ប្រទេសសិង្ហបុរី ៖ យើងធ្លាប់បានឮថា ការលាបថ្នាំពណ៌នៅលើជញ្ជាំងលំនៅឋាននឹងអាចជួយកាត់បន្ថយកំដៅបាន ប៉ុន្តែវានឹងល្អកម្រិតណា បើយើងអាចធ្វើឱ្យទីក្រុងទាំងមូលកាន់តែត្រជាក់ជាងមុន ដោយការលាបថ្នាំពណ៌នៅតាមតំបន់ផ្សេងៗក្នុងទីក្រុង ។

អ្នកស្រាវជ្រាវមកពីសាកលវិទ្យាល័យ Nanyang Technological ប្រទេសសិង្ហបុរី បានបង្កើតថ្នាំពណ៌ធ្វើឱ្យទីក្រុងកាន់តែត្រជាក់ និងអាចកាត់បន្ថយសីតុណ្ហភាព ចាប់ពី១​អង្សារសេ ទៅ២អង្សារសេ ។

ការស្រាវជ្រាវនេះបានសាកល្បងយកថ្នាំពណ៌ប្រភេទថ្មីទៅលាបតាមតំបន់ផ្សេងៗក្នុងទីក្រុង ដូចជា ៖ លាបលើរបង, ដំបូលអគារ, តាមផ្លូវ និងផ្លូវសម្រាប់អ្នកថ្មើរជើង ។ ក្រុមអ្នកស្រាវជ្រាវបានប្រមូលទិន្នន័យអំពីបរិយាកាសប្រែប្រួល, សីតុណ្ហភាព, សំណើម និងកាំរស្មី UV អស់រយៈពេលជាង២ខែ ដោយធ្វើការប្រៀបធៀបតំបន់លាបថ្នាំពណ៌ប្រភេទថ្មី និងតំបន់ពុំបានលាបថ្នាំពណ៌ ។

តាមការសរុបលទ្ធផលសាកល្បងខាងលើបញ្ជាក់ថា តំបន់បានលាបថ្នាំពណ៌អាចបញ្ចេញកំដៅដែលកើតឡើងដោយសារការដ្ឋានសំណង់ បានល្អជាងតំបន់ពុំបានលាបថ្នាំពណ៌ រហូតដល់៣០% ឯណោះ ។ ក្រៅពីនេះ វាអាចកាត់បន្ថយសីតុណ្ហភាពចាប់ពី១អង្សារសេ ទៅ២អង្សារសេ ក្នុងពេលអាកាសធាតុក្តៅបំផុត ។

បើប្រៀបធៀបដំបូលអគារបានលាបថ្នាំពណ៌ប្រភេទថ្មីជាមួយដំបូលអគារធម្មតាឃើញថា ដំបូលបានលាបថ្នាំពណ៌អាចកាត់បន្ថយកំដៅរហូតដល់៤០% ក្នុងពេលអាកាសធាតុក្តៅបំផុត ។ ក្រុមអ្នកស្រាវជ្រាវបានដាក់បញ្ចូលសារធាតុគីមីក្នុងថ្នាំពណ៌ថ្មីដើម្បីជួយកាត់បន្ថយកំដៅថ្ងៃ ព្រមទាំងជួយឱ្យតំបន់នានាក្នុងទីក្រុងគួរឱ្យចង់រស់នៅ ។

វាជាការស្រាវជ្រាវលើកដំបូង និងបានសាកល្បងលាបថ្នាំពណ៌ក្នុងទីក្រុងបង្ហាញថា ការលាបថ្នាំពណ៌នៅផ្នែកខាងក្រៅអាចជួយកាត់បន្ថយសីតុណ្ហភាពរបស់អគារ និងតំបន់ផ្សេងៗក្នុងទីក្រុងដ៏ធំ ។ ការប្រើប្រាស់ថ្នាំពណ៌នេះជាវិធីងាយស្រួល ដែលអាចជួយឱ្យលំនៅឋាន និងអគារផ្សេងៗក្នុងទីក្រុងគួរឱ្យចង់រស់នៅជាងមុន ស្របពេលអាកាសធាតុលើពិភពលោក កាន់តែក្តៅខ្លាំងពីមួយថ្ងៃទៅមួយថ្ងៃ ៕

ប្រទេសហ្វីលីពីន ៖ កាលពីថ្ងៃទី៣ ខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា ខ្យល់ព្យុះឈ្មោះ «យ៉ាងិ» បានបោកបក់មកលើប្រទេសហ្វីលីពីនធ្វើឱ្យកើត ទឹកជំនន់ភ្លាមៗ ។ លើសពីនេះ ពលរដ្ឋហ្វីលីពីនបានស្លា.ប់ ដោយសារគ្រោះធម្មជាតិរហូតដល់១១នាក់ ។

ខ្យល់ព្យុះ «យ៉ាងិ» ធ្វើឱ្យមានភ្លៀងធ្លាក់ខ្លាំងនៅហ្វីលីពីនអស់រយៈពេល២ថ្ងៃ (គឺចាប់ពីថ្ងៃទី២ ដល់ថ្ងៃទី៣ ខែកញ្ញា ឆ្នាំ២០២៤) ។ ក្រោយពីភ្លៀងធ្លាក់រួចមកបណ្តាលឱ្យបាក់ដីជាច្រើនកន្លែង និងមានពលរដ្ឋស្លាប់រហូតដល់១១នាក់ ក្នុងនោះមានទារិកាអាយុត្រឹម៩ខែផងដែរ ។

ទីក្រុងណាកា ស្ថិតនៅភាគខាងកើតប្រទេស គឺស្ថិតក្នុងចំណោមទីក្រុងរងគ្រោះធ្ងន់ធ្ងរបំផុតដោយសារគ្រោះធម្មជាតិ ។ ខ្យល់ព្យុះបានបម្លាស់ទីទៅភាគខាងជើងឆ្នេរសមុទ្រកោះលូសន ដែលជាកោះសំខាន់របស់ហ្វីលីពីន កាលពីថ្ងៃទី២ ខែកញ្ញា កន្លងមក ដែលកម្លាំងខ្យល់ស្មើនឹង៧៥គីឡូម៉ែត្រក្នុង១ម៉ោង ។

អាជ្ញាធរបានដាស់តឿនពលរដ្ឋពីខ្យល់ព្យុះនៅលើកោះលូសន ដែលមានមនុស្សរស់នៅច្រើនបំផុតរបស់ប្រទេសហ្វីលីពីន ព្រមទាំងទីក្រុងម៉ានីលផងដែរ ។ សាលារៀនគ្រប់កម្រិត និងមន្ត្រីរាជការបានផ្អាកការងារបណ្តោះអាសន្ន ដោយសារខ្យល់ព្យុះ ។

មន្ត្រីគ្រប់គ្រងសុវត្ថិភាពសាធារណៈនិយាយថា ទឹកជំនន់នៅតំបន់មួយចំនួនមានកម្ពស់ហួសក្បាលមនុស្ស ហើយជនរងគ្រោះរាប់រយនាក់បានទទួលការជួយសង្គ្រោះ ។ កាលពីថ្ងៃទី២ ខែកញ្ញា មានជនរងគ្រោះជាង៣០០នាក់ស្នាក់នៅក្នុងជម្រកបណ្តោះអាសន្ន ។ អាជ្ញាធរនិយាយថា កម្រិតទឹកជំនន់ក្នុងទីក្រុងដែលមានមនុស្សរស់នៅចំនួន២១ម៉ឺននាក់ បានស្រកចុះយឺតដោយសារទឹកឡើងខ្ពស់ពេក ។

ក្រៅពីនេះ ជើងហោះហោះក្នុងស្រុកជាច្រើនបានផ្អាកការហោះហើរជាបណ្តោះអាសន្ន ។ ខ្យល់ព្យុះបានបោកបក់ឆ្លងកាត់ខេត្តអិសាបេឡា ស្ថិតនៅភាគខាងជើងប្រទេសនៅរសៀលថ្ងៃទី៣ ខែកញ្ញា ហើយមានទីក្រុង៤ និងពលរដ្ឋ៣៣.០០០នាក់ បានរងគ្រោះពីខ្យល់ព្យុះដោយផ្ទាល់ ។

គួរបញ្ជាក់ថា ក្នុង១ឆ្នាំៗ ប្រទេសហ្វីលីពីនបានរងគ្រោះដោយសារខ្យល់ព្យុះចំនួន២០ ។ កាលពីឆ្នាំ២០១៣ ហ្វីលីពីនបានរងគ្រោះដោយសារខ្យល់ព្យុះហៃយៀន ដែលបណ្តាលឱ្យមនុស្សស្លាប់ជាង៧.៣០០នាក់ និងបំផ្លាញភូមិស្រុក, បក់ទូកទៅលើច្រាំង និងធ្វើឱ្យមនុស្ស៥លាននាក់នៅតំបន់កណ្តាលបាត់បង់ផ្ទះសម្បែង ៕

ប្រទេសកូរ៉េខាងត្បូង ៖ គីមឈី គឺជាអាហារដ៏សំខាន់របស់ពលរដ្ឋកូរ៉េខាងត្បូង ប៉ុន្តែគុណភាព និងបរិមាណទិន្នផលស្ពៃបូកគោចាប់ផ្តើមធ្លាក់ចុះដោយសារសីតុណ្ហភាពកើនឡើងខ្ពស់ ដែលបណ្តាលមកពីបម្រែបម្រួលអាកាសធាតុ បានធ្វើឱ្យការផលិតគីមឈីនៅកូរ៉េខាងត្បូងរងផលប៉ះពាល់ខ្លាំង ។ នេះបើតាមការលើកឡើងរបស់កសិករ និងអ្នកធ្វើគីមឈីកូរ៉េខាងត្បូង ។

ស្ពៃបូកគោ នឹងដុះលូតលាស់ល្អពេលអាកាសធាតុត្រជាក់ ហើយគេនិយមដាំវាភាគច្រើននៅតាមតំបន់ភ្នំ ដែលមានសីតុណ្ហភាពមិនលើសពី២៥អង្សារសេក្នុងរដូវក្តៅ ។ ការស្រាវជ្រាវបង្ហាញថា អាកាសធាតុក្តៅខ្លាំងកើតឡើងដោយសារបម្រែបម្រួលអាកាសធាតុបានគំរាមកំហែងទិន្នផលស្ពៃបូកគោយ៉ាងខ្លាំង រហូតធ្វើឱ្យកូរ៉េខាងត្បូងពុំអាចដាំដំណាំនេះបន្តទៀត ។

អ៊ី យ៉ុងយ៉ូ អ្នកជំនាញផ្នែកដំណាំ និយាយថា ស្ពៃបូកគោនឹងដុះលូតលាស់ល្អពេលអាកាសធាតុត្រជាក់ ហើយសីតុណ្ហភាពសមស្របបំផុត គឺចាប់ពី១៨អង្សារសេ ទៅ២១អង្សារសេ ។ រីឯកសិករ និងអ្នកផលិតគីមឈី ក៏បាននិយាយពាក់ព័ន្ធនឹងបម្រែបម្រួលអាកាសធាតុដូចគ្នាដែរ ។ គីមឈីរសជាតិហឹរបានធ្វើពីបន្លែផ្សេងៗ ដូចជា ៖ ក្បាលឆៃថាវ, តាសក់ និងស្លឹកខ្ទឹម ប៉ុន្តែអាហារដ៏ពេញនិយមមួយនេះត្រូវការស្ពៃបូកគោ ពុំអាចខ្វះបាន ។

ចំណែក លី ហាយ៉ុន មន្ត្រីជំនាញគីមឈីមកពីក្រសួងកសិកម្មកូរ៉េខាងត្បូងនិយាយថា ផលប៉ះពាល់ដោយសារសីតុណ្ហភាពកើនឡើងខ្ពស់បានធ្វើឱ្យដំណាំស្ពៃបូកគោស្អុយរលួយ និងខូចឫស ។ បើវានៅតែបែបនេះបន្តទៀត កូរ៉េខាងត្បូងនឹងបញ្ឈប់ការធ្វើគីមឈី នារដូវក្តៅ ។

យោងតាមទិន្នន័យការិយាល័យស្ថិតិរបស់រដ្ឋាភិបាលបញ្ជាក់ថា កាលពីឆ្នាំ២០២៣ ផ្ទៃដីដាំស្ពៃបូកគោនៅកូរ៉េខាងត្បូង គឺតិចជាងពាក់កណ្តាល បើធៀបនឹង២០ឆ្នាំមុន ។ រីឯរបាយការណ៍របស់ការិយាល័យអភិវឌ្ឍន៍ជនបទស្រាវជ្រាវផ្នែកកសិកម្មឱ្យដឹងថា ការផ្លាស់ប្តូរអាកាសធាតុនឹងធ្វើឱ្យផ្ទៃដីដាំស្ពៃបូកគោធ្លាក់ចុះខ្លាំងក្នុងរយៈពេល២៥ឆ្នាំខាងមុខ ហើយគ្មានការដាំស្ពៃបូកគោនៅតំបន់ខ្ពង់រាបទេ ។

អ្នកស្រាវជ្រាវបញ្ជាក់ថា ភ្លៀងធ្លាក់ខ្លាំង និងសត្វល្អិតបំផ្លាញដំណាំដែលកសិករពិបាកកម្ចាត់ក្នុងរដូវក្តៅ គឺជាមូលហេតុធ្វើឱ្យទិន្នផលដំណាំធ្លាក់ចុះ ។ ក្រៅពីនេះ បញ្ហាផ្សិតបណ្តាលឱ្យដំណាំក្រៀមស្វិតបានប៉ះពាល់យ៉ាងខ្លាំងដល់កសិករ ជាពិសេស ពេលជិតប្រមូលផល ៕