តារាចម្រៀងល្បីឈ្មោះ សួស វីសា បានបង្ហាញអារម្មណ៍ដ៏ផ្អែមល្អែមដាក់លោក ថមមី ជាស្វាមីកាត់ព្រឹកស្តែងពីទង្វើល្អដែលមិនមានការប្រែប្រួលទោះបីជាកន្លងផុតមកជាច្រើនឆ្នាំក៏ដោយ។ តារាចម្រៀងរូបនេះកំពុងតែពរពោះកូនទី២ដូចគ្នា បន្ថែមសមាជិកម្នាក់ទៀតរូបនាងកាន់តែផ្អែមល្អែមដាក់ស្វាមី។
នៅព្រឹកថ្ងៃទី៤ ខែកញ្ញា សួស វីសា បានបង្ហោះរូបភាពស្វីតៗជាច្រើនសន្លឹកជាមួយ ថមមី ជាស្វាមី អមដោយពាក្យពេចន៍ថា «ថាមិនចង់ផុសទេ តែទប់មិនជាប់ពីទង្វើល្អមិនប្រែប្រួលរបស់បុរសម្នាក់នេះ តាំងនៅជាមិត្តភ័ក្តរហូតក្លាយជាសង្សារ រហូតក្លាយជាគូដណ្តឹង រហូតដល់ក្លាយជាប្តីប្រពន្ធមានកូន២នាក់ទៅហើយ បងនៅតែមិនប្រែប្រួល។ ទង្វើល្អការថែរក្សាអូននិងកូន ទំនួលខុសត្រូវ កាត្វពកិច្ចមេគ្រួសារ រួមទាំងជាមេដឹកនាំស្ថាប័នផ្សេងៗ គឺបងតែងតែព្យាយាមធ្វើវាបានល្អណាស់ ទោះបងកើតមកជាកូនអ្នកក្រមែនពិត តែបងបានតស៊ូមកដល់សព្វថ្ងៃនេះគឺបានជោគជ័យមួយផ្នែកទៅហើយនៃជីវិត តាំងពីបាតដៃទទេស្អាតរបស់យើងទាំង២នាក់ រហូតដល់បច្ចុប្បន្ននេះ បងពូកែណាស់ ព្យាយាមតស៊ូណាស់»។
ម្ចាស់បទ «ជួបមនុស្សសម្តែង » បានពោលទៅកាន់ស្វាមីរបស់ខ្លួនទៀតថា «អូនអរគុណខ្លួនឯងជាដំបូងដែលជ្រើសរើសបុរសដ៏ល្អម្នាក់បានចូលក្នុងជីវិតអូន ហើយអរគុណជាពិសេសបំផុត គឺវត្តមានរបស់បង ប្តីសំលាញ់។ សង្ឃឹមថា តទៅមុខរហូតដល់ក្លាយជាតាយាយចៅយើង បងនៅតែបែបនេះ I love you my hero ជាតិនេះអូននិងកូន មានសំណាង»។
គូស្នេហ៍សិល្បៈមួយគូនេះក្រៅពីអាជីពសិល្បៈគឺក្តោបក្តាប់ជំនួញជាច្រើននៅក្នុងដៃទាំងវិស័យអនឡាញ មានរោងចក្រទឹកកក វិស័យអចលនទ្រព្យ បង្កើតកម្មវិធីកម្សាន្តនិងមុខរបរជាច្រើនទៀត។
គូសបញ្ជាក់ថា សួស វីសា និង លោក ថមមី បានចំណាយទឹកប្រាក់ជាង ២០ម៉ឺនដុល្លារ សម្រាប់អាពាហ៍ពិពាហ៍របស់ពួកគេកាលពីថ្ងៃទី ២៩ ខែវិច្ឆិកា ឆ្នាំ២០១៩ ខណៈអ្នកទាំងពីរទទួលបានចំណងដៃកូនស្រីច្បងអាយុ៤ឆ្នាំនិងកំពុងតែពរពោះកូនម្នាក់ទៀត៕
