មកស្គាល់កោះកើតពីបន្ទុះភ្នំភ្លើងមានភ្លៀងធ្លាក់តែ១៦ថ្ងៃក្នុង១ឆ្នាំ ប៉ុន្តែប្រជាជនអាចធ្វើរឿងនេះបានទៀត

ប្រទេសអេស្ប៉ាញ ៖ កោះ Lanzarote របស់ប្រទេសអេស្ប៉ាញ ស្ថិតនៅភាគខាងកើតបំផុតរបស់ប្រជុំកោះខាណារី ក្នុងមហាសមុទ្រអាត្លង់ទិក ។ កោះនេះស្ថិតនៅក្បែរឆ្នេរសមុទ្រភាគខាងជើងទ្វីបអាហ្វ្រិក និងសមុទ្រខ្សាច់សាហារ៉ា ។

កោះ Lanzarote បានកើតឡើងដោយសារការផ្ទុះភ្នំភ្លើងកាលពី១៥លានឆ្នាំមុន ហើយវាគ្របដណ្តប់ទៅដោយកំអែភ្នំភ្លើងរឹង, កំទេចកំទីថ្មភ្នំភ្លើង និងវាលខ្សាច់ពណ៌ខ្មៅ ។ នៅលើកោះមានភ្លៀងធ្លាក់តិចតួចបំផុត គឺស្មើប្រមាណតែ១៦ថ្ងៃក្នុង១ឆ្នាំ ហើយពេលខ្លះសីតុណ្ហភាពនៅលើខ្សាច់ពណ៌ខ្មៅ បានកើនឡើងរហូតដល់៥០អង្សារសេ ។

បើទោះជានៅទីនេះមានអាកាសធាតុមិនអំណោយផលក្តី ប៉ុន្តែកោះ Lanzarote អាចផលិតស្រាទំពាំងបាយជូរ ចាប់ពី៤សែនដប រហូតដល់៦សែនដបក្នុង១ឆ្នាំ ។ អ្នកផលិតស្រាទំពាំងបាយជូររបស់កោះចាត់ទុកថា ពួកគេជាក្រុមអ្នកធ្វើការធ្ងន់បំផុតលើពិភពលោក ។ ការស្វែងរកវិធីដាំដើមទំពាំងបាយជូរនៅលើកោះក្សត់ទឹកភ្លៀងនេះបានកើតឡើងតាំងពីសតវត្សរ៍ទី១៨ មកម៉្លេះ ។

កាលពីឆ្នាំ១៧៣០ គឺជាការផ្ទុះភ្នំភ្លើងលើកចុងក្រោយរបស់ភ្នំ Timanfaya និងជាការផ្ទុះភ្នំភ្លើងជាប់ៗគ្នារហូតរយៈពេល៦ឆ្នាំ ។ ហេតុនេះ វាធ្វើឱ្យមនុស្សម្នារស់នៅលើកោះជាច្រើននាក់សម្រេចចិត្តនាំក្រុមគ្រួសារជម្លៀសទៅរស់នៅតំបន់ផ្សេងទៀត ដែលមានអាកាសធាតុអំណោយផល និងពុំប្រឈមជាមួយភ្នំភ្លើង ។

ទោះយ៉ាងណា មនុស្សមួយចំនួនពុំបានផ្លាស់ប្តូរទីលំនៅទៅរស់នៅតំបន់ផ្សេងទេ ហើយពួកគេនៅតែបន្តរស់នៅលើកោះដដែល ។ ពួកគេនិយាយថា ដីភ្នំភ្លើងមានគុណសម្បត្តិអាចរក្សាសំណើមបានយ៉ាងល្អ ទើបពួកគេអាចដាំដុះដំណាំលើកោះដើម្បីមានប្រាក់ចំណូលចិញ្ចឹមជីវិត ។

Lanzarote បានក្លាយជាកោះសម្រាប់ដាំដុះដំណាំលក្ខណៈស្ងួត តាមរយៈការប្រើប្រាស់ដីភ្នំភ្លើង ។ វាជាការពិសោធន៍ឱ្យឃើញថា មនុស្សរស់នៅលើកោះដែលកើតឡើងដោយសារការផ្ទុះភ្នំភ្លើង គឺពិតជាមានភាពអត់ធ្មត់ខ្លាំង និងមានជំនាញកសិកម្ម ៕