ប្រទេសអង់គ្លេស ៖ កាលពីថ្ងៃទី៦ ខែកក្កដា ឆ្នាំ២០២៤ ប្រទេសអង់គ្លេសបានរៀបចំការប្រកួតសត្វខ្យងវារដើម្បីដណ្តើមជើងឯកពិភពលោក ដែលមានបេក្ខជនយកខ្យងជាច្រើនក្បាលមកចូលរួមប្រកួត និងមានភ្ញៀវទេសចរមកទស្សនាជាច្រើននាក់ ។ ការប្រកួតនេះរៀបចំឡើងនៅភូមិខុមហែម តំបន់ន័រហ្វស ហើយបើទោះជាក្នុងអំឡុងពេលប្រកួតមានភ្លៀងធ្លាក់ក្តី ប៉ុន្តែវាពុំមែនជាឧបសគ្គដល់ការប្រកួតទេ ។

នៅឆ្នាំ២០២៤នេះ ខ្យងដែលទទួលបានជ័យជម្នះក្នុងការប្រកួតមានឈ្មោះថា «ជេស» ដែលបានវារទៅដល់ចំណុចគោលដៅនៅរង្វង់មូលពណ៌ខ្មៅ លឿនជាងខ្យងផ្សេងៗទៀត គឺចំណាយពេល៤នាទី និង៣វិនាទី ។

ទោះយ៉ាងណា បើទោះជាខ្យង «ជេស» អាចវារទៅដល់គោលដៅបានរហ័សជាងខ្យងផ្សេងៗក្តី ប៉ុន្តែវាពុំអាចយកឈ្នះការប្រកួតនាពេលកន្លងមកទេ ។ កាលពីឆ្នាំ១៩៩៥ ខ្យងឈ្មោះ «អាឈី» បានវារទៅដល់គោលដៅ ដោយចំណាយពេលត្រឹមតែ២នាទី និង២០វិនាទីប៉ុណ្ណោះ ។

ការប្រកួតលើកនេះ បេក្ខជនបានយកខ្យងមកចូលរួមប្រកួត ចំនួន១៥០ក្បាល ដើម្បីដណ្តើមជើងឯកពិភពលោក ដែលប្រទេសអង់គ្លេសបានរៀបចំការប្រកួតខ្យងវារបែបនេះ តាំងពីឆ្នាំ១៩៦០ មកម៉្លេះ ។ គេបានឃើញគណៈកម្មការម្នាក់ៗឈរពាក់អាវភ្លៀង ខណៈការប្រកួតរៀបចំនៅលើតុមួយ ដែលមានគំនូសរង្វង់មូលពណ៌ខ្មៅព័ទ្ធជុំវិញ និងមានរង្វង់មូលពណ៌ក្រហមនៅចំណុចកណ្តាល ហើយបើខ្យងណាអាចវារទៅដល់រង្វង់មូលពណ៌ខ្មៅមុនគេ នឹងទទួលបានជ័យជម្នះ ។

គួរបញ្ជាក់ថា កាលពីថ្ងៃទី២៩ ខែមិថុនា ឆ្នាំ២០២៤ កន្លងមក ប្រទេសអង់គ្លេសធ្លាប់បានរៀបចំការប្រកួតជីកសត្វជន្លេន (World Worm Charming Championship) ដើម្បីដណ្តើមជើងឯកពិភពលោក ផងដែរ គឺនៅទីក្រុងឈេសឃៀ ។ ពេលនោះ មានបេក្ខជនចូលរួមប្រកួតជាច្រើននាក់ ដែលបានយកឧបករណ៍ជាច្រើនប្រភេទមកជីកជន្លេន ៕

បរទេស៖ ក្រុមហ៊ុន Microsoft ក្នុងប្រទេសចិនកាលពីពេលថ្មីៗនេះបានចេញច្បាប់តម្រូវឱ្យបុគ្គលិកទាំងអស់របស់ខ្លួនប្រើ iPhone ជំនួសឱ្យទូរសព្ទ Android ដើម្បីធ្វើការ ដោយហេតុផលសុវត្ថិភាព ហើយអ្នកដែលមិនមាននឹងត្រូវផ្តល់ឱ្យ iPhone 15 នេះបើយោងតាមការចុះផ្សាយរបស់ Bloomberg នៅថ្ងៃទី៩ ខែកក្កដា ឆ្នាំ២០២៤។ ដូច្នេះការចេញច្បាប់ថ្មីដែលតម្រូវឱ្យបុគ្គលិកទាំងអស់ប្រើ iPhone ជំនួសឱ្យទូរសព្ទ Android គឺជាផ្នែកមួយនៃកិច្ចខិតខំប្រឹងប្រែងក្នុងការពង្រឹងសមត្ថភាពសុវត្ថិភាពអាជីវកម្ម។

អ្នកតំណាងក្រុមហ៊ុន Microsoft បាននិយាថា ក្រុមហ៊ុនបានចេញច្បាប់ថ្មីនេះតាំងពីចុងឆ្នាំមុនមកម្លេះនៅសហរដ្ឋអាមេរិក ប៉ុន្តែទើបតែចាប់ផ្តើមច្បាប់នេះនៅក្នុងប្រទេសចិនទេ។ អ្នកតំណាងរូបនេះបានបន្តទៀតថា ហេតុផលគឺមកពីការតម្រូវឱ្យបុគ្គលិកប្រើប្រាស់កម្មវិធីផ្ទៀងផ្ទាត់ រួមទាំង Microsoft Authenticator និង Identity Pass នៅពេលចូលប្រើធនធានរបស់ក្រុមហ៊ុន។ ទោះជាយ៉ាងណាកម្មវិធីទាំងនេះសុទ្ធតែមាននៅលើ App Store និង Google Play ប៉ុន្តែដោយសារ Google មិនមាននៅក្នុងប្រទេសចិនឡើយ ទើបក្រុមហ៊ុនសម្រេចឱ្យបុគ្គលិកចូលប្រើកម្មវិធីដែលត្រូវការ ដូចជាឧបករណ៍ដែលទទួលពី iOS។

ហេតុនេះជាមួយនឹងការផ្លាស់ប្តូរខាងលើ បុគ្គលិករបស់ Microsoft China គឺមិនអាចប្រើប្រាស់ឧបករណ៍ Xiaomi, Huawei, Redmi, OnePlus និង Oppo សម្រាប់ការងារបាននោះទេ ហើយអ្នកដែលមិនមាន iPhone នឹងត្រូវបានផ្តល់ជូន iPhone 15។ បើយោងតាមអ្នកវិភាគ ការផ្លាស់ប្តូររបស់ Microsoft គឺជាបញ្ហាផ្ទៃក្នុង ប៉ុន្តែអាចបង្កើនភាពខុសគ្នារវាងប្រព័ន្ធអេកូផលិតផលរបស់ប្រទេសចិន និងពិភពលោក ដោយសារវាដកឧបករណ៍ Android ដោយប្រយោលចេញពីកន្លែងធ្វើការ។

គួរបញ្ជាក់ដែរថា កាលពីខែកញ្ញាឆ្នាំមុន WSJ បានរាយការណ៍ថាប្រទេសចិនក៏ធ្លាប់បានហាមឃាត់បុគ្គលិករដ្ឋាភិបាលមិនឱ្យប្រើប្រាស់ iPhone ដែរ។ ដូច្នេះក្រុមហ៊ុនផលិតទូរសព្ទចិនទាំងអស់គឺសុទ្ធត្រូវប្រើប្រព័ន្ធប្រតិបត្តិការ Android ជាប្រព័ន្ធប្រតិបត្តិការ ទោះបីជា Google ត្រូវបានហាមឃាត់ក៏ដោយ ក៏ពួកគេត្រូវតែបង្កើតប្រព័ន្ធប្រតិបត្តិការ និងឃ្លាំងកម្មវិធីផ្ទាល់ខ្លួន៕

ប្រទេសដាណឺម៉ាក ៖ បច្ចុប្បន្ន សំរាមផ្លាស្ទិកនៅទូទាំងពិភពលោក មានត្រឹមតែ៩% ប៉ុណ្ណោះ ដែលត្រូវបានគេយកមកកែច្នៃដើម្បីប្រើប្រាស់ឡើងវិញ ។ រីឯសំរាមផ្លាស្ទិកនៅសល់៩១% ទៀត គេបានយកវាទៅដុតចោល ឬកប់ចោលនៅគំនរសំរាម ។

ផ្លាស្ទិកប្រភេទ Bioplastics ដែលប្រើប្រាស់សព្វថ្ងៃនេះ វាពុំអាចរលាយតាមធម្មជាតិបានទេ ។ ការរលាយរបស់ផ្លាស្ទិកប្រភេទនេះអាចចំណាយពេលជាច្រើនឆ្នាំ និងបណ្តាលឱ្យមានការបំពុលបរិស្ថានផងដែរ ដូចជា ៖ មីក្រូផ្លាស្ទិក ហើយយើងត្រូវតែមានវិធីពិសេសដើម្បីរំលាយវាក្នុងរោងចក្រ ។

ហេតុនេះ អ្នកស្រាវជ្រាវមកពីសាកលវិទ្យាល័យ Copenhagen ប្រទេសដាណឺម៉ាក បានផលិតផ្លាស្ទិកប្រភេទថ្មី ដែលអាចរលាយដោយខ្លួនឯងបាន១០០% ។ ផ្លាស្ទិកនេះផលិតពីម្សៅស្រូវ Barley ផ្សំជាមួយស្ករចម្រាញ់ពីមើមដំណាំ ដែលសល់ពីឧស្សាហកម្មផលិតស្ករ ។ មើមដំណាំនេះមានលក្ខណៈស្រដៀងគ្នានឹងស្ពៃបូកគោ ប៉ុន្តែវាមានមើមនៅក្រោមដី និងមានជាតិស្ករក្នុងមើម ស្មើប្រមាណ៨០% ។

លោកសាស្ត្រាចារ្យ Andreas Blennow មកពីសាកលវិទ្យាល័យ Copenhagen និងជាប្រធានក្រុមស្រាវជ្រាវនិយាយថា ផ្លាស្ទិកប្រភេទ Bioplastics ដែលប្រើប្រាស់បច្ចុប្បន្ន ពុំអាចរលាយបាន១០០% ទេ ហើយយើងត្រូវតែរំលាយវាក្នុងរោងចក្រប៉ុណ្ណោះ ។ ហេតុនេះ វាអាចធ្វើឱ្យកើតការបំពុលបរិស្ថាន ដូចជា ៖ មីក្រូផ្លាស្ទិក ។

ប៉ុន្តែផ្លាស្ទិកប្រភេទថ្មីអាចរលាយដោយខ្លួនឯងក្នុងធម្មជាតិ ត្រឹមតែរយៈពេល២ខែប៉ុណ្ណោះ បើទោះជាគេទុកវាចោលនៅក្រៅធុងសំរាមក៏ដោយ ។ គេអាចប្រើប្រាស់ផ្លាស្ទិកថ្មីនេះសម្រាប់វេចខ្ចប់ម្ហូបអាហារ និងវត្ថុផ្សេងៗតាមធម្មតា ដោយសារវាមានគុណភាពល្អជាងផ្លាស្ទិកធម្មតា, ធន់ជាមួយទឹក, រឹងមាំ និងមិនស្អិតដូចផ្លាស្ទិកទូទៅ ។ រីឯសារធាតុផ្សំសំខាន់របស់ផ្លាស្ទិកថ្មី គឺសារធាតុអាមីឡូស និងសែលុយឡូ ដែលសម្បូរនៅក្នុងដំណាំ ខណៈអ្នកស្រាវជ្រាវហៅវាថា «ណាណូសែលុយឡូស» ៕

បរទេស៖ កាលពីពេលថ្មីៗនេះ ប្រទេសជប៉ុនត្រូវបានគេព្យាករណ៍ថានឹងត្រូវការកម្មករបរទេសចំនួន ១ លាននាក់បន្ថែមទៀតនៅឆ្នាំ ២០៤០ ប្រសិនបើខ្លួនចង់សម្រេចបាននូវគោលដៅសេដ្ឋកិច្ចរបស់ខ្លួនក្នុងបរិបទនៃចំនួនប្រជាជនដែលកំពុងធ្លាក់ចុះ។
យោងតាមនាយកដ្ឋានស្រាវជ្រាវនៃទីភ្នាក់ងារសហប្រតិបត្តិការអន្តរជាតិជប៉ុន (JICA) បានប៉ាន់ប្រមាណថា បច្ចុប្បន្នប្រទេសនេះគឺមានជនបរទេសចំនួន ៥.៩១ លាននាក់ធ្វើការ។

ទោះជាយ៉ាងណានៅឆ្នាំ ២០៤០ ប្រទេសជប៉ុនទំនងនឹងខ្វះពលករបរទេសប្រហែល ១ លាននាក់បន្ថែមទៀត ដោយសារពលករបរទេសប្រមាណ ៦២.៣% នឹងចាកចេញពីប្រទេសនេះក្នុងរយៈពេល ៣ ឆ្នាំខាងមុខ។ មូលហេតុដែលពលករបរទេសចាកចេញពីប្រទេសជប៉ុន គឺដោយសារកំណើននៃបណ្តាប្រទេសផ្សេងទៀត ធ្វើឱ្យពលករបរទេសទំនងជ្រើសរើសធ្វើការនៅប្រទេសផ្សេងជាជាងប្រទេសជប៉ុន ដែលនេះធ្វើឱ្យកម្លាំងពលកម្មនៅក្នុងប្រទេសជប៉ុនត្រូវធ្លាក់ចុះ។

ខណៈកូរ៉េខាងត្បូង និងតៃវ៉ាន់ (ចិន) ឥឡូវនេះក៏ចង់ទាក់ទាញជនបរទេស ដើម្បីពង្រឹងកម្លាំងការងារដែលកំពុងធ្លាក់ចុះផងដែរ។ ពលករបរទេសត្រូវបានចាត់ទុកថាមានសារៈសំខាន់ខ្លាំងណាស់ចំពោះសេដ្ឋកិច្ចជប៉ុន ក្នុងបរិបទនៃចំនួនប្រជាជនវ័យចំណាស់ និងការថយចុះអត្រាកំណើត។ ហេតុនេះគិតត្រឹមខែតុលា ឆ្នាំ ២០២៣ ចំនួនជនបរទេសដែលធ្វើការក្នុងប្រទេសជប៉ុនគឺមានត្រឹមតែ ២.០៥ លាននាក់ប៉ុណ្ណោះ ស្មើនឹង ៣% នៃកម្លាំងពលកម្ម។

ទោះជាយ៉ាងណា រដ្ឋាភិបាលជប៉ុនបច្ចុប្បន្នបានកំពុងពង្រីកទិដ្ឋាការការងារទៅកាន់វិស័យជាច្រើន ហើយទន្ទឹមនឹងនោះក៏បានផ្សព្វផ្សាយដើម្បីបង្កលក្ខណៈងាយស្រួលសម្រាប់ប្រជាជនក្នុងការទទួលយកពលករអន្តោប្រវេសន៍។ គួរបញ្ជាក់ដែរថា រដ្ឋបាលរបស់នាយករដ្ឋមន្ត្រី Kishida Fumio សព្វថ្ងៃនេះគឺកំពុងប្រឈមមុខនឹងឧបសគ្គជាច្រើន ដោយសារការទម្លាក់តម្លៃប្រាក់យ៉េន និងប្រាក់ឈ្នួលទាប ធ្វើឱ្យប្រទេសនេះត្រូវប្រឹងប្រែងកាន់តែខ្លាំងក្នុងការប្រជែងយកទេពកោសល្យពិភពលោក។ ដូច្នេះចាប់តាំងពីដើមឆ្នាំមក ប្រាក់យ៉េនគឺបានធ្លាក់ចុះ ១២% ធៀបនឹងប្រាក់ដុល្លារ៕

ប្រទេសឥណ្ឌា ៖ ឥណ្ឌាបាននាំចេញអង្ករច្រើនបំផុតទៅក្រៅប្រទេស ហើយកាលពីឆ្នាំ២០២៣ ឥណ្ឌាបាននាំចេញអង្កររហូតដល់១៦លាន៥សែនតោន និងក្លាយជាប្រទេសនាំចេញអង្ករលំដាប់ទី១ លើពិភពលោក ។ លើសពីនេះ ឥណ្ឌាបានវ៉ាដាច់ប្រទេសថៃ ដែលបាននាំចេញអង្ករត្រឹមតែ៨លាន២សែនតោន និងស្ថិតនៅលំដាប់ទី២ លើពិភពលោក ។

ប៉ុន្តែ Global Hunger Index បានចាត់ចំណាត់ថ្នាក់ប្រទេសមានភាពអត់ឃ្លានខ្លាំងបំផុតលើពិភពលោក ហើយបង្ហាញថា ឥណ្ឌាជាប់ចំណាត់ថ្នាក់ទី១១១ ក្នុងចំណោម១២៥ប្រទេស (បើប្រទេសណាស្ថិតនៅក្រោមគេ គឺប្រទេសនោះកាន់តែមានភាពអត់ឃ្លានខ្លាំងឡើង) ។ ឥណ្ឌាទទួលបានពិន្ទុភាពអត់ឃ្លាន ស្មើនឹង២៨.៧ពិន្ទុ ដែលចាត់ទុកថា ពលរដ្ឋឥណ្ឌាអត់ឃ្លានខ្លាំង ។

ឥណ្ឌាអាចចិញ្ចឹមមនុស្សទូទាំងពិភពលោកបាន ហើយត្រៀមក្លាយជាប្រទេសនាំមុខផ្នែកសេដ្ឋកិច្ច ប៉ុន្តែឥណ្ឌាបែរក្លាយជាប្រទេសមានពលរដ្ឋអត់ឃ្លាន និងខ្វះខាតម្ហូបអាហារច្រើនបំផុតលើពិភពលោក ។ មូលហេតុចម្បង គឺពុំមែនបណ្តាលមកពីភាពក្រីក្រដូចមនុស្សភាគច្រើនគិតទេ ប៉ុន្តែវាបណ្តាលមកពីកត្តាសំខាន់ៗចំនួន២ រួមមាន ៖

១-បញ្ហាផ្នែក Logistics និង Supply ៖
Logistics និង Supply គឺជាបញ្ហាសំខាន់ក្នុងការថែរក្សា និងរក្សាគុណភាពវត្ថុធាតុដើមផ្សេងៗដែលបានផលិត ហើយបើទោះជាឥណ្ឌាអាចផលិតទំនិញ ឬទិន្នផលកសិកម្មបានច្រើនជាងបច្ចុប្បន្នទ្វេដងក្តី ប៉ុន្តែផ្នែក Logistics និង Supply របស់ឥណ្ឌាមិនល្អ ។ ហេតុនេះ ពលរដ្ឋឥណ្ឌានៅតែមានភាពអត់ឃ្លានបន្តទៀត ។

បច្ចុប្បន្ន ប្រទេសឥណ្ឌាបានពឹងផ្អែកលើការដឹកជញ្ជូនទំនិញតាមផ្លូវគោកយ៉ាងខ្លាំង ឬស្មើប្រមាណ៦៥% នៃការដឹកជញ្ជូនសរុប ។ ប៉ុន្តែផ្លូវនានានៅឥណ្ឌាពុំបានកែលម្អទេ ហើយវាអាចបណ្តាលឱ្យរាំងស្ទះដល់ការដឹកជញ្ជូនទំនិញ ឬទិន្នផលកសិកម្ម, ភាពយឺតយ៉ាវ និងធ្វើឱ្យទំនិញខូចខាត ។

ជាក់ស្តែង បើឥណ្ឌាអាចផលិតអង្ករបានជាង៣០លានតោន ប៉ុន្តែឥណ្ឌាខ្វះខាតការកែលម្អផ្នែក Logistics និង Supply វានឹងធ្វើឱ្យអង្ករជាង៣០លានតោននេះខូចគុណភាពក្នុងពេលដឹកជញ្ជូន និងការវេចខ្ចប់គ្មានស្តង់ដារ ។

២-ផលប៉ះពាល់ដោយសារកំណើនពលរដ្ឋមានជីវភាពមធ្យម ៖
នៅឆ្នាំ២០២៤ ពលរដ្ឋឥណ្ឌាមានជីវភាពមធ្យម ស្មើនឹង៣១% នៃចំនួនពលរដ្ឋសរុប ហើយឥណ្ឌារំពឹងថា រយៈពេល៧ឆ្នាំទៀត ពលរដ្ឋមានជីវភាពមធ្យមនឹងកើនឡើងដល់៣៨% ។ ហេតុនេះ កំណើនពលរដ្ឋមានជីវភាពមធ្យមនឹងធ្វើឱ្យប៉ះពាល់ដល់ការបរិភោគអង្ករក្នុងប្រទេស ខណៈពលរដ្ឋមានជីវភាពធូរធាត្រូវការទំនិញមានគុណភាពល្អ ។

តម្រូវការអាហារកើនឡើងពីពលរដ្ឋមានជីវភាពធូរធា គឺវាផ្ទុយគ្នានឹងអាហារដែលឥណ្ឌាមានសម្រាប់ផ្គត់ផ្គង់ពលរដ្ឋ ទើបធ្វើឱ្យប៉ះពាល់អាហារជារួមរបស់ឥណ្ឌា ។ បើពលរដ្ឋមានជីវភាពធូរធាមានតម្រូវការអាហារកាន់តែច្រើន ប៉ុន្តែអាហារស្តុកទុករបស់ឥណ្ឌាមានបរិមាណដូចមុន (បើទោះជាឥណ្ឌាបានផលិតអង្ករកើនឡើង ប៉ុន្តែការដឹកជញ្ជូនមិនល្អ) វានឹងធ្វើឱ្យឥណ្ឌាពុំអាចផ្គត់ផ្គង់អាហារគ្រប់គ្រាន់ដល់ពលរដ្ឋ ។

សរុបមក កត្តាសំខាន់ទាំង២នេះ នឹងប៉ះពាល់ដល់កង្វះខាតអាហាររបស់ឥណ្ឌាយ៉ាងខ្លាំង ។ ការដោះស្រាយបញ្ហា គឺពុំអាចចាប់ផ្តើមពីរដ្ឋាភិបាលតែមួយទេ ប៉ុន្តែត្រូវមានភាគីផ្សេងៗចូលរួមចំណែកដែរ ដូចជា ៖ ក្រុមហ៊ុនឯកជន និងសហគមន៍ ។ ភាគីទាំងអស់នឹងសហការគ្នាដោះស្រាយបញ្ហាខ្វះខាតអាហារក្នុងប្រទេស ហើយបច្ចុប្បន្ន រដ្ឋាភិបាលឥណ្ឌាក៏បានព្យាយាមចេញគោលនយោបាយជាច្រើន ដើម្បីដោះស្រាយបញ្ហាទាំងនេះ ៕

ប្រសិនបើលោកអ្នកមានបំណងចង់ទៅទស្សនាតំបន់ទេសចរណ៍នានាក្នុងប្រទេសកូរ៉េខាងជើង យើងសូមណែនាំឱ្យមកន្លែងទាំងនេះដោយសារវាជាកន្លែងទាក់ទាញការចាប់អារម្មណ៍បំផុតពីសំណាកភ្ញៀវទេសចរអន្តរជាតិ ដែលកន្លែងនោះមានឈ្មោះថា ជំរុំរដូវក្តៅ Songdowon។ ជំរុំរដូវក្តៅ Songdowon គឺមានកន្លែងកម្សាន្តជាច្រើនដូចជា ឆ្នេរខ្សាច់ សួនទឹកដ៏ត្រជាក់ត្រឈឹម បន្ទប់វីដេអូហ្គេម អាងចិញ្ចឹមត្រីគ្រប់្រភេទ ទីលានបាល់ទាត់ដ៏ធំល្វឹងល្វើយ កន្លែងហាត់បាល់បោះ បាញ់ធ្នូ និងការឡើងភ្នំក្នុងផ្ទះ រួមទាំងមានវិចិត្រសាលនៃគំរូសត្វពាហនៈផងដែរ ជាពិសេសគឺគំរូសត្វស្ទាំងខាងជើង ដែលជាបក្សីតំណាងជាតិរបស់ប្រទេសកូរ៉េខាងជើង។

លើសពីនេះនៅខាងក្នុងជំរុំក៏មានវត្ថុបុរាណប្រវត្តិសាស្ត្រដាក់តាំងផងដែរ ដូចជាតង់ដែលធ្លាប់បានទៅលេងដោយមេដឹកនាំគីម ជុងអ៊ីល នៅពេលលោកមកជំរុំរដូវក្តៅក្នុងឆ្នាំ ២០០៨ ហើយក៏ជាកន្លែងសម្រាប់ស្វាគមន៍ក្រុមកុមារអន្តរជាតិជាច្រើនមកកាន់ប្រទេសកូរ៉េខាងជើងផងដែរ។ ជំរុំរដូវក្តៅអន្តរជាតិ Songdowon ស្ថិតក្នុងខេត្ត Kangwon ប្រទេសកូរ៉េខាងជើង ធ្លាប់ស្វាគមន៍កុមារបរទេសជាច្រើន។ កន្លែងនេះត្រូវបានបើកដំបូងនៅឆ្នាំ ១៩៦០ ដើម្បីលើកកម្ពស់ទំនាក់ទំនងរបស់កូរ៉េខាងជើងជាមួយបរទេស តាមរយៈការរៀបចំជំរុំរដូវក្តៅសម្រាប់កុមារ។

យោងតាម RIA Novosti កុមារមួយចំនួននៅក្នុងប្រទេសរុស្ស៊ីនឹងចូលរួមជំរុំរដូវក្តៅនេះក្នុងខែកក្កដានៃឆ្នាំ ២០២៤។ លោក Rowan Beard អ្នកគ្រប់គ្រងទេសចរណ៍នៃ Young Pioneer Tours ដែលជាអង្គភាពមានបទពិសោធន៍ជាង ១០ ឆ្នាំនាំអ្នកទេសចរទៅកាន់ប្រទេសកូរ៉េខាងជើងបាននិយាយថា បច្ចុប្បន្នជំរុំរដូវក្តៅរបស់ប្រទេសនេះគឺបានស្វាគមន៍និស្សិតមកពីប្រទេសជាច្រើនដូចជា រុស្ស៊ី ចិន ថៃ វៀតណាម ម៉ុងហ្គោលី ម៉ិកស៊ិក និងបណ្តាប្រទេសមួយចំនួនទៀត។ ទោះជាយ៉ាងណា ភ្ញៀវទេសចរដែលចូលរួមបោះជំរុំត្រូវតែគោរពវិញ្ញាណក្ខន្ធដល់អតីតមេដឹកនាំកូរ៉េខាងជើងដូចជា ការច្រៀងបទភ្លេងជាតិ ឬការលើករូបចម្លាក់ជាដើម។

បើយោងតាម Insider នៅទីនេះក៏មានការប្រកួតហែលទឹកផងដែរ។ ដូច្នេះក្នុងជំរុំរដូវក្តៅនេះគឺមានសួនទឹកដ៏ធំល្វឹងល្វើយដែលមានហ្គេមដូចជាស្លាយទឹក និងបឹងទូកជាដើម ហើយអ្នកបោះជំរុំក៏ត្រូវរៀនពីរបៀបចំអិនម្ហូបបែបប្រពៃណីកូរ៉េខាងជើងនៅទីនេះផងដែរ។ ទោះជាយ៉ាងណាក៏ដោយ អ្នកខ្លះបានចែករំលែកថា អាហារខ្លះគឺមិនសូវមានរសជាតិនោះទេ ពួកគេអាចញ៉ាំបានតែបាយ នំបុ័ង ហើយរង់ចាំអាហារសមុទ្រម្តងក្នុងមួយសប្តាហ៍។ ហេតុនេះសម្រាប់តម្លៃចូលរួមបោះជំរុំនៅ Songdowon ភ្ញៀវទេសចរត្រូវចំណាយត្រឹមតែ ៣០០ ទៅ ៤០០ ដុល្លារអាមេរិកប៉ុណ្ណោះ៕