នៅក្នុងជំនឿចិន លេខ៤ ត្រូវបានចាត់ទុកជាលេខអពមង្គលបំផុត ដល់ថ្នាក់ជនជាតិចិនតែងចៀសវាងលេខនេះក្នុងការរស់នៅប្រចាំថ្ងៃ ដូចជាការលុបបំបាត់ជាន់ទី៤ ក្នុងជណ្តើរយន្ត, ចៀសវាងផ្ទះលេខ៤ ,លេខទូរស័ព្ទ ឬសូម្បីតែការរៀបចំកម្មវិធីពិសេសណាមួយក៏ពួកគេរំលងថ្ងៃទី៤ដែរ។ តើនេះបណ្ដាលមកពីមូលហេតុអ្វី?
យោងតាមក្នុងក្បួនហុងស៊ុយ លេខអាចនាំសំណាង ក៏អាចនាំស៊យ ប្រសិនជ្រើសរើសប្រើមិនត្រឹមត្រូវ។ ខណៈប្រទេសជាច្រើនចាត់ទុកលេខ ៤ ជាលេខសំណាង នៅក្នុងប្រទេសចិនឯណោះវិញ លេខនេះជាលេខចង្រៃបំផុត ឬលេខស្លាប់ទៅវិញ ។
មូលហេតុដែលវា ត្រូវបានចាត់ទុកថាជាលេខអពមង្គលបំផុតក្នុងវប្បធម៌ចិន គឺដោយសារតែវាមានសំឡេងអានស្រដៀងនឹងពាក្យ សឺ(sǐ) ដែលមាន័យថា «ស្លាប់ ។ ដោយសារតែការភ័យខ្លាចចំពោះលេខនេះ អគារខ្ពស់ៗជាច្រើននៅចិន ហុងកុង និងតៃវ៉ាន់ តែងតែរំលងជាន់ទី៤ ចោល ដូចជាជាន់ទី ១៤ ឬ ២៤ ដែលវាស្រដៀងទៅនឹងជំនឿរបស់បស្ចិមប្រទេសដែលរំលងជាន់ទី១៣ ដែរ។
បន្ថែមពីនេះ នៅក្នុងតំបន់ប្រើភាសាកាតាំងដូចជាហុងកុង លេខ ១៤ ក៏ត្រូវបានគេជៀសវាងដែរ ព្រោះការបញ្ចេញសំឡេងរបស់វាស្ដាប់ទៅដូចជាឃ្លាថា នឹងត្រូវស្លាប់ជាមិនខាន។ ហេតុនេះហើយ ទើបលេខទាំងនេះមិនដែលត្រូវបានគេយកមកប្រើក្នុងកម្មវិធីមង្គលការ ឬកម្មវិធីផ្សេងៗឡើយ។
ក្រៅពីលេខ៤ លេខ ៣ ក៏ត្រូវបានគេចាត់ទុកថាជាលេខមិនសូវល្អផងដែរ ប៉ុន្តែអាស្រ័យលើស្ថានភាព និងការប្រើប្រាស់។ យ៉ាងណាក្ដី ប្រសិនជូនអំណោយដល់មិត្តភក្តិ ឬគូស្វាមីភរិយា គេកម្រប្រើលេខ ៣ ភ្ជាប់ជាមួយអំណោយនោះខ្លាំងណាស់ ព្រោះសំឡេងរបស់វា ស្រដៀងនឹងពាក្យដែលមានន័យថា “ចែកផ្លូវ” ឬ “បែកបាក់” ៕
