នៅថ្ងៃទី៥ ខែកញ្ញា ឆ្នាំ២០២៤នេះ មន្ទីរសាធារណការ និងដឹកជញ្ជូនរាជធានីភ្នំពេញ បានបញ្ចេញប្លង់គម្រោងសាងសង់ស្ថានីយ៍បូមទឹកថ្មីបន្ថែមរបស់ស្ថានីយ៍បូមទឹកបឹងទំពុន នៃគម្រោងផែនការវិនិយោគហេដ្ឋារចនាសម្ព័ន្ឋ ប្រព័ន្ឋលូ និងប្រព័ន្ឋរំដោះទឹកសម្រាប់បញ្ចៀសការជន់លិចក្នុងភូមិសាស្ត្ររាជធានីភ្នំពេញ។

គម្រោងនេះ នឹងត្រូវបំពាក់ម៉ូទ័របូមទឹកខ្នាតធំ មានទំហំអង្កត់ផ្ចឹត ១.៥ម៉ែត្រ ចំនួន ២គ្រឿង មានសមត្ថភាពបូមទឹក ១២ម៉ែត្រគូបក្នុង១វិនាទី ។

នៅពេលដាក់អោយដំណើរការបូមទឹកនាពេលខាងមុខ ស្ថានីយ៍បឹងទំពុន នឹងមានសមត្ថភាពបូមទឹកសរុប ៤៥ម៉ែត្រគូបក្នុង១វិនាទី ដែលនឹងកាត់បន្ថយការលិចលង់ដោយទឹកភ្លៀងនៅភូមិសាស្ត្រខណ្ឌមានជ័យ ចំការមន ទួលគោក សែនសុខ និងពោធិ៍សែនជ័យ។

គួរបញ្ជាក់ផងដែរថា ស្ថានីយបូមទឹកបឹងទំពុន ជាស្ថានីយបូមទឹកដែលធំជាងគេនៅក្នុងរាជធានីភ្នំពេញ ដោយបំពាក់ម៉ូទ័របន្ថែមជាច្រើនគ្រឿង និងអាចរំដោះទឹកបានជាច្រើនខណ្ឌ៕

នាថ្ងៃស្អែក ទី៦ ខែកញ្ញា ឆ្នាំ២០២៤ វេលាម៉ោង ៦:០០នាទីព្រឹក នឹងមានការដង្ហែសព សម្តេចចៅហ្វាវាំង វរវៀងជ័យ អធិបតីស្រីង្គារ គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង ឆ្ពោះទៅបូជានៅវត្តជម្ពូវ័ន។

ការដង្ហែសពនេះ នឹងចាប់ផ្តើម ដង្ហែចេញពីគេហដ្ឋាន តាមរុក្ខវិថីសម្តេចប៉ាន ឆ្ពោះទៅមហាវិថីព្រះនរោត្តម បត់ស្តាំឆ្ពោះទៅវង្វង់មូល វិមានឯករាជ្យ បត់ឆ្វេងតាមមហាវិថីព្រះសីហនុ រហូតដល់ស្តុបនាគបាញ់ទឹក បត់ឆ្វេងតាមមហាវិថី សម្តេច សុធារស បន្តឆ្លងកាត់មុខព្រះបរមរាជវាំង រហូតដល់ផ្លូវលេខ១៧៨ បត់ឆ្វេងទៅដល់មហាវិថីព្រះនរោត្តម រួចបត់ស្តាំតាមមហាវិថីព្រះនរោត្តម ឆ្ពោះទៅកាន់ស្តុបមន្ទីរពេទ្យព្រះអង្គឌួង បត់ឆ្វេងតាមវិថីព្រះអង្គឌួង ឆ្ពោះទៅ មហាវិថីសហព័ន្ធរុស្ស៊ី រហូតដល់ស្ពានអាកាសចោមចៅ ឆ្ពោះទៅកាន់ផ្លូវជាតិលេខ៤ រហូតដល់ទីតាំងប្រារព្ធ ពិធីបុណ្យបូជាសព នៅវត្តជម្ពូវ័ន។

ហេតុដូចនេះ ប្រជាពលរដ្ឋដែលត្រូវធ្វើដំណើរឆ្លងកាត់តាមតម្រាយផ្លូវខាងលើមេត្តាយោគយល់អធ្យាស្រ័យ និងចូលរួមបញ្ចៀសការធ្វើដំណើរឆ្លងកាត់តាមតម្រាយផ្លូវដង្ហែសពខាងលើ ដើម្បីកាត់បន្ថយការកកស្ទះចរាចរណ៍៕

នាថ្ងៃទី០៤ ខែកញ្ញា ឆ្នាំ២០២៤នេះ អង្គភាពប្រឆាំងអំពើពុករលួយ ហៅកាត់ថា ACU បានសេចក្តីជូនដំណឹងស្ដីពី ការជ្រើសរើសអ្នកសង្កេតការណ៍ស្ម័គ្រចិត្ត សម្រាប់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ០៨ តុលា ២០២៤ ចំនួន ៣៣១៨ នាក់។

សម្រាប់ការដាក់ពាក្យ ACU បានបើកទទួលពីឥឡូវនេះរហូតដល់ថ្ងៃទី១៣ ខែកញ្ញ ឆ្នាំ២០២៤ មុនពេលដែលប្រកាសឈ្មោះបេក្ខជនជាប់នឹងថ្ងៃទី១៨ ខែកញ្ញា។

នៅក្នុងការបំពេញភារកិច្ចរយៈពេល២ថ្ងៃនេះ អ្នកស្ម័គ្រចិត្តសង្កេតការណ៍ប្រឡងបាក់ឌុបទាំងអស់ម្នាក់នឹងទទួលបាន១០មុឺនរៀល ជាមួយនឹងវញ្ញាបនបត្រមួយសន្លឹក។

ការដើម្បីដាក់ពាក្យតម្រូវឱ្យ ចូលតាមតំណលីង QR code ខាងក្រោមនេះ៖

នាវេលាយប់កណ្តាលអធ្រាត្រចូលថ្ងៃទី៥ ខែកញ្ញា ឆ្នាំ២០២៤ លោក ម៉ៃ សុគន្ធបានបើករថយន្តគេចពីគោលដៅត្រួតពិនិត្យរបស់សមត្ថកិច្ច រួចបន្តបុករះកង់បីឥណ្ឌា២គ្រឿង។

មុនពេលកើតហេតុ គេបានឃើញរថយន្តលោក ម៉ៃ សុគន្ធ ម៉ាក LAND CRUISER ពាក់ស្លាកលេខ ភ្នំពេញ 2BW-6802 បានបើកគេចគោលដៅត្រួតពិនិត្យរបស់សមត្ថកិច្ច នៅចំណុចផ្លូវក្បែរបឹងបៃតង រួចមកហួសវត្តទឹកថ្លា ក៏បានរេចង្កូតទៅបុកកង់បីឥណ្ឌា១គ្រឿង បណ្តាលឱ្យកង់បីនោះ ជ្រុលទៅបុកផ្កង់បីឥណ្ឌា១គ្រឿង។

បន្ទាប់មករថយន្តមិនទាន់អស់ល្បឿន ក៏បានបន្តទៅបុកទ្រូងផ្លូវអស់៤កង់បន្ថែមទៀត ទើបទៅមុខលែងរួច។

ក្រោយកើតហេតុភ្លាមៗ ម៉ៃ សុគន្ធ ត្រូវបានសមត្ថកិច្ចបញ្ជូនទៅស្នងការដ្ឋាននគរបាលរាជធានីភ្នំពេញភ្លាម៕

បុរសសញ្ជាតិអាមេរិក-ខ្មែរមួយរូប បានសម្តែងនូវអារម្មណ៍រំភើបចិត្តជាខ្លាំង បន្ទាប់ពីបានចូលសញ្ជាតិខ្មែរ ហើយនេះជាលើកទីមួយហើយ ដែលលោកបានធ្វើដំណើរដោយប្រើប្រាស់ Passport ខ្មែរ ក្នុងនាមជាពលរដ្ឋខ្មែរមួយរូប។

លោក Uriah Lyford ហៅ យូរ៉ាយ មានដើមកំណើតអាមេរិក ដែលកាលពីអំឡុងខែកញ្ញា ឆ្នាំ២០២២ កន្លងទៅ លោកត្រូវបានរាជរដ្ឋាភិបាលសម្រេចផ្តល់សញ្ជាតិខ្មែរឲ្យជាផ្លូវការ បន្ទាប់ពីបានមករស់នៅកម្ពុជារយៈពេលជិត ២០ ឆ្នាំ។

យ៉ាងណាមិញ កាលពីថ្ងៃទី ៣១ ខែសីហា ឆ្នាំ២០២៤នេះ យោងតាមការបង្ហោះនៅលើគេហទំព័រផ្លូវការរបស់លោក យូរ៉ាយ បានបង្ហាញវីដេអូខ្លីមួយ ដោយភ្ជាប់មកជាមួយនឹងចំណងជើងថា «មានកិត្តិយសណាស់ ដែលបានធ្វើដំណើរក្នុងនាមជាជនជាតិខ្មែរម្នាក់»។ តាមរយៈវីដេអូ លោកកំពុងស្ថិតនៅឯអាកាសយាន្តដ្ឋានអន្តរជាតិសៀមរាបអង្គរ ដោយបានបង្ហាញនូវអារម្មណ៍រំភើប ព្រោះបានធ្វើដំណើរក្នុងនាមជាជនជាតិខ្មែរមួយរូប ថែមទាំងអាចដកថ្លៃពន្ធពីប៉ាស្ព័រ ទទួលបានប្រាក់ចំនួន ៧ដុល្លារត្រឡប់មកវិញ។ ម៉្យាងវិញទៀត នៅឯអាកាសយាន្តដ្ឋានមានបំពាក់នូវបច្ចេកវិទ្យាទំនើប ដោយធ្វើការ Scan បានយ៉ាងមានភាពងាយស្រួលផងដែរ។

គួរបញ្ជាក់ថា លោកយ៉ូរាយ គឺអាចនិយាយភាសាខ្មែរបានយ៉ាងស្ទាត់ជំនាញ ខណៈបច្ចុប្បន្ននេះលោកមានភាពល្បីល្បាញយ៉ាងខ្លាំងនៅលើបណ្តាញសង្គម តាមរយៈការដាក់បង្ហោះវីដេអូ ជាសារអប់រំ ខ្លឹមសារវប្បធម៌ ប្រវត្តិសាស្រ្ត និងសង្គមខ្មែរជាហូរហែរ។ លោកយូរ៉ាយ មានប្រពន្ធ និងកូនស្រីៗចំនួន ២ នាក់ទៀតផងដែរ ដោយតាមរយៈវីដេអូ ស្រ្តីជាប្រពន្ធ មានដើមកំណើតជាកូនកាត់ជប៉ុនអាមេរិក ហាក់បង្ហាញអារម្មណ៍ច្រណែន ចង់ចូលសញ្ជាតិខ្មែរឲ្យបានឆាប់រហ័សដូចទៅនឹងស្វាមីរបស់ខ្លួនផងដែរ។ ទាំងនេះគឺបានឆ្លុះបញ្ចាំងពីទឹកចិត្តស្រលាញ់ សម្បត្តិវប្បធម៌និងអរិយធម៌ខ្មែរ ពីគ្រួសាររបស់ពួកគេដែលជាជនបរទេសសុទ្ធសាទ តែនូវតែខិតខំព្យាយាមរៀនទាំងអក្សរនិងប្រវត្តិសាស្រ្តខ្មែរ ដើម្បីទទួលបានសញ្ជាតិជាខ្មែរផងដែរ៕

ព្រះបរមរាជវាំងចតុមុខមង្គល បាននឹងកំពុងតែលេចវត្តមានយ៉ាងល្អឯកចំកណ្តាលទីក្រុងភ្នំពេញ ដែលព្រះរាជវាំងនេះគឺជាទីប្រថាប់របស់ព្រះមហាក្សត្រខ្មែរបច្ចុប្បន្ន ពោលក្នុងរជ្ជកាលព្រះបាទសម្តេចព្រះបរមនាថ នរោត្តមសីហមុនី។

ព្រះបរមរាជវាំងនេះទៀតសោត ក៏បើកទទួលភ្ញៀវទេសចរទាំងជាតិ និងអន្តរជាតិ ឱ្យចូលទស្សនាជារៀងរាល់ថ្ងៃផងដែរ នៅពេលព្រឹកចាប់ពីម៉ោង ៨-១១ ព្រឹក និងពេលរសៀល ចាប់ពីម៉ោង ២-៥ រសៀល។ ចំពោះតម្លៃសំបុត្រចូលទស្សនា : សម្រាប់ភ្ញៀវជាតិ ១,០០០រៀល/នាក់, សម្រាប់ភ្ញៀវបរទេស ១០ដុល្លារ/នាក់។

ការស្ថាបនាព្រះបរមរាជវាំងចុងក្រោយ បានរៀបចំឡើងនៅភ្នំពេញ ចំនួន២លើក គឺលើកទី១ ក្នុងឆ្នាំ១៤៣៤ ក្នុងរជ្ជកាលព្រះបាទពញាយ៉ាត និង លើកទី២ ក្នុងឆ្នាំ១៨៦៦ ក្នុងរាជ្យ ព្រះបាទនរោត្តម និង ត្រូវរុះរើសាងសង់ជាថ្មី នៅឆ្នាំ ១៩១៣ ក្នុងរាជ្យ ព្រះបាទស៊ីសុវត្ថិ រហូតមកដល់សព្វថ្ងៃ ដែលមានឈ្មោះថា ព្រះបរមរាជវាំងចតុមុខមង្គល ដោយស្ថិតនៅត្រង់ចំណុចប្រសព្វនៃទន្លេទាំងបួន មាន ទន្លេមេគង្គលើ ទន្លេមេគង្គក្រោម ទន្លេបាសាក់ និងទន្លេសាប។ ព្រះបរមរាជវាំង សាងសង់បែរមុខទៅទិសខាងកើត គឺ បែរទៅរកទន្លេចតុមុខ។

ព្រះបរមរាជវាំងមានកំពែង ព័ទ្ធជុំវិញប្រវែង ១៧៧២ម ដោយ កំពែងខាងកើតប្រវែង ៤២១ម ខាងលិចប្រវែង ៤៣៥ម ខាងជើងប្រវែង ៤៨៤ម និង ខាងត្បូងប្រវែង ៤៣២ម។ កំពែងថ្មរឹងមាំទាំងនោះ លំអទៅដោយសន្លឹកសីមានៅខាងមុខ ត្រូវបានកសាងឡើង នៅឆ្នាំ១៨៦៦ – ១៨៧០ ក្នុងរជ្ជកាល ព្រះបាទនរោត្តម។

ព្រះបរមរាជវាំង កសាងតាមរចនាបថបាយ័ន ដែលមានក្លោងទ្វារចេញចូលចំនួន៥ ហើយទ្វារទាំង៥នោះត្រូវបានគេសង់ មិនឲ្យចាក់ចំគ្នាឡើយ។ នៅប្រាសាទបាយ័ន ទ្វារជ័យ និង ទ្វារខ្មោច ស្ថិតនៅទិសខាងកើត ហើយទ្វារខ្មោចស្ថិតនៅខាងស្តាំដៃទ្វារជ័យ។ ចំណែកឯព្រះបរមរាជវាំងវិញ ទ្វារជ័យស្ថិតនៅទិសខាងកើត ដែរតែទ្វារខ្មោចវិញស្ថិតនៅឯទិសខាងជើងទៅវិញ។ ទ្វារខ្មោចនេះ ត្រូវបានគេ អនុញ្ញាតិ ឱ្យប្រើ តែពេលណាមាន ព្រះមហាក្សត្រចូលទីវង្គត ដើម្បីដង្ហែព្រះសពទៅធ្វើឈាបនកិច្ចនៅឯទីវាលមេរុ។

ព្រះបរមរាជវាំង ត្រូវបានចាត់ទុកជាតំណាងប្រទេសជាតិទាំងមូល ហើយរាល់សំណង់ប្រាសាទ នៅក្នុងព្រះបរមរាជវាំងត្រូវបានគេលាបលំអ ដោយពណ៌លឿង តំណាងឲ្យ ព្រះពុទ្ធសាសនា និង ពណ៌ស តំណាងឲ្យព្រហ្មញ្ញសាសនា ដែលរួមមាន៖
១. ប្រាសាទទេវាវិនិច្ឆ័យ
២. ប្រាសាទខេមរិន្ទ
៣. ប្រាសាទសហមេត្រី
៤. ប្រាសាទហោសំរាន្តភិរម្យ
៥. ប្រាសាទច័ន្ទឆាយា
៦. ប្រាសាទសំរិទ្ឋភិមាន ឬ ហោព្រះខ័ន
៧. ព្រះទីនាំងភោជនីយ
៨. វិមានស្តេចណាប៉ូឡេអុងទី៣
៩. ព្រះរាជដំណាក់ច័ន្ទ ឬ ព្រះរាជការិយាល័យ
១០. ព្រះវិហារព្រះកែវមរកត
១១. សារមន្ទីររោងដំរី៕