អ្នកមានបញ្ហាគេងមិនលក់រយៈពេលយូរ កុំភ្លេចសាកល្បងវិធីសាស្រ្តថ្មីនេះ

តើអ្នកធ្លាប់ប្រើវិធីសាស្រ្តគ្រប់បែបយ៉ាង ហើយនៅតែមិនអាចគេងលក់មែនទេ បើអញ្ចឹង មកសាកដោះស្រាយវាតាមវិធីនេះ ព្រោះអ្នកប្រហែលជាមិនចាំបាច់ចំណាយលុយទិញថ្នាំពេទ្យលេបឡើយ ប៉ុន្តែស្ថិតលើ កុងតាក់ភ្លើង ក្នុងបន្ទប់ទឹករបស់អ្នកទៅវិញនោះទេ។

យោងតាមការសិក្សារបស់អ្នកវិទ្យាសាស្ត្រផ្នែកដំណេក ពន្លឺភ្លឺច្បាស់នៅក្នុងបន្ទប់ទឹកប្រៀបដូចជា កាហ្វេមួយកែវ សម្រាប់ខួរក្បាលរបស់អ្នក នៅពេលភ្នែកប៉ះនឹងពន្លឺខ្លាំងពេក វាបង្អាក់ការផលិត មេឡាតូនីន (Melatonin) ដែលជាអរម៉ូន សញ្ញាងងឹត ប្រាប់រាងកាយថាដល់ពេលសម្រាកហើយ។ ជាទូទៅ បន្ទប់ទឹកជាកន្លែងដែលភ្លឺបំផុតក្នុងផ្ទះ ការនៅក្រោមពន្លឺនេះត្រឹមតែ ៣០ នាទីមុនចូលគេង អាចធ្វើឱ្យរាងកាយភ្ញាក់រលឹក និងកាត់បន្ថយកម្រិតមេឡាតូនីនយ៉ាងគំហុក។ ការងូតទឹកងងឹត (Dark Showering) គឺជាការបិទភ្លើង ឬប្រើពន្លឺតិចៗ ដូចជាពន្លឺទៀន ដើម្បីបញ្ជូនសញ្ញាទៅប្រព័ន្ធសរសៃប្រសាទឱ្យប្តូរពីស្ថានភាព តានតឹង មកជា សម្រាក និងរំលាយអាហារ វិញ។

ការសិក្សាក្នុងឆ្នាំ ២០១៩ បង្ហាញថា ការងូតទឹកក្តៅឧណ្ហៗ ពី ១ ទៅ ២ ម៉ោងមុនចូលគេង គឺជាមធ្យោបាយដ៏ល្អមួយ។ ទឹកក្តៅធ្វើឱ្យសរសៃឈាមរីកធំ បន្ទាប់មកសីតុណ្ហភាពស្នូលនៃរាងកាយនឹងធ្លាក់ចុះបន្តិចម្តងៗ ការធ្លាក់ចុះសីតុណ្ហភាពនេះហើយ ដែលជាសញ្ញាធម្មជាតិប្រាប់ខួរក្បាលថា ដល់ពេលគេងហើយ។ ដូចនេះ អ្នកដែលងូតទឹកក្តៅឧណ្ហៗ ក្នុងភាពងងឹត មិនត្រឹមតែគេងលក់លឿនជាងមុនប៉ុណ្ណោះទេ ប៉ុន្តែថែមទាំងមានគុណភាពដំណេកកាន់តែស្កប់ស្កល់ជាងមុនទៀតផង។

នេះមិនមែនត្រឹមតែជាការលាងសម្អាតខ្លួនឡើយ ប៉ុន្តែវាបានក្លាយជា Everything Shower ដែលជាពិធីថែរក្សាខ្លួនឯង។ ការងូតទឹកក្នុងពន្លឺតិចៗជួយឱ្យ កាត់បន្ថយភាពតានតឹងពីការប្រើប្រាស់អេក្រង់ (Blue light) ពេញមួយថ្ងៃ បង្កើតបរិយាកាសស្ងប់ស្ងាត់ បង្កើនភាពស្និទ្ធស្នាលជាមួយខ្លួនឯង ឬដៃគូ ហើយដូចជាការរៀបចំផ្លូវចិត្តឱ្យរួចរាល់សម្រាប់ការសម្រាកដោយគ្មានការរំខានផងដែរ។

ដូចនេះប្រសិនបើអ្នកជាមនុស្សដែលពិបាកគេង ឬគេងមិនស្កប់ស្កល់ ហើយប្រើគ្រប់វិធីសាស្រ្តដែលធ្វើឲ្យឆាប់គេងលក់ហើយ នៅតែមិនមានប្រសិទ្ធភាព អ្នកអាចប្ដូរមកសាកវិធីងាយៗខាងលើនេះបាន ព្រោះអ្នកមិនចាំបាច់ចំណាយប្រាក់ទិញថ្នាំលេប ដែលអាចប៉ះពាល់សុខភាពនៅពេលប្រើប្រាស់រយៈពេលវែងនោះឡើយ។ យ៉ាងណាមិញ គួរប្រុងប្រយ័ត្ន បើបន្ទប់ទឹកងងឹតពេក អ្នកអាចនឹងជំពប់ជើង ឬរអិលដួល។ គួរប្រើភ្លើងរាត្រី (Night light) តូចៗ ឬទៀនក្រអូប ដើម្បីសុវត្ថិភាព៕