កូរ៉េខាងជើង៖ រមណីយដ្ឋាន Wonsan-Kalma Beach Resort នឹងបើកជាផ្លូវការនៅខែឧសភា ឆ្នាំ ២០២៥ ដែលត្រូវបានចាត់ទុកថាជារមណីយដ្ឋាន “ធំបំផុត និងល្អបំផុត” របស់ប្រទេសកូរ៉េខាងជើង។
យោងតាម Business Insider រមណីយដ្ឋាននេះដំបូងឡើយគ្រោងនឹងបើកនៅឆ្នាំ ២០១៨ មកម្លេះ ប៉ុន្តែដោយសារខ្វះសម្ភារៈសំណង់ ផលប៉ះពាល់សេដ្ឋកិច្ច និង Covid-19 ទើបគម្រោងត្រូវជាប់គាំងជាច្រើនដង។ ទោះជាយ៉ាងណាក្នុងអំឡុងដំណើរទស្សនកិច្ចទៅកាន់រមណីយដ្ឋាន Wonsan-Kalma Beach Resort ពាក់កណ្តាលសប្តាហ៍មុន មេដឹកនាំកូរ៉េខាងជើងលោក Kim Jong Un ក៏បានប្រកាសថា រមណីយដ្ឋាននេះនឹងបើកដំណើរការជាផ្លូវការតែម្តង នៅខែឧសភា ឆ្នាំ ២០២៥ ដែលត្រៀមសម្រាប់ស្វាគមន៍ភ្ញៀវទេសចរ។

រមណីយដ្ឋាន Wonsan-Kalma Beach Resort មានទំហំ ២៤៥ ហិចតា មានឆ្នេរមួយដែលមានទឹកពណ៌ខៀវថ្លា និងខ្សាច់ពណ៌សក្បោះ ជាមួយនឹងអគារប្រណីតៗរាប់រយ និងបន្ទប់សណ្ឋាគាររាប់ពាន់។ Wonsan-Kalma ស្ថិតនៅចំកណ្តាលអាកាសយានដ្ឋានថ្មីនៅឆ្នេរសមុទ្រខាងកើតនៃប្រទេសកូរ៉េខាងជើង។ យោងតាមទីភ្នាក់ងារសារព័ត៌មានកណ្តាលកូរ៉េ (KCNA) នេះជាលើកទីមួយហើយដែលលោក គីម ជុងអ៊ុន បានវិលត្រឡប់មកកាន់ទីតាំងនេះវិញក្នុងរយៈពេល ៥ ឆ្នាំ។ ក្នុងដំណើរទស្សនកិច្ចនេះ លោកបានប្រកាសថា ការសាងសង់បានចូលដល់ដំណាក់កាលចុងក្រោយហើយ។

ដូច្នេះកន្លែងនេះនឹងក្លាយជា “តំបន់ឆ្នេរដ៏អស្ចារ្យ និងជារមណីយដ្ឋានដ៏ធំ និងល្អបំផុតរបស់កូរ៉េខាងជើង”។ លោក គីម ជុងអ៊ុន បានសង្កត់ធ្ងន់លើសារៈសំខាន់នៃសកម្មភាពកម្សាន្ត រួមទាំងសួនកម្សាន្ត ដើម្បីផ្តល់នូវបទពិសោធន៍ទេសចរណ៍ដ៏ទូលំទូលាយ។ លើសពីនេះ ប្រព័ន្ធគ្រប់គ្រងកាកសំណល់ក៏ត្រូវបានចាត់ទុកថាជាអាទិភាពកំពូលផងដែរ។ អ្នកទេសចររុស្ស៊ីមួយចំនួនត្រូវបានគេនិយាយថានឹងមកលេងរមណីយដ្ឋាននេះ ទោះបីជាប្រទេសកូរ៉េខាងជើងមិនទាន់បានបើកទ្វារទទួលភ្ញៀវអន្តរជាតិភ្លាមៗក៏ដោយ។

ជាមួយនឹងការលើកកម្ពស់វិស័យទេសចរណ៍ រមណីយដ្ឋាន Wonsan-Kalma Beach Resort ត្រូវបានគេរំពឹងថានឹងក្លាយជាចំណុចស្នូលនៃឧស្សាហកម្មទេសចរណ៍ ដោយកូរ៉េខាងជើងក៏បានលើកឡើងពីផែនការដើម្បីស្តារវិស័យទេសចរណ៍នៅក្នុងតំបន់ភ្នំ Kumgang, Mount Chilbo, Majon, Kumya, Riwon និង Yombunjin ផងដែរ។ គួរបញ្ជាក់ដែរថា ក្នុងឆ្នាំ ២០១៩ ប្រទេសនេះបានស្វាគមន៍ភ្ញៀវទេសចរបរទេសប្រមាណ ៣០០,០០០ នាក់ ជាមួយនឹងប្រាក់ចំណូលពីទេសចរណ៍ចាប់ពី ៩០ ទៅ ១៥០ លានដុល្លារអាមេរិក៕

រូបភាពចែកចាយពីបណ្តាញសង្គមបានបង្ហាញឲ្យឃើញពីទិដ្ឋភាពនៅក្នុងសារមន្ទីរមួយកន្លែងរបស់ប្រទេសថៃ ដាក់តាំងបង្ហាញសុទ្ធតែព្រះកេស(ក្បាល)របស់រូបបដិមាយ៉ាងច្រើនពោរពាស ខណៈវាក៏បានលេចឡើងជាចម្ងល់ក្នុងចំណោមជនជាតិខ្មែរ ស្របពេលដែលចម្លាក់បុរាណនៅក្នុងប្រទេសខ្មែរ ខ្លះបន្សល់ទុកត្រឹមតែដងខ្លួនប៉ុណ្ណោះ។

សារមន្ទីរមួយកន្លែងនៅក្នុងខេត្តប៉ាធុមថានី ប្រទេសថៃ ដែលមានដាក់តាំងបង្ហាញពីចម្លាក់បុរាណ រូបបដិមាផ្សេងៗពោរពាស។ យ៉ាងណាមិញ អ្វីដែលជាទីចាប់អារម្មណ៍នោះគឺ ដោយគេបានសង្កេតឃើញថា មានព្រះកេសរបស់បដិមាជាច្រើនដាក់តម្រៀបគ្នាជាជួរៗ ដោយមិនដឹងព្រះកាយនៅទីណានោះទេ។

ស្របពេលដែលបានឃើញពីវត្តមានព្រះកេស(ក្បាល)របស់រូបចម្លាក់ជាច្រើន ស្ថិតនៅក្នុងប្រទេសថៃបែបនេះ វាក៏បានលេចឡើងជាចម្ងល់ក្នុងចំណោមជនជាតិខ្មែរគ្រប់ៗរូប ព្រោះថានៅកម្ពុជា គេក៏បានប្រទះឃើញរូបចម្លាក់មួយចំនួនសុទ្ធតែកំបុតក្បាលទាំងអស់ផងដែរ។

បើយោងតាមការលើកឡើងនៅលើបណ្តាញសង្គមដោយគណនីមួយបានឲ្យដឹងថា« រូបចម្លាក់ ប្រតិមា សិល្បៈបែបខ្មែរទាំងអស់នេះ ត្រូវបានយកចេញពីប្រាសាទរបស់ខ្មែរ បច្ចុប្បន្ន កំពុងដាក់តាំងនៅក្នុងសារមន្ទីរនៃខេត្ត ប៉ាធុមថានី ប្រទេសថៃ។ ក្នុងប្រាសាទខ្មែរជាច្រើនកន្លែង រូបចម្លាក់ កំបុតក្បាល(ព្រះសិរ) នៅសល់តែដងខ្លួន គឺដោយសារតែបែបនេះ។ ថៃ ប្រមូលខ្ទេច ប្រមូលខ្ទីពីខ្មែរ»។

ដោយហេតុថា កម្ពុជាគឺជាប្រទេសមួយបានឆ្លងកាត់សម័យសង្រ្គាមរាប់ភ្លេចទៅហើយ ដែលបណ្តាលឲ្យសម្បត្តិវប្បធម៌ វត្ថុបុរាណជាច្រើនបានបាត់បង់ទៅ ហើយនាពេលបច្ចុប្បន្ននេះ រូបចម្លាក់ខ្លះក៏បានលេចវត្តមាននៅឯសារមន្ទីរប្រទេសនានាលើពិភពលោក។ ដោយកាលពីពេលថ្មីនេះ រូបចម្លាក់បុរាណខ្មែរចំនួន១៤ ក៏ត្រូវបានសារមន្ទីររបស់សហរដ្ឋអាមេរិក ប្រគល់ជូនមកខ្មែរវិញតាមការស្នើសុំផងដែរ។
យ៉ាងណាមិញ ព្រះកេសរបស់រូបបដិមាជាច្រើនដែលបានដាក់តាំងបម្រៀបនៅឯប្រទេសថៃនោះ ត្រូវបានជនជាតិខ្មែរភាគច្រើនលើកឡើងថា វាគឺជាចម្លាក់ក្នុងរចនាបទខ្មែរ ដែលបានបាត់ទៅក្នុងសម័យសង្គ្រាម។ ទោះជាយ៉ាងណា ទាំងនេះគ្រាន់តែជាការលើកឡើងនិងសេចក្តីសន្និដ្ឋានខ្លះៗរបស់ជនជាតិខ្មែរប៉ុណ្ណោះ រីឯភស្តុតាងពិតប្រាកដនោះគឺនូវតែមិនទាន់មាននៅឡើយនោះទេ៕

លោក ចូ បៃដិន បានសម្រេចចិត្តដកខ្លួនចេញពីការប្រកួតប្រជែង ក្នុងការបោះឆ្នោតប្រធានាធិបតីអាមេរិក ដែលគ្រោងនឹងប្រព្រឹត្តិទៅនៅខែវិច្ឆិកាខាងមុខនេះ

សម្រាប់ការដកខ្លួនរបស់លោក ចូ បៃដិន នេះ លោកស្រី Kamala Harris នឹងក្លាយជាបេក្ខជន ប្រធានាធិបតីតំណាងឱ្យគណបក្សប្រជាធិបតេយ្យ ក្នុងការប្រកួតតតាំងជាមួយលោក Donarld Trump ក្នុងការបោះឆ្នោតនៅថ្ងៃទី៥ ខែវិច្ឆិកា ឆ្នាំ២០២៤ផងដែរ។

ស្ថិតក្នុងវ័យ៨១ឆ្នាំ លោក ចូ បៃដិន មិនបានបង្ហាញខ្លួនជាសាធារណៈចាប់តាំងពីរូបលោកបានឆ្លងកូវីដ១៩ និងត្រូវធ្វើចត្តាឡីស័ក។

គួរបញ្ជាក់ផងដែរថា បៃដិន នឹងបន្តកាន់តំណែងជាប្រធានាធិបតីអាមេរិក រហូតដល់នខែមករា ឆ្នាំ២០២៥ បើទោះបីជាមិនឈរឈ្មោះជាបេក្ខភាពប្រធានាធិបតីទៀតក៏ដោយ៕

ប្រទេសចិន ៖ ព្រៃថ្ម «Shilin Stone Forest» ស្ថិតនៅស្រុកលូណាន ភាគខាងកើតទីក្រុងគុនមីង ខេត្តយូណាន ប្រទេសចិន ត្រូវបានគេចាត់ទុកថា គឺជាឧទ្យានជាតិព្រៃថ្មដ៏ធំបំផុតលើពិភពលោក ។ វាលាតសន្ធឹងនៅលើផ្ទៃដីដ៏ធំល្វឹងល្វើយ ប្រកបដោយភ្នំថ្មខ្ពស់-ទាបឆ្លាស់គ្នា បង្កើតបានជាទេសភាពស្រស់ស្អាតគួរឱ្យទាក់ទាញបំផុតសម្រាប់ភ្ញៀវទេសចរ ។

ឧទ្យានជាតិនេះមានភ្នំថ្ម និងសសរថ្មតូច-ធំនៅលាយឡំចម្រុះគ្នាពាសពេញទាំងអស់ ដែលមានលក្ខណៈជាថ្មកំបោរ ។ កាលពីមុន ថ្មទាំងនេះស្ថិតនៅក្រោមផ្ទៃទឹក ប៉ុន្តែដោយសារការផ្លាស់ប្តូរផ្ទៃដីថ្ម វាបានធ្វើឱ្យថ្មកំបោរទាំងនេះផុសចេញពីផ្ទៃទឹកមក និងប្រែក្លាយជាព្រៃថ្មដ៏ស្រស់ស្អាតនាពេលបច្ចុប្បន្ន ។ គេសន្និដ្ឋានថា ព្រៃថ្មនេះមានអាយុរហូត២៧០លានឆ្នាំឯណោះ ។

បច្ចុប្បន្ន នៅទីនេះ គឺជាតំបន់ទេសចរណ៍ដ៏ល្បីល្បាញមួយរបស់ទីក្រុងគុនមីង ខេត្តយូណាន ហើយអាជ្ញាធរចិនបានបើកឱ្យភ្ញៀវទេសចរចូលមកទស្សនាទីនេះនៅផ្នែកខ្លះៗ ។ ភ្ញៀវទេសចរអាចដើរទស្សនាព្រៃថ្មនៅតាមផ្លូវ រហូតដល់ជាង៤០០ផ្លូវ និងមានទីកន្លែងឈប់សម្រាកសម្រាប់មើលទេសភាព ចំនួន២០០កន្លែង ។ គេបានដាក់ឈ្មោះតំបន់នេះថា «ទឹកកួចនៅក្រោមសមុទ្រ» ។

ចំណែកនៅតាមផ្លូវសម្រាប់ឱ្យភ្ញៀវទេសចរដើរទស្សនាឧទ្យានជាតិព្រៃថ្ម គឺមានការប្រគំតន្ត្រី និងការលេងកម្សាន្តជាហូរហែ ព្រមទាំងមានសេវាកម្មជួលស្លៀកពាក់តាមបែបអ្នកស្រុកក្នុងតំបន់ សម្រាប់ឱ្យភ្ញៀវទេសចរថតរូបទៀតផង ។ ការមកកម្សាន្តនៅឧទ្យានជាតិព្រៃថ្ម Shilin Stone Forest ភ្ញៀវទេសចរនឹងបង់ប្រាក់ចំនួន១៧០យាន់ក្នុងម្នាក់ និងបង់ថ្លៃរថយន្តសម្រាប់ទស្សនាព្រៃថ្ម ចំនួន២៥យាន់ទៀត ។

ការជិះរថយន្តទស្សនាព្រៃថ្ម គឺមានភាពងាយស្រួលសម្រាប់ភ្ញៀវទេសចរ ពីព្រោះបើពួកគេដើរទស្សនានោះ គឺនឹងចំណាយពេលពេញ១ថ្ងៃឯណោះ ។ ក្រៅពីនេះ តំបន់មួយទៀតដែលមានទេសភាពស្រស់ស្អាតពុំចាញ់ឧទ្យានជាតិព្រៃថ្ម គឺស្ថិតនៅបរិវេណជុំវិញឧទ្យាននេះ ។ ឧទ្យានជាតិព្រៃថ្ម ត្រូវបានអង្គការ UNESCO ចុះបញ្ជីជាសម្បត្តិបេតិកភណ្ឌធម្មជាតិរបស់ពិភពលោក រួចរាល់ហើយ ៕

នៅពិភពលោកយើងនេះ គឺមានទឹកជ្រោះច្រើនរាប់មិនអស់ ដោយទឹកជ្រោះនីមួយៗសុទ្ធតែមានទេសភាពស្រស់ស្អាត ស្រស់បំព្រងអមដោយខ្យល់អាកាសបរិសុទ្ធ និងធម្មជាតិ មានព្រៃព្រឹក្សាព័ទ្ធជុំវិញ រួមជាមួយទឹកត្រជាក់ថ្លាឈ្វង់ ប្រៀបបានដូចជាឋានសួគ៌នៅលើដីអ៊ីចឹង។ ប៉ុន្តែតើអ្នកដឹងទេថា ទឹកជ្រោះណាដែលត្រូវបានគេចាត់ទុកថា មានទេសភាពស្អាតជាងគេបំផុតក្នុងលោក?

ទឹកជ្រោះដែលមានទេសភាពស្អាតជាងគេបំផុតក្នុងលោកគឺមានឈ្មោះថា Caño Cristales គឺជាទឹកជ្រោះប្រាំពីរពណ៌ ដែលវាតែងតែប្រែពណ៌ផ្សេងៗគ្នានៅក្នុងធម្មជាតិគ្រប់រដូវកាល។ Caño Cristales ឬទឹកជ្រោះប្រាំពីរពណ៌មានទីតាំងនៅជួរភ្នំ Macarena ក្នុងប្រទេសកូឡំប៊ី។ វាត្រូវបានគេហៅថា “ទឹកជ្រោះនៃព្រះ” គឺជាទឹកជ្រោះដែលមានទេសភាពស្អាតជាងគេបំផុតមានតែមួយគត់នៅលើផែនដី។ សព្វថ្ងៃទឹកជ្រោះនេះគឺជាទីកន្លែងដ៏ទាក់ទាញបំផុតសម្រាប់ភ្ញៀវទេសចរ ដែលចូលចិត្តដើរទស្សនាក្នុងតំបន់ទេសចរណ៍ធម្មជាតិ និងអេកូទេសចរណ៍។

ជារៀងរាល់ឆ្នាំ តំបន់រមណីយដ្ឋានទេសចរណ៍នេះគឺបានទាក់ទាញវត្តមានភ្ញៀវទេសចររាប់លាននាក់ រហូតដល់មានប្រយោគមួយលើកឡើងថា «ប្រសិនបើអ្នកទៅប្រទេសកូឡំប៊ី កុំរំលងទឹកជ្រោះប្រាំពីរពណ៌ឱ្យសោះ»។ ទឹកជ្រោះ Caño Cristales គឺមានសារៈសំខាន់ខ្លាំងណាស់សម្រាប់ជីវសាស្រ្តនៃជួរភ្នំ Macarena ដោយសារតែវាបានចូលរួមក្នុងប្រព័ន្ធអេកូឡូស៊ីចំនួនបីដូចជាជួរភ្នំ Andes វាលទំនាបខាងកើត និងព្រៃអាម៉ាហ្សូន ដែលសម្បូរទៅដោយភាពចម្រុះនៃរុក្ខជាតិ និងសត្វគ្រប់ប្រភេទ។ ទឹកជ្រោះ Caño Cristales មានប្រាំពីរពណ៌គឺលឿង ក្រហម ខៀវ បៃតង ស ខ្មៅ និងផ្កាឈូក។

ទឹកទាំងនេះមានភាពបរិសុទ្ធដែលអនុញ្ញាតឱ្យយើងមើលឃើញបាតដ៏ស្រស់ស្អាតរបស់វា ទោះជាយ៉ាងណាក៏ដោយ ទឹកជ្រោះនេះគឺគ្មានត្រីរស់នៅនោះទេ ដោយសារតែការរសាត់តិចនិងសារធាតុដីល្បាប់។ ដូច្នេះតំបន់នេះគឺជាជម្រករបស់សត្វស្លាប ប្រហែល ៤២០ ប្រភេទ សត្វទន្សោង ១០ ប្រភេទ សត្វល្មូន ៤៣ ប្រភេទ និងសត្វព្រូន ៨ ប្រភេទ រួមទាំងរុក្ខជាតិរាប់សិបប្រភេទទៀត៕