King chi ទម្លាក់MV ថ្មី អ្នកគាំទ្រចាប់អារម្មណ៍លើរឿងមួយនេះជាពិសេស

អ្នកគាំទ្រមានការចាប់អារម្មណ៍គួរឱ្យកត់សម្គាល់បន្ទាប់ពីតារារ៉េប King chi បានទម្លាក់ MV ថ្មីរបស់ខ្លួនមានចំណងជើងថា «ហត់នឿយ» ខណៈស្នាដៃដឹកនាំថត MV នេះគឺជាស្នាដៃរបស់តារាចម្រៀង ជូវី លីន អតីតក្រុមប៉ូឡារិចក្រោមផលិតកម្មបារមី។ កាលពីមុនអ្នកគាំទ្រក៏បានឃើញថាលោកជូវី បានបញ្ចេញថ្វីដៃថតបទចម្រៀង «មិនអាចវិលវិញ» របស់ វណ្ណដា និង វណ្ណថាន ផងដែរ។

បកត្រលប់ទៅ៤ខែមុនតារារ៉េប វណ្ណដា និង វណ្ណថាន បានចេញស្នាដៃទីពីររបស់ខ្លួនមានចំណងជើងថា «មិនអាចវិលវិញ» បន្ទាប់ពីជោគជ័យបទ «កំលោះស្រុកខ្មែរ» ដែលទទួលបានការគាំទ្រភ្លូកទឹកភ្លូកដីផ្អើលអស់មួយស្រុកខ្មែរ។ កាលពីគ្រានោះនៅពេលផលិតកម្មបារមីបង្ហាញឈុតក្រៅឆាកពីការថត MV នេះរួមជាមួយការបង្ហោះរបស់តារាចម្រៀង វណ្ណដា អ្នកគាំទ្រចាប់អារម្មណ៍យ៉ាងខ្លាំងបន្ទាប់ពីឃើញតារាចម្រៀង ជូវី លីន ជាអ្នកថតMVរបស់តារាចម្រៀងទាំងពីររូបនេះ ជាហេតុធ្វើឱ្យមានការសរសើរថាលោកជាមនុស្សមានទេពកោសល្យមានចំណេះជំនាញច្រើនលើវិស័យតន្រ្តី។ យ៉ាងណាពេលនេះលោក ជូវី លីន និង នរិទ្ធ បានសម្រេចចិត្តរំសាយក្រុមប៉ូឡារិច ដោយ ជូវី សម្រេចចិត្តបន្តសកម្មភាពឯករាជ្យ ចំណែកឯ នរិទ្ធ បន្តធ្វើជាតារាចម្រៀងក្រោមផលិតកម្មបារមីដដែល។

ថ្មីៗនេះពោលគឺនៅយប់ថ្ងៃទី១៩ ខែកក្កដា តារារ៉េប King Chi បានទម្លាក់ MV ថ្មីមួយបទក្រោមផលិតកម្ម CG ដែលមានចំណងជើងថា «ហត់នឿយ» ហើយតារារ៉េបរូបនេះបន្តអត្តសញ្ញាណរបស់ខ្លួនទៅលើរហ័សនាម ស្តេចជួន ដោយបានរៀបរាប់ខ្លឹមសារនិងមានពាក្យចុងជួនទៅលើបទចម្រៀងនេះ។ មួយផ្នែកទៀតដែលអ្នកគាំទ្រមានការចាប់អារម្មណ៍ជាពិសេសនោះគឺស្នាដៃ MV នេះដែលទទួលបានការសរសើរនេះគឺជាស្នាដៃរបស់ ជូវី លីន ដែលជាដឹកនិងកាត់ MV មួយនេះរបស់ King chi ។ គេចាំបានដែរថា តារាចម្រៀងស្រី កៅ សុហ្វៀរ កាលពី ជូវី លីន ទម្លាក់បទថ្មីរបស់ខ្លួនក្នុងនាមជាតារាចម្រៀងឯករាជ្យរូបនាងក៏បានសរសើរសមត្ថភាព ជូវី លីន ធ្វើបានគ្រប់យ៉ាងរហូតចំអន់ថា «បងដៃ២០»។

អ្នកគាំទ្របានបញ្ចេញមតិថា បទនេះឡូយ បទចម្រៀងមានអត្ថន័យ អ្នកច្រៀងក៏ឡូយអ្នកថតក៏ឡូយ ទាំងពីរោះនិងបង្កប់អត្ថន័យរួមទាំងមតិយោបល់សរសើរជាច្រើនទៀតដែលមានការលើកឡើងស្រដៀងៗគ្នាថាពីរោះអត្ថន័យចាក់ដល់ខួរក្បាល៕