ទម្រាំបានដូចថ្ងៃនេះស្នេហា១២ឆ្នាំរបស់ ផន សុផារី និងស្វាមី ធ្លាប់ចង់លែងលះនិងឈ្លោះគ្នាជាច្រើនដង

ទស្សនិកជនមួយចំនួនធំបានឃើញថាទំនាក់ទំនងជីវិតគូរបស់អតីតតួឯកល្ខោន ផន សុផារី និងស្វាមី ពោរពេញដោយសុភមង្គលតស៊ូជាមួយគ្នាតាំងពីគ្រួសារមិនយល់ព្រមរហូតរកស៊ីមានបានដូចសព្វថ្ងៃ។ យ៉ាងណាមិញក្នុងទំនាក់ទំនង១២ឆ្នាំមានកូនស្រី២នាក់ ផន សុផារី ថារូបនាងនិងស្វាមីធ្លាប់ចង់លែងលះ និងឈ្លោះគ្នាជាច្រើនដង។

នៅថ្ងៃទី២៩ ខែមេសា ឆ្នាំ២០២៦ អ្នកនាង ផន សុផារី ដែលជាអ្នកបង្កើតមាតិកានិងជាអ្នកលក់អនឡាញបានបង្ហោះវីដេអូមានរយៈពេលជាង៨នាទីដោយរៀបរាប់ពីទំនាក់ទំនងក្នុងរយៈពេល១២ឆ្នាំរបស់ខ្លួនជាមួយនឹងស្វាមី។ ម្ចាស់ប្រ៊េនរូបនេះបានបង្ហាញថានៅថ្ងៃទី២៩ ខែមេសា ឆ្នាំ២០១៤ គឺជាថ្ងៃដែលអ្នកទាំងពីរសម្រេចចិត្តធ្វើជាសង្សារនឹងគ្នាហើយក៏ជាឆ្នាំដែលគ្រួសារបំបែកក្រោមហេតុផលខែឆ្នាំមិនត្រូវគ្នា។ តស៊ូជម្នះនឹងការបំបែកពីឪពុកម្តាយ នៅក្នុងឆ្នាំ២០១៥ អ្នកទាំងពីរក៏ខំរកស៊ីរៀងៗខ្លួន។

ដោយសារតែនៅឆ្ងាយពីគ្នាលែងទុកចិត្តនៅក្នុងឆ្នាំ២០១៦ អ្នកទាំងពីរមានបញ្ហារកាំរកូសរហូតសម្រេចចិត្តបែកគ្នានិងមានសង្សារថ្មីរៀងៗខ្លួន។ទោះយ៉ាងណា ហេតុតែជាគូព្រេងដែលទេវតាចារទុក បន្ទាប់ពីបែកគ្នាប៉ុន្មានខែអ្នកទាំងពីរក៏វិលត្រឡប់មករកគ្នាវិញហើយកាន់តែមានគំនិតចាស់ទុំជាងមុន ដោយមើលឃើញពីកំហុសខ្លួនឯងរៀងៗខ្លួន។ នៅចុងឆ្នាំនោះ ផន សុផារី បានបង្កើតមុខរបររកស៊ីអនឡាញ ហើយប្តីរបស់ខ្លួនក៏មកជួយនឹងរកស៊ីជាមួយគ្នាដែលធ្វើឱ្យទំនាក់ទំនងអ្នកទាំងពីរកាន់តែល្អប្រសើរ និងបានភ្ជាប់ពាក្យជាមួយគ្នា។

ក្នុងឆ្នាំ២០១៧ អ្នកនាង ផន សុផារី និងលោក សុង សុវណ្ណារ៉ា បានសម្រេចចិត្តរៀបការជាមួយគ្នានិងបានពរពោះកំណើតបេឡា ក្នុងរយៈពេលប៉ុន្មានខែក្រោយមកស្របពេលជាមួយគ្នានោះអ្នកទាំងពីរមានទាំងឡាននិងផ្ទះផ្ទាល់ខ្លួន។ ក្នុងឆ្នាំ២០១៨ គឺជាឆ្នាំដែលនាងបានក្លាយជាម្តាយគេ ខណៈដែលនៅក្នុងរង្វង់គ្រួសារចាប់ផ្តើមមានភាពតានតឹងរហូតហៅចាស់ទុំមកនិយាយគ្នាគិតគូរពីរឿងលែងលះ។

ទោះបីជាមិនបានលែងលះហើយការលក់ដូរបានប្រសើរជាងមុនប៉ុន្តែការឈ្លោះប្រកែកគ្នានៅតែមានរហូតដល់ឆ្នាំ២០២០ ផន សុផារី ចាប់ផ្តើមពរពោះកូនទីពីរគឺជាអ៊ែលលី។ ក្នុងឆ្នាំ២០២២ អ្នកទាំងពីរបានកាត់បន្ថយការឈ្លោះប្រកែកគ្នាជាងមុន ហើយក្នុងឆ្នាំ២០២៣រូបនាងបានចាប់ផ្តើមធ្វើមាតិកា ដែលធ្វើឱ្យជីវិតរបស់នាងមានការផ្លាស់ប្តូរយ៉ាងខ្លាំង។ ដោយសារតែកូនបានធ្វើឱ្យជីវិតរបស់ ផន សុផារី កាន់តែរកលុយបានច្រើនជាងមុន ហើយនាងនិងស្វាមីបានអង្គុយនិយាយគ្នាដោយបើកចំហរ និងបានស្នើសុំគ្នាទៅវិញទៅមកធ្វើឱ្យអ្នកទាំងពីរកាន់តែយល់ពីគ្នាជាងមុន។

អ្នកនាង ផន សុផារី បាននិយាយថាជីវិតគូមិនត្រូវការតែសេចក្តីស្រលាញ់តែមួយមុខទេ ប៉ុន្តែត្រូវការលទ្ធផល បើសិនជាមានតែក្តីស្រលាញ់តែគ្មានចំណូលមានប្តីប្រពន្ធច្រើនណាស់ដែលមានការឈ្លោះប្រកែកគ្នាដូចជាគ្រួសាររបស់នាង។ អ្នកនាងបន្តទៀតថាចាប់តាំងពីឆ្នាំ២០២៣-២០២៦ នៅពេលទំនាក់ទំនងប្តីប្រពន្ធអ្នកទាំងពីរផ្លាស់ប្តូរមិនថាតែការងារ មុខរបររកស៊ី កិតិ្តយស គឺហូរចូលមកដោយខ្លួនឯង ហើយការសម្រេចចិត្តរបស់នាងកាលពីមុនដែលជម្នះនឹងគ្រួសាររបស់ខ្លួនគឺពិតជាមិនខកបំណងនោះទេ។ នៅចុងវីដេអូ អ្នកនាង ផន សុផារី បាននិយាយដោយសង្ឃឹមថាខួបលើកទី១៣ ពួកគេនឹងមានសមាជិកថ្មីថែមម្នាក់ទៀត៕