ពិធីបុណ្យក្បាច់គុនសៅលីញវូស៊ូអន្តរជាតិ លើកទី១៣ និងកម្មវិធីគុនល្បុក្កតោ កម្ពុជា-ហឺណាន ដែលនឹងមានការសំដែងរួមគ្នាក្បាច់គុនល្បុក្កតោកម្ពុជា និងក្បាច់គុន សៅលីញវូស៊ូ បាននឹងកំពុងប្រព្រឹត្តិទៅនៅឯបរិវេណព្រះវិហារវត្ត Shaolin ស្ថិតក្នុងខេត្តហឺណាន ប្រទេសចិន។

យោងតាមការចុះផ្សាយរបស់មន្ទីរទេសចរណ៍កាលពីពេលថ្មីៗនេះបានគូសបញ្ជាក់ថា «សូមស្វាគមន៍មកកាន់ព្រឹត្តិការណ៍ពិធីបុណ្យក្បាច់គុណសៅលីញវូស៊ូអន្តរជាតិលើកទី ១៣ នៅទីក្រុងចឹងចូវ ខេត្តហឺណាន សាធារណរដ្ឋប្រជាមានិតចិន ចាប់ពីថ្ងៃទី ១៨ ដល់ថ្ងៃទី ២០ ខែតុលា ឆ្នាំ ២០២៤។ ពិធីបុណ្យនេះនឹងមានការសម្តែងរួមគ្នារវាងក្បាច់គុនល្បុក្កតោកម្ពុជា និងក្បាច់គុនសៅលីងវូស៊ូផងដែរ»។

ព្រឹត្តិការណ៍នេះ នឹងមានការចូលរួមពីថ្នាក់ដឹកនាំក្រសួង ស្ថាប័នពាក់ព័ន្ធ សមាគមទេសចរណ៍ និងវប្បធម៌ ផ្នែកឯកជន កីឡាករ ក្បាច់គុនចម្រុះ និងកីឡាករក្បាច់គុនសៅលីញវូស៊ូ មកពីប្រទេសចិន ប្រទេសក្នុងតំបន់និងពិភពលោកសរុបប្រមាណជាង ១២០០នាក់។

តាមរយៈព្រឹត្តិការណ៍នេះគឺជាឱកាសក្នុងការផ្សព្វផ្សាយអំពីក្បាច់គុនល្បុក្កតោកម្ពុជា វឌ្ឍនភាពទេសចរណ៍កម្ពុជា ការពង្រឹងកិច្ចសហប្រតិបត្តិការទ្វេភាគី និងពង្រីក កិច្ចសហប្រតិបត្តិការជាមួយរដ្ឋបាលខេត្តហឺណាន និងជំរុញការផ្សព្វផ្សាយយុទ្ធនាការ «ទស្សនាសៀមរាប ឆ្នាំ២០២៤- ជាពិសេសបន្តជំរុញការអនុវត្ត “ឆ្នាំនៃការផ្លាស់ប្តូរប្រជាជននិងប្រជាជន កម្ពុជា-ចិន ២០២៤- ឱ្យកាន់តែទូលំទូលាយទៅកាន់ទីផ្សារចិន និងអន្តរជាតិ។

គួរបញ្ជាក់ផងដែរថា កាលពីថ្ងៃទី២៤ ខែមេសា ឆ្នាំ២០២៤កន្លងទៅនេះ ជំនួបរវាងក្បាច់គុនសៅលីញនិងក្បាច់គុនល្បុក្កតោ បានកើតឡើងម្តងរួចទៅហើយនៅលើទឹកដីខេត្តសៀមរាបនៃប្រទេសកម្ពុជា តាមរយៈ «ព្រឹត្តិការណ៍ពិព័រណ៍វប្បធម៌ទេសចរណ៍ និងព្រឹត្តិការណ៍ When Shaolin Meets Bokator At Angkor» ហើយក៏ទទួលបាននូវការគាំទ្រយ៉ាងច្រើនកុះករផងដែរ៕

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសផ្ដល់គោលការណ៍ឱ្យបង្កើនយកចិត្តទុកដាក់ចំពោះយោធិនចូលនិវត្តន៍ឡើងវិញ ជាពិសេសសម្រាប់យោធិនដែលដល់អាយុចូលនិវត្តន៍ ប៉ុន្ដែនៅក្មេងនៅមានកម្លាំង គឺសូមឱ្យផ្អាកការចូលនិវត្តន៍សិន។

ថ្លែក្នុងឱកាសអបអរសាទរខួបអនុស្សាវរីយ៍លើកទី៣០ នៃថ្ងៃបង្កើតកងពលតូចលេខ៧០ សម្ដេចបវរធិបតី បានមានប្រសាសន៍ថា៖” ក្នុងរយៈពេលប៉ុន្មានឆ្នាំនេះយើងមិនមានការជ្រើសរើសទ័ពថ្មី ដោយសារបញ្ហាថវិកាជាតិ បញ្ហាក្រោយកូវីដ និងត្រូវបំពេញទៅលើចំណាយផ្សេងៗច្រើន នេះជាហេតុធ្វើឱ្យចំនួនកងទ័ពអ្នកដែលចូលនិវត្តន៍ច្រើនជាងកងទ័ពដែលបំពេញមកវិញ។ ដូច្នេះខ្ញុំសូមផ្តល់គោលការណ៍ចំពោះយោធិនដែលមានជំនាញចាំបាច់ និងមានសុខភាពល្អ គឺត្រូវរក្សាការកាន់តួនាទីសិន ព្រោះយើងកំពុងខ្វះនាយទាហានជំនាញច្រើន ដើម្បីបន្សំានិងបណ្តុះបណ្តាលអ្នកបន្តវេនជំនាញសមត្ថភាពការងារ”។

គួរបញ្ជាក់ថា ការចូលនិវត្តន៍ត្រូវបានបែងចែកជាពីរប្រភេទគឺ ការចូលនិវត្តន៍របស់យោធិន នៃកងយោធពលខេមរភូមិន្ទ និងការចូលនិវត្តន៏របសមន្ត្រីនគរបាលជាតិ។

ការចូលនិវត្តន៍ កំណត់តាមឋានន្តរស័ក្តិ ដោយឋានន្តរស័ក្តិពលបាលត្រី ត្រូវចូលនិវត្តន៍នៅអាយុ ៣៨ឆ្នាំ ខណៈឋានន្តរស័ក្តិវរសេនីយ៍ឯក ឬវរនាវីឯកឡើងទៅ ត្រូវចូលនិវត្តន៍នៅពេលដល់អាយុ ៦០ឆ្នាំ៕

 

ទំនប់អាងទឹកចំនួនបី ដែលមានសមត្ថភាពស្តុកទឹកជាង១២លាន​ម៉ែត្រគូបនៅខេត្តមណ្ឌលគិរីជាខេត្តភាគ ថ្មីៗនេះ រដ្ឋបាលខេត្តមណ្ឌលគិរី បានដាក់​ឱ្យប្រើប្រាស់ ទំនប់អាងទឹកចំនួនបី ​ដើម្បីប្រើ​ប្រាស់ជាពហុវិស័យបម្រើដល់ការលើកកម្ពស់ជីវភាពប្រជាជន និងកំណើនសេដ្ឋកិច្ចពនៅទីនោះ។

ទំនប់អាងទឹកចំនួនបីនេះ មានសមត្ថភាពស្តុកទឹកជាង១២លាន​ម៉ែត្រគូប ដោយក្នុងនោះរួមាន៖
ទំនប់អូរតេស្ថិតក្នុងស្រុកអូររាំង ដែលមានសមត្ថភាពស្តុកទឹក​បានប្រមាណ ១២លានម៉ែត្រគូប

ទំនប់លើស្ថិតក្នុងក្រុងសែន​មនោរម្យ ដែលមានសមត្ថភាពស្តុកទឹកបានប្រមាណ ២១ម៉ឺនម៉ែត្រ​គូប

ទំនប់ក្រោម ស្ថិត ក្នុងក្រុងសែនមនោរម្យ ដែលមាន​សមត្ថ​ភាព​ស្តុកទឹកបានប្រមាណ ២២ម៉ឺនម៉ែត្រគូប

ក្នុងចំណោម៣នេះ ទំនប់អូរតេ ជាទំនប់មានសារសំខាន់ជាខ្លាំងជាងគេ ក្នុងការផ្គត់ផ្គង់ទឹកស្អាតដល់ជីវភាពប្រជាពលរដ្ឋចំនួន ៣៤០០គ្រួសារ ក្នុងក្រុងសែនមនោរម្យ និង ២០០០គ្រួសារ ក្នុងស្រុកអូររាំងនៃខេត្តមណ្ឌលគិរី។

ក្រៅពីផ្តល់សារសំខាន់ទាំងនេះហើយ ទំនប់អូទេ ក៏បានក្លាយជាតំបន់ទេសចរណ៍ក្នុងស្រុកមួយបន្ថែមទៀត សម្រាប់ភ្ញៀវទេសចរណ៍ដែលធ្វើដំណើរទៅកម្សាន្តនៅទឹកជ្រោះប៊ូស្រា អាចឆ្លៀតចូលទៅទស្សនាទំនប់ទឹកនេះបានផងដែរ៕

នាថ្ងៃទី៩ ដល់ថ្ងៃទិ១៧ ខែតុលា ឆ្នាំ២០២៤ គេប្រទះឃើញទាហានឈុតខ្មៅថៃជាង១០០នាក់ បានធ្វើការឈ្លានពានចូលដីខ្មែរ ដកដំណាំរបស់ពលរដ្ឋ នៅតំបន់ព្រំដែនអូរខ្លាឃ្មុំ ក្នុងដែនអធិបតេយ្យភាពរបស់កម្ពុជា។

ហេតុការនេះ កើតនៅតំបន់ព្រំដែនអូរខ្លាឃ្មុំ ស្រុកអូរស្មាច់ ឧត្តរមានជ័យ ដោយទាហានឈុតខ្មៅថៃបានគំរាម និងធ្វើបាប ដោយចោទការធ្វើដំណាំនេះស្ថិតនៅទឹកដីរបស់គេ។

បើតាមការចុះពិនិត្យជាក់ស្តែងផ្ទៃដីចំការប្រជាពលរដ្ឋនោះមានចំងាយពីព្រំដែនថៃប្រមាណ៤០០ទៅ៥០០ម៉ែត្រ ហើយពលរដ្ឋដែលរងគ្រោះសុទ្ធសឹងតែអះអាង ពួកគាត់បង្កបង្កើតផលនៅលើដីនេះជាង២០ឆ្នាំមកហើយ។

ពាក់ព័ន្ធនឹងករណីនេះ ពលរដ្ឋ បានស្នើឱ្យសម្តេចធីបតី ជួយពិនិត្យ និងដោះស្រាយបញ្ហានេះឱ្យបានឆាប់រហ័ស បើមិនដូច្នេះទេពលរដ្ឋរស់នៅតាមបណ្តោយព្រំដែនតំបន់ព្រំដែនអូរខ្លាឃ្មុំ នឹងពិបាកក្នុងការរស់នៅ ខណៈទាហានឈុតខ្មៅថៃ នៅតែព្រហើយចូលមកដីខ្មែរដដែល។

គួរបញ្ជាក់ថា កាលពីខែមេសា កន្លងទៅនេះ ក៏មានទាហានឈុតខ្មៅថៃប្រមាណជា១២នាក់ បំពាក់ដោយអាវុធ បានធ្វើការដើរល្បាតចូលទៅដីខ្មែរ ក្នុងភូមិសាស្ត្រស្រុកសំរោង ខេត្តឧត្តមានជ័យផងដែរ៕

សម្រស់ប្រាសាទប្រែរូបនារដូវវស្សា គឺពិតជាស្រស់ស្អាតខ្លាំងណាស់ ប្រៀបបានដូចជាឋានសួគ៌នៅលើដីអ៊ីចឹង ដែលភ្ញៀវទេសចរជាតិ និងអន្តរជាតិមិនគួររំលងឡើយ។ ធម្មជាតិដ៏ស្រស់បំព្រងនេះ បច្ចុប្បន្នបានកំពុងឆក់យកបេះដូងភ្ញៀវទេសចរគ្រប់ជាតិសាសន៍ឱ្យមកទស្សនានូវទិដ្ឋភាពដ៍ល្អឯកនេះ។ ប្រាសាទប្រែរូប ជាស្ថាបត្យកម្មដ៏គួរស្ញប់ស្ញែងនាសតវត្សរ៍ទី១០ សាងសង់នៅលើខឿនច្រើនជាន់ ជាមួយថ្មបាយក្រៀម និងថ្មភក់ត្រូវបានគេប្រើប្រាស់ដើម្បីធ្វើជា កំពែង ខឿន សសរពេជ្រ ស៊ុមទ្វារ និងផ្ដែរជាដើម។ បើយើងពិនិត្យលើហេដ្ឋារចនាសម្ព័ន្ធសំណង់នៅទីនេះ ឃើញថាមានភាពប្រទាក់ក្រឡាគ្នាល្អណាស់ប្រកបដោយបច្ចេកទេសខ្ពស់បំផុត។

ប្រាសាទប្រែរូប គឺជាប្រាសាទដ៏ល្បីល្បាញមួយក្នុងរមណីយដ្ឋានអង្គរ និងជាកន្លែងពេញនិយមមួយសម្រាប់ភ្ញៀវទេសចរគយគន់ថ្ងៃលិចនារដូវវស្សា។ ប្រាសាទប្រែរូបបច្ចុប្បន្នបានកំពុងទាក់ទាញភ្ញៀវទេសចឱ្យមកទស្សនារាប់ពាន់នាក់ ដោយសារទេសភាពស្រស់ស្អាតគ្មានពីរ ជាមួយនិងពន្លឺព្រះអាទិត្យដែលចាំងមកលើតួប្រាសាទ ធ្វើឱ្យពណ៌របស់ប្រាសាទប្រែជាពណ៌មាសភ្លឺចែងចាំង ជាពិសេសនៅពេលព្រឹក និងរសៀល អមដោយទឹកដក់នៅបរិវេណខាងក្រៅកំពែង បានធ្វើឱ្យភ្ញៀវទេសចរដែលមកដល់ទីនេះស្ងើចសរសើរមិនដាច់ពីមាត់អំពីសម្រសដ៏ល្អអស្ចារ្យនេះ។

ប្រាសាទប្រែរូបត្រូវបានសាងសង់តាំងពីសតវត្សទី១០ ឆ្នាំ ៩៦១ នៃគ.ស ក្នុងរាជព្រះបាទរាជេន្ទ្រវរ្ម័នទី២ ដើម្បីឧទ្ទិសជូនព្រហ្មញ្ញសាសនា។ ប្រាសាទនេះ មានប្រាង្គចំនួនប្រាំ ដែលសង់ជាទម្រង់ប្រាសាទភ្នំ ស្ថិតក្នុងខេត្តសៀមរាប។ បើយើងរាប់ពីខាងត្បូងមកខាងជើង ប្រាង្គទី១ គឺមានចម្លាក់ទាក់ទងនឹងនរសឹង្ហ ឬមនុស្សសឹង្ហ ប្រាង្គទី២ គឺព្រះឥន្ទ្រគង់លើដំរីក្បាលបី ប្រាង្គទី ៣ គឺព្រះរាមគង់លើហនុមាន។ ចំណែកប្រាង្គទី ៤ ព្រះនរាយណ៍គង់លើគ្រុឌ ហើយនៅប្រាង្គខាងជើងបង្អស់គឺប្រាង្គទី ៥ ទេពហយគ្រីវ ឬពាជីមុខ។

ហេតុនេះហើយ ប្រសិនបើភ្ញៀវទេសចរបានមកដល់ខេត្តសៀមរាបហើយ សូមកុំរំលងតំបន់ប្រាសាទប្រែរូបអី ព្រោះនៅទីនេះគឺមានទេសភាពស្រស់ស្អាតខ្លាំងបំផុត ជាពិសេសគឺក្នុងរដូវវស្សានេះតែម្តង៕

រូបភាព៖ ករុណា-Karona