ចប់និយាយតែម្ដង! តែយ៉ាងៗនេះមិនដឹងថារស់បាន ៥០ឆ្នាំទៀតឬអត់ទេ ដោយថ្មីៗនេះអាជ្ញាធរវៀតណាម នៅខេត្តហ៊ុងយ៉េន បានរកឃើញសាច់ប៉ាតេ និងសាច់ក្រករាប់ពាន់ដុំដែលសុទ្ធតែមានផ្ទុកនូវសារធាតុបូរ៉ាក់ក្នុងបរិមាណយ៉ាងច្រើនលើសលប់ កំពុងត្រូវគេបានរៀបចំសម្រាប់បញ្ចេញលក់ក្នុងឱកាសបុណ្យចូលឆ្នាំចិន។

យោងតាមការចេញផ្សាយរបស់សារព័ត៌មាន VNExpress នៅថ្ងៃទី១៥ ខែកុម្ភៈ នាយកដ្ឋានប៉ូលិសសេដ្ឋកិច្ចនៃប៉ូលិសខេត្តហ៊ុងយ៉េន សម្រេចចោទប្រកាន់បុគ្គល ២នាក់គឺ អ្នកស្រី Do Thi Huyen និងកូនប្រុសឈ្មោះ Nguyen Van Truong ពីបទរំលោភលើបទប្បញ្ញត្តិស្តីពីសុវត្ថិភាពចំណីអាហារ។

អាជ្ញាធរបានចុះត្រួតពិនិត្យអាជីវកម្មផលិតសាច់ប៉ាតេគ្រប់ប្រភេទរបស់អ្នកស្រី Do Thi Huyen ដែលមានទីតាំងនៅផ្សារលក់ដុំដុងតាវ ក្នុងទីក្រុងហាណូយ ប្រទេសវៀតណាមរកឃើញសាច់ប៉ាតេធ្វើពីសាច់ជ្រូក និងផលិតផលសាច់កែច្នៃជាច្រើនប្រភេទ ដោយមានការច្រោះសាច់ ការកិនសាច់ ការស្ងោរ ចំហុយ និងការវេចខ្ចប់សម្រាប់ដាក់លក់នៅលើទីផ្សារ។

ក្រុមការងារជំនាញបានធ្វើតេស្តរហ័សលើគំរូផលិតផលនៅនឹងកន្លែង និងបានរកឃើញថា គំរូចំនួន ៦ ក្នុងចំណោម ១២ គំរូ នៃផលិតផលសាច់ទាំងនោះ វិជ្ជមានទៅលើសារធាតុបូរ៉ាក់ដែលជាសារធាតុហាមឃាត់។ ផលិតផលដែលតេស្តឃើញសារធាតុគីមីទាំងនោះរួមមានប៉ាតេសាច់ជ្រូក ហតដក ប៉ាតេឆ្អឹងខ្ចី ប៉ាតេសាច់មាន់ សាច់ក្រកគោ និង សាច់ជ្រូកកិន។

អាជ្ញាធរបានរកឃើញផលិតផលសម្រេចមួយចំនួនធំដែលត្រៀមចែកចាយលើទីផ្សារ រួមមាន ប៉ាតេជ្រូកចំនួន ៧៥០; ហតដកចំនួន ៧២០ ថង់; ប៉ាតេឆ្អឹងខ្ចីចំនួន ១៣០ ថង់; ប៉ាតេសាច់មាន់ចំនួន ៣០ដុំ; សាច់ក្រកគោចំនួន ១,៤២០ រុំដោយស្លឹកឈើ; និងសាច់ក្រកឆៅចំនួន ១៥០ គីឡូក្រាម។

អាជ្ញាធរ បានរឹបអូសវត្ថុធាតុដើម រួមទាំងសារធាតុបូរ៉ាក់ និងឧបករណ៍ជាច្រើនដែលប្រើប្រាស់ក្នុងការកែច្នៃ។ អ្នកស្រី Do Thi Huyen បានសារភាពថា ទំនិញសម្រេចទាំងអស់ត្រូវបានផលិតឡើងដោយប្រើវត្ថុធាតុដើម និងសារធាតុបន្ថែម (រួមទាំងសារធាតុបូរ៉ាក់) ដែលអ្នកស្រីបានទិញដោយខ្លួនឯងប្រើក្នុងសាច់ប៉ាតេ និងលក់វាទៅឱ្យទីផ្សារនៅក្នុងខេត្ត និងខេត្តជិតខាង។

គួរជម្រាបថា បូរ៉ាក់ (Borax) ជាសារធាតុគីមីម្យ៉ាង ដែលបង្កើតឡើងពីសារធាតុរ៉ែធម្មជាតិឈ្មោះ សូដ្យូមបូរ៉ាត សម្រាប់ប្រើជាសារធាតុសម្អាត គ្រឿងសម្អាង និងថ្នាំសម្លាប់សត្វល្អិត។ ប៉ុន្តែត្រូវបានហាមឃាត់មិនឱ្យប្រើលើចំណីអាហារឡើយ ព្រោះអាចប៉ះពាល់ដល់សុខភាព និងអាយុជីវិត៕

នៅទីបំផុត ពលរដ្ឋវៀតណាមនឹងអាចប្រើប្រាស់សេវាអ៊ីនធើរណេត Starlink របស់លោក Elon Musk នៅទូទាំងប្រទេសហើយ ដែលជាដំណឹងដ៏រីករាយយ៉ាងសម្រាប់អ្នករស់នៅជនបទ ខណៈបណ្តាប្រទេសនៅតំបន់អាស៊ីអាគ្នេយ៍មើលឃើញថា គឺជាភាពប៉ិនប្រសប់ និងឆ្លាតវៃប្រកបដោយចក្ខុវិស័យវែងឆ្ងាយរបស់ថ្នាក់ដឹកនាំប្រទេសមួយនេះ ។

តាមការចុះផ្សាយរបស់សារព័ត៌មានវៀតណាមកាលពីថ្ងៃទី១៥ ខែកុម្ភៈ ឆ្នាំ២០២៦ ការិយាល័យគ្រប់គ្រងប្រេកង់វិទ្យុជាតិវៀតណាមបានចេញសេចក្តីប្រកាសអនុញ្ញាតឱ្យក្រុមហ៊ុន Starlink ដែលជាសាខាក្រុមហ៊ុន SpaceX របស់លោក Elon Musk ផ្តល់សេវាអ៊ីនធើរណេតតាមផ្កាយរណបនៅប្រទេសវៀតណាមនៅឆ្នាំនេះ ។

ក្រុមហ៊ុន Starlink Services Vietnam ជាសាខានៅវៀតណាមទទួលបានការអនុញ្ញាតក្នុងការដំឡើងស្ថានីយដំណាក់កាលដំបូង ចំនួន៤កន្លែង ព្រមទាំងអាចចែកចាយសេវាអ៊ីនធើរណេតទៅកាន់ឧបករណ៍ទទួលសេវាអ៊ីនធើរណេត រហូតដល់៦សែនកន្លែងនៅទូទាំងប្រទេស ។

រដ្ឋាភិបាលវៀតណាមបានផ្តល់អាជ្ញាប័ណ្ណឱ្យក្រុមហ៊ុន Starlink ដោយកំណត់ឱ្យក្រុមហ៊ុនធានាថា មិនរំខានដល់បណ្តាញទំនាក់ទំនងវិទ្យុនៅវៀតណាម ។ រដ្ឋាភិបាលវៀតណាមចាត់ទុកការផ្តល់សេវាអ៊ីនធើរណេតរបស់ក្រុមហ៊ុន Starlink នឹងជួយពង្រីកបណ្តាញអ៊ីនធើរណេតគ្របដណ្តប់ដល់តំបន់ដាច់ស្រយាល និងតំបន់ភ្នំ ដែលមិនទាន់មានបណ្តាញអ៊ីនធើរណេតក្នុងស្រុក ។

ទោះជាបច្ចុប្បន្ន ពលរដ្ឋវៀតណាមបានប្រើប្រាស់អ៊ីនធើរណេតរហូតដល់៨០% ក្នុងចំណោមពលរដ្ឋ១០០លាននាក់ ប៉ុន្តែនៅតំបន់ជនបទពុំទាន់មានសេវាអ៊ីនធើរណេតគ្រប់គ្រាន់ទេ ហើយការផ្តល់សេវាអ៊ីនធើរណេតរបស់ Starlink នៅវៀតណាមត្រូវបានពលរដ្ឋអបអរយ៉ាងខ្លាំងដើម្បីឱ្យការប្រើប្រាស់ទូលំទូលាយជាងមុន ។

វត្តមានសេវាអ៊ីនធើរណេតរបស់ Starlink ស្របពេលវៀតណាមកំពុងចរចាកិច្ចព្រមព្រៀងពាណិជ្ជកម្មជាមួយអាមេរិក បន្ទាប់ពីរដ្ឋាភិបាលអាមេរិកយកពន្ធទំនិញវៀតណាមក្នុងអត្រា២០% កាលពីឆ្នាំ២០២៥ ។ ប្រទេសទាំងពីរទើបបញ្ចប់ការចរចាពាណិជ្ជកម្មលើកទី៦ នាពេលថ្មីៗនេះ ប៉ុន្តែពុំទានសម្រេចបានកិច្ចព្រមព្រៀងនៅឡើយទេ ។

កាលពីឆ្នាំ២០២៥ វៀតណាមនៅតែរក្សាកំណើនសេដ្ឋកិច្ចរបស់ខ្លួនរហូតដល់៨% ទោះជាអាមេរិកដំឡើងពន្ធទំនិញក្តី ដែលមតិភាគច្រើនបារម្ភពីការដំឡើងពន្ធរបស់អាមេរិកប៉ះពាល់ដល់ការនាំចេញទំនិញវៀតណាម ។ ទោះយ៉ាងណា នៅឆ្នាំ២០២៦ រដ្ឋាភិបាលវៀតណាមបានកំណត់គោលដៅកំណើនសេដ្ឋកិច្ចលើសនេះទ្វេដង ។

គួរបញ្ជាក់ថា មេដឹកនាំកំពូលវៀតណាមនឹងចូលរួមកិច្ចប្រជុំក្រុមប្រឹក្សាសន្តិភាព (Board of Peace) នៅទីក្រុងវ៉ាស៊ីនតោនលើកដំបូងនាថ្ងៃទី១៩ ខែកុម្ភៈ ក្រោមការដឹកនាំរបស់ប្រធានាធិបតីអាមេរិក លោក Donald Trump ដើម្បីពង្រឹងកិច្ចសហការពាណិជ្ជកម្មបន្ថែមទៀត ៕

ប្រទេសថៃ គឺជាទីតាំងការឆបោ.កអនឡាញ និងជួញដូរមនុស្សដ៏ធំបំផុតលើពិភពលោក និងកំពុងប្រឈមការកើនឡើងការឆបោ.កអនឡាញ បើទោះជាសមត្ថកិច្ចថៃព្យាយាមបង្ក្រាបជាបន្តបន្ទាប់ ប៉ុន្តែបទល្មើសអនឡាញនៅតែមិនថយចុះ ។ នៅថ្ងៃទី១៦ ខែកុម្ភៈ ឆ្នាំ២០២៦ សមត្ថកិច្ចថៃបានចា.ប់ខ្លួនក្រុមឆបោ.កអនឡាញរហូតដល់១០នាក់ ក្នុងនោះមានជ.នជាតិថៃ៣នាក់ ដែលរួមគ្នាប្រព្រឹត្តបទល្មើសនៅខេត្តឈុនបុរី ។

តាមការចុះផ្សាយរបស់សារព័ត៌មាន Khaosod នៅថ្ងៃទី១៦ ខែកុម្ភៈ ឆ្នាំ២០២៦ ជ.នជាតិចិនចំនួន៧នាក់ដែលសមត្ថកិច្ចថៃចាប់ខ្លួន គឺជាក្រុមឆបោ.កតាមអនឡាញរត់ពីប្រទេសមីយ៉ាន់ម៉ា ចូលមកម៉ាឡេស៊ី និងឆ្លងដែនចូលទឹកដីថៃ ដោយសម្ងំលាក់ខ្លួនក្នុងភូមិគ្រឹះមួយកន្លែងនៅខេត្តឈុនបុរី ហើយការចាប់ខ្លួននេះដែរ បន្ទាប់ពីសមត្ថកិច្ចប្រមូលភស្តុតាងគ្រប់គ្រាន់ ។

បន្ទាប់ពីមីយ៉ាន់ម៉ាបង្ក្រាបទីតាំងប្រតិបត្តិការ ពួកគេក៏ឆ្លងដែនចូលម៉ាឡេស៊ី រួចហើយចូលទឹកដីថៃ ដោយយកភូមិគ្រឹះនៅខេត្តឈុនបុរី ធ្វើជាទីតាំងប្រតិបត្តិការ ។ ក្រោយការសាកសួរអ្នកជិតខាង ឱ្យដឹងថា ជារៀងរាល់សប្តាហ៍ ជាពិសេស ថ្ងៃឈប់សម្រាក មានជនជាតិចិនជាច្រើននាក់បានមកប្រមូលផ្តុំគ្នាក្នុងភូមិគ្រឹះដើម្បីប្រជុំពីការងារឆបោកអនឡាញ ទើបសមត្ថកិច្ចសម្រេចចិត្តតាមដានសកម្មភាពពួកគេអស់រយៈពេល៣ថ្ងៃ ដោយការជួលភូមិគ្រឹះនៅក្បែរគ្នា ។

សមត្ថកិច្ចសង្កេតឃើញមានរថយន្តជាច្រើនគ្រឿង និងស្បែកជើងជាច្រើនគូនៅខាងមុខភូមិគ្រឹះដែលក្រុមឆបោកអនឡាញស្នាក់នៅ ទើបសន្និដ្ឋានជាការណាត់គ្នាមកប្រជុំរបស់សមាជិកក្រុមឆបោកអនឡាញ ។ ហេតុនេះ សមត្ថកិច្ចក៏បានឡោមព័ទ្ធភូមិគ្រឹះ និងចូលចាប់ខ្លួនក្រុមជនល្មើសចំនួន១០នាក់ ក្នុងនោះមានជនជាតិចិន៧នាក់ និងស្ត្រីថៃ ៣នាក់ ដោយឱ្យជនជាតិទាំងអស់បង្ហាញលិខិតឆ្លងដែន ឃើញថា ពួកគេធ្វើដំណើរចូលប្រទេសថៃក្នុងថ្ងៃតែមួយ ជើងហោះហើរតែមួយ ។

ក្រុមឆបោកអនឡាញបានប្រើប្រាស់បន្ទប់នានាក្នុងភូមិគ្រឹះធ្វើជាទីតាំងឆបោក ដោយមានកុំព្យូទ័រសម្រាប់ប្រើប្រាស់សរសេរជាភាសាចិនបង្ហាញពីប្រាក់ចំណូល និងការបែងចែកផលប្រយោជន៍គ្នាដោយខុសច្បាប់ ហើយពួកគេប្រើប្រាស់ឈ្មោះក្លែងក្លាយ ។

ជនជាតិចិន៦នាក់ ក្នុងចំណោម៧នាក់ សុទ្ធតែមានឈ្មោះក្នុងបញ្ជីហាមឃាត់ការធ្វើដំណើរឆ្លងប្រទេស ។ សមត្ថកិច្ចថៃសម្រេចបន្តឃុំខ្លួនពួកគេដើម្បីចាត់វិធានការតាមច្បាប់បន្តទៀត មុននឹងបណ្តេញចេញពីប្រទេសថៃ ដោយចោទប្រកាន់ប្រព្រឹត្តបទល្មើសព្រហ្មទណ្ឌ ពីព្រោះបានបង្កើតទីតាំងឆបោកអនឡាញ បោកប្រាស់ជនជាតិចិនដូចគ្នា ។ សមត្ថកិច្ចថៃបានរឹបអូសកុំព្យូទ័រ និងទូរស័ព្ទទាំងអស់ដែលពួកគេប្រើប្រាស់ក្នុងភូមិគ្រឹះខេត្តឈុនបុរី ដើម្បីស៊ើបអង្កេតរបស់ជនពាក់ព័ន្ធបន្ថែមទៀត ។

គួរបញ្ជាក់ថា រដ្ឋាភិបាល និងកងទ័ពថៃ ព្យាយាមលាបពណ៌កម្ពុជា គឺជាទីតាំងឆបោកអនឡាញ (Online Scams) ដើម្បីយកលេសធ្វើសង្គ្រាមឈ្លានពានកម្ពុជាកាលពីឆ្នាំ២០២៥ ខណៈប្រទេសថៃខ្លួនឯង គឺជាទីតាំងឆបោកអនឡាញដ៏ធំលើពិភពលោក និងជាទីតាំងចាប់ជំរិតជនបរទេស ។ ភ្ញៀវទេសចរ ជាពិសេស ភ្ញៀវទេសចរចិនខ្លាចមិនហ៊ានមកលេងថៃ បន្ទាប់ពីតារាចិនត្រូវបានជួញដូរនៅថៃទៅមីយ៉ាន់ម៉ា ។

កន្លងមក អង្គការសហប្រជាជាតិ (UN) បានផ្ញើលិខិតទៅកាន់រដ្ឋាភិបាលថៃ ដើម្បីឱ្យបកស្រាយលម្អិតជុំវិញការឆបោកអនឡាញ និង ជួញដូរមនុស្សនៅថៃ ដែលលិខិតរបស់ UN ទាមទារឱ្យរដ្ឋាភិបាលក្រុងបាងកកបកស្រាយលម្អិតពាក់ព័ន្ធបញ្ងាមួយចំនួន រួមមាន ៖ គោលជំហររបស់រដ្ឋាភិបាលថៃជុំវិញការចោទប្រកាន់ពីបញ្ហាជួញដូរមនុស្ស និងឧក្រិដ្ឋកម្មឆបោកអនឡាញ, ចំណាត់ការទ្វេភាគី/ពហុភាគី, បញ្ហាប្រឈមក្នុងការកំណត់អត្តសញ្ញាណជនរងគ្រោះ, ការទប់ស្កាត់កុំឱ្យប្រើប្រាស់ធនធានក្នុងផ្លូវខុស, ចំណាត់ការឆ្លើយតបថ្នាក់តំបន់ និងថ្នាក់ជាតិ និងការការពារសាធារណជនកុំឱ្យក្លាយជាជនរងគ្រោះ ៕

ប្រសិនបើយើងសម្លឹងមើលភពផែនដីពីទីអវកាស យើងនឹងឃើញពណ៌ខៀវស្រងាត់ដែលគ្របដណ្តប់ ៧១% ស្ទើរតែទាំងស្រុងនៃភពមួយនេះ។ ផ្ទៃទឹកដ៏មហិមាទាំងនេះមិនត្រឹមតែជាជម្រកនៃជីវិតរាប់លានប្រភេទប៉ុណ្ណោះទេ ប៉ុន្តែវាក៏ជាព្រំប្រទល់ធម្មជាតិដ៏អស្ចារ្យដែលបានខណ្ឌចែកដីគោកឱ្យក្លាយជាទ្វីបផ្សេងៗពីគ្នា បង្កើតបានជាអត្តសញ្ញាណភូមិសាស្ត្រដាច់ដោយឡែកពីគ្នាផងដែរ។

ចាប់ផ្តើមដំបូងគេបង្អស់គឺ មហាសមុទ្រប៉ាស៊ីហ្វិក(Pacific Ocean) ដែលជាស្ដេចនៃផ្ទៃទឹកទាំងអស់។ វាមានទំហំធំធេងរហូតដល់អាចផ្ទុកទ្វីបទាំងអស់បញ្ចូលគ្នាបានយ៉ាងងាយ។ មហាសមុទ្រមួយនេះដើរតួជាអ្នកខណ្ឌចែកយ៉ាងដាច់ស្រឡះរវាងពិភពលោកចាស់គឺទ្វីបអាស៊ី និងទ្វីបអូសេអានី បង្កើតបានជាទ្វីបថ្មី គឺទ្វីបអាមេរិកទាំងខាងជើង និងខាងត្បូង។ នៅពេលដែលព្រះអាទិត្យរៀបលិចនៅឆ្នេរនៃទ្វីបអាមេរិក វាគឺជាពេលដែលពន្លឺព្រឹកព្រាងៗចាប់ផ្តើមរះឡើងនៅឆ្នេរនៃទ្វីបអាស៊ី ដែលនេះសបញ្ជាក់ពីឥទ្ធិពលដ៏មហិមារបស់វាចំពោះពេលវេលា និងចម្ងាយផ្លូវដ៏សែនឆ្ងាយ។

បន្ទាប់មកទៀត យើងសម្លឹងទៅកាន់ មហាសមុទ្រអាត្លង់ទិក(Atlantic Ocean) ដែលមានរាងដូចអក្សរ “S” លាតសន្ធឹងពីប៉ូលខាងជើងរហូតដល់ប៉ូលខាងត្បូង។ មហាសមុទ្រនេះគឺជាស្ពានសេដ្ឋកិច្ច និងប្រវត្តិសាស្ត្រដ៏សំខាន់បំផុត ដោយវាបានខណ្ឌចែកទ្វីបអឺរ៉ុប និងទ្វីបអាហ្វ្រិកឱ្យនៅដាច់ពីទ្វីបអាមេរិក។ រាប់សតវត្សមកហើយ អាត្លង់ទិកបានក្លាយជាសមរភូមិនៃរលកយក្ស និងជាផ្លូវនាវាចរណ៍ដែលផ្សារភ្ជាប់វប្បធម៌រវាងពិភពលោកខាងលិច និងខាងកើត។ ទោះបីជាវាមានភាពកាចសាហាវក្នុងរដូវព្យុះភ្លៀង ប៉ុន្តែវាគឺជាខ្សែជីវិតដែលជួយឱ្យការដោះដូរពាណិជ្ជកម្មរវាងទ្វីបទាំងនេះដំណើរការទៅមុខជានិច្ច។

ដោយឡែក បើយើងធ្វើដំណើរទៅកាន់តំបន់ត្រូពិក យើងនឹងជួបជាមួយ មហាសមុទ្រឥណ្ឌា(Indian Ocean) ដែលជាមហាសមុទ្រមានសីតុណ្ហភាពក្តៅជាងគេបំផុត។ វាស្ថិតនៅចន្លោះទ្វីបអាហ្វ្រិកខាងកើត ទ្វីបអាស៊ីភាគខាងត្បូង និងទ្វីបអូស្ត្រាលី។ មហាសមុទ្រឥណ្ឌាមិនត្រឹមតែខណ្ឌចែកទ្វីបទាំងនេះប៉ុណ្ណោះទេ ប៉ុន្តែវាក៏ជាកន្លែងដែលផ្តល់នូវប្រព័ន្ធខ្យល់មូសុងដ៏សំខាន់សម្រាប់កសិកម្ម និងជីវភាពរស់នៅរបស់មនុស្សរាប់ពាន់លាននាក់នៅក្នុងតំបន់អាស៊ីអាគ្នេយ៍ និងអាស៊ីខាងត្បូងផងដែរ។

ងាកមកមើលតំបន់ដែលត្រជាក់ខ្លាំងបំផុតវិញ យើងមាន មហាសមុទ្រអាកទិក(Arctic Ocean) នៅប៉ូលខាងជើង និង មហាសមុទ្រខាងត្បូង(Southern Ocean) នៅប៉ូលខាងត្បូង។ មហាសមុទ្រអាកទិកព័ទ្ធជុំវិញដោយដែនដីនៃទ្វីបអាមេរិកខាងជើង អឺរ៉ុប និងអាស៊ី ដោយបង្កើតបានជាដំបូលទឹកកកនៃពិភពលោក។ ចំណែកឯមហាសមុទ្រខាងត្បូងវិញ វាគឺជាខ្សែទឹកដ៏ត្រជាក់ដែលព័ទ្ធជុំវិញទ្វីបអង់តាក់ទិកឱ្យនៅឯកោពីទ្វីបដទៃទៀត ដែលនេះធ្វើឱ្យទ្វីបទឹកកកមួយនេះរក្សាបាននូវអាថ៌កំបាំង និងបរិស្ថានដ៏បរិសុទ្ធរបស់វា។

ជារួមមក មហាសមុទ្រនីមួយៗមិនមែនគ្រាន់តែជាផ្ទៃទឹកដែលរារាំងផ្លូវដើររបស់មនុស្សនោះទេ ប៉ុន្តែវាគឺជាបេះដូងនៃភពផែនដីដែលកំណត់នូវអាកាសធាតុ ព្រំដែនប្រទេស និងវប្បធម៌នៃទ្វីបនីមួយៗ។ ការយល់ដឹងពីមហាសមុទ្រ គឺជាការយល់ដឹងពីទំនាក់ទំនងដ៏ស្អិតរមួតរវាងដី និងទឹក ដែលធ្វើឱ្យជីវិតនៅលើភពដ៏ស្រស់ស្អាតមួយនេះមានតុល្យភាពរហូតមកដល់សព្វថ្ងៃ៕

នៅក្នុងកម្មវិធីរាត្រីសមោសរអបអរសាទរបុណ្យចូលឆ្នាំថ្មីប្រពៃណីចិន (Spring Festival Gala) ឆ្នាំ ២០២៦ មហាជនទូទាំងពិភពលោកបានស្រឡាំងកាំងនឹងទស្សនីយភាពដែលមិនធ្លាប់មានពីមុនមក។ នោះគឺការរួមដៃគ្នារវាង ក្រុមមនុស្សយន្ត (Humanoid Robots) ដ៏ទំនើប និង យុវជនអ្នកហាត់ក្បាច់គុណ ក្នុងការសម្តែងក្បាច់គុណចិនដ៏រស់រវើក និងមានឥទ្ធិពលបំផុតនៅលើឆាកកណ្តាលក្រុងប៉េកាំង។ នេះបើតាម CNN ។

អ្វីដែលធ្វើឱ្យការសម្តែងនេះខុសប្លែកពីធម្មតា គឺភាពស៊ីសង្វាក់គ្នាឥតខ្ចោះ។ មនុស្សយន្តទាំងនោះមិនមែនគ្រាន់តែធ្វើចលនារឹងៗតាមម៉ាស៊ីនឡើយ ប៉ុន្តែពួកវាបានបង្ហាញនូវកម្លាំងចេញពីក្នុងខ្លួន ដូចទៅនឹងគ្រូក្បាច់គុណពិតៗ។

រាល់ចលនាបត់បែន ការលោតហក់ ទាត់ធាក់ និងការដាក់ជំហរយ៉ាងរឹងមាំ គឺធ្វើឡើងស្របគ្នាជាមួយដៃគូជាមនុស្ស ហាក់បីដូចជាគ្រឿងម៉ាស៊ីនទាំងនោះមានវិញ្ញាណ និងយល់ដឹងពីសិល្បៈដូនតាដូច្នេះដែរ។

នេះជាលទ្ធផលនៃការប្រើប្រាស់បច្ចេកវិទ្យា AI ចុងក្រោយបង្អស់របស់ចិន ដែលអនុញ្ញាតឱ្យមនុស្សយន្តធ្វើត្រាប់តាមចលនាដ៏ស្មុគស្មាញបំផុតរបស់ក្បាច់គុណវូស៊ូ (Wushu) ដោយមិនមានការទាក់ទើឡើយ។ នេះបង្ហាញថា ក្នុងយុគសម័យថ្មី បច្ចេកវិទ្យាមិនមែនមកដើម្បីលុបបំបាត់ប្រពៃណីនោះទេ ប៉ុន្តែវាគឺជាកម្លាំងជំនួយ ដែលជួយលើកតម្កើងវប្បធម៌ឱ្យកាន់តែអស្ចារ្យ និងមានភាពច្នៃប្រឌិត។

សំឡេងវាយស្គរ បូករួមនឹងចលនាដ៏រហ័សរហួនរបស់មនុស្សដែកមានវិញ្ញាណនេះ បានបង្កើតជាបរិយាកាសមួយដែលធ្វើឱ្យអ្នកទស្សនាមិនហ៊ានសូម្បីតែព្រិចភ្នែក។ ការសម្តែងនេះបានបន្សល់ទុកនូវសារយ៉ាងជ្រាលជ្រៅមួយថានៅពេលដែលបេះដូងនៃសិល្បៈបុរាណ ជួបនឹងភាពវៃឆ្លាតនៃបច្ចេកវិទ្យាអនាគត លទ្ធផលដែលទទួលបានគឺភាពអស្ចារ្យដែលគ្មានដែនកំណត់៕