ជឿជាក់ថាប្រិយមិត្តមួយចំនួនប្រាកដជាបានជ្រាបរួចមកហើយ កុមារាដែលពោរពេញទៅដោយទេពកោសល្យមួយរូប កុសល ហុងហ្វូ ដែលនាពេលកន្លងមកនេះ តែងដាក់បង្ហោះនូវបទចម្រៀងរ៉េបនៅលើបណ្តាញសង្គមជាហូរហែរ ខណៈក៏ទទួលបាននូវសន្ទុះនៃការគាំទ្រយ៉ាងច្រើនផុសផុល។
នាថ្ងៃទីថ្ងៃទី ២៧ ខែធ្នូ ឆ្នាំ២០២៤ នេះ នៅលើយូធូបផ្លូវការរបស់កុមារារូបនេះបានបង្ហោះចម្រៀងថ្មីមួយបទទៀត ក្រោមចំណងជើងថា «កម្ពុជាមាតុភូមិខ្ញុំ» ដើម្បីជាការសាទរកម្ពុជា និងស្វាមន៍ឆ្នាំថ្មី។ មិនខុសពីចម្រៀងមុនៗឡើយ, «កម្ពុជាមាតុភូមិខ្ញុំ» គឺជាបទចម្រៀងរ៉េប ដោយភ្ជាប់មកជាមួយនឹងឃ្លាកាព្យឃ្លោងនិងទឹកដមសំឡេងយ៉ាងពីរោះរណ្តំ។ ចំពោះចង្វាក់ភ្លេងនៃបទនេះវិញ គឺជាការលាយបញ្ចូលគ្នាយ៉ាងល្អរវាងភ្លេងបុរាណខ្មែរនិងតន្ត្រីសម័យ ខណៈដែលចម្រៀងក៏បានបង្កប់នូវអត្ថន័យយ៉ាងជ្រាលជ្រៅ ដែលពិណ៌នាអំពីប្រទេសកម្ពុជាដ៏រុងរឿងនិងរីកចម្រើន។
បើក្រឡេកទៅកាន់ MV នៃចម្រៀងមួយបទនេះវិញក៏រឹតតែអស្ចារ្យទៅទៀត ដែលឆ្លុះបញ្ចាំងពីទំនើបកម្មនៃប្រទេសកម្ពុជា (ការអភិវឌ្ឍទីក្រុង) ដែលផ្សារភ្ជាប់ជាមួយសម្បត្តិបុរាណ។ តាមរយៈវីដេអូ បានរំលេចទៅដោយចំណុចពិសេសៗជាច្រើនដែលទាក់ទងនឹងសិល្បៈ វប្បធម៌ និងអរិយធម៌ដ៏ចំណាស់របស់ខ្មែរ រួមមានទាំងសំណង់ប្រាសាទបុរាណ ព្រះបរមរាជវាំង ចម្លាក់ របាំ ឧបករណ៍ភ្លេងខ្មែរជាដើម។ 
កុមារាហុងហ្វូ ដែលស្ថិតនៅក្នុងឈុតសម្លៀកបំពាក់ប្រពៃណីខ្មែរយ៉ាងស្រស់សង្ហា ច្រៀងដោយមោទនភាពរៀបរាប់អំពីទឹកដីអច្ឆរិយៈខ្មែរ ដែលនាំឲ្យមហាជនគ្រប់ៗរូបរំភើបចិត្តនិងកោតសរសើរព្រោងព្រាត៕
