អ្នកគាំទ្រកម្ពុជាប្រតិកម្មចំណងជើងរបស់សារព័ត៌មានដែលថា ព្រះនាង ជេនណា «សុបិនចង់ក្លាយជា Lisa បន្ទាប់»

អ្នកលេងបណ្តាញសង្គមកម្ពុជាមានប្រតិកម្មយ៉ាងខ្លាំងទៅលើការចុះផ្សាយរបស់សារព័ត៌មាន Allkpop ដែលបានដាក់ចំណងជើងថា ព្រះនាង ជេនណា មានក្តីសុបិនចង់ក្លាយជា Lisa ។ ការចុះផ្សាយរបស់គេហទំព័រនេះគឺបានដកស្រង់ពីបណ្តាញសារព័ត៌មានតៃវ៉ាន់មួយដែលបានចុះផ្សាយថាព្រះនាង ជេនណា របស់ប្រទេសកម្ពុជាកំពុងពិចារណាយាងទៅប្រទេសកូរ៉េ ដើម្បីបន្តក្ដីសុបិននៃការបង្ហាញខ្លួនជាតារា K-pop ។

កាលពីថ្ងៃទី១៤ ខែតុលា បណ្តាញសារព័ត៌មានតៃវ៉ាន់ Sanli News Network បានរាយការណ៍ថា ព្រះនាងនរោត្ដម ជេនណា ដែលមានព្រះជន្ម ១២ ព្រះវស្សា កំពុងពិចារណាយាងទៅប្រទេសកូរ៉េ ដើម្បីបន្តក្ដីសុបិននៃការបង្ហាញខ្លួនជាតារា K-pop ។

ព្រះនាង Jenna គឺជាតារាល្បីម្នាក់ក្នុងវិស័យកម្សាន្តរបស់ប្រទេសកម្ពុជា។ នៅអាយុ៨ព្រះវស្សា ទ្រង់ត្រូវបានជ្រើសរើសជាតារាម៉ូដែលសម្រាប់ក្រុមហ៊ុនទូរគមនាគមន៍ដ៏ធំមួយ ហើយឥឡូវនេះព្រះនាងមានអ្នកតាមដាន Instagram ជាង ១២០,០០០នាក់ ។ ព្រះនាងក៏ទទួលបានការទទួលស្គាល់ក្នុងឧស្សាហកម្មកម្សាន្តចិនតាមរយៈការបង្ហាញខ្លួនក្នុងកម្មវិធីបង្ហាញម៉ូត និងកម្មវិធីចិន។

ប្រព័ន្ធផ្សព្វផ្សាយបានកត់សម្គាល់ថា «ជាមួយនឹងរូបរាងពិសេសរបស់ទ្រង់ និងជំនាញសម្តែងដ៏ល្អឥតខ្ចោះ មនុស្សជាច្រើនរំពឹងថាព្រះនាងនឹងក្លាយជា «Lisa បន្ទាប់» ឬ «Minnie បន្ទាប់» ។ សមត្ថភាពច្រៀងនិងរាំដ៏គួរឱ្យចាប់អារម្មណ៍របស់ព្រះនាងក៏បានទទួលការចាប់អារម្មណ៍ ព្រះនាង Jenna មានគម្រោងយាងទៅប្រទេសកូរ៉េដើម្បីក្លាយជាតារាហ្វឹកហាត់»។

ព្រះនាង ជេនណា ជាចៅទួតរបស់ព្រះបាទនរោត្តម សីហនុ ព្រះមហាក្សត្រទី ១១០ នៃកម្ពុជា។ ព្រះមាតា របស់ទ្រង់គឺព្រះនាងនរោត្តម បុប្ផារី ជាបុត្រីរបស់ព្រះបាទ សីហនុ ហើយព្រះបិតារបស់ព្រះនាងគឺជាអ្នកជំនួញជនជាតិបារាំងដ៏មានទ្រព្យសម្បត្តិម្នាក់។នៅព្រះជន្ម ១២ ព្រះវស្សា ព្រះនាង Jenna ត្រូវបានគេរាយការណ៍ថាស្ទាត់ជំនាញក្នុងការមានព្រះបន្ទូលចំនួន ៥ ភាសា រួមទាំងភាសាកំណើតរបស់ទ្រង់គឺភាសា (ខ្មែរ) ថៃ ចិន អង់គ្លេស និងបារាំង។

ព្រះនាងក៏ត្រូវបានគេស្គាល់ផងដែរថាជាអ្នកគាំទ្រ K-pop ដ៏ធំម្នាក់។ ក្នុងដំណើរទស្សនកិច្ចទៅប្រទេសកូរ៉េក្នុងឆ្នាំ ២០២០ ក្នុងនាមជាផ្នែកមួយនៃគណៈប្រតិភូវប្បធម៌ និងសេដ្ឋកិច្ចកម្ពុជា ព្រះនាងបានបង្ហើបថា ទ្រង់ជាអ្នកគាំទ្រក្រុម BLACKPINK, TWICE, និង MOMOLAND ។ នៅក្នុងបទសម្ភាសន៍ជាមួយ Global Korean របស់ YTN កាលពីឆ្នាំ២០២៣ ព្រះនាងបានបង្ហាញពីក្តីស្រលាញ់របស់ទ្រង់ចំពោះតន្ត្រី K-pop និងការរាំ។

ព្រះនាង ជេនណា ធ្លាប់បានលេចព្រះភក្ត្រក្នុងកម្មវិធីជាច្រើននៅប្រទេសកម្ពុជាហើយនៅឆ្នាំ២០២២ នាងបានចេញបទចម្រៀងមួយបទដែលមានចំណងជើងថា «You Da One»។ កាលពីដើមឆ្នាំនេះ ទ្រង់បានសម្តែងក្នុងភាពយន្តបែបភ័យរន្ធត់របស់កម្ពុជារឿង «បណ្តាសានាងរាត្រី» ដែលទ្រង់បានឈ្នះពានរង្វាន់តារាសម្តែងថ្មីល្អបំផុតនៅក្នុងមហោស្រពភាពយន្តអាស៊ីលើកទី ២ ។

ទោះយ៉ាងណា ចំណងជើងនៃអត្ថបទរបស់ Allkpop ដែលមានឃ្លាថា «Dreaming to be the next Lisa » បានធ្វើឱ្យអ្នកគាំទ្រកម្ពុជាមិនពេញចិត្តនិងបង្ហាញអារម្មណ៍ប្រតិកម្មចំណុចនេះនិងបានស្នើឱ្យមានការកែសម្រួល។ អ្នកគាំទ្រក៏បានលើកឡើងដែរថា ទ្រង់ពោរពេញដោយទេពកោសល្យមានសមត្ថភាពមិនចង់ក្លាយទៅជានរណាបន្ទាប់នោះទេ៕