ក្រសួង ត្រៀមសាងសង់សំណង់បង្ហៀរ ជួយដល់ផលដំណាំ៣០០០ហិកតា

ក្រសួងធនធានទឹក និងឧតុនិយម បាននឹងកំពុងអនុវត្តគម្រោងសាងសង់សំណង់បង្ហៀរ លើទំនប់អាងទឹកបែកតាប់ ស្ថិតក្នុងឃុំស្រែណូយ ស្រុកវ៉ារិន ខេត្តសៀមរាប។

គម្រោងនេះសាងសង់ឡើង ក្នុងគោលបំណង ដើម្បីរួមចំណែកជួយដោះស្រាយបញ្ហាទឹក ជូនប្រជាកសិករសម្រាប់ស្រោចស្រពបន្ថែមលើផ្ទៃដីបង្កបង្កើនផលស្រូវរដូវវស្សាចំនួន ១ ៨៥២ហិកតា ស្រូវរដូវប្រាំងចំនួន ១២០ហិកតា និងដំណាំរួមផ្សំចំនួន ១ ៥២០ហិកតា។

ការងារសំខាន់ៗនៃគម្រោងសាងសង់សំណង់បង្ហៀរនេះ រួមមាន៖

ទី១សាងសង់ទំនប់អាងទឹកបែកតាប់ខ្សែទី១ ប្រវែង ១៩០ម៉ែត្រ
ទី២សាងសង់ទំនប់អាងទឹកបែកតាប់ខ្សែទី២ ប្រវែង ២៦០ម៉ែត្រ
និងទី៣សាងសង់សំណង់សិល្បការ្យចំនួន២កន្លែង

គួរបញ្ជាក់ថា ទំនប់អាងទឹកបែកតាប់មានតួនាទីស្ទាក់ទឹកហូរពីប្រភពទឹកតំបន់ខ្ពង់រាបព្រៃស្អាក និងផ្ទៃរងទឹកភ្លៀងក្នុងតំបន់ មកតម្កល់ទុកសម្រាប់បម្រើឱ្យការងារស្រោចស្រពវិស័យកសិកម្ម និងការប្រើប្រាស់ក្នុងជីវភាពរស់នៅប្រចាំថ្ងៃរបស់ប្រជាពលរដ្ឋចំនួន ១៦ភូមិ នៃឃុំស្រែណូយ ស្រុកវ៉ារិន៕