ថ្ងៃទី១៨ ខែកញ្ញា ឆ្នាំ២០២៤ នេះ ជាការគំរប់ខួប៧០ឆ្នាំ នៃព្រះប្រសូត្រព្រះអនុជបង្កើតនៃព្រះករុណា ព្រះបាទសម្តេច នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។

សម្តេច នរោត្តម នរិន្រ្ទៈពង្ស ព្រះប្រសូតនៅថ្ងៃទី១៨ ខែកញ្ញា ឆ្នាំ១៩៥៤ នៅរាជធានីភ្នំពេញ ដោយត្រូវជាព្រះរាជបុត្រានៃព្រះករុណា ព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ។

សម្តេច បានសិក្សារៀនសូត្រនៅ សាលាបឋមសិក្សា នរោត្តម និង វិទ្យាល័យ ដេកាត រាជធានីភ្នំពេញ បន្ទាប់មកក៏ចាកចេញទៅ បន្តការសិក្សានៅសហភាពសូវៀត ថ្នាក់អនុបណ្ឌិតផ្នែក ទស្សនវិជ្ជា ឧក្រិដ្ឋកម្ម និងច្បាប់។

នារបបកម្ពជាប្រជាធិបតេយ្យ សម្តេចទ្រង់ត្រូវបានឃុំខ្លួននៅក្នុងព្រះបរមរាជវាំង ក៉៏ប៉ុន្តែក្រោយរបបនេះដួលរលំ សម្តេចទ្រង់ក៏បានយាងគង់នៅព្រះរាជដំណាក់នៅប្រទេសចិន។

ក្រោយមក ព្រះអង្គ បានរៀបអភិសេកជាមួយ អ្នកម្នាង ស៊ីនួន និងមានព្រះបុត្រីចំនួន២ ព្រះអង្គ គឺ៖

• ព្រះអង្គម្ចាស់ក្សត្រី នរោត្តម ស៊ីមូណារិន ព្រះប្រសូតនៅឆ្នាំ ១៩៨៣
• ព្រះអង្គម្ចាស់ក្សត្រី នរោត្តម មុនីនួក ព្រះប្រសូតនៅឆ្នាំ ១៩៨៧

លុះដល់ថ្ងៃទី៧ ខែតុលា ឆ្នាំ២០០៣ សម្តេច នរោត្តម នរិន្រ្ទៈពង្ស បានយាងចូលព្រះទីវង្គត់ដោយជំងឺគាំងបេះដូង ក្នុងព្រះជន្មាយុ ៤៩ ព្រះវស្សា នៅទីក្រុងប៉ារីស  ព្រះអដ្ឋិរបស់ ព្រះអង្គ ត្រូវបានយាងមកគង់ក្នុងព្រះចេតិយ នាបរិវេណ ព្រះឧបោសថរតនារាម ព្រះកែវមរតក ព្រះបរមរាជវាំង៕

ពិធីបុណ្យកាន់បិណ្ឌទី១ នឹងចាប់ផ្តើមពីថ្ងៃ១រោច រហូតដល់ថ្ងៃថ្ងៃ១៥រោច ឆ្នាំរោង ឆស័ក ព.ស.២៥៦៨ ដែលត្រូវនឹងថ្ងៃទី១៨ ខែកញ្ញា ដល់ថ្ងៃទី២ ខែតុលា ឆ្នាំ២០២៤។

ពិធីបុណ្យកាន់បិណ្ឌ មានរយៈពេល១៤ ថ្ងៃ លុះដល់ថ្ងៃទី១៥ គេហៅថា ថ្ងៃភ្ជុំបិណ្ឌ ដែលពិធីនេះត្រូវបានប្រជាជនខ្មែរតែងតែរៀបចំឡើងតាំងពីបុរាណកាលមកម្ល៉េះ ដោយបានបង្កប់នូវអត្ថន័យយ៉ាងជ្រាលជ្រៅ។

ការកាន់បិណ្ឌនេះ គឺជាការឧទ្ទិសផល្លានិសង្ឃដល់ជនដែលធ្វើមរណកាលទៅកាន់បរលោក ។ ពិធីនោះត្រូវធ្វើអស់កាលកន្លះខែគត់ ដោយពេលនោះហើយយមរាជ ដោះលែងពួកសត្វនរកទាំងឡាយ ក្នុង ១ ឆ្នាំម្ដង ដើម្បីឱ្យឡើងទៅរកបងប្អូន កូនចៅ ដើម្បីទទួលកុសលផលបុណ្យ ដែលគេធ្វើឧទ្ទិសឱ្យ។

សត្វនរក ជាអ្នកខ្លាចពន្លឺ ទើបគេតម្រូវឱ្យមានការបោះបាយបិណ្ឌនៅពេលទាបភ្លឺ។ សត្វនរកដែលគេដោះលែងមក នឹងដើររកបងប្អូនកូនចៅគ្រប់ ៧ វត្ត បើមិនឃើញអ្នកណាធ្វើបុណ្យឧទ្ទិសបញ្ជូនឱ្យទេ នោះនឹងកើតក្ដីស្រេកឃ្លាន ហើយនឹងប្រទេចបណ្ដាសាដល់ញាតិមិត្តមិនលែងឡើយ។

លើសពីនេះទៅទៀត ការកាន់បិណ្ឌក៏ជាការទំនុកបំរុងដល់ព្រះសង្ឃដែលកំពុងគង់ចាំវស្សា ដោយខែនេះជារដូវស្សា នាំអោយមានការលំបាកសំរាប់ព្រះសង្ឃក្នុងការត្រេចចរបិណ្ឌបាត្រ៕

ព្រឹត្តិការណ៍ Gumball 3000 ដែលបានធ្វើឲ្យកក្រើកទឹកដីអង្គរ កាលពីថ្ងៃ ១៦ ខែកញ្ញាបានបញ្ចប់ទៅដោយរលូន ខណៈក៏បានបន្សល់ទុកនូវអនុស្សាវរីយល្អៗក្នុងចំណោមអ្នកចូលរួមក៏ដូចជាប្រជាជនខ្មែរទូទាំងប្រទេស។ បន្ថែមពីលើអនុស្សាវរីយល្អៗ កំណត់ត្រាជាប្រវត្តិសាស្រ្តថ្មីមួយទៀតពី Guinness World Record កំពុងតែកត់ត្រានៅលើទឹកដីអច្ឆរិយៈមួយនេះ។

យោងតាមប្រភពយុវជនប្រតិកម្មរហ័សរដ្ឋបាលក្រុងសៀមរាប បានគូសបញ្ជាក់ថា រថយន្តទំនើបៗ និងថ្លៃៗ រាប់រយគ្រឿងបានមកជួបជុំគ្នា នៅមុខប្រាសាទអង្គរវត្ត ក្រុង/ខេត្តសៀមរាប នាព្រឹកថ្ងៃទី១៧ ខែកញ្ញា ឆ្នាំ២០២៤នេះ ស្របពេលដែលគណៈកម្មាការ Guinness World Record កំពុងរាប់ចំនួនរថយន្តទំនើបៗនៅមុខអង្គរវត្ត ដើម្បីបំបែកកំណត់ត្រាពិភពលោក Guinness World Record «ការតាំងបង្ហាញរថយន្តទំនើបច្រើនជាងគេបំផុតលើពិភពលោក»។

ព្រឹត្តិការណ៍ Gumball 3000 ដែលប្រមូលផ្តុំដោយរថយន្តទំនើបៗរាប់រយគ្រឿង ក៏ដូចជាមានការអញ្ជើញចូលរួមយ៉ាងច្រើនកុះករពីសំណាក់តារាល្បីៗ YouTuber Influencer លំដាប់ថ្នាក់អន្តរជាតិ និងសហគ្រិននានាមកពីជាង ៤០ ប្រទេស។ តាមរយៈព្រឹត្តិការណ៍នេះ ក្រៅពីមានការតាំងបង្ហាញរថយន្តទំនើបៗហើយ ក៏រួមមានទស្សនីយភាព ការបង្ហាញសិល្បៈរបាំបុរាណ ស្វាគមន៍ប្រតិភូ Gumball 3000 ដែលរៀបចំឡើងនៅខាងមុខប្រាសាទបាយ័នប្រកបដោយបរិកាសរីករាយនិងស្និតស្នាលបំផុត។ ជាមួយគ្នានោះ ដោយសង្កេតឃើញថាមានវត្តមានប្រជាពលរដ្ឋខ្មែរ និងជនបរទេសយ៉ាងច្រើនកុះករ ក៏បានមកចូលរួមសារទរព្រឹត្តិការណ៍នេះផងដែរ។

សូមជម្រាបថា តាមរយៈព្រឹត្តិការណ៍ Gumball 3000 កម្ពុជាពិតជាបានទាញយកផលប្រយោជន៍ជាច្រើន ដែលមានការទាំងការផ្សព្វផ្សាយអំពីវប្បធម៌ អរិយធម៌ និងសក្ដានុពលទេសចរណ៍ទៅកាន់ពិភពលោក ស្របពេលដែលព្រឹត្តិការណ៍ជាប្រវត្តិសាស្រ្តថ្មីនៃ«ការតាំងពិរព័ណ៍រថយន្តទំនើបៗនៅមុខប្រាសាទអង្គរវត្ត សំណង់អច្ឆរិយៈខ្មែរ» ក៏កំពុងតែត្រូវបានកត់ត្រាទុកផងដែរ៕

នាវេលាយប់ម៉ោងប្រមាណជា១ទាបភ្លឺមានភ្លៀងធ្លាក់ជាខ្លាំង ដល់ម៉ោង៤ ទាបភ្លឺ ថ្ងៃទី១៧ ខែកញ្ញា ឆ្នាំ២០២៤ បានបង្កឱ្យមានការលិចផ្ទះសម្បែង និងហេដ្ឋារចនាសម្ព័ន្ធមួយចំនួននៅក្នុងស្រុកវិចិត្របុរី។

ទឹកជន់លិចនេះ បានបណ្តាលឱ្យផ្ទះសម្បែងប្រជាពលរដ្ឋ ផ្លូវថ្នល់ សាលារៀន មណ្ឌលសុខភាព វត្តអារាម នៅភូមិអញ្ចាញ ឃុំដារ ស្រុកចិត្របុរី ខេត្តក្រចេះ។

យោងតាមក្រសួងធនធានទឹក និងឧតុនិយម បានបញ្ជាក់ថា កម្រិតកម្ពស់ទឹកទន្លេមេគង្គខេត្តក្រចេះ នៅព្រឹកថ្ងៃទី ១៧ ខែកញ្ញា ឆ្នាំ ២០២៤ នេះ មានកម្ពស់ ១៩,៨៤ ម៉ែត្រ (កើនឡើងកន្លះម៉ែត្រ ឬ ០,៥០ ម៉ែត្រ ធៀបនឹងថ្ងៃម្សិលមិញ) ខណៈកម្រិតកម្ពស់ទឹកប្រុងប្រយ័ត្ន គឺ ២២,០០ ម៉ែត្រ។ ខណៈព្យុះចំនួន ២ នឹងវាយប្រហារក្នុងពេលតែមួយ ដែលមានឥទ្ធិពលខ្លាំងជាងមុន ជះឥទ្ធិពលលើកម្ពុជាគឺ ព្យុះទី ១៣ ឈ្មោះ ប៊ីប៊ីនកា នៅមិនទាន់ថយឥទ្ធិពលនៅឡើយ តែនៅពេលនេះមានព្យុះទី ១៤ មួយទៀត ឈ្មោះ ពូលឡាសាន ដែលនឹងបង្កើនឥទ្ធិពលរួមគ្នាបន្តវាយប្រហារតាមបណ្ដាប្រទេសមួយចំនួន ហើយក្នុងនោះក៏មានប្រទេសកម្ពុជាផងដែរ៕

ធ្មិចបើកៗជិតដល់រដូវបុណ្យភ្ជុំបិណ្ឌហើយ ដែលជាពេលវេលាមនុស្សម្នាជួបជុំគ្រួសារ និងធ្វើដំណើរកម្សាន្តទៅកន្លែងទេសចរណ៍នានា។ ជឿថានៅរដូវនេះប្រិយមិត្តប្រាកដជាមានបំណងចង់ដើរលេងទៅតាមខេត្តជួបជុំបងប្អូន ឬមិត្តភក្តិហើយ ដូច្នេះថ្ងៃនេះយើងនឹងនាំលោកអ្នកមកស្គាល់កន្លែងទេសចរណ៍ល្បីៗ ក៏ដូចជាស្រស់ស្អាត និងលេចធ្លោខ្លាំងក្នុងខេត្តព្រះសីហនុ សូម្បីជនបរទេសក៏ពោលពាក្យសរសើរមិនដាច់ពីមាត់ដែរ ដែលកន្លែងទាំងនោះរួមមាន៖

១.រមណីដ្ឋានឆ្នេរអូរឈើទាល៖ រមណីយដ្ឋានឆ្នេរអូរឈើទាល ស្ថិតនៅក្នុងសង្កាត់ ៣ នៃខេត្តព្រះសីហនុ ក្រុងព្រះសីហនុ។ ឆ្នេរអូរឈើទាល ជាឆ្នេរដែលវែងជាងគេ និងជម្រៅទឹករាក រីឯបរិយាកាសជុំវិញគឺមានលក្ខណៈស្ងប់ស្ងាត់ ហើយសភាពទឹកសមុទ្រមានពណ៌ខៀវថ្លា អមដោយឆ្នេរខ្សាច់មានពណ៌សក្បោះ គឺជាកន្លែងដែលល្បីបំផុតក្នុងខេត្តព្រះសីហនុ។ ឆ្នេរនេះមិនសូវស្ងាត់ប៉ុន្មាននោះទេ ដោយសារមានភ្ញៀវទេសចរជាតិ និងអន្តរជាតិ ងូតទឹកកម្សាន្ដលេង ជិះម៉ូតូទឹក និងញ៉ាំអាហារសមុទ្រស្រស់ៗ មិនថានៅថ្ងៃធម្មតា ថ្ងៃចុងសប្ដាហ៍ ឬថ្ងៃបុណ្យទាននោះទេគឺតែងតែអ៊ូអ៊រជានិច្ច។

២.រមណីដ្ឋានក្បាលឆាយ៖ រមណីយដ្ឋានធម្មជាតិទឹកធ្លាក់ក្បាលឆាយ មានទីតាំងស្ថិតនៅស្រុកព្រៃនប់មានចំងាយ ៧ គីឡូម៉ែត្រពីខេត្តព្រះសីហនុ បត់ឆ្វេង ៦ គីឡូម៉ែត្រទើបទៅដល់ទឹកធ្លាក់នេះ។ រមណីយដ្ឋាន «ទឹកធ្លាក់ក្បាលឆាយ» គឺជាប្រភេទទឹកជ្រោះឬទឹកធ្លាក់តាមបែបទេសចរណ៍ធម្មជាតិ កំពុងទាក់ទាញភ្ញៀវទេសចរយ៉ាងច្រើនកុះករនារដូវវស្សានេះ ដោយសារសម្រស់ធម្មជាតិព្រៃព្រឹក្សាយ៉ាងស្រស់បំព្រង អមជាមួយនឹងវត្តមានទឹកធ្លាក់ពីលើភ្នំ និងផ្ទាំងថ្មដ៏ខ្ពស់ជាមួយទេសភាពខ្យល់អាកាសបរិសុទ្ធ ព្រៃឈើធំៗខ្ពស់ៗ និងភ្នំដ៏ស្រស់ស្អាត ក្នុងការទាក់ចិត្តភ្ញៀវទេសចរឱ្យទៅលេងកម្សាន្ត។ នៅទីនេះអ្នកអាច ហែលទឹក ឬលេងទឹក, ញុំអាហារឆ្ងាញ់ៗបែបស្រុកស្រែ, ដើរលេងថ្មើរជើង និងមានកន្លែងពិកនិចជាច្រើនផ្សេងទៀត។

៣.វត្តជោតញ្ញាណ ឬវត្តលើ៖ វត្តជោតញ្ញាណ ឬវត្តលើ មានទីតាំងស្ថិតនៅលើភ្នំមួយនៃខេត្តព្រះសីហនុដែលមានកម្ពស់ ១៣២ ម៉ែត្រ។ វត្តដ៏ចំណាស់មួយនេះគឺជាទីសក្ការរបស់ពុទ្ធសាសនិក និងជាកន្លែងដែលពលរដ្ឋនៅខេត្តព្រះសីហនុ ចូលចិត្តទៅលម្ហែអារម្មណ៍ស្រូបខ្យល់អាកាសបរិសុទ្ធ ជាពិសេសក៏ជាទីតាំងដ៏ល្អសម្រាប់ភ្ញៀវទេសចរ ដែលចង់មើលទេសភាពនៃទីក្រុងព្រះសីហនុបានយ៉ាងច្បាស់ល្អផងដែរ។

៤.ឧទ្យានរាម៖ ឧទ្យានជាតិរាម ស្ថិតនៅប្រហែលជា ១៨ គម ខាងកើតក្រុងព្រះសីហនុ ត្រូវបានគេស្គាល់ថាជាតំបន់អភិរក្ស។ ឧទ្យានជាតិនេះ ជាកន្លែងដ៏មានប្រជាប្រិយបំផុតក្នុងការផ្ដិតយកទិដ្ឋភាពផូរផង់ នៃធម្មជាតិ។ ទោះជាយ៉ាងណាឆ្នេរនៅឧទ្យានរាមមិនសូវមានភាពទាក់ទាញដូចបណ្តាឆ្នេរដទៃទៀតនោះទេ ដោយសារភាគច្រើនភ្ញៀវដែលមកកម្សាន្តច្រើនតែជិះហួសទៅ ហួសមក។ ប៉ុន្តែភាពស្ងប់ស្ងាត់នៃឆ្នេរមួយនេះ ក៏ជាចំណុចទាក់ទាញដែលអន្ទងចិត្តភ្ញៀវទេសចរមួយចំនួន ជ្រើសរើសជាកន្លែងសម្រាកលំហែកាយសម្រាប់ដំណើរកម្សាន្តមកខេត្តព្រះសីហនុ។ ឆ្នេរសំខាន់ៗនៅទីនោះរួមមានឆ្នេរចម្ការដូង ឆ្នេរបរិស្ថាន ឆ្នេរថ្មដុះ និងឆ្នេរព្រែកចាកជាដើម។

ក្រៅពីរមណីយដ្ឋានល្បីៗខាងលើ ខេត្តព្រះសីហនុក៏មានតំបន់ទេសចរណ៍សប្បាយៗជាច្រើនទៀតផងដែរដូចជា ឆ្នេរអូរត្រេះ, កោះរ៉ុង, កោះរ៉ុងសន្លឹម, កោះទន្សាយ, កោះសង្សារ, កោះតាគៀវ រមណីដ្ឋានឆ្នេរប្រាំពីរជាន់ និងកន្លែងកម្សាន្តដ៏សម្បូរបែបជាច្រើនផ្សេងទៀត៕

នាថ្ងៃទី១៦ ខែកញ្ញា ឆ្នាំ២០២៤ យោងតាមការបង្ហោះរបស់គេហទំព័រផ្លូវការរបស់ស្ថានទូតស៊ុយអ៊តប្រចាំនៅកម្ពុជា បានចេញសេចក្តីប្រកាសក្នុងការបញ្ចប់ កិច្ចសហប្រតិបត្តិការអភិវឌ្ឍន៍ទ្វេភាគីជាមួយប្រទេសកម្ពុជា តាមការសម្រេចចិត្តរបស់រដ្ឋាភិបាលស៊ុយអែត។

ស្ថានទូតស៊ុយអ៊តប្រចាំនៅកម្ពុជា បានបង្ហោះសារដោយរៀបរាប់យ៉ាក្បោះក្បាយថា៖ “យើងសូមជម្រាបជូនថា ស្ថានទូតស៊ុយអែតការិយាល័យប្រចាំទីក្រុងភ្នំពេញ នឹងត្រូវបិទជាផ្លូវការនិងឈប់ធ្វើការ ពីថ្ងៃទី៣០ ខែកញ្ញា ឆ្នាំ២០២៤ នេះ ដោយសារសេចក្តីសម្រេចរបស់រដ្ឋាភិបាលស៊ុយអែតក្នុងការបញ្ចប់ កិច្ចសហប្រតិបត្តិការអភិវឌ្ឍន៍ទ្វេភាគីជាមួយប្រទេសកម្ពុជា។

ស្ថានទូតស៊ុយអែតប្រចាំទីក្រុងបាងកក នឹងបន្តតំណាងឱ្យប្រទេសស៊ុយអែតនៅកម្ពុជា ហើយចាប់តាំងពីថ្ងៃទី១៦ ខែសីហា ការគ្រប់គ្រងការគាំទ្រដល់ប្រទេសកម្ពុជា យោងទៅតាមយុទ្ធសាស្រ្តតំបន់សម្រាប់កិច្ចសហប្រតិបត្តិការអភិវឌ្ឍន៍ជាមួយអាស៊ី និងប៉ាស៊ីហ្វិក ត្រូវបានផ្ទេរទៅអង្គការសហប្រតិបត្តិការអន្តរជាតិអភិវឌ្ឍន៍ស៊ុយអែត ក្នុងទីក្រុង ស្តក់ ហូម (Stockholm)។ ស្ថានកុងស៊ុលស៊ុយអែតប្រចាំទីក្រុងភ្នំពេញនឹងបន្តបើក និងផ្តល់សេវាការទូតមូលដ្ឋានសម្រាប់ពលរដ្ឋស៊ុយអែតនៅកម្ពុជាដដែល។»

តែយ៉ាងណាមិញ បើតាមអ្នកនាំពាក្យក្រសួងការបរទេសកម្ពុជា បានឱ្យដឹងថា៖” តាមការបញ្ជាក់របស់ស្ថានទូតស៊ុយអែតនៅទីក្រុងបាងកក បន្ទាប់ពីការបិទ ការិយាល័យស្ថានទូតស៊ុយអែតនៅភ្នំពេញនៅថ្ងៃទី ៣០ ខែកញ្ញា ឆ្នាំ២០២៤ ស្ថាន ទូតស៊ុយអែតនៅទីក្រុងបាងកក នឹងបន្តតំណាងឱ្យស៊ុយអែតក្នុងទំនាក់ទំនងជាមួយ កម្ពុជា ហើយស្ថានកុងស៊ុលរបស់ស៊ុយអែតនៅភ្នំពេញ នឹងនៅតែបើកទ្វារដើម្បីបន្ត ផ្តល់សេវាកុងស៊ុលដល់ពលរដ្ឋស៊ុយអែតនៅកម្ពុជា”។

គួរបញ្ជាក់ផងដែរថាប្រទេសស៊ុយអែត មានទំនាក់ទំនងការទូតជាផ្លូវការជាមួយកម្ពុជានៅក្នុងឆ្នាំ១៩៦១ ដោយបើកដំណើរការស្ថានទូតរបស់ខ្លួននៅក្នុងទីក្រុងភ្នំពេញ អំឡុងឆ្នាំ២០១០ និងធ្លាប់ប្រកាសបិទម្តងដែរកាលពីឆ្នាំ២០២១៕

កន្លងផុតទៅមួយឆ្នាំ កាលពីថ្ងៃទី១៧ ខែកញ្ញា ឆ្នាំ២០២៣ រមណីដ្ឋានប្រាសាទកោះកេរ ត្រូវបានដាក់បញ្ចូលជាបេតិកភណ្ឌវប្បធម៌ពិភពលោករបស់អង្គការយូណេស្កូ។

រមណីដ្ឋាននេះស្ថិតនៅលើផ្ទៃដីប្រមាណ៨ពាន់ហិកាតា ដែលមានប្រាសាទជាង៧០ ក្នុងនោះមានប្រាសាទធំមួយ ដែលត្រូវបានចាត់ទុកជាពីរ៉ាមីតនៅអាស៊ីអាគេ្នយ៍។

ប្រាសាទកោះកេរ ជាអតីតរាជធានីរបស់ខ្មែរក្នុងសតវត្សរ៍ទី១០ ដែលមានអាយុកាលជាង១ពាន់ឆ្នាំមកហើយ ហើយត្រូវបានកសាងដោយព្រះបាទជ័យវរ្ម័នទី៤ នៅពេលផ្លាស់ប្តូររាជធានីពីក្រុងអង្គរមកតំបន់កោះកេរ។

រាជធានីបុរាណនេះ ពីដើមឈ្មោះឆកគគីរ ឬ ឆោក គគ៌្យរ (ជាអក្សរខ្មែរបុរាណ) មានទីតាំងស្ថិតនៅ ក្នុងភូមិស្រយ៉ង់ជើង ឃុំស្រយ៉ង់ ស្រុកគូលេនខេត្តព្រះវិហារ។

នៅក្នុងក្រុមប្រាសាទកោះកេរ មានប្រាសាទធំដែលគេនិយមហៅថាប្រាសាទកោះកេរ ដែលមានកំពែងរាងបួនជ្រុងទ្រវែង អមដោយប្រាសាទ អគារតូច ធំជាច្រើន ព្រមទាំងប្រាសាទរាយរងធដទៃៗច្រើនទៀត៕

រូបភាព៖ ក្រសួងរៀបចំដែនដី នគរូបនីយកម្ម និងសំណង់