នៅពិភពលោកយើងនេះ គឺមានទឹកជ្រោះច្រើនរាប់មិនអស់ ដោយទឹកជ្រោះនីមួយៗសុទ្ធតែមានទេសភាពស្រស់ស្អាត ស្រស់បំព្រងអមដោយខ្យល់អាកាសបរិសុទ្ធ និងធម្មជាតិ មានព្រៃព្រឹក្សាព័ទ្ធជុំវិញ រួមជាមួយទឹកត្រជាក់ថ្លាឈ្វង់ ប្រៀបបានដូចជាឋានសួគ៌នៅលើដីអ៊ីចឹង។ ប៉ុន្តែតើអ្នកដឹងទេថា ទឹកជ្រោះណាដែលត្រូវបានគេចាត់ទុកថា មានទេសភាពស្អាតជាងគេបំផុតក្នុងលោក?

ទឹកជ្រោះដែលមានទេសភាពស្អាតជាងគេបំផុតក្នុងលោកគឺមានឈ្មោះថា Caño Cristales គឺជាទឹកជ្រោះប្រាំពីរពណ៌ ដែលវាតែងតែប្រែពណ៌ផ្សេងៗគ្នានៅក្នុងធម្មជាតិគ្រប់រដូវកាល។ Caño Cristales ឬទឹកជ្រោះប្រាំពីរពណ៌មានទីតាំងនៅជួរភ្នំ Macarena ក្នុងប្រទេសកូឡំប៊ី។ វាត្រូវបានគេហៅថា “ទឹកជ្រោះនៃព្រះ” គឺជាទឹកជ្រោះដែលមានទេសភាពស្អាតជាងគេបំផុតមានតែមួយគត់នៅលើផែនដី។ សព្វថ្ងៃទឹកជ្រោះនេះគឺជាទីកន្លែងដ៏ទាក់ទាញបំផុតសម្រាប់ភ្ញៀវទេសចរ ដែលចូលចិត្តដើរទស្សនាក្នុងតំបន់ទេសចរណ៍ធម្មជាតិ និងអេកូទេសចរណ៍។

ជារៀងរាល់ឆ្នាំ តំបន់រមណីយដ្ឋានទេសចរណ៍នេះគឺបានទាក់ទាញវត្តមានភ្ញៀវទេសចររាប់លាននាក់ រហូតដល់មានប្រយោគមួយលើកឡើងថា «ប្រសិនបើអ្នកទៅប្រទេសកូឡំប៊ី កុំរំលងទឹកជ្រោះប្រាំពីរពណ៌ឱ្យសោះ»។ ទឹកជ្រោះ Caño Cristales គឺមានសារៈសំខាន់ខ្លាំងណាស់សម្រាប់ជីវសាស្រ្តនៃជួរភ្នំ Macarena ដោយសារតែវាបានចូលរួមក្នុងប្រព័ន្ធអេកូឡូស៊ីចំនួនបីដូចជាជួរភ្នំ Andes វាលទំនាបខាងកើត និងព្រៃអាម៉ាហ្សូន ដែលសម្បូរទៅដោយភាពចម្រុះនៃរុក្ខជាតិ និងសត្វគ្រប់ប្រភេទ។ ទឹកជ្រោះ Caño Cristales មានប្រាំពីរពណ៌គឺលឿង ក្រហម ខៀវ បៃតង ស ខ្មៅ និងផ្កាឈូក។

ទឹកទាំងនេះមានភាពបរិសុទ្ធដែលអនុញ្ញាតឱ្យយើងមើលឃើញបាតដ៏ស្រស់ស្អាតរបស់វា ទោះជាយ៉ាងណាក៏ដោយ ទឹកជ្រោះនេះគឺគ្មានត្រីរស់នៅនោះទេ ដោយសារតែការរសាត់តិចនិងសារធាតុដីល្បាប់។ ដូច្នេះតំបន់នេះគឺជាជម្រករបស់សត្វស្លាប ប្រហែល ៤២០ ប្រភេទ សត្វទន្សោង ១០ ប្រភេទ សត្វល្មូន ៤៣ ប្រភេទ និងសត្វព្រូន ៨ ប្រភេទ រួមទាំងរុក្ខជាតិរាប់សិបប្រភេទទៀត៕

ប្រទេសចិន ៖ ថ្មីៗនេះ អ្នកប្រើប្រាស់បណ្តាញសង្គមនៅប្រទេសចិនបានចែកចាយព័ត៌មានមួយយ៉ាងច្រើន គឺមាននារីម្នាក់អាយុ២៤ឆ្នាំ បានស្លា.ប់ ភ្លាមៗក្នុងអំឡុងពេលនាងកំពុងអង្គុយ Live បរិភោគអាហារលើបណ្តាញសង្គម ។ គ្រូពេទ្យបញ្ជាក់ថា មូលហេតុនៃការស្លាប់នេះ គឺដោយសារនាងបរិភោគអាហារច្រើនខ្លាំងពេក ដែលរាងកាយពុំអាចទទួលយកបាន ។

តាំងពីឆ្នាំ២០២០ មក រដ្ឋាភិបាលចិនបានចាប់ផ្តើមទប់ស្កាត់ពលរដ្ឋប្រកបអាជីពជា Influencer អង្គុយ Live បរិភោគអាហារយ៉ាងច្រើនបង្ហាញតាមបណ្តាញសង្គម ដើម្បីកុំឱ្យពលរដ្ឋមានទម្លាប់បរិភោគអាហារច្រើន និងខ្ជះខ្ជាយអាហារ ។ បើពលរដ្ឋណាល្មើសនឹងបម្រាមនេះ នឹងត្រូវអាជ្ញាធរពិន័យជាប្រាក់ចំនួន១០.០០០យាន់ ។ ប៉ុន្តែការ Live បរិភោគអាហារច្រើននៅតែជាទីពេញនិយមយ៉ាងខ្លាំងនៅចិន ហើយមានពលរដ្ឋចិនរាប់ពាន់នាក់សុខចិត្តយកសុខភាពរបស់ខ្លួនទៅប្រឈមនឹងការបរិភោគអាហារញាត់ចូលមាត់ ដើម្បីចង់បានចំនួន Live និង View ។

ក្នុងចំណោមអ្នក Live បរិភោគអាហារទាំងនេះ ក៏មាននារីឈ្មោះ Pan Xiaoting ផងដែរ ។ នាងជាអតីតបុគ្គលិករត់តុ ហើយនាងក៏ផ្លាស់ប្តូរមុខរបរនេះមករកប្រាក់ចំណូលពីការ Live បរិភោគអាហារតាមបណ្តាញសង្គមដ៏ល្បីល្បាញម្នាក់ ។ ប៉ុន្តែនាងបានស្លាប់កាលពីពាក់កណ្តាលខែកក្កដា ឆ្នាំ២០២៤ ពេលនាងកំពុង Live បរិភោគអាហារ ដោយសាររាងកាយពុំអាចទទួលអាហារច្រើនលើសចំណុះ ។

តាមលទ្ធផលការត្រួតពិនិត្យរាងកាយបង្ហាញថា នៅក្នុងពោះរបស់នាងមានអាហារជាច្រើនពុំបានរំលាយ ហើយគ្រឿងក្នុងរបស់នាងជាច្រើនទៀតខូចខាតទាំងអស់ ។ កាលពីមុន នាងធ្លាប់ធ្វើជាបុគ្គលិករត់តុ ប៉ុន្តែពេលនាងឃើញមនុស្សជាច្រើនចាប់យកមុខរបរបរិភោគអាហារ Live ក្នុងបណ្តាញសង្គមអាចរកប្រាក់បានច្រើន ថែមទាំងទទួលបានរង្វាន់ពីអ្នកទស្សនានោះ នាងក៏សម្រេចចិត្តធ្វើតាមដែរ ។

មុនដំបូង នាងគ្រាន់តែ Live បរិភោគអាហារម្តងម្កាលប៉ុណ្ណោះ ប៉ុន្តែពេលអ្នកទស្សនាវីដេអូនាងកើនឡើងជាបន្តបន្ទាប់ នាងក៏សម្រេចចិត្តចាប់យកមុខរបរនេះតែម្តង ។ ហេតុនេះ នាងក៏លាឈប់ពីការងាររត់តុ រួចហើយមកជួលផ្ទះមួយកន្លែងសម្រាប់ធ្វើជាស្ទូឌីអូ Live ដោយសារឪពុក-ម្តាយនាងពុំឯកភាព និងបារម្ភថា វានឹងប៉ះពាល់សុខភាពកូន ។

ពេលមានអ្នកទស្សនាកាន់តែច្រើន នាងចាប់ផ្តើមពុំខ្វល់ពីសុខភាពរបស់ខ្លួន និងព្យាយាមស្វែងរកអាហារថ្មីៗមកបរិភោគបង្ហាញក្នុងបណ្តាញសង្គមដើម្បីទាក់ទាញចំនួនអ្នកទស្សនា ។ ពេលឪពុក-ម្តាយ និងអ្នកទស្សនាខ្លះនិយាយថា ការបរិភោគច្រើនបែបនេះនឹងធ្វើឱ្យនាងឆាប់ស្លាប់ ប៉ុន្តែនាងតែងតែឆ្លើយតបដោយទឹកមុខញញឹមជានិច្ចថា ៖ «មិនបាច់បារម្ភទេ ខ្ញុំអាចទៅរួច» ។

កាលពីមុន នាងមិនមែនជានារីស្គមទេ ហើយការ Live បរិភោគអាហារលើបណ្តាញសង្គមបានធ្វើឱ្យនាងឡើងទម្ងន់រហូតដល់៣០០គីឡូក្រាម ។ ប៉ុន្តែនាងមិនខ្វល់ទេ ហើយនៅតែបន្តការ Live ឥតឈប់ឈរ ។ នាងធ្លាប់មានបញ្ហាឈាមក្រពះដោយសារបរិភោគអាហារច្រើនជ្រុល ប៉ុន្តែក្រោយពេលព្យាបាលជំងឺជាសះស្បើយ នាងក៏អង្គុយ Live បន្តទៀត ។

ប្រហែល១សប្តាហ៍មុនពេលស្លាប់ នាងចាប់ផ្តើមប្រើវិធីសាស្ត្រថ្មីៗកាន់តែច្រើនដើម្បីទាក់ទាញអ្នកទស្សនា ដូចជា ៖ នាងបរិភោគអាហារជាប់ៗគ្នាមិនឈប់ឈរសោះ យ៉ាងហោចណាស់ នាងបរិភោគអាហារចាប់ពី១០ម៉ោងឡើងទៅ និងបរិភោគអាហារលើស១០គីឡូក្រាមពេល Live ម្តងៗ ។ រហូតដល់ថ្ងៃទី១៤ ខែកក្កដា ឆ្នាំ២០២៤ រាងកាយនាងទប់ទល់លែងរួច នាងក៏បានស្លាប់ភ្លាមៗពេលកំពុង Live ។

បើទោះជាមូលហេតុលម្អិតនៃការស្លាប់របស់នាងពុំត្រូវបានបង្ហាញក្តី ប៉ុន្តែគេហទំព័រ Sohu ផ្សព្វផ្សាយថា គ្រឿងក្នុងរបស់នាងខូចខ្ទេចខ្ទីអស់ ហើយក្នុងក្រពះនាងមានអាហារជាច្រើនទៀតពុំទាន់រំលាយ ។

ការស្លាប់របស់នាងត្រូវបានគេលើកជាឧទាហរណ៍មួយសម្រាប់ដាស់តឿនមនុស្សដទៃទៀត ដែលចូលចិត្តអង្គុយ Live បរិភោគអាហារឱ្យគេស្រក់ទឹកមាត់ ។ វាបានបំផ្លាញសុខភាពខ្លួនឯងយ៉ាងខ្លាំង ដោយសារចង់បានប្រាក់ច្រើន និងការចាប់អារម្មណ៍ពីអ្នកទស្សនា ៕

កាលពីម្សិលមិញ ការកាត់ផ្តាច់ប្រព័ន្ធ IT ជាសកល បានកើតឡើងត្រឹមតែមួយពព្រិចភ្នែក ប៉ុន្តែក៏បានបង្កនូវភាពចលាចល និងរងនូវផលប៉ះពាល់ជុំវិញពិភពលោក ជាពិសេសគឺទៅលើក្រុមហ៊ុនអាកាសចរណ៍ ធនាគារ ប៉ុស្តិ៍ទូរទស្សន៍ និងស្ថាប័នហិរញ្ញវត្ថុ។

យ៉ាងណាមិញ ថ្មីៗនេះ យោងតាមប្រភពសារព័ត៌មានអន្តរជាតិ CNA បានគូសបញ្ជាក់ថា ភាពរអាក់រអួលនេះ គឺកើតឡើងដោយសារតែ ក្រុមហ៊ុន CrowdStrike បានធ្វើការ Update កម្មវិធីកម្ចាត់មេរោគ (Antivirus Program) ទើបបណ្តាលឲ្យមានបញ្ហាគាំងប្រព័ន្ធ Microsoft Windows នៅទូទាំងពិភពលោក។

ទោះជាយ៉ាងណា តាមរយៈភាពរអាក់រអួលត្រឹមតែរយៈពេលខ្លីនេះ គឺបានធ្វើឲ្យមនុស្សម្នាមានភាពចលាចលជាខ្លាំង ក៏ដូចជាមានផលប៉ះពាល់ដល់អ្នកប្រើប្រាស់ដែលដំណើរការដោយប្រព័ន្ធ Window របស់ Microsoft ។ មិនត្រឹមតែប៉ុណ្ណោះ តាមរយៈហេតុការណ៍នេះ ក្រុមហ៊ុនធំៗនានា ដូចជាក្រុមហ៊ុនអាកាសចរណ៍ ធនាគារ ប៉ុស្តិ៍ទូរទស្សន៍ និងស្ថាប័នហិរញ្ញវត្ថុ បានរងនូវការខូចខាតយ៉ាងដំណំត្រឹមតែមួយពព្រឹចភ្នែក។

តាមសេចក្តីរាយការណ៍ ធនាគារ និងស្ថាប័នហិរញ្ញវត្ថុជាច្រើន បានប្រឈមនឹងបញ្ហាមិនអាចទូទាត់ប្រាក់បាន ខណៈក្រុមហ៊ុនផ្តល់សេវាទូរស័ព្ទចល័តក៏មិនអាចដំណើរការបានដែរ ហើយសេវាកម្មអតិថិជននៅក្នុងក្រុមហ៊ុនមួយចំនួនបានធ្លាក់ចុះជាគំហុក។ រីឯប្រព័ន្ធផ្សព្វផ្សាយជាច្រើន ដូចជាទូរទស្សន៍ កាសែត វិទ្យុជាដើម ក៏មានបញ្ហានៅក្នុងការផ្សាយបន្តផ្ទាល់កម្មវិធី។ ចំណែកនៅឯក្រុមហ៊ុន Tesla របស់លោក Elon Musk វិញបានឲ្យដឹងថា ការកាត់ដាច់នេះបានបណ្តាលឱ្យមាន “ផលប៉ះពាល់ដល់ខ្សែសង្វាក់ផ្គត់ផ្គង់រថយន្ត” ផងដែរ។

បន្ទាប់ពីលេចឡើងនូវហេតុការណ៍នេះ នាយកក្រុមហ៊ុន CrowdStrike បានឲ្យដឹងថា«ខ្លួនបានដាក់ចេញនូវដំណោះស្រាយមួយចំនួនសម្រាប់បញ្ហានេះ ហើយពិតជាសុំទោសខ្លាំងណាស់ ទៅកាន់គ្រប់ស្ថាប័ន និងឯកជន ដែលបានរងនូវផលប៉ះពាល់»។ ស្របពេលដែល សេចក្តីថ្លែងការណ៍មួយថា ភ្នាក់ងាររបស់ប្រធានាធិបតីអាមេរិក លោក Joe Biden បាននឹងកំពុងពិភាក្សាជាមួយក្រុមហ៊ុន CrowdStrike និងអ្នកដែលរងផលប៉ះពាល់នានា ដើម្បីទទួលបាននូវដំណោះស្រាយសមស្របផងដែរ៕