងខុសប្លែកពីមុននិងបានបញ្ជាក់ថានាងមិនបានកែកុនចំណុចកន្លែងណានោះទេ ប្រសិនបើនាងកែកុនមែននាងមិនខ្មាសនឹងប្រាប់អ្នកគាំទ្រដូចគ្នា ប៉ុន្តែនាងពេញចិត្តនឹងរូបភាពខ្លួនឯងបច្ចុប្បន្ន។

ឡូរីន បាននិយាយថា មិនមែនកាលពីមុននាងមិនហ៊ានស្លៀកពាក់ស៊ិចស៊ីនោះទេប៉ុន្តែគួ្រសាររបស់នាងមិនចូលចិត្តបែបហ្នឹង តែឥឡូវដល់អាយុមួយត្រូវពាក់អីដែលចង់ពាក់។ សង្សារ វណ្ណដា បាននិយាយទៀតថា កាលពីមុននាងគិតថាអាយុនាងនៅស្ទើរអាយុ១៩ ២០ តែអីឡូវនាង២១ឆ្នាំហើយគ្រួសារនាងក៏បើកចិត្តរឿងការស្លៀកពាក់នេះដូចគ្នា។

ស្រីស្អាតរូបនេះបាននិយាយទៀតថា នាងមានការផ្លាស់ប្តូរលើរូបរាងរបស់នាង ដោយកាលពីមុននាងអត់បញ្ចេញពាក់អាវប៉ុន្មានជាន់ដើម្បីបិទបាំង ដើម្បីកុំឱ្យថាឆ្ងល់តែនៅតែមានអ្នកឆ្ងល់ទាល់តែបានហើយនាងពាក់បែបនេះជារឿយៗពីមុនមកដែរ។

ជាមួយគ្នានេះ ឡូរីន ថាការកែឬផ្លាស់ប្តូរខ្លួនឯងមិនមែនជារឿងអាក្រក់គ្រាន់តែជាការបំពេញចំណុចខ្វះខាតដែលមនុស្សស្រីផ្សេងៗចង់បំពេញខ្លួនឯង។ នាងក៏បញ្ជាក់ថាបើនាងកែមែននាងមិនខ្មាសនឹងប្រាប់គេទេ ប៉ុន្តែនាងមិនបានកែចំណុចណាមួយឡើយ ហើយនាងក៏ពេញចិត្តរូបរាងខ្លួនឯងនាពេលបច្ចុប្បន្ននេះ៕

កាលពីមួយរយៈមុនជុំវិញការជ្រើសរើសប្រធានសមាគមសិល្បករថ្មីបានផ្ទុះកក្រើកនិងមានភាពចម្រូងចម្រាសរួចមកហើយ ខណៈអ្នកនាង ម៉េង កែវពេជ្ជតា និងជំទាវ ចន ច័ន្ទលក្ខិណា ហាក់មានភាពរកាំរកូសមិនស៊ីចង្វាក់គ្នាប៉ុន្តែមិនបើកចំហចំៗតែម្តងទេ។ យ៉ាងណាមិញនាពេលថ្មីៗនេះស្រាប់តែភាគីទាំងពីរបានបើកចំហចំៗតែម្តងនិងបានផ្លោងពាក្យសម្តីទៅវិញទៅមកនៅលើបណ្តាញសង្គម។

កាលពីថ្ងៃទី២៧ មេសា អ្នកនាង ម៉េង កែវពេជ្ជតា បានបង្ហាញចង្ងល់របស់ខ្លួនចំនួនពីរទៅកាន់សមាគមសិល្បករ ក្នុងការចុះឈ្មោះទទួលបណ្ណបញ្ជាក់សិទ្ធិការបោះឆ្នោត ជ្រើសរើសប្រធានថ្មីបានបញ្ចប់មុនថ្ងៃកំណត់ដោយសេចក្តីប្រកាសមុនមិនបានបញ្ជាក់ច្បាស់លាស់។ តារាចម្រៀងរូបនេះក៏បង្ហាញពីចម្ងល់មួយទៀតនោះគឺសិល្បករ សិល្បការិនី មានជាច្រើនពាន់នាក់ ហេតុអ្វីឱ្យមានសិទ្ធិបោះឆ្នោតតែ៦០០នាក់។

ក្រោយមក ជំទាវ ចន ច័ន្ទលក្ខិណា ប្រធានសមាគមសិល្បករបានបង្ហោះលិខិតចំនួន២នៅថ្ងៃទី២៩ មេសា ឆ្លើយតបទៅកាន់អ្នកនាង ម៉េង កែវពេជ្ជតា ដោយមានអត្ថន័យថា «
ចំពោះសំណួរ និង ចម្ងល់របស់លោកស្រី ម៉េង កែវពេជ្ជតា ខ្ញុំទុកតួនាទីជូន ឯកឧត្តមប្រធានគណកម្មការដែលជាតំណាងក្រសួងវប្បធម៌ និង គណកម្មការចម្រុះក្នុងការរៀបចំការបោះឆ្នោតជាអ្នកបកស្រាយ ព្រោះ កិច្ចការងារដំណើរការបោះឆ្នោត គឺ សមាគមត្រឹមតែជាអ្នកសម្របសម្រួលកិច្ចការងារដំណើរការបោះឆ្នោតដែលតម្រូវការតាមគណកម្មការ និង សម្រេចតាមពួកគាត់»។

ការឆ្លើយតបនេះ អ្នកនាង ម៉េង កែវពេជ្ជតា បានលើកឡើងនៅលើបណ្តាញសង្គមវិញថា «
សួរពីគោ ទៅឆ្លើយក្របី នេះឬជាចម្លើយដែលឈ្មោះជាអ្នកដឹកនាំត្រូវឆ្លើយ ? ចាកប្រធានយ៉ាងនេះហើយនៅនាំគ្នាមកដៀលខ្ញុំផង ! អ្នកខ្លះទាំងចាស់ទាំងក្មេង ស្រែកអួតប្រាប់គេថាចិត្តស្ងប់ តែតាមពិតក្នុងចិត្តពុះកញ្ជ្រោលរោលរាលដោយតណ្ហា លោភៈ ទោសៈ មោហៈ លែងដឹងខុសត្រូវ លែងដឹងបាបបុណ្យ។ ឱ្យវារលាយទាំងអស់គ្នាតែម្តងទៅ ហាសហា ! បើមិនយល់ឬធ្វើមិនយល់ចាំខ្ញុំ Live សួរម្តងទៀត តែកុំចោទខ្ញុំថាយកឈ្មោះពួកអ្នកមកបង្ហោះឱ្យខ្មាសគេឱ្យសោះ ព្រោះពួកអ្នកទេដែលនាំគ្នាចំអកខ្ញុំមុនទាំងបំពាន ។ Ok ចាំទទួលទៅ»។
នៅយប់ថ្ងៃទី២៩ អ្នកនាង ម៉េង កែវពេជ្ជតា បាន Live នៅលើបណ្តាញសង្គមដោយបាននិយាយពីរឿងរ៉ាវភាពអសមត្ថភាពរបស់ប្រធានសមាគម ឆ្លើយមិនចំសំណួររបស់ខ្លួនបង្វែរទៅរឿងផ្សេងដាក់បន្ទុកទៅកាន់ថ្នាក់លើដែលជាក្រសួងវប្បធម៌ទៅវិញ រួមទាំងរឿងរ៉ាវជាច្រើនទៀត។ ការចេញមក Live ជាថ្មីនេះរបស់អ្នកនាង ម៉េង កែវពេជ្ជតា ខាង ជំទាវ ចន ច័ន្ទលក្ខិណា បានបង្ហោះសារមួយថា «សូមថ្នាក់ដឹកនាំ និង ក្រសួងកិច្ចការនារីជួយមើលសកម្មភាពលោកស្រី ម៉េង កែវពេជ្ជតា ផង បើអ្នកសិល្បៈមានទង្វើដូចគាត់ជាសាធារណៈ តើភាពថ្លៃថ្នូររបស់អ្នកសិល្បៈនៅកន្លែងណា?»។

ជំទាវ ចន ច័ន្ទលក្ខិណា បានបង្ហោះវីដេអូមួយរបស់អ្នកនាង ម៉េង កែវពេជ្ជតា ដោយភ្ជាប់ជាមួយខ្លឹមសារថា «សូមថ្នាក់ដឹកនាំពិចារណា ហេតុអ្វីគាត់ហ៊ាននិយាយពាក់ព័ន្ធសម្តេច និង លោកជំទាវបែបនេះ ? តើការនិយាយរបស់គាត់ជាសាធារណៈតើយុត្តិធម៌សម្រាប់បេក្ខភាពផ្សេងៗដែលបានឈរឈ្មោះដែរឬទេ ? សូមសម្តេចពុកមេត្តាជ្រាប កូនសុំអភ័យទោសសម្តេចពុកទុកជាមុន ការពិតកូនមិនចង់ផុសទេ តែគាត់បង្កបញ្ហាមកសមាគមរហូត ហើយគាត់បានកកូរកកាយកិច្ចការរបស់គណកម្មការរៀបចំការបោះឆ្នោតមិនឈប់»។

ម៉ោង៣ជាងទៀបភ្លឺថ្ងៃទី៣០ មេសា អ្នកនាង ម៉េង កែវពេជ្ជតា បានបង្ហោះរូបភាពថតរូបអេក្រង់ (Screen Shot) ពីអ្នកមួយចំនួនបានស៊ែរការបង្ហោះរបស់ប្រធានសមាគមសិល្បកររឿងការបកស្រាយដែលមានលិខិតចំនួនពីរដោយអ្នកនាង ម៉េង កែវពេជ្ជតា បានដាក់ចំណងជើងថា «យើងសួរសំនួរងាយៗ បើខ្លួនឆ្លើយមិនចេញក៏ហីចុះ ចាំបាច់អីនាំគ្នីគ្នាមកដៀលត្មះ មើលងាយមើលថោកដូចនេះទៅវិញ ? ? សម្តីពួកគេទាំងនេះគឺបានមាក់ងាយ ចោទប្រកាន់ ចាក់រុកញុះញុងបង្កឱ្យមានការរើសអើងចំពោះខ្ញុំ ! ចាំណា៎ ពួកអ្នកបានបំពានខ្ញុំមុន»។

នៅព្រឹកថ្ងៃទី៣០ មេសា អតីតតួឯកស្រី ចន ច័ន្ទលក្ខិណា ក៏បានបង្ហោះវីដេអូខ្លីពីសម្តីរបស់អ្នកនាង ម៉េង កែវពេជ្ជតា ដោយភ្ជាប់មកជាមួយសម្តីថា «ស្តាប់សំដីសិល្បការនីរៀមច្បង»។
ជម្លោះពាក្យសម្តីដ៏ក្តៅគគុកនេះកំពុងសាយភាពពេញបណ្តាញសង្គមខណៈពេលនេះអ្នកនាង ម៉េង កែវពេជ្ជតា និងជំទាវ ចន ច័ន្ទលក្ខិណា គឺបើកចំហចំៗតែម្តងនិងបង្ហាញជាសាធារណៈទៅកាន់ទស្សនិកជន៕

តារាកំប្លែង នាយ ធុង ដែលមានឈ្មោះដើមថា ម៉ាត់ ចាន់ថន បានទទួលមរណភាពហើយ កាលពីព្រឹកថ្ងៃទី១ ខែឧសភា ឆ្នាំ២០២៤ នេះបើយោងតាមការបង្ហោះតាមរយៈផេកផ្លូវការរបស់តារាកំប្លែងរូបនេះ។

នាយ ធុង បានចាប់អាជីពសិល្បៈប្រមាណជាង១១ឆ្នាំមកហើយ ដោយសារនាយមាននិស្ស័យស្រឡាញ់ចូលចិត្តសិល្បៈតាំងពីនៅតូច។

ដំបូងឡើយ នាយ ធុង ត្រូវបានអ្នកដឹកនាំកម្មវិធី៩នាទីនៃសំណើចរបស់ស្ថានីយទូរទស្សន៍ប៉ុស្តិ៍លេខ៩ ហៅចូលឱ្យនិយាយកំប្លែង ក្រោយមករូបគេក៏បានចូលក្លិបហាត់រៀនសិល្បៈ ហើយក៏មានការងារសិល្បៈ បន្តិចម្តងៗចាប់ពីពេលនោះមក មកដល់សព្វថ្ងៃ។

ដោយឡែក មូលហេតុនៃការស្លាប់ មិនត្រូវបានបញ្ជាក់ឱ្យដឹងនោះទេ ក៏ប៉ុន្តែមហាជនសង្ស័យមកពីជំងឺធាត់ឡើងគីឡូរបស់គាត់ ទើបបណ្តាលឱ្យរូបលោកចាកចេញទៅលឿនបែបនេះ៕