ប្រទេសអង់គ្លេស ៖ សារមន្ទីរមួយកន្លែងនៅប្រទេសអង់គ្លេសបានប្រើប្រាស់បច្ចេកវិទ្យា AI បង្កើតជាសំឡេងសត្វស្លាបផុតពូជពីផែនដី ដើម្បីអាចជជែកជាមួយមនុស្ស ។ សំឡេងបង្កើតពី AI នេះ ពុំមែនជាសំឡេងសត្វតាមធម្មជាតិទេ ប៉ុន្តែវាជាសំឡេងដូចមនុស្សសម្រាប់ឱ្យគ្រោងឆ្អឹងសត្វស្លាបអាចទំនាក់ទំនងជាមួយអ្នកចូលសារមន្ទីរ ។

ការបង្កើតសំឡេងនេះក្នុងគោលបំណងឱ្យអ្នកចូលសារមន្ទីរ Museum Of Zoology អាចសួរសំណួរផ្សេងៗ និងជាការបង្កើតបទពិសោធន៍ថ្មីក្នុងការចូលសារមន្ទីរ ។ គេបានឮសំឡេងរបស់គ្រោងឆ្អឹងសត្វស្លាបនិយាយជាមួយអ្នកចូលសារមន្ទីរម្នាក់ ដែលសំឡេងនេះបញ្ជាក់ពីលក្ខណៈរបស់សត្វស្លាបផុតពូជមួយប្រភេទឈ្មោះ Dodo ។

សត្វស្លាប Dodo មានទំហំខ្លួនធំ និងពុំអាចហោះហើរបានទេ ហើយវាធ្លាប់មានជីវិតរស់នៅលើកោះម៉ូរីសៀស ក្នុងមហាសមុទ្រឥណ្ឌា ប៉ុន្តែបានផុតពូជកាលពីសតវត្សទី១៧ ។ បច្ចេកវិទ្យា AI ដែលធ្វើឱ្យគ្រោងឆ្អឹងសត្វស្លាប Dodo អាចទំនាក់ទំនងជាមួយមនុស្សនេះ គឺធ្វើឡើងដោយក្រុមហ៊ុនផ្នែកស្រាវជ្រាវបច្ចេកវិទ្យា ។ ក្រុមហ៊ុនបានប្រមូលព័ត៌មានពាក់ព័ន្ធនឹងវិទ្យាសាស្ត្រ និងស្រាវជ្រាវពីបរិស្ថានក្នុងអំឡុងពេលសត្វស្លាបនេះមានជីវិតលើផែនដី ដើម្បីបង្កើតសំឡេងឱ្យមានលក្ខណៈដូចសត្វនេះបំផុត ។

បច្ចេកវិទ្យា AI អាចជួយឱ្យគ្រោងឆ្អឹងសត្វ Dodo ឆ្លើយតបសំណួររបស់មនុស្សយ៉ាងឆាប់រហ័ស ព្រមទាំងចេះស្តាប់ភាសាមនុស្ស រហូតដល់២០ភាសា ។ ក្នុងសារមន្ទីរនេះ មិនមែនមានត្រឹមតែគ្រោងឆ្អឹងសត្វ Dodo ប៉ុណ្ណោះទេ ដែលអាចជជែកជាមួយមនុស្សបាន ប៉ុន្តែក្រុមហ៊ុនស្រាវជ្រាវបច្ចេកវិទ្យា ក៏បានប្រើប្រាស់បច្ចេកវិទ្យា AI ជាមួយគ្រោងឆ្អឹងសត្វផ្សេងទៀតផងដែរ ។

ហេតុនេះ អ្នកចូលទស្សនាសារមន្ទីរនឹងអាចសាកសួរសំណួរផ្សេងៗដែលចាប់អារម្មណ៍ដោយសេរី ។ ក្រៅពីនេះ ការប្រើប្រាស់បច្ចេកវិទ្យា AI ក្នុងសារមន្ទីរ ក៏បានទាក់ទាញចំណាប់អារម្មណ៍មនុស្សចូលសារមន្ទីរកាន់តែច្រើន ។ ប៉ុន្តែបច្ចុប្បន្ន បច្ចេកវិទ្យានេះពុំទាន់បានប្រើប្រាស់១០០% ទេ ដោយសារក្រុមហ៊ុនកំពុងសាកល្បងប្រើប្រាស់រយៈពេល១ខែ គឺចាប់ពីថ្ងៃទី១៥ ខែតុលា រហូតដល់ថ្ងៃទី១៥ ខែវិច្ឆិកា ឆ្នាំ២០២៤ ។

ក្រោយការសាកល្បងបច្ចេកវិទ្យា AI បង្កើតជាសំឡេងសត្វផុតពូជ សារមន្ទីរនឹងវិភាគព័ត៌មានផ្សេងៗ ដូចជា ៖ ការឆ្លើយតប និងប្រភេទការសន្ទនារវាងគ្រោងឆ្អឹងសត្វជាមួយមនុស្ស ដើម្បីពិចារណាពីគម្រោងប្រើប្រាស់បច្ចេកវិទ្យានេះ នាថ្ងៃអនាគត ៕

ប្រទេសថៃ ៖ វាបានក្លាយជារឿងមួយល្បីល្បាញនៅខែតុលា ឆ្នាំ២០២៤ និងធ្វើឱ្យរង្គោះរង្គឺក្នុងវិស័យសិល្បៈប្រទេសថៃ ករណីក្រុមហ៊ុន The iCON GROUP ដែលមានលោក វ៉ារ៉ាត់ផុន វ៉ារ៉ាត់វរ៉ាគុន (ឬថៅកែផុន) ជានាយកគ្រប់គ្រងក្រុមហ៊ុន ត្រូវបានជនរងគ្រោះជាច្រើននាក់ចោ.ទប្រកាន់ថា ក្រុមហ៊ុននេះបោកប្រាស់ពួកគេឱ្យជួយលក់ផលិតផលរហូតដល់អស់ប្រាក់ពីខ្លួន ។

ក្រោយមានការប្តឹងជាបន្តបន្ទាប់ពីជនរងគ្រោះទាំងនៅប្រទេសថៃ និងក្រៅប្រទេស នៅទីបំផុត សមត្ថកិច្ចក៏បានចាប់ខ្លួនជនពាក់ព័ន្ធជាមួយក្រុមហ៊ុន ចំនួន១៨នាក់ ដែលសុទ្ធតែមានតួនាទីជានាយកគ្រប់គ្រងក្នុងក្រុមហ៊ុន និងទទួលបានចំណូលយ៉ាងច្រើន ។ ជនពាក់ព័ន្ធដែលត្រូវបានសមត្ថកិច្ចចាប់ខ្លួន ក៏មានតារាសម្តែង៣រូបផងដែរ គឺអ្នកនាង ភីឆាយ៉ា វឌ្ឍនាមុនទ្រី (ហៅមីន), លោក យូរ៉ាណាន់ ផាម៉ុនមុនទ្រី (ហៅសែម ឬលោក ប៉ាតាវី), លោក បូសាកាន់ កាន់ថាថាវ៉ន (ហៅកាន់) ។

កាលពីថ្ងៃទី១៨ ខែតុលា ឆ្នាំ២០២៤ មេធាវីឈ្មោះ ដេឆា បានផ្តល់បទសម្ភាសន៍ទៅកាន់ប្រព័ន្ធផ្សព្វផ្សាយថា ក្រុមជនដែលសហការជាមួយក្រុមហ៊ុន The iCON GROUP រួមគ្នាបោកប្រា.ស់ ពលរដ្ឋ និងត្រូវបានសមត្ថកិច្ចចាប់ខ្លួននោះ គឺតុលាការពុំអនុញ្ញាតឱ្យពួកគេនៅក្រៅឃុំទេ បើទោះជាពួកគេមិនរត់គេចក្តី ពីព្រោះរឿងក្តីនេះមានជនរងគ្រោះជាច្រើននាក់ ។

តុលាការបញ្ជាក់ថា ជនជាប់ចោទម្នាក់ៗនឹងត្រូវជាប់ពន្ធនាគាររយៈពេលយូរឆ្នាំ ហើយជំហានបន្ទាប់ សមត្ថកិច្ចនឹងប្រមូលភស្តុតាងដើម្បីចាប់ខ្លួនជនពាក់ព័ន្ធជាមួយក្រុមហ៊ុន The iCON GROUP ផ្សេងទៀត ។ លោកមេធាវី ដេឆា បន្តថា តារាសម្តែង២នាក់ទៀតអាចប្រឈមនឹងការចាប់ខ្លួនដែរ គឺលោក បយប្រាកន ឆាត់ប៉ារិរ៉ាក់ និងលោក ដុមប្រាកនឡាំ ។

សមត្ថកិច្ចនឹងស៊ើបអង្កេតថា តើតារាសម្តែងទាំង២រូបនេះមានតួនាទីគ្រាន់តែផ្សព្វផ្សាយផលិតផលឱ្យក្រុមហ៊ុន The iCON GROUP ឬពួកគេបានអូសទាញមនុស្សផ្សេងទៀតឱ្យចាញ់បោកក្រុមហ៊ុន ។ ក្រៅពីនេះ ក៏មានការរឹបអូសទ្រព្យសម្បត្តិរបស់អតីតភរិយាលោក វ៉ារ៉ាត់ផុន វ៉ារ៉ាត់វរ៉ាគុន (ឬថៅកែផុន) ជានាយកគ្រប់គ្រងក្រុមហ៊ុន The iCON GROUP ពីព្រោះអតីតភរិយារូបនេះបានទទួលប្រាក់ពីក្រុមហ៊ុន ចំនួន១សែនបាតក្នុង១ខែ ។

ចំណែកជំនួយការរបស់តារាសម្តែងលោក ដុមប្រាកនឡាំ និយាយថា លោក ដុមប្រាកនឡាំ គ្រាន់តែមានតួនាទីជាអ្នកផ្សព្វផ្សាយផលិតផលឱ្យក្រុមហ៊ុនប៉ុណ្ណោះ ហើយលោកគ្មានតួនាទីក្នុងផ្នែកគ្រប់គ្រងក្រុមហ៊ុននេះទេ ។

រីឯតារាសម្តែងលោក បយប្រាកន ឆាត់ប៉ារិរ៉ាក់ បានចេញមកបង្ហាញពីភាពបរិសុទ្ធរបស់ខ្លួននៅស្ថានីយទូរទស្សន៍ប៉ុស្តិ៍លេខ៣ ថៃ ថា លោកបានលុបចោលកិច្ចសន្យាជាមួយក្រុមហ៊ុន The iCON GROUP និងប្រគល់ប្រាក់ទាំងអស់ទៅឱ្យក្រុមហ៊ុនវិញហើយ ។

លោកមេធាវី ដេឆា បន្តទៀតថា ជនពាក់ព័ន្ធម្នាក់ទៀតដែលសមត្ថកិច្ចមានភស្តុតាងច្បាស់លាស់ គឺព្រះសង្ឃ១អង្គ ដោយសារព្រះអង្គបានទទួលប្រាក់១លានបាត និងធ្លាប់មានសង្ឃដីកាអូសទាញឱ្យជនរងគ្រោះបង់ប្រាក់ឱ្យក្រុមហ៊ុន The iCON GROUP ។

កាលពីថ្ងៃទី២០ ខែតុលា ឆ្នាំ២០២៤ សារព័ត៌មានថៃរាយការណ៍ថា ចំនួនជនរងគ្រោះសរុបដែលបានចាញ់បោកក្រុមហ៊ុន The iCON GROUP គឺស្មើនឹង៥.៦៤៨នាក់ ដោយពួកគេបានបង់ប្រាក់ឱ្យក្រុមហ៊ុននេះសរុបជាង១.៦១១លានបាត ៕

ឥណ្ឌូនេស៊ី៖ ប្រទេសឥណ្ឌូនេស៊ីកំពុងស្វែងរកអ្នកវិនិយោគបរទេសដើម្បីគាំទ្រផែនការរបស់ខ្លួនក្នុងការសាងសង់ផ្ទះចំនួន ១៥ លានខ្នងរយៈពេល ៥ ឆ្នាំ ឬ ៣ លានខ្នងក្នុងមួយឆ្នាំសម្រាប់ប្រជាជនក្រីក្រនៅទូទាំងប្រទេស។
ថ្មីៗនេះលោក Hashim Djojohadikusumo ប្រធានក្រុមការងារលំនៅឋាន និងជាទីប្រឹក្សាកំពូលរបស់ប្រធានាធិបតីជាប់ឆ្នោតឥណ្ឌូនេស៊ី បាននិយាយថា នេះគឺជាគំនិតផ្តួចផ្តើមដ៏សំខាន់មួយដែលត្រូវបានប្រកាសដោយប្រធានាធិបតីថ្មី Prabowo Subianto និងដៃគូរបស់គាត់ Gibran Rakabuming Raka ក្នុងអំឡុងពេលយុទ្ធនាការបោះឆ្នោតប្រធានាធិបតីឆ្នាំ ២០២៤ ។

លោក Hashim Djojohadikusumo បានប្រកាសថា “អ្នកវិនិយោគបរទេសនឹងត្រូវបានបែងចែកសម្រាប់សាងសង់ផ្ទះចំនួន ១ លានខ្នង ខណៈដែលអចលនទ្រព្យដែលនៅសល់ចំនួន ២ លានខ្នងទៀតនឹងត្រូវបានបម្រុងទុកសម្រាប់អ្នកវិនិយោគក្នុងស្រុក”។ ផែនការសាងសង់ផ្ទះចំនួន ៣ លានខ្នងក្នុងមួយឆ្នាំរួមមានផ្ទះល្វែងចំនួន ១ លានខ្នងនៅក្នុងទីក្រុង និង ២ លានខ្នងទៀតនៅតំបន់ជនបទ។ លោក Hashim បានបន្តទៀតថា ការសាងសង់ផ្ទះចំនួន ២ លានខ្នងនៅក្នុងភូមិជារៀងរាល់ឆ្នាំ ត្រូវបានគេរំពឹងថានឹងបង្កើតឱកាសការងារជាច្រើននៅក្នុងតំបន់ទាំងនោះ។

ដូច្នេះកម្មវិធីនេះត្រូវបានគេរំពឹងថានឹងក្លាយជាដំណោះស្រាយដំធំមួយដើម្បីបំពេញតម្រូវការលំនៅដ្ឋាននាពេលបច្ចុប្បន្នរបស់ប្រជាជនក្នុងបរិបទនៃការខ្វះខាតផ្ទះរបស់ប្រទេសឥណ្ឌូនេស៊ីប្រហែល ១២.៧ លានខ្នងនៅទូទាំងប្រទេស។ យោងតាមស្ថិតិ ប្រជាជនក្រីក្ររាប់ពាន់នាក់នៅក្នុងប្រទេសអាស៊ីអាគ្នេយ៍មួយនេះ កំពុងរស់នៅក្នុងតំបន់ដែលមិនមានលក្ខខណ្ឌអប្បបរមាគ្រប់គ្រាន់ ដូចជាកង្វះទឹកស្អាត អគ្គិសនី និងអ៊ីនធឺណិត។

ហេតុនេះហើយកម្មវិធីសាងសង់ផ្ទះថ្មីជូនប្រជាពលរដ្ឋគឺជាកិច្ចខិតខំប្រឹងប្រែងមួយរបស់រដ្ឋាភិបាលថ្មីក្នុងការជួយដល់ប្រជាពលរដ្ឋដើម្បីរក្សាលំនឹងជីវិត។ គួរបញ្ជាក់ដែរថាលោក Prabowo Subianto បានចូលកាន់តំណែងជាប្រធានាធិបតីជាផ្លូវការនៅថ្ងៃទី ២០ ខែតុលា បន្ទាប់ពីបានឈ្នះការបោះឆ្នោតប្រធានាធិបតីឥណ្ឌូនេស៊ីកាលពីខែកុម្ភៈ ឆ្នាំ ២០២៤ កន្លងទៅ៕

ប្រទេសថៃ៖ ប្រទេសថៃដែលគេស្គាល់ថាជាប្រទេសកាន់សាសនាព្រះពុទ្ធ ៩៥% ស្រាប់តែមានបំណងចង់ក្លាយជាដឹកនាំឧស្សាហកម្មហាឡាល់ឈានមុខគេនៅលើសកលលោកទៅវិញ ដោយសារទីផ្សារអាហារមូស្លីមក្នុងប្រទេសនេះកំពុងរីកចម្រើនខ្លាំងគួរឱ្យកត់សម្គាល់។

យោងតាមសារព័ត៌មានបរទេស Nation Thailand បច្ចុប្បន្នប្រទេសថៃកំពុងផ្តោតលើផលិតផល និងសេវាកម្មហាឡាលជាច្រើន ដើម្បីប្រកួតប្រជែងជាមួយម៉ាឡេស៊ី ក្នុងការក្លាយជាមជ្ឈមណ្ឌលហាឡាលឈានមុខគេនៅលើសកលលោក។

ឧស្សាហកម្មហាឡាល់រួមមានផលិតផល និងសេវាកម្មជាច្រើនដូចជា អាហារ គ្រឿងសម្អាង ម៉ូដ និងទេសចរណ៍។ ជាមួយនឹងគោលដៅនៃការអភិវឌ្ឍន៍ឧស្សាហកម្មហាឡាល ក្រសួងឧស្សាហកម្មថៃបានបង្កើតមជ្ឈមណ្ឌលឧស្សាហកម្មហាឡាល់ប្រទេសថៃ (THIC) ដើម្បីសម្រេចបាននូវមហិច្ឆតារបស់ខ្លួន ធ្វើឱ្យប្រទេសនេះក្លាយជាប្រទេសឈានមុខគេក្នុងតំបន់ក្នុងការផលិត និងនាំចេញផលិតផលហាឡាល។

គោលដៅរបស់រដ្ឋាភិបាលថៃគឺដើម្បីលើកកម្ពស់ប្រទេសថៃឱ្យក្លាយជាមជ្ឈមណ្ឌលផលិតផលហាឡាល់នៅឆ្នាំ ២០២៨ ដោយផ្តោតលើប្រភេទផលិតផលចំនួន ៥ គឺ ម្ហូបអាហារ ម៉ូដ ឱសថ សេវាកម្ម និងការធ្វើដំណើរ ដោយជំរុញឱ្យមានការខិតខំប្រឹងប្រែងបន្ថែមទៀតដើម្បីប្រកួតប្រជែងជាមួយឧស្សាហកម្មហាឡាលរបស់ប្រទេសម៉ាឡេស៊ី។ ទោះជាយ៉ាងណាក៏ដោយ អ្នកជំនាញសេដ្ឋកិច្ចអន្តរជាតិ Aat Pisanwanich បាននិយាយថា បច្ចុប្បន្ននេះប្រទេសម៉ាឡេស៊ីនៅតែនាំមុខគេក្នុងឧស្សាហកម្មហាឡាល់។

ទោះបីជាម៉ាឡេស៊ីនៅនាំមុខគេក្នុងឧស្សាហកម្មហាឡាល់ក៏ដោយ ក៏ប្រទេសថៃនៅតែមានមហិច្ឆិតាចង់ក្លាយជាអ្នកដឹកនាំឧស្សាហកម្មហាឡាល់ឈានមុខគេនៅលើសកលលោកផងដែរ ដោយសារទីផ្សារអាហារមូស្លីមក្នុងប្រទេសនេះគឺកំពុងរីកចម្រើនយ៉ាងឆាប់រហ័ស។ លោក Aat Pisanwanich បាននិយាយថា “ភាពខ្លាំងរបស់ប្រទេសថៃស្ថិតគឺនៅក្នុងឧស្សាហកម្មម្ហូបអាហារ ភេសជ្ជៈ និងកសិកម្ម”។

គួរបញ្ជាក់ដែរថា តម្លៃនៃការនាំចេញផលិតផលអាហារហាឡាលរបស់ប្រទេសថៃក្នុងរយៈពេល ១១ ខែដំបូងនៃឆ្នាំ ២០២៣ មានចំនួន ២១៧ ពាន់លានបាត (ប្រមាណ ៥,៨៧ ពាន់លានដុល្លារអាមេរិក) កើនឡើង ២,៦% ធៀបនឹងរយៈពេលដូចគ្នាកាលពីឆ្នាំមុន។ ភាគច្រើននៃការនាំចេញទាំងនេះ ស្ថិតនៅក្រោមប្រភេទអាហារហាឡាល់ធម្មជាតិ រួមមានអង្ករ គ្រាប់ធញ្ញជាតិ និងអំពៅ។ ដូច្នេះបច្ចុប្បន្នប្រទេសថៃមានក្រុមហ៊ុនផលិតអាហារហាឡាល់ចំនួន ១៥.០៤៣ និងគ្រឹះស្ថានអាហារហាឡាល់ជាង ៣.៥០០ កន្លែងហើយ៕

ប្រទេសឡាវ ៖ កាលពីថ្ងៃទី១៩ ខែតុលា ឆ្នាំ២០២៤ HelloSafe គឺជាគេហទំព័រផ្នែកហិរញ្ញវត្ថុរបស់ប្រទេសកាណាដាលើកឡើងថា ឡាវ គឺជាប្រទេសដែលភ្ញៀវទេសចរចំណាយប្រាក់តិចបំផុតសម្រាប់ផ្នែកទេសចរណ៍នៅឆ្នាំ២០២៥ ក្នុងចំណោមប្រទេសចំនួន១៣៦ លើពិភពលោក ។

ការចំណាយប្រាក់ប្រចាំថ្ងៃរបស់ភ្ញៀវទេសចរបរទេសនៅប្រទេសឡាវ គឺស្មើត្រឹមតែ១០.៩៧ដុល្លារអាមេរិក បន្ទាប់មក គឺប្រទេសកាហ្សាក់ស្ថាន ស្មើនឹង១៥.៣៧ដុល្លារអាមេរិក ។ រីឯប្រទេស Rwanda និង Ghana ភ្ញៀវទេសចរបានចំណាយប្រាក់ប្រចាំថ្ងៃស្មើគ្នា គឺស្មើនឹង១៧.៥៦ដុល្លារអាមេរិក ខណៈការចំណាយប្រាក់នៅប្រទេសម៉ុងហ្គោលី គឺស្មើនឹង១៩.៧៤ដុល្លារអាមេរិក ។

ក្រៅពីនេះ ឡាវ, ម៉ុងហ្គោលី និងហ្សកហ្ស៊ី គឺជាប្រទេសដែលមានតម្លៃស្នាក់នៅក្នុងសណ្ឋាគារថោកបំផុតលើពិភពលោក គឺតម្លៃស្នាក់នៅក្នុងប្រទេសទាំង៣នេះ ស្មើចាប់ពី៦.៥៨ដុល្លារ ទៅ១៤.២៧ដុល្លារអាមេរិកក្នុង១យប់ ។

ចំណែកប្រទេសដែលមានការចាយវាយខ្ពស់បំផុតសម្រាប់ភ្ញៀវទេសចរបរទេស រួមមាន ៖ ប្រទេស Barbados ស្មើនឹង២៨៦.៤៤ដុល្លារអាមេរិកក្នុង១ថ្ងៃ បន្ទាប់មក គឺប្រទេស Antigua and Barbuda ស្មើនឹង២៦៧.៧៨ដុល្លារអាមេរិក ។ រីឯការចំណាយនៅប្រទេស Saint Kitts និង Nevis គឺស្មើនឹង២៣៥.៩៥ដុល្លារអាមេរិក ។

ទិន្នន័យនេះបានមកពីការដកស្រង់ការចំណាយប្រាក់របស់ភ្ញៀវទេសចរបរទេសដែលមកកម្សាន្តក្នុងប្រទេសនីមួយៗ រួមទាំងការចំណាយថ្លៃស្នាក់នៅ, អាហារហូបចុក និងការធ្វើដំណើរផងដែរ ។

យោងតាមទិន្នន័យរបស់ក្រសួងព័ត៌មាន វប្បធម៌ និងទេសចរណ៍ឡាវបញ្ជាក់ថា ក្នុងរយៈពេល៨ខែដើមឆ្នាំ២០២៤ ប្រទេសឡាវអាចទាក់ទាញភ្ញៀវទេសចរបរទេសបានចំនួន២លាន៦សែននាក់ ក្នុងនោះភ្ញៀវទេសចរថៃបានមកលេងឡាវច្រើនជាងគេ ។

រដ្ឋាភិបាលឡាវរំពឹងថា ឡាវនឹងទទួលបានភ្ញៀវទេសចរបរទេសកើនឡើងថែមទៀតនាថ្ងៃអនាគត ហើយនៅឆ្នាំ២០២៤នេះ ឡាវបានកំណត់គោលដៅទទួលភ្ញៀវទេសចរបរទេស យ៉ាងហោចណាស់ ស្មើនឹង៤លាន៦សែននាក់ និងទទួលបានចំណូលរហូតដល់១.៣០០លានដុល្លារអាមេរិក ៕

ប្រទេសអេហ្ស៊ីប ៖ កាលពីថ្ងៃទី១៧ ខែតុលា ឆ្នាំ២០២៤ សារព័ត៌មានបរទេសរាយការណ៍ថា វាបានធ្វើឱ្យអ្នកជិះ Glider (ស្រដៀងឆ័ត្រយោង) និងអ្នកលេងបណ្តាញសង្គមភ្ញាក់ផ្អើលយ៉ាងខ្លាំង នៅពេលឃើញសត្វឆ្កែ១ក្បាលអាចឡើងដល់កំពូលប្រាសាទពីរ៉ាមីតនៅប្រទេសអេហ្ស៊ីប ដែលប្រាសាទនេះមានកម្ពស់រហូតដល់ជាង១៤០ម៉ែត្រ ។

អ្នកជិះ Glider ម្នាក់ឈ្មោះ Alex Lang និងម្នាក់ទៀតឈ្មោះ Marshall Mosher ភ្ញាក់ផ្អើលយ៉ាងខ្លាំងពេលពួកគេឃើញសត្វឆ្កែ១ក្បាលនៅលើកំពូលប្រាសាទពីរ៉ាមីត ហើយពួកគេជឿថា អ្នកបានឃើញវីដេអូនេះក៏ភ្ញាក់ផ្អើលដែរ ។ ពួកគេប្រាប់ថា ពេលកំពុងជិះ Glider នៅផ្នែកខាងលើប្រាសាទពីរ៉ាមីត ស្រាប់តែឃើញឆ្កែដើរលេងលើកំពូលប្រាសាទ ។

លោក Alex Lang រៀបរាប់ថា ខ្លួនបានជិះ Glider នៅផ្នែកខាងលើកំពូលប្រាសាទពីរ៉ាមីត ប្រទេសអេហ្ស៊ីប កាលពីថ្ងៃទី១៤ ខែតុលា កន្លងមក ហើយបានថតវីដេអូឆ្កែ១ក្បាលកំពុងដើរលេងលើកំពូលប្រាសាទនេះ ។ វាបានព្រូសដាក់សត្វស្លាបនៅក្បែរនោះទៀតផង ។

វីដេអូសត្វឆ្កែលើកំពូលប្រាសាទពីរ៉ាមីតនេះ ត្រូវបានលោក Marshall Mosher យកមកបង្ហោះក្នុងបណ្តាញសង្គម ។ ប្រាសាទពីរ៉ាមីតដែលឆ្កែឡើងទៅដល់កំពូល គឺជាប្រាសាទពីរ៉ាមីតដ៏ធំបំផុតស្ថិតក្នុងទីក្រុងមេនហ្វីស និងជាប្រាសាទ១ ក្នុងចំណោមប្រាសាទអច្ឆរិយវត្ថុបុរាណទាំង៧ របស់អេហ្ស៊ីប ។

លោក Marshall Mosher និយាយថា ពលរដ្ឋរស់នៅក្បែរបរិវេណប្រាសាទប្រាប់ថា ឆ្កែនេះឈ្មោះ Nunya ។ បន្ទាប់មក លោកក៏សួរនៅក្នុងបណ្តាញសង្គមឈ្មោះ IG ថា ៖ «តើអ្នកគិតថា ឆ្កែដែលឡើងទៅលើកំពូលប្រាសាទពីរ៉ាមីត វារស់នៅទីនេះ មែនទេ?» ។

ចំណែកអ្នកលេងបណ្តាញសង្គមនិយាយបែបកំប្លែងថា បើឆ្កែឡើងទៅលើកំពូលប្រាសាទបែបនេះ វាមុខជាបន្ទោរបង់លើនោះមិនខាន ។ រីឯអ្នកលេងបណ្តាញសង្គមខ្លះទៀតឆ្ងល់ថា ហេតុអ្វីឆ្កែអាចឡើងដល់កំពូលប្រាសាទដ៏ខ្ពស់បាន?

នៅថ្ងៃបន្ទាប់ លោក Marshall Mosher ក៏ជិះ Glider ទៅកាន់កំពូលប្រាសាទពីរ៉ាមីតម្តងទៀតដើម្បីមើលថា តើឆ្កែនេះនៅលើកំពូលប្រាសាទទៀតដែរឬទេ? ប៉ុន្តែលោកពុំឃើញវាទេ ហើយលោកគិតថា វាអាចឡើង-ចុះប្រាសាទ ដោយខ្លួនវា ៕

ប្រទេសជប៉ុន ៖ បច្ចុប្បន្ន ប្រទេសជប៉ុនកំពុងប្រឈមនឹងបញ្ហាចំនួនកសិករធ្លាក់ចុះជាបន្តបន្ទាប់ ហើយកសិករជិតពាក់កណ្តាលនៅជប៉ុន គឺជាមនុស្សចាស់មានអាយុជាង៧០ឆ្នាំ ។ រីឯក្រុមយុវជននាំគ្នាទៅធ្វើការនៅតាមទីក្រុងធំៗ ប៉ុន្តែដោយសារចំនួនការនាំចូលអាហារខ្ពស់បំផុតគិតចាប់ពីឆ្នាំ១៩៦០ បានធ្វើឱ្យរដ្ឋាភិបាលជប៉ុនបច្ចុប្បន្នមើលឃើញពីបញ្ហាខ្វះខាតអាហារ នាថ្ងៃអនាគត ។

រដ្ឋាភិបាលជប៉ុនបានរកឃើញដំណោះស្រាយមួយ ហើយក៏ចាប់ផ្តើមអនុវត្តវា គឺលើកទឹកចិត្តឱ្យយុវជនសម័យថ្មីចង់ត្រឡប់មកស្រុកកំណើត ដើម្បីប្រកបរបរកសិកម្មបន្តពីឪពុក-ម្តាយ ឬចាប់ផ្តើមធ្វើកសិកម្មដោយខ្លួនឯង ។ គេបានចាប់ផ្តើមឃើញភាពជោគជ័យរបស់រដ្ឋាភិបាលជប៉ុន នៅទីក្រុង Niseko ខេត្តហុកកៃដូ ដែលបានបណ្តុះគំនិតកូនសិស្សឱ្យចង់ក្លាយជាកសិករ តាំងពីពួកគេរៀនថ្នាក់អនុវិទ្យាល័យ ។

កូនសិស្សថ្នាក់អនុវិទ្យាល័យនៅទីក្រុង Niseko បានចេះពីវិធីសាស្ត្រដាំដុះបន្លែ និងផ្លែឈើ ដោយចាប់ផ្តើមពីការបណ្តុះគ្រាប់ និងរកទីផ្សារលក់ដោយខ្លួនឯង ។ ពេលបន្លែទទួលផល កូនសិស្សទាំងនេះពុំត្រឹមតែដាក់លក់ក្នុងសាលាឱ្យកូនសិស្សគ្នាឯងទិញទេ ប៉ុន្តែពួកគេក៏បានលក់បន្លែក្នុងផ្សារក្រៅសាលារៀន និងលក់តាមអនឡាញផងដែរ ។

លើសពីនេះ បើពួកគេចង់រៀនផ្នែកកសិកម្មបន្តនៅសាកលវិទ្យាល័យ គឺទីក្រុង Niseko នឹងផ្តល់ប្រាក់ឧបត្ថម្ភការសិក្សារហូតដល់ពួកគេបញ្ចប់ការសិក្សានៅសាកលវិទ្យាល័យរយៈពេល៤ឆ្នាំ គឺកូនសិស្សម្នាក់នឹងទទួលបានប្រាក់ឧបត្ថម្ភ ចំនួន៣លានយ៉េនក្នុង១ឆ្នាំ ហើយពុំចាំបាច់សងប្រាក់នេះទៅទីក្រុង Niseko វិញទេ ។ ពេលកូនសិស្សរៀនចប់សាកលវិទ្យាល័យផ្នែកកសិកម្ម ទីក្រុងនេះនឹងផ្តល់ប្រាក់ឧបត្ថម្ភបន្ថែមទៀត ចំនួន១លានយ៉េន ឱ្យពួកគេចាប់ផ្តើមប្រកបរបរកសិកម្ម និងទិញម៉ាស៊ីន ឬឧបករណ៍កសិកម្ម ។

បើនិស្សិតចាប់អារម្មណ៍រៀនពីបច្ចេកទេសកសិកម្ម, ការចាប់ផ្តើមមុខរបរកសិកម្ម និងរកទីផ្សារលក់ទិន្នផលកសិកម្ម ទីក្រុង Niseko នឹងផ្តល់ប្រាក់ឧបត្ថម្ភចំនួន២សែនយ៉េន សម្រាប់១ផ្នែក ។ លើសពីនេះ បើម្ចាស់ចម្ការ ឬកសិដ្ឋានណាទទួលឱ្យនិស្សិតមកហ្វឹកហាត់ការងារតាមគម្រោងរបស់រដ្ឋាភិបាល គឺរដ្ឋាភិបាលនឹងជួយចេញថ្លៃនិស្សិតហ្វឹកហាត់ការងារ ចំនួន២ម៉ឺនយ៉េនក្នុង១ឆ្នាំសម្រាប់និស្សិតម្នាក់ ។

ចំណែកនិស្សិតដែលបានឆ្លងកាត់ការហ្វឹកហាត់ការងារតាមគម្រោងនេះ ពួកគេនឹងទទួលបានលិខិតបញ្ជាក់ពីអភិបាលខេត្ត ។ ហេតុនេះ ជប៉ុននឹងទទួលបានប្រយោជន៍ចំនួន៣ផ្នែក គឺ ៖ ទទួលបានអ្នកធ្វើការផ្នែកកសិកម្មយកថ្លៃឈ្នួលទាប, រដ្ឋាភិបាលទទួលបានយុវជនសម័យថ្មីធ្វើការផ្នែកកសិកម្ម ហើយនិស្សិតក៏បានរៀនសូត្រពីជំនាញ និងបទពិសោធន៍ ។

ពេលនិស្សិតចាប់យកមុខរបរកសិកម្ម និងទទួលបានទិន្នផលដំណាំហើយ គឺរដ្ឋាភិបាលនឹងបង្កើតផ្សារទំនើបនៅកណ្តាលក្រុង សម្រាប់ឱ្យកសិករលក់បន្លែ-ផ្លែឈើមកផ្ញើលក់នៅទីនេះ ។ កសិករពុំចាំបាច់ឆ្លងកាត់ឈ្មួញកណ្តាល ឬពុំអង្គុយលក់បន្លែ-ផ្លែឈើដោយខ្លួនឯងទេ ពីព្រោះរដ្ឋាភិបាលបានបង្កើតអ្វីៗគ្រប់យ៉ាងសម្រាប់កសិកររួចហើយ ។

កសិករគ្រាន់តែសរសេរពីចំនួនបន្លែ-ផ្លែឈើរបស់ខ្លួន រួចហើយយកទៅឱ្យផ្សារទំនើប ។ ផ្សារទំនើបនឹងផ្តល់ស្ទិកឃ៍របញ្ជាក់ពីតម្លៃបន្លែ-ផ្លែឈើទៅឱ្យកសិករ ដើម្បីឱ្យកសិករយកទៅបិទលើបន្លែ-ផ្លែឈើរបស់ខ្លួន រួចហើយផ្ញើឱ្យផ្សារទំនើបជួយលក់ឱ្យ ។ ប្រាក់ទទួលបានពីការលក់បន្លែ-ផ្លែឈើ ផ្សារទំនើបនឹងផ្ញើចូលកុងធនាគារកសិករដោយស្វ័យប្រវត្តិ ។ រីឯថ្លៃជួលបុគ្គលិក និងការថែទាំផ្សារទំនើប គឺជាការទទួលខុសត្រូវរបស់រដ្ឋាភិបាល ។

ក្រៅពីនេះ រដ្ឋាភិបាលនឹងជួយផ្សព្វផ្សាយពីចម្ការរបស់កសិករផងដែរ ដូចជា ៖ ផ្សព្វផ្សាយក្នុងទស្សនាវដ្តីចែកចាយនៅស្ថានីយរថភ្លើង, បិទស្លាកសញ្ញានៅតាមកម្មវិធីលក់ទិន្នផលកសិកម្ម រួមទាំងផ្សាយក្នុងបណ្តាញសង្គម ។ រដ្ឋាភិបាលនឹងបង្កើតកម្មវិធីបបួលអតិថិជនទៅដើរកម្សាន្ត និងទិញបន្លែ-ផ្លែឈើក្នុងចម្ការកសិករ ។

វិធីសាស្ត្ររបស់រដ្ឋាភិបាលជប៉ុន ចាប់ពីដើមទី រហូតដល់សម្រេចគោលដៅ បានធ្វើឱ្យយុវជនសម័យថ្មីងាកមកចាប់អារម្មណ៍ប្រកបរបរកសិកម្មកាន់តែច្រើន ។ ពេលយុវជនចាប់ផ្តើមការងារកសិកម្ម គឺរដ្ឋាភិបាលនឹងផ្តល់ប្រាក់ឧបត្ថម្ភជាបន្តបន្ទាប់ និងជួយដោះស្រាយបញ្ហាផ្សេងៗរបស់កសិករ ។ វាពុំមែនជាការជួយកសិករឱ្យមានប្រាក់ចំណូលត្រឹម១ថ្ងៃទេ ប៉ុន្តែជាការជួយកសិករឱ្យមានពេលវេលាអភិវឌ្ឍន៍ទិន្នផលកសិកម្មដើម្បីបង្កើនតម្លៃ និងទទួលបានចំណូលខ្ពស់ពីមុខរបរកសិកម្ម ៕

ប្រទេសហ្វាំងឡង់ ៖ Icon of The Seas គឺជាកប៉ាល់ទេសចរណ៍ដ៏ធំបំផុតលើពិភពលោក និងធំជាងកប៉ាល់ទីតានិក រហូតដល់៥ដង ។ នៅផ្នែកខាងក្នុងកប៉ាល់នេះពោរពេញទៅដោយភាពប្រណីត, ការកម្សាន្តយ៉ាងរីករាយ និងបានផ្តល់ភាពងាយស្រួលគ្រប់យ៉ាងសម្រាប់មនុស្សគ្រប់វ័យ រហូតដល់ភ្ញៀវទេសចរទិញសំបុត្រជិះកប៉ាល់សរសើរពុំដាច់ពីមាត់ ។

កប៉ាល់ទេសចរណ៍ Icon of The Seas គឺជារបស់ក្រុមហ៊ុន Royal Caribean Group និងផលិតឡើងនៅកន្លែងផលិតកប៉ាល់មួយក្នុងទីក្រុងតឺគូ ប្រទេសហ្វាំងឡង់ ។ កប៉ាល់នេះត្រូវបានផលិតរួចរាល់នៅខែធ្នូ ឆ្នាំ២០២២ និងចំណាយប្រាក់អស់ចំនួន១.៧៩០លានដុល្លារអាមេរិក ។

កប៉ាល់ទេសចរណ៍បានបើកបរលើទឹកលើកដំបូង ដោយធ្វើដំណើរចាកចេញពីកំពង់ផែម៉ៃអាមី កាលពីខែមករា ឆ្នាំ២០២៤ ។ កប៉ាល់នេះមានប្រវែង៣៦៥ម៉ែត្រ, កម្ពស់២០ជាន់ និងអាចដឹកភ្ញៀវទេសចរបានច្រើនបំផុត រហូតដល់៧.៦០០នាក់ ។ កប៉ាល់អាចបើកបរដោយប្រើប្រាស់ឧស្ម័នធម្មជាតិ LNG ហើយវាបានបំភាយឧស្ម័នកាបូនឌីអុកស៊ីតតិចជាងកប៉ាល់ប្រេងឥន្ធនៈ ។

ក្រុមហ៊ុន Royal Caribean Group អះអាងថា កប៉ាល់នេះអាចសន្សំសំចៃថាមពលច្រើនជាងការកំណត់របស់អង្គការដែនសមុទ្រអន្តរជាតិ សម្រាប់កប៉ាល់ទំនើបរហូតដល់២៤% ។ ក្រៅពីការសន្សំសំចៃថាមពល វាជាកប៉ាល់សម្រាប់ការកម្សាន្ត និងជាកន្លែងសម្រាកលំហែកាយផ្តល់ភាពងាយស្រួលគ្រប់បែបយ៉ាង ។ កប៉ាល់នេះមានកន្លែងលេងទឹកធំជាងកប៉ាល់ទេសចរណ៍ផ្សេងៗ ដែលមានឈ្មោះថា «Thrill Island» ។

ក្រៅពីនេះ នៅលើកប៉ាល់ក៏មានកន្លែងជិះស្គីទឹកកក ឈ្មោះថា «Absolute Zero» ដែលមានទំហំធំជាងកន្លែងជិះស្គីទឹកកករបស់កប៉ាល់ទេសចរណ៍ផ្សេងៗ សម្រាប់ឱ្យភ្ញៀវទេសចរជិះស្គី និងការសម្តែងជិះស្គីឱ្យភ្ញៀវទេសចរទស្សនា ។

កប៉ាល់នេះនៅមានចំណុចទាក់ទាញជាច្រើនទៀតដែលភ្ញៀវទេសចរពុំគួរមើលរំលង ដូចជា ៖ បន្ទប់កញ្ចក់ខ្នាតធំឈ្មោះ «AquaDome» ស្ថិតនៅលើក្បាលកប៉ាល់ ដែលមានទឹកជ្រោះសិប្បនិម្មិតខ្ពស់បំផុត បើធៀបនឹងកប៉ាល់ទេសចរណ៍ល្បីៗលើពិភពលោក ។ រីឯបន្ទប់ឈ្មោះ «Royal Promenade» បានបង្ហាញពីស្ថាបត្យកម្មឈ្មោះ «The Pearl» នៅកណ្តាលបន្ទប់ ។

កប៉ាល់ Icon of The Seas មានទីវាលសម្រាប់ឱ្យភ្ញៀវទេសចរអង្គុយលេងស្រូបខ្យល់អាកាស ឈ្មោះ «The Hideaway» ដែលបរិយាកាសនៅទីនេះដូចគ្នានឹងមាត់សមុទ្រ ។ រីឯអាងហែលទឹកលើកប៉ាល់វិញ គឺភ្ញៀវទេសចរអាចជ្រើសរើសអាងហែលទឹក ចំនួន៧ប្រភេទ ហើយបើភ្ញៀវទេសចរចង់បរិភោគអាហារ និងនឿយហត់ដោយសារការលេងទឹក ឬទស្សនាសិល្បៈ កប៉ាល់នេះក៏មានភោជនីយដ្ឋាន និងក្លិប រហូតដល់ជាង៤០កន្លែងសម្រាប់ភ្ញៀវផងដែរ ។

នៅលើកប៉ាល់មានទាំង Walking Street និងរោងភាពយន្តទៀតផង រីឯតម្លៃសំបុត្រជិះកប៉ាល់ទេសចរណ៍យក្សនេះ គឺចាប់ពី១.៧៥៧ដុល្លារ ទៅ២.៦៩៦ដុល្លារអាមេរិកក្នុងម្នាក់ ។ ប៉ុន្តែបើក្នុងពេលបុណ្យទានផ្សេងៗ គឺតម្លៃសំបុត្រស្មើនឹង៥.២៧២ដុល្លារអាមេរិកក្នុងម្នាក់ ៕