នេះជាចម្ងល់យូរមកហើយថា តើទូកអាថ៌កំបាំងនៅលើកោះ Bouvet ដែលស្ថិតនៅឆ្ងាយដាច់ស្រយាលបំផុតនេះជារបស់អ្នកណា? តើទូកនេះធ្វើដំណើរមកពីណា? ពីព្រោះរហូតមកដល់បច្ចុប្បន្ន គ្មានអ្នកស្រាវជ្រាវណាម្នាក់អាចឆ្លើយតបជាមួយសំណួរទាំងនេះបានទេ ។

រឿងរ៉ាវអាថ៌កំបាំងបំផុតបានកើតឡើងកាលពីខែមេសា ឆ្នាំ១៩៦៤ គឺពេលរដ្ឋាភិបាលអាហ្វ្រិកខាងត្បូងបញ្ជូនភ្នាក់ងារមកកាន់កោះ Bouvet ដើម្បីពិនិត្យមើលទីតាំងសាងសង់កំពង់ផែ ស្រាប់តែប្រទះឃើញទូកអាថ៌កំបាំង១គ្រឿងចតលើកោះ និងមានច្រវ៉ា១គូ ស្ថិតនៅឆ្ងាយពីទូកបន្តិច ។ បើទោះជាមានភស្តុតាងបញ្ជាក់ថា មានមនុស្សជិះទូកនេះក្តី ប៉ុន្តែគ្មានសាកសពមនុស្សនៅលើកោះទេ ។

លើសពីនេះ នៅលើកោះគ្មានស្លាកស្នាមបញ្ជាក់ថា តើទូកនេះជារបស់អ្នកណា និងធ្វើដំណើរមកពីណា? ទើបមានសំណួរជាច្រើនពាក់ព័ន្ធនឹងការប្រទះឃើញទូកអាថ៌កំបាំងថា ហេតុអ្វីទូកតូចអាចធ្វើដំណើរមកដល់កោះដាច់ស្រយោលពីមនុស្សបែបនេះ? ពីព្រោះចម្ងាយផ្លូវខ្លីបំផុតពីកោះ Bouvet ទៅកាន់កោះដែលមានមនុស្សរស់នៅ គឺស្មើជាង២.០០០គីឡូម៉ែត្រឯណោះ ។

តើអ្នកណាខ្លះជិះទូកអាថ៌កំបាំងនេះ? ហើយពួកគេបាត់ទៅណាអស់ហើយ ឬមានហេតុការណ៍អាក្រក់កើតឡើងមកលើពួកគេ? ក្រៅពីច្រវ៉ា១គូ គឺគ្មានសម្ភារៈអ្វីផ្សេងនៅលើទូកទេ ។ ដូច្នេះ មនុស្សភាគច្រើនសន្និដ្ឋានថា គ្មានអ្នកណាម្នាក់អាចចែវទូកមកដល់កោះ Bouvet បានទេ ។

លោក ម៉ៃ ឌេត ប្រវត្តិវិទូមកពីទីក្រុងឡុងដ៍ ប្រទេសអង់គ្លេស បានព្យាយាមស្វែងរកឯកសារដើម្បីឆ្លើយតបនឹងសំណួរទាំងនេះ ប៉ុន្តែលោកពុំអាចស្វែងរកចម្លើយច្បាស់លាស់ទេ ។ អស់រយៈពេលជាងកន្លះសតវត្សហើយ ដែលគ្មានអ្នកណាម្នាក់អាចឆ្លើយតបថា តើទូកអាថ៌កំបាំងនេះធ្វើដំណើរមកចតលើកោះ Bouvet ដោយរបៀបណា? វានៅតែជារឿងអាថ៌កំបាំងមួយក្នុងប្រវត្តិសាស្ត្រពិភពលោក រហូតមកដល់បច្ចុប្បន្ន ។

គួរបញ្ជាក់ថា Bouvet គឺជាកោះមួយមានទំហំតូចស្ថិតនៅឆ្ងាយពីទ្វីបអង់តាកទិកប្រមាណ១.៦០០គីឡូម៉ែត្រ និងនៅឆ្ងាយពីកោះ Tristan da Cunha ដែលមានមនុស្សរស់នៅប្រមាណ២.២៥០គីឡូម៉ែត្រ ព្រមទាំងនៅឆ្ងាយពីប្រទេសអាហ្វ្រិកខាងត្បូង ២.៥៧០គីឡូម៉ែត្រ ។ ហេតុនេះ ទើបធ្វើឱ្យកោះ Bouvet ស្ថិតនៅឆ្ងាយពីមនុស្សបំផុតលើពិភពលោក ។

កាលពីឆ្នាំ១៧៣៩ អ្នកស្រាវជ្រាវជនជាតិន័រវេស ឈ្មោះ ឆុងបាទីស ឆាលប៊ូវ៉េ ឌឹរ៉ូសេន បានប្រទះឃើញកោះនេះមុនគេ ។ នៅលើកោះសម្បូរដុំថ្ម និងផ្ទាំងទឹកកក ហើយគ្មានរុក្ខជាតិដុះទេ ក្រៅពីស្លែ ។ រហូតមកដល់ឆ្នាំ១៩២៩ វាក៏បានក្លាយជាកោះរបស់ប្រទេសន័រវេសដោយស្របច្បាប់ ។

នៅឆ្នាំ១៩៥០ រដ្ឋាភិបាលប្រទេសអាហ្វ្រិកខាងត្បូងបានសុំការអនុញ្ញាតពីរដ្ឋាភិបាលន័រវេសមកត្រួតពិនិត្យកោះនេះ ដើម្បីស្វែងរកទីតាំងសាងសង់កំពង់ផែ ។ ប៉ុន្តែស្ថានភាពនៅលើកោះពុំអំណោយផលដល់ការសាងសង់កំពង់ផែទេ ទើបនៅខែមេសា ឆ្នាំ១៩៦៤ រដ្ឋាភិបាលអាហ្វ្រិកខាងត្បូងបានបញ្ជូនភ្នាក់ងារមកកាន់កោះ Bouvet ម្តងទៀត ៕

ស្ពានអណ្តែតទឹក Shiziguan ត្រូវបានគេចាត់ទុកថាជាអច្ឆរិយៈបច្ចេកវិទ្យារបស់ប្រទេសចិន។ ដោយសារគម្រោងនេះត្រូវបានសាងសង់នៅលើដងទន្លេ Thanh Giang ដែលជាទន្លេមានខ្យល់បក់ខ្លាំង ហើយគ្មានសសរ ខ្សែ ឬបេតុងពង្រឹងនោះទេ ប៉ុន្តែស្ពានដ៏ពិសេសនេះនៅតែអាចឱ្យយានជំនិះដែលមានទម្ងន់រហូតដល់ ២.៨ តោនធ្វើដំណើរនៅលើទឹកបានយ៉ាងរលូន និងមានសុវត្ថិភាពបំផុត។

ស្ពានដ៏អស្ចារ្យនេះត្រូវបានសាងសង់ឡើងនៅតំបន់ស្វយ័ត Tujia និង Miao Enshi ខេត្ត Hubei ប្រទេសចិន ដែលកំពុងទាក់ទាញភ្ញៀវទេសចរជាច្រើនឱ្យមកកម្សាន្តរីករាយជាមួយសម្រស់ធម្មជាតិ។ ស្ពានអណ្តែតទឹក Shiziguan ត្រូវបានសម្ពោធនៅឆ្នាំ ២០១៦ នៅពេលបើកដំណើរការភ្លាមៗប្រជាជនមកពីទូទាំងប្រទេសចិនបានសម្រុកមកទីនេះដើម្បីទទួលយកអារម្មណ៍នៃការបើកបរនៅលើទន្លេជាលើកដំបូង។

ការសាងសង់ស្ពានបណ្តែត Shiziguan ត្រូវបានគេប្រើបច្ចេកវិទ្យាទំនើបរបស់អាល្លឺម៉ង់ ដោយស្ពាននេះមិនរអិលទេ ហើយមានលំនឹងខ្ពស់ ព្រោះវាត្រូវបានសាងសង់ដោយបន្ទះជ័រដែលមានដង់ស៊ីតេខ្ពស់ពោរពេញទៅដោយទឹក។ ដូច្នេះស្ពានដ៏អសារ្យនេះអនុញ្ញាតឱ្យយានជំនិះធ្វើចលនាក្នុងល្បឿន ២០ គីឡូម៉ែត្រក្នុងមួយម៉ោង ហើយអ្នកជិះរថយន្តនឹងទទួលបានអារម្មណ៍ប្លែកមិនធ្លាប់មាន។

ទោះជាយ៉ាងណាស្ពាននេះអនុញ្ញាតឱ្យធ្វើចរាចរណ៍បានតែមួយផ្លូវសម្រាប់អ្នកថ្មើរជើងនិងយានជំនិះប៉ុណ្ណោះ។ ទោះបីជាមានភាពអស្ចារ្យខាងវិស្វកម្មក៏ដោយ ក៏ស្ពាននេះនៅតែមានហានិភ័យតិចតួចដែរ ដោយសារកាលពីឆ្នាំ ២០២៣ មានឧបទ្ទវហេតុដ៏សោកសៅមួយបានកើតឡើង ដោយរថយន្តដឹកអ្នកដំណើរ ៨ នាក់បានធ្លាក់ចូលទឹក បន្ទាប់ពីមានខ្យល់បកខ្លាំងពេក បណ្តាលឱ្យមនុស្ស ៥ នាក់ស្លាប់ និង ៣ នាក់ទៀតរងរបួសស្រាល។

ឧបទ្ទវហេតុនេះបានបង្ហាញពីហានិភ័យដែលទាក់ទងនឹងការលើសទម្ងន់ និងល្បឿនកំណត់ ជាពិសេសនៅពេលដែលវាអនុវត្តចំពោះរចនាសម្ព័ន្ធផុយស្រួយបែបនេះ។ បន្ទាប់ពីមានឧបទ្ទវហេតុនេះកើតឡើង ស្ពានអណ្តែតទឹក Shiziguan ត្រូវបានបិទជាបណ្តោះអាសន្នសម្រាប់ការវាយតម្លៃសុវត្ថិភាព ប៉ុន្តែឥឡូវនេះស្ពានបានបើកដំណើរការជាសាធារណៈឡើងវិញហើយ។ បច្ចុប្បន្នស្ពាននៅតែជាកន្លែងដ៏ល្បីមួយដែលទាក់ទាញមនុស្សជាច្រើនឱ្យមកសាកល្បងអារម្មណ៍ប្លែកៗនៃការបើកបរលើទឹក និងគយគន់ទេសភាពភ្នំដ៏អស្ចារ្យ៕

សហរដ្ឋអាមេរិក ៖ វាធ្វើឱ្យមហាជនភ្ញាក់ផ្អើលយ៉ាងខ្លាំងក្រោយពីមានការចែកចាយរូបភាពម្ចាស់ខួបកំណើតម្នាក់នៅអាមេរិកដេកលើពស់ថ្លាន់យក្សជាច្រើនក្បាល ដើម្បីឱ្យពិធីខួបកំណើតរបស់ខ្លួនកាន់តែមានបរិយាកាសសប្បាយរីករាយ ។ ប៉ុន្តែអ្នកមកចូលរួមខួបកំណើត ក៏ដូចជាអ្នកលេងបណ្តាញសង្គមឃើញហើយនិយាយថា វាជាឋានសួគ៌របស់អ្នក ប៉ុន្តែជាសុបិនអាក្រក់របស់ពួកគេ ។

កាលពីថ្ងៃទី២៤ ខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា លោក Jay Brewer រស់នៅរដ្ឋកាលីហ្វ័រញ៉ា សហរដ្ឋអាមេរិក បានរៀបចំពិធីខួបកំណើតរបស់ខ្លួននាពេលថ្មីៗនេះ ។ ពិធីខួបកំណើតរបស់លោកល្បីល្បាញពេញបណ្តាញសង្គម ដោយសារលោកដេកលើពស់ថ្លាន់យក្សជាច្រើនក្បាល និងថតរូបភាពបង្ហោះ ។

លោក Jay Brewer គឺជានាយកសួនសត្វ «California Reptile Park» ហើយលោកចូលចិត្តសត្វល្មូនណាស់ និងតែងតែបង្ហោះរូបភាពសត្វពស់ជាបន្តបន្ទាប់ក្នុងអ៊ីនធើរណេត ។ ចុងក្រោយនេះ លោកក៏បានបង្ហោះរូបភាពដេកលើពស់ថ្លាន់យក្សជាច្រើនក្បាលក្នុងពិធីខួបកំណើត និងសរសេរថា ៖ «នៅថ្ងៃកំណើត ខ្ញុំចង់ប្រាប់មនុស្សគ្រប់គ្នាថា សូមអរគុណយ៉ាងខ្លាំងសម្រាប់ការស្រឡាញ់រាប់អានខ្ញុំ ។ ខ្ញុំចង់បង្ហាញឱ្យមនុស្សគ្រប់គ្នាឃើញថា ពិធីខួបកំណើតនេះពិសេសខ្លាំងប៉ុនណា ដោយសារខ្ញុំបានជប់លៀងឱ្យពស់ថ្លាន់» ។

លោកបន្តទៀតថា ៖ «មិត្តភក្តិជាច្រើននាក់បានមកចូលរួមពិធីខួបកំណើតរបស់ខ្ញុំ ហើយពួកយើងសប្បាយខ្លាំងណាស់ ។ ខ្ញុំសូមអរគុណអ្នកគ្រប់គ្នាដែលបានតាមដានការបង្ហោះរបស់ខ្ញុំក្នុងបណ្តាញសង្គមរហូតមក ។ ខ្ញុំពុំអាចធ្វើវាបានទេ បើគ្មានអ្នកគ្រប់គ្នាជួយគាំទ្រ ។ វាពិតជាអស្ចារ្យខ្លាំងណាស់ និងល្អជាងអ្វីដែលខ្ញុំបានគិតទៅទៀត» ។

តាំងពីលោកបង្ហោះរូបភាពដេកលើពស់ថ្លាន់ក្នុងបណ្តាញសង្គមឃើញថា មានចំនួនចុច Like រហូតដល់ជាង២ម៉ឺនលើក, ការបញ្ចេញមតិជាង៩០០មតិ និងការចែកចាយរូបភាព (Share) យ៉ាងច្រើន ។ អ្នកលេងបណ្តាញសង្គមបានបញ្ចេញមតិខុសៗគ្នា ក្នុងនោះអ្នកខ្លះបានចូលរួមរីករាយជាមួយលោក ខណៈអ្នកខ្លះទៀតខ្លាចពស់ ។

អ្នកលេងបណ្តាញសង្គមភាគច្រើននិយាយថា ពួកគេមិនចង់ជឿថា មានពស់ច្រើនបែបនេះ វាជាពិធីជប់លៀងមួយពិសេសបំផុត ។ ប៉ុន្តែអ្នកលេងបណ្តាញសង្គមខ្លះទៀតថា ពួកគេខ្លាចពស់ណាស់ ហើយនេះជាឋានសួគ៌របស់ម្ចាស់ខួបកំណើត ប៉ុន្តែជាសុបិនអាក្រក់របស់ពួកគេ ៕

ត្រីឆ្លាមហ្គ្រីនលែន ( Somniosus microcephalus ) គឺជាសត្វឆ្អឹងកងមួយដែលមានអាយុកាលប៉ាន់ស្មានប្រហែល ៤០០ ឆ្នាំ ត្រូវបានគេរកឃើញជាញឹកញាប់នៅតំបន់ទឹកជ្រៅនៃមហាសមុទ្រអាត្លង់ទិកខាងជើង និងអាកទិក។

ត្រីឆ្លាមហ្គ្រីនលែននីមួយៗគឺមានអាយុច្រើនណាស់ ជាហេតុធ្វើឱ្យអ្នកវិទ្យាសាស្ត្រងឿងឆ្ងល់ថា តើមូលហេតុអ្វីបានជាត្រីឆ្លាមមួយប្រភេទនេះមានអាយុវែងជាងគេ ខណៈត្រីឆ្លាមផ្សេងៗទៀតមានអាយុត្រឹមតែ ៧០ ទៅ ៨០ ឆ្នាំប៉ុណ្ណោះ។

យោងតាមគេហទំព័របរទេស IFL Science បានឱ្យដឹងថា មូលហេតុដែលត្រីឆ្លាមហ្គ្រីនលែនអាចរស់នៅបានរហូតដល់ ៤០០ ឆ្នាំ គឺដោយសារពួកវាមានហ្សែនច្រើនជាងគេរហូតដល់ ៨១ រួមបញ្ចូលគ្នាដែលហ្សែននេះមានតួនាទីក្នុងការជួសជុល DNA របស់ពួកវាជាហេតុធ្វើឱ្យពួកវាមានអាយុវែងជាងគេ។ នេះបើយោងតាមក្រុមអ្នកស្រាវជ្រាវមកពីវិទ្យាស្ថាន Leibniz និងវិទ្យាស្ថាន Fritz Lipmann រួមទាំងស្ថាប័នជាច្រើនផ្សេងទៀត បានឱ្យដឹងថា ពួកគេបានធ្វើការពិសោធន៍ទៅលើត្រីឆ្លាម Greenland ដោយរកឃើញថា ត្រីនេះមានហ្សែនរហូតដល់ ៨១ ដែលហ្សែនរបស់ពួកវាគឺជាជំហានដ៏សំខាន់មួយឆ្ពោះទៅរកការយល់ដឹងអំពីយន្តការម៉ូលេគុលនៃភាពចាស់នៅក្នុងសត្វដែលមានអាយុវែងបំផុត។

ទោះជាយ៉ាងណាក៏ដោយ អ្នកជំនាញនឹងត្រូវធ្វើការស្រាវជ្រាវបន្ថែមទៀតឱ្យកាន់តែស៊ីជម្រៅ ដើម្បីបញ្ជាក់អំពីមូលហេតុថា ហេតុអ្វីបានជាត្រីឆ្លាមហ្គ្រីនលែន មានហ្សែនច្រើនបែបនេះរហូតដល់ ៨១ បញ្ចូលគ្នា ក៏ដូចជាត្រូវសិក្សាស្វែងយល់បន្ថែមអំពីការផ្លាស់ប្តូររបស់ហ្សែនពួកវានីមួយៗ ដែលរួមចំណែកដល់សមត្ថភាពរបស់ត្រីឆ្លាម Greenland ក្នុងការរស់នៅបានយូរ។ គួរបញ្ជាក់ដែរថា ត្រីឆ្លាម Greenland គឺជាសត្វដែលមានអាយុច្រើនជាងគេបំផុតក្នុងលោក ក្រៅពីត្រីមួយប្រភេទនេះចំណាត់ថ្នាក់ទីគឺបានទៅលើត្រី Koi ដែលមានអាយុ ២២០ ឆ្នាំ និងអណ្តើកសមុទ្រក្រហម (Red Sea Urchin) ជាមួយអាយុ ២០០ ឆ្នាំ៕

ប្រទេសថៃ ៖ សារព័ត៌មានថៃរាយការណ៍ថា ច្បាប់អាពាហ៍ពិពាហ៍អ្នកស្រឡាញ់ភេ.ទ ដូចគ្នារបស់ប្រទេសថៃ នឹងចូលជាធរមានជាផ្លូវការនៅថ្ងៃទី២២ ខែមករា ឆ្នាំ២០២៥ (ឬរយៈពេល ១២០ថ្ងៃទៀត) ។ នេះបើយោងតាមព្រះរាជសារលិខិតរបស់ព្រះមហាក្សត្រថៃ ។

វាជាដំណឹងគួរឱ្យរីករាយមួយសម្រាប់ពលរដ្ឋថៃ ក្រោយពីព្រះរាជសារលិខិតរបស់ព្រះមហាក្សត្រថៃបានផ្សព្វផ្សាយសេចក្តីប្រកាសព័ត៌មានមួយ កាលពីថ្ងៃទី២៤ ខែកញ្ញា ឆ្នាំ២០២៤ ស្តីពីច្បាប់អាពាហ៍ពិពាហ៍អ្នកស្រឡាញ់ភេ.ទដូចគ្នា ឆ្នាំ២០២៤ នឹងចាប់ផ្តើមអនុវត្តជាផ្លូវការ ក្នុងរយៈពេល ១២០ថ្ងៃទៀត ។

ច្បាប់អាពាហ៍ពិពាហ៍អ្នកស្រឡាញ់ភេ.ទដូចគ្នា មានចំនួន ៦៩មាត្រា បញ្ជាក់ថា ពលរដ្ឋថៃដែលស្រឡាញ់ភេទដូចគ្នា នឹងអាចរស់នៅជាមួយគ្នាក្នុងឋានៈជាគូស្វាមី-ភរិយាស្របច្បាប់ និងពុំខុសគ្នាពីគូស្វាមី-ភរិយាជាបុរស និងស្ត្រីឡើយ ។ ក្រៅពីនេះ ពួកគេនឹងមានសិទ្ធិ, កាតព្វកិច្ច និងស្ថានភាពគ្រួសារដូចគ្នាជាមួយគូស្វាមី-ភរិយាទូទៅដែរ ។

ស្ថាប័នពាក់ព័ន្ធរបស់រដ្ឋាភិបាលដែលទទួលខុសត្រូវផ្នែកនេះ ត្រូវតែចូលរួមវាយតម្លៃលើកត្តាផ្សេងៗតាមច្បាប់កំណត់ ដូចជា ៖ សិទ្ធិ, កាតព្វកិច្ច និងស្ថានភាពគ្រួសារ ដែលពាក់ព័ន្ធជាមួយគូស្វាមី-ភរិយាស្រឡាញ់ភេទដូចគ្នា ដើម្បីឱ្យពួកគេទទួលបានសិទ្ធិទាំងនេះដោយស្របច្បាប់ ។

បើបុគ្គលណាមានបំណងចុះសំបុត្រអាពាហ៍ពិពាហ៍តាមច្បាប់ថ្មី ពួកគេនឹងពុំអាចចុះសំបុត្រអាពាហ៍ពិពាហ៍បានភ្លាមៗទេ ក្នុងអំឡុងពេលច្បាប់ទើបតែប្រកាស ។ ដូច្នេះ ពួកគេត្រូវតែរង់ចាំឱ្យផុតរយៈពេល១២០ថ្ងៃសិន ឬអាចចុះសំបុត្រអាពាហ៍ពិពាហ៍ ចាប់ពីថ្ងៃទី២២ ខែមករា ឆ្នាំ២០២៥ តទៅ ។

ច្បាប់អាពាហ៍ពិពាហ៍អ្នកស្រឡាញ់ភេ.ទដូចគ្នា គឺពលរដ្ឋថៃមានសិទ្ធិរៀបពាពាហ៍ពិពាហ៍ជាមួយភេទដូចគ្នាជាគូស្វាមី-ភរិយាស្របច្បាប់ ព្រមទាំងគ្មានលក្ខខណ្ឌកំណត់ថា ពលរដ្ឋថៃត្រូវតែរៀបអាពាហ៍ពិពាហ៍ជាមួយភេទផ្ទុយគ្នាទេ ។ ក្រៅពីនេះ អ្នកស្រឡាញ់ភេទដូចគ្នាអាចរៀបចំពិធីភ្ជាប់ពាក្យ និងរៀបអាពាហ៍ពិពាហ៍ ចាប់ពីអាយុ១៨ឆ្នាំឡើងទៅ ហើយជនជាតិថៃអាចចុះសំបុត្រអាពាហ៍ពិពាហ៍ជាមួយជនបរទេស ដោយអនុវត្តតាមច្បាប់របស់ថៃ ។

អតីតនាយករដ្ឋមន្ត្រីថៃ លោក ស្រេតថា ថាវីស៊ីន បានសរសេរក្នុងបណ្តាញសង្គម X ថា ៖ «វាជាការបោះជំហានដ៏សំខាន់របស់សង្គមថៃ ពីព្រោះច្បាប់អាពាហ៍ពិពាហ៍អ្នកស្រឡាញ់ភេ.ទដូចគ្នា បានចូលជាធរមានហើយ ដើម្បីឱ្យពលរដ្ឋថៃមានសិទ្ធិស្មើភាព ហើយភាពចម្រុះផ្លូវភេទនឹងមានការទទួលស្គាល់យ៉ាងពេញលេញ» ។

រីឯលោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃ បានសរសេរក្នុងបណ្តាញសង្គម X ថា ៖ «ខ្ញុំសូមចូលរួមត្រេកអរចំពោះសេចក្តីស្រឡាញ់របស់មនុស្សគ្រប់គ្នា ហើយក៏សូមអរគុណសម្រាប់ការជំរុញពីគ្រប់ផ្នែកផងដែរ ។ វាជាការតស៊ូរួមរបស់អ្នកគ្រប់គ្នា ដើម្បីឱ្យមានច្បាប់នេះនៅប្រទេសថៃ» ៕

សត្វឆ្កែត្រូវបានគេចាត់ទុកថាជាមិត្តដ៏ល្អបំផុតរបស់មនុស្ស ព្រោះពួកវាច្រើនតែមានភាពស្មោះត្រង់ជាមួយម្ចាស់ រហ័សរហួន វាងវៃ ស្តាប់បង្គាប់ និងគួរឱ្យស្រឡាញ់ ប៉ុន្តែមិនមែនសត្វចិញ្ចឹមទាំងអស់នេះសុទ្ធតែស្លូតបូតនោះទេ ដោយសារសត្វខ្លះក៏មានចរិតកាចសាហាវខ្លាំងផងដែរ។ ខាងក្រោមនេះគឺជាបញ្ជីសត្វឆ្កែដ៏កាចសា.ហាវ និងគ្រោះថ្នា.ក់បំផុតទាំង ១០ ដែលមនុស្សមិនគួរយកទៅចិញ្ចឹម៖

១. Akita៖ Akita គឺជាពូជឆ្កែជប៉ុនដែលមានទំហំធំ ត្រូវបានបង្កាត់ពូជដើម្បីធ្វើជាអ្នកការពារ អ្នកយាម និងជាអ្នកប្រមាញ់សត្វធំៗ ក៏ដូចជាអ្នកបរបាញ់សត្វកាចសាហាវផ្សេងៗជាដើម នេះធ្វើឱ្យពួកវាត្រូវបានគេចាត់ទុកថា ជាសត្វឆ្កែដែលមានគ្រោះថ្នាក់បំផុតក្នុងលោក។

២. American XL Bully៖ គឺជាពូជឆ្កែដ៏ធំមួយត្រូវបានទទួលស្គាល់ដោយ United Kennel Club ថាជាឆ្កែមានរូបរាងរឹងមាំ និងសាច់ដុំក្រាស់ ហើយមានភាពស្មោះស្ម័គ្រជាមួយតែម្ចាស់វាប៉ុណ្ណោះ ក្រៅពីម្ចាស់ ពួកវានឹងដើរខាំគេឯង ដោយសារចរិតកាចសាហាវរបស់វានេះហើយ ធ្វើឱ្យគេចាត់ទុកថាជាសត្វឆ្កែដែលមានគ្រោះថ្នាក់បំផុតទីពីរក្នុងលោក។ ជាក់ស្តែងថ្មីៗនេះអង់គ្លេសបានអនុម័តច្បាប់ហាមឃាត់ការបង្កាត់ពូជសត្វពាហនៈនេះ ដោយសារតែឧប្បត្តិហេតុជាញឹកញាប់នៃការខាំ និងវាយប្រហារមនុស្ស។

៣. The Boerbow៖ គឺជាពូជឆ្កែដែលមានរាងកាយធំមហិមា ជាមូលហេតុចម្បងដែលធ្វើឱ្យវាស្ថិតក្នុងបញ្ជីសត្វឆ្កែដ៏កាចសា.ហាវ និងគ្រោះថ្នា.ក់បំផុតនេះ។ Boerbow ត្រូវបានបង្កើតឡើងពីឆ្កែ Bullenbesser របស់អាល្លឺម៉ង់ ដែលជាឆ្កែចិញ្ចឹមសម្រាប់តាមដាន ហិតក្លិន និងរារាំងអ្នកឈ្លានពាន។

៤.Ken Corso៖ ពូជឆ្កែនេះត្រូវបានបង្កើតឡើងដើម្បីយាម និងការពារអ្នកឈ្លានពានដែលចូលមកទីធ្លាពួកវាដោយគ្មានការអនុញ្ញាត ជាមួយកម្លាំងនៃការខាំរបស់វា ធ្វើឱ្យអ្នកឈ្លានពានស្លាប់ក្នុងរយៈពេលដ៏ខ្លី នេះធ្វើឱ្យពួកវាក្លាយជាសត្វឆ្កែដ៏គ្រោះថ្នាក់បំផុតក្នុងលោក ដែលមនុស្សគួរប្រុងប្រយ័ត្ន។

៥.Chihuahua៖ គឺជាឆ្កែដ៏ Cute មានរូបរាងតូចៗប៉ុន្តែវាក៏ស្ថិតក្នុងបញ្ជីគ្រោះថ្នាក់ដែរ ដោយសារពួកវាជាសត្វក្បាលរឹង ឆាប់ឆេវឆាវ ឆាប់ខឹង ពិបាកចិញ្ចឹម និងងាយខាំម្ចាស់វាណាស់។

៦.Chao Chao៖ គឺជាពូជឆ្កែ Spitz ដែលមានប្រវត្តិរាប់ពាន់ឆ្នាំមកហើយ សត្វនេះមិនសូវមានការអត់ធ្មត់នោះទេ តែងតែខាំមនុស្សជាញឹកញាប់ ទោះជាយ៉ាងណាដោយសារតែរូបរាងដ៏គួរឱ្យស្រលាញ់របស់វាស្រដៀងទៅនឹងខ្លាឃ្មុំតុក្កតា មនុស្សជាច្រើននៅតែចិញ្ចឹមពួកវា។

៧.Collies៖ សម្រាប់ពូជឆ្កែ Collies ក៏មាននៅក្នុងបញ្ជីនេះដែរ ដោយសារសត្វឆ្កែទាំងនេះត្រូវបានគេប្រើដើម្បីធ្វើការជាមួយសត្វធំៗជាច្រើន មិនមែនសម្រាប់ចិញ្ចឹមធម្មតានោះទេ។ ហើយជារឿយៗពួកវាតែងតែខាំមនុស្ស ឬសត្វផ្សេងៗណាដែលឈ្លានពានទីកន្លែងរបស់វា នេះអាចពន្យល់បានថា collies គឺជាឆ្កែចិញ្ចឹមសម្រាប់ការពារ និងការសង្ស័យរបស់មនុស្សចម្លែក។

៨.Doberman Pinschers៖ គឺជាពូជឆ្កែមានភាពវៃឆ្លាតខ្ពស់ រហ័សរហួន និងស្មោះត្រង់ ទោះជាយ៉ាងណាក៏ដោយ Dobermans ត្រូវបានគេកំណត់ថាជាពូជមួយក្នុងចំណោមពូជដែលពាក់ព័ន្ធនឹងឧប្បត្តិហេតុខាំស្លាប់។ នេះគឺដោយសារតែកម្លាំងខាំដ៏ធំសម្បើមរបស់វា ធ្វើឱ្យមនុស្សមានការភ័យខ្លាច ទោះបីជា Dobermans គួរឱ្យស្រលាញ់ និងទន់ភ្លន់ជាមួយសមាជិកគ្រួសារក៏ដោយ ប៉ុន្តែប្រសិនបើវាខឹង ការខាំរបស់វាម្តងៗគឺគ្រោះថ្នាក់ខ្លាំងណាស់។

៩.German Shepherd៖ ត្រូវបានចាត់ទុកថាជាពូជឆ្កែឈានមុខគេមួយដែលធ្វើការនៅក្នុងនាយកដ្ឋានយោធា និងប៉ូលីស។ សម្រាប់ហេតុផលគឺដោយសារ ពួកវាជាសត្វឆ្កែដ៏ឆ្លាតវៃ និងស្មោះត្រង់ ដែលតែងតែត្រៀមខ្លួនដើម្បីការពារ មានការប្រុងប្រយ័ត្នខ្ពស់ចំពោះគ្រប់ទម្រង់នៃគ្រោះថ្នាក់។ ហើយក៏ជាឆ្កែដែលឧស្សាហ៍ព្យាយាម មិនដែលបោះបង់កាតព្វកិច្ច ជាមួយនឹងកម្លាំងខាំដ៏ខ្លាំង ២៣៨ ផោនក្នុងមួយអ៊ីញការ៉េ ដោយពួកវាក៏ត្រូវបំពេញភារកិច្ចខាំរបស់ពួកវាផងដែរ ដើម្បីគ្រប់គ្រងស្ថានការណ៍។

១០. Kuldong៖ ជាពូជឆ្កែដែលមានប្រវត្តិយូរយារណាស់មកហើយក្នុងការធ្វើការងារខ្លាំងមួយចំនួន ដូចជាការបរបាញ់ខ្លាឃ្មុំ និងការប្រយុទ្ធជាមួយសត្វឆ្កែកាចសាហាវដទៃទៀត។ នេះជាមូលហេតុចម្បងដែលធ្វើឱ្យវាស្ថិតក្នុងក្នុងបញ្ជីនេះ ថ្វីត្បិតតែគ្មានអង្គការណាមួយ ទទួលស្គាល់ពូជនេះជាសត្វកាចសាហាវ និងគ្រោះថ្នាក់ជាផ្លូវការក៏ដោយ ប៉ុន្តែវាមិនអាចបដិសេធបានទេថា Guldong គឺជាឆ្កែដ៏រឹងមាំ មានសាច់ដុំខ្លាំងក្លា និងមានសមត្ថភាពប្រយុទ្ធខ្ពស់ណាស់៕