ប្រទេសថៃ៖ ប្រទេសថៃបាននិយាយកាលពីថ្ងៃទី ៣ ខែកញ្ញា ឆ្នាំ២០២៤ ថាខ្លួនចាប់បានត្រីទីឡាប់យ៉ាខ្មៅជាង ១,៣ លានគីឡូក្រាមក្នុងកិច្ចខិតខំប្រឹងប្រែងដើម្បីបំផ្លាញប្រភេទសត្វដែលឈ្លានពាននេះ ហើយក៏ជំរុញឱ្យប្រជាជនយកត្រីនេះទៅផលិតជាទឹកត្រី ឬសាច់ក្រកដើម្បីបរិភោគផងដែរ។
ត្រីទីឡាប់យ៉ាខ្មៅ (Sarotherodon melantheron) បានបង្ហាញខ្លួននៅក្នុងខេត្តចំនួន ១៩ នៃប្រទេសថៃ ដោយបំផ្លាញប្រព័ន្ធអេកូឡូស៊ីក្នុងទន្លេ វាលភក់ និងប្រឡាយដោយការស៊ីត្រីតូចៗ បង្គា និងដង្កូវ ខ្យងជាអាហារ ធ្វើឱ្យប្រទេសថៃមានការព្រួយបារម្ភយ៉ាងខ្លាំងអំពីផលប៉ះពាល់ដល់ឧស្សាហកម្មវារីវប្បកម្មដ៏សំខាន់របស់ខ្លួន។

យោងតាមលោក Nattacha Boonchaiinsawat អនុប្រធានក្រុមប្រឹក្សាដោះស្រាយការរីករាលដាលនៃត្រី បាននិយាយថា ចាប់ពីខែកុម្ភៈដល់ថ្ងៃទី ២៨ ខែសីហា ឆ្នាំនេះអាជ្ញាធរគឺបានរឹបអូសត្រីទីឡាប់យ៉ារាតត្បាតចំនួន ១,៣៣២,០០០ គីឡូក្រាមហើយ។ លោកបានបន្តថា “យើងបានរកឃើញថាត្រីទាំងនេះគឺបានឈ្លានពានកាន់តែច្រើនកន្លែងទៅៗ ដោយពួកគេបានរកឃើញត្រីទីឡាប់យ៉ានៅក្នុងប្រឡាយតូចៗដែលមិនធ្លាប់មានពីមុនមក” ។ លោក Nattacha បានបន្ថែមថា ការផ្ទុះឡើងនៃត្រីទីឡាប់យ៉ាខ្មៅនឹងធ្វើឱ្យសេដ្ឋកិច្ចថៃខាតបង់យ៉ាងតិច ១០ ពាន់លានបាត (ប្រហែល ២៩៣ លានដុល្លារអាមេរិក)។

ត្រីទីឡាប់យ៉ាខ្មៅ គឺជាសត្វដើមនៅអាហ្វ្រិកខាងលិច មានប្រវែង ២០ ទៅ ២៨ សង់ទីម៉ែត្រ ហើយជារឿយៗមានចំណុចខ្មៅនៅលើចង្កា។ ពួកវាអាចផ្តល់កំណើតដល់កូនៗរបស់វារហូតដល់ ៥០០ ក្បាលក្នុងពេលតែមួយ ហើយពួកវាត្រូវបានរកឃើញជាលើកដំបូងនៅក្នុងទន្លេថៃក្នុងឆ្នាំ ២០១០ បន្ទាប់មករីករាលដាលយ៉ាងឆាប់រហ័សនៅក្នុងឆ្នាំ ២០១៨ ហើយឥឡូវនេះពួកវាក៏ត្រូវបានរកឃើញនៅក្នុងរដ្ឋផ្លរីដា សហរដ្ឋអាមេរិក និងប្រទេសហ្វីលីពីនផងដែរ។

វាមិនច្បាស់ទេថាត្រីទាំងនេះបានមកដល់ប្រទេសថៃដោយរបៀបណា ប៉ុន្តែបើយោងតាមប្រព័ន្ធផ្សព្វផ្សាយមួយបានឱ្យដឹងថា ពួកវាប្រហែលជាត្រូវបាននាំចូលដោយក្រុមហ៊ុនមួយពីប្រទេសហ្គាណាក្នុងឆ្នាំ ២០១០។ លោក Nattacha បានបន្តទៀតថាការស៊ើបអង្កេតកំពុងដំណើរការដើម្បីកំណត់ពីមូលហេតុនៃការលុកលុយនេះ។ កាលពីខែកក្កដាឆ្នាំនេះ ប្រទេសថៃបានប្រកាសលុបបំបាត់ត្រីទីឡាប់យ៉ាខ្មៅជាអាទិភាពរបស់ជាតិ ហើយក៏បានចាប់ផ្តើមលើកទឹកចិត្តប្រជាជនបរិភោគពួកវាឱ្យអស់។

បច្ចុប្បន្នខេត្ត Phetchaburi គឺបានផលិតទឹកត្រី និងផ្សព្វផ្សាយទឹកត្រី ក៏ដូចជាសាច់ក្រកដែលផលិតពីត្រីទីឡាប់យ៉ាខ្មៅផងដែរ។ ភោជនីយដ្ឋានផ្សេងៗក្នុងតំបន់នេះឥឡូវក៏បានយកត្រីទីឡាប់យ៉ាខ្មៅទៅច្នៃធ្វើម្ហូបដ៏ឈ្ងុយឆ្ងាញ់ផងដែរ ហើយមនុស្សជាច្រើនក៏ចូលចិត្តញ៉ាំត្រីនេះទៀតផង។ ប្រទេសថៃក៏បានលើកទឹកចិត្តអ្នកស្រុកឱ្យចាប់ត្រីទីឡាប់យ៉ាខ្មៅយកមកធ្វើជាអាហារ ឬក៏បំផ្លាញចោលក៏បានដែរ ដោយបង់ប្រាក់ ១៥ បាត (ប្រហែល ០,៤២ ដុល្លារ) ក្នុងមួយគីឡូក្រាម។ លើសពីនេះ ប្រទេសថៃក៏បានកំណត់តំបន់លក់ត្រីចំនួន ៧៥ នៅទូទាំងប្រទេសផងដែរ៕

ទន្លេមេគង្គ គឺជាទន្លេវែងជាងគេលំដាប់ទី ១២ នៅក្នុងពិភពលោក។ ទន្លេនេះមានប្រវែងប្រហែល ៤២០០ គីឡូម៉ែត្រ ឆ្លងកាត់ប្រទេសចំនួន ៦ គឺកម្ពុជា ចិន ភូមា ថៃ ឡាវ និងវៀតណាម។ ទន្លេមេគង្គគឺជាសរសៃឈាមរបស់ប្រទេសកម្ពុជា ដែលវាហូរកាត់ខេត្តដូចជា ស្ទឹងត្រែង ក្រចេះ កំពង់ចាម កណ្តាល និងព្រៃវែង។ ទន្ទឹមនឹងនេះ វាក៏ជាជម្រកនៃប្រភេទត្រីចំនួន ១,១៤៨ ត្រូវបានទទួលស្គាល់ ក៏ដូចជាមានមនុស្សរាប់លាននាក់ពឹងផ្អែកលើទន្លេសម្រាប់ចិញ្ចឹមជីវិតរបស់ពួកគេផងដែរ។

ទោះបីជាយ៉ាងណាក៏ដោយ បើយោងតាមរបាយការណ៍ថ្មីៗពីសម្ព័ន្ធនៃក្រុមបរិស្ថានក្នុងតំបន់ និងអន្តរជាតិ បានឱ្យដឹងថា ២០% នៃប្រភេទត្រីនៅក្នុងទន្លេមេគង្គបច្ចុប្បន្នកំពុងប្រឈមមុខនឹងហានិភ័យនៃការផុតពូជ។ បើតាមសកម្មជនបរិស្ថាន ទន្លេមេគង្គត្រូវបានគំរាមកំហែងយ៉ាងធ្ងន់ធ្ងររាប់មិនអស់ រួមទាំងការសាងសង់ទំនប់ ការជីកយករ៉ែខ្សាច់ ការគ្រប់គ្រងធនធានជលផលមិនល្អ ការបាត់បង់ទីជម្រក និងការដាក់បញ្ចូលប្រភេទសត្វចម្លែក ដែលបណ្តាលឱ្យចំនួនត្រីក្នុងទន្លេមេគង្គថយចុះ នឹងប៉ះពាល់ដល់មនុស្សរាប់លាននាក់ដែលជីវភាពរស់នៅពឹងផ្អែកលើទន្លេ។

លោក Lan Mercado នាយកអង្គការ WWF ប្រចាំតំបន់អាស៊ីប៉ាស៊ីហ្វិក បានមានប្រសាសន៍ថា៖ «ការធ្លាក់ចុះគួរឱ្យព្រួយបារម្ភនៃចំនួនត្រីនៅក្នុងទន្លេមេគង្គគឺជាការដាស់តឿនមួយ ដើម្បីចាត់វិធានការជាបន្ទាន់។ យើងត្រូវតែធ្វើសកម្មភាពឥឡូវនេះ ដើម្បីផ្លាស់ប្តូរនិន្នាការមហន្តរាយនេះ ពីព្រោះសហគមន៍មេគង្គ និងប្រទេសនានា មិនអាចមានលទ្ធភាពក្នុងការបាត់បង់ពួកគេឡើយ»។ របាយការណ៍ពីក្រុមស្រាវជ្រាវក្នុងតំបន់ និងអន្តរជាតិចំនួន ២៥ បានពិនិត្យលើផលប៉ះពាល់លើផ្នែកផ្សេងៗនៃទន្លេប្រវែង ៤,៩០០ គីឡូម៉ែត្រដែលជាទន្លេវែងជាងគេនៅអាស៊ីអាគ្នេយ៍ រួមទាំងបឹងទន្លេសាបនៃប្រទេសកម្ពុជាផងដែរដែលពួកគេបាននិយាយថាចំនួនត្រីបានធ្លាក់ចុះ ៨៨% រវាងឆ្នាំ ២០១៩ ដល់ឆ្នាំ ២០២៣។

អ្នកនិពន្ធការសិក្សាបានបញ្ជាក់ថា ប្រភេទត្រីចំនួន ៧៤ ត្រូវបានវាយតម្លៃថា “ជិតផុតពូជ” នៅក្នុងបញ្ជីក្រហមរបស់សហភាពអន្តរជាតិសម្រាប់ការអភិរក្សធម្មជាតិនៃប្រភេទសត្វដែលរងការគំរាមកំហែង នេះមានន័យថា ប្រហែល ២០% នៃប្រភេទត្រីដែលគេស្គាល់នៅក្នុងទន្លេមេគង្គត្រូវបានគំរាមកំហែង។ ការបាត់បង់ត្រីអាចធ្វើឱ្យការកាប់បំផ្លាញព្រៃឈើក្នុងតំបន់កាន់តែអាក្រក់ទៅៗ ខណៈដែលមនុស្សរាប់លាននាក់ដែលពីមុនពឹងផ្អែកលើទន្លេសម្រាប់ចិញ្ចឹមជីវិតរបស់ពួកគេត្រូវបានបង្ខំឱ្យធ្វើស្រែចម្ការវិញ។

លោក Herman Wanningen នាយកប្រតិបត្តិនៃអង្គការទេសន្តរប្រវេសន៍ត្រីពិភពលោកបាននិយាយថា “វាច្បាស់ណាស់ថាយើងកំពុងប្រថុយនឹងបង្កឱ្យមានវិបត្តិជីវចម្រុះថ្មីសម្រាប់អាងទន្លេមេគង្គ។ ប៉ុន្តែវាមិនយឺតពេលទេនៅក្នុងអនុសាសន៍របស់ខ្លួន របាយការណ៍នេះបានអំពាវនាវឱ្យប្រទេសមេគង្គប្តេជ្ញាអនុវត្តការប្រឈមមុខនឹងទឹកសាប ក៏ដូចជាការការពារ និងការស្តារប្រព័ន្ធអេកូឡូស៊ីទន្លេឡើងវិញ រួមទាំងការបង្កើនលំហូរធម្មជាតិរបស់ទន្លេ ការកែលម្អគុណភាពទឹក ការការពារទីជម្រក និងប្រភេទសត្វសំខាន់ៗ ក៏ដូចជាការលុបបំបាត់របាំងទន្លេហួសសម័យជាដើម ដែលនេះគឺជាសសរស្តម្ភទាំងប្រាំមួយដែលត្រូវបានណែនាំដើម្បីជួយស្ដារទន្លេមេគង្គ៕

្រទេសវៀតណាម ៖ កាលពីថ្ងៃទី២៨ ខែសីហា ឆ្នាំ២០២៤ សារព័ត៌មានបរទេសរាយការណ៍ថា ប្រទេសវៀតណាមកំពុងសិក្សាពីអត្ថប្រយោជន៍ពិសេសផ្សេងៗ ដើម្បីទាក់ទាញវិនិយោគិនបរទេសផ្នែកផលិត Semiconductor, បច្ចេកវិទ្យា AI និងថាមពលបៃតង ។

ក្រៅពីនេះ ប្រទេសនាំមុខផ្នែកផលិតប្រចាំតំបន់អាស៊ីអាគ្នេយ៍នេះ បានព្យាយាមទាក់ទាញការវិនិយោគផ្នែកឧស្សាហកម្មបច្ចេកវិទ្យាខ្ពស់ ក្រោយពីវិនិយោគិនដកខ្លួនចេញពីចិន ។

វៀតណាម គឺជាប្រទេសមួយទទួលបានអត្ថប្រយោជន៍ច្រើនបំផុតពីការដកខ្លួនរបស់វិនិយោគិនបរទេសចេញពីប្រទេសចិន ដោយសារក្រុមហ៊ុនជាច្រើនព្យាយាមការពារខ្សែសង្វាក់ផ្គត់ផ្គង់របស់ពួកគេឱ្យរួចផុតពីសង្គ្រាមពាណិជ្ជកម្មរវាងចិន និងសហរដ្ឋអាមេរិក ដែលកាន់តែធ្ងន់ធ្ងរឡើង ។

បច្ចុប្បន្ន វៀតណាមបានក្លាយជាមជ្ឈមណ្ឌលការផលិតដ៏សំខាន់របស់ក្រុមហ៊ុនជាច្រើន ដូចជា ៖ ក្រុមហ៊ុន Samsung និង Foxconn ប៉ុន្តែវៀតណាមនៅតែមានឧបសគ្គក្នុងការទាក់ទាញការវិនិយោគពីក្រៅប្រទេស ផ្នែកឧស្សាហកម្មបច្ចេកវិទ្យាខ្ពស់ ។

មន្ត្រីជាន់ខ្ពស់របស់រដ្ឋាភិបាល ក៏ដូចជាក្រុមហ៊ុននានាយល់ឃើញថា វិនិយោគិនបរទេសប្រឈមនឹងបញ្ហាកង្វះខាតកម្លាំងពលកម្មមានជំនាញ ហើយពួកគេបារម្ភពីស្ថិរភាពនៃការផ្គត់ផ្គង់ថាមពលនៅប្រទេសវៀតណាម ។ ក្រៅពីនេះ វៀតណាមប្រឈមនឹងការប្រកួតប្រជែងផ្នែកវិនិយោគបច្ចេកវិទ្យាជាមួយប្រទេសផ្សេងក្នុងតំបន់ផងដែរ ដូចជា ៖ ម៉ាឡេស៊ី ។

លោក Do Nhat Hoang នាយកភ្នាក់ងារការវិនិយោគពីបរទេស (Vietnam’s Foreign Investment Agency) ស្ថិតនៅក្រោមក្រសួងផែនការ និងវិនិយោគ និយាយថា វៀតណាមកំពុងពិចារណាផ្តល់នូវអត្ថប្រយោជន៍ពិសេសៗពាក់ព័ន្ធនឹងការថ្លៃជួលដីធ្លី, ពន្ធសាជីវកម្ម និងពន្ធនាំចូល-នាំចេញទំនិញ ។

លោកបន្តថា រដ្ឋាភិបាលវៀតណាមមានគម្រោងបង្កើតមូលនិធិជំរុញការវិនិយោគ តាមរយៈការផ្តល់ប្រាក់ឧបត្ថម្ភ ឬផ្តល់អត្ថប្រយោជន៍ដើមទុនដល់ក្រុមហ៊ុននានា ដែលគ្រោងវិនិយោគផ្នែកបច្ចេកវិទ្យាខ្ពស់ដើម្បីទូទាត់ជាមួយអត្រាពន្ធខ្ពស់ ៕

ប្រទេសអេស្ប៉ាញ ៖ កោះ Lanzarote របស់ប្រទេសអេស្ប៉ាញ ស្ថិតនៅភាគខាងកើតបំផុតរបស់ប្រជុំកោះខាណារី ក្នុងមហាសមុទ្រអាត្លង់ទិក ។ កោះនេះស្ថិតនៅក្បែរឆ្នេរសមុទ្រភាគខាងជើងទ្វីបអាហ្វ្រិក និងសមុទ្រខ្សាច់សាហារ៉ា ។

កោះ Lanzarote បានកើតឡើងដោយសារការផ្ទុះភ្នំភ្លើងកាលពី១៥លានឆ្នាំមុន ហើយវាគ្របដណ្តប់ទៅដោយកំអែភ្នំភ្លើងរឹង, កំទេចកំទីថ្មភ្នំភ្លើង និងវាលខ្សាច់ពណ៌ខ្មៅ ។ នៅលើកោះមានភ្លៀងធ្លាក់តិចតួចបំផុត គឺស្មើប្រមាណតែ១៦ថ្ងៃក្នុង១ឆ្នាំ ហើយពេលខ្លះសីតុណ្ហភាពនៅលើខ្សាច់ពណ៌ខ្មៅ បានកើនឡើងរហូតដល់៥០អង្សារសេ ។

បើទោះជានៅទីនេះមានអាកាសធាតុមិនអំណោយផលក្តី ប៉ុន្តែកោះ Lanzarote អាចផលិតស្រាទំពាំងបាយជូរ ចាប់ពី៤សែនដប រហូតដល់៦សែនដបក្នុង១ឆ្នាំ ។ អ្នកផលិតស្រាទំពាំងបាយជូររបស់កោះចាត់ទុកថា ពួកគេជាក្រុមអ្នកធ្វើការធ្ងន់បំផុតលើពិភពលោក ។ ការស្វែងរកវិធីដាំដើមទំពាំងបាយជូរនៅលើកោះក្សត់ទឹកភ្លៀងនេះបានកើតឡើងតាំងពីសតវត្សរ៍ទី១៨ មកម៉្លេះ ។

កាលពីឆ្នាំ១៧៣០ គឺជាការផ្ទុះភ្នំភ្លើងលើកចុងក្រោយរបស់ភ្នំ Timanfaya និងជាការផ្ទុះភ្នំភ្លើងជាប់ៗគ្នារហូតរយៈពេល៦ឆ្នាំ ។ ហេតុនេះ វាធ្វើឱ្យមនុស្សម្នារស់នៅលើកោះជាច្រើននាក់សម្រេចចិត្តនាំក្រុមគ្រួសារជម្លៀសទៅរស់នៅតំបន់ផ្សេងទៀត ដែលមានអាកាសធាតុអំណោយផល និងពុំប្រឈមជាមួយភ្នំភ្លើង ។

ទោះយ៉ាងណា មនុស្សមួយចំនួនពុំបានផ្លាស់ប្តូរទីលំនៅទៅរស់នៅតំបន់ផ្សេងទេ ហើយពួកគេនៅតែបន្តរស់នៅលើកោះដដែល ។ ពួកគេនិយាយថា ដីភ្នំភ្លើងមានគុណសម្បត្តិអាចរក្សាសំណើមបានយ៉ាងល្អ ទើបពួកគេអាចដាំដុះដំណាំលើកោះដើម្បីមានប្រាក់ចំណូលចិញ្ចឹមជីវិត ។

Lanzarote បានក្លាយជាកោះសម្រាប់ដាំដុះដំណាំលក្ខណៈស្ងួត តាមរយៈការប្រើប្រាស់ដីភ្នំភ្លើង ។ វាជាការពិសោធន៍ឱ្យឃើញថា មនុស្សរស់នៅលើកោះដែលកើតឡើងដោយសារការផ្ទុះភ្នំភ្លើង គឺពិតជាមានភាពអត់ធ្មត់ខ្លាំង និងមានជំនាញកសិកម្ម ៕

ប្រទេសថៃ ៖ នំគ្រក់ គឺជាអាហាររបស់ខ្មែរយើងតាំងពីយូរយាណាស់មកហើយ ដែលនំនេះធ្វើឡើងពីម្សៅអង្ករលាយជាមួយបាយកក ដាក់ខ្ទះដូង និងចម្អិនដោយអំបែងដីមានរន្ធតូចៗ ។ ពេលឆ្អិន ខ្មែរយើងបានយកនំគ្រក់មកផ្គុំជាប់គ្នាពីរៗបរិភោគជាមួយទឹកជ្រលក់ ពេលខ្លះ យើងក៏អាចបរិភោគជាមួយបន្លែផងដែរ ។

ប៉ុន្តែពេលយើងបង្ហោះរូបភាពនំគ្រក់ក្នុងបណ្តាញសង្គម បែរជាធ្វើឱ្យពលរដ្ឋថៃពុំពេញចិត្តទៅវិញ ហើយថែមទាំងនិយាយថា ខ្មែរលួ.ច នំរបស់ថៃ ។

កាលពីថ្ងៃទី៤ ខែកញ្ញា ឆ្នាំ២០២៤ សារព័ត៌មានថៃរាយការណ៍ថា មានប្រធានបទជជែកគ្នាមិនឈប់ឈររវាងប្រទេសថៃ និងកម្ពុជា ។ ប្រធានបទថ្មីមួយដែលធ្វើឱ្យពលរដ្ឋថៃមានចម្ងល់យ៉ាងខ្លាំងនោះ គឺកម្មវិធី MasterChef របស់កម្ពុជាបានយកនំគ្រក់មកបង្ហាញ និងអះអាងថា នំគ្រក់ គឺជាវប្បធម៌អាហាររបស់ជនជាតិខ្មែរតាំងពីសម័យបុរាណមកម៉្លេះ ។

សារព័ត៌មានថៃផ្សាយថា កម្ពុជា គឺជាប្រទេសមួយដែលមានពលរដ្ឋចូលចិត្តយកម្ហូបអាហារ, នំចំណី និងអ្វីជាច្រើនទៀតរបស់ប្រទេសផ្សេងមកធ្វើជារបស់ខ្លួនជានិច្ច ។ ហ្វេសប៊ុកផេករបស់ថៃឈ្មោះ «World Forum ข่าวสารต่างประเทศ» បានបង្ហោះរូបភាពនំគ្រក់ និងសរសេរថា ៖ «កម្ពុជានិយាយថា នំគ្រក់ ជានំរបស់កម្ពុជាដែលមានតាំងពីសម័យបុរាណកាលមកម៉្លេះ ។ បន្ទាប់ពីកម្មវិធី MasterChef យកនំគ្រក់ជានំតំណាងខ្មែរមកបង្ហាញ បែរជាផ្ទះលេខ២ ប្រាប់ថា នំគ្រក់ជារបស់ខ្លួន» ។

សារព័ត៌មានថៃបញ្ជាក់ថា ពលរដ្ឋខ្មែរបានប្រើប្រាស់ពាក្យថា «ផ្ទះលេខ១» និង «ផ្ទះលេខ២» គឺផ្ទះលេខ១ សំដៅលើប្រទេសកម្ពុជា រីឯផ្ទះលេខ២ សំដៅលើប្រទេសថៃ ។ ក្រោយពេលហ្វេសប៊ុកផេកថៃខាងលើបង្ហោះរូបភាពនំគ្រក់ ធ្វើឱ្យពលរដ្ឋថៃចូលមកបញ្ចេញមតិយ៉ាងច្រើនថា នំគ្រក់ជារបស់ថៃអស់រាប់រយឆ្នាំ ហើយពួកគេថា ខ្មែរលួចនំរបស់ថៃ ធ្វើឱ្យថៃនឿយហត់ចិត្តយ៉ាងខ្លាំង ។

ហ្វេសប៊ុកផេកថៃឈ្មោះ «World Forum ข่าวสารต่างประเทศ» បញ្ជាក់ថា នំគ្រក់របស់ថៃ (ខានុម គ្រក់ ឬ Khanom Khrok) បានជាប់ចំណាត់ថ្នាក់ទី៤ ជានំល្អបំផុតនៅលើពិភពលោក ដែលចាត់ចំណាត់ថ្នាក់ដោយគេហទំព័រដ៏ល្បីល្បាញឈ្មោះ Tasteatlas ។ រីឯចំណាត់ថ្នាក់ទី១ បានទៅ Crêpes របស់បារាំង, ចំណាត់ថ្នាក់ទី២ បានទៅ Kaiserschmarrn របស់អូទ្រីស និងចំណាត់ថ្នាក់ទី៣ បានទៅ Jianbing របស់ចិន ។

គួរបញ្ជាក់ថា ទម្លាប់បរិភោគនំគ្រក់របស់ខ្មែរ និងថៃ គឺខុសគ្នា ។ ខ្មែរយើងបរិភោគនំគ្រក់ជាមួយទឹកជ្រលក់ដាក់ក្នុងចានចង្កឹះ ដែលផ្សំពីទឹកត្រី, ស្ករស, ទឹកខ្មេះ, ខ្ទឹមស និងម្ទេស ហើយពេលបរិភោគ យើងដាក់ខ្ទិះដូងចូលក្នុងទឹកជ្រលក់ ។

ចំណែកថៃវិញពុំបរិភោគនំគ្រក់ជាមួយទឹកជ្រលក់ទេ គឺពួកគេបរិភោគនំនេះជាបង្អែមវិញ ។ នំគ្រក់នៅថៃមានរសជាតិផ្អែមបន្តិច និងដាក់គ្រឿងផ្សំផ្សេងៗនៅផ្នែកខាងលើ ដូចជា ៖ ល្ង, គ្រាប់ពោត, ស្លឹកខ្ទឹម និងត្រាវ ៕

ប្រទេសថៃ ៖ កាលពីថ្ងៃទី៣ ខែកញ្ញា ឆ្នាំ២០២៤ សារព័ត៌មានថៃរាយការណ៍ថា នៅខែកញ្ញា ឆ្នាំ២០២៤នេះ នឹងចាប់ផ្តើមដំណើរការរថភ្លើងដឹកទំនិញឆ្លងកាត់ព្រំដែនពីស្ថានីយរថភ្លើងម៉ាបតាផុត ខេត្តរ៉ាក់យ៉ង ប្រទេសថៃ ទៅកាន់រាជធានីភ្នំពេញ ប្រទេសកម្ពុជា ក្នុងចម្ងាយផ្លូវ ៦៩១គីឡូម៉ែត្រ ។

ប្រទេសថៃបានពិភាក្សាជាមួយកម្ពុជាពីការផ្លាស់ប្តូរទីតាំងស្កេនទំនិញទៅរាជធានីភ្នំពេញតែម្តង ដោយពុំចាំបាច់ស្កេនទំនិញនៅប៉ោយប៉ែតទៀតទេ រីឯការដឹកអ្នកដំណើរតាមរថភ្លើង នឹងដំណើរការនៅឆ្នាំ២០២៥ ។ បច្ចុប្បន្ន ប្រទេសទាំងពីរនឹងផ្តោតលើសុវត្ថិភាពការដឹកទំនិញរបស់រថភ្លើងសិន ។

លោក ពិឈេត គុនណាថាំរ៉ាក់ មន្ត្រីនាយកដ្ឋានដឹកជញ្ជូនផ្លូវដែកថៃ និយាយថា ៖ «នៅខែកញ្ញា ឆ្នាំ២០២៤ (ប៉ុន្តែពុំទាន់កំណត់ថ្ងៃច្បាស់លាស់) ខាងរថភ្លើងថៃមានគម្រោងដំណើរការរថភ្លើងដឹកទំនិញឆ្លងកាត់ព្រំដែនលើកដំបូង គឺចេញពីស្ថានីយរថភ្លើងម៉ាបតាផុត ខេត្តរ៉ាក់យ៉ង ទៅកាន់រាជធានីភ្នំពេញ ក្នុងចម្ងាយផ្លូវ ៦៩១គីឡូម៉ែត្រ ។ ការដឹកទំនិញតាមផ្លូវរថភ្លើងនេះ ក្រោយពីការចុះហត្ថលេខាលើអនុស្សរណៈរវាងកម្ពុជា និងថៃ តាំងពីឆ្នាំ២០១៩» ។

លោកបន្តថា ៖ «ជំហានដំបូង នឹងដំណើរការរថភ្លើងដឹកទំនិញរបស់ក្រុមហ៊ុន Global Multimodal Logistics Co., Ltd. (GML) ស្ថិតនៅក្រោមការគ្រប់គ្រងរបស់ក្រុមហ៊ុន PTT Public Company Limited ។ រថភ្លើងនឹងធ្វើដំណើរ ចំនួន២ជើងក្នុង១សប្តាហ៍ ដោយដឹកទំនិញដូចជា ៖ កំទេចផ្លាស្ទិក, ប្រេងម៉ាស៊ីន និងប្រេងហ្វ្រាំង» ។

លោកបន្តទៀតថា កាលពីចុងឆ្នាំ២០២៣ ខាងរថភ្លើងថៃបានសាកល្បងដឹកទំនិញឆ្លងកាត់ព្រំដែនជាលើកដំបូង តាមរយៈក្រុមហ៊ុន GML ដែលចាកចេញពីស្ថានីយរថភ្លើងម៉ាបតាផុត ទៅកាន់រាជធានីភ្នំពេញ ។ ពេលនោះ ថៃបានដឹកកំទេចផ្លាស្ទិក និងប្រេងម៉ាស៊ីនចំនួន២ទូរ ហើយគ្មានបញ្ហាពេលធ្វើដំណើរទេ ប៉ុន្តែមានបញ្ហាការពិនិត្យទំនិញរបស់មន្ត្រីគយ ។

ពេលរថភ្លើងដឹកទំនិញទៅដល់ប៉ោយប៉ែត គឺត្រូវលើកទំនិញចេញពីរថភ្លើងទៅដាក់លើរថយន្ត ដើម្បីយកទៅត្រួតពិនិត្យនៅនាយកដ្ឋានគយ ដែលនៅឆ្ងាយពីប៉ោយប៉ែតប្រមាណ២គីឡូម៉ែត្រ ។ ពេលពិនិត្យទំនិញរួចរាល់ ត្រូវលើកទំនិញពីរថយន្តឡើងលើរថភ្លើងវិញ ទើបធ្វើដំណើរទៅរាជធានីភ្នំពេញ ។ វាពុំងាយស្រួលទេ និងចំណាយពេលយូរណាស់ ។

ហេតុនេះ ប្រទេសទាំងពីរក៏បានបង្កើតក្រុមការងាររួមគ្នា និងពិភាក្សាជាមួយស្ថាប័នពាក់ព័ន្ធ ក្នុងគោលបំណងត្រួតពិនិត្យទំនិញនៅរាជធានីភ្នំពេញតែម្តង ដោយពុំចាំបាច់ត្រួតពិនិត្យនៅប៉ោយប៉ែត ។ បច្ចុប្បន្ន យើងកំពុងត្រៀមខ្លួនដើម្បីឱ្យការដឹកទំនិញតាមរថភ្លើងមានប្រសិទ្ធភាពបំផុត, ងាយស្រួល, សន្សំសំចៃពេលវេលា និងកាត់បន្ថយការចំណាយ ស្របតាមគោលនយោបាយរបស់ក្រសួងគមនាគមន៍ថៃ ដែលជំរុញការដឹកទំនិញតាមរថភ្លើងទៅកាន់តំបន់អាស៊ាន ។

ចំណែកការដឹកអ្នកដំណើរតាមរថភ្លើងពីប្រទេសថៃទៅកម្ពុជា លោក សុរ៉ាផុង ពិយ៉ាកឆូត រដ្ឋមន្ត្រីក្រសួងគមនាគមន៍ថៃកំពុងពន្លឿនឱ្យដំណើរការឆាប់ៗ ហើយប្រទេសទាំងពីរកំពុងពិភាក្សាគ្នាពីការត្រៀមដឹកអ្នកដំណើរតាមរថភ្លើងឱ្យមានសុវត្ថិភាពបំផុត ។ ភាគីថៃរំពឹងថា ការដឹកអ្នកដំណើរតាមរថភ្លើងរវាងប្រទេសទាំងពីរនឹងដំណើរការនៅឆ្នាំ២០២៥ ៕