ថៃចាប់ផ្ដើម​សាងសង់របងនៅខេត្តច័ន្ទថាបុរី ដើម្បីកំណត់ខណ្ឌសីមាព្រំដែនរវាងថៃនិងកម្ពុជា

ខណៈបញ្ហាខ្សែបន្ទាត់ព្រំដែនគោករវាងកម្ពុជា-ថៃត្រូវបានជាប់គាំង ​ កងទ័ពថៃនៅពេលនេះបានចាប់ផ្តើមសាងសង់របងសន្តិសុខជាផ្លូវការនៅតាមព្រំដែនថៃ-កម្ពុជាត្រង់ចន្លោះបង្គោលលេខ ៥២ និង ៥៤ ក្នុងខេត្តច័ន្ទថាបុរី ជាប់ខេត្តបាត់ដំបងរបស់កម្ពុជា ដោយមានគោលបំណងពង្រឹងសន្តិសុខព្រំដែន និងបង្កើនសុវត្ថិភាពសម្រាប់ប្រជាជនក្នុងតំបន់។
 
យោងតាមការចុះផ្សាយរបស់កាសែត Khaosod នារសៀលថ្ងៃចន្ទ ទី១១ ខែឧសភា ឆ្នាំ២០២៦ នេះ របងថ្មីកំពុងត្រូវបានសាងសង់ជាមួយ​គ្រឹះបេតុងអាមេ និងបន្ទះបេតុងដែលស្មិតស្រាប់ កម្ពស់ ១៥០ សង់ទីម៉ែត្រ រួមជាមួយសំណាញ់ដែក  ដែលមានកម្ពស់សរុបប្រហែល ១៧០ សង់ទីម៉ែត្រ នឹងត្រូវបានដំឡើងត្រង់​ចន្លោះបង្គោលព្រំដែនលេខ ៥២ និង ៥៤ លាតសន្ធឹងប្រវែង ១,៣១០ ម៉ែត្រជាប់នឹងព្រំប្រទល់ស្រុកកំរៀង ខេត្តបាត់ដំបង។​
 
ប្រភពដដែលបានបន្ថែមថា ទាហានកម្ពុជាមួយចំនួនបានតាមដាន និងថតរូបការងារសាងសង់ ប៉ុន្តែអាជ្ញាធរថៃបានទទូចថា គម្រោងនេះកំពុងត្រូវបានអនុវត្តទាំងស្រុងនៅក្នុងទឹកដីថៃ ហើយស្ថិតនៅក្រោមសិទ្ធិអធិបតេយ្យភាពរបស់ប្រទេសថៃក្នុងការគ្រប់គ្រងតំបន់ព្រំដែនរបស់ខ្លួន។ ការសាងសង់ដំណាក់កាលទីមួយបានចាប់ផ្តើមនៅចុងខែមេសា ហើយត្រូវបានគេរំពឹងថានឹងបញ្ចប់ក្នុងរយៈពេល ៤៥ ថ្ងៃ។
 
សូមជម្រាបថា ចំណុចចន្លោះបង្គោលព្រំដែនលេខ ៥២ និង ៥៤ គឺជាតំបន់ដែលភាគីទាំងពីរ (កម្ពុជា និងថៃ) បានឯកភាពគ្នាជាផ្លូវដោយគណៈកម្មការព្រំដែនចម្រុះ (JBC) កាលពីខែមីនា ឆ្នាំ២០០៨ ហើយបានបោះបង្គោលបណ្តោះអាសន្នរួចរាល់កាលពីចុងខែវិច្ឆិកា ឆ្នាំ២០២៥ កន្លងទៅ។ ទោះជាយ៉ាងណា កម្ពុជានៅតែបន្តតាមដានយ៉ាងយកចិត្តទុកដាក់ ដើម្បីធានាថាការសាងសង់របង និងផ្លូវល្បាតស្របគ្នានោះ មិនរំកិលចូលមកក្នុងទឹកដីកម្ពុជាសូម្បីតែមួយមីលីម៉ែត្រ។
 
កន្លងមកក្រសួងការបរទេសកម្ពុជាបានផ្ញើ កំណត់ទូតតវ៉ា (https://mfaic.gov.kh/publish/files/uploads/RTTXXCX3HBAE/Updates%20on%20Border%20situation_31%20Aug%2025.pdf) ប្រឆាំងនឹងការសាងសង់ឯកតោភាគីណាមួយដែលរំលោភលើអនុស្សរណៈនៃការយោគយល់គ្នា (MoU 2000) និងបានសង្កត់ធ្ងន់ថា ព្រំដែនមិនអាចកែប្រែបានដោយការប្រើកម្លាំងឡើយ។

បន្ថែមលើនោះ កម្ពុជាបានជំរុញឱ្យភាគីថៃបញ្ជូនក្រុមការងារបច្ចេកទេសចម្រុះ (JBC) ដើម្បី ចុះទៅពិនិត្យ និងកំណត់ទីតាំងបង្គោលព្រំដែន (https://www.facebook.com/khmertimes/posts/a-well-informed-source-has-provided-a-public-clarification-regarding-plans-repor/976295061407074/) ឱ្យបានច្បាស់លាស់មុននឹងធ្វើការសាងសង់ ដើម្បីជៀសវាងការរំលោភចូលទឹកដីគ្នាទៅវិញទៅមក៕