ចុងក្រោយមកនេះអ្នកគាំទ្រសង្កេតឃើញថាតារាល្បីៗប្រចាំប្រទេសថៃមួយចំនួនចាប់ចិត្តមកលេងប្រាសាទអង្គវត្ត។ ថ្មីៗនេះគេបានឃើញតារាសម្តែង Bifern Anchasa បានបង្ហោះរូបស្រស់ស្អាតជាច្រើននៅលើបណ្តាញសង្គមរបស់ខ្លួនជាមួយនឹងការមកដល់ទឹកដីសៀមរាបជាលើកទី១។
កាលពីយប់ថ្ងៃទី១៧ ខែតុលា Bifern Anchasa ជាតារាសម្តែងមួយរូបប្រចាំប្រទេសថៃដែលគ្រងតំណែងជាតួឯកបានបង្ហោះរូបចំនួន១០សន្លឹកជាមួយនឹងចំណងជើងថា «Siem Reap First Time »។ ក្នុងរូបភាពតារាស្រីរូបនេះបានស្លៀកពាក់រ៉ូបពណ៌សមានផ្កាកុលាបពណ៌ផ្កាឈូកផ្ទៃខាងលើបន្តិច និងបានបង្ហាញរូបភាពប្រាសាទអង្គរវត្តទាំងរូបភាពពេលព្រឹកនិងពេលល្ងាចដែលបញ្ចេញពណ៌យ៉ាងស្រស់ស្អាត។ Bifern បានបង្ហាញរូបភាពស្ថាបត្យកម្មនៃប្រាសាទអង្គរវត្តរួមទាំងចម្លាក់របាំអប្សរាផងដែរ។
ការបង្ហាញរូបភាពនៃដំណើរកម្សាន្តរបស់ខ្លួនលើទឹកដីសៀមរាបជាលើកដំបូងនេះរបស់ Bifern គឺធ្វើឱ្យមានការខម្មិនជាច្រើនថាស្រស់ស្អាតទាំងមនុស្សនិងសំណង់ស្ថាបត្យកម្ម ខណៈអ្នកគាំទ្រកម្ពុជាក៏បានចូលទៅខម្មិនស្វាគមន៍យ៉ាងកក់ក្តៅចំពោះការមកដល់របស់តារាសម្តែងរូបនេះ។
នារយៈចុងក្រោយនេះគេសង្កេតឃើញថា តារាៗមួយចំនួនប្រចាំប្រទេសថៃចាប់ផ្តើមមកកម្សាន្តនៅខេត្តសៀមរាបជាបន្តបន្ទាប់និងបើកចំហជាងមុនដែលមានការចែករំលែកនៅលើបណ្តាញសង្គមដែលខុសកាលពីមុនពេលតារាមួយចំនួនមកហើយពុំសូវបានបង្ហាញនៅលើប្រព័ន្ធផ្សព្វផ្សាយឡើយ។ កន្លងមកនេះថ្មីៗចុងក្រោយនេះតារាសម្តែងល្បីជួរមុខប្រចាំប្រទេសថៃ Weir sukollawat និងតារាស្រី Pitchanart sakhakorn គឺបានមកកម្សាន្តនៅលើទឹកដីសៀមរាប ខណៈ Weir បានបង្ហើបប្រាប់អ្នកគាំទ្រថានឹងមានបំណងមកកម្សាន្តម្តងទៀត។
គួរបញ្ជាក់ថាតារាស្រី Bifern ឧស្សាហ៍មានដំណើរកម្សាន្តណាស់បន្ទាប់ពីទំនេរដៃពីការងារសិល្បៈហើយតែងតែមានរូបភាពស្រស់ស្អាតចែករំលែកទៅកាន់អ្នកគាំទ្រ។ តារាសម្តែងរូបនេះបានបញ្ចប់ភាពនៅលីវកាលពីឆ្នាំ២០២២ ខណៈភាពយន្តរបស់ Bifern ចាប់ដៃគូជាមួយតារាសម្តែងប្រុស Film Thanapat គឺទទួលបានប្រជាប្រិយភាពយ៉ាងខ្លាំង៕
