កូរ៉េខាងត្បូង៖ Squid Game រដូវកាលទី ២ បានចាក់បញ្ចាំងនៅថ្ងៃទី ២៦ ខែធ្នូ ដែលមានចំនួន ៧ ភាគប៉ុន្តែរឿងនេះហាក់ទទួលបានមតិចម្រុះជាច្រើន។ ទោះបីជាមានការរិះ.គន់ថាមិនសូវល្អមើលដូចវគ្គ ១ ក៏ដោយ ក៏ Squid Game វគ្គ ២ នៅតែទាក់ទាញអ្នកទស្សនាយ៉ាងច្រើន ថែមទាំងទទួលបានភាពជោគជ័យខ្លាំងជាងវគ្គដំបូងទៀតផង ដោយបានបង្កើតកំណត់ត្រាថ្មីដែលមិនធ្លាប់មានពីមុនមកសម្រាប់ Netflix។

យោងតាមការចុះផ្សាយរបស់ទស្សនាវដ្តី Forbes បានឱ្យដឹងថា Squid Game រដូវកាលទី ២ បានជាប់ចំណាត់ថ្នាក់លេខ ១ ដំណាលគ្នាក្នុងប្រទេសទាំង ៩៣ នៅលើ Netflix គឺជារឿងដំបូងគេដែលមានអ្នកមើលច្រើនជាងគេបំផុត។ នេះមិនមែនជារឿងធម្មតាទេដែល Netflix សម្រេចបាននូវភាពអស្ចារ្យដ៏គួរឱ្យចាប់អារម្មណ៍ទាំងនេះ សូម្បីតែកម្មវិធីធំៗដែលធ្វើបានល្អនៅលើតារាងពិភពលោក ក៏មិនដែលបង្ហាញខ្លួននៅលេខរៀងទី ១ ដំណាលគ្នាដែរ ដោយសារតំបន់ខ្លះតែងតែចូលចិត្តខ្សែភាពយន្តខុសៗគ្នា។

ខណៈ Squid Game រដូវកាលទី ២ ស្រាប់តែទាក់ទាញអ្នកទស្សនាច្រើនមិនធ្លាប់មាន ដែលបង្ហាញថាវគ្គ ២ គឺទទួលបានភាពជោគជ័យខ្លាំងជាងវគ្គដំបូងទៅទៀត។ ទោះបីជាយ៉ាងនេះក្តីអ្នកប្រើប្រាស់អនឡាញកូរ៉េជាច្រើនបានប្រមូលផ្តុំគ្នានៅក្នុងវេទិកាអនឡាញដ៏ពេញនិយមមួយដើម្បីសម្តែងការរិះគន់ចំពោះរឿងនេះ។ មនុស្សជាច្រើនកំពុងត្អូញត្អែរអំពីការអភិវឌ្ឍន៍យឺត ខណៈដែលអ្នកផ្សេងទៀតបានយកបញ្ហាជាមួយការសម្តែងរបស់តួសម្តែងថាជារឿងខ្វះចន្លោះនិងមានភាពធុញទ្រាន់។ ទោះយ៉ាងណា ទន្ទឹមនឹងមតិអវិជ្ជមានចំពោះរដូវកាលទី២នេះ ទស្សនិកជនមួយចំនួនបានវាយតម្លៃដែរថាឈុតឆាកបែប ‘Deer Hunter’ មានភាពរំជើបរំជួលយ៉ាងខ្លាំងហើយរដូវកាលនេះគឺពោរពេញទៅដោយសកម្មភាពដែលជំរុញដោយប្រធានបទនៃការសងសឹក។

គួរបញ្ជាក់ផងដែរថា រដូវកាលដំបូងនៃ Squid Game បានចេញផ្សាយនៅឆ្នាំ២០២១ ហើយបានក្លាយជាបាតុភូតសកល ដោយទទួលបានពានរង្វាន់តារាសម្តែងឆ្នើម Lee Jung-jae និងអ្នកដឹកនាំរឿង Hwang Dong-hyuk ពានរង្វាន់អ្នកដឹកនាំឆ្នើមនៅឯពានរង្វាន់ Primetime Emmy Awards លើកទី ៧៤ ក្នុងឆ្នាំ២០២២។ ក្នុងរដូវកាលទី១គឺ រកប្រាក់ចំណូលបានខ្ពស់គុណនឹង ៤០ ដងនៃដើមទុនផលិតដោយបានចំណាយទឹកប្រាក់ក្នុងការផលិតចំនួន ២១.៤ លានដុល្លារ ខណៈរកចំណូលបានមកវិញជិត ៩០០ លានដុល្លារ៕

ប្រទេសកូរ៉េខាងត្បូង ៖ កាលពីថ្ងៃទី២៩ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា យន្តហោះរបស់ក្រុមហ៊ុនអាកាសចរណ៍ Jeju Air ជើងហោះហើរ 7C 2216 ដែលដឹកអ្នកដំណើរ និងបុគ្គលិកអាសចរណ៍ សរុប១៨១នាក់ ចាកចេញពីអាកាសយានដ្ឋានសុវណ្ណភូមិ ប្រទេសថៃ ទៅកាន់អាកាសយានដ្ឋានមូអាន់ (Muan) ប្រទេសកូរ៉េខាងត្បូង បានធ្លាក់ពីផ្លូវ Runway បណ្តាលឱ្យមនុស្សស្លា.ប់ រហូតដល់១៧៩នាក់ និងមានមនុស្សតែ២នាក់ប៉ុណ្ណោះនៅមានជីវិត ។

អតីតអាកាសយានិកកូរ៉េខាងត្បូងបាននិយាយពីមូលហេតុបណ្តាលឱ្យមានហេតុការណ៍សោកនាដកម្មនេះថា គឺមកពីផ្លូវ Runway មានចម្ងាយខ្លីត្រឹមតែ២,៨០០ម៉ែត្រ ហើយយន្តហោះមានបញ្ហាកង់មុខ កង់ក្រោយ និងប្រព័ន្ធហ្វ្រាំង ។ អតីតអាកាសយានិកបានណែនាំឱ្យអ្នកដំណើរប្រយ័ត្នគ្រោះថ្នាក់ដោយសារការធ្វើដំណើរតាមយន្តហោះចុះចតនៅអាកាសយានដ្ឋានមាន Runway ខ្លី ។

យន្តហោះនេះមានបុគ្គលិកអាកាសចរណ៍៦នាក់ និងអ្នកដំណើរ១៧៥នាក់ ក្នុងនោះអ្នកដំណើរកូរ៉េខាងត្បូង ១៧៣នាក់ និងថៃ ២នាក់ បានធ្លាក់ពី Runway ក្នុងអាកាសយានដ្ឋានអន្តរជាតិមូអាន់ ខេត្តឆុលឡាខាងត្បូង ដែលនៅឆ្ងាយពីទីក្រុងសេអ៊ូល ទៅភាគនិរតីប្រមាណ២៨៨គីឡូម៉ែត្រ និងទៅបុករបងបណ្តាលឱ្យចេញអណ្តាតភ្លើងយ៉ាងឆាប់រហ័ស ។

Runway ក្នុងអាកាសយានដ្ឋានមូអាន់ មានចម្ងាយខ្លីបំផុត ទើបអាកាសយានិកប្រើជំនាញខ្ពស់ដើម្បីចុះចតយន្តហោះ បើមានបញ្ហាកង់មុខ ឬប្រព័ន្ធហ្វ្រាំងនៅបរិវេណស្លាបយន្តហោះ គឺវាកាន់តែធ្វើឱ្យអាកាសយានិកពិបាកថែមទៀត ដូចជា ៖ ពុំអាចទម្លាក់ចុះកង់មុខ និងកង់ក្រោយបាន ។ ហេតុនេះ អ្នកដំណើរត្រូវជិះយន្តហោះចុះនៅ Runway ខ្លី គួរជ្រើសរើសក្រុមហ៊ុនអាកាសចរណ៍ដែលមានការហោះហើរទៀងទាត់ទៅអាកាសយានដ្ឋាននោះ ពីព្រោះក្រុមហ៊ុននឹងជ្រើសរើសអាកាសយានិកមានជំនាញចុះចតនៅ Runway ខ្លី ។ នេះបើតាមការអះអាងរបស់អ្នកជំនាញផ្នែកយន្តហោះ ។

រីឯភ្នាក់ងារជួយសង្គ្រោះបញ្ជាក់ថា យន្តហោះព្យាយាមចុះចតជាបន្ទាន់ដោយសារប្រព័ន្ធចុះចតមានបញ្ហា ប៉ុន្តែយន្តហោះពុំអាចបន្ថយល្បឿនបាន ទើបធ្លាក់ពី Runway ហើយអាចមកពីយន្តហោះបុកសត្វស្លាបផងដែរ ។ ពួកគេបានជួយអ្នកដំណើរប្រុសម្នាក់ និងស្ត្រីម្នាក់ចេញពីកន្ទុយយន្តហោះ ។ វាជាហេតុការណ៍សោកនាដកម្មដ៏ធ្ងន់ធ្ងរបំផុតនៅកូរ៉េខាងត្បូង តាំងពីយន្តហោះ Korean Air ធ្លាក់នៅកោះកួម ក្នុងឆ្នាំ១៩៩៧ បណ្តាលឱ្យអ្នកដំណើរស្លាប់ជាង២០០នាក់ ។

មេដឹកនាំកូរ៉េខាងត្បូងបានប្រកាសកាន់ទុក្ខ ចំនួន៧ថ្ងៃ សម្រាប់យន្តហោះដឹកអ្នកដំណើរ Jeju Air ជួបគ្រោះថ្នាក់បណ្តាលឱ្យមនុស្សស្លា.ប់ ចំនួន ១៧៩នាក់ និងចាត់ទុកថា គឺជាការបាត់បង់ជីវិតមនុស្សច្រើនបំផុតក្នុងរយៈពេលច្រើនឆ្នាំមកនេះ ៕

Olivia Hussey គឺជាតួឯកស្រីដ៏ល្បីល្បាញតាំងពីឆ្នាំ ១៩៦៨ ក្នុងរឿង “Romeo and Juliet” ដែលជារឿងមួយល្បីកក្រើកបស្ចឹមប្រទេសរហូតដល់ទ្វីបអាស៊ីយើង។ រឿងនេះក៏ធ្លាប់បកប្រែកែសម្រួលដោយសាស្ត្រាចារ្យ ហង្ស ធុនហាក់ មកជាភាសាខ្មែរផងដែរដោយដាក់ចំណងជើងថា “រ៉ូមេអូ និងស៊ុលីយ៉េត”។ ទោះជាយ៉ាងណាកាលពីថ្ងៃទី២៧ ខែធ្នូថ្មីៗនេះ តួឯកស្រី Olivia Hussey បានទទួលមរណភាពហើយនៅជន្មាយុ ៧៣ ឆ្នាំដោយសារជំងឺមហារីក ដែលដំណឹងនេះបានធ្វើឱ្យអ្នកគាំទ្រជាច្រើនជុំវិញពិភពលោកភ្ញាក់ផ្អើល និងសោកស្តាយជាខ្លាំង។

Olivia Hussey កើតនៅឆ្នាំ ១៩៥១ នៅប្រទេសអាហ្សង់ទីន និងធំធាត់នៅប្រទេសអង់គ្លេសគឺជាតារាស្រីដែលបានបង្កើតស្នាដៃអស្ចារ្យជាច្រើន ត្រូវបានគេចាត់ទុកថាជាសិល្បករឈានមុខគេរបស់ពិភពលោក។ គាត់បានសិក្សាសិល្បៈតាំងពីក្មេង និងសម្ដែងរឿងតាំងពីអាយុ ១៣ ឆ្នាំមកម្លេះ ដោយបានបង្ហាញខ្លួនជាលើកដំបូងនៅក្នុងរឿង The Prime of Miss Jean Brodie Hussey។ ហើយបន្ទាប់មកគាត់ក៏ត្រូវបានអញ្ជើញឱ្យចូលរួមក្នុងខ្សែភាពយន្ត Romeo and Juliet ក្នុងនាមជាតួឯកស្រីផងដែរ។

បន្ទាប់ពីខ្សែភាពយន្តនេះជោគជ័យ Olivia Hussey ក៏បានក្លាយជាតារាដ៏កំពូលរបស់ចក្រភពអង់គ្លេស និងជាតារាល្បីម្នាក់នៅក្នុងពិភពហូលីវូដនៃសតវត្សទី ២០ និងជាសហតារា Leonard Whiting ដែលបានទទួលការតែងតាំងសម្រាប់ពានរង្វាន់ Globe Golden ក្នុងឆ្នាំ ១៩៦៩។ ខណៈពេលដែលខ្សែភាពយន្ត Zeffirelli ដែលលោកស្រីសម្តែងក៏ទទួលបានពានរង្វាន់អូស្ការចំនួន ៤ រួមមាន៖ Best Picture និង Best Director ទៀតផង។ លើសពីនេះលោកស្រី Olivia Hussey ក៏បានសម្តែងក្នុងរឿង All the Right Noises (១៩៧១) និង The Summertime Killer (១៩៧២) រួមទាំងខ្សែភាពយន្តភ័យរន្ធត់ Black Christmas (១៩៧៤) ក៏ដូចជាចូលរួមសម្តែងក្នុងខ្សែភាពយន្តល្បីៗជាច្រើនទៀតផងដែរ។

ហេតុនេះហើយតាំងពីកុមារភាពរហូតដល់វ័យចំណាស់លោកស្រីគឺទទួលបានភាពជោគជ័យខ្លាំងណាស់ និងបានបង្កើតស្នាដៃអស្ចារ្យជាច្រើនដោយសារភាពយន្តដែលគាត់សម្តែងសុទ្ធតែឈ្នះពានទាំងអស់។ ទោះជាយ៉ាងណាក្នុងរយៈពេលប៉ុន្មានឆ្នាំថ្មីៗនេះលោកស្រី Olivia Hussey ក៏បានធ្លាក់ខ្លួនឈឺដោយសារជំងឺមហារីកសុដន់។ ដូច្នេះហើយការចាកចេញរបស់តួឯកស្រីដ៏ល្បី Olivia Hussey គឺជាការបាត់បង់ធនធានមនុស្សដ៏សំខាន់មួយសម្រាប់ឧស្សាហកម្មភាពយន្តហូលីវូត ព្រោះកន្លងមកគាត់ត្រូវបានគេចាត់ទុកថាជាសិល្បករឈានមុខគេរបស់ពិភពលោក និងជាតារាសម្តែងម្នាក់ដែលជោគជ័យខ្លាំងបំផុតក្នុងអាជីពសិល្បៈ៕

នាព្រឹកថ្ងៃទី ២៨ ខែធ្នូ ឆ្នាំ ២០២៤ នេះ យោងតាមការចុះផ្សាយរបស់នាយកដ្ឋានប្រយុទ្ធនឹងជំងឺឆ្លង CDC បានឲ្យដឹងថា ប្រទេសចិនបាននិងកំពុងប្រយុទ្ធប្រឆាំងនឹងការបង្កឡើងនៃមេរោ.គ human metapneumovirus (HMPV) ដែលមានរោគសញ្ញាស្រដៀងទៅនឹងជំងឺផ្តាសាយធំ និងកូវីដ ១៩។

យោងតាមការបញ្ជាក់ពីវេជ្ជបណ្ឌិត Chen Chih-jung នៃមន្ទីរពេទ្យ Linkou Chang Gung Memorial Hospital បាននិយាយនៅក្នុងបទសម្ភាសន៍មួយកាលពីថ្ងៃព្រហស្បតិ៍ថា hMPV គឺស្រដៀងទៅនឹងមេរោគផ្លូវដង្ហើម RSV (ជាមេរោគបង្កជំងឺផ្លូវដង្ហើមដែរ) ដែលភាគច្រើនឆ្លងដល់កុមារអាយុក្រោម ២ ឆ្នាំ ខណៈដែល hMPV មាននិន្នាការឆ្លងកុមារធំ។

លោកវេជ្ជបណ្ឌិត បានពន្យល់ទៀតថា កុមារខ្លះដែលឆ្លងមេរោគអាចតម្រូវឱ្យចូលមន្ទីរពេទ្យ ប៉ុន្តែជំងឺនេះមិនសូវធ្ងន់ធ្ងរដូចជំងឺគ្រុនផ្តាសាយធំទេ ហើយកុមារភាគច្រើនបានជាសះស្បើយឡើងវិញ។

សូមជម្រាបថាក្នុងរដូវរងារនេះ អ្នកមានរោគផ្តាសាយ និងរលាកផ្លូវដង្ហើម គឺភាគច្រើនបង្កឡើងដោយមេរោគផ្តាសាយធំ Influenza ។ ដូច្នេះ ដើម្បីបង្ការចម្លងមេរោគផ្តាសាយ និងមេរោគផ្លូវដង្ហើមផ្សេងៗ សូមពាក់ម៉ាស់ រក្សាគម្លាត ឧស្សាហ៏លាងដៃញឹកញប់ ចៀសវាងកន្លែងមានមនុស្សច្រើន ដើម្បីកាត់បន្ថយការឆ្លងរាលដាល។ សម្រាប់ព័ត៌មានបន្ថែមសូមទាក់ទងលេខទូរស័ព្ទ ១១៥៕

ថ្មីៗនេះ កាសែតវៀតណាមបានចុះផ្សាយថា ប្រទេសខ្លួនក្លាយជាគោលដៅដ៏ពេញនិយម សម្រាប់ជនបរទេសមកប្រារព្ធពិធីបុណ្យឆ្លងឆ្នាំសកល ២០២៥ ដែលកើនឡើង ៣០ភាគរយ បើធៀបនឹងឆ្នាំមុន។

ការស្ទង់មតិពីគេហទំព័រ Agoda បានបង្ហាញថា ភ្ញៀវទេសចរភាគច្រើន ដែលមកពីប្រទេសកូរ៉េខាងត្បូង ជប៉ុន ថៃ តៃវ៉ាន់ និងសហរដ្ឋអាមេរិក នឹងជ្រើសរើសប្រទេសវៀតណាមសម្រាប់ដំណើរកម្សាន្តនាថ្ងៃឆ្លងឆ្នាំដ៏ឆាប់ខាងមុខនេះ។

ជាមួយគ្នានោះ ទីក្រុងហូជីមិញឈរលើលំដាប់លេខរៀងទី១ ដែលមានអ្នកស្វែងរកច្រើនជាងគេបំផុត ព្រោះថានឹងការតំាងពិពណ៌ និងអុជកាំជ្រួញ Countdown នៅតាមដងទន្លេ Saigon ដ៏ល្បី កក្រើករាត្រីថ្ងៃឆ្លងឆ្នាំ។

បន្ទាប់ពីទីក្រុងហូជីមិញ កោះ Phu Quoc ឬកោះត្រល់ ឈរលើលំដាប់លេខរៀង ២ មានភ្ញៀវទេសចរស្វែងរកនិងកក់ទុកច្រើនដូចគ្នាដែរ។ ក្រៅពីនេះ តំបន់ដ៏ពេញនិយម ៣ កន្លែងទៀត សម្រាប់ព្រឹត្តិការណ៍ឆ្លងឆ្នាំនៅវៀតណាម គឺរួមមាន Da Nang, Ha Noi, និង Nha Trang ខណៈភ្ញៀវទេសចរកំពុងតែកក់ទុកជាបន្តបន្ទាប់។

សូមសម្រាបថា ក្រៅពីប្រទេសវៀតណាម, ប្រទេសអាស៊ីផ្សេងទៀត ដូចជា ទីក្រុងបាងកក ប្រទេសថៃ, តៃប៉ិ ប្រទេសតៃវ៉ាន់, តូក្យូ ប្រទេសជប៉ុន, សិង្ហបុរី ,និងហុងកុង ក៏ជាគោលដៅទេសចរណ៍កំពូល អំឡុងព្រឹត្តិការណ៍ឆ្លងឆ្នាំសកល ឆ្នាំ២០២៥ នេះផងដែរ៕