ក្នុងថ្ងៃទិវាអ្នកម្តាយ វណ្ណដា បានធ្វើរឿងយ៉ាងល្អសម្រាប់អ្នកមានគុណ

នៅពេលថ្មីៗនេះគេបានឃើញវត្តមានប៉ាម៉ាក់របស់ វណ្ណដា បានចូលរួមការប្រគំតន្រ្តីរបស់កូនប្រុសនៅឯរាជធានីភ្នំពេញ។ ក្រោយមកតារារ៉េបរូបនេះបានបង្ហាញពីវីដេអូសុំពរជ័យឱ្យអ្នកមានគុណស្រោយទឹក និងបានបំពេញតួនាទីជាកូនល្អនាំម៉ាក់ទៅវិបស្សនាចំនួន១០ថ្ងៃ។

ក្នុងថ្ងៃទិវាអ្នកម្តាយ វណ្ណដា បានចែករំលែកជីវិតរបស់ខ្លួននៅលើ Story ដោយបង្ហាញវីដេអូមួយកំពុងត្រូវបានឪពុកម្តាយស្រោចទឹកឱ្យដោយលោកបានភ្ជាប់មកជាមួយនឹងចំណងជើងថា «ព្រះរស់ក្បែរកូន»។ បន្ទាប់មកទៀត វណ្ណដា បានបង្ហាញក្តីស្រលាញ់ចំពោះម្តាយជាមួយរូបថតរបស់គាត់កំពុងតែសើចសប្បាយ ទទួលអាហារជាមួយគ្នា។ វណ្ណដា ក៏បានបញ្ជាក់ទៀថាលោកបានជូនម៉ាក់មកវិបស្សនាចំនួន១០ថ្ងៃហើយនេះក៏ជាលើកទី៧របស់គាត់។

មានការចែករំលែកបន្ថែមទៀតថាមិនត្រឹមតែ វណ្ណដា ប៉ុណ្ណោះទេដែលជូនអ្នកម្តាយមកវិបស្សនាគេបានឃើញក្រុមការងារក៏ដូចជា រ៉េត ស៊ូហ្សាណា នរិទ្ធ មានវត្តមាននៅទីនោះជាមួយគ្នាផងដែរ។ រូបភាពមួយទៀត វណ្ណដា ក៏បាននាំឪពុករបស់ខ្លួនទៅមើលសំលៀកបំណាក់ក្នុងហាងមួយជាមួយគ្នាផងដែរ។

បន្ទាប់ពីអ្នកគាំទ្រឃើញបែបនេះហើយពួកគេបានបង្ហាញសេចក្តីជ្រះថ្លាយ៉ាងខ្លាំងចំពោះគ្រួសាររបស់ វណ្ណដា ដែលតែងតែបង្ហាញក្តីស្រលាញ់ចំពោះគ្នានិងជ្រះថ្លាក្នុងការធ្វើបុណ្យ។ ជាក់ស្តែងដូចជា វណ្ណដា ផ្ទាល់ទោះបីទើបបញ្ចប់ការប្រគំតន្រ្តីឬមានកិច្ចការមមាញឹកយ៉ាងណាលោកតែងតែឆ្លៀតពេលសម្រាប់អ្នកមានគុណជានិច្ច។ ចំណែកឯអ្នកមានគុណតារារ៉េបរូបនេះតែងតែមកផ្តល់កម្លាំងចិត្តនិងឈរនៅពីក្រោយភាពជោគជ័យរបស់កូនប្រុស៕