បរិភោគផ្លែឈើ៧ប្រភេទជួយបំបាត់ភាពតានតឹង និងបង្កើនអារម្មណ៍ស្រស់ថ្លា

ការបរិភោគផ្លែឈើ មិនត្រឹមតែធ្វើឱ្យរាងកាយរបស់យើងទទួលបាននូវស្ករធម្មជាតិ និងមានអារម្មណ៍ស្រស់ថ្លាប៉ុណ្ណោះទេ ប៉ុន្តែវាថែមទាំងផ្តល់នូវសារធាតុចិញ្ចឹមជួយឱ្យរាងកាយបានសម្រាក និងកាត់បន្ថយភាពតានតឹងផងដែរ ។

មនុស្សភាគច្រើនចូលចិត្តបរិភោគអាហារឆ្ងាញ់ៗដើម្បីកាត់បន្ថយភាពតានតឹង ប៉ុន្តែផ្លែឈើក៏ត្រូវបានគេចាត់ទុកថា អាចកាត់បន្ថយភាពតានតឹងដែរ ដោយសារវាផ្តល់នូវរសជាតិផ្អែម និងស្រស់ថ្លាក្នុងពេលដំណាលគ្នា ។ តើមានផ្លែឈើណាខ្លះមានសារធាតុចិញ្ចឹមជួយកាត់បន្ថយភាពតានតឹង?

១-ផ្លែចេក ៖ ចេកសម្បូរដោយប៉ូតាស្យូមជួយកាត់បន្ថយកម្រិតសម្ពាធឈាម, ជួយឱ្យអំបិលរ៉ែក្នុងរាងកាយមានតុល្យភាព ព្រមទាំងផ្ទុកនូវម៉ាញ៉េស្យូមបន្ធូរសាច់ដុំ និងសរសៃប្រសាទ ។ ការបរិភោគចេកនឹងអារម្មណ៍ធូរស្រាល ដោយសារវាផ្ទុកសារធាតុ Tryptophan បញ្ចេញសារធាតុ Serotonin ពីក្នុងខ្លួន ។ Tryptophan ជាសារធាតុជួយឱ្យអ្នកបរិភោគចេកមានក្តីសុខ, អារម្មណ៍រីករាយ និងសម្រាកលក់ស្រួល ។

២-ផ្លែក្រូច ៖ ក្រូចមានរសជាតិជូរអែម ឬសម្បូរទឹក នឹងធ្វើឱ្យអារម្មណ៍ស្រស់ថ្លាភ្លាមៗ ដោយសារចេកសម្បូរវីតាមីន C ។ ក្រៅពីវាជួយពង្រឹងប្រព័ន្ធការពាររាងកាយហើយ ការស្រាវជ្រាវបង្ហាញថា វីតាមីន C បានកាត់បន្ថយអរម៉ូនតានតឹង និងរក្សាតុល្យភាពកម្រិតសម្ពាធឈាមក្នុងខ្លួន ។

៣-ផ្លែ Strawberry ៖ Strawberry សម្បូរវីតាមីន C និងសារធាតុប្រឆាំងអុកស៊ីតកម្ម ។ វាជួយកាត់បន្ថយភាពតានតឹង ហើយថែមទាំងមានរសជាតិជូរអែមឆ្ងាញ់ បរិភោគពេលណា ក៏មានអារម្មណ៍ស្រស់ថ្លាដែរ ។

៤-ផ្លែត្របែក ៖ ផ្លែត្របែកស្ថិតក្នុងចំណោមផ្លែឈើមានវីតាមីន C ខ្ពស់ ហើយយើងអាចបរិភោគត្របែកឱ្យបាត់អស់អារម្មណ៍តានតឹងបាន ។ បើក្លាសេវាក្នុងទូរទឹកកក គឺរឹតតែឆ្ងាញ់ និងទំពារដើម្បីបំបាត់ទុក្ខកង្វល់ ។

៥-ផ្លែប៉ោម ៖ គ្រាន់តែធុំក្លិនផ្លែប៉ោម ក៏ធ្វើឱ្យអារម្មណ៍ស្រស់ថ្លាដែរ ការបរិភោគផ្លែប៉ោមនឹងទទួលបានរសជាតិផ្អែមឆ្ងាញ់ និងវីតាមីន C ។ វាថែមទាំងមានសារធាតុប្រឆាំងអុកស៊ីតកម្ម ដូចជា ៖ Flavonoids ដែលអាចប្រឆាំងការរលាក និងកាត់បន្ថយភាពតានតឹង ។ ក្រៅពីនេះ វាផ្តល់នូវជាតិសរសៃខ្ពស់ធ្វើឱ្យឆ្អែតបានយូរ និងមានកម្លាំងកំហែងពេញមួយថ្ងៃ ។

៦-ផ្លែប័រ ៖ ផ្លែប័រផ្តល់នូវសារធាតុចិញ្ចឹមយ៉ាងច្រើន និងបំបាត់ស្ត្រេស ។ ក្រៅពីមានរសជាតិឆ្ងាញ់ហើយ ផ្លែប័រសម្បូរជាតិខ្លាញ់ល្អបំប៉នប្រព័ន្ធប្រសាទ និងខួរក្បាល ព្រមទាំងសម្បូរវីតាមីន E ជួយនាំអុកស៊ីសែនចូលក្នុងកោសិកាផ្សេងៗរបស់រាងកាយ ។

៧-ផ្លែឪឡឹក ៖ ជាផ្លែឈើដ៏ពេញនិយមនៅតំបន់អាស៊ីអាគ្នេយ៍ ពីព្រោះសម្បូរទឹក, រសជាតិផ្អែមឆ្ងាញ់ ថែមទាំងអាចបរិភោគគ្រប់រដូវកាល ។ លើសពីនេះ ឪឡឹកក៏អាចជួយកាត់បន្ថយភាពតានតឹង, កាត់បន្ថយកម្រិតសម្ពាធឈាម, កាត់បន្ថយការនឿយហត់អស់កម្លាំង និងជួយបញ្ចុះកំដៅក្នុងខ្លួន ។

បើតប់ប្រមល់ ឬនឿយហត់អស់កម្លាំង យើងអាចទិញផ្លែឈើទាំងនេះមកបរិភោគបាន ហើយកុំភ្លេចផឹកទឹកឱ្យច្រើន, ធ្វើអ្វីដែលខ្លួនចូលចិត្ត និងសម្រាកគ្រប់គ្រាន់ ដើម្បីឱ្យរាងកាយទទួលបានថាមពលយ៉ាងរហ័ស ៕