ថ្មីៗនេះ សាលាដំបូងរាជធានីភ្នំពេញ បានចេញសេចក្តីប្រកាសសាលក្រម ដោយសម្រេចផ្តន្ទាទោសជនបង្កដាក់ពន្ធនាគារ រយៈពេល ៥ឆ្នាំ និងពិន័យជាប្រាក់ ២០លានរៀល ក្នុងករណីបុរសម្នាក់បើករថយន្តបុករះម៉ូតូ៤គ្រឿង និងរថយន្ដច២គ្រឿង បណ្ដាលអោយបាត់បង់អាយុជីវិត៤នាក់ស្រី៣នាក់ប្រុស១នាក់ នៅក្រោមស្ពានអាកាសឬស្សីកែវ។
ជុំវិញករណីនេះ សម្ដចធិបតី ហ៊ុន ម៉ាណែត បានបញ្ជាឱ្យរដ្ឋមន្ត្រីក្រសួងយុត្តិធម៌ ឯកឧត្តម កើត រិទ្ធ សើរើករណីនេះឡើងវិញ ដោយត្រូវពិនិត្យមើលការផ្ដន្ទាទោសនេះស្របតាមច្បាប់ឬនៅ។
សម្តេចធិបតី បានសង្កត់ធ្ងន់ថា៖”ដើម្បីឱ្យប្រាកដលើករណីនេះ ត្រូវអនុវត្តន៍ការប្ដឹងទៅសាលាឧទ្ធរណ៍ ដើម្បីពិនិត្យមើលការសម្រេចនេះ ធ្ងន់គ្រប់គ្រប់ឬនៅពីព្រោះថាបុកស្លាប់ដល់ទៅ៤នាក់ឯណោះ”។
គួរបញ្ជាក់ផងដែរ កាលពីវេលាម៉ោង៦ៈ៤០នាទីយប់ថ្ងៃទី២០ ខែមករា ឆ្នាំ២០២៤ ចំណុចក្រោមស្ពានអាកាសឬស្សីកែវ មានហេតុការណ៍គ្រោះថ្នាក់ចរាចរណ៍ ដែលបណ្តាលមកពីរថយន្ត Ford Ranger មួយធ្វើដំណើរចុះពីស្ពានឬស្សីកែវ ដោយល្បឿនលឿនបុករះ បណ្តាលឱ្យស្លាប់មនុស្ស៤នាក់ ខណៈអ្នកបើកបរ បើកក្នុងស្ថានភាពស្រវឹង ដោយមានអត្រាជាតិអាល់កុល ០,៥៤mg/l លើសពីអ្វីដែលច្បាប់បានចែង៕
