ក្នុងរយៈពេល ១០០ ឆ្នាំកន្លងមកនេះ គិតចាប់ពីឆ្នាំ ១៩២៤ ដល់ឆ្នាំ ២០២៤ សីតុណ្ហភាពផ្ទៃផែនដីរបស់យើងគឺបានកើនឡើង ១.១ អង្សាសេ កម្រិតទឹកសមុទ្រកើនឡើង ២០ សង់ទីម៉ែត្រ ហើយការបំភាយឧស្ម័នផ្ទះកញ្ចក់បានកើនឡើងជិត ២៨ ដង ដែលការកើនឡើងទាំងអស់នេះ នឹងបណ្តាលឱ្យអាកាសធាតុប្រែប្រួលលឿនជាងមុន។ បម្រែបម្រួលអាកាសធាតុបានធ្វើឱ្យពិភពលោកជួបប្រួទះនូវគ្រោះមហន្តរាយផ្សេងៗដូចជា រលកកំដៅ គ្រោះរាំងស្ងួត ទឹកជំនន់ និងព្យុះធំៗជាដើម ដែលនឹងបំផ្លាញជីវិតមនុស្សសត្វនាពេលអនាគត។

កាលពីឆ្នាំ ១៨៥០ ដល់ ១៩០០ អាកាសធាតុពិភពលោករបស់យើងគឺមិនបានប្រែប្រួលខ្លាំងយ៉ាងនេះទេ ដែលធ្វើឱ្យផែនដីមានភាពត្រជាក់ត្រជុំ។ ប៉ុន្តែនៅអំឡុងឆ្នាំ ១៩២៤ មកដល់ពេលបច្ចុប្បន្ន អាកាសធាតុពិភពលោកគឺបានប្រែប្រួលខ្លាំងខុសធម្មតាដោយសារបច្ចេកវិទ្យាជឿនលឿន និងសកម្មភាពរបស់មនុស្សដែលកំពុងបំផ្លាញផែនដី។ ការកើនឡើងសីតុណ្ហភាព និងការប្រែប្រួលអាកាសធាតុនាំឱ្យមានការផ្លាស់ប្ដូរប្រព័ន្ធអេកូឡូស៊ី។ ប្រភេទរុក្ខជាតិ និងសត្វជាច្រើនមិនអាចសម្របខ្លួនទៅនឹងលក្ខខណ្ឌថ្មី ដែលនាំឱ្យមានហានិភ័យនៃការផុតពូជ។

នៅក្នុងរបាយការណ៍ឆ្នាំ ២០២១ ដោយ Assessment Report 6 របស់ IPCC អ្នកវិទ្យាសាស្ត្រប៉ាន់ប្រមាណថា សត្វប្រហែលមួយលានប្រភេទកំពុងប្រឈមនឹងការផុតពូជនាពេលអនាគតដ៏ខ្លី ដោយសារតែការប្រែប្រួលអាកាសធាតុ និងកត្តាផ្សេងៗទៀតដូចជាការបាត់បង់ទីជម្រក និងការបំពុលជាដើម។ ហើយប្រព័ន្ធអេកូឡូស៊ីសំខាន់ៗជាច្រើនដូចជាព្រៃឈើ ថ្មប៉ប្រះទឹក ផ្កាថ្ម និងដីសើមក៏កំពុងត្រូវបានបំផ្លាញយ៉ាងធ្ងន់ធ្ងរ ដែលនាំឱ្យបាត់បង់ជីវៈចម្រុះផងដែរ។

ឥទ្ធិពលព្យុះផ្គររន្ទះ ក៏ដូចជារលកកម្តៅ គ្រោះរាំងស្ងួត និងការប្រែប្រួលសីតុណ្ហភាពញឹកញាប់បានកំពុងបំផ្លាញជីវិតមនុស្សសត្វរុក្ខជាតិជាបណ្តើរៗហើយ ដែលអ្នកជំនាញបានសន្មត់ថា ប្រសិនបើអាកាសធាតុចេះតែប្រែប្រួលលឿនជាងមុនបែបនេះ ពិតណាស់ភពផែនដីរបស់យើងទំនងនឹងរលាយបាត់វត្តមានពីប្រព័ន្ធព្រះអាទិត្រក្នុងរយៈពេល ២០០ លានឆ្នាំខាងមុខ៕

ប្រទេសចិន ៖ យុវជនចិនសម័យថ្មីពុំនិយមរៀបការអធិកអធមដូចមុនទេ ដោយសារពួកគេយល់ថា វាជាការចំណាយប្រាក់ខ្ជះខ្ជាយឥតប្រយោជន៍ ហើយពួកគេបានរៀបការក្នុងភោជនីយដ្ឋាន ឬហាង ជំនួសសណ្ឋាគារធំៗ និងអញ្ជើញភ្ញៀវមកចូលរួមតិចតួចប៉ុណ្ណោះ ។ យុវជនម្នាក់និយាយថា ខ្លួននឹងសន្សំប្រាក់ទុកចំណាយពេលមានការចាំបាច់ ល្អជាងចំណាយប្រាក់រៀបចំពិធីរៀបការធំដុំ ។

ការរៀបការតាមប្រពៃណី និងទំនៀមទម្លាប់ចិនបុរាណ ត្រូវបានគេចាត់ទុកថា គឺជាការចំណាយប្រាក់ខ្ជះខ្ជាយយ៉ាងខ្លាំង ទើបធ្វើឱ្យយុវជនចិនបច្ចុប្បន្នបោះបង់ការរៀបការតាមប្រពៃណីចាស់ និងកាត់បន្ថយការចំណាយផ្សេងៗក្នុងពិធីរៀបការ ។ ក្រៅពីនេះ ពួកគេក៏បានលុបចោលពិធីស្មុគស្មាញមួយចំនួនទៀតផងដែរ ដើម្បីមានប្រាក់គ្រប់គ្រាន់ទុកចំណាយពេលរៀបការរួច ។

គូស្វាមី-ភរិយា១គូនៅខេត្តក្វាងទុង ស្ថិតនៅភាគខាងត្បូងប្រទេសចិន បានអញ្ជើញភ្ញៀវមកចូលរួមពិធីរៀបការរបស់ពួកគេ ត្រឹមតែ២០នាក់ប៉ុណ្ណោះ ។ វាជាពិធីរៀបការតូចតាចបំផុត បើធៀបនឹងពិធីរៀបការតាមប្រពៃណីបុរាណចិន ដោយគូស្វាមី-ភរិយានេះបានរៀបការក្នុងសាខាហាង McDonald’s ខេត្តក្វាងទុង ។

ការរៀបចំពិធីនេះ ពួកគេចំណាយប្រាក់ត្រឹមតែ៨០០យាន់ (ឬស្មើជាង១០០ដុល្លារអាមេរិក) ប៉ុណ្ណោះ សម្រាប់ថ្លៃម្ហូបអាហារ ។ បើសរុបថ្លៃចំណាយទាំងអស់ ដូចជា ៖ ថ្លៃអាហារភ្ញៀវ និងការតុបតែងទីកន្លែងរៀបការ គឺពួកគេចំណាយប្រាក់មិនដល់២.០០០យាន់ (ឬមិនដល់៣០០ដុល្លារអាមេរិកទេ) ។ វាខុសគ្នាពីការរៀបការក្នុងសណ្ឋាគារទំនើប ដែលត្រូវចំណាយប្រាក់ថ្លៃកន្លែង និងអាហារក្នុងតម្លៃខ្ពស់ ។

កូនក្រមុំឈ្មោះ សៀវ យេជឺ និយាយថា ៖ «មានភ្ញៀវមកចូលរួមតែជាង២០នាក់ប៉ុណ្ណោះ ដោយយើងអង្គុយជុំគ្នានៅហាង McDonald’s ហើយជល់កែវកូកាកូឡាជំនួសកែវស្រា និងទទួលទានហេមបឺហ្គ័រ ជាមួយអាហារចៀនផ្សេងៗ ។ យើងបរិភោគបណ្តើរ និយាយបណ្តើរ ហើយទទួលបានការជូនពរពីភ្ញៀវប្លែកមុខទៀតផង ។ យើងពុំអាចបំភ្លេចថ្ងៃនេះបានទេ» ។

ការរៀបការក្នុងហាង McDonald’s បានធ្វើឱ្យគូស្វាមី-ភរិយានេះអាចសន្សំសំចៃប្រាក់រហូតដល់១សែនយាន់ សម្រាប់ទុកពេល Honeymoon និងថតរូបរៀបការនៅសមុទ្រ Aegean ប្រទេសក្រិក ។ ក្រៅពីនេះ ពួកគេនឹងយកប្រាក់ខ្លះទៀតទៅជួសជុលផ្ទះឱ្យថ្មី ។

ដោយឡែក គូស្វាមី-ភរិយា១គូទៀតនៅទីក្រុងសៀងហៃ បានជ្រើសយកភោជនីយដ្ឋាន Haidilao ធ្វើជាកន្លែងរៀបការ ។ កូនក្រមុំឈ្មោះ លី ម៉ឺងមីង ប្រាប់ថា ៖ «ការរៀបការអធិកអធមនឹងធ្វើឱ្យភ្ញៀវកោតសរសើរ តែខ្ញុំរៀបការតូចតាចប៉ុណ្ណោះ ដោយសារពិបាករកប្រាក់ណាស់ក្នុង១ថ្ងៃៗ ។ ការរៀបការតូចតាច គឺល្អជាងយកប្រាក់បានពីញឺសឈាមមកចំណាយអស់តែ១ថ្ងៃ» ។

បើទោះមតិមួយចំនួនរិះគន់ថា វាជាពិធីរៀបការពុំផ្លូវការក្តី ប៉ុន្តែយុវជនចិនបែរជាយល់ឃើញផ្ទុយពីនេះ និងប្រាប់ថា ពួកគេនឹងចំណាយប្រាក់សម្រាប់ការងារចាំបាច់ វាល្អជាងចំណាយមាសប្រាក់យ៉ាងច្រើនសម្រាប់រៀបចំពិធីរៀបការតែ១ថ្ងៃ ។ រីឯអ្នកលេងបណ្តាញសង្គមបានគាំទ្រការរៀបការតាមវិធីថ្មីនេះ សំខាន់ឱ្យតែអាចរស់នៅជាមួយគ្នាមានសុភមង្គល ប្រសើរជាងការរៀបការអធិកអធម រួចហើយឈ្លោះគ្នា ៕

ប្រទេសអូស្ត្រាលី ៖ ឆ្នេរសមុទ្រជាច្រើនកន្លែងនៅទីក្រុងស៊ីដនី ប្រទេសអូស្ត្រាលី ព្រមទាំងឆ្នេរសមុទ្រ Bondi ដ៏ល្បីល្បាញលើពិភពលោក ត្រូវបានអាជ្ញាធរបិទពុំអនុញ្ញាតឱ្យភ្ញៀវទេសចរចុះលេងទឹកជាបណ្តោះអាសន្ន កាលពីថ្ងៃទី១៧ ខែតុលា ឆ្នាំ២០២៤ ក្រោយពីប្រទះឃើញដីឥដ្ឋតូចៗ និងកាកសំណល់យ៉ាងច្រើននៅឆ្នេរសមុទ្រទាំងនេះ ។

សារព័ត៌មានរ៉យទ័ររាយការណ៍ថា អភិបាលក្រុង Waverley ប្រកាសថា បានបញ្ជាឱ្យបិទឆ្នេរសមុទ្រ Bondi, ឆ្នេរសមុទ្រ Bronte និងឆ្នេរសមុទ្រ Tamarama ដើម្បីផ្តល់សុវត្ថិភាពដល់ពលរដ្ឋ និងភ្ញៀវទេសចរ ។ ដូចគ្នានេះ អភិបាលក្រុង Randwick ក៏បានបញ្ជាឱ្យបិទឆ្នេរសមុទ្រ៤កន្លែងទៀតស្ថិតនៅភាគខាងត្បូងផងដែរ ដោយសារបារម្ភពីគ្រោះថ្នាក់ផ្សេងៗ ។

លោក Will Nemesh អភិបាលក្រុង Waverley ថ្លែងថា ៖ «យើងបានយកចិត្តទុកដាក់លើសុវត្ថិភាពរបស់ពលរដ្ឋក្នុងតំបន់ និងភ្ញៀវទេសចរបរទេសខ្លាំងបំផុត ទើបយើងសម្រេចចិត្តបិទឆ្នេរសមុទ្រជាបណ្តោះអាសន្នសិន ដើម្បីការពារគ្រោះថ្នាក់ដោយសារដីឥដ្ឋតូចៗទាំងនេះ» ។

បើតាមលទ្ធផលការត្រួតពិនិត្យជំហ៊ានដំបូងបញ្ជាក់ថា នៅឆ្នេរសមុទ្រជាច្រើនរបស់អូស្ត្រាលីមានដីឥដ្ឋតូចៗពណ៌ខ្មៅ (ឬហៅថា Tar Balls) ត្រូវបានទឹករលកបោកបក់មកលើវាលខ្សាច់ ព្រមទាំងមានប្រេងឥន្ធនៈ និងកាកសំណង់ជាច្រើនទៀត ។ ហេតុនេះ អាជ្ញាធរអូស្ត្រាលីបារម្ភថា កាកសំណល់ទាំងនេះអាចបណ្តាលឱ្យភ្ញៀវទេសចរមានគ្រោះថ្នាក់ ។

ពលរដ្ឋអូស្ត្រាលីដែលរស់នៅបរិវេណឆ្នេរសមុទ្រ Coogee ដែលត្រូវបានអភិបាលក្រុងបញ្ជាឱ្យបិទដែរនោះ និយាយថា អ្នកស្រុកកំពុងរងផលប៉ះពាល់ដោយសារជាតិពុលផ្សេងៗ ដូចជា ៖ ជាតិពុលលើបរិយាកាស, ជាតិពុលចេញពីនាវា និងផ្លាស្ទិក ហើយឆ្នេរសមុទ្ររបស់យើងនឹងរងផលប៉ះពាល់ដោយសារជាតិពុលទាំងនេះ គឺដូចគ្នានឹងឆ្នេរសមុទ្រផ្សេងទៀតលើពិភពលោក ។

ចំណែកភ្នាក់ងារការពារបរិស្ថាននៅរដ្ឋ New South Wales បានយកដីឥដ្ឋតូចៗនៅលើឆ្នេរសមុទ្រទៅត្រួតពិនិត្យដើម្បីបញ្ជាក់ថា តើវាជាអ្វីឱ្យប្រាកដ ។ ក្រៅពីនេះ អាជ្ញាធរអូស្ត្រាលីបានសំណូមពរទៅកាន់ពលរដ្ឋទាំងអស់ហាមចុះហែលទឹកក្បែរដីឥដ្ឋ ឬចាប់វាដាច់ខាត ដើម្បីកុំឱ្យមានគ្រោះថ្នាក់ ។

គួរបញ្ជាក់ថា ទីក្រុងស៊ីដនីរបស់អូស្ត្រាលី មានឆ្នេរសមុទ្ររហូតដល់ជាង១០០កន្លែងនៅបរិវេណឈូងសមុទ្រ និងមាត់សមុទ្រ ។ ឆ្នេរសមុទ្រទាំងនេះជាតំបន់ទេសចរណ៍ដ៏ល្បីល្បាញ និងបានទាក់ទាញភ្ញៀវទសចរជាតិ និងអន្តរជាតិឱ្យធ្វើដំណើរមកកម្សាន្តរាប់លាននាក់ក្នុង១ឆ្នាំៗ ៕

ប្រទេសថៃ ៖ ជនរង.គ្រោះបានចាញ់បោ.ក ក្រុមហ៊ុន The iCON GROUP មិនមែនមានតែពលរដ្ឋថៃប៉ុណ្ណោះទេ ពលរដ្ឋខ្មែរក៏បានក្លាយជាជនរងគ្រោះដូចគ្នាដែរ គឺស្មើជាង១ពាន់នាក់ ដោយសារក្រុមហ៊ុននេះទើបតែនាំតារាថៃល្បីៗមកផ្សព្វផ្សាយផលិតផលនៅប្រទេសកម្ពុជា ។ នេះបើតាមការចុះផ្សាយរបស់សារព័ត៌មានថៃ កាលពីថ្ងៃទី១៧ ខែតុលា ឆ្នាំ២០២៤ ។

លោកស្រី ឆាលីដា ផាឡាម៉ាត ជាប្រធានមូលនិធិបាននាំជនរងគ្រោះជាច្រើននាក់ដែលបង់ប្រាក់ឱ្យក្រុមហ៊ុន The iCON GROUP មកកាន់ការិយាល័យសមត្ថកិច្ចផ្នែកស៊ើបអង្កេត ដើម្បីដាក់ពាក្យបណ្តឹងប្តឹងក្រុមហ៊ុននេះ ក្នុងនោះមានជនរងគ្រោះម្នាក់ជាស្ត្រីចំណាស់ អាយុ៧៨ឆ្នាំ ។ ក្រៅពីនេះ មានជនរងគ្រោះ២នាក់ទៀត ដែលម្នាក់ជាជនជាតិស៊ុយអែត និងម្នាក់ទៀតជាជនជាតិខ្មែរ ហើយជនរងគ្រោះម្នាក់ៗបានបង់ប្រាក់ជាង២សែនបាតទៅឱ្យក្រុមហ៊ុន ។

អ្នកស្រី ជេននី អាយុ៤២ឆ្នាំ ជនជាតិខ្មែរនិយាយថា កាលពីឆ្នាំ២០២២ ជាអំឡុងពេលជំងឺកូវីដ-១៩ ឆ្លងរាតត្បាត អ្នកស្រីបានស្វែងរកវគ្គបណ្តុះបណ្តាលដើម្បីបង្កើនចំណូលឃើញថា មានវគ្គបង្រៀនពីរបៀបលក់ផលិតផលអនឡាញរបស់ក្រុមហ៊ុន The iCON GROUP ហើយតម្លៃរៀនបង់ត្រឹមតែ៩៧បាតប៉ុណ្ណោះ ។ ហេតុនេះ អ្នកស្រីក៏បានសម្រេចចិត្តចុះឈ្មោះចូលរៀន ដោយរយៈពេល១ថ្ងៃ ទៅ២ថ្ងៃដំបូង ក្រុមហ៊ុននេះបានបង្រៀនពីវិធីលក់ផលិតផល ។

ប៉ុន្តែចាប់ពីថ្ងៃទី៣ ដល់ថ្ងៃទី៤ គឺមានថ្នាក់ដឹកនាំក្រុមហ៊ុនមួយចំនួនមកជួយបង្រៀនពីរបៀបលក់ផលិតផល ហើយពួកគេក៏បបួលអ្នករៀនចូលរួមរកស៊ីជាមួយក្រុមហ៊ុន The iCON GROUP ដោយបញ្ជាក់ថា អ្នករៀននឹងទទួលបានភាពជោគជ័យ ទើបអ្នកស្រីជឿជាក់ ។ ពេលនោះ អ្នកស្រីក៏សម្រេចចិត្តបើក Dealer មួយ និងបង់ប្រាក់ចំនួន ២សែន៥ម៉ឺនបាតឱ្យក្រុមហ៊ុន ។

ចំណែកលោក អូកាន់ អាយុ៦៤ឆ្នាំ ជនជាតិស៊ុយអែត ដែលបានចាញ់បោកក្រុមហ៊ុន The iCON GROUP ដែរនិយាយថា លោកបានស្គាល់ក្រុមហ៊ុននេះតាមរយៈបងប្រុស ដែលណែនាំឱ្យលោកបង់ប្រាក់ឱ្យក្រុមហ៊ុននេះ ។ ពីដំបូង លោកគិតថា វាជាក្រុមហ៊ុនល្អ, មាន Franchise ច្រើន ហើយបុគ្គលិកក្រុមហ៊ុនសហការគ្នាល្អ គឺចាប់ពីថ្នាក់ដឹកនាំក្រុមហ៊ុនរហូតដល់ថ្នាក់ក្រោម ទើបលោកមានទំនុកចិត្តខ្លាំង ។

ហេតុនេះ លោកក៏បានចំណាយប្រាក់វិនិយោគជាមួយក្រុមហ៊ុន ចំនួន២សែនបាត ប៉ុន្តែតាំងពីលោកចំណាយប្រាក់រួចមក គឺមិនទទួលបានអ្វីមកវិញសោះ ហើយក៏ពុំទទួលបានផលិតផលអ្វីដែរ ។ ប្រាក់ចំនួន២សែនបាតនេះ សម្រាប់លោកមិនច្រើនទេ ប៉ុន្តែវាច្រើនសម្រាប់អ្នកផ្សេងទៀត ហើយលោកក៏សម្រេចចិត្តមកប្តឹងសមត្ថកិច្ច ពីព្រោះចង់ផ្តល់យុត្តិធម៌ដល់ជនរងគ្រោះ ។

គួរបញ្ជាក់ថា ក្រុមហ៊ុន The iCON GROUP បានមកបើកទីផ្សារនៅប្រទេសកម្ពុជានៅឆ្នាំ២០២៤ ហើយកាលពីពេលថ្មីៗនេះ មានថ្នាក់ដឹកនាំក្រុមហ៊ុនមួយចំនួន ព្រមទាំងថ្នាក់ដឹកនាំជាតារាថៃល្បីៗមកចូលរួមកម្មវិធីនៅកម្ពុជាផងដែរ ។ ក្រោយពីបើកទីផ្សារនៅកម្ពុជា មានពលរដ្ឋខ្មែរជាង១.០០០នាក់បានចាញ់បោកក្រុមហ៊ុននេះ ដោយម្នាក់ៗបានចំណាយអស់ប្រាក់យ៉ាងច្រើន ។ នេះបើយោងតាមការចុះផ្សាយរបស់សារព័ត៌មានថៃឈ្មោះ Khaosod ។

ក្រោយពីមានជនរងគ្រោះជាច្រើនប្តឹងក្រុមហ៊ុន The iCON GROUP សមត្ថកិច្ចថៃក៏បានចាប់ខ្លួននាយកគ្រប់គ្រងក្រុមហ៊ុននេះ ព្រមទាំងចាប់ជនពាក់ព័ន្ធទាំងអស់ ក្នុងនោះមានតារាសម្តែងល្បីៗលំដាប់ប្រទេសផងដែរ មកសួរចម្លើយពីករណីបោកប្រាស់ពលរដ្ឋ និងរួមគ្នាផ្សព្វផ្សាយព័ត៌មានមិនពិត ។

កាលពីថ្ងៃទី១៧ ខែតុលា កន្លងមក សារព័ត៌មានថៃរាយការណ៍ថា តារាសម្តែងលំដាប់ប្រទេសចំនួន៣រូប គឺអ្នកនាង ភីឆាយ៉ា វឌ្ឍនាមុនទ្រី (ហៅមីន ជាតារាសម្តែង), លោក យូរ៉ាណាន់ ផាម៉ុនមុនទ្រី (ហៅសែម ឬលោក ប៉ាតាវី ជាតារាសម្តែង), លោក បូសាកាន់ កាន់ថាថាវ៉ន (ហៅកាន់ ជាតារាសម្តែង និងពិធីករទូរទស្សន៍) បានឱ្យមេធាវីសុំបង់ប្រាក់ធានាទៅតុលាការដើម្បីបាននៅក្រៅឃុំ ប៉ុន្តែតុលាការពុំអនុញ្ញាតទេ និងបញ្ជូនពួកគេទៅកាន់ពន្ធនាគារជាមួយជនពាក់ព័ន្ធផ្សេងទៀត ។

តុលាការបញ្ជាក់ថា រឿងក្តីនេះពាក់ព័ន្ធជាខ្សែសង្វាក់ និងបែងចែកការងារគ្នាធ្វើ ដែលធ្វើឱ្យប៉ះពាល់ដល់ជនរងគ្រោះជាច្រើននាក់ ។ ហេតុនេះ ពួកគេមានទោសកំហុសធ្ងន់ធ្ងរ ពុំអាចនៅក្រៅឃុំបានទេ ពីព្រោះអាចរត់គេចខ្លួនទៅក្លែងបន្លំភស្តុតាង ៕

សហរដ្ឋអាមេរិក៖ ពីមហាសេដ្ឋីលំដាប់ទី ១ ក្នុងលោកកាលពីដើមឆ្នាំ ២០២៤ ធ្លាក់មកនូវចំណាត់ថ្នាក់ទី ៥ វិញនៅចុងឆ្នាំនេះ ដោយសារមូលហេតុដូចខាងក្រោម។
មហាសេដ្ឋីទំនិញប្រណិត LVMH គឺលោក Bernard Arnault បានបាត់បង់ប្រាក់រហូតដល់ ១០ ពាន់លានដុល្លារអាមេរិក ក្នុងរយៈពេលត្រឹមតែមួយថ្ងៃប៉ុណ្ណោះ ដោយសារតម្រូវការទីផ្សាររបស់ចិនសម្រាប់ទំនិញប្រណីតបានធ្លាក់ចុះ។

នេះបើយោងតាមការចុះផ្សាយរបស់គេហទំព័របរទេស Fortune ការលក់នៅក្នុងត្រីមាសទី ៣ នៃឆ្នាំ ២០២៤ បានធ្លាក់ចុះខ្លាំងមិនធ្លាប់មាន ដែលធ្វើឱ្យ Bernard Arnault ក្លាយជាមហាសេដ្ឋីដែលបាត់បង់ប្រាក់ច្រើនជាងគេបំផុតក្នុងរយៈពេលថ្មីៗនេះ។ Bernard Arnault គឺជាម្ចាស់ក្រុមហ៊ុនទំនិញប្រណីត LVMH ដែលកាន់កាប់ម៉ាកយីហោល្បីៗដូចជា Louis Vuitton, Dior និង Tiffany។

ទោះបីជាលោកបានខាតបង់ប្រាក់ច្រើនយ៉ាងណាក៏ដោយ ក៏មហាសេដ្ឋីរូបនេះនៅតែជាអ្នកមានជាងគេទី ៥ របស់ពិភពលោក បន្ទាប់ពី Elon Musk, Mark Zuckerberg, Jeff Bezos និង Larry Ellison។ ដូច្នេះបច្ចុប្បន្នមហាសេដ្ឋីបារាំងរូបនេះមានទ្រព្យសម្បត្តិផ្ទាល់ខ្លួនសរុបប្រហែល ១៧៤.៥ ពាន់លានដុល្លារអាមេរិក។

ចំនួននេះគឺទាបជាងកាលពីដើមឆ្នាំ ២០២៤ នៅពេលដែល Bernard Arnault បានកាន់តំណែងជាមហាសេដ្ឋីលំដាប់ទីមួយនៅលើផែនដី។ កាលពីខែមីនា ឆ្នាំ ២០២៤ ទ្រព្យសម្បត្តិផ្ទាល់ខ្លួនសរុបរបស់មហាសេដ្ឋី LVMH បានឈានដល់កំណត់ត្រា ២៣១ ពាន់លានដុល្លារដោយពេលនោះលោកគឺបានវ៉ាដាច់ Elon Musk ទៅទៀត។ ប៉ុន្តែចាប់ពីខែកញ្ញាមកការលក់របស់លោកគឺបានធ្លាក់ចុះខ្លាំងជាបន្តបន្ទាប់ ដោយសារតម្រូវការទីផ្សារចិនមានកម្រិតទាបខុសធម្មតា។

ហេតុនេះគិតមកដល់ពេលបច្ចុប្បន្នលោក Bernard Arnault បានធ្លាក់ចេញពីតំណែងមហាសេដ្ឋីទីមួយក្នុងលោក មកត្រឹមមហាសេដ្ឋីទី ៥ ក្នុងលោកវិញ បន្ទាប់ពីតម្លៃភាគហ៊ុនរបស់លោកបានធ្លាក់ចុះ ២០% ហើយទ្រព្យសម្បត្តិសុទ្ធរបស់លោកបានហួតអស់ ៥៤ ពាន់លានដុល្លារអាមេរិក៕

ប្រទេសកូរ៉េខាងត្បូង ៖ នៅពាក់កណ្តាលខែតុលា ឆ្នាំ២០២៤ កងទ័ពកូរ៉េខាងត្បូងបានបង្ហាញវីដេអូមួយ ដែលកូរ៉េខាងជើងដាក់គ្រាប់បែ.ក បំផ្ទុះផ្លូវធ្វើដំណើរតភ្ជាប់រវាងប្រទេសកូរ៉េខាងជើង និងកូរ៉េខាងត្បូង ។ ទង្វើរបស់កូរ៉េខាងជើងបានបញ្ជាក់ពីទំនាក់ទំនងបែកបាក់ និងពុំអាចតភ្ជាប់គ្នាដូចមុន ។

ប្រទេសកូរ៉េខាងជើងបានប្រកាសផ្តាច់ទំនាក់ទំនងទាំងអស់ជាមួយកូរ៉េខាងត្បូង ដូចជា ៖ កាត់ផ្តាច់ផ្លូវរថភ្លើង និងផ្លូវធ្វើដំណើរ ។ នៅក្នុងវីដេអូនេះ គេបានឃើញផ្សែងហុយទ្រលោម និងមានរថយន្តធំៗ ព្រមទាំងត្រាក់ទ័រជាច្រើនគ្រឿងមកកាយដីនៅបរិវេណនេះឱ្យកាន់តែជ្រៅថែមទៀត ដើម្បីកុំឱ្យរថយន្តតូច-ធំធ្វើដំណើរឆ្លងកាត់បាន ហើយមានទាហានកូរ៉េខាងជើងមកជួយការពារសុវត្ថិភាពយ៉ាងតឹងតែង ។

ក្រោយពីកូរ៉េខាងជើងដាក់គ្រាប់បែកបំផ្ទុះផ្លូវតភ្ជាប់ជាមួយកូរ៉េខាងត្បូង និងបញ្ជូនត្រាក់ទ័រមកជីកផ្លូវឱ្យមានរណ្តៅកាន់តែជ្រៅ កងទ័ពកូរ៉េខាងត្បូងក៏បានបាញ់កាំភ្លើងព្រមានវិញ ។ វាបញ្ជាក់ពីទំនាក់ទំនងរវាងប្រទេសកូរ៉េទាំងពីរបានធ្លាក់ដល់ចំណុចទាបបំផុត ។

កាលពីថ្ងៃទី៩ ខែតុលា ឆ្នាំ២០២៤ កូរ៉េខាងជើងបញ្ជាក់ថា នឹងបិទការឆ្លងកាត់ព្រំដែនរវាងប្រទេសកូរ៉េទាំងពីរជារៀងរហូត ដោយកូរ៉េខាងជើងនឹងចាប់ផ្តើមបំផ្លាញផ្លូវនានាដែលតភ្ជាប់ជាមួយកូរ៉េខាងត្បូង ។ បន្ទាប់មក កូរ៉េខាងជើងនឹងសាងសង់របងការពារនៅតាមព្រំដែនយ៉ាងរឹងមាំ ។

កូរ៉េខាងជើងបានបង្ហាញអាកប្បកិរិយាកាន់តែតឹងតែងខ្លាំងឡើង ដូចជា ៖ បញ្ជូនបាឡុងសំរាមយ៉ាងច្រើនមកកូរ៉េខាងត្បូង តាំងពីខែឧសភា ឆ្នាំ២០២៤ ដើម្បីឆ្លើយតបជាមួយសកម្មជននយោបាយកូរ៉េខាងត្បូងបញ្ជូនខិត្តប័ណ្ណផ្សព្វផ្សាយជាច្រើនមកកូរ៉េខាងជើង ។

កាលពីសប្តាហ៍ទី២ ខែតុលា ឆ្នាំ២០២៤ កូរ៉េខាងជើងនិយាយថា កូរ៉េខាងត្បូងបានបញ្ជូនដ្រូនមកព្រំដែនរបស់ខ្លួន ព្រមទាំងបញ្ជូនខិត្តប័ណ្ណឃោសនាប្រឆាំងនឹងកូរ៉េខាងជើងជាច្រើនសន្លឹក ។ អ្នកស្រី គីម យ៉ូចង ជាប្អូនស្រីលោក គីម ជុងអ៊ុន មេដឹកនាំកូរ៉េខាងជើង បញ្ជាក់ថា កូរ៉េខាងត្បូងត្រូវតែទទួលខុសត្រូវ មុនពេលកូរ៉េខាងជើងកាច់ផ្តាច់ទំនាក់ទំនងទាំងអស់ ។

រីឯពលរដ្ឋកូរ៉េខាងត្បូងដែលរស់នៅក្បែរព្រំដែនបានប្រមូលផ្តុំគ្នានៅបរិវេណខាងមុខអគារប្រធានាធិបតី ដើម្បីសំណូមពរឱ្យរដ្ឋាភិបាលប្រញាប់ដោះស្រាយបញ្ហាតានតឹងជាមួយកូរ៉េខាងជើង ដោយសារពួកគេពុំចង់រស់នៅដោយការភ័យខ្លាច ៕

ប្រទេសស្កុតឡេន ៖ ស្កុតឡេន គឺជាប្រទេសដ៏ល្បីល្បាញមួយនៅលើពិភពលោក ដោយសារមានតំបន់ទេសចរណ៍ជាច្រើនកន្លែង ហើយក្នុង១ឆ្នាំៗ មានភ្ញៀវទេសចរជាច្រើននាក់មកកម្សាន្តនៅទីនេះ ។ អ្វីដែលធ្វើឱ្យទីក្រុងនេះកាន់តែល្បីល្បាញខ្លាំងថែមទៀត ដោយសារពលរដ្ឋរស់នៅក្នុងទីក្រុងនិយាយថា ពួកគេបានឃើញ UFO របស់មនុស្សក្រៅភព រហូតដល់៣០០គ្រឿងក្នុង១ឆ្នាំ ។

ទីក្រុងតូចមួយនៅស្កុតឡេនឈ្មោះ «Bonnybridge» មានពលរដ្ឋរស់នៅប្រមាណ៦.០០០នាក់ ហើយអ្វីដែលធ្វើឱ្យទីក្រុងនេះខុសប្លែកពីទីក្រុងផ្សេងៗ គឺគេដាក់ឈ្មោះទីក្រុងនេះថា «Bonnybridge Triangle» ដោយសារអ្នករស់នៅទីនេះ បានមើលឃើញ UFO របស់មនុស្សក្រៅភព ជាមធ្យម៣០០គ្រឿងក្នុង១ឆ្នាំ ។

សមាជិកសភាស្កុតឡេន លោក ខាប័រលី បូខាណាន់ ធ្លាប់បានលើកឡើងពីទីក្រុង Bonnybridge និងធ្វើឱ្យមានការជជែកគ្នាយ៉ាងខ្លាំងក្នុងរដ្ឋសភា និងពិភាក្សាគ្នាថា តើទីក្រុងនេះមានទ្វារតភ្ជាប់ជាមួយភពផ្សេង ឬមានវិញ្ញាណផ្សេងៗចូលមកពាក់ព័ន្ធ ឬយ៉ាងណា? ។ លោក ខាប័រលី បញ្ជាក់ថា រឿងរ៉ាវប្លែកៗនេះនឹងពុំប៉ះពាល់ដល់វិស័យទេសចរណ៍ក្នុងទីក្រុងទេ ។

ចំណែកមន្ត្រីក្រសួងការបរទេសស្កុតឡេនបញ្ជាក់ថា ៖ «យើងគ្មានភស្តុតាងបញ្ជាក់ថា UFO របស់មនុស្សក្រៅភព ឬប្រទេសនានាបានឈ្លានពានមកលើដែនអាកាសរបស់យើងទេ ។ ប៉ុន្តែពលរដ្ឋរស់នៅទីក្រុង Bonnybridge ជឿជាក់ថា នៅទីនេះ ពិតជាមានច្រកផ្លូវទៅកាន់ភពផ្សេង» ។

ដោយឡែក បុគ្គលិកសម្អាតអគារ៣នាក់ ធ្លាប់និយាយថា កាលពីខែតុលា ឆ្នាំ១៩៩៤ ពេលធ្វើដំណើរទៅធ្វើការ ស្រាប់តែពួកគេឃើញ UFO របស់មនុស្សក្រៅភព ចំនួន៥គ្រឿង ហើយពួកគេសួរទៅនាយកគ្រប់គ្រងថា តើមានរឿងអ្វីកើតឡើង? ពេលនោះ ពួកគេបានឃើញពន្លឺភ្លើង និងរង្វង់មូលពណ៌ទឹកក្រូចប្លែកៗនៅបរិវេណ Bonnybridge Triangle ។

លើសពីនេះ កាលពីថ្ងៃទី៩ ខែវិច្ឆិកា ឆ្នាំ១៩៧៩ លោក រ៉ូបឺត ថែលល័រ ជាភ្នាក់ងារថែរក្សាព្រៃឈើបានឃើញ UFO ដ៏ធំមួយពេលលោកកំពុងត្រួតពិនិត្យក្នុងព្រៃ ។ លោកបញ្ជាក់ថា ពេលដើរទៅកាន់ទីវាលមួយ ស្រាប់តែលោកឃើញរង្វង់មូលលោហៈធំមួយពណ៌ប្រផេះ ហើយលោកក៏ដើរចូលទៅក្បែរវា ។ បន្ទាប់មក វាក៏ធ្លាក់មកលើដី ហើយមានឧបករណ៍២ ធ្លាក់ចុះមក ដែលឧបករណ៍ទាំងនេះមានបន្លាមុតស្រួច និងមានរូបរាងដូចគ្រាប់បែករបស់កងទ័ពជើងទឹក ។

ឧបករណ៍ទាំង២នេះ ក៏ហោះមករកលោក ហើយលោកបានព្យាយាមរត់គេចពីវា ប៉ុន្តែឧបករណ៍នេះមកទាក់ជាមួយខោរបស់លោក រហូតដល់រហែក ។ ក្រោយមក វាក៏អូសលោកមកកាន់កន្លែង UFO ធ្លាក់ ហើយលោកក៏បានសន្លប់ប្រមាណ២០នាទី ។ លោកបានដឹងខ្លួនឡើងវិញពេលឮសូរសំឡេងក្បែរខ្លួន ប៉ុន្តែបាត់លែងឃើញ UFO ទើបលោកវារចេញពីទីនេះទៅកាន់រថយន្តវិញ ដោយសារជើងរបស់លោកពុំអាចដើរបាន ។

ក្រោយកើតហេតុការណ៍នេះ ក្រុមហ៊ុនមួយបានបញ្ជូនភ្នាក់ងារទៅត្រួតពិនិត្យនៅកន្លែងកើតហេតុយ៉ាងលម្អិត ហើយពួកគេបានឃើញស្លាកស្នាមប្លែកៗជាច្រើនលើដី ប៉ុន្តែពុំដឹងថា វាជាស្លាកស្នាមអ្វីទេ ។ រីឯសមត្ថកិច្ចក្នុងតំបន់ ក៏ពុំបានបកស្រាយបានដែរថា តើស្នាមលើដីទាំងនេះកើតឡើងដោយសារអ្វី ។

បច្ចុប្បន្ន អ្នកជំនាញផ្នែក UFO ជាច្រើនបានមកស្រាវជ្រាវរកមូលហេតុពន្លឺភ្លើងប្លែកៗនៅលើមេឃក្នុងទីក្រុង Bonnybridge ។ អ្នកជំនាញសង្ឃឹមថា នៅថ្ងៃណាមួយ ពួកគេនឹងអាចរកឃើញភស្តុតាងច្បាស់លាស់ពាក់ព័ន្ធនឹងមនុស្សក្រៅភព ៕