ប្រៀបដូចជារឿងអភិនិហាមួយសម្រាប់តារាចម្រៀងរ៉េប វណ្ណដា ខណៈបទចម្រៀងដែលទម្លាក់ជាង៥ខែមកហើយស្រាប់តែផ្ទុះកក្រើកលើទីផ្សារម្តងទៀត។ ការផ្ទុះបទចម្រៀង «សង្រ្កាន្តស្គាល់ស្នេហ៍» ឡើងវិញនេះបានទាក់ទាញការចូលលេងរាប់ម៉ឺននាក់ចាប់តាំងពីតារាល្បីៗនៅប្រទេសថៃ អ្នកបង្កើតមាតិកាល្បីៗនិងអ្នកលេងបណ្តាញសង្គមទិកតុកជាច្រើនទៀតរហូតធ្លាយមកដល់អ្នកបង្កើតមាតិកាជាជនជាតិកូរ៉េម្នាក់ទៀតមានឈ្មោះថា Kejimin ក៏លេងបទ វណ្ណដា ដែរ។

ថ្ងៃទី២៨ ខែកញ្ញា នេះអ្នកគាំទ្រមានការចាប់អារម្មណ៍ទៅលើគណនីទិកតុកមួយឈ្មោះថា Kejimin ជាជនជាតិកូរ៉េដែលមានអ្នកតាមដានរហូតដល់ ១១.៨លាននាក់បានបង្ហោះវីដេអូមួយលេងបទចម្រៀងរបស់ វណ្ណដា មានចំណងជើងថា «សង្ក្រាន្តស្គាល់ស្នេហ៍»។ មិនត្រឹមតែចូលលេងប៉ុណ្ណោះទេតែស្រីស្អាតរូបនេះបានបង្ហាញទង់ជាតិកម្ពុជានិងកូរ៉េខាងត្បូង ប៉ុន្តែបានដាក់ចំណងជើងជាភាសាថៃមានអត្ថន័យថា «សួស្តី»។ ការដាក់ចំណងជើងបែបនេះទំនងដោយសារតែបទនេះបានផ្ទុះកក្រើកខ្លាំងនៅក្នុងប្រទេសថៃ។

គួរឱ្យដឹងថា kejimin គឺជាអ្នកលេងទិកតុកល្បីម្នាក់ប្រចាំប្រទេសកូរ៉េមានអាយុ២៣ឆ្នាំ។ នាងក៏ជាអ្នករាំនិងជាតារាម៉ូដែលម្នាក់ផងដែរ។

បទ សង្រ្កាន្តស្គាល់ស្នេហ៍ របស់ វណ្ណដា ដែលផ្ទុះកក្រើកលើទិកតុកឡើងវិញនេះមានតារាល្បីៗដូចជាតារាសម្តែង Pinky Savika តួនាងថងឌីឆ្នាំ២០១២ បានច្រៀងផ្ទាល់តែម្តងធ្វើឱ្យអ្នកគាំទ្រមានការចាប់អារម្មណ៍យ៉ាងខ្លាំង។ ក្រៅពីមានដូចជា Mai davika លេងបទនេះចំនួន២ដង ហើយ Mint Chalida ក៏បានលេងផងដែរ។ ក្រៅពីតារាល្បីៗប៉ុន្មានដួងនេះតារាសម្តែង Faye Malison តួស្រីក្នុងប្រភេទរឿង GL គឺមានការពេញចិត្តពេញថ្លើមចំពោះវណ្ណដា ជាងគេតែម្តងសូម្បីតែLive ជជែកជាមួយអ្នកគាំទ្ររូបនាងក៏បានចាក់បទ វណ្ណដា ស្តាប់ផងដែរ។

នេះគឺជាលើកដំបូងហើយដែលបទរបស់ វណ្ណដា ផ្ទុះកក្រើកខ្លាំងយ៉ាងនេះនៅលើទិកតុកដូចនេះធ្លាយដល់ក្រៅប្រទេសបើទោះបទនេះបានចេញកាលពីចូលឆ្នាំខ្មែរមកម្ល៉េះ៕

ប្រទេសជប៉ុន៖ នៅប្រទេសជប៉ុនដើម្បីទាក់ទាញអតិថិជន ម្ចាស់ហាងតែងមានគំនិតប្លែកៗជាច្រើន ដូចជាការបម្រើភ្ញៀវដោយសេវាកម្មទះកំផ្លៀង ខណៈភោជនីយដ្ឋានខ្លះទៀតធ្វើត្រាប់តាមពន្ធនាគារ ដោយអតិថិជនត្រូវបានគេដាក់ខ្នោះដៃជាដើម។ ទោះជាយ៉ាងណាថ្មីៗនេះភោជនីយដ្ឋានមួយដែលមានឈ្មោះថា Bato Cafe Omokenashi វិញក៏មិនធម្មតាដែរ ដោយសារមានបម្រើសេវាកម្មស្តីបន្ទោសអតិថិជន និងយកស្បែកជើងវាយអតិថិជនជាដើម ដែលបច្ចុប្បន្នកំពុងទទួលបានការចាប់អារម្មណ៍យ៉ាងខ្លាំងពេញបណ្តាញសង្គមទាំងក្នុង និងក្រៅប្រទេស។

Bato Cafe Omokenashi គឺជាភោជនីយដ្ឋានដែលទើបតែបើកថ្មីៗនោះទេក្នុងទីក្រុងតូក្យូ មានបម្រើសេវាកម្មស្តីបន្ទោសអតិថិជន និងយកស្បែកជើងវាយអតិថិជន ដែលសព្វថ្ងៃកំពុងទាក់ទាញចំណាប់អារម្មណ៍យ៉ាងខ្លាំង។ សេវាកម្មនេះត្រូវបានបំផុសគំនិតដោយកម្មវិធីទូរទស្សន៍មួយដែលដឹកនាំដោយ Nobuyuki Sakuma ។ ហេតុនេះសម្រាប់ភ្ញៀវដែលចង់ទទួលបានបទពិសោធន៍ថ្មីៗ ប្លែកៗអាចមកហាងនេះផ្ទាល់ ដើម្បីស្តាប់ពាក្យមិនល្អ ឬគម្រុះគម្រើយពីបុគ្គលិក និងត្រូវបុគ្គលិកវាយប្រហារដោយស្បែកជើងជាដើម។

ទោះជាយ៉ាងណាការធ្វើអាកប្បកិរិយាបែបនេះគឺជាការសំណូមពរពីអតិថិជននោះទេ ដូច្នេះបុគ្គលិកក្នុងហាងត្រូវតែធ្វើតាមអតិថិជនដូចជាការស្តីបន្ទោស ឬវាយនឹងស្បែកជើងជាដើម។ អតិជនខ្លះសំណូមពរបុគ្គលិកក្នុងហាងឱ្យវាយពួកគេចំមុខ ហើយអ្នកខ្លះទៀតក៏សំណូមពរឱ្យបុគ្គលិកក្នុងហាងវាយពួកគេនឹងគូទផងដែរ។ ទោះបីជាយ៉ាងនេះក្តីមនុស្សជាច្រើនដែលបានពិសោធសេវាកម្មនេះ បាននិយាយថា អាហារនៅ Bato Cafe Omokenashi គឺពិតជាឆ្ងាញ់ខ្លាំងណាស់ ព្រោះមានរសជាតិប្លែក និងពិសេសខុសពីហាងដទៃ។ លើសពីនេះអតិថិជនក៏មានការចាប់អារម្មណ៍ចំពោះបុគ្គលិកស្រីៗនៅទីនោះផងដែរ ដោយសារពួកគេមានសម្រស់ស្រស់ស្អាតនិងមានភាពរួសរាយរាក់ទាក់។

គួរបញ្ជាក់ដែរថា ការបើកហាងដោយមានបម្រើសេវាកម្មចម្លែកៗបែបនេះមិនមែនជាលើកទីមួយក្នុងប្រទេសជប៉ុននោះទេ កន្លងមកហាងជប៉ុនជាច្រើនបានប្រើវិធីសាស្ត្រនេះ ដើម្បីទាក់ទាញអតិថិជន។ ជាក់ស្តែងដូចភោជនីយដ្ឋាន Shachihoko អ៊ីចឹងគឺមានបម្រើភ្ញៀវដោយសេវាកម្មទះកំផ្លៀង ហើយថ្មីៗនេះព្រះសង្ឃមួយអង្គបានបើកក្លឹបរាត្រីមួយក្នុងទីក្រុងតូក្យូ ក៏កំពុងទទួលបានការចាប់អារម្មណ៍ខ្លាំងផងដែរ៕

ប្រទេសចិន ៖ កាលពីចុងខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា ប្រទេសចិននឹងចាប់ផ្តើមនាំចូលអាហារសមុទ្រជប៉ុនឡើងវិញបន្តិចម្តងៗ ក្រោយពីចិនបានផ្អាកការនាំចូលអស់រយៈពេល១ឆ្នាំ ដោយសារបារម្ភថា អាហារសមុទ្រជប៉ុនគ្មានសុវត្ថិភាពសម្រាប់អ្នកបរិភោគ ។

រដ្ឋាភិបាលចិនលើកឡើងថា តាំងពីខែសីហា ឆ្នាំ២០២៣ មក រដ្ឋាភិបាលចិនបានចេញបញ្ជាហាមនាំចូលអាហារសមុទ្រពីជប៉ុនជាដាច់ខាត ហើយចិនក៏ចាប់ផ្តើមអនុវត្តបម្រាមនេះ នៅខែតុលា ឆ្នាំ២០២៣ ។ ការហាមឃាត់នាំចូលអាហារសមុទ្រជប៉ុន ដោយសារជប៉ុនបង្ហូរទឹកចេញពីរោងចក្រថាមពលនុយក្លេអ៊ែរ Fukushima ចូលក្នុងមហាសមុទ្រប៉ាស៊ីហ្វិក ។

ប៉ុន្តែរដ្ឋាភិបាលជប៉ុននិយាយថា ទឹកបង្ហូរចេញពីរោងចក្រថាមពលនុយក្លេអ៊ែររបស់ខ្លួនមានសុវត្ថិភាព និងទទួលការគាំទ្រពីទីភ្នាក់ងារនុយក្លេអ៊ែររបស់អង្គការសហប្រជាជាតិ ។ ការបង្ហូរទឹកកខ្វក់នេះបានធ្វើឱ្យចិនតវ៉ាយ៉ាងខ្លាំងថា គឺជាទង្វើមួយឃើញតែផលប្រយោជន៍ផ្ទាល់ខ្លួន ហើយចិនក៏បានហាមនាំចូលអាហារសមុទ្រជប៉ុនគ្រប់ប្រភេទ ។

នៅខែកញ្ញា ឆ្នាំ២០២៤នេះ ប្រទេសចិន និងជប៉ុនបានឯកភាពគ្នាពាក់ព័ន្ធនឹងការបង្ហូរទឹកចេញពីរោងចក្រនុយក្លេអ៊ែរ ទើបចិនសម្រេចចិត្តលុបចោលការផ្អាកនាំចូលអាហារសមុទ្រជប៉ុន ដែលចិនបានអនុវត្តអស់រយៈពេល១ឆ្នាំ ។

ក្រសួងការបរទេសរបស់ចិនឱ្យដឹងថា នឹងចាប់ផ្តើមកែតម្រូវវិធានការពាក់ព័ន្ធទាំងអស់ដោយផ្អែកលើកត្តាវិទ្យាសាស្ត្រ ហើយចិននឹងនាំចូលអាហារសមុទ្រជប៉ុនបន្តិចម្តងៗ ដើម្បីឱ្យស្របតាមបទប្បញ្ញត្តិ និងស្តង់ដារ ។

ចំណែកនាយករដ្ឋមន្ត្រីជប៉ុន លោក Fumio Kishida បានថ្លែងថា ជប៉ុនរីករាយណាស់ ដែលចិនសម្រេចចិត្តនាំចូលអាហារសមុទ្រជប៉ុនឡើងវិញ ក្រោយពីផ្អាកអស់រយៈពេលយ៉ាងយូរ ។ ជប៉ុននឹងត្រួតពិនិត្យគុណភាពទឹកដែលបង្ហូរពីរោងចក្រថាមពលនុយក្លេអ៊ែរបន្ថែមទៀត ដើម្បីផ្តល់ទំនុកចិត្តដល់អតិថិជនថា អាហារសមុទ្រជប៉ុនពុំប៉ះពាល់សុខភាពទេ ៕

ប្រទេសចិន ៖ រយៈពេលប៉ុន្មានឆ្នាំចុងក្រោយនេះ ការផលិតមនុស្សយន្តរបស់ចិនកាន់តែទំនើបខ្លាំងឡើងៗ ។ ក្នុងកិច្ចប្រជុំមនុស្សយន្តលំដាប់ពិភពលោក នៅទីក្រុងប៉េកាំង ប្រទេសចិន បានបង្ហាញមនុស្សយន្ត Humanoid ជាច្រើនប្រភេទ ក្នុងនោះមានមនុស្សយន្តកវីដ៏ល្បីល្បាញបំផុតរបស់ចិន ឈ្មោះ ស៊ូ ស៊ឺ ដែលរស់រវើកដូចមានជីវិតពិតៗ ។

EX Robots គឺជាក្រុមហ៊ុនល្បីល្បាញផ្នែកផលិតមនុស្សយន្ត Humanoid បានរៀបចំកម្មវិធីបង្ហាញមនុស្សយន្តថ្មីៗជាច្រើន ព្រមទាំងមនុស្សយន្តមានជំនាញធ្វើការងារផ្ទះផងដែរ ។ វាជាមនុស្សយន្តស្រី ដែលក្រុមហ៊ុន EX Robots បានផលិតសម្រាប់ឱ្យជួយធ្វើការងារផ្សេងៗក្នុងផ្ទះ ហើយវាអាចគ្រប់គ្រងឧបករណ៍បច្ចេកវិទ្យាទាំងអស់ក្នុងផ្ទះ និងធ្វើជាមិត្តភក្តិជាមួយសមាជិកគ្រួសារផងដែរ ។

លោក លី ប៉យ៉ាង ស្ថាបនិក និងជា CEO របស់ក្រុមហ៊ុន EX Robots នៅទីក្រុងតាលៀន និយាយថា ក្រុមហ៊ុនរបស់លោកបានរួមបញ្ចូល Hardware និងបច្ចេកវិទ្យា AI ជាមួយគ្នា ដើម្បីឱ្យមនុស្សយន្តអាចសម្របខ្លួនជាមួយស្ថានការណ៍ផ្សេងៗបែប Real Time ។ លោកបញ្ជាក់ថា ៖ «មនុស្សយន្តអាចបំពេញតួនាទីជាអ្នកថែទាំគ្រួសារដ៏សំខាន់ មិនថាមនុស្សចាស់រស់នៅផ្ទះម្នាក់ឯង ឬយុវជន ឬកុមារ ដែលអ្នកទាំងនេះចង់មានមិត្តភក្តិជាមនុស្សយន្ត» ។

លោកបន្តថា មនុស្សយន្តរាប់រយគ្រឿងរបស់ក្រុមហ៊ុន EX Robots ត្រូវបានយកទៅប្រើប្រាស់រួចហើយ ។ ក្រុមហ៊ុននឹងផលិតមនុស្សយន្តបន្ថែមទៀតចំនួន៥០០គ្រឿង នៅឆ្នាំ២០២៤ នេះ ។

ដោយឡែក ក្រុមហ៊ុន Astrobot ដែលមានទីតាំងនៅទីក្រុងសិនជិន ក៏បានបង្ហាញមនុស្សយន្តថ្មីផងដែរ គឺមនុស្សយន្តនេះអាចលេងតន្ត្រីចិនបុរាណឈ្មោះ «យាងឈីន» និងសរសេរអក្សរចិនបាន ។ ក្រៅពីនេះ វាក៏អាចបង្ហាញពីក្បាច់គុនចិន, ធ្វើការងារផ្ទះ និងរៀបចំម្ហូបអាហារទៀតផង ។

លោក ឡៃ ជី ស្ថាបនិក និងជា CEO របស់ក្រុមហ៊ុន Astrobot និយាយថា បច្ចេកវិទ្យា AI មានសារៈសំខាន់យ៉ាងខ្លាំងក្នុងការធ្វើឱ្យមនុស្សយន្តមានចលនាដូចមនុស្ស និងអាចរៀនសូត្រវិធីធ្វើការជាប្រព័ន្ធ ព្រមទាំងមានហេតុផលស្រដៀងមនុស្ស ។

ក្រុមហ៊ុន Astrobot បានផលិតមនុស្សយន្តប្រុស Humanoid មានលក្ខណៈស្រដៀងមនុស្ស ដើម្បីអាចប្រើប្រាស់សម្ភារៈផ្សេងៗដែលមនុស្សបង្កើតឡើង ព្រមទាំងដឹងពីអារម្មណ៍ផ្លាស់ប្តូររបស់មនុស្ស ។ ក្រុមហ៊ុនរំពឹងថា មនុស្សយន្តនឹងជំនួសកម្លាំងពលកម្មមនុស្សដែលកំពុងធ្លាក់ចុះ និងបំពេញការងារជាបុគ្គលិកថែទាំមនុស្សចាស់ ខណៈចិនកំពុងឈានទៅរកសង្គមមនុស្សចាស់យ៉ាងឆាប់រហ័ស និងមានកម្លាំងពលកម្មធ្លាក់ចុះ ។

ការផលិតមនុស្សយន្ត Humanoid របស់ចិនបានកើនឡើងយ៉ាងខ្លាំងកាលពីឆ្នាំ២០២៣ និងកើនឡើង៨៥.៧% បើធៀបនឹងឆ្នាំ២០២២ ។ ចិនរំពឹងថា ឧស្សាហកម្មមនុស្សយន្តនឹងកាន់តែរីកចម្រើនខ្លាំងបន្ថែមទៀត នាថ្ងៃអនាគត ៕