ថ្មីៗនេះទស្សនិកជនបានជ្រាបខ្លះៗមកហើយពីតារាចម្រៀងអ្នកនាង សុគន្ធ និសា ចាកចេញពីទ្រនំរស្មីហង្សមាសបន្ទាប់ពីឃើញអក្សរបញ្ជាក់នៅលើបណ្តាញសង្គមជាតារាចម្រៀងឯករាជ្យ។ ទោះបីមិនបន្តសកម្មភាពក្រោមការគ្រប់គ្រងរបស់ផលិតកម្មទៀត ប៉ុន្តែគេបានឃើញតារាចម្រៀងអ្នកនាង ឱក សុគន្ធកញ្ញា លោក ណុប បាយ៉ារិទ្ធ អ្នកនាង ពេជ្រ សោភា បានបង្ហាញការគាំទ្រដល់អ្នកនាង សុគន្ធ និសា។
តារាចម្រៀង សុគន្ធ និសា បានប្រកាសកាលពីយប់ថ្ងៃទី១៦ ខែតុលា នឹងចេញបទចម្រៀង «ពេលខ្ញុំដួល អ្នកនៅឯណា?» នៅលើឆាណែលយូធូបរបស់ខ្លួននាថ្ងៃទី១ ខែវិច្ឆិកា នេះ។ នេះគឺជាបទចម្រៀងដំបូងរបស់តារាចម្រៀងរូបនេះបន្ទាប់ពីធ្លាយដំណឹងថាចាកចេញពីផលិតកម្មរស្មីហង្សមាស មកធ្វើជាតារាចម្រៀងឯករាជ្យវិញ។
ទោះបីជាចាកចេញពីក្រុមហ៊ុនតែមួយហើយពិតមែនប៉ុន្តែអ្នកគាំទ្របានឃើញកំពូលតារាចម្រៀង ឱក សុគន្ធកញ្ញា បានបង្ហាញការគាំទ្រចំពោះអ្នកនាង និសា ក្នុងដំណើរថ្មីនេះ។ អ្នកនាង ឱក សុគន្ធកញ្ញា គឺបានចែករំលែកការប្រកាសរបស់អ្នកនាង សុគន្ធ និសា ក្នុងការចេញបទថ្មីរបស់ខ្លួន។ 
ក្រៅពីតារាចម្រៀងរូបនេះ លោក ណុប បាយ៉ារិទ្ធ ក៏បានបង្ហាញការគាំទ្រដោយបានចែករំលែកបន្តនិងបានដាក់ខ្លឹមសារថា «Love u អូន អ្នកណាបោះបង់យើងក៏មិនសំខាន់ សំខាន់កុំបោះបង់ខ្លួនឯង Sokun Nisa»។ ក្នុងនោះដែរ អ្នកគាំទ្រក៏បានឃើញតារាចម្រៀង ពេជ្រ សោភា បង្ហាញការគាំទ្រអ្នកនាង សុគន្ធ និសា ដូចគ្នា។
បន្ថែមពីតារាចម្រៀងល្បី៣ដួងខាងលើ ពិធីការិនី កែវ ចាន់និមល កញ្ញា ណាក់ ស្រីណា លោក ករុណា ពេជ្រ រួមទាំងអ្នកគាំទ្រ គឺបង្ហាញការគាំទ្រចំពោះស្នាដៃថ្មីរបស់តារាចម្រៀង ឯករាជ្យ សុគន្ធ និសា។
គួរបញ្ជាក់ថាអាជីពសិល្បៈរយៈពេល២២ឆ្នាំមកនេះ អ្នកនាង សុគន្ធ និសា បានធ្វើឱ្យមហាជនស្គាល់តាមរយៈស្នាដៃជាច្រើនដោយបានឆ្លងកាត់ផលិតកម្មដូចជា រស្មីស្ទឹងសង្កែ ស្ប៉ាក ផលិតកម្មរស្មីហង្សមាស ថោន និងចុងក្រោយនេះជាតារាចម្រៀងឯករាជ្យ៕
